News

Dili- Ministru Interior vizita Centru Formasaun Polisia (CFP) hodi observa no rona prosesu kursu formasaun Sarjentu ne’ebe maka halao iha tinan kotuk.

Ministru Interior Longuinhos Monteiro hateten vizita ne’e atu hare jestaun ba formasaun ne’ebe maka halao fulan tolu ona, formasaun ne’e orentadu ba ajente sira ne’ebe maka atu promove ba Sarjentu no Instruindu sira husi nasaun membru CPLP, Nia hato’o asuntu ne’e hafoin aprezentasaun relatoriu formasaun husi Komandante CFP iha Comoro Dili Kuarta (15/03)

Eis Komandante Jeral PNTL ne’e afirmatan katak relatoriu husi Komandante CFP relata katak Instruindu sira 94% hetan valor diak iha sira nia formasaun hein katak formasaun ne’e sai hanesan kestaun inportante atu dezenvolve profesionalismu Polisia nian.

“ Kursu Formasaun Sarjentu ne’e hanesan formasaun ne’ebe maka halao primeira vez iha nivel CPLP hanesan Prezidente em exersisiu ba Reuniaun Ministru Interior no Administrasaun Interna CPLP ne’ebe iha deklarasaun Dili tinan kotuk foti desijaun no ita sai hanesan mata dalan uniku ne’ebe halao kursu formasaun iha nivel nasional no partisipa husi nasaun membru CPLP”, dehan ministru Monteiro.

Iha okajiaun ne’e Komandante CFP Superintendente Arquimino Ramos hateten Kursu formasaun ba Sarjentu oras ne’e lao daudaun ho Instruindo hamutuk nain 121 kompostu husi PNTL nain 114 no Polisia CPLP (Guinea Bisau no São Tome e Principe) hamutuk nain 7 maioria Instruindo sira pasa ho valor % 94 pojitivu no falta fulan rua sira ba estajiu.

Materia ne’ebe maka partisipante sira simu kompostu husi Juridiku, Tekniku Professional, Fizika no atividade komplementadas hanesan palestra, vizita estudu ba fatin sira hanesan museum no formador sira mai husi PNTL no GNR

CFP nudar eskola Polisia nian ne’ebe laos deit formasaun ba ajente maibe oras ne’e daudaun hasae ba kategoria Sarjentu no iha futuru mai bele iha nivel ofisial, ida ne’e nudar mehi atu Centru ida ne’e hetan rekonesementu meritu ho sistema ensinu iha ita nia rai.

Vizita Ministru Interior ne’e akompaña husi Segundu Komandante Jeral PNTL Komisariu Polisia Faustino da Costa no partisipa maximu husi instruindu sira, Formador husi GNR no Ofisiais, Sarjentus no Ajentes husi Centru Formasaun Polisia. Media PNTL

Dili, Ministru Interior (MI) Dr.Longuinhos Monteiro akompaña husi Komandante Jerál Polísia Nasional Timor Leste (PNTL) Komisariu Julio da Costa Hornay, iha Kuarta ne’e (15/03) hasoru malu ho delegasaun ida husi Ministeriu Seguransa Públika Xina nian hodi diskuti kooperasaun bilateral ne’ebe sei hala’o iha futuru.

Komandante Jerál PNTL Komisariu Julio da Costa Hornay hafoin enkontru ho delegasaun Xina iha salaun MI hateten, enkontru ne’e halo ho objetivu atu hare’e kooperasaun bilateral entre Ministeriu Seguransa Públika Xina ho Ministeriu Interior liga ho apoio balun ne’ebe maka governu Xina sei oferese mai PNTL.

“Delegasaun Xina ne’e, sei ba hare’e situasaun Unidade sira iha PNTL nia laran no posibilidade saida mak presija liu iha unidade hirak ne’e atu sira bele fó apoio”, tenik Komandante Jerál PNTL.

Ministeriu Seguransa Públika Xina haruka membru na’in neen (6) ho nia delegasaun ne’ebe xefia husi Diretor ASEAN Affairs Division of International Cooperation Department Mr. Lian Hongtao hahu’u sira nia vizita mai Timor Leste iha loron 6 to’o loron 11 fulan Marsu 2017.

Media PNTL.

Dili, Tersa feira ne’e (14/03) Sekretariadu Tekniku Administrasaun Eleitoral (STAE) halo distribuisaun ba material “Sensitivu” bulletin votus ba Sentru Votasaun hotu ne’ebe estabelese iha suku hotu-hotu iha Teritoriu Timor Leste no mós Sentru Votasaun iha Diaspora hanesan Darwin, Sydney no Lisboa.

