News

Dili- Ajente Polisia Nasional Timor-Leste (PNTL) hamutuk 62 ofisialmente integra ba Unidade Espesial Polísia (UEP) hafoin termina sira nia Estájiu Baze durante fulan tolu (3) kona-ba servisu UEP.

Komandante Jerál PNTL, Komisáriu Polisia Julio da Costa Hornay ne’ebe partisipa iha enseramentu Formasaun no Treinamentu kona-ba UEP ne’e hateten ba ajente PNTL ne’ebe terrmina ona Estájiu katak forsa rezerva PNTL tenke iha disiplina, moral, étika no profesionalizmu ne’ebe sai hanesan sasukat ba susesu Instituisaun PNTL nian iha futuru.

“Ohin ofisialmente imi sai hanesan membrus efektivus iha Unidade ida ne’e nian, tanba ne’e hau husu ba imi atu servisu didiak ho valor disiplina, hodi tane ass Unidade ida ne’e nia naran, husik ona imi nia pasadu no kaer metin regra servisu no kumpri orientasaun Komando ho firmeja no prontidaun,” Komisáriu Polisia Julio da Costa hateten iha nia diskursu perante serimonia Enseramentu Estájiu ba Kursu Kontra Terorizmu no Estáziu baze iha Kuartél UEP Bairo-Pite, Kinta-feira semana ne’e (14/04/2016).

Komandante Jerál PNTL ne’e mós apela ba formandu UEP ne’ebe termina ona Estájiu ne’e katak, “Hau husu ba membrus UEP tomak atu kuida no tane aas ida ne’e, atuasaun brutalizmu no bandalizmu, sei estraga prestijiu Instituisaun no sai perguntas bo’ot ba komunidade kona-ba ita nia prezensa atu sai hanesan protezedor ka sai hanesan amiasador ba komunidade sira, ne’e sai hanesan pergunta ba ita nia aan, se sai protezedor maka presiza reflesaun ne’ebe klean ba ita nia aan”.

Ho optimista Komandante Jerál fiar katak Unidade ida ne’e sei sai hanesan ezemplu ba sira seluk, tanba ne’e presiza responsabilidade husi Komandante sira hahu’u husi Komandante seksaun to’o Komandante Unidade atu kontrola nia membrus sira iha Kuartél, no iha terrenu, brifin inportante ba membrus antes no depois de ezekusaun servisu, karik iha failansu ruma halo koresaun imediata nune’e labele repete sala ne’ebe akontese ona.

Iha okajiaun ne’e, Komandante UEP Superintendente Xefe Afonso dos Santos hateten membrus UEP foun ne’ebe maka integra ohin, iha tempu badak sei koloka Kompania ida iha Munisipiu Cova-Lima tanba programa dezenvolvimentu governu nian komesa lao. Media PNTL

Dili-Unidade Espesial da Polisia (UEP) estabelese Peltaun Seksaun Anti Terorista (SAT) hodi bele antisipa terorista no aktividade terrorizmu ne’ebe fó amiasa ba seguransa no estabilidade nasaun iha futuru.

Komandante Jerál PNTL, Komisáriu Polisia Julio da Costa Hornay wainhira partisipa iha serimonia enseramentu Estájiu ba Kursu kontra Terrorizmu ne’ebe hala’o iha Komando UEP Bairo-Pite Dili, Kinta-feira semana ne’e (14/04), hateten formadu ne’ebe maka termina ona kursu hamutuk ema nain ruanulu-resin ha’at (24) ne’e bele ona responde ba amiasa Terrorizmu iha rai laran.

“Membrus Peltaun SAT ne’ebe maka kompostu husi ema nain 24 ne’e prepara atu antisipa amiasas balun ne’ebe karik aban bainrua akontese iha ita nia nasaun, tanba ne’e forsa seguransa preparadu atu halo atuasaun”, hateten Komisáriu Julio da Costa Hornay.

