News

Lautem, atu fasilita servisu membrus Polísia Nasional Timor Leste (PNTL) iha munisipiu, Komandante Jerál PNTL inagura tan edifisiu foun Kuartél Jerál iha munisipiu Lautem ne’ebe ninia obra konstrusaun halo durante tinan ha’at.

Komandante Jerál PNTL Komisariu Julio da Costa Hornay ne’ebe ofisialmente inagura edifisiu ne’e apela ba Komandu munisipiu hamutuk ho membrus sira atu iha responsabilidade no obrigasaun hodi kuida edifisiu ne’e hanesan uma rasik.

“Ohin ita asiste serimonia ida ne’ebe importante ba munisipiu Lautem, edifisiu foun depois tinan sanulu-resin-neen (16) ita uja edifisu tuan Polísia Indonesia husik hela mai, ohin ita komesa uja edifisiu foun ne’ebe nia kustu husi orsamentu povu Timor nian rasik hodi hari’i”, tenik Komandante Jerál PNTL iha ninia diskursu.

Komisariu Julio da Costa Hornay akresenta tan katak Importante ba Komandu maka buat ida ne’ebe iha, ita bele utiliza ho diak, ho sentimentu ida hanesan ita nia rasik, tanba dala ruma ita bele halo konstrusaun kuartél ida ne’ebe furak maibé kuandu laiha sentimentu kuida hanesan sasan rasik, tinan ida to’o rua bele att fila fali.

Entertantu, Komandante PNTL munisipiu Lautem Superintendente Marcos Sequeira hateten Komandu Munisipiu la hein apoio husi Kompañia maibé tanba konstrusaun ne’e hanesan ezizensia ida atu bele fasilita membrus sira nia servisu loron-loron no edifisiu tuan ne’e bele utiliza ba interese seluk.

Serimonia inagurasaun ne’ebe ho tema “Hamutuk Lautem Forsa No Forsa Hamutuk Lautem Bele”, taka ho hala’o mini expozisaun ida ne’ebe maka Komandu PNTL Munisipiu Lautem prepara hanesan fotogradia no video aktividade hotu husi Komandu PNTL munisipiu Lautem nian.

Preparasaun Seguransa ba Komemorasaun 28 Novembro

Relasiona ho aktividade komemorasaun loron Proklamasaun Independensia 28 Novembro ba tinan ne’e ne’ebe sei hala’o iha munisipiu Lautem, Komandante Jerál PNTL sei garante seguransa ba aktividade expozisaun no serimonia insar bandeira iha loron 28 Novembro.

“Ne’e dever ida ba PNTL atu asegura seguransa serimionia 28 Novembro nian sai diak tanba ne’e membrus PNTL Komandu munisipiu Lautem tenke sente orgullu no dignu katak governu deside hodi selebra serimonia loron historiku nian iha munisipiu Lautem”, tenik Komisariu Julio da Costa Hornay ba jornalista sira hafoin serimonia.

Ne’e duni, Komandu PNTL apela ba membrus hotu iha munisipiu Lautem hanesan uma na’in ne’e tenke prepara ann hodi kontrola estabilidade no paz atu serimonia ne’e bele lao ho diak hodi komunidade sira mós bele partisipa ho kontenti.

Partisipa iha serimonia inagurasaun ne’e Komandante Komponente Apoio Servisu (KAS-F-FDTL) Tanente Coronel Punu Fanu, Komandante PNTL munisipiu sira, administrador munisipiu Lautem no komunidade sira.

Media PNTL.

Dili- Ekipa Polisia Nasional Timor-Leste (PNTL) munisipiu Dili sai vensedor ba kompetisaun nasional poco -poco ba dala III ne’ebe maka organiza husi Ministeriu Saude.

Ekipa PNTL munisipiu Dili sai vensedor Primeiru Lugar (juara I) hodi halakon ekipa 14 ne’ebe maka partisipa iha kompetisaun poco-poco ne’ebe maka halao iha loron 18 to’o 20 Novembru 2016 no organiza husi Ministeriu Saude.

