News

Dili– Polisia Nasional Timor Leste (PNTL) sei hala’o primeiru sentru aprendizajen ba programa polisia Komunitaria (POLKOM) iha Munisipiu Ainaro.

Atividade ne’e sei hala’o iha Salaun Administrasaun no Kuartel PNTL Munisipiu Ainaro durante loron 2 hahu husi loron 17-18 Dezembru 2015.

Tuir ajenda ne’ebe mak Média PNTL asesu katak, serimonia Primeiru Sentru Aprendizajen ba Programa POLKOM ne’e sei loke ofisialmente husi Komandante Jeral PNTL, Komisariu Julio da Costa Hornay no Administrador Munisipiu Ainaro, nomos husi parseiru dezenvolvimentu hanesan Fundasaun Ázia no Polisia Nova Zelandia iha Timor Leste.

Atividade ne’e hala’o liu husi servisu Departamentu Polisia Komunitaria Nasional no PNTL Munisipiu Ainaro ne’ebe sei aprezenta kona ba progresu programa Konsellu Polisiamentu Komunitaria iha Munisipiu Ainaro nian.

Sei iha mos aprezentasaun kona-ba dadus preliminaria survey polisiamentu komunitaria 2015 ne’ebe hala’o husi programa HAKOHAK Fundasaun Ázia nian.

Orador ne’ebe mak sei ko’alia iha serimonia ne’e mak hanesan Komandante Jerál PNTL, Komisariu Julio da Costa Hornay, Administrador Munisipiu Ainaro, Xefe Departamentu Polisia Komunitaria Nasional Superintendente Assistente Boavida Ribeiro, Komandante PNTL Munisipiu Ainaro, Xefe Programa HAKOHAK husi Fundasaun Ázia hetan apoiu husi Fundasaun Ázia liu husi programa HAKOHAK Sarah E. Dewhurst, Embaxador Nova Zelandia iha Timor Leste, Reprezentante USAID iha Timor Leste.

Entertantu atividade seluk ne’ebe mak sei hala’o iha eventu ne’e mak hanesan loke video hamutuk 5 kona-ba servisu polisiamentu komunitaria nian ba partisipante sira, vizita expozisaun sentru aprendizajen. Média PNTL.

Dili- Iha loron boot Natal no tinan foun, sempre akontese asidente oi-oin tamba ne’e Polisia Nasional Timor Leste (PNTL) apela ba komunidade tomak liu-liu kondutor no motorista sira atu respeita kodigu tranzitu, tamba bainhira halai arbiru mak sei hetan asidente no ema seluk mak sai vítima ba iha Estrada publiku.

Komandante Jeral PNTL Komisariu Julio da Costa Hornay hateten, Ho nune’e, atu reduz númeru asidente trafiku, husu ba komunidade tomak atu bainhira lori karreta ho motorizada tenke atensaun no kumpri regras kodigu estrada nian.

“Husu ba komunidade tomak atu bainhira lori karreta ho motorizada tenke atensaun no kumpri regras kodigu estrada nian, liu-liu uza sintu seguransa, no keta haluha tenke lori dokumentu veíkulu nian no karta kondusaun, no husu ba motorista sira atu lori motor ho konsiensia no tenke uza kapasete,” afirma Komisáriu Julio Hornay liu husi konferensia imprensa ne’ebe mak hala’o iha Kuartel Jeral PNTL Caicoli-Dili, loron Tersa (15/12/15).

Komandante Jeral akresenta, kondutor no motorista sira labele uza velosidade másimu, labele konsumu alkol ka tua bainhira lori karreta ka motorizada, ba sira ne’ebe mak karik konsumu alkol ka hemu tua labele lori karreta/motorizada.

Komisariu Hornay husu mos ba joven sira, liu-liu ba sira ne’ebe mak hein iha ida-idak nia prejépiu, tenke iha ema ida mak responsavel ba prejepiu, labele konsumu alkol iha estrada publiku ka prejepiu oin, labele tau prejepiu iha dalan publiku hodi taka dalan ba ema hotu ne’ebe halo movimentu ba mai. Média PNTL.

Dili- Relasiona ba selebra festa Natal no Tinan Foun, Polisia Nasional Timor Leste (PNTL) hahu iha loron 15 Dezembru to’o loron 03 Janeiru 2016 sei hala’o operasaun hanaran “Operasaun Lilin Tinan 2015” hodi asegura seguransa ba komunidade hotu liu-liu ba fatin ne’ebe mak atu selebra festa Natal no tinan foun ba.

Komandante Jeral PNTL Komisariu Julio da Costa Hornay hateten, atu asegura movimentu komunidade nian mak PNTL sei hamutuk ho sidadaun sira iha estrada publiku ho objetivu prinsipal mak atu reduz numeru asidente, no vitima, hodi haforsa seguransa rodoviaria.

