News

Dili- Polisia Nasional Timor-Leste (PNTL) presiza orsamentu sufsiente hodi resolve problema menus fasilidade no ekipamentu servisu ba Unidade Polisia Fronteira (UPF).

Komandante Jeral PNTL Komisariu Polisia Julio Hornay hateten Atu rezolve problema menus fasilidade servisu no ekipamentu hanesan postu UPF ne’ebe maka balu sei halo hanesan Baraka, falta kilat no ekipamentus servisu seluktan presiza apoiu orsamentu ne’ebe sufsiente Nia hato’o asuntu ne’e hafoin enkontru ho Prezidente Republika iha Palacio Prezidente Bairo-Pite Dili kinta (06/04).

Komisariu ne’e haktuirtan katak problema ne’ebe maka Unidade Polisia Fronteira enfrenta oras ne’e daudaun ne’e hanesan asuntu nasaun nian, Governu no Parlamentu Nasional rasik hare no hatene situasaun no kondisaun real PNTL nian Ita espera katak tinan 10 ou 20 oin mai sei diak liu ida agora ne’e.

Atu rezolve problema ne’e Ministeriu Interior luta nafatin no governu entende oinsa atu rezolve problema ne’e tanba ita bele halo milagre dala ida maibe neneik-neneik ita hadia, ita hadia desde hari PNTL iha tinan 2000 to’o agora mudansa barak mak ita alkansa ona ida ne’e mak progresu dezenvolvimentu instituisaun nian.

Antes ne’e iha deskursu ba serimonia aniversariu PNTL ba dala-17 27 de Marsu 2017prezidente Republika apela ba governu atu kontinua tau matan ba situasaun unidade Polisia Fronteira nian presizatan ita nia esforsu no apoiu para dignifika UPF tanba sira servisu lor-loron laos mesak maibe servisu iha oin no matan nasaun vizinu Indonezia.

Media PNTL

Dili- Situasaun Seguransa no ordem Publika iha teritoriu Timor-Leste laran tomak en jeral seguru no kontroladu maske iha asidente no insidente balun ne’ebe maka akontese.

Komandante Jeral PNTL Komisariu Polisia Julio da Costa Hornay hateten, oras ne’e daudaun seguransa rai laran lao ho diak maske iha problema balu maibe Polisia atende no bele rezolve problema hirak ne’e, Nia hato’o asuntu ne’e hafoin enkontru ho Prezidente Republika iha Palacio Prezidente Bairo-Pite Dili Kinta (06/04).

Komandante Jeral ne’ebe maka akompana husi Segundu Komandante Jeral iha enkontru semanal ho Prezidente Republika hodi informa situasaun seguransa rai laran ne’e informatan katak maske enfrenta difikuldades oin-oin maibe PNTL nafatin halao servisu hodi asegura seguransa ba povu no nasaun. Media PNTL

Dili, Kinta-feira ne’e (06/04) Primeira Dama Timor-Leste Dra. Isabel Perreira hasoru malu ho Komandante Jerál Polísia Nasional Timor-Leste (PNTL) Komisariu Polísia Julio da Costa Hornay hodi koalia kona-ba preparasaun seguransa iha Seminariu ba atividade kampaña Eleisaun Parlamentar 2017.

Hafoin hasoru malu ho Komandante Jerál, Dra. Isabel Perreira ba Media PNTL hateten objetivu husi vizita ne’e atu koalia kona-ba seguransa Seminariu ida ne’ebe organiza husi Gabinete Primeira Dama no tuir planu sei hala’o iha loron 20 fulan Abril tinan 2017.

“Hau nia objetivu mai hasoru Komandante Jerál atu koalia kona-ba Seminariu ida, ita atu halo iha loron 20 fulan Abril ne’e hodi halo preparasaun ba kampaña Eleisaun Parlamentar”, tenik Primeira Dama Timor-Leste.

Dra. Isabel Perreira haktuir tan katak antes Kampaña Prezidensial foin lalais ne’e, iha fulan Fevereiru atividade Seminariu hanesan halo mós husi Gabinete Primeira Dama. Iha biban ne’e mós, Dra. Isabel Perreira konvida mós Komandante Jerál PNTL atu partisipa iha seminariu refere.

Media PNTL.

