News

Dili-Polisia Nasional Timor-Leste (PNTL) Unidade Servisu Investigasaun Kriminal Nasional (SIKN) kaptura sidadaun Tailandia hamutuk na’in sia (9), tamba deskonfia sira uza vistu turista halo servisu doubru.

Polisia hala’o kapturasaun iha loron Tersa (13/10), lorokraik tuku 16:00 OTL, iha area restaurante Thay Herbal, Palapasu Dili, iha salon ida ne’e polisia deskonfia antes katak prostituta alias borboleta kalan mos hala’o atividade helik iha salon nia kotuk.

“Ita deskonfia sira loke salon no halao mos servisu doubru no ita deskonfia sira uza vistu turista hodi hala’o fali servisu tanba ne’e ita ba bolu sira mai hala’o investigasaun realidade ita hetan sira balu uza vistu turista,” informa Komandante SIKN, Superintendente Ludgerio Lay ba jornalista iha Kuartel Jeral PNTL, Kaikoli Kuarta (14/10).

Nia hatutan prosesu hotu hatama ona ba Ministeriu Publiku (MP) no sira mos simu ona orientasaun husi MP rasik para aplika Termu Identidade Rezidensia (TIR) ba sira.

“Ita simu orientasaun hodi aplika TIR ba sira no prosesu maka ita hein fali delegasaun kompetensia husi Ministeriu Publiku,” dehan Ludgerio. (Fontes: Timor Post, Kinta 15 Outubru 2015.)

Viqueque– Komando Polisia Nasional Timor-Leste Munisípiu Viqueque halo dialogu ho komunidade suku Uaibobo Postu Administrativu Ossú Munisípiu Viqueque hodi husu komunidade sira nia kolaborasaun no partisipasaun ba prosesu dezenvolvimentu nuudar sidadaun Timor oan.

Komandante PNTL Munisípiu Viqueque Superintendente Antonino Mauluta iha nia diskursu hateten dialogu ne’e ho nia objetivu atu halibur hamutuk ho komunidade hodi kontribui ba prosesu dezenvolvimentu tamba agora la’os tempu atu fahe malu maibe hamutuk dezenvolve povu no Nasaun Timor-Leste ba futuru ne’be mak di’ak liu.

“Liu husi dialogu ne’e nuudar Timor oan ita ko’alia no fo hanoin ba malu hodi rona malu tamba ita hotu hanoin katak povu no nasaun ida ne’e hakarak moris di’ak, moris iha paz no estabilidade nia laran, uluk ita iha nakukun laran agora ita hetan ona naroman nune’e ita servisu haka’as aan atu oan sira eskola sai matenek iha future,” afirma Komandante Mauluta bainhira hala’o dialogu ho komunidade sira iha Suku Uaibobo Postu Administrativu Ossú Munisípiu Viqueque, loron Sesta (09/10/2015).

Komandante Mauluta hatutan, hafoin dialogu ne’e sei aprezenta ba komando jeral atu ba oin oinsa komando nia atensaun ba komunidade Uaibobo hodi tau matan no asegura seguransa ba komunidade sira.

Iha fatin hanesan, Manajer ONG Belun Maria Oliveira da Costa hateten ONG Belun nia fokus servisu liu-liu monitorija setor seguransa no dezenvolvimentu, liu husi kooperasaun servisu ho PNTL oinsa atu servisu hamutuk hodi apoiu seguransa.

“Ami nia papel atu kontribui no servisu hamutuk hodi fo informasaun ba polisia atu nune’e instituisaun sira oinsa tau atensaun no uza politika hodi responde ba situasaun seguransa liu-liu liga ba prevensaun konflitu,” afirma Maria Oliveira.

Manager Belun hatutan, dadus insidente violensia ne’ebe maka hetan durante ne’e iha postu Administrativu Ossú mak hanesan violensia doméstika, problema rai, problema animal tama to’os no hamosu problema, ema deskoñesidu na’ok ema seluk nia animal no kazu krime seluk tan.

Entertantu partisipa iha dialogu ne’e mak hanesan Administrador Interino Munisipiu Viqueque Jose da Costa Sousa, Prezidente CNE Jose Belo, Manajer ONG Belun, Komandante PNTL Munisipiu Viqueque, no reprezentante Instituisaun Governu iha Munisipiu Viqueque mak hanesan Saude, SAS, Agrikultura, EDTL, Edukasaun, Rejistu Sivil no Notariadu no komunidade sira iha Uaibobo. Média PNTL.

