News

Oe-Cusse- Komandu Polisia Nasional Timor-Leste (PNTL) sei la tolera membrus ne’ebe maka involve iha partidu politiku tanba nudar lutu ba nasaun PNTL nia knaar maka atu fo seguransa ba povu no nasaun.

Komandante Jeral PNTL Komisariu Polisia Julio da Costa Hornay hateten misaun PNTL nia define ona iha Konstituisaun Republika Demokratika Timor-Leste, Lei Organika PNTL no Regulamentu Dixiplinar tanba ne’e tenke kaer metin prinsipiu hirak ne’ebe maka konsagra ona hodi halao servisu tanba PNTL nia dever atu fo seguransa ba partidu politiku hot-hotu. Nia apelu ne’e ba membrus PNTL iha Rejiaun Oe-Cusse bainhira diriji formatura.

Nia haktuirtan katak PNTL prontu atu fo seguransa ba partidu saida deit maka manan hodi ukun atu nune’e sira hakmatek hodi prepara planu estratejia hodi dezenvolve nasaun doben Timor-Leste.

“Besik ona Eleisaun Jeral hau lakoi rona ofisial husi Komandante distritu to’o ajente inklina iha partidu politiku,” Dirijente maximu ne’e apela.

PNTL ida Deit

Ih okajiaun ne’e Komandante Jeral mos apela ba membru sira katak Polisia Nasional Timor-Leste (PNTL) ida deit laiha kor ketak-ketak maske funsaun la hanesan maibe ita ida deit, iha knar lor-loron nian tenke halo kordenasaun servisu ho Falentil Forsa Defeza Timor-leste (F-FDTL) tenke respeita malu no kopera ba malu hodi halao knaar seguransa no defeza.

Komandu la fo toleransia ba membru PNTL no F-FDTL atu baku malu, problema ne’ebe maka fo sai ba publiku liu husi media komunikasaun sira konaba erro (kesalahan), Komandu sei foti medidas forte hodi asegura prestijiu ba instituisaun Seguransa no Defeza tanba nudar lutu ba nasaun tenke kolabora, apoiu malu no servisu hamutuk.

Mai ita hamutuk hateke ba oin, fiar ita nia aan no kumpri lei no regras servisu hodi servi povu no nasaun. Media PNTL

Dili, atu asegura seguransa durante eleisaun jerál iha tinan 2017, Komandu Polísia Nasional Timor Leste (PNTL) sei koloka membrus PNTL iha area ne’ebe identifikadu ba potensia konflitu ninian.

Adjuntu Komandante Jerál PNTL Komisariu Polísia Faustino da Costa wainhira hasoru malu ho jornalista sira segunda ne’e (10/10) hateten, Komandu kontinua simu no buka informasaun ba area hirak ne’ebe maka iha potensial ba konflitu, relasiona ho realizasaun eleisaun jerál iha tinan 2017.

“Internalmente PNTL oras ne’e nafatin orienta hela membrus sira hodi buka tuir informasaun no tanba ne’e husu ba komunidade, sosiedade no liu-liu ita nia povu sente katak ita ne’e laos provínsia maibé ita ne’e nasaun soberanu Timor Leste”, tenik Komisariu Polísia Faustino da Costa iha ninia kna’ar fatin.

Segundu Komandante Jerál mós reforsa tan katak oinsa maka atu eleisaun hirak ne’e lao diak, importante maka ema Timor oan rasik maka tenke asegura paz iha tinan ida ne’ebe sei hahu’u eleisaun jerál sira iha tinan oin 2017 hodi desenvolvimentu iha rai ida ne’e bele lao ho diak.

“Karik iha indikasaun ruma maka Komandu sei informa fila fali katak area ne’ebe bele konsidera hanesan potensia ba konflitu iha eleisaun, ida ne’e ami sei fó tuir bainhira atu tama ona ba faze eleisaun ninian”, hateten Adjuntu Komandante Jerál PNTL.