Entertantu Ekipa Ministeriu Interior okupa Segundu Lugar (Juara II) no ekipa PNTL Kuartel Jeral okupa Terseru Lugar (Juara III); no Ekipa Feto Atauro okupa kuatru Lugar (harapan I) Taxa ba Vensedor sira maka hanesan osan no taxa (Piala).

Segundu Komandante Jeral PNTL Komisariu Polisia Faustino da Costa iha nia intervensaun hateten liu husi kompetisaun ida ne’e partisipante sira tenta atu esplora no hatudu servisu ekipa no espiritu de korpu ne’e inportante.

Komisariu ne’e haktuirtan katak kompetisaun ne’e inportante ba saude korasaun ne’ebe diak maka ita tenta manan material balu hanesan osan no taxa ne’ebe maka komisaun organizadora prepara hafoin ida ne’e ita buka atu manantan konfiansa katak ami nia ekipa maka mais mellor no ema selukmos rekuinese ida ne’e.

“Kompetisaun ne’ebe halao iha Kuartel Jeral ne’e hola parte hanesan atividade Polisiamentu Komunitariunune’e Komunidade mos bele vizita Kuartel Jeral PNTL atu sira bele hatene katak fatin ne’e laos ba Polisia deit maibe ne’e oportunidade ida ba sira hodi hatene katak Polisia nia edifisiu ne’e hanesan ne’e no bele halo atividade hamutuk ho komunidade”.

Kompetisaun Nasional Poco-Poco ne’e halao durante loron tolu 18-20 Novembru 2016, loron primeiru partisipa husi ekipa hamutuk 6 no loron da ruak partisipa husi ekipa 8, hodi hatudu katak servisu ekipa no espiritu de korpu ne’e inportante liu.

Kompetisaun poco-poco ba dala 3 ne’e partisipa husi ekipa 14 husi Ministeriu Interior, PNTL (ekipa rua), Ministeriu Saude, Ministeriu Agrikultura no Peskas (MAP), Cruz vermelha Timor-Leste (CVTL), Ministeriu Obras Publika (ekipa rua),Hospital Nasional Guido Valadares(HNGV) no Feto Atauro. Media PNTL

Dili, Komando Polísia Nasional Timor Leste (PNTL) liu husi departamentu Polisiamentu Komunitaria realiza enkontru annual ho parseiru desenvolvimentu sira hanesan The Asia Foundation (TAF), BELUN, UNDP no Fundasaun Mahein (FM) ne’ebe maka durante ne’e fó apoio ba iha Community Policing Program Management Committee (PMC) atu hare’e progresu servisu durante tinan 2016.

Komandante Jerál PNTL Komisairu Julio da Costa Hornay ne’ebe halo abertura iha Enkontru PMC ne’e hateten Komandu apresia ho apoio parseiru sira nia mai iha PNTL ne’ebe iha avansu bo’ot liu-liu ba iha departamentu Polisiamentu Komunitaria tanba hetan konfiansa másimu husi komunidade.

“Husi apoio hirak ne’ebe maka parseiru sira fó, progresu sira ne’e maka hanesan kolokasaun Ofisial Polísia Suku (OPS), Konsellu Polisiamentu Komunitariu (KPK), Konsellu Seguransa Munisipiu (KSM) nia apoio servisu iha prevensaun konflitu iha nivel aldeia, suku to’o mai iha nivel nasional”, tenik Komandante Jerál PNTL.

Komisairu Julio da Costa Hornay subliña liu tan katak antuziasmo PNTL nian ba programa parseiru sira nian maka Komandu Jerál kolaka ona OPS hamutuk 442 iha Suku, apoio motorizada atu fó suporta sira nia servisu, laptop 442 prepara atu fahe no tuir planu sei kompleta tan maka radiu komunikasaun no fatin ba membru sira atu servisu.

