News

Dili-Polisia Nasional Timor-Leste halo ona koorespondensia ho autoridade seguransa Indonezia hodi buka tuir Juga Gama no Alcino, maibe to’o ohin loron seidauk identifika.

Ne’e duni PNTL kontinua koopera ho Interpol atu bele deteta nafatin Juga Gama no Alcino ninia paraderu iha fatin hotu-hotu.

Komandante Jeral PNTL Komisariu Julio Hornay hateten, dadur na’in rua ne’e bainhira sei moris polisia sei buka tuir nafatin to’o kaer ka aprezenta an mai autoridade seguransa.

“Sidadaun Timor sente sala tenke mai aprejenta an hodi kumpri desijaun no tempu determina pena hotu ne’e bele hala’o vida livre,” Dehan nia iha Kuartel Jeral PNTL Kaikoli horsehik.

Tanba ne’e Komandante Julio apela nafatin ba dadur na’in rua ne’e atu bele mai aprezenta an iha polisia hodi bele kumpri sira nia sentensa.

Mezmu tempu PNTL nafatin halo kooperasaun para atu identifika sira nia fatin para depois entrega mai no tuir prosedura ne’ebe iha. (Fontes: INDEPENDENTE edisaun 08/09/2015).

Dili- Jogador husi Polisia Nasional Timor Leste (PNTL) ne’ebe kompostu husi ekipa Feto no Mane entrega Taxa 3 (tolu) ba Komando Jerál PNTL ne’ebe ekipa refere manan husi kompetisaun desportiva “FALINTIL CUP” hodi komemora Aniversáriu ba loron FALINTIL ne’ebe komisaun organizadora hala’o iha Ginájiu Dili foin lalais ne’e.

Iha kompetisaun ne’e, ekipa feto no mane husi PNTL ma kraut taxu tamba okupa hotu 1 lugar ba volleyball indoor no footsal (football salaun).

Ekipa Feto PNTL okupa 1 (primeiru) lugar ba kompetisaun volleyball indoor ne’ebe simu taxa 1 ho montante osan $450,00 (dolar atus haat limanulu), ekipa mane PNTL okupa mos 1 (primeiru) lugar ba kompetisaun volleyball indoor ne’ebe simu taxa 1 ho montante osan $450,00 (dolar atus haat limanulu), no ekipa mane PNTL manan tan 1 (primeiru) lugar ba kompetisaun footsal (football salaun) ne’ebe simu taxa 1 ho montante osan $ 750,00 (dolar atus hitu limanulu).

“Atividade ohin ne’e ami entrega taxa 3 ba Komando Jerál, taxa ne’e ami nia ekipa manan husi kompetisaun ba eventu “FALINTIL CUP ne’ebe mak ami PNTL feto no mane mos partisipa iha ne’eba, ami sente orgullu tebes tamba tinan-tinan 1 lugar ne’e sempre ekipa feto husi Ministériu Financas mak manan, maibe ba tinan ida ne’e ekipa husi feto PNTL mak bele sai 1 lugar, tamba ne’e ohin ami mos hala’o serimonia agradesimentu ida hamutuk ho Komando Jerál,” afirma Xefe Ekipa Jogador Feto PNTL, Inspetor Xefe Helena das Dores Alves iha serimonia entrega taxa ba Komando Jerál iha Kuartel Jerál PNTL Caicoli-Dili, loron Sesta (04/09/2015).

Adjuntu Komandante Polisia Komunitaria Nasional ne’e sujere mos ba Komando jerál atu bele tau sira nia ekipa jogador iha estrutura lei organika PNTL nian.

Entertantu Segundu Komandante Jerál PNTL, Komisáriu Faustino da Costa hatan katak Komando Jerál sei diskute hodi tau ekipa ne’e iha estrutura lei organika PNTL nian atu nune’e sira bele organiza malu di’ak liu tan, atu iha futuru partisipa tan iha eventu ruma, sira bele hatudu profesional liu tan iha eventu desportiva. Média PNTL.

Dili– Komando Jerál apresia ba jogador feto no mane husi Instituisaun Polisia Nasional Timor Leste (PNTL) tamba realidade jogador sira hatudu prestasaun ne’ebe di’ak iha eventu desportiva “FALINTIL CUP” hodi komemora Aniversáriu loron FALINTIL ba dala 40 ne’ebe hala’o foin lalais ne’e iha Ginájiu Dili.