Dili- Polisia Nasional Timor-Leste (PNTL) pronto atu asegura prosesu eleisaun Parlamentar hahu husi kampaña Eleisaun Parlamentar ne’ebe maka sei hala’o iha fulan Jullu

Komandante Jeral PNTL Komisariu Polisia Julio da Costa hornay hateten PNTL preparadu hodi fo seguransa iha tempu kampaña no Eleisaun tuir kalendariu ne’ebe maka dekreta ona, Nia hato’o asuntu ne’e hafoin enkontru ho prezidente Republika iha Palacio Prezidente Bairo-Pite Dili kinta (06/04)

Kestiona konaba Partidu politiku ne’ebe maka rezista iha CNE hamutuk 32 Komisariu Polisia Julio hateten PNTL prontu nafatin atu asegura seguransa.

“PNTL hamutuk ho F-FDTL sei halo evaluasaun ba servisu ne’ebe maka halao ona iha Eleisaun Prezidensial, hafoin evaluasaun sei kompleta buat balun ne’ebe maka karik presiza no servisu ne’ebe maka diak ita kontinua mantein”.

Alende ne’e iha loron 20 fulan Maiu povu Timor-Leste sei selebra Restaurasaun Independensia ba dala-15 no sei halo serimonia tomada de posse ba Prezidente Republika periodu 2017-2022 PNTL preparadu hodi fo seguransa ba serimonia istoriku ne’e PNTL kordena ona ho Ministeriu Administrasaun Estatal no parte hotu.

PNTL prontu atu asegura seguransa ba serimonia istoriku ne’e tanba Polisia nia knaar prinsipal atu asegura seguransa ba povu no nasaun. Media PNTL

Dili, Kadetes Reservadu ba kintu Kursu Ajentes Polísia Nasional Timor-Leste (PNTL) hamutuk ema na’in 233 tuir planu sei hahu’u sira nia formasaun iha fulan Jullu tinan 2017.

Segundu Komandante Jerál PNTL Komisariu Polisia Faustino da Costa iha segunda ne’e (03/04) hafoin enkontru semanal iha Kuartél Jerál hateten kadetes hirak ne’ebe reservadu iha tinan kotuk, komesa prosesa ona ba iha Centro Formasaun Polísia (CFP) atu buka hatene kona-ba prosesu hotu ne’ebe presija.

“Orsamentu ita preve, tempu ita preve no ami enkontru ona ho Ministru Interior ho Fundo Capital Humano (FDCH-MPIE) ne’ebe ita sei halo duni (formasaun ba kadetes) tanba tempu agora ita sei iha formasaun ba Sarjentu, maibé iha ona Despasu husi Ministru Interior nian katak kadetes reservadu hirak ne’e sei hahu’u sira nia formasaun básiku iha loron 5 fulan Jullu 2017”, tenik Segundu Komandante Jeraál.

Komisariu Faustino da Costa subliña liu tan katak antes fulan hahu’u formasaun, pesoal hirak ne’e, Komandu liu husi CFP sei bolu atu halo medical cek-up atu hare’e sira nia kondisaun, tanba tinan ida liu ona sira hela iha liur.

“Lista ne’ebe ami iha, ema hamutuk na’in 233 ne’ebe ami preve katak sira sei tama hotu, maibé hanesan iha pasadu, iha Kuartu Kursu ne’ebe halo kuandu ita tau tiha 250 vaga, ikus mai balun tama tiha Akademia loron ida rua resigna ann ona, espera sira 233 pesoas ne’ebe durante ne’e hein wainhira tama iha Centro sei la resigna ann”, salienta Komisariu Faustino.

Media PNTL.

Dili, Polísia Nasional Timor-Leste (PNTL) iha semana kotuk rejista Kazu Asidente 36, Insidente 33, no kazu Violensia Domestika hamutuk 12.

Segundu Komandante Jerál PNTL Komisariu Faustino da Costa hafoin hala’o enkontru semanal ho Komandante Unidade no Departamentu sira iha Komandu Jerál, hateten kazu hirak ne’ebe maka rejistu la rezulta ema mate ka kanek todan.

“Semana kotuk asidente iha Timor laran tomak akontese kazu asidente 36 mas la rezulta ema balun to’o grave todan, sim iha ema balun kanek, balun nia kareta no motor att maibé maioria kareta ho kareta maka soke malu”, tenik Segundu Komandante Jerál.

Komisariu Faustino da Costa akresenta tan katak, iha semana kotuk rejista mós kazu Insidente hamutuk 33, no númeru ne’e sae ass oituan kompara ho semana antes loron 26 Marsu ne’ebe PNTL rejistu 27 Insidente no iha loron 27 to’o 31 Marsu PNTL rejistu 33 kazu, signifika iha kazu 6 mak sae.

