News

Dili- Timor-Leste Police Development Program (TLPDP) entrega motorizada 8 ba Polisia Nasional Timor-Leste ( Ofisial Ligasasaun Prokuradoria/ OLP) atu bele fasilita diak liutan servisu hodi halo monitorizasaun ba investigasaun prosesu kazu krime iha Ministeriu Publiku.

Adjuntu Komandante TLPDP Superintendente Kurt Plumer hateten ho apoiu motorizada 8 ne’e bele kompleta PNTL nia nesesidade liu-liu OPL sira bele halao sira nia servisu ho professional no diak liutan hodi responde ho lalais, Nia hato’o kestaun ne’e iha serimonia entrega motorizada ba OLP iha Kuartel Jeral PNTL Kaikoli Dili (02/08).

Nia haktuirtan katak ho fornesimentu motorizada ba OLP iha munisipiu Dili, Baucau, Bobonaro, Ermera, Oe-Cusse no Viqueque bele aumentatan vizivilidade no komunikasaun entre PNTL ho Ministeriu Publiku liu-liu halo monitorizasaun ba servisu investigasaun nian, tanba ne’e husu ba membru sira atu utiliza ho kuidadu nune’e bele dura ba tempu naruk.

Iha okaziaun ne’e komandante Jeral PNTL Komisariu Julio da Costa Hornay husu ba OPL sira atu utiliza sasan hirak ne’e ho responsabilidade maximu no kuida didiak tanba motorizada ne’e bele hatutan ita boot sira nia ain hodi hakat luan no lalais ba fatin servisu nian.

Nia espliktan katak motorizada ne’ebe apoiu husi TLPDP ninia situasaun la hanesan ho Ofisial Polisia Suku (OPS) nian tanba ne’e motorizada ne’e utiliza ba servisu no bainhira membrus sira hetan kolokasaun foun entrega fali ba membru foun ne’ebe troka imi.

Antes termina nia deskursu Komandante Jeral lori Komandu PNTL nia naran agradese ba TLPDP ne’ebe fo apoiu maximu ba servisu OLP PNTL tanba ho apoiu ida ne’e OLP sira nia servisu bele lao ho diak no lalais, no husu nafatin TLPDP nia apoiu ba parte seluk ne’ebe maka sei presiza.

Eskritoriu Ofisial Ligasaun Prokuradoria hahu nia servisu iha loron 14 fulan Fevereiru tinan 2014 ho nia eskritoriu primeiru iha Prokuradoria Distrital Dili atu nune’e haluantan espansaun ba vizivilidade no komunikasaun entre PNTL no Ministeriu Publiku liu-liu halo monitorzasaun ba servisu investigasaun nian iha nivel nasional no munisipiu; ida ne’e hanesan efeitu pojitivu ida ba investigasaun ne’ebe komesa ona iha suksesu atu lori autor kriminoju sira hodi prosesa kazu tuir dalan ne’ebe loos.

Serimonia entrega motorizada ne’e Partisipa husi Segundu Komandante Jeral, OPL husi munisipiu, membru no ofisial husi Servisu Investigasaun Criminal no parseru TLPDP. Media PNTL.

Hera, Liu husi futebol , maka bele hametin diak liu Amizade entre Instituisaun husi Forsa, Polísia Nasional Timor Leste (PNTL) ho Falintil Forsa Defesa Timor Leste (F-FDTL).

Kinta – Feira ne’e (28/07) iha kampu futebol Politekniku Hera, membru husi PNTL-CFP hamutuk ho membru husi F-FDTL husi Komponente Naval hala’o jogu amizade hodi bele koñese malu no hametin diak liu tan relasaun Instituisaun rua ne’e iha futuru.

Komandante Centru Formasaun Polísia (CFP) Superintendente Arquimino Ramos ho Komandante Komponente Naval F-FDTL, iha abertura jogu ne’e hateten jogu ne’e halo atu oinsa membru husi Instituisaun PNTL no F-FDTL koñese malu diak liu tan, nune’e iha terrenu bele halo kooperasaun servisu ne’ebe diak.

