News

Dili, Ajentes Polísia Nasional Timor Leste (PNTL) hamutuk na’in 1348 ne’ebe maka konkore iha vaga ba Sarjentu sei partisipa iha exame Admisaun iha loron 28 fulan Agostu tinan ida ne’e.

Tuir dadus ne’ebe maka ekipa Komisaun ba teste refere iha katak, Ajentes hirak ne’ebe maka hatama dokumentu ba Konkursu Formasaun Sarjentu hamutuk na’in 1348 husi munisipiu, Unidades no Departamentu iha PNTL nian no na’n 4 seluk husi Ministeriu Interior maibé ekipa Komisaun retira ka hasai husi lista.

Komisariu Polísia Faustino da Costa ne’ebe sai hanesan Presidente Komisaun Admisaun nian iha abertura enkontru ne’ebe hala’o iha Centro Formaçao Policia (CFP) no partisipa diretamente husi Komandante PNTL Munisipiu, Unidade no Pontu Fokal, hateten prosesu no lalaok selesaun Ajentes ba Sarjentus refere halo tuir Diploma Ministerial ne’ebe maka iha.

Segundu Komandante Jerál PNTL afirma tan katak prosesu refere hetan apoio másimu husi ekipa Guarda Nacional Repúblicana (GNR) husi Portugal ne’ebe maka sei halo exame eskrita ba Ajentes sira ne’e. Komisariu Polísia ne’e apela ba Komandante Munisipiu sira atu bele fó hanoin ba Ajentes sira kona-ba vantagen husi Kursu Formasaun refere.

Enkontru refere halo ho objetivu atu fahe informasaun ba Komandante Munisipiu sira, liu-liu Pontu Fokal ne’ebe maka lidera lista kandiadus admitidu sira, atu bele aselera lalais ba preparasaun ba exame ne’ebe besik dadaun ona.

Orariu ba teste Admisaun xamada dahuluk nian sei hala’o iha loron 28 Agostu 2016, iha oras tuku 08:00 dader, kandidatus sira sei hatan pergunta hamutuk 40 iha oras ida nia laran no exame sei realiza iha fatin rua maka hanesan Munisipiu Dili no Munisipiu Baucau. Enkuantu teste Admisaun ba xamada daruak nian sei hala’o iha loron 5 fulan Setembru 2016.

Total vaga ne’ebe iha hamutuk 157 ne’ebe sei compete tuir kapasidade kandidatus sira nian.

Media PNTL.

Dili, Relasiona ho kazu Produz osan falsu ne’ebe maka akontese iha Munisipiu Lautem, Polísia Nasional Timor Leste (PNTL) detein ona suspeitu na’in 3 hodi aprezenta ba iha Ministériu Públiku (MP).

Komandante Jerál PNTL Komisariu Polísia Julio da Costa Hornay iha segunda ne’e (22/08) relata ba jornalista sira kona-ba prosesu invsestigasaun kazu produs osan falsu iha Munisipiu Lautem katak, Polísia kaptura ona suspeitu na’in 3 inklui evidensia hanesan Makina fotokopia ida ne’ebe uza hodi halo Scan no osan $20 tahan 7 hodi aprezenta ona ba Ministériu Públiku Munisipiu Baucau.

Tuir relatoriu ne’ebe maka hato’o husi Komandante PNTL Munisipiu Lautem mai Komandu Jerál katak, Desizaun ne’ebe maka Tribunal foti maka kontinuasaun Prosesu Normal, nune’e Polísia sei nafatin buka informasaun balun hodi bele reforsa tan evidensia ba kazu refere.

“Ita hotu hatene, kazu produs osan falsu ne’e kazu krime, portantu lori ba prosesu depois maka Tribunal sei deside tuir Lei ne’ebe maka vigora iha ita nia rai”, tenik Komandante Jerál iha nia kna’ar fatin.

