Konkursu Públiku ba Admisaun Kursu Formasaun ba Ajente Polísia Nasionál Timor-Leste

Diskrisaun badak

Governu Konstitusionál Repúblika Demokrátika Timor-Leste ba Dahaat, liuhosi Sekretária Estadu Seguransa, hahú iha fulan-Marsu halo Konkursu Públiku ida hodi hetan admisaun Kursu ba Formasaun Ajente Polísia Nasionál Timor-Leste.

Konkursu Públiku ne’e fo ba kandidatu feto ho mane, ho totál vagas 520, fahe ba kursu terseiru konkursu no kuartu konkursu tuir númeru abitantes ne’ebé eziste iha distritu ho mínimu 15% hosi vaga ne’e loke ba feto sira .

Atu bele tama, kandidatu sira tenke prienxe kondisaun jerál admisaun nian ne’ebé inklui: nasionalidade sidadaun orijináriu Timor-Leste, klosan, iha domíniu pelumenus ida hosi lian ofisiál sira, tenke iha kualidade morál no hahalok sívika adekuada hodi fó dalan atu bá oin ho justisa, lealdade, integridade, onestidade no kompeténsia profisionál, atu bele hetan konfiansa no respeitu hosi komunidade no kontribui ba prestíjiu PNTL no instituisaun demokrátiku sira seluk.

Kandidatu tenki ho idade 18 no labele liu 23, iha data ne’ebé fo sai.  Altura ba feto mínimu 1,56 metrus no ba mane minimu 1,60 metrus, iha fíziku ne’ebe diak hodi halao servisu polísia nian no tenke iha abilitasaun akadémika mínima eskolaridade tinan 9 ka ekivalente.

Hafoin tuir verifikasaun ba rekízitu admisaun, selesaun kandidatu/a sira sei hala’o liuhosi provas neen mak hanesan tuir mai ne’e; Prova Dokumentál, Prova Médika, Prova Psikolójika, Entrevista Selesaun Profisionál, Prova Aptidaun Fízika, no husi prova sira ne’e ida-idak sei elimina kandidatu/a ne’ebe la prienxe kriteria.

Iha Prova Dokumentál, kandidatu sira tenki aprezenta sira nia dokumentus ba juri konkursu ho kondisaun di’ak, la foer, la modifika ou la falsifika, nune’e bele hodi konkore nafatin.

Prova Kulturál klasifika ba nível eskolaridade tinan 9 ka ekivale (SMP ka SMTP). Prova ida-ne’e sei iha forma eskríta no ho tipu eskolla múltipla, ho klasifikasaun tuir eskala pontu 0 to’o 100, no kandidatu sira ne’ebé hetan klasifikasaun menus pontu 60 sei hetan klasifikasaun la pasa.

Iha Prova Médika, kandidatu sira sei simu klasifikasaun pasa ou la pasa.  Karakterístika balu ne’ebé konsidera la pasa inklui; todan boot liu, isin-rua durante provas selesaun to’o data inísiu Kursu Formasaun, livre husi alkol, vitar iha isin, tatto no ulun molik (botak-red).

Prova Aptidaun Fízika sei klasifika iha pontu haat mak hanesan; haksoit leao, restok (tara-an), lao husi muru leten no fleksaun iha besi (ba kandidatu mane), ba kandidatu feto, bomba rai, lao muru leten no haksoit leao.

Kandidatu sira tenki halo hotu ezersísiu sira mak temi iha leten no hetan klasifikasaun pontus 60, kuandu la tuir kondisaun ne’ebe ezije sei koinsidera la pasa.

Klasifikasaun finál ba kandidatu sira sei foti hosi númeru boot to’o mai kraik hanesan formula tuir mai ne’e:

KF= (PK+PP+PAF) /3

Iha-ne’ebé:

KF = Klasifikasaun Final

PK = Klasifikasaun Prova Kulturál

PP = Klasifikasaun Prova Psikolójika

PAF = Klasifikasaun Prova Aptidaun Fízika

Informasaun kona aplikasaun konkursu nian bele hetan hosi Gabinete Atendimentu no Informasaun ba Kandidatu sira iha Sentru Formasaun Polísia (Rua dos Mártires da Pátria – Comoro – Díli), hosi númeru telemovel: 78348810 – 78350772 – 78350773, ne’ebé kandidatu sira bele liga ba hosi Segunda-Feira to’o Sesta-Feira, entre tuku 0800 no 1200 no 1400 to’o 1700. Bele mós hetan informasaun hosi Komandu Distritál no Eskuadra PNTL sira.