“Husi resultadu hirak ne’e laos mai mesak husi PNTL maibé hamutuk ho parseiru sira ita desenvolve aktividade polísia komunitaria nian no ita mós espera katak iha tinan rua oin mai nesesidades importante balun ne’ebe maka tau iha Planu Estratéjiku Desenvolvimentu Nasional (PEDN) departamentu Polisia Komunitaria sei hare’e atu bele hetan apoio ruma husi parseiru sira”, hateten Komisairu Julio da Costa Hornay.

Iha fatin hanesan, Xefe Departamentu Polisiamentu Komuntariu Superintendente Asistente António da Luz hateten objetivu husi annual metting ne’e, halo atu hare’e progresu servisu polísia komunitariu nian durante ne’e.

“Objetivu husi enkontru ne’e mak Komandu PNTL liu husi departamentu polísia komunitariu hamutuk ho parseiru sira organiza atu bele hare’e kona-ba progresu servisu polísia komunitariu nian hamutuk ho parseiru sira trasa ona iha planu annual ninian ne’ebe maka hetan aprovasaun husi Komandante Jerál atu implementa iha tinan 2016”, subliña Xefe Departamentu Polisiamentu Komuntariu.

Superintendente Asistente António da Luz akresenta liu tan katak resultadu husi aktividade hirak ne’ebe maka hala’o ona iha tinan 2016 apresenta iha enkontru ne’e atu bele hetan apresiasaun, sujestaun balun husi komandu no parseiru sira atu bele hare’e kontinuasaun ba iha programa polísia komunitaria nia iha tinan 2017.

Media PNTL.

Dili- Komandu PNTL husu ba komunidade suku Kaikoli uma kain 11 ne’ebe maka afetadu ba futuru konstrusaun edifisiu Kuartel Jeral atu kopera ho governu nune’e bele aselera prosesu hari edifisiu foun.

Komandante Komandu Administrasaun Superintendente Xefe Mateus Fernandes hateten komunidade tenke kopera atu nune’e dezenvolvimentu konstrusaun ne’e bele lao tanba governu preve ona orsamentu atu halo konstrusaun ne’e iha tinan 2017, Nia hato’o asuntu ne’e liu husi komferensia emprensa hamutuk ho Diresaun Terras Propriedade iha Kuartel Jeral PNTL Kikoli Dili Sexta (11/11).

Nia haktuirtan katak husu ba uma kain 11 ne’ebe maka seidauk kopera governu la taka dalan ba imi atu rezista se lalais liu entaun diak liu tanba ami fo ona prazu loron tanba kuandu hein kleur liu maka orsamentu bele fila fali ba kaixa estadu.

Iha okajiaun ne’e Diretor Interinu Diresaun Nasional Terras Propriedade Servisu Cadastral (DNTPSC) Gabriel C de Araujo hateten Komunidade afetadu uma kain 21 ne’e uma kain 7 maka kopera hodi asina kontratu indimizasaun ba uma no ai horis ami finalize ona no lori dokumentu mai entrega iha komandu Jeral PNTL, no uma kain 11 seidauk koopera.

Nia haktuirtan katak DNTPSC halo ona faze prosesu orsamentu ba finansas hafoin sira nia orsamentu tama iha sira nia konta bankaria maka ekipa sei fo notifikasaun no husu sira hamamuk fatin bazeia ba kontratu ne’ebe maka iha, no sira ne’ebe ba kopera sei halo despezu administrativu.

Total orsamentu ne’ebe maka aprova ba komunidade afetadu hamutuk $362.147,21, orsamentu ba kada familia depende ba avalisaun ne’ebe maka ekipa Ministeriu Obras Publika halo no ba komunidade sira ne’ebe halo reklamasaun bele hato’o ba Tribunal no parte governu hare atu rezolve.

Indimizasaun sei refere ba uma no ai horis kona ba rai sei tuir mai tanba lei rai sei iha prosesu diskusaun iha Parlamentu Nasional wainhira lei ne’e aprovadu no promulga maka sei regulariza tuir lei ne’e.

