2014_04_30_Graduasaun PNTL foun-100-100-6-84

Sentru Formasaun Polísia

Objetivu

Polítika ida-ne’e iha objetivu atu kria padraun kualidade aas nian ida-ne’ebé uniformizadu hodi treina ofisiál sira reforsu lei nian iha Timor-Leste, no estabelesimentu sistema unifikadu formasaun nian no abordajen ba formasaun mak tau matan ba objetivu no prioridade sira ne’ebé estabelese husi Sentru Formasaun Polísia no governu  jeralmente.

Baze Legál

Sentru Formasaun Polísia (SFP) nia mandatu bazeia ba Konstituisaun RDTL no Lei Orgánika (Dekretu Lei 2008).

Funsaun

Sentru Formasaun Polísia sei sai hanesan Eskola PNTL ne’ebé espesifikamente foka liu ba formasaun morál, kulturál, fíziku, no tékniku/profisionál ba ofisiál, sarjentu, no ajente sira no mós ba atualizasaun, espesializasaun no valorizasaun ba sira-nia koñesimentu.

Sentru Formasaun Polísia sei dirije husi Xefe Superintendente ida, ne’ebé nomeia husi instrusaun Komandante Jerál nian. Sentru Formasaun Polísia sei responsavel ba konsepsaun sistema ensinu ba PNTL ne’ebé inklui kursu formasaun, kursu espesialista, kursu resiklajen, no kursu formasaun ba promosaun nian kona-ba diviza no postu oioin.

Sentru Formasaun Polísia sei responsabiliza atu organiza no hato’o kursu formasaun ne’ebé refere iha parágrafu uluk, no ba efeitu ida-ne’e, tenke dezenvolve  kurríkulu no programa respetivu sira. Nu’udar devér Sentru Formasaun Polísia nian atu propoin no prepara planu formasaun anuál hodi konsidera objetivu sira no nesesidade jerál no espesífiku unidade sira PNTL nian.

Sentru Formasaun sei koordena ho Ministériu Justisa iha formulasaun ba programa formasaun nian kona-ba investigasaun kriminál. Sentru Formasaun Polísia tenke iha ninia regulamentu internu rasik, ne’ebé sei aprova husi Konsellu Ministru, no tenke define estrutura kuadru ensinu, kurríkulu, sertifikasaun ba programa formasaun no avaliasaun no mós validasaun.

Sentru Formasaun Polísia tenke halo relasaun ho Ministériu Edukasaun no Ministériu Administrasaun Estatál kona-ba kestaun sira-ne’ebé relasiona ho konteúdu kursu nian ne’ebé bele hetan akreditasaun sivíl.