“Entre kazu Asidente no Insidente sira ne’e, bo’ot liu maka kazu mota lori ema na’in rua iha Ossu ne’ebe ita envolve mós operasaun ita nia maluk husi forsa, mas to’o agora ida ita seidauk hetan só ida deit maka ita hetan, kazu sira seluk hanesan kazu ordinariu ne’ebe balun ho kondisaun lanu halo problema no dala ruma bosok ema seluk ida ne’e maka barak”, subliña Komisariu Faustino.

Husi kazu 33, iha 12 kazu maka rejistu ho Violensia Domestika ne’ebe akontese iha semana kotuk, no tuir Lei kazu refere sei apresenta ba Ministeriu Públiku (MP) atu bele rejistu no bele prosesa tuir Lei.

Operasaun Camera CCTV Lao Ho Diak

Relasiona ho camera CCTV ne’ebe maka monta iha kruzamentu sira iha Kapital Dili, Segundu Komandante Jerál PNTL Komisariu Faustino da Costa hateten CCTV hirak ne’e funsiona ho diak no ajuda tebes servisu PNTL nian liu-liu ba atendimentu asidente ruma.

“Ita nia CCTV hotu funsiona ho diak no ajuda tebes PNTL liu-liu iha Kruzamentu bainhira iha asidente ruma, ita nia operador sira hatene katak iha fatin ida ne’e akontese asidente ka insidente, maibé laos atu hare’e ba engrafamentu (kemacetan), nune’e wainhira akontese asidente ruma operador bele informa lalais ba ekipa Patrulla Munisipiu Dili nian atu bele atende lalais”, subliña Segundu Komandante Jerál.

Entre camera CCTV hirak ne’ebe maka monta, iha CCTV rua maka agora dadaun iha problema ho eletrisidade. Tanba dala ruma ahi mate depois lakan fila fali, entaun prezudika funsionamentu camera ne’e rasik. Camera rua ne’e, lokaliza iha parte Bekora no Tasi Ibun.

Media PNTL.

Dili, Komandu Polísia Nasional Timor Leste iha Segunda-feira ne’e (03/04) hala’o serimonia Isar Bandeira iha Kuartél Jerál Kaikoli ne’ebe dirije husi Komandante Jerál PNTL Komisariu Polisia Julio da Costa Hornay akompaña husi Segundu Komandante Komisariu Polisia Faustino da Costa.

Perante ofisias superior, ofisias subalternus, sarjentus, ajentes no funsionariu sivil sira, Komandante Jerál iha nia intervensaun ba serimonia Isar Bandeira, agradese ba membrus hotu ne’ebe hala’o kna’ar iha seguransa ba eleisaun Presidensial foin lalais ne’e.

“Lori Komandu PNTL nia naran hakarak hato’o agradesimentu ba ita hotu (ofisias superior, ofisias subalternus, sarjentus, ajentes no funsionariu sivil tomak) ne’ebe hala’o kna’ar iha seguransa ba eleisaun Presidensial 2017 ne’ebe ita bo’ot sira hola parte seguransa ba sentru votasaun iha munisipiu 13, ne’ebe lao diak ho lideransa Komandante sira ninian ne’ebe koloka iha munisipiu hodi kontrola membru sira ne’ebe destakadu iha fatin votasaun”, tenik Komandante Jerál PNTL.

Komisariu Julio da Costa Hornay mós agradese ba Komisaun Organizadora ne’ebe hala’o servisu ba preparasaun loron Aniversariu PNTL nian ba dala 17 foin lalais ne’e, ne’ebe hala’o ho diak mezmu iha buat balun ne’ebe presiza tau atensaun atu bele hadia iha serimonia sira tuir mai.

“Buat hotu bele lao ho diak tanba ita hotu-hotu nia kooperasaun servisu, fiar malu, rona malu, servisu hamutuk maka buat sira ne’e bele ita alkansa, tanba ne’e husu ba ita hotu husi Komandante sira to’o ajente, atu hotu apoio malu iha âmbitu servisu ninian hodi alkansa saida maka Instituisaun hakarak” subliña Komisariu Julio.

Iha biban ne’e, Komandante Jerál mós fó hanoin ba loron Paskoa ne’ebe besik dadaun ona, atu Komandu Operasaun atu hanoin ona kona-ba planu operasaun ba seguransa loron Paskoa iha fulan Abril nia laran. Nune’e, Komandu fó hanoin ba Komandu Operasaun atu hare’e mós planu operasaun ba serimonia Tomada de Posse ba Presidente Eleitu ne’ebe sei hala’o iha loron 20 Maiu 2017, atu bele koopera diak ho Komisaun Organizadora, atu bele asegura serimonia bo’ot ida ne’e bele lao ho susesu.