Dialogu no enkontru aproximasaun ho komunidade afetadu halao husi ekipa interministerial ne’ebe maka kompostu husi Ministeriu Justisa (DNTPSC), Ministeriu Obras Publika, Ministeriu Agrikultura no PNTL hanesan nain ba projetu hahu halo prosesu ne’e desde tinan 2014 to’o agora no ekipa konsege rekola uma kain 20 hamutuk hamutuk komunidade 18 maka hela iha neba no ita halo prosesu to’o ohin loron iha komunidade nain 7 maka kopera ho governu liu husi akta-akta enkontru no rejolusaun ne’ebe maka hasai husi governu iha loron 5 outubru tinan 2016. Media PNTL

Dili, hahu’u husi inisiu tinan 2016 to’o iha fulan Outubru, Polísia Nasional Timor Leste (PNTL) rejista ona asidente tráfiku hamutuk 1.540, kanek kma’an hamutuk 1.274, kanek todan hamutuk 312 no ema hamutuk na’in 56 maka mate.

Komandante Jerál PNTL Komisariu Julio da Costa Hornay iha segunda ne’e (14/11) hateten kauza husi asidente hirak ne’e maioria tanba fatór umanu no fatór estrada.

“Kauza husi asidente hirak ne’e maka fatór umanu, fatór estrada no mós la kumpri regras tránzitu ne’ebe maka ita nia lei kódigu estrada kria tiha ona ba ita nia rai ida ne’e”, tenik Komandante Jerál PNTL ba jornalista sira iha nia kna’ar fatin.

Komisariu Julio da Costa Hornay apela ba kondutor sira ne’ebe maka lori karreta no motor atu bele kumpre regras tránzitu ne’ebe maka iha, no lori karreta labele ho kondisaun lanu tanba vida pasajeiru sira nia iha kondutor nia liman.

“Ne’e duni husu ba maluk Timoroan sira hotu atu toma atensaun hodi ita bele reduz númeru asidente no reduz vida Timoroan sira nia ne’ebe lakon iha estrada”, salienta Komisariu Julio da Costa Hornay.

Seguransa Eleisaun Suku, Primeiru no Segundu Ronde Kontroladu

Relasiona ho aktividade Eleisaun Suku ne’ebe hala’o iha teritoriu Timor laran tomak, hahu’u husi primeiru no segundu ronda, PNTL konsege asegura ho diak no kontroladu.

Komandante Jerál PNTL ne’e ba jornalista sira hateten durante eleisaun suku hala’o, insidente hamutuk 10 maka akontese maibé PNTL konsege asegura seguransa ho diak.

“Durante prosesu eleisaun ne’e lao iha munisipiu 13, em jerál lao ho diak, kontroladu maske akontese insidente balun husi joven sira ne’ebe maka provoka situasaun iha sentru votasaun maibé PNTL konsege hakalma, joven balun maka konsege lori mai iha sela detensaun nune’e mós seguransa eleisaun suku ba segunda ronde nian lao ho diak to’o mai agora iha ne’ebe balun sei iha prosesu apuramentu nia laran”, esplika Komandante Jerál PNTL.

Komisariu Julio da Costa Hornay akresenta tan katak maske membrus PNTL sira ne’ebe maka fó seguransa iha kada sentru votasaun mínimu, maibé ida ne’e la sai obstakulu ba instituisaun PNTL atu asegura eleisaun suku nia ho diak.

Iha biban ne’e mós Komandante Jerál PNTL hato’o votu parabens ba xefe suku eleitu no ba komunidade tomak iha Timor laran ne’ebe kontribui duni sira nia ann ba iha eleisaun ida ne’e ho diak, hodi garante estabilidade no paz.

PNTL Sei Kontrola Fogetes Iha Loja Sira

Hare’e ba besik ona tama fulan Dezembru, PNTL sei kontrola Supermerkadu no loja sira ne’ebe maka komesa ona faan fogetes maske laiha autorizasaun husi parte kompotente.