Media PNTL.

Dili, relasiona ho planu alargamentu konstrusaun edifisiu Kuartél Jerál Polísia Nasional Timor Leste (PNTL) segunda feira ne’e (10/10,) Komandu PNTL hamutuk ho Ministériu Interior, Ministériu Justisa Diresaun Nasional Terras Propriedades no Ministériu Obras Públikas hala’o enkontru ikus ho komunidade afetadu husi konstrusaun refere hodi rona desizaun ne’ebe Konsellu Ministru hasai ona.

Ministru Interior Dr. Loguinhos Monteiru iha ninia intervensaun enkontru ne’e hateten katak, objetivu husi enkontru ne’e laos ona atu halo diskusaun no negosiasaun ho parte komunidade afetadu nian, maibé atu rona desizaun ikus ne’ebe maka Konsellu Ministru aprova hodi alarga edifisiu Kuartél Jerál PNTL nian iha futuru.

“Hau mai atu halo esklaresimentu kona-ba desizaun Konsellu Ministru ninian ne’ebe maka fó sai iha kuarta-feira semana kotuk kona-ba situasaun prosesu rai ne’e ninian, dezekupante sira ne’ebe maka okupa iha edifisiu PNTL nian sorin ne’eba, rai ne’ebe governu deside atu konstrui Komandu Jerál PNTL nian edifisiu foun”, tenik Dr. Loguinhos Monteiru.

Eis Komandante Jerál PNTL ne’e reforsa tan katak Ministériu Justisa liu husi Diresaun Nasional Terras Propriedades aprezenta iha Konsellu Ministru, rai ida ne’e konsidera hanesan rai ida ne’ebe governu maka administra no tanba laiha dadus ida maka rejistu propritariu privadu ida nian, nune’e sira ne’ebe maka durante ne’e hela, konsidera hanesan okupante deit.

Dr. Loguinhos Monteiru husu ba komunidade afetadu sira atu bele kolabora ho parte tekniku hodi bele aselera prosesu konstrusaun ba edifisiu foun Kuartél Jerál PNTL nian iha tinan 2017, nune’e parte tekniku sei fó prazu loron tolu, hahu’u segunda ne’e to’o kuarta-feira semana ne’e atu hatama dokumentu no númeru konta bankaria husi komunidade ne’ebe maka alista ona.

Iha parte hanesan, Komandante Jerál PNTL Komisariu Polísia Julio da Costa Hornay iha ninia intervensaun husu ba komunidade afetadu sira atu bele kopera hodi desenvolve rai ida ne’e iha futuru, liu-liu iha area seguransa nian.

Media PNTL.

Oe-Cusse- Atu asegura seguransa fronteira terrestre membru Unidade Polisia Fronteira (UPF) tenke hametin disiplina hodi asegura seguransa fronteira husi atividade kontra bandu.

Komandante Jeral PNTL Komisariu Polisia Julio da Costa Hornay hateten UPF halao misaun sagradu ne’ebe inportante ba nasaun ida ne’e maka siguransa fronteira terestre entre Timor-Leste ho nasaun vizinu Republika Indonezia husi ema no sasan atu labele tama ilegalmente mai Timor-Leste, Nia hato’o asuntu ne’e iha serimonia aniversariu UPF iha rejiaun Oe-Cusse.

Nia haktuirtan katak UPF tenke forte no atenbrani hodi asegura fronteira no labele husik kualker ema ka sasan ruma tama illegal, membru hotu ne’ebe kolokadu iha fronteira atu servisu ho responsabilidade, dignidade, justu, honestu no professional tanba seguransa frontera iha imi nia liman.

Nudar jerasaun foun tenke servisu makaas, sakrifika aan hodi defende no tane ass ukun rasik aan ne’e atu labele monu ba rai, hanesan lutu ba nasaun servisu inportante liu maka asegura fronteira terrestre no maritima ho Indonezia no Australia.

