News

Dili, basea ba akontesimentu baku malu entre membru PNTL no F-FDTL ne’ebe akontese dala rua, maka Kinta feira ne’e (30/06) iha Kuartel Jerál F-FDTL Komando husi Instituisaun rua refere hala’o Konferensia Imprensa atu esklarese ba akontesimentu membrus F-FDTL no PNTL baku malu.

“Ita hotu hatene no asiste informasaun liu husi media no televisaun katak, iha fulan kotuk liu ba membru PNTL baku Segundu Sarjentu ida husi F-FDTL no iha semana kotuk fali membru husi F-FDTL iha postu Ainaro baku membru PNTL ida. Situasaun ida ne’e balun generiza fali dehan katak Instituisaun F-FDTL ho Instituisaun PNTL maka baku malu ne’ebe komunidade sente tauk no trauma keta krise 2006 nian mosu fila fali ou tamba besik ona elisaun ne’ebe keta partidu politikus balun iha kotuk hodi kria situsaun ida ne’e hodi hatudu ba povu katak instabilidade bele mosu fila fali iha ita nia rai laran. Lori Komandu rua nia naran, Komandu F-FDTL no Komando PNTL nia naran ami hakarak hato’o ba públiku katak kazu ida ne’e individu ou oknum husi PNTL no F-FDTL maka baku, laos Institusaun F-FDTL no PNTL maka baku malu, ne’e problema entre joven ho joven ne’ebe maka foin tama iha Instituisaun F-FDTL, ne’ebe seidauk entende didiak kona-ba oinsa sai membru ba forsa seguransa no defesa kestaun mentalidade ne’e maka prinsipal”, hateten Brigaderu Jeneral F-FDTL Lere Anan Timur iha konferensia imprensa ne’e.

Komandante F-FDTL ne’e reforsa tan katak, Instituisaun rua ne’e la hanesan ho Institusaun sivil, Institusaun F-FDTL no PNTL nia regulamentu disiplinar regirosu hodi regula militar ka ajente PNTL ida nia lalaok servisu durante nia moris iha Institusaun ne’e, pior liu militar ka ajente ida envolve problema baku malu ne’e krime no nia sei hasoru prosesu tribunal ba nia asaun krime no prosesu disiplinar ba nia aaun infrasaun didiplinar.

“Bainhira nia hetan sansaun kriminal tinan 3 ba leten, nia automatikamente simu sansaun disiplinar dimisaun ou dala ruma nia la hetan pena kriminal maibé nia bele simu sansaun disiplinar hanesan subtensaun ba fulan rua ka fulan tolu ka fulan ne’en sem salariu, ne’e tuir Institusaun idak-idak nia regra”, tenik Komando F-FDTL ne’e.

Nune’e Komando rua ne’e liu husi Konferensia Imprensa ne’e hakarak hato’o ba komunidade katak, problema baku malu entre oknum F-FDTL no PNTL ne’ebe akontese iha fulan kotuk no semana kotuk, maka Komando sei foti medida disiplinar ne’ebe forte no Komando rua ne’e husu ba komunidade atu labele tauk no trauma husi akontesimentu baku entre F-FDTL no PNTL ne’e.

Media PNTL.

Dili-Atu Dezenvolve diak liu tan prespetiva jeneru iha kna’ar Polísia Nasional Timor-Leste nian, maka Gabinete Jeneru PNTL realija workshop ho terma Orsamentu Responsivu Jeneru PNTL, hodi deskuti kona-ba nesesidade no programa jeneru nian.

Iha abertura workshop ne’e, representante Komandante Jerál PNTL Superintendente Xefe Carlos Almeida Sousa Jeronimo hateten objetivu husi realizasaun workshop ne’e maka bele traduz orsamentu sensivel ba jeneru iha Instituisaun PNTL nia laran.

“Instituisaun PNTL iha knar inportante atu aborda prespektiva jeneru liu husi servisu hamutuk ho Sekretariu Eestadu Mulher (SEm) no gabinete Primeru Ministru no hetan apoiu husi parseru dezenvolvimentu sira hodi garante ba polisia mane no feto sira nia partisipasaun no asesu ba fasilidade”, hateten Inspector Jeral iha deskursu abertura workshop ne’ebe hala’o iha Salaun Delta Nova Tersa ne’e (28/06).

