News

Batugade, membru na’in 30 husi Unidade Patrullamentu Fronteira, Polísia Nasional Timor Leste (PNTL) ofisialmente integra ann hafoin partisipa treinamentu báziku durante fulan sia no halo estájiu durante fulan tolu.

Inspetór Jerál PNTL Superintendente Xefé Carlos Jerónimo ne’ebe representa Komandante Jerál iha nia diskursu ba serimonia enseramentu ne’e hateten membru UPF sira ne’e representa instituisaun PNTL nian iha fronteira.

“Joven 30 ne’ebe eskolidu husi ema atus rua resin ne’e, laos fasil atu ita bo’ot sira integra mai iha UPF, iha fatin ida ne’e ita bo’ot sira exerse funsaun hanesan lutu ba nasaun no mós hatudu oinsa atu bele hametin dignidade estadu Timor Leste liu husi imi nia kna’ar iha fronteira”, tenik Inspetór Jerál PNTL.

Superintendente Xefé Carlos Jerónimo salienta ba membrus UPF tomak katak, kna’ar membrus UPF sira nia laos ida deit, tanba além de garante seguransa iha liña fronteira Unidade ne’e iha kna’ar importante ida tuir modelu PNTL nian maka polísia proximidade ou polísia komunitariu ne’ebe la hase’es an husi komunidade.

“Wainhira ita hakbesik ba komunidade, ita hato’o saida deit ba komunidade, sira sei depozita sira nia konfiansa mai ita tanba sira hatene saida maka ita hakarak atu hato’o ba sira, tanba ita bo’ot sira mós sai hanesan mikro estadu nian hodi transmite informasaun saida deit kona-ba fronteira nian, kona-ba legislasaun sira ne’ebe maka vigora ita nian rai”, haktuir Superintendente Xefé Carlos Jerónimo.

Inspetór Jerál PNTL apela ba membrus UPF tomak atu nafatin garante estabilidade seguransa iha liña fronteira hodi kaer nafatin disiplina ne’ebe instituisaun PNTL iha ba ninia membrus sira. Komandu mós sei la tolera membrus se’e deit maka involve iha aktu krime no sei foti sansaun tuir prosesu disiplinar PNTL nian.

Iha serimonia ne’e taka mós Boinha no entrega sertifikadu ba membrus UPF foun sira. Partisipa iha serimonia ne’e Komandante Centru Formasaun Polísia (CFP), Komandante Eskuadra Batugade, autoridade lokal, representante diresaun Afândega no komunidade sira.

Media PNTL.

Batugade- Unidade Polisia Fronteira (UPF) kaptura membru Grupu Arte Marsiais (GAM) Persaudaran Setia Hati Terate (PSHT) nain 79 ne’ebe maka ba sai warga (Pengesahan) iha Indonezia/Atambua no fila mai Timor liu fronteira Terestre (Bobonaro no Suai).

Komandante Jeral PNTL Komisariu Polisia Julio da Costa Hornay hateten UPF kaptura membru PSHT nain 79 iha Suai no Batugade no sira rasik deklara katak sira Pengesahan iha Indonezia no fila mai iha loron 19 de Outubru kalan liu Fronteira Mota-Ain no Suai, Nia hato’o asuntu ne’e iha Kuartel UPF Batugade munisipiu Bobobaro (20/10).

Komisariu ne’e haktuirtan katak Hafoin prosesu investigasaun sei entrega ba Komandu PNTL munisipiu Bobonaro nia investigador no kontinua ba Tribunal Distrital Suai hodi halo Primeiru Interogatoriu no Tribunal maka sei desidi bazeia ba lei ne’ebe maka vigora no hein katak ho ida ne’e bele halo prevensaun ba joven sira labele violatan rejolusaun governu   ne’ebe bandu Arte Marsiais PSHT, KORKA, KERA SAKTI atu halao sira nia aktividade.

