News

Oe-Cusse- Segundu Komandante Jeral Polisia Nasional Timor-Leste (PNTL) Komisariu Polisia Faustino da Costa kompleta atividade vizita ba komandu PNTL munisipiu Oe-Cusse hodi halo enkontru no estabelese komunikasaun ho membru sira.

Komisariu Faustino da Costa hateten vizita ba Komandu PNTL munisipiu Oe-Cusse ne’e atu hato’o ba membru PNTL sira kona-ba planu no programa PNTL ba futuru i esplika mos ba membru sira kona-ba knaar no responsabilidade membru sira nian tuir orientasaun Komandu hodi nune’e hases husi buat ne’ebe maka ita la espera.

Haktuirtan katak ho vizita ne’e bele estabelese komunikasaun Komandu no membru sira iha munisipiu hodi hato’o informasaun husi parte Komandu ba membru nomos membru sira bele hato’o ba Komandu sira nia situasaun iha terrenu.

Iha vizita ne’e membru PNTL Oe-Cusse hato’o kona-ba preparasaun hasoru Eleisaun Jeral tinan 2017 konaba kolokasaun membru no fasilidade atu apoiu sira nia servisu hanesan meius komunikasaun no transporte.

Kestiona kona-ba movimentu iha fronteira Komisariu Faustino haktuir katak to’o ohin loron movimentu iha fornteira terrestre Oe-Cusse lao diak maske sei iha ema balun sei tenta tama fronteira liu hosi dalan local. Servisu UPF kontinua alerta no kaptura sira ne’ebe viola lei.

Segundu Komandante Jeral salienta mos katak kordenasaun servisu TNI no UPF lao diak hodi mantein seguransa iha fronteira terrestre tuir akordu Joint Border Committee (JBC) ne’ebe estabelese husi postu integradu.

Vizita servisu ne’e akompaña husi departamentu planeamentu no aprovijinamentu PNTL. Media PNTL

Dili, Relasiona ho teste ne’ebe konkore husi Ajentes Polísia Nasional Timor Leste (PNTL) hamutuk 1348 ba vaga Sarjentu hamutuk 157 ne’ebe hala’o iha loron 03 Setembru 2016 liu ba, Ekipa Psicolog Guarda Nasional Repúblika (GNR) Portugal ohin (13/09) hasoru malu ho Komandante Jerál PNTL.

Enkontru refere halo ho objetivu atu ekipa Psicolog informa kona-ba Teste ba fase tuir mai hanesan Fisika, Psicolog no Saúde ba kandidatus ajentes ne’ebe maka partisipa ona iha teste eskrita.

Tuir Kalendariu, Kursu ba Sarjentu sei hahu’u iha loron 5 Dezembru 2016 no sei termina iha fulan juñu 2017.

Ekipa komisaun Psicolog husi GNR ne’ebe halo sorumutu ho Komisariu Polísia Julio da Costa Hornay kompustu husi Tenente Coronel Ilidio Canas, Capitão Liliana Rocha (medika), Primeiru Sarjentu Hélder Serdoura, Cabo Chefe António Pereira no Cabo Saúl Vidigal.

Media PNTL.

Dili- Sekretariadu Tekniku Administrasaun Eleitoral (STAE) Sosializa Lei Suku No 9/2016 ba Polisia Nasional Timor-Leste (PNTL) atu nune’e PNTL iha koñesementu no halo planu seguransa hodi asegura eleisaun suku.

Diretor Jeral STAE Acilino Manuel Branco hateten Liu husi sosializasaun ida ne’e maka PNTL bele trasa sira nia planu hodi asegura seguransa iha sentru votasaun hotu atu bele asegura situasaun ne’ebe seguru ba eleitor sira hodi ezerse sira nia direitu de votu ho livre, Nia hato’o asuntu ne’e liu husi Enkontru Desiminasaun no Sensibilizasaun Lei Suku iha Kurtel Jeral PNTL Kaikoli Dili (06/09).

