News

Dili, Komandu Polísia Nasional Timor-Leste (PNTL) to’o oras ne’e dadaun nafatin halo aproximasaun ho komunidade sira ne’ebe maka afetadu husi kontrusaun ba edifisiu foun Kuartél Jerál PNTL.

Diretór Planeamentu PNTL Superintendente Ludgerio Lay iha entrevista hateten konstrusaun ba edifisiu foun Kuartél Jerál liu husi prosesu ida ne’ebe naruk no esforsu husi Komandante Jerál sesante (aktual Ministru Interior), Komandante Jerál aktual, diretór Planeamentu sesante halo koordenasaun ho governu.

“Liu husi politika governu ninian agora dadaun hamutuk ho Komandu Jerál ohin loron tama ona nia prosesu atu bele komesa ona konstrusaun”, hateten Diretór Planeamentu PNTL.

Hatan kona-ba komunidade sira ne’ebe maka to’o agora ladauk hamamuk fatin, Superintendente Ludgerio Lay esplika Komandu liu husi diresaun planeamentu, diresaun Administrasaun no Polísia Komunitariu tenta ona halo aproximasaun ba komunidade no agora parte governu maka sei toma responsabilidade atu halo atuasaun ba kestaun ne’e.

“Agora dadaun Komandu esforsu hela no orsida sei halo enkontru preview no aban (20/04) sei halo site visit hafoin ida ne’e prosesu oinsa, ne’e kompetensia CNA nian”, salienta Superintendente Ludgerio Lay.

Ba komunidade sira ne’ebe maka lakohi kolabora atu hamamuk fatin refere, Komandu husu atu kolabora tanba ita hotu iha Lei nia okos no ida ne’e sai hanesan politika governu nian, nune’e hakarak ou lae ita hotu tenke koopera.

Media PNTL.

Dili- Komandu Polisia Nasional Timor-Leste (PNTL) evalua servisu seguransa ba Eleisaun Prezidensial ne’ebe maka halao iha fulan Marsu hodi prepara no hadia diak liutan iha Eleisaun Parlamentar.

Komandante Komandu Operasaun Superintendente Xefe Henrique da Costa hateten Rekursu Humanus limitadu, menus ekipamentu servisu hanesan Pistola, Stik, Borgol, Gas Air Mata, Ransel, Kappa Udan, Biti no transporte sai hanesan problema prinsipal ne’ebe maka PNTL infrenta iha terrenu, Nia hato’o asuntu ne’e hafoin partisipa enkontru iha Kuartel Jeral PNTL Kaikoli Dili Tersa (18/04).

Nia haktuirtan katak elende ne’e PNTL enfrentamos problema external maka hanesan Sekretariadu Tekniku Administrasaun Eleitoral (STAE) aluga kareta hodi tula material sensitivu maibe kareta nia kondisaun ladiak no labele ba sentru votasaun ne’ebe dook ho kondisaun Estrada aat.

Iha enkontru evaluasaun ne’e Komandu Operasaun no Komandante munisipiu ida-idak aprezenta situasaun no problema ne’ebe maka Komandu PNTL munisipiu ida-idak enfrenta ho oinsa maka buka solusaun hamutuk tuir kompetensia no kapasidade PNTL nian hodi prepara ba Eleisaun Parlamentu nune’e bele minimija problema no erru hirak ne’e labele akontesetan iha Eleisaun Parlamentar.

Kestiona konaba planu ESTAE atu aumenta sentru votasaun Komandante ne’e hateten planu ne’e fo inpaktu ba servisu Polisia nian maibe parte siguransa akompña no ajusta tuir programa governu nian ho rekursu humanus ne’ebe maka iha hodi koloka iha sentru votasaun hotu.

Antes ne’e governu aloka ona orsamentu $ milaun rua (2) atu sosa ekipamentu ba PNTL hodi asegura seguransa ba Eleisaun Jeral, ekipamentu hirak ne’e iha hela prosesu kompras no seidauk entrega ba PNTL ami hein katak ekipamentu hirak ne’e bele entrega ba PNTL antes Eleisaun Parlamentar nune’e PNTL bele uza hodi halo seguransa.

Enkontru evaluasaun Seguransa ba Eleisaun Prezidensial ne’e dirizi husi Komandante Jeral PNTL Komisariu Polisia Julio da Costa Hornay no partisipa husi Komandante PNTL munisipiu 13, Komandante Unidade, Xefe Servisu no Xefe Departamentu sira. Media PNTL

Dili, Polísia Nasional Timor-Leste (PNTL) durante semana Paskoa rejista asidente hamutuk 37 ne’ebe maka akontese iha teritoriu laran tomak.