Hodi Komandu Jeral nia naran hau hakarak hato’o parabens ba Komandante UPF ho nia membrus tomak ne’ebe ohin loron halo tinan 13, hau husu ba imi atu labele monu ba tentasaun diak liu kiak maibe iha dignidade tanba ne’e tenke tau ass no ho responsabilidade maximu ba servisu ida ne’e.

Komandante UPF Superintendente Xefe João Belo iha nia deskursu hateten UPF hamrik metin hodi asegura seguransa iha lina fornteira liu husi patrulamentu iha tempu kalan no loron, iha tempu udan no loro manas no toba iha ai laran fuik hodi hatutan sakrifisiu ne’ebe maka funu nain veteranus sira halao tia ona sai ezemplu pojitivu atu banati tuir iha tempu independensia.

Komandante ne’e ejiji ba membrus PNTL UPF hot-hotu atu sente sai nain ba servisu ne’ebe maka estadu fo ba ita, orgulu no onra boot tanba hetan fiar husi estadu atu hamrik iha liña fronteira ho bandeira RDTL ne’e hanesan responsabilidade boot tanba ne’e tenke aumenta profesionalismu, hametin disiplina, no orgulu ba servisu ne’ebe ita halao, inplementa ho rigoroju lei sira ne’ebe maka fo mandatu ba ita maske ita lao neineik maibe ita lao beibeik.

UPF hamrik iha loron 30 fulan Setembru tinan 2003 iha Marco kapital postu administrativu Cailaku munisipiu Bobonaru ne’ebe maka inisia husi Peace Keeping Force (PKF) Australia sira no Lidera husi ofisial PNTL atual Inspetor Jeral Superintendente Xefe Carlos Jeronimo, iha situsaun ne’ebe maka difisl tebes maibe ita hakarak diak ba estadu Timor-Leste.

Serimonia Aniversariu UPF ba dala 13 ne’e partisipa husi Prezidente ZEEMS Mari Alkatiri, Membru Parlamentu Nasional, Prokurador Rejiaun Oe-Cusse, konvidadus no komunidade sira. Media PNTL

Dili- Membru Ofisial Polisia Suku (OPS) nain 30 halao estudu komparativu iha BIMNAS Bali Indonezia hodi aprende no aumenta konyesementu kona-ba lalaok polisiamentu Komunitaria.

Komandante Operasaun Superintendente Xefe Henrique da Costa hateten Estudu komparativu ne’ebe maka halao ho nia objetivu atu aprofunda liutan konesementu memebru OPS sira nian hodi nune’ebe bele dezenvolve no servi komunidade ho diak liutan. Nia hato’o asuntu ne’e hafoin enkontru ho membru OPS sira iha kuartel Jeral Kaikoli Dili (07/10).

Nia informatan katak Estudu komparativu ne’ebe maka halao durante loron 5 nia laran hahu huis loron 10 to’o 15 fulan Outubru sei foka liu konaba vijita ba eskola, vijita ba uma komunidade nian , oinsa atende no simu keisa husi komunidade sira no rezolve problema ne’ebe maka mosu.

Komandante operasaun ne’e husu ba membru sira durante halo estudu komparativu aproveta tempu hodi aprende lisaun ruma ne’ebe diak husi polisia BINMAS Bali konaba oinsa inplementa servisu polisia komunitaria nian no espera katak ho estudu komparativu ne’e bele sai hanesan sasukat no refensia ida atu motiva sira hodi dezenvolve instituisaun PNTL liu-liu halao servisu polisia komunitaria ho diak liutan.

Entretantu liu husi enkontru preparasaun reprejentante Ajensia Polisia Nasional Japaun husu ba membru OPS nain 30 ne’ebe maka partisipa iha estudu komparativu ne’e atu aproveta tempu hodi aprende ho susesu tanba programa ne’e interesante no membru hirak ne’ebe maka ba reprenta nasaun Timor-Leste no fila mai inplementa iha servisu polisia Komunitaria ho diak liutan.

