News

Dili, relasiona ho publikasaun husi jornal Timor Post no jornal Independente iha loron 3 fulan Marsu foin lalais ne, kona-ba “Deskonfia Kontentor Rua Lakon,iha Kilat no Droga” informasaun refere lalos, tamba ne’e iha tersa-ferira (08/03/2016) Komandante Jerál PNTL, Komisariu Julio da Costa Hornay hala’o konferensia imprensa atu klarifika informasaun refere.

“Iha oportunidade ne’e, hau hakarak klarifika fila fali liafuan ne’ebe ita nia alin jornalista sira hakerek iha Timor Post no Independente iha dia 3 Marsu liu ba, iha primeira pagina hakerek “Deskonfia kontentor rua lakon iha kilat no droga”, resposta ne’ebe maka hau responde ne’e repete perguntas ne’ebe maka jornalista hato’o mai hau. Hau responde “sim”, kontentor rua ne’ebe maka lakon iha kilat ka laiha kilat ita sei hein delegasaun kompetensia husi Ministeriu Públiku para halo investigasaun klean. Liafuan “sim” ne’e maka dalaruma ita nia jornalista sira konsidera hanesan hau hatene katak informasaun kontentor rua ne’e iha kilat no droga” hateten Komisariu Julio da Costa Hornay ba jornalista sira iha salaun enkontru Kuartel Jerál PNTL kaikoli.

Iha biban ida ne’e, Komisariu PNTL ne’e mós esplika katak kontentor rua ne’ebe lakon, oras ne’e dadaun sei iha prosesu investigasaun. No parte PNTL liu-husi Servisu Investigasaun Kriminal Nasional (SIKN) iha dia 11 Janeiru liu ba simu karta husi parte Alfândega para atu buka tuir kontentor rua ne’ebe maka sai husi portu Dili sem iha koñesimentu husi autoridade alfândega.

Komisariu Julio da Costa Hornay esplika, “Hau simu telephone husi vise Ministru Finansas, hau orienta via telefone ba hau nia xefe investigasaun kriminal para buka lalais kontentor rua ne’ebe maka sai husi portu Dili sem iha koñesimentu husi autoridade alfândega hodi halo investigasaun. Tanba ne’e maka sira aproxima ho alfândega hodi halo investigasaun. No sira konsege investiga ema balun iha alfândega no mós responsavel kondutor ne’ebe maka lori sai no resultadu hato’o ona ba Ministeriu Públiku hodi hein delegasaun kompetensia atu halo investigasaun klean”.

Ikus liu, Komandante Jerál PNTL deklara ba publiku kona-ba informasaun ne’ebe publika iha loron 3 Marsu husi jornal Timor Post no Independente iha pagina primeiru, klarifika fila fali katak kontentor rua ne’ebe lakon, oras ne’e dadaun seidauk iha resultadu atu identifika iha kilat no droga ou laiha. “Iha bebidas, sprite ho coca-cola, mais tanba parte alfandega la konsege halo inspeksaun bele mos iha laran iha serveja, tanba konforme informasaun ne’ebe hateten ne’e iha kontainer balun ne’ebe sira revista dehan bebidas, tanba bele mos deskonfia serveja iha laran, buat balun ne’ebe la hakerek iha lista bele mos iha laran. Tanba ne’e maka kontainer ne’e sai husi portu Dili sem iha inspeksaun husi alfandega”esplika Komisariu PNTL Julio da Costa Hornay.  No apela ba publiku atu labele sente tauk ho informasaun ida ne’e. Media PNTL.

Dili, kada segunda-feira iha inisiu kada fulan, iha Quartel Jerál PNTL kaikoli hala’o serimonia isar da bandeira Nasional. Iha loron 07 fulan Marsu 2016 serimonia isar da bandeira Nasional da RDTL dirige husi Segundu Komandante Jerál, Komisáriu Faustino da Costa.