Kontinuasaun Kazu Bomba Molotov Iha Munisipiu Bobonaro

Prosesu Investigasaun ba Bomba Molotov ne’ebe maka akontese iha Eskuadra PNTL Postu Administrativu Maliana, Munisipiu Bobonaro, tuir relatoriu ne’ebe maka Komandu iha katak, suspeitu ba kazu refere deskoñesidu, nune’e to’o oras ne’e dadaun Polísia sei nafatin servisu maka’as hodi buka suspeitu.

Komandante Jerál mós apela ba komunidade hodi bele apoio servisu polísia nian hodi bele kaptura lalais suspeitu ne’ebe maka halo krime, nune’e entrega ba prosesu Tribunal.

Operasaun Kazu Rama Ambon

Iha biban ida ne’e, Komisariu Polísia Julio da Costa Hornay koalia mós kona-ba Operasaun ne’ebe maka membru PNTL halo relasiona ho Kazu Rama Ambon no deskonfia sira ne’ebe maka durante ne’e lao iha kapital Dili.

“Informa mós ba públiku katak PNTL sei nafatin halo operasaun ba kazu Rama Ambon no asaltu sira ne’ebe maka durante ne’e halo movimentu iha kapital Dili, no konsege halo’ot ona evidensia balun relasiona ho sasan lakon hanesan Laptop, Kamera, Telefone, Kareeta no Motor”, informa Komisariu Julio da Costa Hornay.

Espera katak operasaun refere sei lao nafatin no husu mós apoio husi komunidade hodi kombate kriminozu sira ne’ebe hakarak estraga estabilidade seguransa kapital Dili nian, nune’e ita hotu bele sente hakmatek.

Media PNTL.

Dili- Unidade Espesial Policia(UEP) Polisia Nacional Timor–Leste iha loron 19 Agostu halo serimonia enseramentu ba Kursu Operador Drones, nebe presidi hosi Ministru Interior, no kompleta ho demonstrasaun ba ekipamentus nebe apoiu ba operasaun no tatiku nian.

Ministru Interior Longuinhos Monteiro lansa kursu ida ne’e hodi forma operador nain 6 no hetan apoiu hosi Guarda Nasional Republikana (GNR). Iha fase dahuluk Ministeriu fo ekipamentus ha’at ba treinu pilotu nian. Objetivu kursu ida ne’e atu hari ekipa ida hodi bele ajuda PNTL nomos servisu ho diresaun hotu nebe halao kna’ar seguransa interna.

Ekipamentus hirak ne’e nia funsaun atu hodi halo obsevasaun no nia finalidade maka atu hetan dadus konaba eventu sira, no bele analiza iha tempu oportunu hodi nune’e sai fonte informasaun util ba sira nebe atu foti desisaun.

Batugade- Unidade Patrulamentu Fronteira (UPF)/PNTL entrega sasan kontrabandu ne’ebe maka sira prende hanesan Konvustivel, masimidar no motor ba Servisu Investigasaun Kriminal Munisipiu Bobonaro prosesu ba Tribunal.

Komandante UPF Superintendente João Belo Reis hateten Sasan kontrabandu hirak ne’e prende bainhira UPF halo patrula hodi kontrola movimentu ema no sasan iha fornteira no sasan hirak ne’e nia nain halai lakon hotu tanba ne’e UPF prende no asegura iha eskuadra Batugade, Nia hato’o asuntu ne’e liu hosi serimonia Asina Nota Entrega ne’ebe maka halao iha Kuartel UPF Batugade iha (17/08).

Komandante ne’e informatan katak Sasan kontrabandu hirak ne’ebe maka entrega hanesan motorizada unidade 4, masimidar saku 16 no fos saku rua ne’ebe maka prende iha Tunubibi Maliana hafoin entrega ba servisu Investigasaun Kriminal Bobonaro lori prosesu ba iha Tribunal atu foti desijaun ruma.

Hahu fulan Janeiru to’o Agostu tinan ne’e UPF prende ona minarai hamutuk 50 barel (litru rihun 11 ) motorizada 4, no motor lubuk ida seluk ne’ebe maka prosesa tia ona no entrega ba munisipiu Bobonaro hodi impede atividade negosiu no importasaun illegal ba transporte hanesan motor no kareta ne’ebe maka prende iha Suai no Oe-Cusse.