Komandante Operasaun PNTL Superintendente Xefe Henrique da Costa iha segunda feira ne’e (17/04) hateten husi asidente hirak ne’ebe maka PNTL rejista laiha ema ida maka mate.

“Parte PNTL durante semana Paskoa nian, rejista asidente hamutuk 37, iha ema kanek kma’an no kanek todan hamutuk 41 maibé laiha ema mate”, tenik Komandante Operasaun PNTL.

Superintendente Xefe Henrique da Costa iha biban ne’e, apela ba komunidade sira atu bele minimiza asidente hirak ne’ebe maka sempre mosu, “Molok tama ba loron Paskoa, Komandu Jerál liu husi Komandante Jerál fó ona mensagem ba ema hotu ne’ebe halo viagem ba munisipiu, primeiru tenke hare’e uluk kondisaun transporte ninian no evita atu tula pasageiru liu kapasidade transporte nian”.

Aliende hare’e ba kondisaun no kapasidade transporte nian hodi halo viagem, wainhira lori kareta labele konsumu tua no wainhira sente kolen ou matan dukur presija para atu deskansa hodi kontinua halo viagem.

Media PNTL.

Dili, relasiona ho komemorasaun loron 20 Maio no serimonia tomada de posse ba Prezidente Repúblika Timor-Leste foun, Polísia Nasional Timor-Leste (PNTL) sei hatun ninia membru efetivu tomak hamutuk atus neen resin hodi halo seguransa ba iha serimomina refere.

Komandante Operasaun PNTL Superintendente Xefe Henrique da Costa hafoin partisipa iha enkontru semanal ba Media PNTL hateten, Komandu PNTL sei hatun membru tomak hodi fó apoio ba iha Komandu Munisipiu Dili nian ba festa Demokrasia 20 Maio no mós serimonia tomada de posse ba Prezidente Repúblika foun.

“Agora dadaun ita nia ekipa operasional halo hela komunikasaun no koordenasaun ho parte komisaun organizadora atu oinsa ita bele prepara seguransa ida ne’ebe adekuadu ba iha eventu ida ne’e”, tenik Komandante Operasaun PNTL.

Superintendente Xefe Henrique da Costa akresenta tan katak forsa ne’ebe maka atu fó seguransa ba iha eventu refere maka Komandu PNTL munisipiu Dili no sei hetan apoio husi Unidade Espesial Polísia (UEP), Unidade Polísia Marítima (UPM), Servisu Informasaun Polísia (SIP) no mós ekipa Operasaun Komandu Jerál hodi responde seguransa iha fatin eventu nian.

“Ita espera katak iha fim fulan Abril, ita nia ordem operasaun ita prepara feitu ona atu nune’e bele fó ba iha Komandu munisipiu Dili no ba Unidade sira ne’ebe maka atu fó apoio seguransa, atu nune’e sira bele ezerse sira nia kna’ar iha loron 20 Maio no mós serimonia tomada de posse ba Prezidente foun”, salienta Superintendente Xefe Henrique da Costa.

Membrus PNTL Sei Partisipa Iha Forsa Parada 20 Maio

Iha fatin hanesan Komandante Operasaun PNTL ne’e afirma katak, aliende fó seguransa ba iha serimonia 20 Maio, membru efetivu PNTL mós sei partisipa iha Forsa Parada iha loron refere.

“To’o agora ita nia preparasaun bele hateten dehan atu remata, tanba ita halo rekoñesimentu de terenu ba iha fatin ne’ebe atu sai hanesan fatin serimonia, espera iha fim fulan Abril ne’e ita bele hasai ona ordem operasaun ba membru sira hodi hala’o servisu”, hateten Superintendente Xefe Henrique da Costa.

Media PNTL.

Komferensia Emprensa

Komandante Jeral PNTL Komisariu Polisia Julio da Costa Hornay lori Komandu Polisia Nasional Timor-Leste ho Falintil-Forsa Defeza Timor-Leste (F-FDTL) nia naran hau hakarak fo hanoin ba komunidade iha teritoriu tomak katak hahu ohin (13 to’o 16) Abril ita tama iha Quinta-feira Santa, Sexta-feira Santa, Sabado Alelui no Domingu Resureisaun.