Iha ninia diskursu hanesan inspetór serimonia, Faustino da Costa apela ba membru PNTL sira ne’ebe iha quartel jerál atu hatudu exemplu diak ba komando iha munisipiu hotu, hodi servisu ho profesionalismu hanesan servisu tama ho oras no tenke loyalidade. Além de apela ba membru PNTL atu disiplina iha servisu, segundu Komandante Jerál mós koalia kona-ba situasaun em jerál lao normal mezmu que asidente no insidente hotu ne’ebe akontese, maibe membru PNTL iha terenu sempre fo apoio másimu hodi atende no atua situasaun ho diak.

Ekipa ne’ebe hetan responsabilidade iha Serimonia insar da bandeira ne’e maka husi Gabinete Relasaun internasional ho Saude no Superintendente Xefe Mateus Fernandes maka sai hanesan Komandante da Parada. No membru PNTL Quartel Jerál marka presensa iha serimonia ne’e inklui mós funsionariu publiku PNTL nian iha kada segunda-feira.

Media PNTL                        

Dili, Sexta-feira ne’e (04/03/2016) membru PNTL hala’o limpeza jerál iha kapital Dili, hahu’u ho diresaun Taibessi, Hali-laran, Quintal-Bo’ot no remata iha Kuartél Jerál Kaikoli.

Antes hala’o limpeza jerál, membru simu orden formatura husi Xefe Departamento de Administrasaun no Planeamento PNTL, superintendente Assistente Isamel da Costa Babo. Limpeza ne’e hetan mós apoio husi F-FDTL no partisipa direkta husi membru PNTL rasik. Iha sorin seluk, membru husi departamento Lojistik, Tranzitu, Komunitariu hala’o limpeza jeral iha kuartel jeral kaikoli.

Aktividade limpeza ne’e, sai hanesan aktividade rutina ne’ebe PNTL halo kada semana iha loron sexta-feira. Média PNTL

Maliana, 03032016- Atu bele iha uniformizasaun kona-ba atividades ne’ebe hala’o husi PNTL nivel Munisipiu, Seksaun Relasaun Publika PNTL kuntinua desemina informasaun servisu ne’ebe tutela mai iha Relasaun Publika. Sorumutu hanesan mós hala’o ona iha PNTL Munisipiu Baucau.

Relasaun Publika PNTL rekuñese katak iha jestaun hodi koloka informasaun ne’ebe mak sai ba konsume publiku, kada instituisaun sempre oferese espasu ba publiku hodi hatene informasaun sira ne’ebe nesesário ba públiku, ne’ebe asessível kona-ba servisu institusaun nian liu-husi kanais ne’ebe mak produz husi Relasaun Publika PNTL nian. Hodi nune’e bele kria no melhora liu komprensaun mútua entre organizasaun ho públiku.

Sorumutu ne’ebe hala’o iha Quartel Jeral PNTL Maliana durante loron rua hahu’u husi 22 – 23 Fevereiru 2016, ne’e partisipa husi Komandante Eskuadra,Polisia Transito,Investigasaun no Justica.

Iha abertura ba loron dahuluk sorumutu, Komadante Operasaun Inspektor Xefe Helio de Deus, ne’ebe representa Komadante PNTL Municipiu Maliana. Superintedenti Xefe Armando Monteiro subliña katak sorumutu ne’e nu’udar pasu importante ba PNTL munisipiu Maliana hodi bele hatene papel no funsaun husi servisu Relasaun Publika. “PNTL Municipiu Maliana senti urgullu tamba bele hetan oportunidade hodi delega ninia membrus sira mai tuir sorumutu ne’e. Espera katak ami nia membrus sira bele hetan informasaun ne’ebe sufisienti durante sorumutu ne’e”.

Objetivo husi sorumutu ne’e atu kontribui hodi desenvolve kompetênsias no abilidade husi pesoal PNTL iha nivel munisipiu iha area komunikasaun,ne’ebe sei fornese informasaun sobre diferentes formas husi komunikasaun ho uzu ne’ebe adekuado.

Topiku ne’ebe koalia durante sorumutu ne’e mak, Papel no funcsaun Relasaun Publika, Komunikasaun Institusional no Hari’i Komunikasaun Efetivu.