“Aproveita oportunidade ida ne’e hau husu ba komunidade tomak, liu-liu emprezariu internasional no mós nasional sira atu labele faan fogetes iha loja antes tempu Natal, maibé ita komesa rona ona fogetes nia lian, tanba ne’e komandu fó ona ordem ba PNTL munisipiu Dili hodi kontrola no prende sasan hirak ne’e”, apela Komisariu Julio da Costa Hornay.

Media PNTL.

Dili- Polisia Nasional Timor-leste (PNTL) nain 2.448 sei fo seguransa ba Eleisaun Suku Segunda Ronde ne’ebe maka sei halao iha loron 13 fulan Novembru iha Sentru votasaun 1.530

Komandante Komandu operasaun Superintendente Henrique da Costa hateten Komandu PNTL sei koloka nia membru iha Sentru Votasaun hodi garante seguransa ba Eleisaun Segunda Ronde atu nune’e povu bele ba vota ho seguru.

Komandante ne’e haktuirtan katak kolokasaun pessoal iha sentru votasaun lahanesan bazeia ba fatin ne’ebe maka iha risku komandu munisipiu ida-idak sei koloka membru tuir nesesidade ne’ebe maka iha.

Komandu Jeral apoiu membru hamutuk nain 298 ba Komandu munisipiu 12 hodi fornese seguransa iha sentru votasaun nomos seguransa taktika hodi responde ba situasaun ruma.

Membru sira ne’ebe maka sei fo seguransa husi Unidade Epesial Polisia (UEP), Unidade Polisia Maritima (UPM), Unidade Polisia Fronteira (UPF), Centru Formasaun Polisia no Komandu Jeral.

Serimonia Deslokasaun membru PNTL ba munisipiu sei halao iha loron 12 fulan Novembru tuku 8:30 iha Kurtel Jeral PNTL Kaikoli Dili no prezidi husi Komandante Jeral PNTL Komisariu Polisia Julio da Costa Hornay. MEDIA PNTL.

Dili- Polisia Nasional Timor-Leste (PNTL) rejista insidente hamutuk 12 iha Sentru Votasaun iha munisipiu Dili, Ainaro, Baucau, Viqueque, Lautem no Cova-Lima.

Komandante Komandu Operasaun Supertintendente Xefe Henrique da Costa hateten durante fo seguransa ba Eleisaun Suku iha loron 29 fulan Outubru mosu problema ou insidente hamutuk 12 hanesan joven balu hemu tua lanu no tenta tama iha sentru votasaun ho intensaun atu impede Eleisaun Suku no tenta atu foti Bulletin de Votos husi brigada sira, hahalok hirak ne’e konsidera hanesan krime, Nia hato’o asuntu ne’e ba media PNTL iha nia knar fatin Kaikoli Dili (07/11).

Nia haktuirtan katak PNTL konsege kaptura suspeitu hirak ne’e entrega ba Komandu PNTL munisipiu ida-idak hodi kontinua halo prosesu investigasaun no lori ba Tribunal; Maske mosu problema balu iha Sentru Votasaun maibe PNTL kontinua mantein seguransa no Eleisaun Suku lao ho diak no tuir rezultadu husi STAE katak Kandidatu Sefe Suku barak maka pasa ba Segunda Volta tanba ne’e iha loron 13 fulan Novembru sei halao eleisaun segunda volta maka oras ne’e dadaun komandu PNTL prepara hela planu operasaun no membru hodi fo apoiu seguransa.

Relasiona ho Eleisaun Suku segunda volta ne’ebe maka sei halao iha loron 13/11 Komandante Komandu Operasaun ne’e husu ba Komunidade sira nia apoiu no koperasaun hamutuk ho membru PNTL ne’ebe maka koloka iha sentru votasaun hodi asegura seguransa atu nune’e eleisaun segunda volta bele lao ho susesu.

