News

Prezidente Republika Taur Matan Ruak kontinua orienta Polisia Nasional Timor-Leste (PNTL) atu hametin seguransa iha rai laran

“Xefe estadu sempre fo orientasaun katak ita mantein seguransa ne’ebe diak forte ba ita nia povu no ita nia nasaun par abele hakmatek I opovu bele moris iha ambiente ida hakmaek nian,” Komisariu PNTL Julio da Costa Hornay haktuir ba jornalista sira iha Palasiu prezidensial hafoin enkontru ho xefe estadu iha bairo-pite, Kinta (07/04).

Durante enkontru ho xefe estadu, Komandante Jeral akompaña husi segundu Komandante Jeral PNTL, Komisariu Faustino da Costa hato’o situasaun seguransa rai laran ba xefe estadu.

Komandante Jeral hateten situasaun rai laran atu lao diak presija ema hotu nia kontribuisaun hodi nune’e bele garantia nafatin paz no estabilidade iha rai laran.

Iha parte seluk Komandante Jeral Polisia Nasional Timor-Leste (PNTL), Komisariu Julio Hornay hateten Polisia kontinua buka tuir kriminozu sira ne’ebe hana no sona malu iha Dili laran.

“ami buka hela informasaun, ami komesa detekta ona I ami sei buka namanas hela, ita hein tempu,” dehan nia.

Durante ne’e problema ne’ebe akontese iha capital Dili barak ona mak kona-ba hana malu no sona malu sai prekupasaun ba ema hotu.

Tanba ne’e PNTL hanesan instituisaun ne’ebe garante seguransa iha rai laran tenke halo esforsu makaae hodi nune’e bele asegura estabilidade iha rai laran.

“Suspeitu sira ne’e bele informa mai polisia para ita bolu nia mai investiga karik nia sala ita eduka para nia labele halo beibeik tanba ita hotu, povu tomak moris iha paz no dame iha ambiente ne’ebe saudavel,’ dehan nia.

Komandante Jeral husu ba populasaun tomak karik iha joven balun mak kria problema iha rai laran presiza informa ba PNTL hodi nune’e polisia bele foti mediodas ba ema sira ne’e.

Fonte: Timorpost, edisaun Sesta 08 ABRIL 2016

Dili, quarta feira ne’e (06/04/2016) Komandante husi munisipiu 13 ensera sira nia Kursu Ezekutivu nian kona-ba Sistema Jestaun Insidente ne’ebe hala’o iha Sentru Akademia Polisia Comoro durante loron tolu, hahu iha loron 04-06 fulan Abril tinan 2016.

Kursu ezekutivu ne’ebe hala’o husi parte IMS ba Komandante 13 munispiu ne’e, ho nia objetivu atu bele kapasita Komandante sira husi munisipiu nune’e bele orienta no halo kontrolu servisu ba mebru sira iha idak-idak nia munisipiu.

Komandante Munisipiu Baucau, Superintendente Justino Meneze ne’ebe reprezenta partisipantes sira hateten, kursu ne’e iha ninia progresu diak tebes maske hala’o deit iha loron tolu nia laran. “Primeiru, reprezenta kolega sira ne’ebe partisipa iha sorumutu ne’e, hakarak agradese ba Komando Jerál aumesmo tempo ita nia parseiru dezenvolvimentu TLPDP nia tulun ba programa ne’e bele realiza hodi kapasita ba ami Komandante sira, atu oinsa bele hatene kontrolu diak liu aktividade sira ne’ebe importansia servisu polísia ninian”.

Tuir Superintendente Justino Menezes, ho sorumutu ne’e parte partisipantes sira durante loron tolu ne’e hetan progresu positive tebes, tanba sorumutu ne’e koalia kona-ba kontrolu liu-liu servisu investigasaun, servsiu patrullamentu, servisu tránzitu ninia no iha tempo hanesan bele hare regulamentu disiplina liu husi metodu ne’ebe maka hetan durante sorumutu nian, karik iha membru sira ne’ebe hetan medidas Indisiplinar.