Governu taka arte marsiais hirak ne’e hodi estabelese paz no dame iha rai laran tanba ne’e hau husu ba joven sira atu kumpri rejolusaun ne’ebe maka governu hasai, nudar Forsa Seguransa PNTL inplementa rejolusaun ne’ebe maka governu hasai no lei hirak ne’ebe maka vigora iha nasaun ne’e hodi asegura ema hotu bele kumpri.

Komandante Operasaun UPF Inspector Xefe Bernado Freitas hateten membru PSHT hirak ne’e UPF kaptura ho sasan evidensia hanesan hatais farda kompletu, no sira seluk la uza farda tanba tauk ema hare iha dalan no impede sira nia movimentu tanba ne’e sasan balu sira rai iha Atambua no fila mai isin tanan maibe hafoin Polisia passa revista no cek informasaun liu husi telfone hetan sira nia fotorgrafia kompletu ho atributu tanba ne’e ami sita.

Nia haktuitan katak ami identifika Señor ida hanesan Kiai uza uza farda kompletu ho nia kaben lori ema nain 6 ba Pengesahan.

PNTL/UPF kaptura membru PSHT hamutuk nain 79 ne’ebe kompostu husi feto nain 11 no mane nain 69, sidadaun timor oan hirak ne’e nain 15 maka ba ho pasaporte no restu illegal, grupu ne’e maioria joventude no identifika professora ida husi Eskola Ensinu Baziku Central 20 de Agostu Ermera, Funsionariu Tribunal Distrital Dili nain ida no funsionariu Alfandega nain ida. Media PNTL

Dili, Seminariu Transnasional Krime ne’ebe organiza husi CFP-AFP durante loron tolu, sexta feira ne’e (21/10) ensera husi Komandante CFP.

Workshop ne’ebe ho tema ““Transnational Crime ba Membrus PNTL No PSIC Bele Aumenta Kapasidade Hodi Kombate Krime Organizadu Entre Nasaun” partisipa husi membru Polísia Nasional Timor Leste (PNTL), Polísia Sientifika Investigasaun Criminal (PSIC-Ministeriu Justisa), Imigrasaun no Alfândega ne’e ensera ho fahe sertifikadu ba partisipantes sira ne’be durante loron tolu partisipa iha seminariu refere.

Representante partisipantes iha workshop ne’e Inspétor Xefe Ambroso Gomes hateten materia sira ne’ebe fahe husi orador sira durante seminariu ne’e, sai hanesan koñesimentu ida ne’ebe diak tebes hodi bele aplika iha servisu fatin.

“Ami agradese tebes ba parseiru sira nia apoio hodi bele realiza workshop ne’e, no ami sujere ba Komandu PNTL atu iha futuru seminariu hanesan ne’e bele kontinua atu nune’e matenek ne’ebe ami simu bele aumenta hodi bele kombate Krime Transnasional iha ita nia rai”, tenik Inspétor Xefe Ambroso Gomes.

Entertantu, Komandante CFP Superintendente Polísia Arquimino Ramos iha ninia diskursu enseramentu ne’e hateten kursu ne’e sai hanesan tempu diskusaun ida entre insitutisaun seguransa nian (PNTL, PSIC,Imigrasaun no Alfândega) oinsa atu bele koopera hodi kombate Krime Transnasional ne’ebe agora dadaun buras iha nasaun barak.

“Fiar katak durante tolu ne’e ita bo’ot sira aprende materia lubuk ida no bele fahe informasaun ba malu, atu nune’e servisu iha terenu, bele iha diferensia instituisun maibé ita nia kooperasaun atu kombate Krime Transnasionl ne’e hanesan”, hateten Komandante CFP.

Superintendente Polísia Arquimino Ramos hatutan tan katak iha futuru sei hala’o mós Kursu ho tipu hanesan ne’e, ho presensa Komandu F-FDTL nian atu nune’e instituisaun seguransa hotu bele servisu hamutuk iha futuru. Orador sira durante seminariu ne’e mai husi TLPD_, CFP, PSIC no Prokuradór Geral.