Guvernu anunsiu ona katak funsionariu publiku ohin servisu loron sorin deit to’o 12 horas, Sexta-feira, Sabado no Domingo feiradu, ho loron feiradu naruk ne’e komunidade tantu funsionariu publiku sira, Estudante sira barak mak sei halo viajem ba munisipiu hodi selebra loron Paskoa ho familia tantu ho transporte publiku ka transporte privadu.

Tanba ne’e autoridade seguransa hakarak fo hanoin atu kuidadu an liu-liu ba kondutor sira atu kontrola velosidade no tau atensaun ba pasajeiru sira labele tur iha kapon leten ka tara an iha odamatan tanba ne’e fo perigu ba imi nia vida.

Oras ne’e daudaun tempu udan, rai namdoras no konstrusaun estrada iha parte leste, rai klaran no parte weste lao hela ne’ebe kondisaun estrada mos barak mak ladun diak, tanba ne’e presiza tau atensaun hodi nune bele asegura pasajeiru sira nia vida.

Atu informa mos katak numeru asidente trafiku ne’ebe PNTL rejista ass tebes, iha tinan 2017 hahu Janiero to 6 de Abril total kazu asidente hamutuk 500 ne’ebe maka rejulta ema hamutuk nain 21 kanek todan, nain 103 kanek kaman no balu lakon sira nia vida.

Atu asegura ida ne’e PNTL iha teritoriu tomak sei halo cek point ba sasan kroat no pasajeiru sira nebe tur iha kapon leten ka tara an iha odamatan kareta nian no wainhira hetan maka sei hatun no fo sansaun ba kondutor sira.

Seguransa ba loron Paskoa ne’e halao em koordenasaun hamutuk ho F-FDTL hanesan parte husi planu operasaun em koordenasaun nebe halao desde Natal no Anu Novu to’o tomada de pose ba VII Guvernu Konstitusional.

Komandu PNTL hasai ona diretiva operasaun ba Komandu munisipiu sira atu asegura festa semana Santa Paskoa hodi lao ho diak.

Atu termina hau husu ba joven sira atu hotu-hotu bele hakmatek hodi kontribui ba estabilidade no paz liu-liu iha loron Pascoa ne’ebe ita Sarani Katolika tomak sei selebra hamutuk; Nudar sarani ita hotu iha dever maximu hodi asegura loron importante ida ne’e nudar sarani bele hamutuk hodi selebra iha ambiente nebe nakonu ho paz no dame. Boas Festa Santa Paskoa Ba Ita Hotu. Media PNTL

Dili, Ministru Turismo Arte Kultura Francisco Kalbuady Lay iha Kuarta ne’e (12/04) hasoru malu ho Komandante Jerál Polísia Nasional Timor-Leste (PNTL) Komisariu Polísia Julio da Costa Hornay hodi hato’o agradesimentu ba apoio ne’ebe ministeriu hetan durante ne’e husi PNTL.

Ministru Turismo Arte Kultura hafoin enkontru hateten durante ne’e Ministeriu Turismo Arte Kultura hala’o eventu Nasional no Internasional ne’ebe maka sempre envolve PNTL.

“Em nome ministeriu no mós hau privadu merese hau atu mai kongratula dala ida tan ba Komandante Jerál ho rekoñesimentu ne’ebe mak povu tomak hato’o, nune’e mós Prezidente Repúblika foin dadauk fó homenagem bo’ot tebes-tebes ba Komandante Jerál ho ninia kna’ar ida ne’ebe maka lidera hela PNTL”, tenik Ministru Turismu Arte Kultura.

Francisco Kalbuady Lay akresenta tan katak lori ministeriu nia naran hakarak agradese ba apoio Komandante Jerál no membru PNTL tomak iha Munisipiu ne’ebe mak durante ne’e fó apoio másimu tebes ba eventu tomak ne’ebe maka ministeriu hala’o.

“Hau sente onra no orgullo tebes-tebes ho membrus sira, ita hare’e sira haris ho kosar iha dalan maibé sira nunka lamenta ka hirus, sira akompaña hela deit aktividade sira to’o remata”, salienta Francisco Kalbuady Lay.

Ministeriu Turismo Arte Kultura Sei Koopera Ho PNTL Ba Seguransa Eventu Internasional 2020-2030

Relasiona ho aktvidade ne’ebe maka sei hala’o iha fulan Maio 2017 kona-ba Mundu nia hanoin ba Vizaun no Misaun ba tinan 2020 to’o 2030 ne’ebe maka Sekretariu Jerál Nasoen Unidas mós sei marka presensa iha eventu refere.

