News

Dili– Polísia Nasional Timor Leste liu husi Departamentu Tranzitu no Seguransa Rodoviária hamutuk ho Diresaun Nasional Transporte Terrestre (DNTT) lansa Livru Nota Auto Infrasaun foun hodi hahú aplika iha terreinu bainhira hetan infratór sira halo infrasaun iha Estrada Públiku.

Diferénsia husi Livru Nota Auto Infrasaun foun ne’e mak, prosesu pagamentu ba multa lahanesan uluk, karik hetan kondutor ka motorista sira halo infrasaun tránzitu mak polisia tranzitu sei fó nota auto infrasaun no infratór sira sei ba selu direta iha Banku, la’os selu iha LLAJR.

Molok implementa nota auto infrasaun foun ne’e, Polisia Tránzitu Nasional hala’o workshop durante loron 2 (rua) hodi esplika konteudu husi Livru nota auto infrasaun ne’e ba Xefe Seksaun Tranzitu PNTL husi Nasional no Munisipiu 13 iha Salaun Seksaun Komunikasaun Kuartel Jeral PNTL Caicoli-Dili, loron Segunda (27/07/2015).

“Objetivu husi workshop ne’e mak atu fo koñesimentu ba Xefe Seksaun Tránzitu sira husi Nasional no Munisipiu 13 atu bele kompriende didiak livru nota auto infrasaun ne’e molok implementa iha terreinu, liu-liu ba prosesu pagamentu ka selu multa, infrator rasik ba direta,” afirma Komandante Tránzitu no Seguransa Rodoviária Interinu Valente Soares.

Iha parte seluk, Diretor Nasional DNTT, Natalino do Rosario hateten, “ami halo enkontru ho Vice Ministru Obras Publika no Transporte Terrestre, DNTT rasik ho Diresaun Jeral Ministeriu Finansas nian katak ba infrasaun selu direta ba iha banku ne’e diak liu.”

Iha fatin hanesan, Reprezentante Komandante Jeral PNTL, Superintendente Xefe Carlos Jeronimo hateten “hakarak husu ba membru polisia Tranzitu sira ne’ebe servisu iha estrda publiku tenke hala’o kna’ar ho professional, labele haree hapara kondutor no motorist sira tamba la gosta nia, maibe hapara nia bainhira halo sala ka halo infrasaun duni.”

Partisipa iha workshop ne’e Xefe seksaun Tranzitu husi Nasional no Munisipiu 13, parte DNTT nomos Komandante Opersaun Nasional Interinu. Média PNTL.

Dili– Sekretariu Estadu Fortalesimentu Institusional (SEFI) ho Instituisaun Polisia Nasional Timor Leste (PNTL) hala’o Diagnóstika Nasional ba Fortalesimentu Institusional liu-liu ba Instituisaun PNTL ne’ebe hala’o durante loron tolu (20-22 Jullu 2015) iha Edifisiu Comissão Nacional de Eleição (CNE) Caicoli-DIli.

Diagnóstika Nasional ne’e ho nia objetivu atu identifika problema ne’ebe mak PNTL hasoru no oinsa buka nia solusaun hodi rezolve ba tempu badak nomos ba tempu naruk.

Asuntu ne’ebe mak ko’alia iha Diagnostika Nasional ne’e mak kona-ba Politika, vizaun, estratejia, lideransa, estrutura Governasaun no Kuadru Institusional, Jestaun Rekursu Humanu, Jestaun rekursu seluk kona-ba planeamentu, orsamentu, kontrola ba ezekusaun, Kultura organizasaun no komunikasaun interna, Rezultadu prestasaun servisu, Jestaun relasaun no komunikasaun eksterna.

Entertantu tuir Jerente Prinsipál SEFI Francisco da Costa “Borlaco” hateten, PNTL iha ona planu estratéjiku 2014-2018, atu implementa planu ida ne’e labele la’o mesak, tenke halo koordenasaun ho Ministériu seluk atu nune’e bele la’o dia’k no susesu.