Programa ne’e realiza tamba iha parseria entre Seksaun Relasaun Publika PNTL ho ninia parseria UNDP liuhusi ninia projetu foun ho naran PNTL Strengthening Governance & Service Delivery. Media PNTL  

Dili, quarta feira ne’e (02/03/2016) Komandante Jerál PNTL, Komisariu Julio da Costa Hornay apela ba komunidade kapital Dili atu bele asegura fasilidade ne’ebe Estadu kria ona.

Julio da Costa Hornay koalia lia hirak ne’e, relasiona ho postu Tranzitu ne’ebe governu liu husi SEFOPE kria iha area Kolmera Dili, hetan estragu husi ema deskoñesidu foin lalais ne’e. “Los duni iha Ministeriu Publiku nia oin, postu Tranzitu hetan estragus vidru rahun hotu no iha bairo-pite mós hetan estragu. Tan ne’e ohin hau apela ona ba komandu distrital no Tranzitu atu bele priense para asegura atu bele hala’o kna’ar Tranzitu nian”, hateten Komandante PNTL iha Kuartél Jerál kaikoli Dili.

Komandante Jerál PNTL apela ba komunidade, liu-liu joven sira atu bele asegura fasilidade ne’ebe governu kria no halo husi orsamento estadu nian, nune’e Polísia bele halo vigilansia ba servisu seguransa iha kapital Dili.

Postu Tranzitu kolmera ho bairo-pite hetan estragus husi ema deskoñesidu balun iha tempo kalan. Postu ne’e hari’i husi SEFOPE atu bele hatan ba nesesidades seguransa komunidade hotu ninian. Media PNTL.

Dili, Kuartel Jerál kaikoli Tersa Feira ne’e (01/03/2016), Komandante Jerál PNTL Julio da Costa Hornay, apela ba joven iha kapital Dili atu mantem seguransa iha tempu kalan. Relasiona ho akontesimentu ne’ebe ikus-ikus ne’e akontese iha kapital Dili hanesan problema tuda malu ho ataka malu, PNTL liu husi Polísia Patrullamentu Dili nian ho hetan apoio husi Batallaun Ordem Públika (BOP) aumenta oras extra servisu nian liu-liu iha tempo kalan.

Komandante Jerál PNTL Julio da Costa Hornay hateten, “Los duni informasaun ne’ebe ita akompaña loron ba loron, aktividade ita nia joven sira ataka malu, tuda malu iha tempo kalan, ninia tensaun ne’e sa’e oituan. Tanba ne’e maka kalan-kalan ita nia polísia sira patrulamentu Dili nian apoio husi BOP halo patrula hodi atende problema hirak ne’e”.

Ho problema ne’ebe akontese ih kapital Dili, Komandante PNTL informa ba oras ne’e dadaun hasa’e volume patrulamentu iha tempo kalan. No polísia konsege kaptura joven balun hodi mai foti sira nia deklarasaun.

Julio da Costa Hornay apela ba joven Timor oan atu bele hakmatek hodi bele kontribui ba paz no estabilidade iha ita nia rai, liu-liu iha kapital Dili. Nune’e deit joven sir abele ona kontribui ba dezenvolvimentu rai ida ne’e nian.

Media PNTL.

Dili, Tersa Feira ne’e (01/03/2016) Komandante Jerál PNTL Julio da Costa Hornay asina akordu ho Komandante Timor-Leste Police Development Program (TLPDP), Paul Dickinson iha Salaun Enkontru Quartél Jerál Kaikoli, kona ba estabelesimentu Konsellu Koordenasaun Programa.

Iha abertura serimonia ne’e, Komandante TLPDP, Paul Dickinson iha ninia diskursu hateten, konsellu ne’e aliña PNTL ho TLPDP nia valores kona-ba kooperasaun, respeitu no responsabilidade mutual. “Ho haksolok mak hau ohin iha ne’e atu asina PNTL – TLPDP nia akordu ba Konsellu Koordenasaun Programa. Estabelesimentu ba Konsellu ne’e, refleta parseira aprosimasaun atu dezenvolve PNTL no reforsa papél Komandante Jerál ho nia Ezekutivu nian hodi hato’o lideransa estratéjiku ba PNTL ho programa parseirus”, hateten Paul Dickinson.

