News

Dili– Polisia Nasional Timor-Leste (PNTL) apela ba kondutor motor no kareta sira hotu atu lori kareta ho motor kalma no atensaun atu nune’e bele redus dezastre trafiku durante fulan Novembru no iha selebrasaun loron matebian (Finadu).

Komandante Jerál PNTL Komisáriu Julio da Costa Hornay hateten joven no ema ida-idak tenke kuida nia vida, sae motor no lori transporte tenke tuir regras ne’ebe maka iha hodi nune’e bele evita no redus risku ba dezastre trafiku selae to’o ikus numeru ema mate ba asidente aas iha fim do ano.

“Normalmente iha fulan Novembru ita hotu hatene no partisipa i tuir natureza asidente barak maka akontese, tanba ne’e ha’u apela ba ema hotu atu la’o neneik no to’o fatin destinasaun ho saude di’ak, duké hakarak semo lalais maibe la ba uma, para fali iha ospital, Mortuariu ou Santa Cruz,” informa Komisariu Julio Hornay ba jornalista sira hafoin serimonia abertura kursu formasaun ba ajente rekruta sira iha Centru Formasaun ba Polisia Comoro, Dili loron Tersa (27/10/2015).

iha okaziaun ne’e, Komisariu Hornay mos husu ba joven sira atu labele hemu tua lanu mak lori karreta no motor tamba bainhira lanu mak lori transporte sei fo perigu ba ita nia vida.

“Ha’u apela ba joven Timor Oan sira ne’ebe mak gosta hemu tua lanu e depois sa’e no dada motor iha Estrada Publiku to’o ikus tohar no balu lakon vida tenke tau atensaun katak ita nia vida ne’e laiha rezerva no la fa’an iha merkadu, tanba ne’e tenke kuidadu-an,” Julio afirma. Média PNTL.

Dili– Ajente rekruta Polisia Nasional Timor-Leste (PNTL) na’in 243 (atus rua hatnulu resin tolu) ofisialmente hahú formasaun báziku to’o graduasaun durante fulan neen (6) iha Centru Formasaun ba Polisia (CFP) molok sai membru polisia.

“Ohin halo tan abertura ba kuarta kursu (4^o) ba ajente rekruta Polisia Nasional Timor-Leste hanesan parte inisiu ida atu hala’o formasaun ba ajentes ba ano letivu 2015/2016,” informa Komandante Interinu CFP Superintendente Assistente Emilio dos Santos iha serimonia abertura formasaun ba ajente rekruta sira iha loron Tersa (27/10) CFP Comoro Dili.

Komandante Emilio hatutan, despaixu husi Komandante Jeral katak iha kuarta kursu ida ne’e rekruta ajente nain 262 maske seidauk kompleta maibe sei iha faze inkorporasaun nia laran iha deit 243 no sira seluk sei halo hela prosesu atu kompleta númeru 262.

Entertantu Komandante Jeral PNTL Komisariu Julio da Costa Hornay husu ba ajente rekruta sira atu asegura didiak hodi kumpri regulamentu hotu-hotu ne’ebe maka iha, estuda no treinu maka’as no tenke iha fizika, mentalidade no matenek polisia nian atu bele sai polisia ne’ebe di’ak no afirma iha filera PNTL hodi servi povu no nasaun ida ne’e.

“Iha tinan ida ne’e muda tiha kuríkulu husi tinan ida ba fulan neen tamba ne’e ha’u husu ba imi hotu atu kumpri regulamentu hotu ne’ebe maka aplika ba imi durante iha formasaun, imi seidauk polisia, imi sei rekruta kandidatu polisia no regulamentu ne’ebe maka aplika ba imi regulamentu disiplinar rekruta nian lalika prosesu naruk iha nivel estrutura Centru Formasaun prosesa e elimina no laiha toleransia ba infrasaun disiplinar ne’ebe maka komete husi ajente rekruta sira,” tenik eis Komandante CFP ne’e.

Ho nune’e Komandante Jeral espera katak ajente rekruta sira ne’ebe tuir formasaun ne’e bele to’o graduasaun.

“Hau espera katak imi ne’ebe hamrik iha ne’e no restu mai tan hodi kompleta 262 sei hamrik hanesan ne’e iha loron graduasaun,” Nia afirma.