Enseramentu ne’e, taka ho fahe sertifikadu ba partisipantes sira.

Media PNTL.

Programa Timor-Leste National Police – Strengthening Governance and Service Delivery’  harii  bazeia ba programa anterior husi apoio  PNUD nian   funções no jestaun  administrasaun nudar xave ba  PNTL, liuhusi  apoia ba mudanças sistêmikas iha nível sentral hodi  assegura katak bele transforma nia rezultados ho verdade ba servisu nebe halao husi policia  iha  nível lokal.

Hodi bele transforma rezultadu hirak ne’e iha nivel lokal, PNUD lihusi programa ‘Timor-Leste National Police – Strengthening Governance and Service Delivery’ iha tinan 2016, kuntinua loke ninia espasu hodi apoiu atividade PNTL iha Munisipiu Baucau nudar programa pilotu dahuluk antes atu kuntinua ba munisipiu seluk.

Hodi bele hasae kunhesementu membrus PNTL munisipiu Baucau, faze dahuluk husi programa ne’e halao tiha ona formasaun komputador baziku ba programa Microsoft Word no Excel nune’e mos formasaun lori motorizada nebe involve ativamente membrus PNTL Munisipiu Baucau.

Objetivu husi formasaun komputador baziku atu hasa’e kapasidade pesoal PNTL ida-idak atu bele konhese no hatene uza komputador iha atividade servisu lor-loron iha area administrasaun, no investigasaun. Nune’e mos iha formasaun ne’e atu ajuda mos komunidade nebe lidera husi polisia komunitariu liuhusi maneiras uza aparelho teknolojia ho diak. Kuntinuasaun husi formasaun ne’e mos oinsa atu bele dezenha formatu estandarte ida kona ba tipu de formatu relatoriu inklui mos oinsa atu halibur baze de dadus relasiona ho servisu polisia nian. Kursu ne’e rasik hahu’u husi 10 – 21 Outubru 2016 nebe involve 20 pesoas husi seksaun no eskuadra sira iha PNTL Munisipiu Baucau. Realizasaun ba formasaun ne’e liuhusi koperasaun hamutuk ho ONG local INFOTIMOR.

Nune’e mos iha tempu nebe hanesan , halao mos formasaun kona ba oinsa lori motorizada ho diak inklui uza aparelu wainhira lori motor nebe hatoo direita husi INSTRUTOR Sentru Formasaun Polisia, Komoro, Dili. Total partisipantes nebe partisipa iha formasaun ne’e hamutuk 20 pesoas nebe involve mos polisia husi eskuadra balun iha Munisipiu Baucau hanesan Quelicai, Baugia no Venilale inklui mos seksaun balun iha Kuartel PNTL Munisipiu Baucau.

Manufahi- Konfiansa konsiderandu hanesan fator inportante hodi hari relasun positivu entre polísia no komunidade. Polisia disposta hodi hatudu bontade nebe diak, harii lina komprensun no iha konsiderasaun wainhira iha interasaun ho komunidade hodi konstrui konfiansa entre komunidade no polísia.

Polisia prefere uza abilidade komunikasaun hodi komunika ba malu iha situasaun saida deit ho meius possível no la uza forsa fízika wainhira hasoru problema iha komunidade nia leet.

Estratégia komunikasaun ho nia tátika nebe maka iha hodi fortalese relasaun ho komunidade fundamentu tebes hodi artikula polisia nia misaun no vizaun  ho nia objetivu hodi nune’e publiku bele iha kunfiansa ba atuasaun nebe polisia halo iha terenu . atu garantia situasaun hanesan ne’e Programa Nasoens Unidas da Dezenvolvimentu (PNUD) Timor Leste através husi ninia programa ” Timor-Leste National Police – Strengthening Governance and Service Delivery ‘organiza formasaun kona ba Komunikasaun Efikasia no papel Relasoens Públikas ba membru PNTL iha munisipiu  Manufahi no Covalima.