“Parte PNTL agradese ba Komandante Komponente Naval tanba aseita ona konvite hodi realiza jogu ida ne’e no nia objektivu maka iha nivel tekniku atu interpreta  Lei Seguransa Nasional númeru 2/2010, obriga Instituisaun rua ne’e servisu hamutuk”, tenik Superintendente Arquimino Ramos.

Komandante CFP akresenta tan katak liu husi desizasun polítiku sira nian sei loke eskola ida ba Instituisaun rua ne’e ninia membru ofisial sira bele hamutuk no liu husi aktividade informal hanesan jogu amizade bele hakbesik liu tan membru sira.

Iha fatin hanesan, Komandante Komponente Naval Kapitaun Maijor Adão Britu ne’ebe representa Komandu F-FDTL hateten jogu ne’e halo atu oinsa individu husi Institusaun rua ne’e bele koñese malu diak liu tan.

“Objetivu husi jogu amizade ne’e atu oinsa soldadu sira husi Instituisaun F-FDTL no PNTL bele iha familiarismu ne’ebe diak liu tan, tanba Komandu rua ne’e hare’e oinsa para bele lori soldadu sira iha fatin ida atu sira bele koñese malu diak liu tan entre ida ho ida”, hateten Kapitaun Maijor Fragata Komponente Naval.

Komandante Naval ne’e afirma tan katak se kuandu soldadu sira la koñese malu no dok ba malu maka dala ruma akontese buat ne’ebe maka ita la espera, tanba deit soldadu sira idak-idak ho ninia arogansia katak sira mesak maka bele halo servisu, maibé tuir lolos ne’e Instituisaun rua hamutuk maka sai hanesan Pilar Importante ba nasaun ida ne’e ninia funsionamentu diak, se Instituisaun rua n’e lao diak.

Media PNTL.

Relasiona ho akontesimentu ne’ebe maka akontese iha loron 25/07 entre membru PNTL husi Polísia Tránzitu ho Jornlista ida husi Jornal Business Timor iha parte Kolmera, Segundu Komandante Jerál Polisia Nasional Timor Leste (PNTL) Komisariu Polísia Faustino da Costa halo sesaun Klarifikasaun ho Jornalista husi Ajénsia Notisiosa Timor Leste (ANTL). Tuir mai klarifikasaun Segundu Komandante Jerál PNTL:

Atu bele fahe informasaun liga ho akontesimentu ne’ebe mosu iha dia 25 kona-ba informasaun to’o katak Polísia halo abusu poder ba jornalista ida, atu dehan deit hanesan nunue’e; iha dia 25 besik meudia, iha parte loja Novena nia sorin, iha kamioneta ida maka detekta para kontra sinais Tránzitu, ne’e mais ou menus 11:45. Ekipa tránzitu sira laos cek point maka baku, hakarak atu esplika buat ne’e, ne’ebe halo movimentu patrulla iha area ne’eba detekta kamioneta no sira para ne’e, atu hare’e nia dokumentus iha ka lae? Iha tempu ida ne’e maka alin joven ida ne’e mosu husi kotuk, e sira mós la hatene ne’e jornalista, hasai foto husi kotuk. Sira bolu joven ne’e, kuandu sira bolu joven ne’e, joven ne’e la dehan nia ann dehan nia jornalista. Iha tempu ne’ebea maka nia deklara katak nia jornalista, hau hanoin laiha problema. Mas depois sira diskuti malu, entaun sira komesa kaer nia, hafoin maka nia dehan hau ne’e jornalista. Hau atu dehan deit, buat sira ne’e koordenasaun no koperasaun deit, se maluk jornalista sira hakarak halo kobertura ruma kona-ba aktividade polísia nian, laiha sala ida. Bele akompaña fó hatene Relasaun Públika PNTL nian para ita bele hatene. Tanba saida maka buat sira orseik ne’e akontese, tanba polísia bele iha Prediksaun katak iha Timor Leste, Media Sosial ID balun ho falsu, entaun orsida ema la hare’e públikasaun ida que diak, maibé publikabuat ne’ebe que dala ruma ita sente la merese atu públika iha Timor Leste. Entaun ida ne’e maka sira interven hodi hapara nia, mas inisiu kedas se nia fó hatene nia ann katak hau mai husi diresaun ida ne’e, hakarak halo kobertura ida kona-ba aktividade ne’e, hau hanoin laiha problema ida. Tanba ne’e maka mosu dezentendimentu ka kesalapahaman hodi sira interven ba alin mane ne’e. Se kuandu maka alin ne’e iha momentu interven maka halo koperasaun karik, hau hanoin buat ne’e la akontese. Atu dehan deit katak, primeiru Polísia Nasional maka atu mantein Estabilidade no mós Implementa Lei ho Ordem ba sira ne’ebe ho intensaun hakarak atu viola Lei ruma.