“Relasiona ba festa Natal no Tinan Foun mak hahú iha loron 15 Dezembru to’o loron 03 Janeiru 2016, PNTL sei fo seguransa ba fatin sira ne’ebe mak ita atu selebra Festa Natal no Tinan Foun, atu nune’e bele prevene krime no asidente trafiku,” afirma Komisáriu Julio Hornay liu husi konferensia imprensa ne’ebe mak hala’o iha Kuartel Jeral PNTL Caicoli-Dili, loron Tersa (15/12/15).

Komisariu Hornay hatutan, Natal nuudar tempu ida ne’ebe ita atu reflete ba tempu pasadu no prezente, no saida mak ita atu halo iha tempu oin mai, oinsa atu realiza mehi no esperansa ne’ebe ita iha, ba ita nia-an, no ba ita nia familia.

Iha operasaun lilin ne’e, laos polisia tranzitu deit mak sei fo seguransa iha Estrada publiku maibe sei apoiu mos membru polisia sira atu nune’e bele asegura seguransa iha Estrada publiku, fatin publiku, no iha fatin ne’ebe mak atu selebra festa Natal no Tinan foun liu-liu iha igreja sira. Média PNTL.

Dili– Munisipiu Ainaro tuir planu sei sai fatin treinamentu nian ba Ofisial Polisia Suku (OPS) husi Komando Munisipiu sira seluk Polisia Nasional Timor Leste (PNTL) nian tamba sira mak implementa no monta hotu ona OPS iha kada suku.

Komandante Polisia Komunitaria Nasional Superintendente Assistente Boavida Ribeiro dehan, Munisipiu Ainaro sei sai fatin treinamentu ba Komandante husi Munisipiu sira seluk nian tamba sira implementa no estabelese hotu ona OPS iha kada suku hotu iha Munisipiu ne’e nia laran.

“Ita haree iha Munisipiu hotu so Ainaro deit mak koloka ona OPS ba suku 11 hotu. Munisipiu seluk seidauk tamba ne’e ita sei tau fatin ne’e hanesan sentru treinamentu ida ba komandante hotu husi Munisipiu seluk nian,” dehan Boavida liu husi nia aprezentasaun iha Akademia Polisia Comoro, Kinta (10/12).

Nia hatutan, planu OPS nian estabelese iha suku hotu ne’e hodi atinji planu Vizibilidade, Involvimentu, no Profesionalismu (VIP) ne’ebe mak fo vantajen ba komunidade sira hodi sente katak PNTL hamutuk ho sira, nune’e bele redus ona númeru konflitus.

“Ita nia planu ne’e sei koloka hotu ita nia OPS sira iha kada suku ne’ebe mak espalla iha ita nia nasaun ida ne’e,” dehan Boavida.

Nia hatutan, oras ne’e estabelese ona OPS iha Munisipiu 11 nia laran maibe la to’o hotu suku sira ne’e, mais ho prejensa OPS sira nian nomos iha Dili laran koloka iha kada eskola bele ona hamenus numeru konflitus iha eskola no bairus balun. Fonte Timor Post Edisaun 11 Dezembru 2015.

Dili– Komando Jeral Polisia Nasional Timor-Leste husu ba Komandante sira atu kontrola armas ne’ebe maka uza hodi halao servisu atu nune’e kualker sidadaun sivil labele uza hodi hasai foto arbiru.

Komandante Jeral PNTL Komisariu Julio da Costa Hornay hateten normalmente Komandante sira maka iha armas autorizadu tanba ne’e ha’u husu komandante sira atu kuida no asegura didiak nune’e labele sai fali sasan ne’ebe ema hotu bele kaer no uza hodi action hasai foto no tau iha facebook. Komisariu Hornay hato’o kestaun ne’e liu husi retiru reflesaun Sesta (11/12) iha Centru Formasaun ba Polisia Comoro Dili.

Komandante Jeral hato’o afirmasaun ne’e relasiona ho aprezentasaun husi Fundasaun Mahein kona ba ema sivil hasai foto ho armas PNTL no tau iha facebook “ Fotografia husi Fundasaun Mahein ne’e fo hanoin mai ita atu hadi’a se bele karik ida-idak halo reflesaun ba nia-an.

“Ha’u fo ezemplu, iha tinan 2006 nudar Komisariu Investigador Nasional ba kazu kilat nian, ami kondena ema lubuk ida tanba dala ruma membrus sira hafoin servisu fila ba uma dala ruma fo kilat ba oan ou ferik oan sira hodi action hasai foto, depois ho kurioju ita hakarak hasai foto hafoin tau iha Facebook no mundu tomak haree no dehan iha Timor sivil mos armadu hotu no ema manipula ita dehan ida ne’e sai ISIS fali katak Timor mos perigu ona uza kilat steyr,” afirma Komisariu Hornay.