Nia haktuir tan katak, Peltaun SAT nia servisu foka liu ba atendementu terrorista kuandu kazu akontese terorista iha Timor-Leste, no ho ekipamentu báziku ne’ebe maka atual iha, parte Komandu sei tenta hare atu oinsa bele fasilita sira nia ekipamentus no orsamentu, nune;e sira bele preparadu atu atende, karik akontese terrorizmu ruma iha ita nia rain. Kestiona kona-ba total membru batelaun SAT nain 24 deit, Komandante Jerál PNTL ne’e hateten provizoriu só iha numeru ida ne’e, bazeia ba nesesidade.

Iha fatin hanesan Komandante UEP Superintendente Xefe Afonso dos Santos hateten membrus Peltaun SAT forma husi instruktor nasional ne’ebe maka iha esperiénsia no simu ona formasaun iha Portugal, no Peltaun SAT integra iha kompania Operasaun Espesial nia okos.

Serimonia ne’e prezidi husi Komandante Jerál PNTL no partisipa husi Ministru Interior Longinhos Monteiro, Eis Ministru Interior Rogerio Tiago Lobato, Eis Komandante Jerál PNTL Paulo Martins, eis Segundu Komandante Jerál PNTL Komisáriu Afonso de Jesus, Embaixador Portugal ba Timor-Leste, Korpus Diplomatikus, Konvidadus no familia ajente foun UEP.

Serimonia ne’e enseramentu Estajiu ba Kursu Kontra Terrorizmu no Estaziu Baze ba ajente UEP ne’e, anima ho demostrasaun kapasidade Unidade Espesial Polisia iha sira nia servisu loron-loron nian, hanesan táktiku fiziku, patrullamentu ho karreta, Operasaun Tubulares, no servisu UEP seluk tan.

Media PNTL.

Dili, iha Kuartél  Jerál Kaikoli quarta-feira ne’e (13/04/2016) membru PNTL husi Servisu Investigasaun Kriminal Nasional (SIKN halo prevensaun ba karreta ha’at ne’ebe tula sasan mai husi Indonesia, balun la tuir lista ne’ebe mak iha.

Komandante SIKN Superintendente Ludgerio Lay ne’ebe komanda direktamente aktividade prevensaun ne’e hateten, parte SIKN simu informasaun husi membru Polisia sira ne’ebe maka servisu iha terrenu katak karreta ha’at (4) ne’e sasan balun la tama iha lista.

“Ita simu informasaun husi membru ne’ebe ita koloka iha terrenu katak sasan hirak iha karreta ne’e, balun iha lista no balun laiha lista, ho ida ne’e maka ita halo prevensaun, ita bolu sira mai iha ne’e para ita cek sasan hirak ne’e, ida pur ida tuir lista ne’ebe maka sira selu taxa”, Superintendente Ludgerio lay hateten iha aktividade prevensaun ne’ebe hala’o iha Kuartél Jerál Kaikoli.

Tuir Komandante SIKN ne’e katak, tanba kestaun rekursu membru PNTL husi SIKN nian menus, nune’e sei akompaña karreta hirak ne’e ba to’o iha nia fatin, hodi bele cek fila fali sasan hirak ne’e tuir lista ne’ebe maka iha. Tanba sasan hirak ne’ebe maka tula husi Indonesia ho karreta ha’at ne’e tama mai Timor Leste iha dokumentu kompletu no sira kumpri hodi selu taxa, maibé ho informasaun ne’ebe maka iha, parte SIKN presiza halo prevensaun ba karreta hirak ne’e.

“Agora karreta ha’at (4) ne’e dadaun, tanba ita nia rekursu ema atu hatun sasan ida pur ida laiha, ita nia Polisia sei akompaña sira ba to’o iha fatin sira nia hodi sobu (bongkar), no sei akompaña husi nain rasik, sira sei cek ida pur ida”, tenik Komandante SIKN.