Ekipa STAE ho apoio husi Polísia Nasional Timor Leste (PNTL) sei transporta pakote material sensitivu sira husi kapital Dili to’o Munisipiu, Suku, no Sentru Votasaun hamutuk 944 ne’ebe estabelese iha rai laran no Diaspora.

Director Jerál STAE Acilino Manuel Branco iha ninia intervensaun ba serimonia distribuisaun material hirak ne’e hateten Timor Leste dala ida tan halo istoria bo’ot ida iha ne’ebe eleisaun ba tinan ne’e diferente ho eleisaun sira uluk ninian tanba foin ba dala uluk akontese ho prosesu ita nia rasik, rekursu ita nia rasik no ho ita nia kapasidade rasik hamutuk hasoru eleisaun Jerál liu-liu Eleisaun Prezidensial ne’ebe maka sei realiza iha tempu besik.

“Eleisaun ida ne’e hanesan eleisaun ida ne’ebe importante tebes tanba ita atu hili ema ida númeru um iha ita nia rai RDTL rasik, tanba ida ne’e hanesan ita hotu hatene hahu’u husi loron iha ne’ebe Prezidente Repúblika dekreta data, kandidatura no prosesu kampaña ne’ebe oras ne’e dadaun iha ona rohan no ohin ita tama ona finalizasaun ba distribuisaun material eleisaun ninian”, tenik Director Jerál STAE.

Iha fatin hanesan, Komandante Operasaun PNTL Superintendente Xefé Henrique da Costa ne’ebe reprezenta Komandante Jerál, iha nia intervensaun hateten atu garante festa demokrasia ne’e lao ho diak PNTL halo ona preparasaun no prontu atu asegura eleisaun prezidensial lao ho seguru.

“Durante fulan hirak nia laran, ita hotu servisu maka’as husi preparasaun kampaña no periode kampaña, agora ita tama ba iha faze ida ne’ebe ema hotu hein hela mak loron ba eleisaun prezidensial ne’ebe maka ema hotu atu hili ema ida ne’ebe atu sai líder ba iha nasaun ida ne’e”, hateten Komandante Operasaun PNTL.

Superintendente Xefé Henrique da Costa akresenta tan katak PNTL servisu hamutuk ho forsa amiga sira hanesan Comissão Nacional Eleições (CNE), STAE, Autoridade Munisipiu, Autoridade lokal sira hotu, oinsa atu bele koopera ba susesu iha eleisaun ninian.

Komandante Operasaun mós apela ba Komandante Munisipiu PNTL sira, “Loron to’o ona atu hatudu katak PNTL prontu duni atu servi ninia povu rasik, ema hotu agora hein hela katak seguransa eleisaun sira dahuluk ninian lao ho susesu tanba hetan apoio husi polísia ONU ninian, maibé situasaun agora oin seluk, koko Polisia Nasional Timor Leste nia kapasidade oinsa ita bele ezerse ita nia kna’ar atu asegura seguransa ba iha eleisaun ida ne’e”.

Ba distribuisaun material eleisaun ninian, Komandu PNTL husu ba Komandu Munisipiu idak-idak atu iha responsabilidade ba iha material hirak ne’e, hodi bele lori ba iha area jurídiku ne’ebe determina ona hanesan fatin ba votasaun.

Partisipa iha serimonia ne’e, Ministru Administrasaun Estatal (MAE), Prezidente CNE, Diretor STAE, Komandante PNTL Munisipiu sira, Reprezentante UNDP, Observadores Nasionais no Internasionais, Administradores Munisipais, Fiskais husi Kandidatu Prezidente Repúblika nian, Media Nasional no Internasional.

Media PNTL.

Dili- Trimestre primeiru (Janeiru-Marsu ) tinan 2017 asidente trafiku rezulta ema nain 17 mate no nain 352 kanek todan no kmaan.

Segundu komandante Jeral PNTL Komisariu Polisia Faustiona da Costa hateten iha trimester primeiru tinan 2017 PNTL rezista kaze asidente trafiku hamutuk 434 husi total kazu ne’e rejulta ema nain 17 mate no nain 352 kanek todan no kmaan, hat’o asuntu ne’e iha Kuartel Jeral PNTL Kaikoli Dili Segunda (13/03).