Nia informatan katak Sosializasaun ne’e nudar parte kordenasaun hodi fornese dadus ba PNTL para oinsa trasa diakliutan planu seguransa; Parte STAE iha planu operasional identifika fatin hirak ne’ebe maka tuir esperensia eleisaun durante ne’e katak iha potensia ba risku ami fornese dadus hirak ne’e ba PNTL no informasaun kona-ba mekanismu oinsa atu organiza eleisaun tanba iha movimentu lubuk ida hahu husi prosesu votasaun, kontajen, rejultadu no sirkulasaun husi munisipiu ba suku, suku ba aldeia no husi aldeia fila fali mai suku tanba ne’e presiza akompanamentu husi parte PNTL.

Iha okajiaun ne’e Komandante Jeral PNTL Komisariu Polisia Julio da Costa Hornay hateten ami konvida STAE atu mai esplika regras, data no fatin eleisaun nune’e PNTL bele halo planu operasaun hodi asegura prosesu eleisaun suku ne’ebe maka sei halo iha aldeia 2225 tanba iha kada distritu pessoal PNTL ho numeru ne’ebe maka lahanesan.

Komandante Jeral ne’e haktuirtan katak Eleisaun Suku sei halao iha kada aldeia iha teritoriu Timor-Leste laran tomak hamutuk Sentru votasaun 2225 ne’e sai prekupasaun ba PNTL atu koloka membru PNTL iha sentru votasaun hotu.

“ Hau koalia ho diretur Jeral STAE atu tetu buat hirak ne’e hotu tanba kolokasaun pessoal PNTL foin to’o suku 442 maibe seidauk to’o iha aldeia hotu ida ne’e sai prekupasaun boot tanba ne’e PNTL sei tur hamutuk ho STAE hodi hanoin atu nune’e forsa seguransa ne’ebe maka koloka iha munisipiu bele alkansa to’o iha sentru votasaun iha aldeia.”

Atu asegura prosesu eleisaun lao ho diak maka PNTL prepara ekipa intervensaun ne’ebe maka stand buy atu nune’e karik iha problema ruma iha sentru votasaun forsa ekipa intervensaun bele to’o iha fatin hodi halo atendementu.

Dekretu governu No 8/2016 dekreta katak Eleisaun Suku sei halao iha loron 30 fulan Setembru tina 2016, eleisaun sei halao simultaniamente iha aldeia hamutuk 2225 hodi hili lideransa suku ne’ebe maka kompostu husi Xefe Suku, Xefe Aldeia, Delelgadu no Delegada sira.

Enkontru Desiminasaun no Sensibilizasaun Lei Suku ne’e diriji husi Komandante jeral PNTL no akompaña husi Diretor Jeral STAE ho ekipa tekniku no partisipa maximu husi Komandante PNTL iha munisipiu no Komandante Unidade sira. Media PNTL

.

Dili, Tuir dadus ne’ebe Polísia Nasional Timor Leste (PNTL) hetan durante fulan Agostu nia laran rejista ona kazu Asidente Tráfiku hamutuk 142.

Segundu Komandante Jerál PNTL Komisariu Polisia Faustino da Costa iha segunda ne’e (05/09) wainhira hasoru malu ho jornalista sira hateten, total asidente tráfiku ne’ebe rejista resulta ema mate hamutuk na’in 6 no sira seluk kanek kma’an.

Komisariu Polísia ne’e afirma tan katak, ba kazu hirak ne’ebe maka hetan konkordansia entre Vitima ho Arguidu (motorista) nafatin rejista iha PNTL, maibé kazu refere sei entrega ba iha Tribunal hodi foti desizaun.

Hatan kona-ba Tráfiku Humanu ne’ebe maka akontese iha kapital Dili, Segundu Komandante Jerál PNTL informa, kazu refere ho vitima na’in 2 ne’ebe Servisu Investigasaun Munisipiu Dili hetan hodi halo prosesu Investigasaun no antes vitima sira halo keixa, hato’o ona ba iha Ministériu Públiku hodi hein desizaun final.