Eventu desportiva ne’e kompostu husi Volleyball ba feto no mane, nomos Footsal (Football salaun) ne’ebe ekipa husi PNTL feto no mane mos involve iha atividade refere hodi kompete ho ekipa sira seluk husi Instituisaun Estadu, Governu no organizasaun seluk.

Iha kompetisaun ne’e, ba volleyball indoor ekipa feto no mane husi PNTL mak okupa hotu 1 (primeiru) lugar no ba footsal ekipa mane husi PNTL mak okupa tan 1 (Primeiru) lugar.

“Ba atividade saida deit ne’ebe mak membru PNTL sira hala’o, ami Komando Jerál sempre fo apoiu ba sira nia atividade, ba dadaunm ne’e ha’u apresia tebes ba ita nia jogador sira husi PNTL tamba sira hatudu prestasaun di’ak iha eventu desportiva ne’e, no komando apoiu ba oin komando sei apoiu nafatin ekipa ne’e atu bele partisipa nafatin iha eventu-eventu tuir mai,” afirma Segundu Komandante Jerál PNTL, Komisáriu Faustino da Costa bainhira simu Taxa 3 husi jogador PNTL iha Kuartel Jeral PNTL, Caicoli-Dili, loron Sesta (04/09/2015).

Komisáriu Faustino hatutan, iha lei orgánika PNTL mos defini katak asegura eventu hotu-hotu tantu iha Nasional nomos iha Internasional inklui eventu olímpiku, tamba ne’e kaulaker atividade, komando sempre autoriza atu partisipa, hodi nune’e eventu sira ne’e sai animadu. Média PNTL.

Dili– Departamentu Polisia Tranzitu no Seguransa Rodoviariu (Poltraz) Nasional hala’o pasa revista ba Transporte Públiku liu-liu Taxi no Mikrolet iha Estrada Públiku Kuartel Jerál PNTL nia oin Caicoli-Dili durante loron 2 (rua) husi loron 01-02 Setembru 2015, konsege prende Taxi no Mikrolet hamutuk 30 (tolu nulu).

“Objetivu passa revista ba transporte publiku liu-liu Taxi no Mikrolet hodi regulariza kondutor sira bele obedese no kumpri ho di’ak regulamentu kodigu de Estrada atu nune’e bele minimiza númeru infrasaun tranzitu no redusaun ba númeru asidente de viasaun,” afirma Xefe Departamentu Tránzitu no Seguransa Rodoviaria Nasional Interinu, Inspetor Xefe Valente Soares da Silva.

Iha pasa revista ne’e konsege prende Taxi 20, Mikrolet 10, dokumentu karreta nian 15, uza vidru nakukun (reben) 9, kontra ordem 1, karta kondusaun la tuir kategoria 14, dokumentu liu prazu 9, laiha dokumentu 3, lalori dokumentu 2, la uza farda 17, lamonta lampu 5. Karreta no dokumentu hirak ne’e sei detein hela temporariamente iha Departamentu Tranzitu Nasional.

Husi total infrasaun ne’e, infrator sira hetan nota auto infrasaun husi Polisia Tranzitu no sei ba selu koima direta iha Banku Nasional Ultramarino (BNU), no lori nota koima (selu) husi BNU ba Polisia Tranzitu mak bele foti fali karreta no dokumentu seluk ne’ebe polisia prende.

Molok atu foti fali viaturas refere tenke kumpri regulamentu mak hanesan tenke monta lampu mikrolet nian, monta espellu iha parte liman karuk no loos, troka lampu piska la’os kinur, troka lampu boot ba “mikrolet” nian ne’ebe la’os koor mutin, nomos labele uza vidru metan.

Husi total infrasaun durante loron rua ne’e sei selu koima ba kofre Estadu hamutuk $ 1.763 (rihun ida atus hitu neen nulu resin tolu Dolar Amerikanu). Média PNTL.

Dili– Polisia Nasional Timor-Leste sei asegura seguransa ba Reunian KRRSA (Komite Rejional Rejiaun Sudeste Aziátiku) ba dala-68 (Regional Committee 68 Session for South East Asia Region) ne’ebe mak sei hala’o iha Dili durante loron lima (5) hahú iha loron 7 to’o 11 Setembru 2015.