Media PNTL.

Dili, Polísia Nasional Timor Leste (PNTL) iha kuarta feira ne’e (27/07) realiza Workshop kona-ba Gestaun Lideransa ba Komandante Munisipiu, Unidade no Departamentu sira ne’ebe maka tuir ona Kursu Gestaun Lideransa nian iha tinan 2011-2014 liu ba no Workshop ne’e halo atu bele fó hanoin hikas ba Teoria foun sira ne’ebe iha relasaun ho Gestaun Lideransa nian.

Adjuntu Komandante Jerál PNTL Komisariu Polísia Faustino da Costa ne’ebe halo abertura ba workshop ne’e hateten Workshop ne’e realiza hodi bele konvida fila fali membru PNTL sira ne’ebe maka tuir ona Kursu Gestaun Lideransa iha tinan kotuk atu bele haburas ka hamorin fila fali teoria sira ne’ebe maka hetan ona dutante Kursu.

“Objetivu husi Workshop ne’e halo tanba Komandante Centru Formasaun Polísia (CFP) hatene katak membru PNTL atu tolu (300) maka partisipa ona iha aktividade Kursu Diploma Gestaun no Lideransa, no ohin konvida duni maluk Graduadu kona-ba Lideransa no Gestaun mai para atu bele hanoin hikas fali saida maka sira aprende ona iha tinan balun ba kotuk”, hateten Adjuntu Komandante Jerál PNTL.

Komisariu Polísia Faustino da Costa afirma tan katak membru PNTL hirak ne’ebe iha tinan kotuk tuir ona Kursu Lideransa no Gestaun ne’e , além de hetan teoria sira mós aplika pratika iha terrenu ne’ebe sira finaliza ho apresentasaun kona-ba saida mak sira hetan durante Kursu.

Iha fatin hanesan, Komandante Centru Formasaun Polisia Superintendente Polísia Arquimino Ramos iha ninia intervensaun hateten PNTL ne’ebe foin halo tinan 16 presija iha formasaun barak atu bele hadia diak liu tan servisu iha Instituisaun PNTL nia laran.

“Seminariu ida ne’e realiza ho kolaborasun husi professor Choi husi nasaun Korea ne’ebe iha esperiensia barak koa-ba Gedtaun no Lideransa iha nasaun barak, nune’e nia bele fahe esperiensia no teoria kona-ba Gestaun nian ba membru hotu ne’ebe maka tuir ona Kursu iha tinan kotuk”, tenik Superintendente Polísia Arquimino Ramos.

Iha biban ne’e, Komandante Centru Formasaun Polisia husu ba partisipantes sira hotu atu bele aproveita Serminariu ne’e ho diak, no aprende tan materia foun balun kona-ba Gestaun no Lideransa nian.

Media PNTL.

Kefamenanu, Unidade Patrullamentu Fronteira (UPF) halo sorumutu ho Tentara Nasional Indonesia (TNI) Satgas Pamtas RI-RDTL yunif 641 no yunif Raider 321 atu bele garante seguransa ba populasaun iha liña fronteira Timor Leste no Repúblik Indonesia.