Superintendente Xefe ne’e haktuir tan katak gabinete jeneru PNTL sai hanesan pilaar importante hodi halo koordenasaun, komunikasaun, kolaborsaun no analija jeneru husi unidade ida-idak hodi hare’e no analiza situasaun jerál polísia mane no feto ba objektivu instituisaun ho prinsipiu igualdade ba oportunidade asesu, rejultadu no benefisiu atu nune’e bele atinji konseitu igualdade jeneru atu tau iha planu asaun PNTL 2017.

Entertantu iha fatin hanesan, Xefe Gabinete Jeneru-PNTL Superintendente Assistente Umbelina Soares hateten, liu husi worksop ida ne’e polisia sira ne’ebe maka loron-loron hasoru komunidade, identifika komunidade nia problema no saida maka sira implementa bainhira atende kazu tanba ne’e maka presija sira nia partisipasaun iha workshop ne’e atu nune’e bele hato’o sira nia nesesidade ne’ebe maka sai xave importante ba servisu loron-loron nia iha munisipiu ida-idak.

Xefe Gabinete Jeneru PNTL reforsa tan katak, aktividade sira ne’ebe sai xave ba implementasaun orsamentu tinan 2017 nian ba asuntu igualdade jeneru liu-liu ba problema Unidade Ema Vuneravel (VPU) no mós problema violensia bazeia ba jeneru ne’ebe maka komundade sira hasoru loron-loron.

Sekretariu Estadu Mulher (SEM) hanesan instituisaun governu ne’ebe maka servisu diretamente ba promosaun igualdade jeneru iha instituisaun estadu hotu, inklui PNTL tanba ne’e maka iha fulan ida ne’e nia laran SEM halo formasaun ba liña ministeriu hotu inklui PNTL.

“Fulan ida ne’e nia laran SEM halo formasaun, atu hare’e nesesidade feto ho mane ne’ebe maka la hanesan hodi responde ba prekupasaun sira liu-liu atu hetan konsiderasaun ba Planu Annual tinan 2017 hodi asegura implementasaun ba programa iha tinan oin atu bele iha konsiderasaun ba politika abordajen integradu jeneru liu-liu atu responde ba prekupasaun feto ho mane iha instituisaun hotu”, hateten Xefe Departamentu Ligasaun Sekretariu Estadu Mulher (SEM) Odilia Martins.

Gabinete Jeneru PNTL dezenvolve hela politika jeneru nian, liu husi servisu hamutuk ho UNWOMEN, SEM no Ministeriu Interior halo ona avaliasaun institusional kona-ba jeneru no hamosu rekomendasaun lubuk ida atu melhora dezenvolvimentu jeneru iha PNTL no inisia atu halo abordajen integrada jeneru ne’ebe sai alvu iha tinan 2017.

Workshop durante loron rua ne’e Loke husi Inspetor Jeral akompaña husi Xefe Departamentu Ligasaun SEM, reprezentante husi UN Women no TLPDP no partisipa husi reprezentante Ministeriu Interior, parseru PNTL, no reprezentante Unidade VPU munisipiu 13.

Media PNTL.

UNDP Timor Leste liu husi ninia Projeto  fortalesimento Governasaun no Prestasaun  Serviços  iha PNTL ho parseria ho UN Women no UNDP Global Focal Point sei realiza workshop durante loron rua, 28 – 29 de June 2016 iha Salaun Delta Nova,Comoro  kona ba integrasaun perspektiva  gênero iha Plano  Asaun Annual PNTL nian ba 2017.

Workshop ne’e hetan mos koordenasaun husi Secretário de Estado para o Apoio e Promoção Social Econômico das Mulheres no mos Departamento de Gênero  PNTL nian. Realizasaun workshop ne’e bazeia ba rekomendasoens husi SEM nebe rekomenda atu  PNTL  dezenvolve Avaliasoens liuhusi Plano Asaun Anual 2017 hodi koloka orsamento anual  ba  rekomendasoens sira nebe maka fo sai iha relatoriu husi SEM.

Partisipantes nebe sei tuir workshop ne’e mai husi PNTL inklui mos Unidade VPU no género husi nível nasional no distrital no mos ministeriu relevantes sira seluk.