Julio hatutan, kazu ida foin dadauk Sr. Mau Kiak nian iha tinan 2006, nia oan mos kaer armas hodi hasai foto hafoin iha operasaun Konselu Revolusaun Maubere (KRM) ninian diskonfia nia mos subar armas tanba ne’e F-FDTL ho Polisia Unidade Espesial serku hotu nia uma atu pasa revista hafoin bolu nia ba investiga, nia esplika katak lae iha tinan 2006 ha’u kaer duni kilat ida ne’e no ha’u nia oan maka foti hodi action hasai foto no ema seluk tau iha Facebook nune’e ema komesa buka tuir dala ruma ita tuur ou toba hakmtek tiha forsa aserka ita atu buka armas ne’e.

Nudar Komandante no membru PNTL material estadu nian ne’ebe maka ita kaer atu halo seguransa nunka fo ba ema seluk kaer, tanba material hirak ne’e perigu, iha akontesimentu kazu ida oan mane boot rasik tiru mate nia alin tamba la kontrola (kelalaian). Média PNTL.

Komando Jeral Polisia Nasional Timor-Leste (PNTL) Prontu Simu kritikas husi Sosiedade Sivil atu nune’e bele Dezemvolve instituisaun Seguransa ne’e sai diak liutan iha futuru.

Komandante Jeral PNTL Komisariu Julio da Costa Hornay hateten ita ema la perfeitu sempre iha failansu tantu konsiente no la konsiente sempre akontese maibe ita labele fo avalia ba ita nia aan ema seluk maka bele hadia ita no fo hanoin ba ita katak ida ne’e sala no ida ne’e diak tanba ne’e maka sosiedade sivil iha, Nia hato’o kestaun ne’e wainhira partisipa Retiru Avaliasaun servisu PNTL loron rua Sexta (11/12) iha Centru Formasaun Polisia Comoro, Dili.

Nia informatan katak Kritikasa barak maibe PNTL hamrik metin nafatin hodi servi povu no nasaun atu nune’e seguransa metin no dezenvolvimentu bele lao tanba ne’e husu ba komandante sira hotu atu labele alergi kritikas tanba kritikas ne’e normal ho objetivu atu hadia tanba nudar ema la perfeitu sempre halo sala barak maibe halo diak mos barak maske dalabarak ema sempre kritika ida sala ne’e .

Iha okajiaun ne’e komandante Jeral agradese ba Fundasaun Mahein ne’ebe maka halao aprezentasaun konaba “Prespetiva Sosiedade Sivil Ba Inplementasaun Politika Dezenvolvimentu Vizivilidade Involvimentu no Profesionalismu (VIP) iha instituisaun PNTL hodi aprezenta suksesu no obtaklu ne’ebe maka PNTL hasoru iha servisu lor-loron nian nomos aprezenta imajen no video konaba atuasaun ne’ebe maka uza forsa no la tuir regras nune’e bele fo hanoin fila-fali ba PNTL katak failansu ida rua sei akontese iha terrenu no presija atu hadia.

“ Kritikus hirak ne’e konstrutivu teb-tebes no ami prontu atu simu no ita hamutuk oinsa atu hadia nune’e sai diak liutan. Maske PNTL iha ona tinan 15 maibe sempre iha problema tanba ne’e liu husi retiru ida ne’e hanesan reflesaun ida ba membru PNTL konaba servisu no atuasaun ne’ebe maka halao karik la tuir regras no lei presiza hadia failansu ne’e iha ne’ebe no suksesu ne’e iha ne’ebe nune’e bele kontinua hadia,” dehan komisariu Hornay.

Fundasaun Mahein nia servisu diak no inportante ba PNTL tanba sira ativu kritika, fo ideia no fo hanoin ba PNTL .

Retiru ho tema “Ho fe esperansa no Karidade ita bele inmplementa Diak liutan Vizivilide Involvimentu no Profesionalismu Servisu Hodi hametin Konfiansa husi Komunidade halao durante loron tolu (10-12 Dezembru 2015) iha Centru Formasaun Polisia no partisipa husi komandante munisipiu 13, director departamentu, Komandante Unidade, Komandante Distritais no ofisiais superior sira ne’ebe maka partisipa ativu iha diskusaun ne’e hodi fo ideaias, kritikas no perguntas. Media PNTL

Dili– Polisia Nasional Timor Leste (PNTL) hala’o retiru hodi halo avaliasaun ba servisu PNTL nian durante tinan 2015, liu husi retiru ne’e bele hadi’a di’ak liu tan kualidade servisu hodi garante seguransa ba povu.