“Ita bele hare maske ami iha kada idak-idak nia munisipiu, ami bele hare munispiu seluk to’o mai iha Nasional realidade progresu ita nia membru, seksaun no departamentu sira nia servisu, liu-liu kazu kriminalidade, asidente tráfiku ita bele hare nia totalidade ne’e hira”, relata Komandante Munisipiu Baucau.

Tuir partisipante sira ne’ebe partisipa iha aktividade ne’e, relata ho sorumutu kona-ba Sistema Jestaun Insidente progresu seluk ne’ebe maka sira hetan maka sira bele hatene aktividade membru PNTL iha kada munisipiu ne’ebe maka la hala’o sira nia servisu maske la relata iha kada relatoriu ne’ebe maka aprezenta ba iha kada Komandante Munisipiu.

Partisipantes sira mós hato’o rekomendasaun relasiona ho sorumutu kona-ba Sistema Jestaun Insidente ne’e, “Atu formasaun ida ne’e bele espesífiku liu iha munisipiu, iha sup-seksaun ida ne’ebe mak nomea ka forma husi Komando Munisipiu, sira propriu ba kursu ida para sira mós bele hatene liu ba iha area ida ne’e nune’e sira bele servisu iha oras 24 nia laran” hateten Komandante Munisipiu Baucau.

Entretantu iha fatin hanesan, Segundu Komandante Jerál PNTL Komisariu Polísia Faustino da Costa iha niani diskursu ba enseramentu ne’e agradese ba Komandante husi Munisipiu sira ne’ebe maka durante lorn tolu partisipa iha sorumutu ne’e hodi nune’e wanhira fila ba idak-idak ninia munisipiu bele fahe fali koesimentu sira ne’e ba iha membru iha terenu.

Tanba tuir Komisariu Polísia Faustino da Costa katak, Planu Estratéjiku PNTL nian ba tinan 2014-2018 koalia mós kona-ba area Administrasaun nune’e ho sorumutu ida ne’e bele implementa no exekuta Planu Estratéjiku 2011-2030 ne’ebe hakerek to’o iha tinan 2030 Polísia Nasional Timor Leste iha ona koñesimentu ida ne’ebe diak no uja ekipamentus ne’ebe adekuadu no modernu.

Seromonia enseramentu ne’e, marka mós prezensa husi Parseiru Dezenvolvimentu TLPDP, Komandante Interinu Centro Formação Polísia (CFP) no partisipantes ne’ebe mai husi Komandante Munisipiu 13. Rohan husi serimonia ne’e, maka hasai foto hamutuk entre partisipantes sorumutu ho Segundo Komandante Jerál akompaña husi Komandante CFP.

Media PNTL.

Dili, segunda-feira (04/04/2016) Komandante Jerál PNTL Komisariu Polisia Julio da Costa Hornay ho segundu Komandante Jerál Komisariu Polisia Faustino da Costa entrega direktamente motorizada hamutuk atus lima sianulu resin lima (259) ba Ofisial Polisia Suku (OPS).

Komisariu Polisia Julio da Costa Hornay ne’ebe entrega direktamente xave no motor inklui dokumentus motorizada hateten, viatura hirak ne’ebe sosa ho orsamentu governu nian husu atu Ofisiais sira ne’ebe simu motorizada atu bele utiliza tuir nesesidade servisu ninia iha terrenu.

“Ohin ita nia Ministru Interior hato’o mai hau, atu hato’o ba imi katak viatura ka transporte motorizada sira ne’ebe maka governu fó mai ita, utiliza tuir nesesidade servisu ne’ebe maka ita bo’ot sira iha no ho komprimisiu ne’ebe orsida ita bo’ot sira sei halo, husu atu bele utiliza motorizada hirak ne’e ba servisu tuir idak-idak nia nesesidade,” hateten Komandante Jerál Julio da Costa Hornay iha ninia diskursu ba membru OPS sira.

Komandante Jerál PNTL ne’e mós afirma katak planu sosa motorizada hirak ne’e tanba hetan konkordansia entre governu ho Komando nian kona-ba nesesidade servisu OPS nian iha baze.