Nia hatutan tan katak, karik iha aktividade cek sasan hira ne’e maka iha hotu lista ne’e legal no tuir duni lista ne’ebe maka nain selu taxa, entaun Polisia sei husik. Karik maka identifika sasan balun la tuir lista maibé iha karreta laran, entaun Polisia sei prende hodi halo relatoriu no sei haruka ba Minitériu Públiku atu halo prosesu tuir lei ne’ebe maka vigora.

Media PNTL.

Dili-Segundu Komandante Jeral Polisia Nasional Timor-Leste (PNTL) Komisariu Polisia Faustino da Costa husu ba membrus PNTL hotu atu asesu ba website PNTL tanba iha informasaun, lei no regra sira konaba servisu PNTL nian hakerek iha website ne’e.

Nia heteten wainhira membrus PNTL asesu ba situs PNTL nian rasik maka sei halo sira nia servisu sai diak liu tan, tanba iha situs laran hakerek kona-ba orientasaun, regulamentus, notisia polisia nian no saida maka Komando sempre koalia bainhira iha inkontru ruma ou iha abertura formasaun ruma ou iha loron no aktividade importante sira.

“Membrus PNTL ne’ebe maka asesu sira nia koñesementu no referensia barak liutan tanba ne’e ohin hau dehan ba sira katak alienede asesu media sosial sira mos tenke asesu ba media PNTL nian rasik atu nune’e bele enreceza (memperkaya) sira nia koñesementu kona-ba oinsa atu halo sira nia servisu,” afirma Komisariu Faustino.

Fatór balu sai difikuldade ba membrus PNTL sira liu-liu sira ne’ebe maka iha munisipiu difisil atu asesu internet, maibe se ema asesu ba media sosial signifika nia bele asesu ba website PNTL, importante ba membrus sira alinende asesu ba media sira seluk tenke asesu mos media PNTL liu husi manera ne’ebe maka simples hakerek www.pntl.tl .

Media PNTL.    

Dili-Komando Polisia Nasional Timor-Leste (PNTL) la fó toleransia ba nia membrus husi Unidade tranzitu ne’ebe maka simu subornu husi motorista sira ne’ebe maka halo infrasaun kontra Kodigu Estrada no Kodigu Penal.

Asuntu ne’e hateten husi Segundu Komandante Jeral PNTL Komisariu Polisia Faustino da Costa hafoin halo abertura ba Sorumutu konaba Sistema Jestaun Insidente Segunda semana ne’e (11/04/2016). “Komando PNTL sei la fó toleransia ba nia membrus ne’ebe maka simu subornu (envelope ou osan sigaru) tanba hahalok ne’e konsidera krime no wainhira iha membrus balu maka komete maka sei hetan demisaun ou hasai husi Polisia”.

Komisariu Polisia ne’e afirma tan katak, membrus PNTL husi Unidade Tranzitu labele simu subornu no wainhira iha ema ruma maka obriga fó, maka membru PNTL iha obrigasaun atu hato’o katak regras wainhira kontra Kodigu Estrada no Kodigu Penal tenke ba selu iha banku maske ema ne’ebe komete infrasaun dehan laiha tempu, iha obrigasaun ba ema ne’ebe viola regra tenke ba selu iha banku, no wainhira maka la selu iha banku membru Unidade Tranzitu sei halo nota infrasaun.

“ Laiha toleransia ba tilan di tempat fó osan mai ida-idak simu ne’e labele akontese tanba ne’e ho formasaun kona-ba Sistema Jestaun Insidente Modulu Tranzitu no Modulu Patrulha orienta sira, nune’e ba oin Komando lakohi rona tan kazu hanesan ne’e akontese no wainhira akontese maka ema halo keixa ne’e konsidera subornu ne’e krime, konsekuensia pessoal ba membru ne’ebe maka la kumpri orientasaun Komando maka risku bele to’o demisaun ou hasai husi polisia, “ dehan Komisariu Faustino da Costa.