Bazeia ba despaixu husi Komandante Jeral mak PNTL koloka membru na’in 366 husi unidade hotu hodi fo seguransa nune’e bele asegura reuniaun ne’e bele lao ho diak,

“Atu garante seguransa ba eventu Internasional ne’e lao ho diak maa membru seguransa hotu tenke halo tuir ordem komando hodi involve funsionamentu servisu polisia nian sei halo seguransa durante loron hitu (7), hahu simu bainaka iha loron 5 no 6 to’o eventu ne’e remata no bainaka sira fila,”, Afirma Inspector Polisia Alarico Barreto Ribeiro de Jesus nudar responsavel Jeral seguransa ba Média PNTL iha kuartel Jeral PNTL Caicoli-Dili.

Inspetor Alarico mos husu ba populasaun iha Kapital Dili atu koopera ho autoridade seguransa liu-liu kona-ba movimentu trafiku, tanba Timor-Leste primera vez hetan oportunidade atu organiza eventu ne’e liu husi Ministeriu Saude.

Reuniaun ne’e partisipa husi Nasaun Banglades, Bhutan, Republika Korea, India, Indonesia, Maldives, Myanmar, Nepal, Sri Lanka, Thailand no Timor-Leste. No sei halo abertura iha Centru Convensaun Dili (CCD) hafoin kontinua iha Ministeriu Negosiu Estranjeiru iha loron 7 to’o 11 Setembru ne’e. Média PNTL.

Dili–Sekretária Estadu ba Apoiu no Promosaun Setor Ekonomia Mulher, Veneranda Lemos enkoraja Ministru Interior Longuinhos Monteiro, nune’e kontinua dezenvolve di’ak liu tan partisipasaun feto iha Polisia Nasional Timor-Leste (PNTL).

Previzaun hirak ne’e mosu hafoin Sekretária Estadu Mulher (SEM), Veneranda Lemos hala’o enkontru dahuluk ho Ministru Interior nune’e hametin koodenasaun servisu.

Objetivu husi enkontru ne’e atu haree ba implementasaun planu asaun anual ba tinan 2016 nian, liu-liu kona-ba orsamentu, no ko’alia kona-ba partisipasaun feto PNTL iha área jéneru nian.

“Ami sei servisu hamutuk atu haree kona-ba ajente jeneru nian feto hira maka partisipa iha nivel altu no mane hira mak partisipa, liu-liu iha formasaun, SEM servisu hamutuk mos ho UN Women no TLPDP atu haree kona-ba formasaun ba lideransa, formasaun ba public speaking ba polisia femenina sira, atu iha korajen atu infrenta situasaun,” Veneranda informa ba jornalista sira, iha Ministeriu Interior.

Eis Sekretaria Estadu Asuntu Setor Privadu ne’e hala’o enkontru ho Ministru Interior, haree mos kona-ba konstrusaun edifisiu no implementasaun lei kontra violénsia doméstika.

Durante enkontru Ministru Interior, Longuinhos Monteiro suporta maka’as ba Sekretaria Estadu Veneranda Lemos, nune’e kontinua dezenvolve partisipasaun feto iha PNTL.

Tanba tuir Veneranda katak, partisipasaun ba treinamentu no kapasitasaun ba feto polisia nian, husi komando jeral rasik seidauk iha dadus konkreta kona-ba númeru feto no mane hira mak partisipa iha formasaun. (Fontes: Timor Post Edisun Kuarta 02 Setembru 2015).

Dili– Komandante Jerál (Komjer) Polisia Nasional Timor Leste (PNTL) Komisáriu Julio da Costa Hornay hala’o ninia vizita servisu ba Komando PNTL Munisipiu Ermera ne’ebe ho nia objetivu atu haree no hatene progresu no difikuldade ne’ebe membru sira hasoru iha terreinu.

Vizita servisu ne’e nuudar kontinuasaun ba programa ne’ebe Komandante Jerál hala’o ona iha Munisípiu sira seluk iha fulan hirak liu ba.

Entertantu atividade ne’ebe mak sei hala’o iha Munisipiu Ermera durante loron 3 (tolu) nia laran hahú husi loron 01-03 Setembru tinan ne’e mak hanesan sei hala’o enkontru kona-ba Konsellu Diretiva Distrital (KDD), hala’o enkontru mos ho Veteranus sira no sei halo vizita ba Eskuadra PNTL iha Munisípiu Ermera hanesan Gleno, Railaco, Hatolia, Letefoho no Atsabe. Média PNTL.