Iha okajiaun ne’e Segundu Komandante Jerál GNR Maijor Tavares Nunes hateten Instrutores GNR sira sei ajuda, akompaña no fo apoiu bazeia ba pedidu husi PNTL ho orientasaun ne’ebe maka iha hamutuk ho instrutor Timor oan sira.

Formasaun ba ajente rekruta sira kompostu husi formasaun báziku, eskolar no fizika ne’ebe maka sei hala’o iha CFP, formasaun karakteristika sei hala’o iha foho Pilmou Postu Administrativu Bazartete Munisipiu Liquica durante loron tolu.

Serimonia abertura ne’e dirizi husi Komandante Jerál PNTL akompaña husi Komandante Interinu CFP no Segundu Komandante Jeral GNR Maijor Tavares Nunes, reprejentante TLPDP, Instrutores iha CFP, membrus PNTL no ajente rekruta sira. Média PNTL.

Dili– Reuniaun Ministru Interior no Administrasaun Interna Comunidade Países da Língua Portuguesa (MIAI-CPLP) ba dala 4 ne’ebe realiza iha Timor Leste ko’alia asuntu importante 4 mak hanesan polisia, migrasaun, estranjeiru no fronteiras, protesaun sivil no bombeiros.

Serimonia solene ba abertura reuniaun MIAI-CPLP ba dala 4 ne’e loke ofisialmente husi Primeiru Ministru RDTL Rui Maria de Araujo ne’ebe hala’o iha Ministeriu Negosiu Estranjeiru no Kooperasaun (MNEK) Praia dos Coqueiros Dili, Segunda (26/10/2015).

Iha serimonia abertura ne’e, Primeiru Ministru Rui Maria de Araujo hateten, asuntu 4 ne’e importante hodi diskute durante iha reuniaun ne’e hodi bele promove no fortalese ba dezenvolvimentu iha ita nia relasaun de kooperasaun.

“Asuntu ne’ebe sei ko’alia iha reuniaun ne’e mak kona-ba polisia, migrasaun, estranjeiru no fronteira, no protesaun sivil no bombeiros mak sei diskute no analiza ba loron ida ne’e, no iha reuniaun ne’e nuudar oportunidade ida ba nasaun membru CPLP sira atu bele promove no fortaleser ba dezenvolvimentu ba ita nia relasaun de kooperasaun,” afirma PM Rui.

Iha fatin hanesan, PM Rui hateten, asuntu kooperasaun seluk ne’ebe entre nasaun CPLP hala’o mak hanesan iha área prevensaun kriminalidade no polisiamentu proximidade, protesaun natureza no ambiente, jestaun sivil no krize, armas no explozivu, investigasaun kriminal, prevensaun no kombate imigrasaun illegal, no tráfiku umanu, observatoriu fluxos migratoriu, no rede feto polisia nuudar area kooperasaun ne’ebe sei fo benefisiu ba ita nia nasaun hotu-hotu bainhira nasaun ida infrenta problema, nasaun seluk sei fo apoiu iha area ne’ebe temi iha leten.

Reuniaun ne’e partisipa husi Ministru Interior no Administrasaun Interna husi nasaun membru CPLP, Eis Presidente Republika Jose Ramos Horta, Ministru Obras Publika Gastão Sousa, Ministru Justisa Ivo Valente, Ministru Koordenador Asuntu Administrasaun Deonisio Babo, Ministru Petroleo Alfredo Pires, Ministra Solidariedade Sosial Isabel Guterres, Ministra Saude Maria do Ceo, Sekretaria Estadu SEM Veneranda Lemos, Xefe Polisia CPLP, Diretores Migrasaun, Protesaun Sivil no Bombeiros. Média PNTL.

Dili– Ministru Interior (MI) Longuinhos Monteiro asume kna’ar Prezidente ba Reuniaun Ministru Interior no Administrasaun Interna Comunidade Países da Língua Portuguesa (MIAI-CPLP) nian husi Moçambique.

Kna’ar ne’e simu liu husi serimonia solene ba abertura Reuniaun Ministru Interior no Administrasaun Interna Comunidade Países da Língua Portuguesa (CPLP) ba dala 4 ne’ebe realiza iha Ministeriu Negosiu Estranjeiru no Kooperasaun (MNEK) Praia dos Coqueiros Dili, loron Segunda (26/10/2015).