Atividade patrulamentu hanesan meius ida hodi prevene nune’e Timor-Leste labele sai fatin destinasaun ba sasan hosi rejultadu krime tanba nasaun vizinu preukupa nune’e Timor-Leste mos prekupa tanba viatura hirak ne’ebe maka laiha dokumentu kontinua sirkula iha nasaun ne’e tanba ne’e kazu konaba inportasaun illegal ba motorizada ka kareta ou sasan seluktan halo prosesu investigasaun liu husi Komandu munisipiu no lori ba Ministeriu Publiku hodi prosesa ba Tribunal.

Sasan evidensia hirak ne’e ofisialmente entrega ba Servisu Investigasaun Kriminal munisipiu Bobonaro maibe kontinua rai iha Kuartel UPF tanba laiha transporte atu tula ba Maliana nune’e UPF sei asegura to’o prosesu Tribunal desidi sasan hirak ne’e atu ba Estadu ou oinsa.

Serimonia entrega sasan evidensia ne’e halao ho Asina Termu Entrega husi Komandante UPF Superintendente João Belo Reis ba Komandante Investigasaun munisipiu Bobonaro Inspector Sabino Barreto no akompaña husi Ofisial Justisa Ministeriu Publiku, Komandante Relasaun Publika no membrus UPF. Media PNTL

Dili, Tersa Feira ne’e (16/08) Komandante Jerál PNTL hala’o enkontru ho Komandante munisipiu 13 no Komandante Unidade sira aprezenta relatoriu hodi rona diretamente dezafiu no susesu servisu ne’ebe maka durante ne’e hetan iha terenu.

“Enkontru ne’e importante atu ita bele fahe informasaun ba malu husi komandante munisipiu sira mai iha komandu rasik no mós problema balun ne’ebe maka presiza ita hato’o ba malu atu nune’e implementasaun iha terrenu bele lao ho diak tuir regras servisu ne’ebe maka iha”, hateten Komisariu Polísia Julio da Costa Hornay perante Komandante munisipiu sira iha sala enkontru Kuartel Jerál Kaikoli.

Komisariu Polísia Julio da Costa Hornay apela mós ba Komandante Munisipiu sira atu kontrola transporte nia utilizasaun husi membrus sira nune’e bele mantém kondisaun transporte nian hodi halo operasaun iha terrenu nune’e mós komandante munisipiu no Unidade sira atu akompaña nafatin servisu membru idak-idak no korigi karik iha buat balun maka sala, fó hanoin wainhira sira atu hala’o sira nia kna’ar.

Iha enkontru ne’e, Komandante munisipiu no Unidade sira aprezenta relatoriu servisu ne’ebe maka Komandu Munisipiu Dili ba atuasaun kazu rama ambon, komandu munisipiu Ermera ba susesu inagurasaun Igreja no serimonia nahe biti bo’ot, komandu munisipiu Viqueque komunidade Waibobo pronto ona ba rejistu hodi hetan kartaun Eleitoral atu partisipa iha eleisaun, no mós Unidade Polísia Fronteira (UPF) nian hodi halo prenvensaun ba inportasaun sasan illegal ne’ebe maka tama mai Timor Leste.

Ho relatoriu hirak ne’e maka Komandu Jerál fó agradese ba Komandante Munisipius nia prestasaun servisu ne’ebe diak atu bele mantem servisu polísia iha terenu no garante prestiju institusaun PNTL.

Media PNTL.

Dili, Atu bele detekta motorista ne’ebe maka lori transporte ho kondisaun lanu, membru Polísia Nasional Timor Leste (PNTL) Unidade Tránzitu hetan formasaun husi Guarda Nasional Republicana (GNR) .

Iha serimonia entrega sertifikadu ba formandu sira, Koordenador Formasaun GNR Tanente Coronel António Ludovino hateten PNTL iha ona aparelu atu halo teste ba persentajen alcohol no ho formasaun ida ne’e maka bele introduz ba membru Unidade Tránzitu sira atu bele implementa ona iha terenu.