Komisariu Polisia ne’e mós hato’o ba membru OPS sira katak, “Politika ida ne’ebe maka governu konkorda ho ideas Komando Jerál nian, hau husu para atu bele asegura ho didiak, implementa halo didiak, labele viola fali”.

Komisariu Julio da Costa Hornay hateten, razaun Komando nian hodi halo planu sosa motorizada ba OPS tanba wainhira hala’o visita ba distritu 13 hafoin simu mandatu, problema ne’ebe maka administrador distritu, xefe suku, apresenta ba iha Komandante Jerál maka apoio transporte.

“Ho razaun hirak ne’e maka Komando debate no desidi atu koloka orsamentu ba nesesidade ida ne’e, ita imoplementa, tanba Polisia Komunitariu sai prioridade ida iha area tolu ne’ebe maka governu ezije ba Instituisaun PNTL, primeiru Polisia Komunitariu, segundu fronteiras, terseiru Marítima inlkui mós tranzitu rodoviáriu”, afirma Komandante Jerál PNTL.

Total viaturas ne’ebe maka fahe iha serimonia ne’e hamutuk: 259 motorizada, karreta 4, karreta ambulansia 1, karreta emergensia 1 no karreta hilux 2. Tuir planu husi Komando Jerál nia katak iha futuru sei fahe tan radio komunikasaun no laptop hodi bele kompleta servisu iha terrenu.

Serimonia distribuisaun motorizada ba OPS ne’e antes fahe, hetan mós bensaun husi amo Kapelaun PNTL, amo Nelinho Américo.

Media PNTL.  

Dili- Iha selebrasaun Festa Paskoa tinan 2016 ne’e iha asidente trafiku lima maka akontese iha kapital Dili nian la inklui Munisípiu sira.

“Hau la mensiona konaba Munisípiu sira maibe iha kapital Dili asidente lima maka akontese no nain tolu maka grave,” dehan segundu Komandante PNTL, Komisariu Faustino da Costa ba Jornalista iha Sentru Treinamentu polísia Komoro, Segunda (28/3).

Nia hatutan entre kazu lima ne’e nain tolu maka todan balun ain tohar no liman tohar, no lori halai ba halo tratamentu iha Hospital Nasional Guido Valadares (HNGV), asidenti sira ne’e motorizada deit.

Iha fatin hanesan liu husi deskursu Komandante Jeral PNTL Komisariu Julio da Costa Hornay dehan, asidente rodoviáriu iha tinan 2015 total ema nain 89 maka mate, kanek todan nain 437, no kanek kamaan 1.399.

“Tuir dadus ne’ebe maka ita iha total asidente 1.664 husi asidente ne’e mate nain 89 iha tinan 2015. Ne’e kauza hόsi hahalok ema nian, ” dehan Julio liu husi nia deskursu ba aniversariu PNTL dala 16.

Nia hatutan, atu reduz numeru asidenti ne’e tinan 2016 Komando PNTL sei hasae volume operasaun cek point, ba sirkulasaun viaturas públiku, privadu no governu ne’ebe maka utiliza veikúlus la tuir lei kodigu Estrada nian, tantu iha kapital no munisipíu.

Fonte Timor Post edisaun Kinta 31 Marsu 2016.

Dili–Komando Polisia Nasional Timor-Leste (PNTL) entrega motorizada 257 ba Ofisial Polisia Suku (OPS) atu bele fasilita sira nia servisu iha komunidade nia le’et nune’e bele minimiza krime.

Iha serimonia aniversariu PNTL ba dala 16 Segunda 28 Marsu, Primeru Ministru simbolikamente entrega save motor nian ba reprejentante OPS Sargentu José Paulo da Costa.

Iha deskursu Komandante Jeral PNTL Komisariu Julio da Costa Hornay, husu ba OPS sira nia responsabilidade hodi asegura no kuida transporte ne’ebe maka fornese hodi utilija ba servisu hanesan ita nia rasik nune’e bele dura ba tempu naruk.