Presiza Kooperasaun Entre Polísia Ho Autoridade no Komunidade Atu Kombate Konflitu

Adjuntu Komandante Jerál PNTL afirma kona-ba konflitu ne’ebe sei kontinua akontese maske postu polísia nian montra ona iha komunidade nia le’et, maka presiza iha kooperasaun no kolaborasaun entre polísia ho autoridade no komunidade.

“Ita bele koloka polísia barak tebes-tebes iha fatin hotu-hotu, nia sei labele netraliza situasaun wainhira ita nia kooperasaun ho parte hotu-hotu inklui autoridade iha fatin ne’ebe ita nia polísia koloka”, tenik Komisariu Polísia Faustino da Costa.

Segundu Komandante Jerál PNTL akresenta tan katak, importante wainhira ita nia autoridade no komunidade iha informasaun hodi hato’o ba polísia kona-ba ema hirak ne’ebe maka involve iha krime, nune’e parte polísia bele atúa ho lalais.

Komandu La Tolera Membru PNTL Uja Atributu Arte Marsias

Relasiona ho Organizasaun balun nia preokupasaun kona-ba Ajente Polísia uja atributu arte marsias hodi tau iha media sosial, Komisariu Polísia Faustino da Costa esplika, “Ita nia NGO balun kestiona kona-ba Ajente foun PNTL ninian balun uja atributu arte marsiais , hakarak dehan nune’e utilizasaun media sosial iha Timor ne’e ita la hatene falsu ka lae, ne’e sai problema ida ba Polísia atu bele detekta ema ne’ebe maka utiliza media sosial refere”.

Komisariu Polísia ne’e apela ba komunidade hotu karik hetan informasaun kona-ba membru Polísia sira ne’ebe maka uja media sosial hodi publika informasaun la tuir regras, bele informa mai Komandu hodi bele loke prosesu disiplinar. Tanba Komandu sei la tolera membru ne’ebe maka la halo tuir doutrina Instituisaun PNTL nian.

Media PNTL.

Dili- Ajente Polisia Nasional Timor-Leste (PNTL) nain 1348 ne’ebe maka konkore ba vaga postu Sarjentu tuir ezame eskrita hodi kompete ba vaga Sarjentu hamutuk 157.

Segundu Komandante Jeral PNTL Komisariu Polisia Faustino da Costa hateten ezame eskrita ne’e hanesan faze daruak hafoin prosesu selesaun dokumentus, ho perguntas 40 múltipla escolha (pilihan ganda) ho versaun lian portuges no tetum, Nia hato’o asuntu ne’e iha Centru Formasaun Polisia Comoro Dili (05/09).

Nia haktuirtan katak ezame ne’e halo dala ida deit iha teritoriu nasional tomak hahu husi Lospalos tama to’o Oe-Cusse; Hafoin ezame eskrita sekretariadu komisaun sei avalia hodi hare kandidatu ne’ebe maka tuir ezame no la tuir tanba tuir diploma ministerial Nu 30 fo dalan ba sira ne’ebe maka la tuir karik tanba moras no baixa ou eskolta hela alta entidade sira ba distritu ka ba rai liur maka fo tempu ba sira iha loron 10/09 halo teste ikus ho perguntas hanesan no modelu ida deit no kandidatu hotu mai konsentra iha Centru Formasaun Polisia.

Faze tuir mai maka publika valor ezame hodi hare kandidatu ne’ebe maka nia valor boot liu sai numeru primeru no tutuir malu to’o numeru kiik; Tanba iha loron 19/09 tama iha faze datolu maka hensan teste fiziku hanesan Halai, Bomba Rai no Haksoit, hafoin kontinua kedan ho PisikoTest ne’ebe maka fahe ba parte rua hanesan eskrita no entrevista oral, Faze ikus liu maka teste saude hodi hasai ran kompletu no Raio-X, tanba vaga ne’e 157 deit maka sei halo avaliasaun hodi hare valor ne’ebe maka boot liu to’o valor kiik liu hodi priense vaga ne’e.