Programa estudu komparativu ne’ebe maka halao durante loron 5 ne’e hetan suporta husi parseru Ajensia Polisia Nasional Japaun no eskola BIMNAS Bali hanesan fatin atu aprende tanba distansia besik, sira nia esperensia inplementa servisu polisia komunitaria kleur ona no sira mos suksesu iha sira nia servisu, Aliende Bali estudu komparativu ne’e halao ona iha Bekasi Indonezia, Japaun, no Nova Zelandia hodi hare dezenvolvimentu polisia komunitaria iha nasaun hirak ne’e. Media PNTL

Dili, Unidade Tránzitu Polísia Nasional Timor Leste (PNTL) durante inisiu tinan 2016 to’o fulan ikus Setembru nian, konsege rejistu númeru kazu asidente tráfiku hamutuk 1353 ne’ebe kausa husi fatór umanu.

Asidente tráfiku 1353 ne’ebe akontese durante ne’e, Unidade Tránzitu rejistu 1654 kanek kma’an, 266 kanek todan no fatal hamutuk 47 ne’ebe akontese tanba fatór umanu.

Komandante Tránzitu Inspetor xefe António L. C. Soares kuarta ne’e (05/10) hateten além de fatór umanu hodi resulta asidente tráfiku, fatór viatura no kondisaun Estrada mós sai fatór ida ne’ebe maka resulta asidente tráfiku.

“Ita hatene katak asidente tráfiku ne’e kausa husi fatór ha’at maka hanesan fatór umanu, kondisaun viatura, kondisaun Estrada no mós fatór naturais, maibé entre kazu sira ne’ebe maka rejista, númeru ne’ebe maka elevadu liu mak tanba fatór umanau”, Komandante Tránzitu.

Inspetor xefe António L. C. Soares akresenta tan katak maioria vitima husi asidente ne’e maka joven ho idade minoridade, tanba halai liu limiti velosidade másimu, lori motorizada ho kondisaun lanu no mós la respeita sinais tránzitu ne’ebe maka iha. Tanba ne’e, Komandu PNTL liu husi Unidade Tránzitu halo ona sosializasaun ba estudante sira kona-ba Lei Kodigu Estrada, sinais Tránzitu atu nune’e bele evita númeru asidente tráfiku.

Operasaun Viatuira Estadu Iha Loron Feriadu

Hatan kona-ba operasaun ba karreta no motor estadu sira ne’ebe maka halo movimentu iha oras fora servisu nian, komandante Tránzitu hateten iha ona Dekretu Lei ne’ebe regula ona sirkulasaun karreta estadu, labele sirkula iha loron sabadu no dominggu tuir periodu normal katak husi dader tuku 7 to’o fali tuku 7 kalan, segunda to’o sexta

“Ba sabadu no dominggu bandu atu karreta estadu halo movimentu, maibé wainhira funsionariu ida maka hala’o nia servisu iha loron sabadu ka dominggu, tenke iha guia de marxa ou autorizasaun husi kargu xefia ida iha ministeriu ne’ebe nia halo servisu ba”, salienta Inspetor xefe António L. C. Soares.

Komandante Tránzitu akresenta liu tan katak durante ne’e laiha dezentendimentu iha prosesu cek point ba karreta no motor estadu sira ne’ebe mak sirkula iha oras fora servisu, tanba ministeriu idak-idak hatene ona kona-ba dekretu Lei refere.

Media PNTL.

Dili, relasiona ho sirkulasaun merkadu ba bebidas alkohol no movimentu motor ho knal pot resin iha kapital Dili, Komandu Polísia Nasional Timor Leste (PNTL) halo enkontru ho Ministériu Comercio Industria (MCI) parte Inspesaun Alimentar hodi buka solusaun nune’e bele prevene númeru kazu asidente.