Nia informa tan katak Komando PNTL entrega motorizada 257 falta 60 ne’ebe sei entrega iha tempu badak, tanba sei iha prosesu kompras, alienede transporte Komando mos sei entrega radiu komunikasaun 155 ho leptop 170.

Entertantu Sargentu José Paulo da Costa, reprejentante OPS liu husi deklarasaun komprimisiu utilizasaun motorizada hateten, bazeia ba regulamentu ne’ebe maka iha membru OPS sei utiliza transporte ne’ebe Komando PNTL entrega ho responsabilidade no profesionalizmu tuir obrigasaun ne’ebe maka iha hodi nune’e bele fasilita servisu iha baze.

Aliende fornese transporte ba OPS, eis Komandante Centru Formasaun Polisia ne’e mos kompremete ba membrus PNTL tomak katak governu liu husi Ministru Interior iha komprimisiu bo’ot atu atu suporta no fasilita nafatin PNTL etapa pur etapa.

Media PNTL.    

Dili, iha tersa-feira semana ne’e (29/03/2016), segundu Komandante Jerál Polisia Nasional Timor Leste (PNTL) Komisariu Polisia Faustino da Costa, loke abertura ba formasaun kona-ba moras HIV/SIDA ne’ebe maka partisipa direta husi representante membrus PNTL husi munisipiu 12.

Komisariu Polisia Faustino da Costa iha ninia intervista hateten, formasaun ne’ebe suporta no fasilita husi parseiru UNFPA sai hanesan material ida ba membru PNTL husi munisipiu atu bele fahe fila fali materia kona-ba oinsa hatene maneira husi moras HIV/SIDA ninian.

“Formasaun ne’e hanesan formasaun ida kona-ba edukador kolega ba kolega katak maluk sira PNTL sira ne’ebe mai husi munisipiu para hetan formasaun ida oinsa kuando sira fila, sira bele sai hanesan edukador ida ba sira nia kolega servisu hamutuk. Kolega servisu hamutuk ne’e mak sese? Maka PNTL sira ne’ebe iha sira nia distritu, iha sira nia sub-distritu ou postu administrativu, ida ne’e maka sira sei koalia, katak afinal risku husi moras HIV/SIDA maka ne’e, tanba bele da’et liu husi maneira hanesan ne’e,” hateten Komisariu Polisia Faustino da Costa.

Segundu Komandante Jerál ne’e mós apela ba mebru PNTL husi munisipiu ne’ebe partisipa iha treinamentu ne’e, atu bele aproveita oportunidade ida ne’e hodi bele fahe matenek ne’ebe sira hetan durante formasaun ba membru seluk iha sira nia munisipiu.

“Tanba ne’e maka ohin hau nia presensa hodi halo abertura no mós aproveita oportunidade ne’e katak ba sira importante maka sira tenke aproveita formasaun ida ne’e no aplika resultadu formasaun ida ne’e iha terenu”, apela Komisariu Polisia Faustino da Costa ba membru PNTL ne’ebe partisipa iha formasaun ida ne’e.

Iha sorin seluk, representante United Nations Fund  Population  (UNFPA) Dr. Domingas Bernardo hateten, treinamentu ne’e hanesan kontinuasaun husi formasaun ne’ebe hanesan, ne’ebe hala’o tiha ona ba Komandante husi Munisipiu 13 iha loron 14 fulan Marsu, no iha loron 29-31 UNFPA no Ministeriu Saude kontinua hala’o formasaun ba Peer Edukadores sira husi munisipiu 12.

“Objetivu husi treinamentu ida ne’e maka atu informa ba komandante sira hotu kona-ba atividade ne’ebe maka sei hala’o husi membru Peer Edukadores sira iha futuru, nune’e mós informa oinsa komandantes sir abele fó suporta durante implementasaun programa ne’e iha nivel nasional no munisipiu sira”, hateten Dr. Domingas Bernardo iha abertura programa ne’e nian.