“Iha loron 20 to’o 24 Maio 2017 iha eventu bo’ot tebes-tebes iha Timor-Leste ne’ebe maka hau simu hela kna’ar iha CCD (Centro Convenções Dili) hare’e ba programa ne’ebe maka Primeiru Ministru hato’o ona despasu mai membrus governu hotu nune’e mós Komandante Jerál, tanba ne’e hau mai atu koordena ho Komandante Jerál atu hare’e servisu lao diak liu tan ba oin”, tenik Ministru Turismu Arte Kultura.

Ministeriu Turismo Arte Kultura sei koordena ho PNTL iha parte seguransa ba protokolo bainaka sira, abertura no enseramentu ba programa ne’e.

Media PNTL.

Dili- Comisaun Nasional Aprovisionamentu (CNA) loke konkursu Publiku ba tenderizasaun konstrusaun Kuartel Jeral PNTL nune’e bele konstrui iha tinan ne’e.

Segundu Komandante Jeral PNTL Komisariu Polisia Faustino da Costa hateten iha loron 19 Abril Komandu Jeral PNTL sei halo Enkontru Interministerial hamutuk ho Comisaun Nasional Aprovisionamentu (CNA), Ajensia Dezenvolvimentu Nasional (ADN) Ministeriu Obras Publika Transporte no Telekomunikasaun (MOPTK) sei halo enkontru iha CAN nia fatin atu hare no avalia konkursu ne’ebe maka loke ba kompania sira. Nia hato’o asuntu ne’e ba jornalista sira iha Kuartel Jeral PNTL Kaikoli Dili Segunda (10/04)

Komisariu ne’e haktuirtan katak orsamentu ba konstrusaun ne’e tuir estimasaun hamutuk kuaze Dolar milões 12 orsamentu ne’e la inklui ba Interior Desain.

Durante prosesu konstrusaun edifisiu kiik oan hirak ne’ebe maka afeta hanesan Armajena PNTL nian bele muda fali ba fatin ruma hodi asegura sasan hirak ne’e.

Kestiona konaba komunidade afetadu Komisariu Faustino hateten iha komunidade lubuk ida ne’ebe rejistu atu simu pagamentu indimizasaun balu foti ona sira nia osan no espera katak sir a bele buka ona fatin seluk.

“ Kompensasaun ne’ebe maka estadu fo bazeia ba medida uma, material ne’ebe maka uza halo uma no sira nia aihoris hanesan, Nu’u, talas, Ai Ata, Hudi no seluktan tuir tabela presu ne’ebe maka estabelese no konkorda ona.”

Ba komunidade hirak ne’ebe maka lakoi rejistu no simu indimizasaun Komandu husu atu komunidade sira kopera no kontribui ba dezenvolvimentu maske difisil no todan ba ema ida atu muda sai husi nia hela fatin maibe iha parte seluk desde governu desidi ona fo indimizasaun maka sei halo despezu administrativu. Media PNTL

Dili, relasiona ho tempu Kuaresma tinan ne’e, Polísia Nasional Timor-Leste (PNTL) hala’o aktividade Via Sakra iha Kristu Rei ne’ebe mak partisipa direta husi membrus PNTL tomak.

Komandante Jerál PNTL Komisariu Polísia Julio da Costa Hornay hafoin Via Sakra hateten aktividade refere foin maka halo ba dala uluk no inisiativa hodi halo aktividade ne’e mai husi Amo Kapelaun PNTL Padre Nelinho Americo Fereira Soares, O. CARM.

“Ami sente aktividade Via Sakra ne’e idea diak ida tenta atu bele organiza no ikus mai ita realiza duni, ohin PNTL tomak husi Unidade hotu hanesan Unidade Espesial, Unidade Marítima, UPF, Komandu Jerál, Centro Formação ho Komandu Munisipiu Dili, sira hotu la marka presensa maibe representante husi kada Unidade hirak ne’e iha hotu atu partisipa iha Via Sakra ida ne’e”, tenik Komandante Jerál PNTL.

Komisariu Polísia Julio da Costa Hornay liu husi Via Sakra ida ne’e iha esperansa ida katak iha kada estasaun ne’ebe maka liu, iha buat barak ne’ebe maka ita le’e, ita bele hanoin, ita bele konfesa katak buat balun ne’ebe ita bele halo tuir hanesan ema umanu, ita halo tuir atu bele manan Grasa Maromak nian.

