Dili, Komandu Polísia Nasional Timor-Leste (PNTL) kinta-feira ne’e (10/05) hala’o serimonia deslokasaun membru PNTL sira ne’ebe maka sei fó apoiu seguransa ba iha Eleisaun Antisipada Parlamentar 2018 iha teritoriu Timor laran tomak.
Komandante Jerál PNTL Komisariu Polísia Julio da Costa Hornay ne’ebe dirige serimonia deslokasaun ne’ebe hala’o iha resintu Kuartél Jerál PNTL ne’e hateten, ohin loron ida importante ita hala’o serimonia ida ne’e, apoiu forsa Polísia husi Kuartél PNTL ba apoiu munisipiu 13 hodi asegura prosesu eleisaun antisipada ne’ebe sei hala’o iha loron 12 Maio 2018.
“Ita bo’ot sira sei koloka iha sentru votasaun sira tuir programa ne’ebe Komandu munisipiu prepara ona ba ita bo’ot sira, to’o iha ne’eba Komandu Munisipiu sira maka iha responsabilidade másimu hodi hare’e, koloka, kontrola kona-ba servisu sira ne’ebe maka ita bo’ot sira sei desentende iha sentru votasaun iha munisipiu 13”, hateten Komandante Jerál PNTL ne’e.
Komisariu Polísia Julio da Costa Hornay akresenta liu tan katak tanba ne’e husu ba membru tomak ne’ebe hala’o kna’ar ida ne’e atu hala’o kna’ar ida ne’e ho responsabilidade másimu tuir misaun ne’ebe ita iha, além de ida ne’e hatudu nafatin ita nia disiplina servisu, bainhira ita hala’o kan’ar iha servisu iha sentru votasaun ne’eba.
“Hatudu ita nia neutralidade, imparsialidade iha servisu laran ida ne’e maka importante, durante loron 30 nia laran kampaña eleisaun ita asegura ho diak, ita kontinua nafatin to’o festa demokrasia ida ne’e determina, eleisaun, kontagen, anunsiu to’o ba iha formasaun oitavu governu konstitusional, ida ne’e maka Konstituisuan Repúblika fó mai ita atu ezerse no kompetensia ne’ebe ita iha, laiha buat seluk husi ne’e”, hatutan Komisariu Polísia ne’e.
Na’in ulun PNTL ne’e husu ba membru sira ne’ebe maka desloka ba munisipiu atu bele halo koordenasaun ho autoridade lokal iha munisipiu, parte Comissão Nacional Eleição (CNE), parte Sekretariadu Tékniku Administrasaun Eleitoral (STAE) no sira ne’ebe maka iha responsabilidade kona-ba eleisaun atu bele halo servisu ho diak to’o ba iha rohan.
Ba dala ikus, Komisariu ne’e apela ba membru tomak atu hala’o servisu ho diak, hatudu nafatin disiplina, responsabilidade, neutralidade no imparsialidade nu’udar forsa seguransa hanesan aparellu estadu atu bele hala’o misaun ida ne’e ho diak.
Partisipa iha serimonia deslokasun ne’e Komandante Jerál akompaña husi Segundu Komandante Jerál, Inspector Jerál, Komandante Administrasaun, Komandante Operasaun, Komandante Unidade, Komandante Munisipiu, Ofisias Superiores, Ofisias Subalternu, Sarjentu no ajente PNTL.
Media PNTL.