Komisariu Faustino esplika katak asidente ne’ebe akontese maka hanesan kareta soke motor, kareta monu mesak, motor monu mesak (asidente tunggal) kareta ho kareta soke malu no kareta baku fila, motor soke malu no kareta ho motor soke ema ne’ebe rezulta ema mate, estragus ba kareta, motor no rin eletrisidade.

“ Kazu ne’ebe akontese maioria iha kapital Dili, relasiona ho ne’e PNTL kontinua halo cek point no iha fim da semana ne’e Komandu PNTL munisipiu Dili prende mikrolet no taxi hamutuk 250 tanba halo movimentu la ho kondisaun hanesan dokumentus laiha, dokumentus invalidu, kondutor laiha karta kondusaun.

Alende ne’e PNTL mos prende motorizada hamutuk 116 tanba laiha lampu, espelu, la uza kapasete, kanu resin no laiha karta kondusaun .

Kazu hirak ne’e balu selu multa no balu prosesu ba Tribunal liu-liu kazu ne’ebe maka rezulta ema mate no kondutor laiha karta kondusaun, tanba kodigu Estrada hateten lori kareta ho motor seim karta kondusaun ne’e krime ho pena prijaun tinan 3. Media PNTL

Dili- Relasiona ho Eleisaun Prezidensial Polisia Nasional Timor-Leste (PNTL) sei halo alerta um (1) hahu loron 15 to’o 21 Marsu hodi antisipa seguransa antes eleisaun.

Segundu Komandante Jeral PNTL Komisariu Polisia Faustino da Costa hateten PNTL tenke garantia katak iha loron hakmatek antes Eleisaun Prezidensial laihatan atividade kampaña no lori atributu partidu politiku, Nia hato’o asuntu ba jornalista sira iha Kuartel Jeral PNTL Kaikoli Dili Segunda (13/03).

Komisariu Faustino haktuirtan katak relasiona ho ne’e membru PNTL husi Unidade no Komandu Jeral sei desloka ba munisipiu 12 iha loron 18 hodi koloka membru sira ne’e ba Komandu munisipiu hodi fo apoiu seguransa ba Eleisaun Prezidensial ne’ebe maka sei halao iha loron 20 Marsu.

Alende ne’e tuir orariu iha loron 14 STAE sei halo distribusaun material sensitivu ba Komandante Komandu PNTL munisipiu 13, Komandu munisipiu sira informadu no sira rasik sei mai simu sasan hirak ne’e. atu lori ba rai iha iha sira nia munisipiu. Media PNTL

Dili- Komandu Polisia Nasional Timor-Leste (PNTL) Informa situasaun seguransa kampaña Prezidensial ba Prezidente Republika (PR).

Komandante Jeral PNTL Komisariu Polisia Julio da Costa Hornay hateten enkontru mensal ho Prezidente Republika ho autoridade seguransa ohin hodi informa situasaun seguransa rai laran relasiona ho seguransa kampaña Prezidensial, Nia informa asuntu ne’e hafoin enkontru ho PR iha Palasiu Aitarak Laran Dili Kuarta (8/03)

Komandante Jeral haktuirtan katak kampaña Prezidensial ne’ebe maka hahu iha loron 3 to’o 7 Marsu horseik buat hotu lao ho diak so deit akontense insidente iha Raikotu wainhira militante Fretelin fila husi kampaña iha munisipiu Ermera.

Relasiona ho kazu Raikotu PNTL kaptura ona autor prinsipal hodi ba prosesu iha Tribunal no autor hetan medidas koasaun Aprezentasaun Periodika hodi hein prosesu julgamentu no autor nain hat (4) seluk hein mandadu kapturasaun husi Ministeriu Publiku.

Polisia mantein nafatin seguransa hodi nune’e kampaña Prezidensial bele lao ho diak tuir nia dalan nune’e lider politiku no militantes partidu sira mos intende no kompriende konduta ne’ebe maka partidu iha no kumpri regras hirak ne’ebe maka vigora.

Antes termina eis Komandante Centru Formasaun Polisia ne’e apela ba Lider partidu politiku sira atu fo informasaun nafatin ba militantes sira wainhira lao iha kampaña tenke mantein nafatin pojisaun no kumpri regras tranzitu karik motorista no pasajeiru sira viola maka Polisia prende no aplika sansaun tuir lei haruka. Media PNTL

Dili- Polisia Nasional Timor-Leste (PNTL) prende motorizada 199 tanba kanu resin, laiha sapa matrikula no la uza espelu

Segundu Komandante PNTL munisipiu Dili Superintendente Asistente Euclides Belo hateten iha Domingu 05 Marsu PNTL liu husi atividade cek point PNTL prende motorizada hamutuk 199 entre motor hirak ne’e 48 mak kanu resin no halo estrundu, hato’o asuntu ne’e iha Komandu PNTL munisipiu Dili Segunda (6/03).