“Ida ne’e orgullu ida ba Timor Leste laos ba Ministeriu Interior deit, maibe ba Estadu tomak tamba ita kompriende katak jestaun reuniaun iha nivel Estadu ninian Konsellu Ministru nian, ita nia Governu mak asume responsabilidade hodi nune’e tutela Ministeriu hotu-hotu ne’ebe mak iha Governu nia responsabilidade, prejidi mos reuniaun hanesan ba iha nivel ministeriais,” informa Ministru Interior RDTL Longuinhos Monteiro ba jornalista sira liu husi konferensia imprensa iha MNEK.

Prezidente ba reuniaun MIAI CPLP ne’e hatutan, asume knaar prezidente ne’e hanesan mos ba polisia, Diretores Migrasaun no Bombeiros.

“Nune’e mos iha ámbitu tutela sira nian, reuniaun ba polisia nian, reuniaun ba Diretores Migrasaun nian, ba Protesaun sivil, simultaneamente reuniaun ida ne’e bele dehan reuniaun ida alargada tamba komisaun de peritus no konsellu 3 reuniaun desde loron 4 kotuk mak rezulta ohin dokumentu ida lori mai iha nivel ministeriais hodi aprova.” tenik Longuinhos.

Sai sasin iha entrega kna’ar ne’e mak hanesan Primeiru Ministru RDTL Rui Maria de Araujo ne’ebe ofisialmente loke serimonia solene ne’e, no partisipa husi membru Governu, membru Parlamentu Nasional, Corpus Diplomatiku, Eis Presidente RDTL Dr. Ramos Horta, reprezentante ONG, Ministru Interior no Administrasaun Interna no Xefe Polisia, Migrasaun, Bombeiros husi nasaun membru CPLP, inklui Televizaun Timor Leste halo transmisaun direta no hetan kobertura husi RTP no media Nasional sira iha Dili. Média PNTL.

Dili– Ministru Interior husi Nasaun membru Comunidade Países da Língua Portuguesa (CPLP) asina akta “Deklarasaun Díli” ne’ebe koalia kona ba kestaun kooperasaun iha ámbitu polisial nian, nomos partilla responsabilidade atu kontribui ba kazu emerjensia ne’ebe karik membru nasaun CPLP balun infrenta.

Akta Deklarasaun Dili ne’e asina hafoin Reuniaun Ministru Interior no Administrasaun Interna entre nasaun membru CPLP ba dala 4 iha Ministeriu Negosiu Estranjeiru no Kooperasaun (MNEK) Praia dos Coqueiros Dili, loron Segunda (26/10/2015).

“Iha reuniaun ne’ebe mak hala’o husi oras 09.00 dader to’o tuku 18.00 resin lorokraik rezulta katak pais hotu-hotu konkorda hodi asina akta “Deklarasaun Dili”, deklarasaun ida ne’ebe Estados membru ninia hodi buka atu reforsa liu tan kestaun de kooperasaun iha ambitu polisial nian, partilla mos responsabilidade husi nasaun membru CPLP atu kontribui ba kazu emerjensia ne’ebe karik nasaun membru CPLP balun infrenta,” informa Ministru Interior RDTL Longuinhos Monteiro ba jornalista sira liu husi konferensia imprensa iha MNEK.

Ministru Longuinhos hatutan, akta deklarasaun Dili ne’e mos koalia kona ba nasaun membru CPLP liu-liu Ministerio Interior no Administrasaun Interna sei uza sítiu (website) ida ne’ebe sei atualiza informasaun ba atividade ne’ebe Ministeriu Interior husi kada nasaun membru CPLP hala’o.

Akta Deklarasaun Dili ne’e asina husi maioria nasaun membru CPLP hamutuk 8 hanesan Portugal, Angola, Cabo Verde, Mocambique, Guinea Bissau, Guinea Equatorial, São Tome e Principe, no Timor Leste, entertantu Brasil mak la asina tamba seidauk hetan koñesimentu husi Ministru Interior Brasil.

Ho nune’e, sei fo tempu loron 30 ba Brasil liu husi ninia reprezentante Embaxador Brasil iha Timor Leste hodi koalia ho sira nia Governu atu nune’e bele haree ba dokumentu Deklarasaun Dili ne’e hodi desidi.