Dili- Polisia Nasional Timor-Leste kaptura inan ida (germo) bainhira halao hela transaksaun fa’an labarik feto ba emprezariu rihun $3 dolar Amerika.

Transaksaun fa’an feto minoridade ho inisial EC ne’e akontese iha tersa-feira horseik, oras tuku 10:30 dadersan iha hotel ida parte Bidau nian.

Komandante Servisu Investigasaun Kriminal Nasional (SIKN) Superintendente Ludgerio Lay hatete, tersa horsehik nia rasik hetan relatoriu husi komandante VPU no komandante Administrasaun PNTL katak sira kaptura señora ida ne’ebe maka lori labarik feto minoridade atu oferese ba mane.

“Lori mai ona ami nia fatin hodi halo prosesu no hato’o mos ba ona Ministeriu Publiku, no mos hetan ona orientasaun husi MP hodi prosesu tuir Lei ne’ebe maka vigora iha nasaun ida ne’e,” dehan Ludgerio ba jornalista sira iha nia knaar fatin Kuartel Jeral PNTL Kaikoli horsehik.

Tuir fonte ida husi estasaun polisia, katak señora ho inisial OM ne’e halo hela negosiasaun ho emprezariu ida atu halo relasaun sexual ho folin hamutuk rihun $3. Husi total osan ne’e fonte ne’e dehan señora ne’e sei fahe ba rua, osan sorin sei ba labarik feto ne’e.

Oras ne’e suspeitu ho inisial OM submete ona ba prosesu investigasaun. SIKN hein desijaun Ministeriu Publiku kona ba prosesu detensaun suspeitu. Fontes: INDEPENDENTE, 14 outubru 2015.          

Dili- Servisu Investigasaun Kriminal Nasional (SIKN) kaptura autor jogu illegal kasino online ne’ebe diskunfia selu kliente ho osan falsu.

“Ita simu informasaun no husu orientasaun husi Ministeriu Publiku halo operasaun no konsege duni kaptura jogu illegal ho osan falsu,” dehan Xefe Servisu Investigasaun Kriminal Nasional Superintendente Ludgerio P.M Lay, iha nia knaar fatin Kuartel Jeral PNTL Kaikoli horsehik.

SIKN kaptura patraun Xina ho inisial YGH ho sita material hirak ne’ebe maka diskunfia illegal hodi kontinua halo investigasaun. Oras ne’e suspeitu iha sela polisia Kaikoli, Dili.

Iha fatin kapturasaun SIKN konsege sita osan hamutuk $10 milaun dolar Amerika, ne’ebe diskonfia osan falsu.

“Ita laiha makina hodi atu detekta osan falsu maibe ohin ita halo ona pedidu ba banku nasional para atu halo testu ba osan sira ne’e,” tenik nia.

Nia dehan parte SIKN sei diskunfia deit osan sira ne’e falsu ka lae no osan sira ne’ebe maka sira diskunfia ne’e ho montante $10 miloens, maibe buat hotu tenke liu husi testu,” dehan nia.

Kazu ne’e rejistu ona iha Ministeriu Publiku iha oras tuku 9:00 horsehik (13/10). Fontes: INDEPENDENTE, 14 Outubru 2015.

Dili– Problema kombustivel ne’ebe mak Komando Polisia Nasional Timor-Leste (PNTL) infrenta foin lalais ne’e rezolvidu ona tamba instituisaun halo ona pagamentu ba kompañia fornesedόr.

“Ita hasai ona PO (pass order) no problema ne’e rezolvidu ona,” Komandante Jerál PNTL Komisariu Julio da Costa Hornay informa ba jornalista sira iha Vila-Verde bainhira tau fatuk dahuluk ba konstrusaun postu tranzitu nian, Tersa (13/10).

Nia hatutan prosesu fornesementu mina ba PNTL komesa la’o ona no laiha problema ho kompañia.

“Ita nia servisu operasional la’o diak hela no kompania oferese fali ona mina mai ita,”dehan Julio.

Antes ne’e, na’in Kompania Fornesedor Ruvic Fuels Rui Castro dehan, problema kombustivel ne’ebe mak akontese iha instituisaun PNTL ne’e la’os sala kompañia fornesedor maibe tamba sala husi jestaun administrasaun interna PNTL nia rasik nomos parte lojistika subar relatoriu balun ba komandante jeral hodi bele koalia loloos ba publiku.

Castro dehan problema kombustivel ne’e laos sala kompania nian maibe sala ne’e husi adminisrasaun no lojistika PNTL rasik. Kompania hakarak osan tanba ne’e bisnis. Se osan laiha kompania mos lakohi oferese mina ona. Kompania fo mina PNTL tenke selu.