Batallaun 641 no UPF nia misaun maka atu garante seguransa iha liña fronteira, hodi promove harmonia iha komunidade rua ne’ebe maka hela iha liña fronteira, mesmu iha diferensa nasaun, diferente bandeira maibé kultura ida deit.

“Ita nia intensaun husi visita ida ne’e, oinsa maka Unidade forsa ida ne’ebe foin mai ita iha komunikasaun ne’ebe ativu, para problema ne’ebe akontese iha nivel taktikal to’o mai nivel Danyon bele resolve iha nivel taktikal”, dehan Komandante UPF Superintendente Polísia João Belo.

Superintendente Polísia João Belo afirma tan katak forsa rua husi nasaun Timor-Leste no Indonesia sei koordena servisu ne’ebe maka diak hodi komprende idak-idak ninia misaun no iha koordenasaun ne’ebe maka efektivu, nune’e problema krime kona-ba liña fronteira nian ne’e bele resolve iha nivel base antes to’o iha nivel governu.

Iha fatin hanesan Danyon Satgas Pamtas RI-RDTL Letnan Kolonel Infantry 641 Wisnu Herlamban hateten TNI sente orgullu tanba bele hetan oportunidade atu bele servisu hamutuk ho UPF hodi garante seguransa iha liña fronteira.

“Iha dader ne’e ami hetan visita husi UPF ho esperansa katak ho ami TNI Satgas Pamtas 641 nia presensa hamutuk ho UPF maka atu bele garante seguransa iha liña fronteira no ami sente orgullu bele hetan oportunidade atu bele asegura seguranasa iha fronteira RI-RDTL espesialmente iha parte leste nian”, tenik Letnan Kolonel Infantry 641 Wisnu Herlamban.

Letnan Kolonel Infantry 641 mós akresenta tan katak, Nota Entedementu ne’ebe maka sei asina entre UPF ho TNI Unit 641 nian hanesan halo patrullamentu konjuntu, partilla informasaun kona-ba aktividade iha liña fronteira, halo visita iha nivel postu entre forsa rai rua ne’e nian.

Entertantu Konsuladu RDTL-RI Atambua Cipriano Manca Teme ne’ebe maka partisipa mós iha sorumutu ne’e hateten durante tinan rua nia laran ona maka servisu koordenasaun entre TNI Satgas Pamtas RI-RDTL ho UPF lao diak tebes, laiha ameasa ruma iha liña fronteira hodi kombate krime ne’ebe maka mosu.

Sorumutu ne’ebe hala’o durante loron rua (20-21/07) iha markas Komandu Atambua no Kefamenanu-Indonesia nian, tuir planu sei asina mós Nota Entendimentu (MoU) entre UPF ho TNI ba iha estabelesimentu husi Unit 641 hodi kompleta servisu iha liña fronteira hamutuk ho Batalhaon Unit Infantry Raider 321/GT ne’ebe maka antes ne’e estabelese ona.

Media PNTL.

Dili, ajentes Polísia Nasional Timor Leste (PNTL) hamutuk ema nain 157 iha fulan Outubru to’o Novembro tinan ne’e sei tuir Kursu Formasaun ba Sarjentu hodi kompleta servisu iha Instituisaun ida ne’e.

Segundu Komandante Jerál Komisariu Polísia Faustino da Costa hamutuk ho Komandante PNTL husi Munisipiu 13, iha segunda-feira ne’e (25/07) partisipa iha enkontru kona-ba sensibilazasaun informasaun hodi halo Promosaun Selesaun ba Ajentes ne’ebe maka sei enfrenta Kursu Formasaun ba Sarjentu nian.