Enkontru ne’e halo hodi buka dalan atu oinsa halo prevensaun ba sirkulasaun alkohol iha loja no supermerkadu sira ne’ebe faan, nune’e parte PNTL hamutuk ho MCI bele halo operasaun ba loja no supermarkadu sira ne’ebve maka faan produtu hirak ne’e.

Komandante Jerál PNTL Komisariu Polísia Julio da Costa Hornay hateten parte Polísia liu-liu Komandu Munsipiu Dili hamutuk ho Unidade Tránzitu halo ona operasaun ba motor hirak ho knal pot resin, maibé realidade númeru kazu asidente kontinua mosu. Tanba ne’e, ho enkontru refere hodi iha futuru parte MCI bele halo diploma ministerial ida hodi regula inportasaun bebidas alkohol no sasan ofisina hodi halo knal pot resin.

Iha biban ne’e mós parte Ministeriu Comercio Industria (MCI) parte Inspesaun Alimentar esplika, sei apresenta problema ne’ebe maka durante Operasaun ne’ebe halo husi Polísia ba iha Ministeriu. Tanba parte Inspesaun Alimentar iha deit kompetensia hodi halo operasaun ba produtu hirak ne’ebe maka liu ona prazu ka expire, sasan ne’ebe maka faan laiha dokumentu, maibé atu halo kontrola ba produtu Knal Pot resin laos kompetensia parte Inspesaun Alimentar.

Enkontru ne’e lidera direktamente husi Komandante Jerál no partisipa, Komandante Operasaun, Komandante Munisipiu Dili, Komandante Unidade Tránzitu, no representante Diresaun Inspesaun Alimentar (MCI).

Media PNTL.

Dili- Komandu PNTL presiza Infraestrutura baziku no orsamentu hodi kria Cinoteknika (Anjing pelacak) hodi detekta droga ne’ebe maka oras ne’e dadaun akontese no trafikante sira uza timor-leste hanesan fatin tranzasaun droga.

Segundu Komandante Jeral PNTL Komisariu Polisia Faustino da Costa hateten atu trenu asu hodi detekta droga ne’e presiza tempu no infrastrutura baziku hanesan uma, toba fatin no hahan ba asu ne’e signifika presiza orsamentu, Nia hato’o kestaun ne’e ba jornalista sira iha nia knar fatin Kaikoli Dili Segunda (03/10).

Nia akresentatan katak estabelese Cinoteknika presiza tratamentu especial ba Asu tanba ne’e tenke iha pessaol ne’ebe maka treinadu no sai treinador nune’e PNTL hein hela no ami kolia ona ho Ministru Interior

Atu sosa asu mos tenke identifika nasaun ne’ebe maka nia klima hanesan ho timor tanba ne’e presiza infraestrutura baziku no orsamentu hodi halo preparasaun ida antes hola asu hodi halo servisu tanba atu trenu asu tenke uza material ne’ebe maka hanesan hodi detekta.

Planu ne’e sei iha prosesu nia laran se la konsege realiza tinan ida ne’e maka PNTL sei tenta nafatin no buka meius iha tinan 2017 bele iha duni tanba agora instala ona Seksaun Anti Terorismu (SAT) iha Unidade Espesial Polisia ne’ebe maka semana balun mai pesoal nain 23 sei desloka ba Portugal durante fulan 2 hodi tuir formasaun no bainhira sira fila no iha konesementu maka ita sei hare pasu tuir mai aliende ne’e komesa ona halo kompras ba ekipamentus konaba detekta droga no terorismu. Media PNTL

Dili- Komandu Polisia Nasional Timor-Leste (PNTL) husu ba komunidade no sosiedade sivil atu hato’o keisa ba komandu konaba membru Corpu Seguransa Pessoal (CSP) ne’ebe maka sai broker ba membru governu no kompania.