Bazeia ba avaliasaun juri partisipasun husi PNTL munisipiu hotu minimu %3 to’o maximu %9 tuir criteria ne’ebe maka iha hanesan Ajente ne’ebe maka atu konkore tenke servisu tinan 4, no hare ba klase komportamentu. Media PNTL

Dili- Komandu PNTL fo tempu semana ida ba komunidade uma kain 20 ne’ebe maka afetadu ba futuru konstrusaun edifisiu Kuartel Jeral atu hatama konta bankaria ba banku hodi simu kompensasaun ba sira nia uma no aihoris.

Komandante Administrasaun Superintendente Xefe Mateus Fernandes hateten hafoin halao dialogo ho komunidade uma kain 20 ne’ebe maka afetadu ba futuru konstrusaun edifisiu Kuartel Jeral iha dialogu ikus ohin loron komandu PNTL fo ultimatum ba komunidade ne’ebe maka afetadu atu hatama sira nia konta bankaria no simu kompensasaun husi governu Nia hato’o kestaun ne’e liu husi dialogo ho komunidade iha edifisiu Postu Administrativu Vera-Cruz (31/08).

Nia informatan katak Instituisaun PNTL presiza apoiu no kooperasaun husi Komunidade sira atu nune’e bele halao konstrusaun ba edifisiu Kuartel Jeral PNTL nune’e bele iha fatin ida ne’ebe maka apropriadu no diagnu atu halao servisu seguransa ho diak.

Iha okaziaun ne’e Xefe Departamentu Terras Propriedade Francisco Mouzino Amaral hateten enkontru ne’ebe maka halao bazeia ba identifikasaun no levantamentu husi ekipa integradu ne’ebe maka kompostu husi Ministeriu Justisa, Ministeriu Estatal, Ministeriu Obras Publika no Ministeriu Agrikultura halo tia ona identifikasaun, levantamentu ba rai, uma no aihoris iha parte ne’ebe maka atu halo konstrusaun Kuartel Jeral.

Nia hatutan desde tinan tolu liuba to’o agora identifika familia 20 maka afetadu tanba ne’e komforme orientasaun husi superior sira katak sei halo pagamentu uluk ba uma komforme tabela avaliasaun ne’ebe maka Ministeriu Obras Publika halo maibe kona-ba ai horis no plantasaun sei halo pagamentu tuir avaliasaun husi Ministeriu Agrikultura.

Governu seidauk halo pagamentu ba rai tanba to’o agora seidauk iha estatutu defenitivu ba rai, agora daudaun rejimi especial lei ba rai nian sei debate iha Parlamentu Nasional.

Iha enkontru ne’e komunidade sira hato’o sira nia prekupasaun no insatisfasaun tanba tuir sira ekipa tekniku Diresaun Nasional Terras Propriedade sukat uma la tuir medidas lolos, uma balun ne’ebe maka medida boot sai fali kiik no uma ne’ebe kiik sai fali boot tanba ne’e husu ekipa tekniku atu halo verifikasaun fali antes halo kompensasaun.

Enkontru final ne’ebe maka prezidi husi komandante Administrasaun PNTL Superintendente Xefe Mateus Fernandes ne’e akompaña husi Xefe Departamentu Terras Propriedade, Administrador Postu Administrativu Vera-Cruz, Xefe suku Kaikoli, Komandante PNTL munisipiu Dili, no komunidade sira ne’ebe afetadu. Media PNTL

Dili, Ajentes Polísia Nasional Timor Leste (PNTL) hamutuk na’in 1438 ne’ebe maka konkore iha vaga ba Sarjentu sei partisipa iha exame Admisaun iha loron 4  Setembru 2016.