Workshop  ne’e rasik sei lidera husi  Unidade  Género PNTL ho ninia parseiros  dezenvolvimento hanesan UNDP,UN Women, TLPDP, IOM, no  Marie Stops International  inklui mos agências internacionais  sira seluk no instituisoens husi governamentais hanesan Komisaun SIDA.

Metodalojia workshop ne’e sei aprezenta liu husi apresentasaun introdutória husi SEM kona ba  kompromissos nasionais no internasionais hanesan Konvensaun   Eliminasaun ho formas  hotu kona ba diskriminasaun kontra Feto (CEDAW), Plano Asaun Nasional kona ba Violênsia Bazeia ba  Género no  Plano Asaun Nasional husi artigu 1325.

Obketivu husi workshop ne’e hodi bele  garanti katak  kompromissos kona ba género iha aspeitu nasionais no internasionais Timor Leste nian hanesan  NAP-1325 no observasaun konklusiva CEDAW nian ho Planu Asaun Nasional kona Violensia Bazeia ba Generu  integra duni iha  Plano Asaun Annual  2017 PNTL nian ho ninia orsamento nebe alokado iha prosesu implementasaun ba servisu 2017 nian.

Dili-Durante fulan Jeneiru to’o Juñu Polisia Nasional Timor-Leste (PNTL) Departamentu Tranzitu Seguransa Rodoviariu rejista kazu asidente hamutuk 777 husi kazu hirak ne’e nain 625 kanek kma’an , nain 255 kanek todan no nain 25 maka mate.

Segunda ne’e, (27/06), Komandante Jerál PNTL Komisariu Polísia Julio da Costa Hornay iha sesaun intrevista ho jonalista sira hateten, asidente sira ne’ebe maka akontese durante ne’e dala barak kauza husi konsinesia husi ema ne’ebe maka lori transporte.

“Kazu asidente hirak ne’e akontese tanba kondutor no motorista sira falta kuidadu ba Kodigu Estrada, menus konsiensia nomos fator neglijensia,”Komandante Jerál hato’o kestaun ne’e iha nia kna’ar fatin Kaikoli Dili.

Komisariu Polísia ne’e haktuir tan katak, dala barak kondutor sira lori karreta ho kondisaun lanu no la tau importansia ba vida hodi viola Kodigu de Estrada tanba ne’e mosu asidente tráfiku, no lori ba prosesu ba sira ne’ebe maka lori karreta no motor laiha karta kondusaun, kondisaun husi transporte ladun diak no laiha dokumentus kompletu husi motor no karreta refere.

“Husu ba kondutor no motorista sira atu iha konsiensia no tau importansia vida moris humanu iha karreta leten tanba ita ema nia vida la fa’an iha merkadu no loja nune’e bainhira asidente kauza mate no tohar ne’e hotu ona no laiha troka; Tanba ne’e lao ho kuidadu, kontrola velosidade, se karik matan dukur tenke deskansa barak antes lori kareta tanba dala barak kondutor transporte publiku buka liu mak osan no halai kareta ho kondisaun lanu ou dukur,” komandante PNTL apela.

Ema ida-idak nia konsiensia importante atu bele prevene asidente tráfiku tanba ne’e papel media importante atu informa no eduka komunidade sira.

Media PNTL.

Dili, Komandante Jerál Polísia Nasional Timor Leste (PNTL), Komisariu Julio da Costa Hornay apresia tebes ba Governu Japaun inklui Japan International Cooperation Agency (JICA) ne’ebe mak fó apoio máximu ba iha Instituisaun Polísia Nasional Timor Leste (PNTL).

Kooperasun ne’e iha area rekursu humanu, lojístika, finanseiru, planeamentu no mós jestaun kona-ba rekursu umanu inklui mós jere lojístika ba transporte manuntensaun.

Governu Japaun ho JICA mós fó apoio máximu iha polísia komunitáriu hanesan ohin ita asiste teatru husi alin feto sira ne’ebe apresenta, ida mak ita informa KPK involve mós polísia suku hodi bele ba rezolve komunidade sira nia problema violensia doméstika liu-liu ba rai.

“Ita reduz problema lubuk ida rai hamutuk ho autoridade lokal ho suku no vetaranus sira, reprezentante mós feto ho parte hotu-hotu involve iha laran ne’e nia resultadu pozitivu tebes, ne’e bele ita alkansa, tanba governu Japaun fó apoio liu husi JICA nian,” Komandante Jerál PNTL, Komisariu Julio da Costa Hornay hato’o nia diskursu iha Hotel Timor, Kinta (23/06).

