Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa lori instituisaun nian naran hato’o deskulpa ba Organizasaun Mundial Saúde (OMS) relasiona ho deklarasaun falta kuidadu husi ofisias PNTL nian na’in ida iha loron hira liu ba.
Liu husi konferensia imprensa Komisariu Polísia Faustino hato’o ba públiku liga ba aktividade balun ne’ebe hala’o iha loron rua liu ba (23/03), PNTL servisu hamutuk ho Ministeriu Saúde (MS) no OMS halo Sensibilizasaun kona-ba COVID-19 iha Kuartél Komandu Jerál PNTL nian. Durante aktividade sensibilizasaun no aprezentasaun ida ne’e, iha mós faze ida kona-ba husu perguntas no pedidu esklaresimentu balun.
“Loos duni iha ami nia ofisial superior ida husi Komandu PNTL hato’o perguntas, sugestaun ne’ebe ikus mai mós hafoin enkontru ne’e remata, ami nia ofisial ne’e halo konferensia ida ba media hodi repete pedidu ne’ebe hato’o durante enkontru; hare’e ba situasaun sira ohin loron hanesan mós prezensa ONU nian iha Timor-Leste tantu organizasaun internasional sira no liga ba publikasaun ne’ebe ita nia media fó sai, maka Komandu PNTL sente no hanoin katak importante atu bele haloos fila fali situasaun sira ne’ebe fó sai ona públiku”, afirma Komandante Jerál ne’e.
Komisariu Polísia Faustino subliña katak tanba iha koordenasaun ne’ebe diak ho PNTL, maka OMS no MS hala’o aktividade (Sensibilizasaun-red) iha loron rua liu ba ne’e. Ho akontesimentu ka publikasaun ne’ebe iha, Komandu PNTL hadia no haloos hodi husu kooperasaun OMS nafatin ho PNTL ba asuntu interese liu-liu kona-ba kombate COVID-19 iha Timor-Leste.
“Komandu mós nota no hatene katak husi publikasaun ne’ebe iha bele hamosu mós efeitu seluk, tanba ne’e Komandu PNTL husu ba membru tomak atu garante paz no estabilidade ba ema hotu-hotu iha Timor, laos ba Timor oan sira deit maibé ba ema hotu hanesan ita nia diplomata sira, sidadaun estrangeiru ne’ebe hela iha ne’e tantu mós pesoal ou staff husi agensia internasional hanesan ONU nian ne’ebe existe iha ita nia rai”, apela Komisariu Polísia ne’e.
Iha oportunidade diak ne’e, Komandante Jerál lori instituisaun PNTL nia naran hato’o deskulpa ba OMS, karik iha deklarasaun ou perguntas balun ne’ebe maka ofisial PNTL nian hato’o iha momentu ne’eba (23/03) ladun diak dala ida tan ba reprezentante OMS nian iha ne’e, hato’o deskulpa no fiar katak ita sei servisu hamutuk nafatin, iha koordenasaun ne’ebe diak ba oin oinsa ita hamutuk ba interese povu no nasaun ninian. Media PNTL