Karik Brasil desidi hodi la asina akta Deklarasaun Dili, Ministru Longuinhos hatan katak, karik Brasil mak la asina la prejudika ba akta deklarasaun ne’e tamba akta ne’e maioria mak asina ona. Média PNTL.

Dili– Xefe Polisia husi Nasaun Membru Comunidade dos Paizes de Lingua Portugesa (CPLP) aprezenta kona-ba situasaun seguransa públika husi nasaun ida-idak nian iha Reuniaun Konsellu Xefe Polisia CPLP ne’ebe hala’o iha Edifisiu CPLP Praias dos Coqueiros-Dili, loron Sesta (23/10/2015).

“Liu husi reuniaun ne’e, nasaun ida-idak aprezenta sira nia situasaun seguransa ne’ebe akontese iha sira nia rain, problema ne’ebe mak sira infrenta hanesan mos problema em jeral nebe’e kada nasaun hasoru, ho nune’e liu husi reuniaun ne’e ami bele diskute oinsa mak bele halo prevensaun ba problema hirak ne’e”.

Afirma Komandante Jerál Polisia Nasional Timor Leste Komisáriu Julio da Costa Hornay ba jornalista sira iha Reuniaun Konsellu Xefe Polisia ne’ebe hala’o iha Edifisiu CPLP Praias dos Coqueiros-Dili.

Komisariu Hornay hatutan, asuntu importante ne’ebe debate iha reuniaun ne’e mak oinsa bele halo prevensaun ba kriminalidade, nomos seguransa rodoviaria, maibe sei halo diskute hafoin mak foti nia konkluzaun hodi hato’o ba Ministru Interior hodi ba halo diskusaun entre Ministerial.

Tuir ajenda, asuntu seluk ne’ebe diskute iha Reuniaun Xefe Polisia CPLP ne’e mak hanesan, aprezenta rezultadu reuniaun komisaun peritos polisia, deklarasaun Maputo iha area polisia nian, análiza sumariu ezekutivu seminariu internasional, análiza modalidade estrutura de kooperasaun entre Estadu membru CPLP, define data no fatin ba realiza XI Reuniaun Konsellu Xefe Polisia CPLP, no análiza no aprovasaun ba sumariu ezekutivu ba reuniaun konsellu ba elaborasaun iha area polisia ba projetu Deklarasaun de Dili.

Komandante Policia ne’ebe halo aprezentasaun kona-ba seguransa públika iha reuniaun ne’e mak Angola, Cabo Verde, Guinea Bissau, Moçambique, Portugal, São Tome e Príncipe, no Timor Leste, enkuantu Brasil no Guinea Equatorial mak la partisipa tamba situasaun iha sira nia nasaun no sira informa ona katak iha reuniaun nivel ministerial mak embaxador sei reprezenta. M

Díli– Polisia Nasional Timor-Leste (PNTL) prontu koopera ho Polisia Repúblika Indonesia (POLRI) hodi simu treinamentu kona-ba “asu buka tuir droga” no mos treinamentu seluk ne’ebe maka iha ligasaun ho polisia nian.

“Ita atu ba tuir treinamentu ne’e laiha problema maibe kestaun ita nian maka kona-ba orsamentu. Ita atu koloka ita nia ema ba tuir treinamentu nian, agora ita husu ema mai fό treinu mos ita presiza apoiu orsamentu nune’e buat hotu bele lao ho diak,” Komandante Jeral PNTL, komisariu Julio da Costa Hornay informa ba jornalista sira iha nia kna’ar fatin, Kuarta (21/10).

Nia hatutan, presiza orsamentu ne’ebe maka sufisiente atu nune’e apar malu hodi bele prosesu treinamentu ne’e lao ho susesu.

Antes ne’e Komandante Kompi Anjing Pelacak POLRI NTT, Sersan Virsensus Leo informa, sira prontu apoia Servisu Investigasaun Kriminal Nasional (SIKN) hodi fό treinamentu asu buka droga nian, karik PNTL hakarak Timor Leste uza asu mos hanesan Indonezia nian.