Nia haktuirtan katak iha operasaun ne’e prende mos motorizada governu nian, motorizada balun ne’ebe maka laiha sapa matrikula, laiha espelu no la tuir kodigu Estrada. Motor nain hirak ne’ebe maka fila husi atividade kampaña Prezidensial iha munisipiu Liquica Polisia prende motorizada maibe fo fila atributu partidu ne’ebe maka sira uza tanba loron kampana nian

“ PNTL halo antisipasaun maximu ba atividade kampaña Prezidensial atu evita ema labele halo asaun brutal, Komandu PNTL munisipiu Dili koloka membru operasaun iha Eskuadra hat ho apoiu husi Polisia Unidade Espesial.”

Hafoin prende motorizada hirak ne’e tau hela iha Komandu PNTL munisipiu Dili no aplika sansaun tuir regras hirak ne’ebe maka vigora iha lei Kodigu Estrada nian tuir tabela infrasaun. Media PNTL

Dili- Polisia Nasional Timor-Leste (PNTL) no Falintil Forsa Defeza Timor-Leste (F-FDTL) sei halo seguransa koordenada hodi asegura prosesu Eleisaun Jeral tinan 2017 lao ho seguru.

Liu husi komferensia da emprensa hamutuk iha Kuartel Jeral PNTL Komandu PNTL no F-FDTL deklara katak instituisaun Seguransa no Defeza nudar instrumentu estadu nian sei halo servisu maximu no fo apoiu ba malu hodi asegura prosesu Eleisaun Jeral lao ho susesu.

Komandante Jeral PNTL Komisariu Polisia Julio da Costa Hornay hateten ami PNTL ho F-FDTL deside hodi kria seguransa em koordenada hodi apoiu malu asegura Eleisaun Jeral tinan 2017 (Eleisaun Prezidensial no Eleisaun Parlamentar) lao ho susesu.

Ezistensia PNTL ho F-FDTL atu toma responsabilidade hodi asegura seguransa maske forsa rua ne’e iha nia misaun keta-ketak PNTL konaba seguransa interna no F-FDTL seguransa externa maibe iha ami nia lei organika rasik mos hateten atu koopera malu iha servisu kuandu nesesita, no forsa rua ne’e implementa ona dala barak hodi rezolve problema nasaun nian.

Seguransa ba eleisaun ne’e maske em koordenada maibe PNTL maka prinsipal no infrenta direita hodi fo seguransa tantu kampaña no iha Sentru votasaun, tanba ne’e preparasaun ba seguransa eleisaun ne’e PNTL sei hatun nia efektivus tomak, komandu sei fo apoio efektivus ba reforsa komandu munisipiu hodi asegura eleisaun ne’e.

Iha perturbasaun ruma nebe maka Polisia labele atende maka Komandante Jeral PNTL sei husu apoiu ba F-FDTL.

Entretantu Xefe Estado Maior General F-FDTL Lere Anan Timur hateten F-FDTL no PNTL nudar instrumentu nasaun nian ba legalidade uza forsa kuandu nesesariu, maske misaun ketak-ketak maibe kompleta malu instituisaun rua ne’e nia knaar maka interven no reprime problema ruma ne’ebe mosu iha rai laran ou situasaun ruma ne’ebe kria instabilidade ba estadu, nasaun no povu.

Husu ba timor oan hotu atu iha responsabilidade hodi asegura eleisaun 2017 ne’e bele lao ho diak no iha ambiente nebe nakonu ho paz no dame nune ita timor oan hatudu dala ida tan ba mundu katak timor oan sira mos bele, maske iha difikuldade oin-oin maibe kestaun de responsabilidade, nasionalismu, patriotismu hodi asegura ita nia dignidade nudar nasaun independente, demokratiku nia folin laiha negosiasaun. Media PNTL

Dili, Komandu Polísia Nasional Timor Leste (PNTL) hala’o enkontru Jestaun Konsellu Projetu ho parseiru desenvolvimentu sira ne’ebe maka durante ne’e fó apoio mai PNTL.