Parte UNFPA hanesan fasilitador iha programa ne’e, espera katak liu husi treinamentu ida ne’e, partisipante sira hotu bele hetan kuñesimentu diak liu hodi nune’e bele fasilita atividade sira nivel munisipiu hanesan halo kampaña HIV/SIDA iha munisipiu 13 no atividade vizita ba distritu, nune’e mós halo rekorda no relata ba atividade sira.

Dr. Domingas Bernardo mós agradese ba Instituisaun PNTL no diresaun hotu ne’ebe maka sempre fó apoio ba Implementasaun programa ida ne’e. “UNFPA iha kumprimisiu nafatin fornese suporta tekniku ba PNTL iha area saude seksual no reproduktivu, violensia bazea ba jéneru no exploitasaun seksual no hasa’e kapasidade ba PNTL sira”.

Programa HIV/SIDA ne’e alende suporta husi UNFPA, hetan mós suporta husi Fundus Global ba SIDA/AIDS, TB no Malaria hodi implementa intervensaun mudansa ba hahalok ba Polisia Nasional Timor Leste (PNTL).

Media PNTL.  

Dili-Polisia Nasional Timor-Leste (PNTL) Domingu 27 de Marsu 2016 selebra aniversariu ba dala XVI ho misa agradesimentu no selebrasaun Paskoa. Ho tinan XVI ne’e konsidera PNTL joven ona no bele hala’o servisu mesak hodi servi povu diak liu tan.

Iha Selebrasaun misa ne’e, amu Kapelaun Reverendu Padre Nelino Americo Soares ne’ebe dirige iha selebrasaun misa Domingo (27/3) iha Kapela St. Antonio Centru Formasaun Polisia Comoro Dili, iha nia homilia hateten ho tinan XVI konsidera PNTL joven ona, hatene halo servisu mesak no hatene saida maka diak no saida maka aat.

Nia haktuir tan katak ho idade ne’ebe maka joven, PNTL buka atu moris tuir lei no ordem instituisaun nian ne’ebe hatudu no hakerek hela, respeita ema seluk tuir hirarkia ne’ebe maka iha no responsabilidade atu haburas espiritu de korpu hodi apoiu malu iha parte hotu-hotu ho fuan no laran tomak.

Iha Fatin hanesan Ministru Interior Dr. Longinhos Monteiro hateten ho aniversariu PNTL ba dala-XVI, PNTL bele luta hodi hamoris fraternidade, seguransa no paz iha Timor-Leste liu-liu hahu’u husi familia uma kain, bairu no ita nia distritu.

“PNTL instituisaun ida ne’ebe moris ho nia esperensia oin-oin, moris iha aprendijajen nia laran no moris ho komprimisiu ida firme, atu servi ita nia seguransa, servi povu no nasaun atu moris iha seguransa nia laran,” dehan eis Komandante Jeral PNTL Longinhos Monteiro.

Iha oportunidade ne’e Ministeriu Interior hato’o mós Boas Festa Santo Paskoa ba sarani hotu no Parabens ba membrus PNTL tomak ne’ebe maka selebra tinan ba dala-XVI iha instituisaun nia laran.

Hafoin de misa, Ministru Interior, Komandante Jeral PNTL, Segundu Komandante Jeral PNTL, estrutura tomak PNTL no sarani balu ba kari’i aifunan iha Monumento dos Martires PNTL hodi fó homenajem ba martires PNTL nian.