“Ha’u kontaktu ho hau nia kolega ne’e problema ho PNTL ne’e ema nain tolu hanesan Lafaek, Ruvic no Nagardjo. Ami asina kontratu ho montante kiik. Hau nia kolega Lafaek ho $290,00 mil, hau kontaktu nia dehan PNTL sei deve $390,00 mil, Nagardjo nian PNTL deve $500,00 mil tiha ona. Hau lae tanba esperiensia hau hatene ona PO sai hau produs kupon maka fo mina. Se lae hau la oferese mina tanba sira deve ne’e lais atu selu ne’e kusta lahalimar,” dehan Rui ba jornalista sira iha nia knaar fatin, Bidau, Kinta (8/10).

Nia hatutan problema jestaun interna ne’e laos agora. PNTL nian ne’e problema antigu. Kompañia ne’ebe maka oferese mina ba polisia remata ho problema. Sira nia problema dun ba kompania. Problema buka osan la’os buka problema. Fontes: Timor Post, Kuarta 14 Outubru 2015.

Dili-Polisia Nasional Timor Leste (PNTL) preparadu atu fó seguransa ba serimonia boot komemorasaun tinan 500 (atus lima) Portugés tama Timor Leste ne’ebe sei hala’o iha Lifau-Oecusse loron 28 Novembru 2015.

Segundu Komandante Jerál PNTL, Komisáriu Faustino da Costa hateten, atu asegura seguransa ba komemorasaun ne’e, ekipa ida husi PNTL sei desloka ba Oe-Cusse hodi apoiu ba maluk PNTL iha Oe-Cusse.

“Ita prepara hela ekipa ida atu desloka ba Oecuse tamba komandante operasaun rasik involve direta ba iha ekipa preparasaun. Ami mos prepara hela despaixu ba ofisiais PNTL nain rua iha Oe-cuse,” informa Segundu Komandante Jerál PNTL Komisáriu Faustino da Costa ba jornalista sira iha Kuartel Jerál PNTL, Caicoli0-Dili, loron Segunda (12/10/2015).

Komisáriu Faustino hatutan, ofisiais PNTL na’in rua ne’ebe hetan despaixu ne’e, sei tuir enkontru ne’ebe sei realiza iha loron 15 Outubru iha Oe-Cusse.

Kona ba númeru membru PNTL ne’ebe atu koloka ba serimonia ne’e, sei haree ba númeru konvidadus mak bele koloka membru ba atu fo seguransa.

“Ida ne’e ami depende ba eventu ne’ebe mak iha nomos ita nia konvidadu hira mak atu mai no konvidadu ne’ebe mak merese fo seguransa, hafoin ne’e mak ita foin halo estimasaun membru PNTL na’in hira mak atu koloka ba,” tenik 2 Komandante Jerál. Média PNTL.

Dili– Polísia Nasional Timor Leste (PNTL) no Sekretariu Estadu Polítika Formasaun Profesional no Empregu (SEPFOPE) lansa primeira pedra ba konstrusaun postu polisia tranzitu hamutuk 8 iha Munisipiu Dili.

Konstrusaun ba postu polisia ne’e liu husi Programa Empregu Rural husi SEPFOPE nian ne’ebe SEPFOPE kolabora ho Ministru Interior hodi fo apoiu ba servisu polisia tranzitu nian iha fatin públiku.

Iha serimonia lansamentu primeira pedra ne’e, Sekretariu Estadu SEPFOPE Ilidio Ximenes da Costa hateten, konstrusaun ba postu polisia ne’e sei uza tizolu tesi ne’e halo husi rai mean, liu husi projetu ne’e bele promove rekursu naturais Timor Leste nian.

“Objetivu harii postu polisia ne’e ita bele halo promosaun ba tizolu tesi ne’ebe halo husi rai mean, atu nune’e ita bele utiilza ita nia rekursu naturais ne’ebe mak iha, duke uza bloku, iha parte seluk estudante sira husi Sentru Formasaun SENAI Becora bele hala’o pratika on the job training hodi konstroi postu polisia ne’e,” afirma Sekretariu Estadu Ilidio XImenes iha lansamentu 1 pedra konstrusaun ba postu polisia iha Prokuradoria Jerál nia oin Vila-Verde, Dili, loron Tersa (13/10/2015).

Iha fatin hanesan, Ministru Interior Longuinhos Monteiro kongratula ba SEPFOPE nia desijaun ida ne’ebe di’ak hodi kolabora ho Ministeriu Interior hodi konstroi postu polisia ba PNTL.