Dili-Governu entrega ona relatoriu ba Prezidente Repúblika (PR), Taur Matan Ruak kona-ba rezultadu Empeñamentu Operasun Konjunta (EOK).

Liu husi enkontru Konsellu Superior Defeza no Seguransa, Primeru Ministru (PM) Rui Maria de Araujo entrega kedas relatoriu operasaun nian ba estadu.

Ohin hatama ona, depois enkontru Primeiru Ministru hatama kedas relatoriu,”Ministru Interior Longinhos Monteiro informa ba jornalista sira iha palasiu Prezidensial, Segunda (31/08/15).

Iha aprezentasaun relatoriu ne’e aprezenta husi ministru interior, Longinhos Monteiro, Ministru Defeza Cirilo Cristovão inklui mos Xefe Estadu Maior, Jeneral FALINTIL Forsa Defeza Timor-Leste (F-FDTL) Maijor Jeneral Lere Anan Timor no Komandante Jerál PNTL Julio Hornai.

Operasaun HANITA ezekuta husi F-FDTL no Polisia iha fulan tolu liu ba, husi mandadu kapturasaun ba Prezidente Konsellu Revolusaun Maubere (KRM), matebian Paulino Gama “Mauk Moruk” ho nia grupu.

Hafoin matebian, Mauk Moruk mate iha loron 8 Agostu, EOK hahu hamenus efetivu iha terrenu to’o loron 21 fulan Agostu mak halo enseramentu ba operasaun HANITA.

“Xefe Estadu Maior Forsa Armada no Komando Jerál PNTL aprezenta relatoriu ho volume bo’ot ida kona-ba situasaun operasaun HANITA to’o dia 21 de Agostu ne’ebe Ministeriu Interior no Ministeriu Defeza hodi halo enseramentu ba operasaun HANITA” dehan Ministru Interior ne’e.

Iha loron 9 fulan Setembru, governu sei hatuun tarefas ba operasaun HANITA nian.

Maske Nune’e parte PNTL kontinua halo persegisaun hodi buka tuir membru matebian Mauk Moruk nain rua (Sunardi no Lemorai) ne’ebe maka sei halai subar.

Enkontru konsellu defeza no seguransa ne’e partisipa husi Primeiru Ministru Rui Maria de Araujo, Ministeriu relevante no membru komisaun B Parlamentu Nasional. (Fontes Notísia: Timor Post Edisaun Tersa 01 Setembru 2015).

Dili– Komando Polisia Nasional Timor Leste Munisipiu Dili sei Realiza Forsa Rezerva Cup ka jogu amigavel hodi hametin amizade entre liña ministerial, liña Instituisaun Governu no Universidade iha Kapital Dili hodi manan konfiansa entre servidor hot-hotu atu servi povu ho di’ak liutan.

Liu husi enkontru ne’ebe maka realija ohin, Tersa loron 1 fulan Setembru tinan 2015 Komando PNTL Munisipiu Dili halo planu hamutuk ho reprejentante husi kada Ministeriu no Universidade sira atu realiza jogu amizade Voleybol no Footsal ba feto no mane.

Adjuntu Komandante PNTL Munisipiu Dili, Superintendente Assistente Euclides Belo nu’udar Koordenador ba Komisaun Organizadora hateten Jogu amizade Forsa Rezerva Cup nia objetivu hodi komemora loron 20 de Agostu Aniversariu FALINTIL ba dala-40, komemora tinan 16 loron Konsulta Popular, transformasaun mentalidade servi ho professional, hatudu sentidu produtivu, kreatividade nu’udar servidor estadu tuir liña orientasaun formal nomos komemora loron São Miguel Arcanjo nu’udar Mahein Komando PNTL Munisípiu Dili, iha loron 29 fulan Setembru.

Jogu amizade ne’e sei partisipa husi Kuartel Jerál PNTL, Ministeriu Interior, Diresaun Estatístika, Ministériu Solidariedade Sosial (MSS), Seguransa Sivil, Batalaun Ordem Públiku (BOP COPA), Munisipiu Dili, Bombeiros, Suku Kaikoli, TLPDP, TLCPP, Jestaun Merkadu, no Universidade Dili (UNDIL).