Tuir dadus ne’ebe maka ekipa Komisaun ba teste refere iha katak, Ajentes hirak ne’ebe maka hatama dokumentu ba Konkursu Formasaun Sarjentu hamutuk na’in 1348 husi munisipiu, Unidades no Departamentu iha PNTL nian no na’n 4 seluk husi Ministeriu Interior maibé ekipa Komisaun retira ka hasai husi lista.

Komisariu Polísia Faustino da Costa ne’ebe sai hanesan Presidente Komisaun Admisaun nian iha abertura enkontru ne’ebe hala’o iha Centro Formaçao Policia (CFP) no partisipa diretamente husi Komandante PNTL Munisipiu, Unidade no Pontu Fokal, hateten prosesu no lalaok selesaun Ajentes ba Sarjentus refere halo tuir Diploma Ministerial ne’ebe maka iha.

Segundu Komandante Jerál PNTL afirma tan katak prosesu refere hetan apoio másimu husi ekipa Guarda Nacional Repúblicana (GNR) husi Portugal ne’ebe maka sei halo exame eskrita ba Ajentes sira ne’e. Komisariu Polísia ne’e apela ba Komandante Munisipiu sira atu bele fó hanoin ba Ajentes sira kona-ba vantagen husi Kursu Formasaun refere.

Enkontru refere halo ho objetivu atu fahe informasaun ba Komandante Munisipiu sira, liu-liu Pontu Fokal ne’ebe maka lidera lista kandiadus admitidu sira, atu bele aselera lalais ba preparasaun ba exame ne’ebe besik dadaun ona.

Orariu ba teste Admisaun sei hala’o iha loron domingu 4  Setembru 2016, iha oras tuku 08:00 dader, kandidatus sira sei hatan pergunta hamutuk 40 iha oras ida nia laran no exame sei realiza iha fatin lima maka hanesan Munisipiu Dili, Baucau, Ainaro no Bobonaro inklui Rejiaun espesial Oecusse.

Total vaga ne’ebe iha hamutuk 157 ne’ebe sei compete tuir kapasidade kandidatus sira nian.

Media PNTL.

Dili, iha loron Sabadu, 27 Agostu 2016 Komandante Jerál PNTL Komisariu Polísia Julio da Costa Hornay akompaña husi Segundu Komandante Jerál Komisariu Polísia Faustino da Costa hasoru malu ho Brigadeiru Jenerál F-FDTL Filomeno Paixão de Jesus no Vise Xefe Estado Maior Jenerál Coronel Falur Rate Laek no mós ofisias tomak hala’o Konferensia Imprensa iha Kuartel Jerál F-FDTL Fatuhada.