Konsellu ne’e sei tau matan ba implementasaun Programa Dezenvolvimentu ba Polísia Nasionál Timor-Leste husi Polísia Federal Australiana, halo avaliasaun ba nia progresu, hare ba mudansas no fó orientasaun kona-ba nesesidades dezenvolvimentu nian.

“Nu’udar ajénsia polisiamentu rua, Polísia Federal Australiana ho Polísia Nasionál Timor-Leste partilla ho objetivus hanesan, kona-ba protesaun ba ita nia komunidade ho fó ambiente seguru ba ita nia povu. Kriasaun Konsellu ne’e tau ita nia hamutuk hodi haburas no hametin polisiamentu, prevene krime no promove boa governasaun institusionál”, tenik Komandante TLPDP.

Iha fatin hanesan, Komandante Jerál PNTL Julio da Costa Hornay iha ninia diskursu apresia “em primeiru lugar lori Komando Jerál PNTL hakarak hato’o agradesimentu ba TLPDP ne’ebe maka sai hanesan parseiru servisu dezenvolvementu instituisaun PNTL nian iha area lubuk ida desde 2004 to’o mai loron ne’e. Apoio ne’e positivu tebes, tanba konsege dezenvolve kapasidade rekursu umanu PNTL nian”.

Komandante Jerál PNTL agradese ba TLPDP no kontinuasaun progresu ne’e maka ohin asina planu servisu 2015 ba 2016. “Ohin asina planu servisu 2015 ba 2016, balun ita halo ona iha 2015, balun ita sei hatutan ba to’o iha Jullu 2016. Iha programa ne’e diak tebes, tanba hau hare’e kapasitasaun ba membru PNTL liu-liu investigasaun iha nivel 1, 2, no 3. No mós iha parte IMS apoio informasaun husi distritu mai Nasionál. Hau espera programa ne’e bele lao ho diak”, hateten Julio da Costa Hornay.

Husi apoio ne’ebe maka TLPDP fó mai PNTL durante ne’e, Sentru Formasaun Polisia sai hanesan rekordasaun ne’ebe diak tebes. Media PNTL

Dili, Sexta Feira ne’e (19/02/2016) iha Quartél Jerál Kaikoli, Unidade Batallaun Ordem Públika (BOP) no Companhia Operação Especial (COE) hala’o atividade pratika kona ba Insidente Tátika Polisial. Objetivu husi atividade ne’e, atu oinsa halo pratika ba materia kontra terrorizmu nian ne’ebe hetan durante formasaun.

Inspector Assistente, Gonçalo Antonio Pinheiro nu’udár Koordenador ba atividade ne’e esplika, “Iha atividade ida ne’e, sira (BOP no COE) aprende kona ba Planeamentu Operasaun iha situasaun Reasaun. Iha planeamentu ne’e fahe ba kategori rua (2) mak hanesan Planeamentu Situasaun Insiativa no Planeamentu Situasaun Reasaun”.

Iha planeamentu situasaun inisiativa katak operasaun ne’e sei halo aban ou bainrua. Katak sei iha tempu atu rekolla informasaun, halo plano, halo treinamentu no bele halo preparasaun ne’ebe diak liu. No iha planeamentu situasaun Reasaun, ida ne’e plano ida ne’ebe ejiji situasaun ne’ebe akontese agora dadaun. Hanesan akontese kazu terrorista, ne’ebe laiha tempu atu halo plano no preparasaun, maibé ejiji atu oinsa aplika planeamentu ne’e rasik.

Media PNTL.    

Buacau, 17 de Fevereiru 2016.

Atu hasa’e kuñesimentu membrus PNTL kona ba papel no funsaun Relasoens Públikas iha nia atividade servisu loron loron, seksaun Relasoens Públikas PNTL ne’ebe hetan apoiu husi UNDP liu husi Capacity Building Support Project, realiza sorumutu durante loron rua hahu’u husi 15 – 16 Fevereiru 2016 iha Quartél Jerál Municipiu Baucau.