Komandante PNTL munisipiu Manufahi Superintendente Agustinho Gomes, iha serimônia enseramentu iha 4 Outubro 2016 hateten “Hodi mantein segurança no ordem iha sociedade, nesesita tebes atu iha kultura komunikasuan harmonia hodi preserva nafatin prinsípiu Lei no Ordem nudar pilar fundamental hodi asegura atividade polisia nian lao ho susesu “.

Nudar instituisaun de direitu, estabelesimentu komportamento kona ba modelu komunikasaun ba membru PNTL sira essensial tebes. La iha mekanismu hodi garantia métodu komunikasaun nebe ezistente ho orientasaun, prátika diak nebe maka suseptíveis sei la hetan rezultadu nebe maka diak.

Programa PNUD nian ne’e estende hodi apoio no dezenvolve kapasidade polísia hodi aplika método rezolve problema liuhusi metodu komunikasaun nebe efikas hodi evita uza forsa nudar forma hodi rezolve problema iha komunidade. Avaliasaun ne’e konsidera nudar área nebe essensial hodi assegura no melhora servisu Polisia ho komunidade sai efetivu liu tan . Tanba  servisu polisia nian ejiji atu polisia iha konesementu no abilidade komunikasaun verbal hodi halao funsaun ho eficiente.

“Nudar primeira lina husi komunikasaun, Polisia iha obrigasaun simu ordem husi Komandante no  tengki komunika ho klaramente kona ba situasaun emerjênsia nebe akontese ho nível husi ameasas “, hateten Superintendente Eugenio Ferreira, Komandante PNTL Covalima iha nia observasaun ba treinamentu nebe halao iha Salaun inkontru Komandu PNTL munisipiu Covalima (6/10).

Programa Timor-Leste National Police – Strengthening Governance and Service Delivery’ harii bazeia ba programa anterior husi apoio PNUD nian   funsun no jestaun administrasaun nudar xave ba PNTL, liuhusi apoia ba mudansa sistêmikas iha nível sentral hodi assegura katak bele transforma nia rezultadu ho verdade ba servisu nebe halao husi polisia iha nível lokal.

Formasaun kona ba komunikasaun efikas no servisu Relações Públikas halao tiha ona ba membru PNTL munisipiu Baucau no Bobonaro iha fulan Fevereiru  ho nia topiku kona ba oinsa estabelese relasun konfiansa entre Polisia no Komunidade ho metodu komunikasaun no estratéjia hodi bele konstrui konsiênsia, kompreensaun no aseitasaun.

Programa ‘Timor-Leste National Police – Strengthening Governance and Service Delivery ’ husi PNUD iha  kolaborasaun importante ho parseiria dezenvolvimentu hanesan Polícia Federal Australiana, USAID no mos Governo Japão. Nebe konsentra liu ba areas fundamentais governansaun nian hanesan: 1) Estratégico Planeamentu, 2) Tecnologia Informação (TI) , Jestaun database, 3) Jestaun Aquisição, 4) Jestaun Recursos Humanos 5) Informasaun públika no 6) Jestaun frotas. Media PNTL

Dili, atu bele kombate krime Transnasional iha nasaun Timor Leste, Polísia Nasional Timor Leste (PNTL) liu husi Centru Formasaun Polísia (CFP) hamutuk ho Australia Federal Police (AFP) organiza seminariu ida atu bele aumenta kapasidade membrus PNTL hodi kombate krime organizadu entre nasaun.

Segundu Komandante Jerál PNTL Komisariu Polísia Faustino da Costa ne’ebe ofisialmente halo abertura ba seminariu ne’e hateten ho seminariu ne’e maka partisipantes sira ne’ebe maka mai husi Polísia Sientifika Investigasaun Criminal (PSIC-Ministeriu Justisa), Imigrasaun, Alfandega no PNTL bele iha liña koordenasaun ne’ebe diak hodi bele kombate krime transnasional ne’ebe mai ho forma oin-oin.