Segundu Komandante Jeral PNTL Komisariu Polisia Faustino da Costa hateten komunidade no sosiedade sivil presiza hato’o keisa ba Komandu konaba membru CSP ne’ebe maka deskumfia sai broker atu nune’e komandu bele prosesa membru ne’e hodi foti desijaun ruma, Nia hato’o kestaun ne’e ba jornalista sira iha nia knar fatin Kuartel Jeral PNTL Kaikoli Dili (03/10).

Nia informatan katak komandu PNTL laiha informasaun konaba membru CSP sai broker iha instituisaun governu balun hodi hetan lukru maibe se ida ne’e akontese maka husu ba komunidade no sosiedade tomak atu hato’o keisa nune’e bele prosesa ema sira ne’e tanba regra PNTL la autorija pessoal ida sai fali broker entre membru governu ho kompania ruma.

To’o oras ne’e Komandu sidauk simu informasaun katak ami nia pessoal CSP involve sai hanesan broker maske media no sosiedade sivil fo sai no kestiona konaba ida ne’e, aliened ne’e Komandu mos hetan kontaktu balun husi Prezidente Komisaun B ne’ebe maka trata asuntu Seguransa Defeza no negosiu Estranjeiru David Diaz Ximenes ‘Mandati’ konaba asuntu ne’e maibe ofisialmente seidauk iha karta ruma ne’ebe maka hateten katak membru A, B ou C tanba ne’e karik iha bele hato’o keisa para ami loke prosesu.

Manual konaba CSP define katak kada fulan 6 tenke halo rotasaun ba membru CSP ne’ebe maka eskolta ba Alta Entidade maibe Komandu PNTL entfrenta duni katak dala ruma susar utuan tanba membru governu sira sempre husu atu ema sira ne’e mantein tanba sira toman malu no hare malu hanesan maun alin ou inan aman ho oan.

Problema ne’ebe maka PNTL infrenta maka desde tinan 2000 no 2001 kuandu sai polisia membru balun sai eskoltu ba alta entidade to’o agora seidauk iha rotasaun maske Komandu hasai ona ordem atu halo rotasaun hodi troka membru sira ne’e maibe kestaun sentimentu familiar entre membru governu ho CSP tanba tinan barak nia laran servisu hamutuk ida ne’e maka difikulta atu halo rotasaun ba pessoal ne’ebe maka koloka ba eskolta alta entidade sira.

Media PNTL

Dr. Longuinhos Monteiro.

“Ho Aniversariu Ba Dala XIII Mai Ita Hametin Liu Tan Espirito de Corpo, Profesionalismu No Disiplina Hodi Asegura Liña Fronteira RDTL”.

Lori Minsteriu Interior nia naran hakarak hato’o hau nia mensagem ba Unidade Patrullamentu Fronteira (UPF), Polísia Nasional Timor Leste (PNTL) ne’ebe selebra ninia tinan ba dala 13 iha 2016. Unidade Patrullamentu Fronteira hanesan unidade ida PNTL nia laran, ne’ebe hala’o nia misaun espesifika tuir termus Lei ninian atu asegura seguransa iha ita fronteira terrestre hotu-hotu. Asegura nia misaun ida ne’ebe enkopora depende ba ninia aktividade ho Servisu Imigrasaun nune’e mós ho Forsas Armadas Timor Leste nian. Aproveita okaziaun ida ne’e, hanesan Ministru Interiro hato’o hau nia Parabéns ba Komandante UPF, ba membrus tomak Unidade ninian ba imi nia aniversariu ba dala 13 no espera katak ho aniversariu ba dala 13, Komandu UPF bele hasa’e ninia Espiritu de Corpo entre membrus hotu-hotu ho nia Komandu nune’e mós Profesionalismu no Disiplina ne’ebe maka’as. Tanba ho disiplina maka ita bele atinji misaun hotu-hotu ne’ebe maka Lei atribui ba PNTL, liu husi ninia Unidade sira. No espera katak profesioalismu ne’ebe maka membrus tomak husi UPF ninia dedikasaun ba ninia misaun sei lori duni susesu ba seguransa iha Timor Leste. Obrigadu no Parabéns!