Objetivu husi sorumutu ne’e atu kontribui hodi dezenvolve kompeténsia no abilidade husi pesoal PNTL iha nivel munisipiu ba area komunikasaun, ne’ebe sei fornese informasaun sobre diferentes formas husi komunikasaun ho uzu ne’ebe adekuado. Iha situasaun país ne’ebe ninia sidadaun inteligente, krítiku no kompetitivu atu esplora oportunidades ne’ebe eziste, Relasoens Públikas sai pontus prinsipais ne’ebe utiliza husi organizasaun, hodi alkansa no promove objetivu ne’ebe planeadu hodi fanun kunsiénsia públiku kona ba servisu ne’ebe mak hala’o hela husi institusaun refere.

Iha sesaun abertura, durante sorumutu ne’ebe hetan partisipasaun husi representante eskuadra Policia Municipiu Baucau, Komandante Servisu Relasoens Públikas PNTL Inspetur Xefi Honorio Barreto iha ninia intervensaun relata, “Sorumutu ne’e nudar maneiras ida husi Seksoens Relasoen Publica hodi fo hateten ba maluk Policia sira kona ba mekanizmu servisu Relasoens Publica no mós produtu hirak ne’ebe mak halo husi Relasoens Públikas durante ne’e. Ho hanoin ida katak depois sorumutu ne’e remata Polisia sira iha Municipiu bele ona utiliza kanais ne’ebe mak PNTL rasik halo hodi promove instituisaun refere”.

Iha apresentasaun dahuluk, durante sorumutu ne’e ekipa husi Relasoens Públikas ho UNDP apresenta definisaun no funsaun servisu Relasoens Publica ho oinsa hari’i komunikasaun Institusional iha nivel instituisaun. Iha loron daruak koalia kona ba Komunikasaun efetivu no produtu hirak ne’ebe mak produs husi Relasoens Públikas PNTL inklui oinsa atu uza aparelho internet ho másimu ba funsionamentu servisu deseminasaun informasaun ba malu.

Komandante Municipiu Baucau Superintedenti Justino Menezes iha enseramentu ba sorumutu ne’e subliña katak, materia ne’ebe hetan durante sorumutu ne’e importante tebes tamba aliña mós ho planu no programa balun husi PNTL municipiu Baucau. “ PNTL Municipiu Baucau senti urgulhu tamba hetan opurtunidade hodi bele delega ninia membrus tuir sorumutu ne’e. Ami mós iha ona planu atu bele hasa’e kuñesimentu ami nia membrus sira liu husi planu balun ne’ebe mak ami planea tiha ona hanesan kursu public speaking, komputador, hakerek relatoriu no mós treinamentu kona ba Leis no Violensia domestika” hateten Komandante Justino Menezes.

Resultadu ne’ebe hetan durante sorumutu ne’e, maka oinsa atu bele fo resposta ba públiku nia perspektiva kona ba saida mak polísia nia atividade, liu husi informasaun ne’ebe mak fó sai husi kanais ofisial PNTL nian hanesan website,broxura no revista.

Media PNTL.

Dili, Quarta-feira ne’e, 2° Komandante Jerál PNTL Faustino da Costa iha salaun enkontru Quartél Jerál PNTL- Kaikoli, hasoru malu ho representante husi BINUS (Bina Nusantara University) ne’ebe mai husi nasaun Indonesia hodi koalia kona ba kooperasaun iha area IT nian ba futuro.

Iha intersesaun entre parte rua ne’e, hala’o ho objetivu atu parte PNTL iha futuru bele desenvolve rekursu umanu PNTL nian, liu-liu iha area IT atu bele ba estuda iha BINUS- Jakarta Indonesia. Parte BINUS mós halo apresentasaun kona ba aktividade, programa, no susesu ne’ebe BINUS hetan durante ninia existensia núdar Instituisaun privado ida iha Indonesia.

Segundu Komandante Jerál PNTL iha ninia abertura ba intersasaun ne’e, apresia no agradese ba presensa Bina Nusantara University atu bele loke oportunidade ba membru PNTL atu ba estuda iha BINUS liu-liu iha area IT atu hatene klean liu tan kona ba oinsa hasoru Krime Trans Nasional nian iha futuru.

Media PNTL.