Media PNTL

Dili-Primeru Ministru (PM) Dr. Rui Maria de Araujo enkoraja Komando Polisia Nasional Timor-Leste (PNTL) atu orienta no halo esforsu tomak hodi hametin liu tan polisiamentu komunitaria, kontrolu fronteira terrestre no maritima no seguransa rodoviaria, hodi garante seguransa ba povu no nasaun.
Iha komemorasaun Aniversariu PNTL ba dala XVI, segunda horseik (28/03/2016) Primeru Ministru (PM) RDTL Rui Maria de Araújo iha nia deskursu hateten, PNTL iha funsaun atu kontrola, hodi prevene no kombate krime, prezerva ordem publika, hodi halo ema bele kumpri lei no asegura kondisaun seguransa ne’ebe bele garante funsionamentu normal instituisaun demokratiku sira.
“Hau fo hanoin hikas fali katak iha tinan kotuk, iha aniversariu dala-XV hau apela ba konsentrasaun boot liu-tan polisiamentu komunitaria, kontrolu fronteira terrestre no maritima no seguransa rodoviaria. Tinan ida liu tiha buat balun konsege halo ona no buat lubun ida sei hein hela atu inplementa,” hateten PM Rui Maria de Araújo.
Nia reforsa tan katak alienede ne’e PNTL mós iha funsaun prinsipal atu proteje sosiedade, servi, fo asistensia no defende ema hirak ne’ebe maka presija no hodi defende direitus humanus sidadaun Timor-Leste.
Iha okajiaun ne’e Komandante Jeral PNTL Komisariu Julio da Costa Hornay hateten desde PNTL moris, mantein fiel ba prinsipiu ida hanesan forsa seguransa ne’ebe ho nia estratejia no filozofia polisiamentu, nune’e nia karakteristika polisia komunitaria, enkuantu nia organizasaun, disiplina, instrusaun no estatutu pessoal assume natureza ida identika militar maibe laos militar.
Komisariu ne’e haktuir tan katak liu tiha tinan XVI desde nia hari’i ho tempu ne’ebe liu daudaun PNTL hasoru nesesidade mudansa seguransa nian ho nune’e maka PNTL reformula diplomas estrutura ba organizasaun hanesan lei organika, regulamentu disiplinar no rejime ba promosaun.
Serimonia ne’e kompleta ho entrega kondekorasaun, promosaun divija, entrega motorizada ba OPS no anima husi grupu banda Colegio Paulo VI no koru husi eskola Sᾶo Pedro.
Selebrasaun aniversariu PNTL ba dala XVI (27/03/2000 & 27/03/2016) diriji husi Komandante Jeral PNTL no konta ho prezensa Ministru Interior Dr. Longuinos Monteiro, Primeru Ministru, Ministru Defeza Cerilo Cristovᾶo, Vice Prezidente Parlamentu Nasional Aderito Hugo, Komisariu KAK Aderito Tilman, Vice Chefe Estadu Maijor F-FDTL Brigadeiru General Filomeno Paixᾶo, reprezentante POLDA NTT Belu, korpus diplomatikus, ajensia Internasional familia boot PNTL no konvidadus sira.
Media PNTL

Dili: Iha fulan Marsu tinan ne’e, Polisia Nasional Timor-Leste sei halo tinan ba dala 16. Ba loron importante ne’e, Komandante Jeral PNTL Komisariu Julio da Costa Hornay hatete sei halo deit serimonia simples ida hodi selebra.

Komisariu Julio dehan, tanba loron aniversariu PNTL monu iha loron Domingu ne’ebe sai mos nu’udar loron Paskua, Komando desidi hodi realiza selebrasaun aniversariu iha loron segunda (28/03).
“Mezmu komplikadu mais ami kontinua hala’o serimonia ida ne’e maske simples (muda loron serimonia). Tanba loron importante tuir sarani Katolika nian monu mos iha loron aniversariu PNTL,”dehan Komisariu Julio iha Kuartel Jeral PNTL, kaikoli Dili, horisehik.

Kona-ba preparasaun Komisariu Julio dehan horisehik no ohin PNTL halo ona gladi ba parade militar. Iha serimonia aniversariu, Komisariu Julio dehan, PNTL sei konvida bainaka espesial husi Polisia Daerah (POLDA ) NTT no administrador Belu, inklui Tentara Nasional Indonesia iha Belu. Nia dehan PNTL konvida Polda NTT tanba iha relasaun servisu ne’ebe diak entre PNTL ho POLRI. “Liu husi konvida iha serimonia ida ne’e ita aproveita bele koalia ba malu hodi troka informasaun kona-ba movimentu fronteira ne’e lao oinsa no oinsa seguransa rai rua nian bele servisu hamutuk para bele asegura seguransa liu husi komunikasaun ne’ebe besik,” dehan nia. Kona-ba orsamentu Komisariu Julio la fo detaillu numeru orsamentu, maibe so dehan deit katak numeru osan ki’ik liu tanba ne’e maka sei halo festa ida ne’ebe simples.