“Enkontru ida ohin ne’e hanesan fase ida ba implementasaun Diploma Ministerial ne’ebe Ministeriu Interior hasai inklui Despasu husi Ministru nian, kona-ba prepara ekipa hodi halo Promosaun Selesaun ba ajentes balun ne’ebe maka sei enfrenta Kursu Formasaun ba Sarjentu iha fulan balun tuir mai”, hateten Komisariu Polísia Faustino da Costa ba jornalista sira iha Centru Formasaun Polísia Comoro.

Segundu Komandante Jerál PNTL akresenta tan katak, presensa husi Komandante PNTL Munisipiu 13 atu bele fahe informasaun ba pontu fokal husi Unidade idak-idak atu bele prepara ajentes husi Munisipiu sira ne’ebe maka sei enfrenta Kursu refere.

“Oinsa para buat ne’e lao diak, presija Komandante Unidade Munisipiu sira nia koñesimentu para Prosedimentu ne’e lao oinsa, esplika ba sira hodi halo sensibilizasaun ba informasaun atu bele fó apoio ba sekretariadu hodi halo servisu ida ne’e”, hatutan Segundu Komandante Jerál PNTL.

Presensa Komandante PNTL Munisipiu 13 iha enkontru ne’e, atu sira bele entende kona-ba Formasaun Sarjentos ne’ebe sei halo entre fulan Outubru to’o Novembro, tanba laos PNTL deit maibé sei envolve mós maluk balun husi CPLP (Comunidade Países da Língua Portuguesa) hanesan Caboverde, Guine-Bissau, Guine-Equtorial no mós São Tome e Príncipe, sei fó sira nia delegasaun hamutuk ho PNTL hodi halo Formasaun durante fulan 6, Estágiu durante fulan 2 iha Timor Leste.

Total vaga ba PNTL hamutuk 157.

Media PNTL.

Ermera, atu fasilita servisu membru Polísia Nasional Timor Leste (PNTL) iha Munisipiu Ermera iha sexta semana kotuk (22/07) Uma hamutuk 50 hetan inagurasaun husi Ministru Interior no Segundu Komandante Jerál PNTL.

Ministru Interior Longinhos Monteiro ne’ebe ofisialmente inagura uma hirak ne’e hateten agradese no kongratula servisu Kompañia Konsorsiu Grup Sala LDA ne’ebe maka hetan responsabilidade ba iha kontrusaun uma ba membru PNTL iha Munisipiu Ermera.

“Hau agradese tanba simu informasaun katak kontrusaun ne’e hala’o, konta mós ho apoio ne’ebe maka maun Veteranus sira fó direkta no indirekta ba Komapañia Sala ne’ebe maka hala’o kontrusaun ida ne’e no ba diretor Kompañia lori Ministeriu nia naran hau hakarak kongratula ba ita nia esforsu maske ho difikuldade ne’ebe maka mosu konsege duni ohin halo serimonia entrega xave ba Ministeriu Interior hodi hatutan ba Komandu PNTL ”, tenik Ministru Interior iha Munisipiu Ermera.

Ministru Interior mós akresenta tan katak, Planeamentu ne’ebe diak ba governu defini hodi halo Kaserna Polísia ninian, laos halo deit iha Munisipiu Ermera, maibé halo kedas desde 2011 hahu’u iha munisipu balun no oras ne’e dadaun iha munispiu seluk iha hela prosesu kontrusaun nia laran.

“Em prinsipiu polítika ida ne’e halo para depois bele ajuda Komando bele jere gestaun kolokasaun membrus iha territorio nasional, tanba prinsipiu ida tantu iha forsa seguransa no forsa defesa ita ninia kolokasaun laiha limite espasu, signifika karik hau moris iha Lospalos hau nia kolosaun laos iha Lospalos deit maibe ita kumpri ita nia misaun atu hetan kolokasaun iha territorio nasional”, hatutan Longinhos Monteiro.

Iha fatin hanesan, Segundu Komandante Jerál PNTL Komisariu Polísia Faustino da Costa ne’ebe lori Komando PNTL, iha ninia diskursu ba Serimonia Inagursaun Bairo PNTL hateten governu nia polítika hato’o mai iha Komandu atu kria kondisaun ba Polísia Nasional Timor Leste (PNTL) nia membru sira.