Iha parte seluk mós UNDP fó apoio hodi PNTL, ne’ebe hetan vantajen pozitivu tebes, espera katak UNDP nia programa ba apoio dezenvolvimentu ba iha Instituisaun PNTL bele lao nafatin.

“Ne’ebe sira apresia tebes-tebes ba iha area seguransa ninian, hodi nune’e sira dehan kuandu seguransa ne’e lao diak, estabilidade lao diak, mak prosesu dezenvolvimentu ba nasaun ne’e lao ho diak ne’ebe sira apresia tebes ba autoridade seguransa nian,” dehan Hornay.

Fontes: Jornal Timor Post, Edisaun Segunda (27/06).

Dili, relasiona ho rekruta hamuruk atus-rua resin ne’ebe foin lalais ne’e halo protesta kona-ba seidauk iha xamada atu tama iha Sentru Formasaun Polísia, Polísia Nasional Timor Leste (PNTL) sei halo teste iha tinan oin.

Komandante Jerál Polísia Nasional Timor Leste (PNTL) Komisariu Polísia Julio da Costa Hornay iha ninia entrevista ho Media RTTL no PNTL hateten, rekruta hirak ne’ebe to’o agora seidauk tama iha Sentru Formasaun Polísia tanba kestaun kolokasaun orsamentu husi governu mai iha PNTL ho montante ne’ebe ki’ik.

“ Vaga ne’ebe loke ba públiku ne’e hamutuk 520 (atus-lima-ruanulu) pessoas, maibé depois prosesu rekrutamentu lao ema ne’ebe passa to’o iha prosesu final hamutuk 600 (atus-neen), entaun kuandu primeiru turnu remata bolu tan segundu turnu tama iha quartu kursu ne’e mak agora lao dadaun ne’e ba quintu Kursu ne’e dezisaun governu para atu aprova ou la aprova sira ne’ebe reserve iha liur hela”, hateten Komisariu Polísia Julio da Costa Hornay iha Kuartel Jerál Kaikoli sexta ne’e (24/06).

Komandante Jerál PNTL ne’e subliña tan katak sira ne’ebe reserve agora dadaun iha liur hela hamutuk 520 tal (atus-lima-resin), governu deside aprova hodi bele tama iha quintu kursu maibé tanba kestaun Orsamentu ba iha quintu Kursu iha 2016 hotu ona ba iha formasaun ne’ebe maka agora dadaun lao hela, nune’e governu deside hodi tau ba iha tinan 2017 tuir despaisu husi Ministerio Interior nian.

Kestaun seluk husi rekruta sira ne’ebe seidauk tama iha Sentru Formasaun, tanba kolokasuan orsamentu ba iha PNTL tinan 2016 foka liu ba ha alimentasaun membru PNTL no mós ba iha manutensaun, kombustivel, nune’e kestaun rekruta sira nian ne’e, tama hotu iha proposta adisional ba tinan 2017. Iha tinan oin maka sei hare’e rekruta hirak ne’e, hodi tuir prosesu selesaun hanesan teste saude, hodi tama iha formasaun 2017 nian.

Media PNTL.  

Dili, atu prevene numeru asidente trafiku aumenta, Komando Polísia Nasional Timor Leste (PNTL) munisipiu Baukau kontinua hala’o aktividade cek point ba motorizada no karreta.

Komandante PNTL munisipiu Baukau, Superintendente Justino Menezes hafoin partisipa iha misa Selebrasaun loron Santo António iha Kuartel Jerál Kaikoli (22/06) hateten, oras ne’e dadaun numeru asidente iha munisipiu Baukau menus ona kompara ho fulan kotuk.

“Operasaun kona-ba cek point ba transporte públiku, motorizadas no karreta estadu lao nafatin tanba ne’e asidente iha Baucau redus ona”, tenik Komandante PNTL Munisipiu Baucau.

Superintendente ne’e informa tan katak, aktividade cek point ne’ebe hala’o iha loron Sabadu no Dominggo foka liu ba iha motor no karreta Estadu ne’ebe laiha Karta Autorizasaun Servisu, maibé uja hodi halo fali aktividade privadu iha fim de semana, nune’e parte Polísia prende no halo relatorio ba iha ninia Ministeriu kompetente atu prosesa.