“Husu para mínimu liu ne’e ita bele halo buat ne’ebe diak, primeiru ba ita nia ann rasik hafoin ba ita nia viziñu, ba ita nia komunidade no ba ita nia nasaun, ida ne’e mak objetivu husi Via Sakra ida ne’e, atu ida-idak konfesa karik individu halo sala karik ou grupu karik ou iha servisu laran ka iha moris loron-loron nian, ema idak-idak bele aproveita loron Paskoa ne’e hodi husi penitensia ba Aman Maromak atu bele fó Perdaun”, hateten Komisariu Polísia Julio da Costa Hornay.

Via Sakra ne’e dirigi husi Amo Kapelaun PNTL Padre Nelinho Americo no partisipa husi Komandante Jerál, Segundu Komandante Jerál, Ofisias Superior, Sarjentu no Ajente inklui funsionariu Sivil PNTL tomak.

Media PNTL.

Dili- Iha Inisiu fulan Abril (loron 1 to’o 6 ) Polisia Nasional Timor-Leste rezista kazu krime hamutuk 29 iha teritoriu laran tomak, maioria kazu akontese iha Dili .

Segundu Komandante Jeral PNTL Komisariu Polisia Faustino da Costa hateten husi total kazu ne’ebe maka rejistu ass liu munisipiu Dili hamutuk kazu 19 maka PNTL rezista no prosesu inklui kazu konfrontus iha Beto-Comoro ne’ebe maka rezulta Zito Sevastião mate, Nia hato’o asuntu ne’e hafoin enkontru semanal ho Komandante munisipiu no Unidade sira iha Kuartel Jeral PNTL Kaikoli Dili Segunda (10/04)

Komisariu Faustino haktuirtan katak relasiona ho kazu komfrontus iha Beto-Comoro Komandu munisipiu Dili kaptura ona suspeitu nain haat(4) hodi submete ba prosesu investigasaun no aprezenta ba Ministeriu Publiku.

Bazeia ba kompetensia ne’ebe maka lei atribui iha Kodigu Prosesu Penal artigu 52 ba PNTL atu kaptura autor krime sira iha fatin balu iha Dili laran maibe wainhira Polisia to’o iha fatin akontesementu autor sira halai lakon nune’e prosesu kleur no lori tempu naruk ne’e sai hanesan prekupasaun PNTL nian.

Alende ne’e unidade Servisu Investigasaun Kriminal (SIK) rezista no prosesu kazu balu ne’ebe maka hetan ona delegasaun kompetensia husi Ministeriu Publiku no kazu balu sei hein delegasaun kompetensia.

Liu husi enkontru semanal komandu Jeral ho Komandante munisipiu no Unidade sira Komandante SIK informa katak iha kazu balu sei halo julgamentu maibe iha informasaun katak arguidu balu atu desloka ba rai liur tanba ne’e Komandu PNTL orienta atu investigador sira kordena ho Ministeriu Publiku hodi kontinua prosesu julgamentu antes arguidu sira desloka ba rai liur. Media PNTL

Dili- Polisia Nasional Timor-Leste (PNTL) sei fo seguransa maximu durante selebrasaun semana Paskoa ne’ebe maka sarani katolika iha Timor-Leste selebra (Kinta-Feira Santa to’o Dominggo) tuir orariu ne’ebe maka Diocese Dili fosai.

Segundu Komandante Jeral PNTL Komisariu Polisia Faustino da Costa hateten Komandu Jeral PNTL hasai ona despaisu Diretiva ida atu asegura seguransa ba festa paskoa no orenta membru PNTL tenke ativu hodi asegura seguransa maximu atu nune’e sarani sira ne’ebe maka ba misa bele ba ho diak no seguru, Nia hato’o asuntu ne’e hafoin enkontru semanal ho Komandante munisipiu no Unidade sira iha Kuartel Jeral PNTL Kaikoli Dili Segunda (10/04)

Komisariu Polisia ne’e haktuirtan katak Komandante munisipiu ida-idak hatene area ne’ebe maka risku ba komflitu no asegura fatin sira ne’e no iha kapela no igreja ne’ebe maka sei halao misa, PNTL tenke asegura tuir despaisu ne’ebe maka hasai ona iha semana kotuk

Liu husi enkontru semanal ohin Komandante Operasaun Superintendente Xefe Henrique da Costa aprejenta ona planu operasaun hodi asegura seguransa ba festa paskoa. Media PNTL