Asidente tráfiku kada fulan aumenta ba beibeik, tanba konsiensia ema ida-idak nian menus no dalaruma ema lori transporte motor ou kareta ho velosidade maka’as, maske Kodigu Estrada define ona katak iha sidade laran halai KM 45 no sai husi sidade velosidade máximu KM 60 maibe ema la kumpri nune’e kada tinan ema ne’ebe mate tanba asidente tráfiku a’as liu kompara ho ema ne’ebe maka mate tanba krime.

Media PNTL.

Dili- Iha primeru trimestre tinan ida ne’e (2016) hahu’u husi fulan Janeru to’o Abril, membru Polisia Nasional Timor-Leste (PNTL) prende ona karreta estadu hamutuk 10 resin ne’ebe maka lao iha fim da semana, hodi hala’o fali aktividade privadu.

Segundu Komandante Jerál PNTL Komisariu Polisia Faustino da Costa, iha Centru Formasaun Polisia Comoro Dili hafoin loke abertura ba workshop kona-ba Sistema Jestaun Insidente, Segunda-feira (11/04) ne’e hateten membru PNTL kontinua halo asaun cek-poin ba sirkulasaun karreta estadu iha loron feriadu. “Iha loron Sabadu no Domingu PNTL halo patrulamentu konjuntu hamutuk ho funsionariu patrimoniu estadu, hodi hare’e no detekta karreta estadu ne’ebe maka hala’o aktividade fora husi oras no loron servisu nian, iha área husi Palasiu do Governu, inklui iha loja no supermerkadu oin” relata Komisariu Faustino da Costa.

Komisariu ne’e akresenta tan katak, aktividade patrullamentu ne’ebe hala’o entre membru PNTL ho funsionariu husi Patrimoniu Estadu nian maka wainhira detekta ona karreta hirak ne’ebe maka viola regra, sei lori hikas ba iha Parte Patrimoniu Estadu atu bele hala prosesu investigasaun

“Hau hanoin fim de semana ida liu ba ne’e, ate horseik Domingo ita prende karreta estadu hamutuk 10 hodi entrega ba funsionariu husi patrimoniu estadu lori ba sira nia edifisiu,” dehan Komisariu Faustino.

Karreta hirak ne’e prende bazeia ba dekretu lei no dekretu governu ne’ebe maka hateten karreta estadu la sirkula iha fim da semana no loron ferias, tanba ne’e wainhira kontra regras ida ne’e maka parte kompotente sei foti medidas hodi prende karreta hirak ne’e. Karreta hirak ne’ebe maka polisia no patrimoniu estadu prende maka husi Ministeriu Agrikultura no Peskas, sekretariu estadu balun nia gabinete, no ministeriu balun.

Media PNTL.

Dili- Atu fasilita servisu iha terrenu ho lais no fasil, Incident Management System (IMS) ou Sistema Jestaun Insidente, kapasita membru Polisia Nasional Timor-Leste (PNTL) Unidade Tranzitu Rodoviariu hodi hala’o sorumutu kona-ba servisu informasaun nian.

Segundu Komandante Jerál PNTL Komisariu Polisia Faustino da Costa ne’ebe ofisialmente halo abertura ba sorumutu ne’e, enkoraja ba partisipante sira atu bele aproveita oportunidade ne’e ho diak nune’e bele implementa iha servisu loron-loron nian hodi aktualiza informasaun ho lolos. “Liu husi sorumutu ne’ebe maka hala’o, bele fasilita membrus PNTL liu-liu Unidade Tranzitu Rodoviariu atu pasa informasaun ne’ebe lolos hodi akumula dadus kona-ba asidente ne’ebe maka akontese atu nune’e hetan dadus ne’ebe fiksu”,hateten Komisariu Polisia Faustino da Costa hafoin abertura, iha Centru Formasaun Polisia Comoro, Dili, Segunda-feira ne’e (11/04).