Resultadu husi aktividade cek point ne’e, durante besik fulan 5 prende ona motor no transporte públiku kuaje 500 no karreta estadu kuaje 20, no total osan ne’ebe motorista sira ne’ebe halo infrasaun hodi selu multa, hamutuk $6000 no osan hirak ne’e hatama ba kofre estadu.

Kestiona kona-ba situasaun seguransa iha munisipiu Baucau Komandante ne’e haktuir katak, situasaun seguransa públika iha munisipiu Baucau lao kontroladu nune’e aktividade Komunidade Estadu no Relijioju lao normal iha seim impedimentu ruma no iha kolaborasaun servisu entre komunidade, veteranus, intelektuais no estadu ba iha servisu polisia munisipiu Baucau nian.

Media PNTL.

Dili- Familia bo’ot Polisia Nasional Timor-Leste (PNTL) hamutuk konvidadus sira seluk iha 22 de Junu de 2016, selebra loron Santo Antonio nudar Padrueru PNTL liu husi misa ne’ebe prezidi direita husi Bispo Diocese Dili MGR. Virgilio do Carmo da Silva,SDB.

Bispo Diocese Dili MGR. Virgilio do Carmo da Silva,SDB iha ninia homilia husu ba PNTL atu fiel ba lema PNTL ne’ebe dehan ‘Servir e Protejer’.

Bispo Diocese Dili salienta liu tan katak“Pontus inportante atu PNTL bele aplika lema ne’e maka tenki iha Komunikasaun, Empatia, Integridade, Profesionalismu no Korajen. PNTL iha abilidade atu hatudu empatia la to’o rona ho simpatia deit, la rona ho tilun deit maibe rona ho atensaun, rona ho fuan no iha mos abilidade atu hatudu integridade no abilidade atu hatudu profesionalismu no abilidade atu hatudu korajen laos atu halo buat ne’ebe boot no situasaun difisil deit.”

Iha okajiaun ne’e Komandante Jeral PNTL Komisariu Polisia Julio da Costa Hornay hateten selebrasaun misa ba loron Santo Antonio ne’e ho objektivu atu fo agradesementu ba instituisaun PNTL no nia membrus tomak no mos agradesementu ba herois libertasaun da patria ne’ebe maka fornese sira nia vida tomak hodi sosa ukun rasik aan ida ne’e no mos ba membrus PNTL ne’ebe maka mate iha servisu laran.

Nia haktuir tan katak misa ida ne’e atu halo malirin buat kroat balu ne’ebe maka karik uluk ita uza iha servisu laran maka ladun halo los no buat ruma karik ita husu para halo malirin nune’e ba oin ita servisu ho situasaun ida ne’ebe maka hakmatek ho espiritu de korpu no espiritu de kamaradajen ne’ebe forte hadomi povu no atende povu ho justu, honestu no professional.

Nudar Mahein ba Instituisaun PNTL Santo Antonio proteje husi buat neebe aat, durante ne’e nia mos la toba, nia estatua mos la hela saugati deit iha ne’e maibe nia harohan nafatin ba instituisaun ne’e atu ema kontinua muda, transforma no konverte nia aan.

Misa Solene ne’ebe diriji husi Bispo Diocese Dili ne’e mos nudar misa Enseramentu Retiru Misericordia nebe hetan mos partisipasaun husi Ministru Interior Longuinhos Monteiru, Eis Segundu Komandante Jeral Komisariu Afonso de Jesus, Komandante munisipiu 13, Komandante Unidade, Sefe Departamentu, kombidadus no familia boot PNTL. Media PNTL

Dili, Komando Polisia Nasional Timor-Leste (PNTL ) munisipiu Dili, iha Segunda ne’e (13/06) komemora loron St. Antonio padrueru PNTL ho misa ne’ebe prezidi husi Amu Kapelaun Nelino Americo no akompaña husi amu Paskalis Patut O Carm no amu Aniceto Maia da Costa.

Iha ninia homilia, Padre Con selebrante Paskalis patut O carm apela ba membru PNTL atu labele uza sala armas ne’ebe maka iha, maibé uza hodi fó seguransa ba sosiedade.

“PNTL tenke servi povu no nasaun ho matenek, labele laran metin ba forsa fiziku, borgol no pistola wainhira hala’o nia knaar, tanba ne’e polisia tenke matenek no halai lais liu kriminoju sira“, hateten Padre Paskalis Patut O Carm iha selebrasaun misa refere.