“Ohin (27/08) konvida maluk jornalista sira hotu, atu mai rona no ajuda transmite informasaun ne’ebe Komandu Forsa rua hasai, kona-ba Insidente ne’ebe mosu iha Ainaro. Atu informa katak Komandu Forsa rua Estadu nian, apár ho Insidente ho Asidente ne’ebe mosu iha loron Sexta (26/08) oras tuku 9:30 kalan, iha festa Feira Ministeriu Administrasaun Estatal nian iha Munisipiu Ainaro. Estadu Major Jenerál ho Komandu Jerál PNTL konsidera Insidente ne’e hanesan insidente ne’ebe involve individu ka oknum PNTL nu’udar suspeitu no individu membru F-FDTL nu’udar vitima, laos insidente entre F-FDTL ho PNTL hanesan instituisaun. Ba kazu ne’e, Komandu PNTL foti ona medidas Kautelares ba membru PNTL refere. Ohin (27/08) dadersan Segundu Komandante munisipiu Ainaro apresenta mai Komandu membru refere entrega kedas ba Servisu Investigasaun Kriminal no agora iha ona detensaun 72 oras depois lori ba primeiru interogatoriu iha Tribunal Distrital Suai. Além de parte disiplinar, Komandu foti medidas Kautelar maka suspensaun preventiva, signifika membrus refere Dezarmadu kedas, desfardadu no hase’es husi servisu hodi atende ninia prosesu. Portantu, Komandu rua husu ba Komandu ho diresaun Subordinariu sira kontinua hala’o nia kna’ar Estadu nian, halo servisu normal hanesan bain-bain hodi asegura nafatin Prestasaun Sevisu ba ita nia komunidade iha teritoriu laran tomak no garante no koordenasaun servisu diak entre Instituisaun rua ne’e iha terenu. Husu ba membrus tomak atu serve ita nia povu ho dignu, honestu no professional tuir Lei no regras servisu ne’ebe vigora. Tama iha instituisaun seguransa, laos atu aproveita hodi hala’o violasaun ka torturasaun hanesan ema bandalismu sira, maibé tama iha institusaun ida ne’e atu serve povu no nasaun ida ne’e, ne’ebe nia povu sosa ho nia isin no ran. Instituisaun sei la lakon buat ida, bainhira hasai nia membrus sira ne’ebe la merese ona atu servisu ona iha instituisaun ida ne’e. Tanba joven barak maka hein hela iha liur hakarak atu tama bainhira loke vaga sira prontu atu tama no prontu atu serve povu ida ne’e ho diak no dignu. Ba Komandante sira nomeadu, Komandu husu atu kontrola membrus sira nia servisu no atetude loron ba loron no brani foti medidas wainhira hare’e ka rona membrus sira la kumpre nia orientasaun ka komete infrasaun ruma. Ikus liu, atu afirma ba públiku kona-ba rumoris katak kazu Ainaro hodi kalan (26/08) PNTL ho F-FDTL tiru malu, ne’e lalos. Los maka oknum PNTL tiru ita nia soldadu ida ne’ebe oras ne’e baixa hela iha hospital. Ho akontesimentu ne’e, hodi kalan (26/08) Komandu rua kontaktu malu, kontrola membrus tomak tantu F-FDTL no PNTL hodi hakalma situasaun. Hanesan Komandante Jerál PNTL ho Segundu Komandante Jerál lori Komandu nia naran hakarak husu deskulpa ba Komandu F-FDTL em jerál no espesial ba familia tomak ne’ebe nia oan hetan kanek tanba hetan tiru husi oknum PNTL. Komandu sei foti medidas disiplinar mais forte hasoru membru ne’ebe komete iha infrasaun ida ne’e”.

Media PNTL.

Dili 25/08 Relasiona ho planu konstrusaun Kuartel Jerál Polísia Nasional Timor Leste (PNTL) kaikoli hodi haluan fatin edifisiu, Komandu Jerál hamutuk ho Ministeriu Interior no Sekretariu Estadu Terras e Propriedades hala’o enkontru hodi aselera prosesu Alargamentu ba kontrusaun refere.

Ministru Interior Dr. Longuinhos Monteiru iha nia dirkursu hateten enkontru refere atu bele hatutan Planu Desenvolvimentu ne’ebe trasa husi Governu iha sektor Seguransa liu-liu atu halo kontrusaun ba Kuartel Jerál PNTL nian.

Ministru realsa katak Prosesu ba konstrusaun refere pendente ona durante tinan tolu (3) nia laran tanba ho razaun preukupasaun la klaru husi komunidade sira ne’ebe maka oras ne’e dadaun sei okupa legal ou ilegalmente rai ne’ebe hodi halo kontrusaun ba.

Dr. Longuinhos hateten laiha sidadaun ida mak atu impede desenvolvimentu Instituisaun ida nian, povu sai ho maneira diak ou povu sai ho maneira ladiak, iha opsaun rua deit desde ita justifika katak rai refere pretense ona kontrusaun Kuartel Jerál nian, hodi apela ba autoridade lokal atu informa ba komunidade ne’ebe okupa area refere.