“Seminariu ne’e, inisiaitiva ida mai husi CFP ne’ebe hetan apoio husi TLPDP hodi halo formasaun ida ne’e no formasaun konjuntu hanesan ne’e iha Timor Leste foin maka ba dala uluk ne’ebe maka envolve PSIC, Imigrasaun, Alfândega, Unidade sira iha PNTL hanesan fronteira no investigasaun munisipiu sira hotu”, tenik Segundu Komandante Jerál PNTL.

Komisariu Polísia Faustino da Costa realsa tan katak partisipantes sira ne’ebe hamutuk ema na’in 50 ne’e bele hetan koñesimentu ida ne’ebe ho level hanesan tanba ho koñesimentu no prosedimentu ne’ebe hanesan maka iha atuasaun, atendimentu sira ba públiku sei laiha diferensa.

Iha fatin hanesan, Komandante CFP Superintendente Polísia Arquimino Ramos iha ninia diskursu ba semanariu ne’e hateten ho realizasaun workshop ne’e maka bele halibur esperiensia husi parte hotu-hotu hodi hametin pás no seguransa iha Timor Leste.

“Tuir relatoriu ida iha tinan 2016 hateten katak Krime transnasional sira akontese maioria tanba investimentu ne’ebe ki’ik iha sektor seguransa liu-liu iha ba ekipamentus no mós implementasaun lei husi komponente seguransa sira”, salienta Komandante CFP.

Seminariu ne’ebe ho tema “Transnational Crime ba Membrus PNTL No PSIC Bele Aumenta Kapasidade Hodi Kombate Krime Organizadu Entre Nasaun” ne’e halo iha salaun enkontru CFP Comoro Dili ne’e marka presensa husi Komisariu Polísia Australia, Komandante TLPDP no partisipantes sira.

Media PNTL.

Dili, atu bele asegura historia Polísia Nasional Timor Leste (PNTL) iha futuru, Komandu Jerál liu husi Centru Formasaun Polísia (CFP) lansa Mini Museum hodi bele rai didiak dokumentu no material hirak ne’ebe maka sai hanesan historia PNTL nian.

Komandante CFP Superintendente Arquimino Ramos iha ninia entrevista hafoin halo inagurasaun ba Mini Museum ne’e hateten Mini Museum ne’e hari’I ho objetivu atu bele rai memoria ba iha gerasaun foun sira ne’ebe maka hakarak atu hatene historia PNTL nain.

“Objetivu estabelesimentu mini Museum ne’e para atu bele hametin memoria instituisional, tanba iha institusaun barak ne’ebe hari’I kleur ona maibé ninia historia komesa lakon, nune’e ita seidauk tarde tanba PNTL foin maka halo tinan 16, ho ida ne’e ita kria mini Museum ida ne’e hodi hatutan memoria ba gerasaun foun sira”, tenik Komandante CFP.

Superintendente Arquimino Ramos afirma tan katak ho mini Museum ne’e maka iha futuru bele fasilita gerasaun foun sira atu hatene oinsa maka PNTL hari’I, forma oinsa, mai husi ne’ebe, uja Lei saida maka hari’I, buat sira hotu tanba ne’e maka mini Museum ne’e iha atu bele hametin historia sira ne’e.

Orsamentu ne’ebe uza hodi estabelese mini Museum ne’e maka kontribuisaun husi ajente rekruta husi Kuartu Kursu sira ne’ebe maka foin dadaun halo sira nia graduasaun, hodi sai hanesan lembransa ida ne’ebe husik hela mai iha CFP.

Iha fatin hanesan, Segundu Komandante Jerál PNTL Komisariu Polísia Faustino da Costa ne’ebe ofisialmente inagura mini Museum ne’e hateten objetivu husi estabelesimentu mini Museum ne’e atu bele define lolos historia husi PNTL nian.

“Objetivu mini Museum ne’e ba tempo naruk, katak ema balun ou karik estudante no membru PNTL rasik ne’ebe hakarak atu hakerek kona-ba asuntu balun liga ba seguransa, bele mai iha ne’e hodi hatene kona-ba prosesu desenvolvimentu PNTL no bele sai hanesan referensia ida.