“Lori Ministeriu Interior nia naran kongratula ba SEPFOPE nia desijaun diak ida ne’e hodi kolabora hamutuk ho ami liu-liu fo apoiu ba PNTL atu konstroi postu polisia ho modelu ne’ebe uniku, uza material ne’ebe ho rekursu rasik, maibe bele fo vizibilidade ba prestasaun servisu polisia tranzitu nian,” afirma MI Longuinhos.

Eis Komandante Jerál PNTL ne’e hatutan, kolaborasaun SEPFOPE nian hodi harii postu polisia ne’e, la’os ida ne’e deit maibe Ministeriu Interior no PNTL sei kolabora nafatin ho SEPFOPE atu halo dezeña no harii uma hela fatin ba Ofisila Polisia Suku (OPS) iha kada suku.

Entertantu projetu ne’e sei harii postu polisia tranzitu hamutuk 22 (ruanulu resin rua) iha Munisipiu Dili, maibe iha tinan ne’e sei harii uluk postu 8 ne’ebe gasta orsamentu hamutuk $32 mill dolar amerikanu, kada postu gasta $4 mill dolar.

Kada postu sei kompleta ho fatin tuur, fatin fase liman, kaza de bañu no Air Conditional (AC).

Área ne’ebe sei harii postu 8 ne’e mak hanesan, 1 iha Prokuradoria Jerál Repúblika Vila Verde nia oin (dalan kruzamentu entre Katedral, Notariado no PJR), 1 iha Eskola Báziku no. 4 Maloa Bairo-pite nia oin, 1 iha Postu Anterior dalan kruzamentu entre ba Fatumeta no Hudi laran Bairopite nian, 1 iha Palacio Prezidensial nia oin, 1 iha Leader Supermarket Delta nia oin, 1 iha Pantai Kelapa, 1 iha Metiaut, no 1 ihaTerminal Becora.

Konstrusaun ba postu 8 ne’e sei halo husi estudante area konstrusaun jerál Sentru Formasaun SENAI Becora no DOM BOSCO Comoro ba grupu 2 ne’ebe ho nia tárjetu ba konstrusaun postu 8 ne’e fulan 1 resin, semana 1 harii postu 2.

Entertantu, partisipa iha serimonia lansamentu primeira pedra ne’e mak hanesan Ministru Interior Longuinhos Monteiro, Sekretariu Estadu SEPFOPE Ilidio Ximenes da Costa, Komandante Jerál PNTL, Komisáriu Julio da Costa Hornay, Komandante PNTL Munisipiu Dili, Superintedente Xefe Pedro Belo, Xefe Gabinete SEPFOPE no Ministeriu Interior, Xefe Seksaun Operasaun Polisia Tranzitu Nasional, no Estudante Sentru Formasaun SENAI Becora. Média PNTL.

Dili-Governu Rekoñese katak Ofisial Polisia Suku (OPS) sei infrenta problema boot iha baze hanesan fsilidade laiha no hela fatin laiha, tanba ne’e governu promete sei hadia, maske sei lao tuir prosesu.

Tuir Ministru Interior Longuinhos Monteiro katak, polisia komunitariu sira ne’ebe mak estabelese ona iha suku sira balun to’o oras ne’e hasoru hela problema mak hanesan fasilidade no fatin atu hela hodi halo servisu, tan ne’e buat hotu atu la’o diak mak tenke ho neneik atu nune’e bele alkansa objetivu no mehi PNTL nian.

“Ha’u hanoin orsamentu mai husi Ministeriu Finansa, no osan ne’e fo propoin liu ba planu ne’ebe maka iha, tamba ne’e ita tenke la’o neneik no problema sira hanesan ne’e la’os akontese iha Timor-Leste de’it maibe Nasaun barak mos kuaze hanesan, tan ne’e governu sei la promete atu hadia iha tinan ida ne’e maibe fiar katak tinan seluk ne’e ita bele haree,” informa Ministru Interior ba Jornalista sira iha nia kna’ar fatin Vila-Verde, Sesta (08/10).

Nia informa liu tan katak, liu husi osan ne’ebe mak uituan sei la alkansa mehi ne’ebe maka iha, tan ne’e buat hotu presiza rai osan lai atu nune’e bele haree ba tinan oin ou tinan seluk, no buat ne’ebe maka kompletu ne’e husik ona haree fali buat seluk.

Antes ne’e Komandante Jerál Polisia Nasional Timor-Leste (PNTL) Komisariu Julio da Costa Hornay hatete, komando rekoñese nafatin kona ba kondisaun OPS sira nian, tanba to’o agora OPS sira sei hela deit iha sede suku laran.