“Governu nia polítika nian ne’ebe maka hato’o mai Instituisaun Polísia Nasional Timor Leste atu identifika no implementa programa sira, ida maka kria kondisaun ba Polísia Nasional, iha fulan balun ba kotuk halo mós serimonia hanesan iha Rejiaun Otonomia Espesial Oecusse, ohin ita halo ba daruak iha Munisipiu Ermera”, tenik Komisariu Polísia Faustino da Costa.

Entertantu Diretor Kompañia Konsorsiu Grup Sala LDA Domingos José da Costa, ne’ebe maka hetan responsabilidade ba iha kontrusaun Uma ba PNTL iha Munisipiu Ermera hateten maske hetan difikuldade iha prosesu kontrusaun nian, maibé parte Kompañia konsege finaliza projetu ne’e hodi entrega ba iha PNTL.

“Hanesan Kompañia lokal ida ne’ebe hetan fiar husi governu hodi implementa projetu ida ne’e iha terrenu, infrenta difikuldade hanesan limitasaun rekursu sira hodi implementa projetu ida ne’e to’o final”, hateten Diretor Kompañia Konsorsiu Grup Sala LDA.

Total orsamentu ne’ebe maka preve husi governu ba Kompañia ho montante $1.220.000, maibé husi orsamentu refere la sufisiente atu bele finalija projetu ne’e, nune’e Kompañia hasai osan rasik ho total $1.504.000 hodi finalija projetu Uma ba PNTL iha Munisipiu Ermera.

Media PNTL.

Dili- Durante fulan Juñu nia laran Polisia Nasional Timor-Leste husi Unidade Tranzitu Seguransa Rodoviariu rejista asidente trafiku hamutuk 169, husi total ne’e nain neen (6) mate, 130 kanek kma’an no nain 53 maka kanek todan.

Komandante Jerál PNTL Komisariu Polisia Julio da Costa Hornay wainhira hasoru malu ho jornalista sira iha nia kna’ar fatin hateten, asidente tráfiku hirak ne’ebe maka akontese, tanba kondutor sira lori karreta no motor ho kondisaun lanu no la tau importansia ba vida hodi viola Kodigu de Estrada.

“Kazu asidente hirak ne’e akontese tanba kondutor no motorista la respeita Kodigu Estrada, menus konsiensia nomos fator neglijensia”, tenik Komandante Jeral PNTL iha Kuartél Jerál Kaikoli Dili (19/07).

Atu prevene kazu asidente ne’ebe ass, maka Polísia kontinua halo sensibilizasaun Lei kona-ba regras no Sinais Tránzitu iha eskola no komunidade sira atu bele kompriende no iha kuidadu bainhira lori motor no karreta. Aliende ne’e halo aktividade passa revista (cek point) hodi prende sira ne’ebe maka laiha karta kondusaun, karreta nia kondisaun ladiak inklui laiha dokumentus husi transporte hirak ne’e.

Maske nune’e konsiénsia husi motorista no kondutor sira nian importante tebes hodi nune’e bele prevene asidente tráfiku.

Media PNTL.          

Dili- Komandu Unidade Espesial Polisia (UEP) fó ona sansaun ba Komandante Kompania Alfa Inspector Jose Luis ne’ebe maka fó karreta UEP ba ema sivil lori hodi soke airin eletrisidade iha Sexta Madrugada no rejulta karreta att.

Komandante UEP Superintendente Xefi Afonso dos Santos wainhira hasoru malu ho Komandante Jerál iha Segunda ne’e (18/07) hateten hasai ona Komandante Kompania Alfa husi nia kargu iha Sabadu loron 16 hodi ba hala’o fali kna’ar hanesan ofisial normal iha Komandu UEP.

“Komandante Kompania Alfa Inspector Jose Luis ne’ebe maka fó karreta UEP ba ema sivil lori no hetan soke, hetan ona sansaun hodi transfere nia ba hodi hala’o servisu hanesan ofisial bai-bain”, tenik Superintendente Xefi Afonso de Jesus iha kuartél Jerál Kaikoli Dili.