Iha fatin hanesan, Sekretariu Estadu Terras e Proriadades Jaime Xavier Lopes ne’ebe marka mós presensa iha enkontru ne’e esklarese katak parte Sekretariu Estadu Terras e Proriadades halo ona enkontru dala barak ho komunidade ne’ebe afetadu husi Planu Kontrusaun ne’e, maibé tamba iha momentu ne’eba ladauk iha orsamentu atu rekopensa ba komunidade no nia aihoris, nune’e maka Planu refere pendente no foin bele realiza iha tinan ida ne’e.

Total Orsamentu ne’ebe atu fó rekopensa ba komunidade uma kain 20 afetadu ba area kontrusaun Kuartel Jerál PNTL nian hamutuk $ 372.147,21.

Media PNTL.

Dili –Atu hametin Performansia Polisia Femenina iha instituisaun PNTL maka Polisia femenina liu husi Gabinete Jeneru presiza kria atividade social hanesan hari koperativa no arisan.

Segundu Komandante Jeral PNTL Komisariu Polisia Faustino da Costa hateten performansia mai husi problema social, problema familia no ekonomia tanba ne’e inportante hodi hamosu atividade social ne’ebe maka kontribui ba pesoal polisia femenina hanesan inan no membrus PNTL hodi kontribui indireta ba sira nia servisu no performansia hanesan pesoal ida-idak, Nia hato’o asuntu ne’e liu husi abertura enkontru Performasia Polisia Femenina iha Salaun Komunikasaun PNTL Kaikoli Dili, (25/08).

Komisariu ne’e haktuirtan katak Programa Komandu PNTL munisipiu Lautem hodi hari koperativa no programa arisan kada fulan hodi tur hamotuk kolia ba malu kona’a ba problema no dezafiu oi-oin ne’ebe maka hasoru iha familia no instituisaun nudar programa social ne’ebe maka inportante ba Polisia Femenina no sai ezemplu ba munisipiu seluk atu banati tuir.

Kolia kona-ba performansia Polisia Femenina prezidente de juri ba Komisaun promosaun no rekrutamentu PNTL ne’e fo ezemplu se polisia femenina ida mai fuk naruk no hatais ladun kaber ne’e laos tanba ema ne’e barukten maibe iha kestaun balun ne’ebe maka halo nia laiha oportunidade atu hadia aan, tanba ne’e hau hato’o ba sira no alarga informasaun katak kazu violensia domestika ohin loron ass tebes aliende ofensas integridade fizika tanba ne’e kontribuisaun PNTL feto hanesan inan tenke hadia uluk iha instituisaun laran antes habelar ba liur.

Iha okajiaun ne’e Xefe Gabinete Jeneru Inspetur Xefe Daria da Costa Ximenes hateten komesa ohin ba polisia femenina tenke hadia nia performansia liu husi fuk, hatais no seluktan liu-liu ofisiais sira tenke fo ezemplu ne’ebe diak no sai lanenok ba membru sira, no husu ba polisia femenina atu iha loron Sexta tenke uza ropa training ne’ebe maka instituisaun fo laos ida-idak sosa ninia no hatais komforme hakarak.

Liu husi mandatu Komandante Jeral ho nia Segundu Komandante maka kria no hamosu politika Jeneru tama iha estrutura ofisial PNTL ami tenta no orienta ona politika ne’e atu sai hanesan estrutura organika ida iha PNTL ne’ebe maka sei iha prosesu nia laran no sei aprezenta ba ministeriu Intrior bainhira iha aprovasaun ba lei organika foun maka signifika sira iha kompetensia konaba saida maka sira sei halo no saida maka labele halo.

Enkontru Konaba Performansia Polisia Femenina ne’e Diriji husi Segundu Komandante Jeral, akompaña husi Komandante Gabinete Jeneru Inspetur Xefe Daria da Costa Ximenes, Adjuntu Komandante Polisia Komunitaria Inspector Xefe Helena das Dores no parseru TLPDP no partisipa husi Xefe Jender husi Nasional, Munisipiu no Unidade sira. Media PNTL