Amo Con selebrante   informa tan katak, selebrasaun loron St. Antonio ba tinan ida ne’e diferente, tanba antes hala’o selebrasaun misa, hala’o mós aktividade Retiru ne’ebe maka amo Kapelaun hala’o ona iha munisipiusanulu resin ida falta Munisipiu Covalima ho Munisipiu Bobonaru.

Aktividade Retiru hanesan programa PNTL nian, ne’ebe maka halo ho nia objetivu atu ema idak-idak nu’udar kriatura Maromak nian hatene ninia a’an no komprende lolos oinsa lori ita nia fiar iha servisu loron-loron.

Iha okajiaun ne’e Adjuntu komandante PNTL munisipiu Dili Superintendente Assistente Euclides Belo hato’o agradese ba amu selebrante no amu konselebrante nain rua ne’ebe maka selebra loron St. Antonio nian hamutuk ho familia bo’ot PNTL iha Komando PNTL munisipiu Dili.

Santo Antonio moris tinan 36 deit no nia hanesan ema ida ne’ebe Santu liu iha istoria igreja Katólika no nia prosesu sai santo lais liu depois nia mate la to’o tinan ida (loron 352) deit nia sai santo, Santo Antonio koñesidu hanesan ema ne’ebe maka servisu maka’as to’o nia mate.

Misa solene ne’e partisipa husi Komandante Jerál PNTL, Komandante munisipiu Dili, Komandante Administrasaun, Xefe Departamentu Polisia Komunitariu, reprezentante ministeriu Saude, konvidadus no familia bo’ot PNTL.

Media PNTL.

Dili, Kinta-feira ne’e (09/06) Polísia Nasional Timor Leste (PNTL) liu husi Polísia Munisipiu Dili no Tránzitu halo sosializasaun no fahe informasaun kona-ba regras ka normas sinais tránzitu nian ba estudante Sekundaria Nobel da Paz, iha Quintal Bo’ot.

Segundu Komandante Munisipiu Dili Superintendente Assistente Euclides Belo ne’ebe representa Polísia Munisipiu Dili perante estudante sira, esplika uluk nanain kona-ba misaun no papel PNTL nian iha nasaun ida ne’e maka garante seguransa Interna rai ida ne’e nian.

“Misaun PNTL nian tuir ita nia Lei Konstitusional RDTL garante seguransa Interna nian, úniku instituisaun Estadu nian ida ne’ebe maka garante seguransa interna nian formalmente Lei fó dalan atu uja forsa hodi fó garante seguransa maka PNTL”, hateten Segundu Komandante Munisipiu Dili.

Superintendente Assistente ne’e mós subliña tan katak, PNTL maka garante máxima ita nia estabilidade maibé laos PNTL mesak, tenke iha apoio tomak husi komunidade no mós estudante sira hanesan futuru nasaun nian.

PNTL além de sai hanesan instituisaun Estadu nian ida ne’ebe maka garante seguransa interna, Segundu Komandante Munisipiu Dili ne’e akresenta tan katak, papel segundu husi PNTL nian maka kontrola seguransa tránzitu rodoviariu ne’ebe maka sai hanesan pontu esensial iha aktividade sosializasaun ida ne’e, atu nune’e estudante sira bele hatene atu oinsa lao tuir sinais no regras husi tránzitu rodoviariu nian.

“Infrasaun ne’ebe sidadaun hotu-hotu lori karreta no motor maka kontra regras sinais tránzitu nian maka sei kona multa, hanesan laiha xapa matrikula, laiha espellu no laiha lampu maka Polísia Tránzitu sei prende”, haktuir Superintendente Assistente Euclides Belo.

Iha fatin hanesan, diretor eskola Sekundaria Nobel da Paz Pedro Nunes agradese ba presensa no realizasaun aktividade refere husi Polísia Munisipiu Dili nian no mós Tránzitu hodi fahe informasaun sira ne’ebe bele fó benefisiu ba estudante sira atu hatene kona-ba regras ka normas tránzitu ninia.

Marka presensa iha aktividade ne’e, estudante sekundaria hamutuk ho professores no representante husi Polísia Tránzitu Munisipiu Dili.

Media PNTL.