Mini Museum ne’e inagura husi Segundu Komandante Jerál PNTL, akompaña husi Komandante CFP, Komandante Operasaun, Inspétor Jerál no Komandante PNTL Munisipiu sira.

Media PNTL.

Dili, Komandu Polísia Nasional Timor Leste (PNTL) liu husi Unidade Espesial Polísia (UEP) sei haruka nia membru hamutuk na’in 21 hodi partisipa iha kursu Formasaun Kontra Terorista iha Portugal durante fulan rua.

Iha sexta ne’e (14/10) membru UEP husi pelutaun Seksaun Anti Terorista (SAT) halo teste fisíku ne’ebe organiza husi Guarda Nacional República (GNR) Portugal hodi hare’e kapasidade membru sira nian wainhira halai.

Komandante UEP Superintendente Xefé Afonso dos Santos hateten membru hirak ne’ebe maka atu tuir kursu refere halo ona preprasaun durante fulan ualu (8) no tuir planu sei aranka ba Portugal iha loron 18 fulan Outubru tinan ida ne’e.

“Sira sei fila fali mai Timor iha loron 19 fulan Dezembro 2016 sei kontinua halo treinamentu Kontra Terorista iha Rairobo (Munisipiu Bobonaro) durante fulan rua tan, ida ne’e maka planu Komandu UEP nian ne’ebe hetan autorizasaun husi Komandante Jerál PNTL no Ministru Interior”, subliña Komandante UEP iha kuartél UEP Bairo-Pite.

Superintendente Xefé Afonso dos Santos realsa tan katak além de halo preparasaun físiku, durante fulan neen (6) nia laran iha mós kursu lingua Portuguesa ne’ebe professora ida husi Ministériu Interior maka prepara no Kursu ne’e laos deit pelutaun SAT maka partisipa maibé fó mós ba ofisias, sarjentu sira iha UEP nia laran.

Hatan kona-ba total membru UEP husi Pelutaun SAT ne’ebe maka atu partisipa iha Formasaun Kontra Terorismu, Komandante UEP esplika, “Selesaun ba membru SAT ne’e ema hamutuk 30 no hafoin teste hetan deit membru na’in 21 inklui instructor na’in 2 ne’ebe maka formadu husi GNR sei akompaña sira ba Portugal”.

Orsamentu ne’ebe aloka ba formasaun refere hamutuk $400.000 ne’ebe maka koloka ba iha UEP hodi uza ba iha treinamentu, sosa ekipamentu ba Seksaun Anti Terorista (SAT).

Media PNTL.

Viqueque, Komandu Polísia Nasional Timor Leste (PNTL) Munisipiu Viqueque hamutuk ho autoridade lokal, Komisaun Nasional Eleisaun (CNE) no mós parte STAE halo rejistu ba komunidade (membrus CPD-RDTL) suku Uaibobo hamutuk na’in 500 hodi hetan kartaun eleitoral.

Komisaun Nasional Eleisaun (CNE) hamutuk ho autoridade lokal no PNTL inklui mós membru governu, durante ne’e esforsu hodi halo sosializasaun no konsolida membru Konsellu Popular Demokrátiku-Repúblika Demokrátika Timor Leste (CPD-RDTL) hamutuk na’in 500 ne’ebe durante tinan barak nia laran laiha kartaun eleitoral hodi bele partisipa iha eleisaun xefe suku, Presidensial no eleisaun Parlamentar.

Komisariu CNE José Belo ne’ebe marka prezensa iha suku Uaibobo wainhira asiste diretamente prosesu trata kartaun eleitoral hateten ho rejistu ne’ebe halo ba komunidade (membrus CPD-RDTL) husi suku Uaibobo, ida ne’e sei fó influensia ba maluk sira seluk ne’ebe seidauk rejistu.