Media PNTL.

Dili- Unidade Espesial Polisia (UEP) husu ba Komandu Jeral Polisia Nasonal Timor-Leste (PNTL) atu kria kondisaun diak no ekipamentus adekuadu ba Unidade ne’e atu hala’o servisu.

Komandante UEP Superintendente Xefi Afonso do Santos hateten Unidade Espesial iha nasaun hotu-hotu tenke hare ba rekursu ne’ebe sufsiente, kria kondisaun diak no ekipamentus adekuadu hodi garante bem estar, Nia hato’o asuntu ne’e hafoin serimonia graduasaun ba membru BOP iha Kuartel UEP Bairo-Pite Dili Kinta (30/03).

Komandante Afonso haktuirtan katak governu liu husi Ministeriu Interior ho Komandu Jeral tenke hare situasaun ida ne’e tanba Unidade Espesial nia misaun espesial bainhira akontese insidente ass no perigu iha nasaun ida ne’e so ami deit maka bele resolve.

“Komandante Unidade nudar Timor oan maske ema hotu hare katak Unidade Espesial Polisia (UEP) falta ekipamentus maibe ida ne’e laos problema ba hau, konsiensia hau nia atu prepara efetivu buat ne’ebe maka ita iha atu responde kualker situasaun wainhira estadu bolu,” dehan Superintendente Xefi Afonso.

Ezemplu ita hare Explosive Ordenance Disposal (EOD) inkompletu maibe membru sira servisu nafatin, UEP kaer metin prinsipiu patriotismu hodi banati tuir Veteranus sira nia luta iha ou laiha prontu atu servi povu no proteje nasaun no nia riku soin tuir misaun forsa especial nian.

Hatan ba prekupasaun ne’e Komandante Jeral PNTL Komisariu Polisia Julio da Costa Hornay hateten PNTL depende ba Orsamentu Jeral Estadu ne’ebe maka governu aloka maka ita utilija ba unidade no laos deit ba UEP maibe ba PNTL iha teritoriu tomak haesan PNTL iha munisipiu 13, Unidade UEP, UPF no UPM, Centru Formasaun Polisia no Komandu Jeral.

Komisariu ne’e haktuirtan katak Komandu iha responsabilidade atu hadia kondisaun no fasilidade tuir orsamentu estadu hodi hadia kondisaun Unidade UEP, UPF no UPM presiza atendementu ida ne’ebe inportante ba sira alende munisipiu 13

Kondisaun ne’ebe maka iha ita tenta atu hadia neneik pasu por pasu no labele halo buat hotu dala ida deit bazeia ba embelope fiskal ne’ebe governu koloka ba komandu PNTL tuir prioridade ne’ebe maka iha. Media PNTL

Dili- Membru Batelaun Ordem Publika (BOP) nain 39 simu graduasaun hafoin remata kursu formasaun baziku Manutensaun Ordem Publika iha Unidade Espesial Polisia (UEP).

Komandante Jeral PNTL Komisariu Polisia Julio da Costa Hornay hateten kursu formasaun baziku ne’e hanesan kultura bainhira membru foun integra iha Unidade ne’e tenke simu treinamentu espesial ba Unidade ida ne’e nian, Komandante Hornay hato’o asuntu ne’e hafoin graduasaun ba membru BOP iha Kuartel UEP Bairo-Pite Dili Kinta (30/03).

Nia haktuirtan katak ajente BOP nain 39 ne’ebe simu graduasaun ohin sei reforsatan efetivu Unidade Espesial liu-liu iha BOP hodi asegura Eleisaun Parlamentar no atividade sira seluk ne’ebe maka presija sira nia apoiu.

“Atu fasilita servisu UEP nian Komandu Polisia Nasional Timor-Leste sosa ona ekipamentus no hein katak sei to’o mai iha tempu besik hodi distribui ba membru sira hodi fasilita sira nia servisu.”

Formasaun sai papel fundamental ba PNTL, kursu formasaun Manutensaun Ordem Publika ne’e kursu espesial ba Polisia atu kontrola disturbiu sivil iha ambitu misaun mantein no reestabelese ordem publika hodi dezenvolve kompetensia no komportamentu ne’ebe espesifiku ba halao funsaun.

Iha okajiaun ne’e komandante UEP Superintendente Xefi Afonso dos Santos hateten ajente nain 39 ne’e tuir kursu formasaun baziku no formasaun ordem publika durante fulan rua (2) no formador sira husi GNR no Instrutor UEP, tuir tradisaun formasaun ba UEP halao durante fulan tolu (3) no kontinua formasaun durante semana 6 ba Ordem Publika.