“Liu husi formasaun ne’e ami transmite esperensia ne’ebe maka ami iha kona-ba area ida ne’e iha Portugal, hodi introduz iha ne’e tuir forma no métodu foun hodi fiskaliza kondisaun motorista sira nia tanba efeitu husi alcohol (tua)”, tenik Koordenador Formasaun GNR iha Kuartel Jeral Kaikoli Dili Sesta (12/08).

Ho utilizasaun aparelu refere, bele ona reduz númeru asidente ne’ebe maka kada tinan sempre aumenta makas no mós asegura seguransa iha estrada, tanba kauza husi asidente hirak ne’e maka kondutor sira lori transporte ho kondiasaun lanu no bele fó perigu ba ema seluk nia vida.

Entertantu iha okaziaun ne’e, Komandante Unidade Tránzitu Seguransa Rodoviariu Inspetor Xefe Antonio L.C Soares hateten Governu sosa tia ona aparelu Alcolimitru hamutuk 26, tanba ne’e ho Formasaun ne’ebe hala’o ba membru Unidade Tránzitu nain 15 husi Nasional no munisipiu Dili no wainhira publika iha Jornal da Repúblika maka sira bele utiliza ona aparelu refere hodi bele detekta persentajen alcohol.

Inspetor Xefe Antonio L.C Soares haktuir tan katak durante ne’e mosu asidente tráfiku barak, maibé ladauk ida aparelu ida maka bele prova katak motorista sira ne’ebe lori transporte ho kondisaun lanu ou la lanu.

Tuir Kodigu de Estrada, kondutor ou motorista ne’ebe maka hemu tua no persentajen 0-0,88 graus sei hetan Infrasaun hodi selu Koimas (multa) no persentajen 1, 2 ne’e krime bazeia ba Kódigu Penal artigu 208 .

Formasaun ne’e hala’o ba membru nain 15 ne’ebe maka fahe ba klase rua, klase primeiru fahe ba membru nain 8 no klase daruak ba membru nain 7. Formasaun ne’e hala’o iha Kuartel Jerál Kaikoli hahu’u iha loron 14 to’o 15 de Agostu no hetan partisipasaun másimu husi membru sira. Media PNTL

Dili, Relasiona ho eventu Internasional Tour de Timor ne’ebe sei hala’o iha fulan Setembru tinan ne’e, Komandante Operasaun Polísia Nasional Timor Leste (PNTL) hamutuk ho Komandante Munisipiu sira partisipa iha enkontru Planu Preparasaun Ordem Servisu ba realizasaun aktividade refere.

Enkontru refere realiza atu apresenta ba Komandante Munisipiu sira kona-ba Route ne’ebe maka Siklista (Raider) sira sei ultrapasa hahu’u husi Inisiu to’o Final, ne’ebe tuir planu sei realiza iha loron 13-17 Setembru 2016 atu Komandante Munispiu idak-idak bele halo Preparasaun Ordem Servisu hare’e ba kestaun seguransa durante eventu ne’e hala’o.

Komandante Jerál PNTL iha abertura enkontru ne’e apela ba Komandante Munisipiu sira atu fó sira nia kolaborasaun no apoio seguransa hodi bele hetan susesu husi aktividade ne’ebe maka sei partisipa husi siklista Internasional sira.

“Tour de Timor sei ultrapasa iha munisipiu balun, tanba ne’e maka enkontru ida ne’e halo atu Komandante Munisipiu sira bele rona direta informasaun hodi halo Planu Operasaun ba iha kada munisipiu atu bele asegura eventu ida ne’e ho diak”, tenik Komisariu Polísia Julio da Costa Hornay, sexta feira ne’e (12/08) iha Kuartel Jerál PNTL Kaikoli.