Nia hatutan, sira iha asu buka tuir droga rua-buka tuir mate 2 , buka tuir bomba 1, no buka tuir kona-ba krimi nian iha rua.

“Ami nia asu rua ne’ebe maka buka tuir droga ne’e halao ona servisu iha fronteira Mota-Ain no konsege detekta ona kazu droga balun iha ne’eba,” dehan Vicensus ba Timor Post iha Kupang, Domingo (18/10).

Nia hatutan Demonstrasaun ne’e hanesan parte ida husi dialogo ne’ebe maka halao ona iha Kupang ne’e no sira prontu ajuda PNTL iha area asu ninian atu fό treinamentu ba asu hodi buka tuir droga.

“Ami prontu hodi fό treinamentu ba asu TL nian hodi bele servisu iha area fronteira nian konaba kombate droga,” dehan komandante ne’e.

Iha fatin hanesan, Komandante Servisu Investigasaun Kriminal Nasional (SIKN) Superintendente Ludgerio Lay dehan, SIKN prontu atu servisu hamutuk ho POLRI konaba oinsa hakiak no hanorin asu ne’ebe maka bele buka no detekta droga.

“Ami prontu atu koopera no presiza ita boot sira nia tulun kona-ba oinsa maka fό treinu ba asu maibe hau sei ba hato’o iha ami nia boot tamba sira maka bele desidi konaba asuntu sira hanesan ne’e,” dehan Ludgerio.

Nia hatutan TL presiza duni asu buka droga nian (Anjing Pelacak) atu nune’e bele tau iha Fronteira rai maran, no iha Portu no Aeroportu sira.

Entertantu, Eis Dirjen Badan Nasional Narkotik Kupang (BNNK), Alok Dando dehan, se ida ne’e maka lao duni ho diak ne’e sai hanesan ezemplu ba rai seluk nia fronteira.

“Ita nia planu hamutuk hodi fό treinamentu asu buka tuir droga nian ami nia ema ba hanorin imi nian no ita hotu servisu iha fronteira ho asu asegura ita nia fronteira husi droga. Ha’u hanoin ida ne’e hanesan ezemplu boot ba nasaun seluk nia fronteira,” dehan Alok.

Fonte: Timor Post, Kinta, 22 outubru 2015.

Dili– Liu husi Reuniaun ba dala Sanulu Konsellu Xefe Polisia Nasaun Membru Comunidade dos Paizes de Lingua Portuguesa (CPLP) iha Dili, Polisia Nasional Timor-Leste (PNTL) simu responsabilidade nuudar Prezidénsia Xefe Polisia CPLP husi Sao Tome e Príncipe.

Kna’ar ne’e entrega direta husi Komandante Jerál Polisia Nacional São Tome e Príncipe ba Komandante Jerál PNTL Komisáriu Julio da Costa Hornay iha Edifisiu CPLP Praias dos Coqueiros-Dili, loron Sesta (23/10/2015).

Hafoin simu kna’ar ne’e, Komandante Jerál PNTL, Komisáriu Julio da Costa Hornay hateten, liu husi asinatura Livru de Ouru, Timor Leste iha oportunidade hodi simu kna’ar nuudar Prezidensia ba Xefe Polisia CPLP ne’ebe ofisialmente Sao Tome e Principe entrega kompetensia ba Timor-Leste.

“Ohin ita hetan oportunidade hodi simu knaar nuudar prezidente ba Xefe Policia CPLP, asuntu importante ne’ebe ita debate iha ne’e mak oinsa bele halo prevensaun ba kriminalidade, nomos seguransa rodoviaria, maibe ami sei diskute mak foin foti nia konkluzaun hodi hato’o ba Ministru Interior husi parte Polisia, Imigrasaun no Seguransa Sivil atu nune’e Ministru Interior lori ba diskusaun iha nivel Ministerial,” afirma Komisáriu Hornay.

Komandante Julio hatutan, hafoin simu knaar no responsabilidade ne’e Xefe Polisia Timor-Leste mak prezide reuniaun Polisia CPLP durante tinan ida.