Eleisaun Suku ne’ebe maka realiza iha loron 29 fulan Outubru tinan 2016 hetan apoiu husi membru PNTL Nain 2.893 hodi fo seguransa ba Sentru Votasaun 2.225 iha teritoriu Timor-Leste laran tomak tanba Seguransa ba Eleisaun Suku hanesan faze ida atu esprimenta kapasidade forsa PNTL atu asegura festa demokrasia ida ne’e

Membru PNTL assume sira nia knaar ho diak maske hasoru difikuldade menus rekursu humanus tanba ne’e koloka kada sentru votasaun membru nain ida deit maibe tanba apoiu maximu husi Autoridade Lokal, joventude, no Komunidade sira maka Eleisaun Suku lao ho diak. Media PNTL

Dili- Durante semana ida hahu loron 21 to’o 31 fulan Outubru Polisia Nasional Timor-Leste (PNTL) rezista kazu asidente trafiku hamutuk 51 no rejulta vitima nain rua mate no nain 11 kanek todan.

Komandante Komandu operasaun Superintendente Henrique da Costa hateten Asidente Trafiku semana ida hahu dia 21 to’o 31 Outubru rejista kazu 51ne’ebe rejulta vitima nain 2 mate, nain 11 kanek todan no nain 37 kanek kmaan, Nia hato’o asuntu ne’e ba jornalista sira iha nia Gabinete Kuartel jeral PNTL Kaikoli Dili (07/11).

Nia informatan katak husi kazu 51 ne’ebe maka rejista ona kazu haat maka prosesu final iha Tribunal, kazu 9 iha prosesu nia laran no kazu 38 maka resolve tuir familia.

Kazu asidente trafiku ne’ebe maka akontese maioria kauja fator humanu ou neglijensia humanu. Media PNTL.

Dili, atu bele kompleta servisu Polísia Nasional Timor Leste (PNTL) Unidade Tránzitu iha munisipiu 13 no Ofisial Polísia Suku (OPS) komandu entrega motorizada hamutuk 123.

Komandante Jerál PNTL Komisariu Polísia Julio da Costa Hornay ne’ebe entrega ofisialmente motorizada ba membru Tránzitu no OPS husu ba membrus tomak atu utiliza motorizada hirak ne’ebe maka governu fó mai iha PNTL nu’udar apoio tomak ba servisu instituisaun nian iha baze.

Ba membru OPS sira ne’ebe maka simu motorizada, Komandante Jerál PNTL apela, “Husu ba ita bo’ot sira atu utiliza responsabilidade ba servisu nasaun ninian, servisu ba povu nian tanba motorizada hirak ne’e governu sosa ho osan povu nian tanba ne’e utiliza hodi serve ita nia povu laos ba interese privadu”.

Komisariu Polísia Julio da Costa Hornay hato’o mós ba membru Tránzitu hirak ne’ebe maka simu motorizada ba kada munisipiu apela ba utilizasaun transporte hirak ne’e tenke ho responsabilidade atu bele dura ba tempu naruk.

“Ita ne’ebe hetan ona oportunidade utiliza ho didiak, kontrola ho didiak hanesan ita nia rasik para ita bele uza ho durasaun tempu ne’ebe naruk tanba ne’e husu atu uza ho responsabilidade ba interese servisu nian, bainhira utiliza motorizada ne’e laiha apoio ba manuntensaun no mós kombustivél ida ne’e ita bo’ot sira nia responsabilidade másimu tuir polítika ida ne’ebe governu deside ona”, afirma Komandante Jerál PNTL.

Total motorizada ne’ebe maka fahe hamutuk 123 ba munisipiu 13, motorizada 60 ba OPS no motorizada 63 ba Tránzitu.

Serimonia entrega motorizada ne’e halo direktamente husi Komandante Jerál no akompaña husi Komandante PNTL munisipiu sira iha Kuartél Jerál Kaikoli.

Media PNTL.

Dili- Membru Unidade Polisia Maritima nain 21 foti Boña no ofisialemnte integra iha Unidade Polisia Maritima (UPM) hodi halo servisu kontrola tasi.