Komisariu Polísia Julio da Costa Hornay informa tan katak hare’e ba esperiensia Tour de Timor ne’ebe hala’o iha tinan kotuk lao ho susesu tanba hetan kolaborasaun husi parte hotu, nune’e eventu ba tinan ne’e iha esperansa bele hetan resultadu ne’ebe diak mós no Komandante Munisipiu sira bele orienta membru PNTL atu asegura Route ne’ebe maka Siklista sira sei liu.

iha fatin hanesan, Komandante Operasaun Superintendente Xefe Henrique da Costa hateten aktividade Tour de Timor hanesan aktividade Internasional ida ne’ebe maka além partisipa husi Timor oan sei involve mós ema Estrangeiru sira, nune’e presija hare’e mós ba aspektu seguransa durante eventu ne’e hala’o.

Entertantu representante Komisaun Organizadora husi Sekretaria Estadu Juventude no Desportu (SEJD) ne’ebe maka tinan ne’e sai hanesan responsavel ba eventu refere hateten Tour de Timor no Dili Maratona ne’ebe maka sei hala’o mós iha fulan Outubru tinan ne’e, sai ona Planu Estratéjiku Desenvolvimentu Nasional (PEDN) 2011-2030 governu nian, nune’e eventu hirak ne’e sei kontinua hala’o mós iha tinan oin.

Tuir informasaun ne’ebe maka Ofisial Planeamentu Operasaun PNTL hetan katak, aktividade Tour de Timor ne’e sei hala’o ho Route maka hanesan abertura iha loron 13 Setembru husi Dili ba Manatuto, loron 14/09 route Manatuto-Quelicai; loron 15/09 route Quelicai-Ilomar; loron 16/09 route Ilomar-Lospalos no Final iha loron 17/09 husi Lospalos ba munisipiu Baucau.

Total partisipante Internasional ne’ebe maka konfirmadu atu marka iha eventu ne’e hamutuk ema na’in 25 no partisipante Nasional seidauk iha dadus tanba inskrisaun sei loke iha loron 5 fulan Setembru 2016.

Media PNTL.

Dili, Iha loron sexta fim de semana (05/08) ne’e Polísia Nasional Timor Leste (PNTL) Gradua tan Ajentes Rekruta hamutuk na’in 263 atu kompleta efetivus ba servisu Instituisaun nian iha terrenu.

Ajentes Rekruta hirak ne’e, kompustu husi mane hamutuk na’in 263 no feto hamatuk 7 antes halo juramentu no simu graduasaun frekuenta sira nia Formasaun iha Centro Formasaun Polísia (CFP) Comoro durante fulan 9 nia laran hahu’u husi fulan Outubru 2015 to’o Jullu 2016.

Komandante CFP Superintendente Arquimino Ramos iha abertura serimonia ne’e hateten antes formasaun hahu’u iha total ema hamutuk na’in 263 maka tama iha Inkoporasaun maibé wainhira hahu’u Kursu Formasaun, kandidatu mane na’in ida resigna ann, na’in rua seluk tanba kestaun saude hodi la konsege tuir formasaun, nune’e sira ne’ebe maka konsege termina Kursu Formasaun hodi gradua hamutuk na’in 263.

“Prosesu atu muda mentalidade ema sivil nian ba polísia presija sistema no politika Formasaun ida ne’ebe diak no relevante ho situasaun, kondisaun ne’ebe Timor Leste iha”, tenik Komandante CFP perante konvidadus no ajentes rekruta hamutuk ho familia sira.

Superintendente Arquimino Ramos akresenta tan katak Formasaun ba Polísia foun sira iha nivel Ajentes nu’udar Formasaun Prinsipal atu forma karakter no kompotensia ajentes polísia hodi servi no protege povu ne’ebe maka sira sei servi ba no iha sistema Formasaun ida ne’ebe adekuadu no iha kualidade hodi hari’I sai ema ne’ebe ho karakter nu’udar membru polísia ho ninia filosofia Polísia Komunitaria maibé ninia organizasaun, estrutura, formasaun, disiplina identiku ho militar.

Entertantu Komandante Jerál PNTL Komisariu Polísia Julio da Costa Hornay iha ninia diskursu hateten PNTL hanesan Instituisaun ida ne’ebe Forte ne’e duni Ajentes Rekruta sira tenke pronto atu hasoru dezafiu saida deit maka sei mosu iha terrenu.