Sai sasin ba entrega responsabilidade Prezidensia Xefe Polisia CPLP ne’e mak Xefe da Polisia husi nasaun membru CPLP hanesan Angola, Cabo-Verde, Guinea Bissau, Portugal, Moçambique, São Tome e Príncipe no Timor-Leste, enkuantu nasaun rua seluk hanesan Brazil no Guinea Equatorial la partisipa tamba situasaun iha sira nia nasaun no sira informa ona katak iha reuniaun nivel ministerial mak embaxador sei reprezenta. Média PNTL.

Dili– Komandante Jeral Polisia Nasional Timor Leste (PNTL), Komisáriu Julio da Costa Hornay hateten, kona-ba kaptura Juga Gama no Alcino ne’e kestaun tempu, atu sedu ka tarde sei kaptura prizioneiru na’in ne’e.

“Juga Gama nia moris fatin iha Timor, nia fen no oan hela iha Timor, loron ruma nia sei fila mai hasoru nia familia, atu la’o to’o ne’ebe to’o tempu ida polisia sei kaer, kriminozu iha ne’ebe deit to’o tempu ida sei kaer,” afirma Hornay ba jornalista sira iha Kuartel Jeral PNTL, Caicoli-Dili, loron Kuarta (21/10/2015).

Tamba ne’e Komisáriu husu ba Prizioneiru na’in 2 ne’e nuudar sidadaun Timor oan di’ak liu entrega-an, duké ba subar movimentu ba mai la livre.

“Nuudar sidadaun Timor oan diak liu entrega-an deit, no husu ba komunidade sira ne’ebe hatene informasaun kona ba sira na’in 2 nia paradeiru, bele informa ba polisia.” Média PNTL.

Dili– Nasaun membru Comunidade Países da Língua Portuguesa (CPLP) fahe esperiensia ba malu iha área seguransa nian liu husi Seminariu Internasional CPLP ne’ebe hala’o iha Hotel Timor, Dili, loron Kinta (22/10/2015).

Semináriu Internasional ne’e ho tema “A CPLP em Prol da Seguransa Humana e Global”, nuudar mos programa ida ba IV Reuniaun dos Ministros Interior no Administrasaun Interna ne’ebe tinan ne’e Timor Leste mak sai uma na’in hodi realiza reuniaun ne’e durante semana ida (20-26 Outubru).

Hafoin abertura ba seminariu ne’e, Komandante Jerál PNTL, Komisariu Julio da Costa Hornay hateten, seminariu ne’e oinsa mak nasaun membru CPLP fahe esperiensia ba malu no servisu hamutuk hodi kria estabilidade entre nasaun membru CPLP nian.

“Seminariu Internasional ne’e importante ba nasaun membru CPLP hodi fahe esperensia nasaun ida-idak nian no kooperasaun servisu hamutuk iha setor seguransa hodi mantein paz no estabilidade iha nasaun membru CPLP ida-idak.”

Komisariu hatutan, iha loron tuir mai 23 Outubru Xefi da Polisia sira sei reuni fila-fali hodi deskuti klean liu konaba seguransa humana e global.

Iha Seminariu Internasional ne’e, Timor Leste mos sai Orador hodi koalia kona-ba apoiu Timor Leste nian ba prosesu dezenvolvimentu seguransa ba Nasaun Guiné Bissau, fluxos migratoriu, no protesaun sivil.

Asuntu importante ne’ebe koalia iha seminariu ne’e mak hanesan forsa seguransa no jestaun sivil no krize, fluxos migratoriu, protesaun sivil, prevensaun seguransa rodoviária.

Seminariu ne’e loke ofisial husi Ministru Interior Longuinhos Monteiro, ne’ebe partisipa husi Komandante Jeral PNTL Komisariu Julio da Costa Hornay, Xefi Estadu Maior das F-FDTL Maijor Jeneral Lere Anan Timur, Presidente Komisaun B Parlamentu Nasional Deputadu David Diaz Ximenes, Sosiedade Sivil, 2 Komandante Jerál PNTL, Komisáriu Faustino da Costa ho Ofisiai superior sira, Adjunta Prokuradoria Jeral Republica, Dra. Zelia Trindade, no reprezentante Nasaun Membru CPLP hanesan Portugal, Brasil, Angola, Mocambique, Cabo-Verde, São Tome e Príncipe, Guinea Bissau, Guinea Equatorial no Timor Leste nuudar uma na’in no komisaun organizadora ba eventu importante ne’e. Media PNTL.