Dili- Polisia Nasional Timor-Leste (PNTL) sei garante estabilidade seguransa durante serimonia Investidura Prezidente Republika iha Tasi-Tolu no komemorasaun Restaurasaun Independensia ba dala 20 iha Palasiu Prezidente Aitarak laran Dili.
Porta Voz Komandu PNTL Superintendente Xefe Armando Monteiro hateten Autoridade Seguransa neébe maka destakadu iha estrada publiku sei orienta movimentu komunidade no transporte ba iha fatin serimonia, Nia hatoó asuntu neé liu husi komferensia emprensa iha Kuartel Jeral PNTL Kaikoli Dili, kinta (18/05).
“Komandu PNTL apela ba sidadaun hotu iha kapital Dili nomos sira neébe mai husi munisipiu atu partisipa iha serimonia investidura Prezidente eleitu neébe maka sei halao iha loron 19/05 kalan nomos komemorasaun loron restaurasaun independensia ba dala 20 iha loron 20 maiu atu sai nudar uma nain diak ba ita nia bainaka sira,” Nia dehan.
PNTL sei fasilita komunidade sira neébe halo viajen tantu mos ba partisipa serimonia iha Tasi-Tolu Ami husu komunidade neébe halo movimentu iha estrada publiku hahu husi kapital toó baliza munisipiu Liquica nomos movimentu husi Liquica atu mai kapital Dili atu respeitu regras no tuir orientasaun husi Autoridade seguransa nébe maka destaka iha estrada orienta ita iha dalan no area neébe maka presiza liu hodi nuneé bele fo espasu ba ita nia komunidade no bainaka sira neébe maka partisipa iha serimonia Investidura iha Tasi-Tolu atu tama no sai ho livre.
Alende neé iha loron 20 maiu serimonia Restaurasaun Independensia iha Palasiu Prezidensial Aitarak Laran hanesan bai-bain dalan husi diresaun Kampun Alor transporte hotu ita sei haruka tun ba tasi ibun nuneé mos diresaun Palapasu atu ba Aitarak Laran sei tun ba tasi ibun. Entretantu Husi diresaun Bairo-Pite atu ba sidade laran lao tuir diresaun dalan normal mai iha bebora nomos Kolmera hodi nuneé bele fasilita no labele halo engrafamentu durante serimonia restaurasaun independensia 20 de maiu lao.
Kestiona konaba karik iha planu blokeia movimentu transporte publiku iha estrada diresaun Rotunda Komoro ba Tasi-Tolu Porta Voz komandu PNTL neé haktuir situasaun depende ba partisipasaun volume movimenetu komunidade nian tanba neé PNTL la inpede movimentu publiku nuneé publiku mos bele iha komprensaun hodi husu autoridade seguransa sira neébe maka destakadu iha dalan atu orenta sira tuir dalan neébe maka bele liu no labele liu.
Iha biban neé Komandu PNTL mos atualija estatistika kriminalidade, Asidente no Reseta neébe PNTL rekolla iha periodu fulan janeiru toó abril 2022.
Asidente Trafegu hamutuk 636 kompostu husi kanek kmaan 679, kanek todan 144 no rezulta vitima nain 22 maka lakon vida. Media PNTL