“Juramentu ne’ebe imi halo laos atu sai deit hanesan formalidade ida, kada liafuan/frase ne’ebe imi hateten maibé iha ninia sentidu ba imi wainhira moris nu’udar polísia, juramentu ne’e representa komprimisu atu defende interese no valor Nasaun nian ne’ebe ass liu”, hateten Komandante Jerál PNTL.

Komisariu Polísia Julio da Costa Hornay afirma tan katak membru ajentes rekruta ne’ebe maka halo ona juramentu tenke tane ass interese Nasaun no povu Timor Leste nian duke interese pesoal ema ida-idak nian, no apela ba graduadu sira atu hatudu komportamentu exemplar apartidariu (la mete iha partidu), no respeitu tomak ba prinsipiu ita nia Estadu Direitu Demokratiku, hodi kaer ba legalidade no tau as direitus humanus.

“Ita hakarak atu ita nia sidadaun sira hare’e polísia ne’ebe respeita ba lei no ajente polísia ne’ebe bele proteje sidadaun, no sai amigu ba ema hotu no mós iha kapasidade no kompetensia ne’ebe sai parte importante ba Estabilidade iha ita nia Rain ne’e kkonstroi wainhira prezerva valores tolu ne’e: PAZ, SEGURANSA NO LIBERDADE”, hatutan Komandante Jerál PNTL.

Kursu Formasaun ba Ajente ho nia finalidade atu forma Rekruta sira para iha koñesimentu no kompetensia teknika ne’ebe espesifiku ba hala’o funsaun ne’ebe fó ba sira. Kursu Formasaun ba ajentes rekruta hirak ne’e hanesan kuartu Kursu ne’ebe realiza hodi atesta ba kualidade formasaun no progresu ne’ebe desenvolve iha PNTL to’o mai ohin.

Komandante Jerál PNTL mós hato’o honra bo’ot no privelegio ba apoiu ne’ebe Guarda Nacional Republicana fó hanesan parseiru desenvolvimentu ba iha Susesu Kuartu Kursu Formasaun Ajentes.

Partisipa iha serimonia ne’e Ministru Defesa Dr. Cerilo Cristovão, Duputadu Komisaun B Parlamentu Nasional Dr. David Dias Ximenes, Prokurador Jerál Repúblika Dr. José Ximenes, Segundu Komandante das F-FDTL Brigadeiru Jeneral Filomeno Paixão, Reitor UNTL, Parseiru PNTL no Ofisias Superiores, Subalternus, Ajentes inklui familia husi graduadus sira.

Media PNTL.  

Loron Kinta feira ne’e (04/08) Instituisaun Polísia Nasional Timor Leste (PNTL) Hala’o Serimonia Tomada de Posse ba ofisias Superiores no Subalternus hamutuk na’in hitu ofisialmente simu Kna’ar hanesan Komandante Munisipiu, Segundu Komandante no Xefe Gabinete foun atu kompleta servisu instituisaun nian iha terenu.

Ofisias Superiores hirak ne’e antes ne’e kaer ona kna’ar nu’udar Komandante husi Munisipiu sira no tuir despasu ne’ebe maka Komandu Jerál hasai hodi nomea ba kargu foun, hanesan forma Rekolokasaun ba Estrutura Komandu PNTL nian iha Munisipiu 13 nia laran.

Komandante hirak ne’ebe maka simu posse iha Serimonia ne’e maka hanesan: Komandante Operasaun maka Superintendente Xefe Henrique da Costa; Komandante Munisipiu Baucau maka Superintendente Xefe José Soares; Komandante Munisipiu Ermera kaer husi Superintendente Natercia Martins; Superintendente Justino Menezes Komandante Munisipiu Baucau rekoloka hanesan Komandante Munisipiu Ainaro; Segundu Komandante Munisipiu Ainaro maka Superintendente Albino Mouzinho; Segundu Komandante Munisipiu Aileu maka Superintendente Umbelina Santos Soares no Xefe Gabinete Jéneru maka Inspetór Xefe Dária da Costa Ximenes.