Entertantu Josefina Maria Liza Monteiro estudante UNDIL ne’ebe partisipa iha enkontru ne’e hateten nia sente kontente ho programa ne’ebe maka organiza husi Komando PNTL Munisípiu Dili tamba liu husi eventu ne’e bele hametin no kria unidade jogador sira nomos instituisaun governu.

Josefina haktuir katak UNDIL sei prepara ekipa feto no mane ba jogu voleyball no footsal.

Jogu amizade ne’e sei realiza iha loron 7 fulan Setembru no sei remata iha loron 29 Setembru 2015 iha Salaun BOP Caicoli-Dili, ba manan na’in sira sei hetan prémiu hanesan taxa (piala) ba manan na’in I, II no III lugar. Ba finanseiru no ekipamentus suporta rasik husi Komando PNTL Munisipiu Dili. Média PNTL.

Dili– Liu husi apoiu dezenvolvimentu kapasitasaun rekursu umanu ba membru Polisia Nasional Timor Leste (PNTL) husi Programa Dezenvolvimentu Nasoens Unidas (UNDP) hatudu duni progresu maka’as iha tinan 2 (rua) nia laran (2013-2015).

Área hirak ne’ebe durante ne’e UNDP fó apoiu dezenvolvimentu kapasitasaun mak hanesan implementasaun no koordenasaun planu estratejiku, Informasaun Teknolojia, Rekursu Umanu, Aprovizionamentu, Jestaun Viaturas no Relasaun Públika, entre área hirak ne’e maioria mak hatudu duni nia progresu maka’as.

“Ekipa Projetu UNDP nian mai hodi fó suporta ba PNTL ho espesialidade ne’ebe sira iha. Ha’u sente área sira ne’ebe UNDP suporta, área ne’ebe importante tebes ba PNTL, no mudansa hatudu dadauk ona liu husi kualidade servisu membru PNTL nian, ne’e hatudu katak espesialista sira hakarak tulun duni PNTL hodi oferese sira nia matenek ba membru PNTL sira.”

Afirma Komandante Jerál PNTL Komisáriu Julio da Costa Hornay iha enkontru konsellu ba projetu UNDP-PNTL nian iha Salaun Konferensia Kuartel Jerál PNTL Caicoli-Dili, loron 28 Agostu 2015.

Iha oportunidade ne’e, Komisáriu Hornay hodi PNTL nia naran agradese no apresiasaun ba parseiru PNTL tomak liu-liu UNDP, tamba ho sira nia apoiu mak ohin loron UNDP ho nia ekipa mai servisu hamutuk ho PNTL desde tinan 2013 to’o ohin loron, no husu ba UNDP atu kontinua fo suporta nafatin PNTL tamba PNTL mak asegura seguransa interna atu nune’e Timor Leste hakmatek iha paz nia laran, tamba ne’e PNTL presija servisu ho kualidade hodi responde ba nesesidade povu Timor Leste tomak.

Komisáriu Julio hatutan, iha área balun mak sei la’o neneik hela maibe sei buka dalan oinsa atu bele koopera ba malu di’ak liu tan hodi lori PNTL ba oin, no fiar katak bele.

Iha fatin hanesan, Jestór ba projetu UNDP-PNTL Gil Naldo Rei hateten, durante UNDP nia apoiu ba área hirak ne’ebe UNDP fó suporta, sira hatudu progresu makaas liu, maibe sei iha mos dezafiu balun ne’ebe presija atu hadi’a diak liu tan liu-liu iha liña kooperasaun.

“Durante UNDP nia apoiu ba área hirak ne’ebe UNDP fó suporta, sira hatudu progresu maka’as liu, ita la espera katak PNTL bele atinji ida ne’e iha tinan 2 de’it, maibe dezafiu balun mos iha, katak presija halo di’ak liu tan, tamba ne’e ohin ami hato’o ba komandante Jeral, tamba desijaun hotu iha Komandante Jerál nia liman, no ami mos hanesan Timor oan hakarak hadi’a dezenvolvimentu PNTL ba oin, tamba ne’e tenke hetan kolaborasaun ne’ebe di’ak no ha’u hakarak hatete katak dezafiu sira ne’e la’os sai obstákulu atu la’o ba oin,” tenik Naldo Rei. Média PNTL.