Iha abertura ba retiru ne’e, Komandante Administrasaun PNTL, Superintendente Xefe Mateus Fernandes hateten retiru avaliasaun servisu ne’ebe maka halao importante tebes atu fo motivasaun ba PNTL hodi haree fila-fali saida maka la’o ona durante tinan 2015, erru no problema saida mak sei hasoru, buat sira ne’e hotu sai hanesan prosesu ida atu nune’e prepara ofisial superior sira bele sai servidor ida diak ba instituisaun no povu Timor-Leste.

“Intensaun husi reflesaun ne’e atu bele iha diskusaun, sujestaun no rekomendasaun hodi bele hamosu espiritu foun, prespetiva foun no konsistensia foun hodi haree fila-fali iha tinan 2016 problema sira ne’e bele rezolve no servisu hamutuk ho integradu no koletivu nune’e bele atinji mehi instituisaun PNTL nian ho susesu,” haktuir Sup. Xefe Mateus Fernandes iha abertura retiru iha Centru Formasaun ba Polisia Comoro, Dili, loron Kinta (10/12/2015).

Komandante Administrasaun ne’e hatutan, durante iha servisu lor-loron nian PNTL sempre hasoru dezafiu no problema oi-oin ne’ebe sai hanesan kolega ida hodi motiva no dudu ita, dezafiu no problema hirak ne’e nuudar prosesu ida halo ita sai maduru liu tan hodi lidera Departamentu, Unidade no Distritu ho diak no kredibel tuir prespetiva povu nian.

Retiru ne’e ho tema “Ho Fé Esperansa no Karidade Ita Bele Implementa Diak liu tan Vizibilidade Involvimentu no Profesionalismu Servisu Hodi hametin Konfiansa husi Komunidade”.

Molok hala’o retiru ne’e, hahu uluk misa iha Kapela PNTL ne’ebe dirije husi Amo Kapelaun PNTL, Pe. Nelinho Soares, no retiru ne’e sei hala’o durante loron tolu (10-12 Dezembru 2015) iha Centru Formasaun ba Polisia ne’ebe sei taka ho misa.

Retiru ne’e hetan partisipasaun husi Komandante Operasaun Nasional, Komandante Munisipiu 12 no Rejiaun Espesial Oe-Cusse, Komandante husi kada Unidade, Departamentu, Seksaun, no Ofisiais Superior sira. Média PNTL.

Dili– Ema deskoñesidu tuda no estraga komunidade nia kioske iha área Pantai Kelapa. Polisia Nasional Timor Leste (PNTL) sei hala’o hela investigasaun hodi buka tuir suspeitu.

Komandante Jerál PNTL, Komisariu Julio da Costa Hornay dehan, kazu ne’e akontese iha semana kotuk, iha ema deskoñesidu tuda no estraga komunidade nia kioske. Kazu ne’e sei iha hela investigasaun nia laran.

“Ita simu informasaun ne’e kioske ida maibe ita nia Servisu Investigasaun Kriminal sei buka informasaun. Karik sei iha tan depois investigasaun mak hatene,” dehan Julio ba jornalista sira iha Kuartel Jeral PNTL Caicoli, Kuarta (09/12).

Nia hatutan, informasaun ne’e katak grupu artemarsiais mak halo problema hodi estraga kioske sira ne’e, maibe atu detallu liu depois rezultadu investigasaun mak foin hatene loos.

“Ita nia polisia sira sei buka hela suspeitu. Tamba ita seidauk kaptura ema ruma iha akontesimentu ne’e,” dehan Julio.

Nia hatutan, problema ba Polisia mak falta de kooperasaun husi komunidade sira hodi bele fo hatene paradeiru ema ne’ebe mak halo problema, tamba ne’e mak polisia la kaptura suspeitu sira ne’e.

“Ita sempre tun ba fatin akontesimentu ita nia inan aman sira nunka fo hatene ema ne’ebe mak halo problema. Sira sempre dehan lahatene ema bairu seluk mak mai halo problema,” dehan Julio.

Antes ne’e mos Xefe Estadu Maior Jeneral F-FDTL, Major Jeneral Lere Anan Timur dehan, oras ne’e mosu tuda malu barak ona iha Dili laran, liu-liu iha área Pantai Kelapa besik Ministru Defeza nia uma oin.

“Ami fila mak foin haree sira. Tamba sira kalan sempre tuda malu hela deit,” dehan Lere iha Baucau Sabadu (05/12).

Akontesimentu tuda malu entre joven mak harahun mos komunidade sira nia kioske ne’e akontese iha Sesta (04/12). Fonte: Timor Post Edisaun Kinta (10/12/2015).