“Ami mos hanoin hela la’os fatin hela de’it ba OPS sira maibe inklui mos fasilidade ba OPS oinsa atu fasilita di’ak sira nia servisu iha baze ho di’ak, maske seidauk iha uma ba OPS sira iha kada suku, maibe autoridade lokal sira mos oferese ona fatin sede suku hodi fasilita dadaun OPS sira hodi hala’o servisu iha suku laran,” dehan Julio.

Parte seluk Komandante Polisia Komunitaria Nasional, Superintendente Assistente Boavida Ribeiro dehan, atu prienxe komunidade sira nia ejijensia ka prezensa polisia nian iha sira nia suku laran, entaun estabelesimentu OPS suku sira hala’o tiha ona iha tinan kotuk, atu nune’e hodi bele servisu hamutuk ho autoridade lokal sira atende problema ne’ebe maka akontese iha suku laran. (Fontes: Timor Post, Segunda 12 Outubru 2015).

Dili-Polisia Nasional Timor-Leste (PNTL) kontinua halao dialogu ho komunidade n’eebe maka okupa rai iha area edifisiu Kuartel Jeral PNTL Kaikoli atu entrega rai ne’e ba governu.

Komandante Jeral PNTL Komisariu Julio da Costa Hornay hateten oras ne’e dadaun parte PNTL halao hela prosesu dialogu hamutuk ho komunidade hirak ne’ebe maka okupa hela rai ne’ebe pertense ba edifisiu Kuartel Jeral PNTL atu nune’e sira bele husik mamuk fatin ne’e ba PNTL hodi harii edifisiu foun.

“Nuudar Timor oan ha’u husu ba komunidade hirak ne’e atu kontribui ba programa dezenvolvimentu ne’ebe mak governu planea ona atu Nasaun ne’e bele la’o ba oin,” Tenik Komisáriu Hornay. Média PNTL.

Dili– Timor-Leste Police Development Program (TLPDP) husi Polisia Australia ne’ebe durante ne’e sai parseiru Dezenvolvimentu ba PNTL apoiu tan fasilidade Exercicio ba Komando Jeral Polisia Nasional Timor-Leste (PNTL) nune’e bele hadi’a no dezenvolve fiziku no saude membrus PNTL sira nune’e bele hala’o servisu ho di’ak.

“Uluk ami mai iha ne’e no ami haree fatin GYM ne’e importante ba membrus PNTL atu halo exercicio hodi hadi’a sira nia saude, inves de sira tur bilaan iha ai hun ou servisu bebeik lor-loron di’ak liu ita buka fatin ida hodi prepara atu nune’e membrus sira bele uza hodi halo exercicio nune’e bele dezenvolve sira nia saude,” afirma Komandante Jerál PNTL Komisáriu Julio da Costa Hornay hafoin serimonia hand over fasilidade GYM husi TLPDP ba PNTL iha Kuartel Jerál PNTL Caicoli-Dili, sesta (09/10/2015).

Komisáriu Hornay espera katak Gym ho ekipamentus sira ne’e bele favorese ba membru PNTL sira maske seidauk kompletu maibe bele hadi’a membrus PNTL nia saude atu nune’e hahú ohin ba oin sira servisu ho fiziku no saude ne’ebe diak.

Eis Komandante Centru Formasaun ba Polisia ne’e tenik tan, atu mantein ho kuidadu ba ekipamentus hirak ne’e mak Komando Jeral sei koloka staff sivil ida, no husu apoiu husi TLPDP atu hanorin funsionariu sivil ida kona-ba oinsa halo manutensaun ba ekipamentus hirak ne’e, atu nunne’e ekipamentus hirak ne’e dura ba tempu naruk.

Fasilidade GYM ne’e sei loke ba membrus PNTL no funsionariu sivil ne’ebe mak servisu iha Kuartel Jerál PNTL no sei loke loro-loron husi tuku lima (5) lorokraik, regras uza Gym mak tenke mai ho roupa ezersisiu nian, sapatu kets, lori ho toalla kiik no be’e atu hemu no mantein fatin ne’e mos nafatin.

Antes termina Komandante Jerál aviza ba membru PNTL no funsionariu sivil tomak ne’ebe mak servisu iha Kuartel Jeral PNTL ne’ebe hakarak uza fasilidade ne’e tenke uza ho kuidadu atu nune’e jerasaun PNTL tuir mai bele uza nafatin. Média PNTL.