Nia informa tan katak, liu husi dadus ne’ebe maka rekolla no relata kona-ba rezultadu no observasaun asidente ne’ebe maka akontese nune’e sai hanesan referensia ba Komando atu oinsa hare’e kona-ba estratéjia no atividades saida maka presija hare’e no ho akontesimentu hirak ne’ebe maka iha.

Iha fatin hanesan Komandante Centru Formasaun Polisia (CFP) Superintendente Arquimino Ramos hateten Sorumutu ne’e nu’udár parte dezenvolvimentu rekursu umanus bazeia ba dezenvolvimentu informasaun teknolojia ohin loron nian nune’e formasaun kona-ba IMS importante atu fasilita servisu membrus PNTL loron-loron nian iha terrenu.

Nia akresenta tan katak sorumutu ne’e hala’o tanba CFP servisu hamutuk ho Timor-Leste Police Development Program (TLPDP) hodi fó formasaun ba membrus PNTL hotu atu bele atinji planu estratéjiku PNTL 2014-2018.

Sorumutu ho tema Sistema Jestaun Insidente Modulu Tranzitu no Modulu Patrulha ne’e alem de loke husi Segundu Komandante Jeral PNTL Komisariu Polisia Faustino da Costa no akompaña husi Komandante CFP Superintendente Arquimino Ramos partisipa mós Xefe Operasaun TLPDP Shane Baker no hetan partisipasaun husi membru PNTL husi Komando Munisipiu Manatuto, Baucau, Viqueque, Lautem, Liquica no Dili.

Tuir planu ne’ebe maka iha Sorumutu ne’e fahe ba klase rua, klase primeru hahu’u iha Segunda-feira (11 to’o 15 Abril) no klase segundu sei hahu’u iha loron 18 to’o 22 Abril tinan 2016.

Media PNTL.

Dili-Polisia Nasional Timor-Leste (PNTL) sei halo operasaun ba organizasaun artemarsiais tanba durante ne’e balun kontinua treinu subar.

Komandante Polisia Nasional Timor-Leste Komisariu Julio da Costa Hornay hatete, buka hela autor sira ne’ebe halo treinu subar-subar tanba ne’e inplementa rejolusaun governu nian.

“Ita sei halo operasaun ba organizasaun artemarsiais sira tanba durante ne’e balun kontinua treinu subar ihabairu laran ,” esplika Julio ba jornalista sira iha palasiu Prezidente Republika Aitarak Laran Dili, horsehik.

Julio informa sira ne’ebe kaer entrega ba iha Ministeriu Publiku (MP) para atu halo prosesu.

“Parlamentu Nasional (PN) diskumfia katak involve mos husi membru PNTL tenke temi nia naran ohin kedas hau loke prosesu, labele dehan deskunfia, ita deskunfia deit ne’e ema rihun haat bainhira maka ita identifika suspeitu se loos ne’ebe husu ba komunidade ou se de’it mak hatene informasaun si A ou si B husi kompañia ou distritu ne’ebe mai iha gabinete Komandante Jeral para loke prosesu,” tenik nia.

Nia realsa durante ne’e komunidade sira fo informasaun kona ba organizasaun artemarsiais menus liu ne’e duni husu komunidade sira hotu para atu asegura rai ida ne’e ho attitudes ou problema kiik ne’ebe akontese ba suspeitu sira bele informa ba PNTL para bolu nia atu investiga, karik nia sala eduka para labele halo beibeik, tanba povu hotu hakarak presiza páz no dame iha ambiente ne’ebe saúdavel.

Entertantu, nia dehan, agora daudaun Polisia Nasional Timor-Leste(PNTL) buka autor ne’ebe hana ema, tanba ne’e presiza tempu atu kaer ema refere.

Fonte: INDEPENDENTE, edisaun Sesta 08 Abril 2016