Komandante UEP reforsa tan katak, membrus sira ne’ebe maka lori karreta fora husi oras servisu no laiha ordem ruma maka hetan asidente pior liu tan fó ema sivil maka lori, membru ne’e tenke responsabiliza hodi hadia karreta ne’ebe maka aat, tanba governu fó fasilidade atu fasilita servisu laos ba estraga.

Entretantu, Komandante Jerál PNTL Komisariu Polisia Julio da Costa Hornay hateten Komandu loke ona prosesu ba ofisial ne’e, hafoin rejultadu prosesu sai maka Komandu sei foti medidas maibé Ofisial ne’e prontu atu hadia karreta refere.

Hatan kona-ba prekupasaun públiku ba desijaun ne’ebe maka Komandu foti ladun forte, Komandante Jeral ne’e informa katak ofisial ne’e simu konsekuensia husi hahalok ne’ebe maka nia halo no prosesu disiplinar maka sei determina nia hahalok ida ne’ebe sala kontra saida.

Media PNTL.

Dili, kuarta ne’e (14/07) Segundu Komandante Jerál Polísia Nasional Timor Leste (PNTL) Komisariu Polísia Faustino da Costa informa situasaun seguransa ba iha Presidente da Repúblika Taur Matan Ruak.

Komisariu Polísia Faustino da Costa hafoin enkontru ba jornalista sira hateten reuniaun ne’e atu informa ba Presidente da Repúblika (PR) kona-ba lalaok seguransa iha fronteira no mós total kazu hirak ne’ebe maka akontese iha rai laran.

“Informa ba PR kona-ba Asidente no Insidente ne’ebe akontese durante fulan ida ba kotuk, informa mós katak asidente no insidente iha fulan kotuk ne’e sa’e, ba asidente iha fulan ida ne’e ita rezistu númeru ne’ebe bo’ot kompara ho Maiu liu ba katak ema ne’ebe mate iha Maiu ema nain 4 maibé iha Juñu ne’e ema nain 6 tanba asidente no mós insidente hanesan koflitu ofensas integridade simples ne’ebe maka mosu”, tenik Segundu Komandante Jerál iha Palacio Presidensial Aitaral Laran.

Iha enkontru ne’e mós PR husu oinsa situasaun seguransa iha fronteira, hatan ba ida ne’e Komisariu Polísia Faustino da Costa hateten situasaun fronteira to’o ohin loron lao diak, polísia kontinua halo movimentu no kontinua prende sasan kontrabandu sira hanesan kombustivel ne’ebe maka atu tama mai Timor Leste.

Segundu Komandante Jerál PNTL mós informa ba PR kona-ba total númeru asidente no insidente ne’ebe maka akontese iha fulan Juñu, ba ida ne’e Komisariu Polísia esplika, “asidente iha fulan kotuk resulta ema 130 maka kanek kma’an, nain 33 kanek todan no nain 6 maka mate, 3 husi Lospalos, 1 husi Dili, 1 husi Aileu no ida seluk husi Liquiça kompara ho Maiu karik ema nain 4 deit”.

Além kazu asidente, iha mós kazu insidente iha fulan Juñu nian hanesan asaltu/ tuda malu hamutuk 358 mak rejistu ona iha Komandu PNTL, husi kazu hirak ne’e laiha maka grave liu no nia númeru sae as liu kompara iha fulan Maiu nian hamutuk 341 kazu.

Hatan kona-ba motorizada sira ne’ebe prende durante ne’e, Segundu Komandante Jerál ne’e esplika, “Iha Juñu nia laran ne’e ita konsege hatama osan ba kofre Estadu $32.997 tanba dokumentus la kompletu, laiha nia dokumentus ba pesoal nian, laiha mós dokumentus ba asesoria transporte ne’ebe nia lori”.

Media PNTL.