Nia reforsatan katak hafoin graduasaun ajente hirak ne’e sei halao servisu iha UEP no kolokadu iha Peltaun de Apoiu no wainhira Eleisaun Parlamentar hotu maka sei fahe ba kompania Bravo  Baucau no kompania Delta Bobonaro.

Tuir Planu Komandu EUP maka tenke aumenta efetivu kompletu iha BOP hodi kompleta kompania hat (4) nia membru kata kompania membru 100 resin maibe numeru efetivu ne’ebe maka iha oras ne’e daudaun sufsiente atu responde bainhra estadu presija.

Enseramentu kursu formasaun baziku ba ajente BOP ne’e kompleta ho atrasaun Teknika Manutensaun Ordem Publika hanesan Patrullamentu, Anti Terorista, Operasaun Tubulares no Inativasaun Armas Esplusivu.

Serimonia graduasaun ne’e partisipa husi komandante Administrasaun Superintendente Xefi mateus Fernandes, Segundu komandante CFP Superintendente Asistente Emilio dos Santos instructor GNR, komvidadus, familia graduadu no membru UEP. Media PNTL

Dili- Estadu Timor-Leste kondekora instituisaun Polisia Nasional Timor-Leste PNTL ho Medalha Ordem de Timor-Leste ne’ebe maka hala’o servisu seguransa ba povu no nasaun hodi asegura seguransa públika.

Prezidente Republika Taur Matan Ruak hateten Kondekorasaun ne’e nudar rekoñesementu estadu ba instituisaun seguransa ne’ebe maka loro-loron koopera no servisu makaas hodi hametin seguransa iha rai laran, hametin legalidade demokratika, tane ass no asegura identidade nasional liu husi kapasidade hodi servi nasaun no povu, Nia hato’o asuntu ne’e liu husi deskursu ba serimonia aniversariu PNTL iha Centru Formasaun Polisia Comoro Dili Segunda (27/03).

Taur haktuir tan katak rekoñesementu Publiku ne’ebe maka hau fo iha serimonia ida ne’e hodi kondekora instituisaun ho Colar Ordem de Timor-Leste no Presigna ba Estandarte Nasional hanesan sentimentu gratidaun ida ne’ebe justu hodi fo rekoñesmentu ba PNTL.

“ Hau hato’o agradesementu ba PNTL ne’ebe simu dever no disponibilidade maka’as atu proteje no servi sidadaun no nasaun ho profesionalismu no dedikasaun”

Iha okajiaun ne’e PR kondekora mos Komandante Jeral PNTL Komisariu Polisia Julio da Costa Hornay ho medalla Ensigna de Ordem Timor-Leste ba servisu ne’ebe nia presta ona ba nasaun iha Komandu Jeral PNTL.

Prezidente Republika kondekora mos Ofisiais Superior PNTL nain 19 ho medalla de Servisus Distintos grau Ouro no Medalla de ordem Servicos Distintos grau Prata ba inspector, Sarjentu no Ajente Xefe nain 12.

Kondekora mos Vice-Ministru Administrasaun Estatal Tomas do Rosario Cabral ho Medalla de Mérito de Segurança Públika 1^a klase no Medalla de Mérito de Segurança Públika 4^a klase ba Primeiro-Sarjentu das F-FDTL Celestino fraga no Ajente-Chefe Nelson Carlos Amaral.

Iha okajiaun ne’e Prezidente Republika mos kondekora sidadaun nasional no estrajeiru ne’ebe maka kontribui ba servisu seguransa hanesan Superintendente Paul Jorge Dickinson Polisia Federal Australia, Superintendente Kevin joseph brenan Polisia Nova Zelandia, major Felisberto Antonio M.P. Contente GNR no kompania TELEMOR.

Serimonia kondekorasaun ne’e kompleta ho kondekorasaun Medalla de Komportamentu Exemplar ba Inspetor Lucia de Fatima Ximenes, Sarjentu Domingos Maia no Ajente-Chefe Albertino das Neves.

Serimonia Aniversariu PNTL ba dala 17 ne’e Partisipa husi Primeiru Ministru, Ministru Interior, Ministru Defeza, Maijor General F-FDTL, Prokurador Jeral Republika(PJR) Jose da Costa Ximenes, Reprezentante Prezidente parlamentu Nasional, reprezentante Prezindente Tribunal Rekursu, membru governu, Korpu Diplomatiku, parseiru desenvolvimentu PNTL, Konvidadu, membru PNTL no familia tomak. Media PNTL