Tuir Komandu PNTL, Rekolokasaun ne’e mós hanesan forma ida, atu oinsa Komandante Munisipiu sira labele mantén deit iha fatin ou munisipiu ida, maibé oinsa bele hatene lalaok seguransa iha teritoriu Timor laran tomak.

Iha diskursu serimonia ne’e, Komandante Jerál PNTL hato’o Parabens ba Ofisiais Superiores no Subaltenus ne’ebe maka simu posse no apela ho kargu foun ne’e Ofisiais sira bele halo servisu ho responsabilidade másimu no hatudu exemplu ne’ebe diak ba membrus tomak iha terenu. Tanba kna’ar hirak ne’ebe simu ona, Ofisiais sira ne’e sai hanesan Servidor Nasaun no Povu.

Serimonia Tomada de Posse ne’e dirige husi Komandante Jerál Komisariu Polísia Julio da Costa Hornay no Segundu Komandante Komisariu Faustino da Costa hamutuk ho Ofisias Superiores no Subalternus hotu iha PNTL.

Media PNTL.

Dili, Hafoin halo kna’ar nu’udar Komandante Jéneru iha Instituisaun Polísia Nasional Timor Leste (PNTL) durante tinan neen, iha tersa (02/08) semana ne’e Komandu entrega servisu Jéneru nian ba iha Komandante foun.

Komandante Jerál PNTL akompaña husi Segundu Komandante Jerál iha abertura enkontru ne’e hateten halo mudansa iha Departamentu Jéneru hanesan rotasaun ida ne’ebe maka sai nesesidade atu kompleta servisu Jéneru nian iha Instituisaun PNTL.

“Oportunidade ida ne’e atu fó hanoin ba ita hotu katak ho mudansa xefe ou Komandante nian hodi servisu Jéneru nian bele lao to’o iha munisipiu no labele lao deit iha nivel Komandu Jerál nian”, Komisariu Julio da Costa Hornay hato’o lia hirak ne’e perante pontu fokal Jéneru PNTL nian husi munisipiu 13 iha Kuartel Jerál Kaikoli Dili.

Komandante Jerál PNTL afirma tan katak entrega servisu Jéneru ba Komandante foun atu bele kontinua servisu Jéneru nian hodi bele desenvolve diak liu tan iha futuru no agradese ba servisu ne’ebe durante ne’e halo husi Komandante Jéneru anterior ba Instituisaun PNTL.

Iha fatin hanesan, Superintendente Assistente Umbelina Soares ne’ebe iha enkontru ne’e hato’o mós relatoriu servisu durante tinan neen hateten area hat ne’ebe maka nia halo durante ne’e maka hanesan Rekrutamentu, Promosaun Pozisaun no mós Edukasaun.

“Gabinete Jéneru estabelese hodi hare’e ba igualidade Jéneru iha parte Rekrutamentu, Promosaun Pozisaun no mós Edukasaun atu labele mosu dezegualidade iha Instituisaun PNTL nia laran”, tenik Superintendente Assistente Umbelina Soares.

Iha relatoriu ne’e Xefe Jéneru ne’e relata servisu hirak ne’ebe maka gabinete Jéneru halo ho parseiru Internasional sira hanesan UN WOMEN, TLPDP husi tinan 2010 to’o tinan 2016 no mós koordenasaun iha liña ministerias hodi estabelese PAN 1325 ne’ebe maka agora dadaun implementa ona.

Xefe Jéneru foun Inspetor Xefe Daria Ximenes ne’ebe maka nomeada ona husi Komandu Jerál hateten iha futuru husu koordenasaun no apoio husi pontu fokal Jéneru nian iha munisipiu 13 atu bele desenvolve servisu Jéneru nian diak liu tan.

Departamentu Jéneru PNTL durante tinan neen komanda husi Superintendente Assistente Umbelina Soares no iha tinan ne’e Komandu entrega servisu refere ba Inspetor Xefe Daria Ximenes. Tuir despaxu ne’ebe maka iha katak Superintendente Assistente Umbelina Soares koloka hodi sai Adjuntu Komandante PNTL Munisipiu Aileu.

Media PNTL.