Komandante Jeral PNTL Komisariu Polisia Julio da Costa Hornay hateten orgulu ba Komandu UPM bele treina membrus sira no prepara unidade ida ne’e diak ba daudauk hahu ho membru nain 27 to’o ohin loron atinji ona 155 no sei aumenta nafatin to’o alkansa numeru ne’ebe maka ita nesesita, Nia hato’o asuntu ne’e iha serimonia foti boña ba membrus UPM iha Kuartel UPM Lecidere (21/10).

Nia haktuirtan katak Unidade ida ne’e reprezenta feto sira nia kapasidade, matenek no involvimentu iha parte hotu hanesan ohin ita hare no asisti feto sira bele nani hamutuk ho mane sira ho distansia hanesan no bele halo buat hotu hanesan mane sira halo, parabens ba feto PNTL no especial ba feto UPM hau espera katak bele iha parte hotu, Unidade, Departamentu, no Munisipiu mos hatudu sira nia kapasidade diak hanesan membru no Komandante husi nivel eskuadra to’o munisipiu ita priense ona.

Kuaze tinan rua nia laran UPM hasoru difikuldade boot tanba Roo lansa 17 att hotu maibe ohin ita konsege hadia no halo manutensaun no bele uza fali hodi asegura no kuida didiak no uza tuir nesesidade tanba wainhira aat atu hadia mos presija tempu tanba ne’e fasilidade no ekipamentu ne’ebe iha uza ho responsabilidade hanesan imi nia moto disiplina ne’e inposrtante, disiplina iha servisu no utilijasaun inventarijasaun estadu nian ne’ebe foba ita, ita utilija ho diak tuir regras no nesesidade .

Hafoin tinan 16 PNTL hari to’o ohin loron ita hare maske difikuldade barak maibe ita priense utuan-utuan ho apoiu governu mai Komandu no unidade ita hare iha abansu ida ne’ebe sufsiente atu bele lao ba oin hau husu ba Komandu no membru tomak atu kontinua mantein ida ne’e hodi asegura saida maka iha ona hodi lao ba oin nune’e bele asegura husi kriminozu sira ne’ebe bele utilija ita nia tasi hodi halo asaun krime ne’ebe ita lahakarak iha ita nia rain ne’e maka misaun UPM nian kumpri ba ho responsabilidade no dignidade nomos sentimentu nain ba rai ida ne’e.

Iha okajiaun ne’e Komandante UPM Superintendente Xefe Lino Saldanha hateten Unidade Maritima iha nia doutrina rasik katak tenke prontu bokon, metan, servisu ekipa no servisu tuir lei no ordem no prontu mate bainhira lahatene nani tasi.

Nia haktuirtan katak UPM mos iha karakter integridade, responsabilidade, no disiplina ne’ebe ass hodi kontrola tasi no tenke badinas no matenek hodi servi povu no nasaun ne’e ba oin tanba ne’e husu ba membru UPM nain 155 atu banati tuir dutrina no karakterisitka ne’e.

Atu garante estabilidade no seguransa tenke tau iha pratika maka tenke iha responsabilidade, disiplina, badinas no matenek atu servisu diak no fo forsa ba Komandu Jeral no Ministeriu Interior atu servisu makaas liutan.

Antes termina Komandante ne’e mos husu ba Ministeriu Interior, Komandu Jeral no parseiru sira atu apoiu nafatin Unidade ne’e hodi bele dezenvolve aan diak liutan tanba ho imi nia apoiu maka unidade ne’e bele hakat ba oin tanba haumutuk ho imi ita bele halo buat barak no lao ba oin.

Serimonia Taka Boña ba membrus UPM ne’e kompleta ho lansamentu ba monumentu UPM husi Komandante Jeral no Segundu Komandante Jeral ho prezensa husi Prezidente CNE Alcino Baris, Atase POLRI iha Embaixada Indonezia, Prezidente Komite 12 Novembru Gregorio Saldanha, Diretor Jeral Ministreriu Interior, Diretor PSIC, Komandante Komponente Naval F-FDTL, konvidadus no familia graduadu sira. Media PNTL