Komisaun B apresia

Entretantu relasiona ho aniversariu PNTL ne’ebe besik daudaun, ona deputadu sira iha Parlamentu Nasional mos fo sira nia hanoin ba servisu ne’ebe membru PNTL hala’o ona durante ne’e.
Deputadu husi Komisaun B ne’ebe trata asuntu Defeza no Seguransa, apresia servisu Polisia Nasional Timor-Leste (PNTL) durante ne’e tanba PNTL hatudu progresu iha servisu seguransa nian. Vise Prezidente Komisaun B, Deputadu Duarte Nunes dehan durante ne’e sira fiskaliza no observa PNTL halo ona servisu ne’ebe diak. “Ita halo avaliasaun ba servisu PNTL nian, ita hare diak, tanba kuaze munisipiu 12 ne’e buat hotu diak,” dehan Duarte iha PN, Tersa (22/03). Maski iha mudansa, maibe Deputadu ne’e kritika mos servisu PNTL ba kazu balu ne’ebe mosu iha munisipiu sira, liu-liu iha kapital Dili. Maski konsidera kazu hirak ne’ebe maka mosu normal maibe, polisia sira tenke servisu maka’as atu nune’e seguransa iha munisipiu sira, liu-liu iha kapital Dili no munisipiu seluk ne’ebe akontese problema bele hakmatek.  “Ita presiza hare oinsa mak sira bele servisu diak liutan atu nune’e kapital Dili bele hakmatek liutan,” katak nia. Inportante liu ba polisia presiza apoiu fasilidade maibe PNTL mos tenke hatudu sira-nia disiplina.

Fonte: INDEPENDENTE

Dili, Kuartel Jerál Kaikoli tersa-feira ne’e, relasiona ho aktividade demonstrasaun ne’ebe hala’o husi organizasaun husi MKOTT (Movimentu Kontra Okupasaun Tasi Timor), ACBN (Assosiasaun Combantentes Brigada Negra), Universitariu, Sosiedade Sivil, Rede Mulheres iha embaixada Australia, Komandante Jerál PNTL husu atu bele asegura seguransa durante demostrasaun hala’o.

“Demonstrante sira hotu, Timor oan tomak ne’ebe maka partisipa iha demostrasaun ne’e hodi hato’o sira nia aspirasaun, husu atu bele asegura seguransa no kumpri regra hirak ne’ebe maka sira nia responsavel hato’o ona no hein katak demostrasaun ne’e bele lao ho diak to’o remata”, informa Komisariu Julio da Costa Hornay iha nia kna’ar fatin.

Komandante PNTL realsa tan katak, parte PNTL fó seguransa másimu atu bele asegura movimentu demostrasaun ida ne’e lao ho diak no kopera malu ho responsavel kada organizasaun husi MKOTT, ACBN, Universitariu, Sosiedade Sivil, Rede Mulheres no sira hotu ne’ebe maka sai komponente ba demonstrasaun ida ne’e.

“Hau fiar katak povu timor oan hotu ne’ebe maka marka prezensa iha fatin demostrasaun iha Embaixada Australia nian oin ho objetivu atu husu ba governu Australia, atu hare’e ba kestaun fronteira Tasi entre Timor Leste ho Australia”, hateten Komandante PNTL.

Polisia Nasional Timor-Leste (PNTL) mós husu ba demonstrante sira hotu ne’ebe maka partisipa iha demostrasaun kona-ba frontera Tasi Timor atu bele asegura seguransa no kumpri regra hirak ne’ebe maka iha. Demostrasaun refere sei halao durante loron rua (22 no 23 Marsu ) iha resinto embaixada Australia nia oin.

Media PNTL