Komandante Jerál PNTL Komisariu Julio da Costa Hornay iha intervensaun hateten Komandu agradese tebes ba presensa parseiru sira nian ne’ebe maka durante ne’e ajuda PNTL ba nia prosesu desenvolvimentu instituisaun ninian liu-liu ba United Nations Development Programme (UNDP).

“Instituisaun PNTL hetan apoio husi UNDP atu desenvolve kapasidade iha area jestaun no administrasaun hodi kompleta formas asistensia ne’ebe PNTL nesesita”, hateten Komandante Jerál PNTL iha salaun enkontru Kuartél Jerál sexta ne’e (25/02).

Komisariu Julio da Costa Hornay akresenta tan katak objetivu husi apoio ne’e maka atu garante katak matenek hirak ne’ebe parseiru sira transmite mai iha PNTL atu bele tau iha prátika. Programa UNDP ho parseiru sira seluk mai atu fó apoio no reforsa kapasidade PNTL hodi bele presta servisu ho kualidade ba povu Timor Leste.

“Progarama apoio UNDP ne’ebe iha durante ne’e tuir nesesidade PNTL duni no hala’o iha area hirak hanesan implementasaun no koordenasaun ba Planu Estrátegiku Desenvolvimentu PNTL nian, Teknologia no Jestaun ba Dadus, Aprovisionamentu, Jestaun Frotas ka Servisu MTO, Relasaun Públika, Apoio ba Jéneru, no mos Jestaun Rekursu Umanu”, salienta Komisariu Julio.

Komandante Jerál PNTL mós louva ho programa hirak ne’ebe maka parseiru sira oferese iha duni ninia rezultadu no hatudu duni vantagem ne’ebe diak mai iha PNTL.

Iha fatin hanesan UNDP Country Director Sr. Claudio Providas iha ninia intervensaun ba enkontru ne’e hateten parte UNDP agradese tebes ba servisu ne’ebe maka halo ho PNTL durante ne’e lao diak tebes.

“Servisu UN nian hanesan ita hotu hatene maka atu prioritize estrátegia ne’ebe maka define ona ba tempu naruk no dezeñu projetu ne’ebe maka eziste dadaun iha UNDP ho PNTL hodi haforsa governasaun no hare’e liu ba servisu atendimentu ne’ebe sai hanesan progranma UNDP nian ho PNTL”, hateten UNDP Country Director.

Partisipa iha enkontru ne’e parseiru sira hanesan Australia Federal Police (AFP), JICA, United State of America Embassy no representante Embaixada Nova Zelandia nian iha Timor Leste.

Media PNTL.  

Dili- Governu liu husi Ministeriu Interior halo ona planu atu monta kamera vidio iha kareta patrulamentu no operasional Polisia Nasional Timor-Leste (PNTL) hodi nune’e bele monitorija atuasaun iha baze.

Ministru Interior Longuinhos Monteiru hateten hare ba modernijasaun ba Informasaun no Teknolojia (IT) ohin loron permite atu kareta Polisia ne’ebe maka lao iha patrulamentu mos iha camera video iha kareta oin, hato’o asuntu ne’e iha deskursu serimonia inagurasaun sistema CCTV iha Kuartel Jeral PNTL Kaikoli Dili Kinta (23/02).

Nia haktuirtan katak kamera video hirak ne’e atu monitorija membru nia atuasaun iha baze no gravasaun hirak ne’e bele utilija hodi defende pojisaun polisia nian tanba dalabarak Polisia ne’ebe maka sai hanesan autor lei no ordem hetan fali akujasaun tanba sira nia asaun nune’e mos diak ba Komandante sira atu foti desijaun.

Ita nia mehi katak antes fulan Agostu kareta patrula polisia iha Dili tenke iha ona video kamera ida ne’e prioridade hodi justifika prezensa polisia nia empanamentu, regras iha ambitu siguransa interna no siguransa interna.

Ministeriu hare hela ida nee no sei halo akijisaun iha tempu besik se buat hotu lao diak antes fulan Agostu kamera ba kareta patrulamentu no operasional sei monta kamera video hodi halo gravasaun iha oras ne’ebe maka polisia sira sai halo intervensaun iha terrenu hot-hotu gravadu.

Entretantu Segundu Komandante PNTL munisipiu Dili Superintendente Asistente Euclides Belo hateten wainhira iha meius barak liu mka bele dezenvolve PNTL no sei fasil atu fo atendementu ba publiku liu-liu komunidade hodi garante estabilidade. Media PNTL