Dili- Ekipa Forsa Tarefas Konjunta halao sosializasaun ba Estudante Eskola Sekundaria Jeral 12 Novembru oinsa atu kontribui ba paz no estabilidade durante vizita Santo Padre Papa Francisco mai Timor-Leste.
Xefe Departamentu Polisiamentu Komunitaria Nasional Superintendente Assistente Polisia Graciano Moniz Amaral hateten sosializasaun ne’e hanesan atividade ne’ebe planea tia ona hamutuk ho Forsa Tarefas Konjuntu tuir rezolusaun Numeru 22/2024 loron 10 fulan juñu hodi prepara planu operasaun ba vizita Sua Santidade Papa nian, Nia hato’o Asuntu ne’we iha Eskola 12 Novembru Becora Dili, tersa (13/08).
Nia hatutan Sosializasaun ne’e ho objetivu halibur estudante sira hodi habela rmos informasaun balu liga ba preparasaun ne’ebe maka Forsa Tarefas Konjuntu halo hamutuk ho entidades oi-oin autoridade hotu-hotu iha timor hodi tau hamutuk ita nia hanoin oinsa ita prepara situasaun no kondisaun ba vizita Santo Padre nian.
Estudante sira mos hola parte iha sosiedade entaun sira nia papel maka estuda, badinas mai eskola no evita sira nia aan iha hahalok violensia, ho situasaun sira hanesan ne’e maka indiretamente sira kontribui ona ba situasaun estavel hodi promove paz iha ita nia rain.
“Ita hakarak atu ema hotu-hotu tenke kontribui liu husi serbisu hotu-hotu ne’ebe maka sira halo hodi Evita sira nia aan atu partisipa iha kualker hahalok ne’ebe maka perturba situasaun seguransa, ita tenke garante situasaun ne’ebe diak liu-liu situasaun seguransa iha ita nia rai laran, ita tenke prepara duni situasaun ida ne’e tanba vizita papa nian sei realiza iha loron 09-11 setembru, entaun ita hotu nia responsabilidade atu kria situasaun ne’ebe diak, bolu ema hotu-hotu atu tau atensaun, hanoin oinsa promove situasaun seguransa ne’ebe estavel no harmonia atu nune’e vizita Papa nian bele lao diak no atividade hotu-hotu bele realiza ho diak,” dehan Komandante Graciano.
Nia argumenta sosilizasaun ne’e halao ona iha Eskola 5 de Maiu, ohin iha Eskola 12 Novembru no sei kontinua ba eskola 28 Novembru no tuir mai sei halao iha eskola sira seluk iha Becora. Hau halo ona kordenasaun ho Komandante munisipiu Dili, Komandante Eskuadra Becora ho nia estrutura no OPS sira hodi halo kordenasaun ho eskola sira ne’ebe ita sei vizita hodi halo sensibilizasaun.
Sensibilizasaun hanesan halao mos iha loron Domingo-domingo ba grupu kategoria sira, voluntariu no Eskuteru sira iha parte Komoro, ekontru hanesan ne’e halao mos ba Autoridade sira, Entidade sira, NGO sira, parte Igreja mos halao sira nia papel fahe informasaun liga ba situasaun seguransa rai laran no vizita Papa nian atu nune’e vizita ne’e lao ho diak.
Iha okajiaun ne’e Diretor eskola 12 Novembru Marcolino Menezes Babo hateten deziminasaun informasaun sira hanesan ohin ba estudante sira ne’e inportante teb-tebes, tanba ita hotu hatene katak estudante sira ne’e foin sae dalaruma sira nia karakter hanesan joven sira lakon kontrolu, nune’e liu husi informasaun sira hanesan ne’e ita bele hanoin katak sira mos bele kompriende konaba situasaun sira hanesan ne’e no sira mos bele kontrola sira nia aan iha situasaun durante vizita Papa nian.
Nia hatutan iha vizita Amu Papa nia ita presiza duni situasaun ida ne’ebe maka seguru hodi hatudu ba mundu katak ita nia dignidade nasaun nian inportante liu tanba ne’e ita tenke hatudu situasaun hirak ne’ebe hakmatek, seguru hodi hatudu imajen nasaun nian ba nasaun seluk.
Iha Sosializasaun ne’e Komandante Tranzitu Nasional fahe informasaun konaba Disiplina utiliza via publiku, disiplina utiliza veiukulu (motor no kareta), oinsa utiliza Zebra Cross, Respeita Sinais Tranzitu no seluktan. Komandante Operasaun munisipiu Dili Inspetor Xefe Polisia Luis Amaral husu estudante sira atu kontribui no ajuda parte seguransa hodi kria estabilidade iha munisipiu Dili, no Kapitaun Jaime dos Santos husi F-FDTL husu estudante sira atu hatutuan informasaun ba komunidade sira konaba regras vizita Santo Padre nian, Estudante hirak ne’ebe partisipa hamutuk kuaje nain 500. Media PNTL