“Tanba enkontru ne’ebe ami halo ho komunidade Uaibobo, ita sente katak durante ne’e parte hotu-hotu iha ona kartaun eleitoral, sira mós partisipa hodi fó sira nia votu no fó sira nia kontribuisaun ba desenvolvimentu, maibé komunidade Uaibobo seidauk partisipa, tanba ne’e responsabilidade ita hotu nian, profesionais estadu nian no CNE nu’udar orgaun independente sente bolu hodi halo aproximasaun ba ema hotu bele partisipa”, tenik Komisariu CNE.

José Belo realsa tan katak kontaktu sira ne’ebe durante ne’e halo ho munisipiu hamutuk ho administrador, Komandante PNTL no koordenador CPD-RDTL hodi hetan konkluzaun ida katak komunidade Uaibobo hotu konkorda atu partisipa iha eleisaun suku ne’ebe sei realiza iha fim fulan Outubru tinan ne’e.

Entertantu Komandante PNTL Munisipiu Viqueque Superintendente Antonino Mauluta hateten atu garante estabilidade ba ita nia rai maka presija ema hotu nia apoio hodi hanoin deit katak ita hotu-hotu ida deit, nasaun ida deit.

“Ita atu koalia kona-ba estabilidade, ita mós tenke hare’e kona-ba ita nia unidade, se ita nia Unidade la metin, ita labele koalia estabilidade iha munisipiu Viqueque, tan ne’e atu unidade ne’e bele metin presija ita hotu nia apoio no kolaborasaun atu garante seguransa iha ita nia le’et”, salienta Superintendente Antonino Mauluta.

Observasaun Media PNTL iha suku ne’e, populasaun sira ho antusiasmu marka presensa iha sede CPD-RDTL nia hodi hetan kartaun eleitoral.

Media PNTL.  

Dili, tuir kalendariu ne’ebe maka Governu termina ba eleisaun Suku tinan ida ne’e, sei realiza iha loron 29 Outubru 2016 maka Komandu Polisia Nasional Timor Leste (PNTL) liu husi Komandu Operasaun hala’o briefing ho adidu defesa, adidu seguransa no pontu fokal husi embaixada sira iha Timor Leste.

Komandante Operasaun Superintendente Xefé Henrique da Costa ne’ebe prezidi enkontru ne’e hateten presensa adidu sira nian iha enkontru ne’e importante tebes tanba bele rona mós sugestaun no opiniaun sira nian kona-ba servisu PNTL nian atu asegura seguransa iha rai laran.

“Ohin ita hala’o enkontu ho adidu defesa, adidu seguransa, no mós pontu fokal husi embaixada sira iha Timor Leste atu fahe informasaun kona-ba situsaun seguransa iha teritoriu laran tomak no fahe mós informasaun kona-ba preparasaun PNTL nian atu asegura seguransa eleisaun suku 2016 nian”, tenik Komandante Operasaun.

Superintendente Xefé Henrique da Costa afirma tan katak, ho informasaun ne’ebe maka Komandu Operasaun fahe, hetan apresiasaun diak tebes husi adidu hirak ne’e no husi sugestaun hirak ne’ebe maka fó ba iha Komandu PNTL, iha benefisiu ne’ebe diak ba iha realizasaun eleisaun suku ninian.

Sei Reforsa Membru PNTL Atu Asegura Seguransa Eleisaun Suku

Hatan kona-ba rekursu membru PNTL nian iha kolokasaun ba sentru votasaun sira iha teritoriu laran tomak, Komandante Operasaun esplika, “Tanba iha munisipiu sira membru la sufisiente maka sei reforsa tan membru sira husi nasional, Komandu Jerál, Unidade Espesial, Polísia Marítima, Polísia Fronteira no hamutuk membru rihun tolu maka sei asegura seguransa durante eleisaun suku hala’o”.

Total aldeia ne’ebe maka sei koloka sentru votasaun, iha loron 29 fulan Outubru tinan ne’e hamutuk aldeia 2225 no Komandu sei koloka kada sentru votasaun ho membru PNTL na’in 2 hodi bele asegura eleisaun suku ninian.

Media PNTL.