“Ha’u hanoin PNTL iha planu ona, agora oinsa mak planu ne’e bele la’o ho di’ak. Ida mak komandante hotu-hotu tenke hatene sira nia planu no programa ne’ebe sira planeia ona tuir planu estratejiku, no planu ida ne’e sira labele la’o mesak, sira tenke la’o ho instituisaun sira seluk hanesan Ministeriu Estatal, Finansas, Ministeriu Publiku no seluk tan, nomos ho Ajensia Internasional sira ne’ebe hakarak apoiu ba PNTL, sira nia apoiu ne’e tenke enkuadra-an ba planu ne’ebe iha tiha ona, katak planu tenke integradu, orsametu tenke kompleta malu, tenke halo kontrolu hamutuk,” afirma Francisco Borlaco.

Francisco Borlaco hatutan, iha parte seluk PNTL mos hatudu ona progressu boot iha ninia servisu maske ema balun labele halo, maibe PNTL bele hala’o mesak ezemplu krize ne’ebe mak akontese iha tinan 2006, PNTL bele rezolve, seguransa internal ne’ebe ONU husik hela sira bele responsavel mesak.

Diagnóstika Nasional ba Fortalesimentu Institusional ne’ebe ho Lema/Motto mak vizaun ida, planu ida no asaun ida ho nia signifika katak Insituisaun hotu-hotu iha ninia vizaun ida deit, planu ne’ebe iha tenke integradu, tenke la’o hamutuk ho Ministeriu no Instituisaun sira seluk, asaun ida deit katak, ema ida hala’o nia asaun ida maibe ninia objetivu no kontekstu ida de’it.

Nomos ho Tema “moris diak nasaun ne’e responsabilidade ita hotu nian, tamba ne’e ita preokupa hodi serví ho di’ak ba dezenvolvimentu”

Ikus liu Jerente Prinsipal SEFI, Francisco Borlaco afirma katak PNTL bele la’o nafatin tuir planu estratéjiku ne’ebe mak iha, tuir vizaun Vizibilidade Involvimentu no Profesionalizmu.

“Ha’u hanoin PNTL sira kontinua la’o nafatin tuir sira nia Planu Estratéjiku VIP, reforma dezenvolvimentu Institusional, Ordem Públika no Polisia Komunitaria, ha’u hanoin sira kontinua planu 2 ne’e ho diak, hala’o koordenasuan di’ak no importante liu mak hametin sira nia lejislasaun, kompriende lei no regra, aumenta tan formasaun, disiplina tenke di’ak, administrasaun tenke metin, iha prinsipiu VIP. Karik sira hala’o ho diak, ha’u hanoin tinan 2018 ba oin, sira bele atinji sira nia mehi ne’ebe iha ona,” Esperansa Borlaco.

Entertantu partisipa iha Diagnóstika ne’e mak Komando Jerál PNTL, Komandante Unidade, Departamentu, Seksaun iha Nasional, nomos Komandante husi Munisípiu 13 inklui ekipa SEFI. Enkontru ne’e organiza husi SEFI no no hetan apoiu husi UNDP. Média PNTL.

Dili– Treinador Grupu Drum Band ka Moradór husi Polísia Nasional Timor Leste (PNTL), Sarjento Xefe Helder Francisco fó treinamentu Moradór ba Juventude husi Parókia Balide-Dili hamutuk na’in 30 (tolu-nulu) iha Kuartel Jerál PNTL, Caicoli-Dili, loron Kuarta (15/07/2015).

Sjt. Xefe Helder ne’ebe agora dadaun servisu iha Departamentu Polísia Komunitária Nasionál simu orientasaun husi Komando Jerál PNTL hodi fahe ninia esperiénsia kona-ba moradór nian ba ba juventude sira husi Parókia Balide ne’ebe ho nia objetivu atu halo preparasaun ba simu Cruz Joven no Illas Na’in Feto Peregrina ne’ebe hala’o vizita ba kada Parókia iha Kapitál Dili.

“Ohin ami fó treinamentu ba Juventude nomos estudante husi Parokia Balide nian hamutuk na’in 30 hodi prepara sira sai hanesan Moradór Juventude atu simu Cruz Joven no Illas Na’in Feto Peregrina iha sira nia Parokia, no la’o ida ne’e de’it maibe ami hala’o hanesan mos ba juventude sira iha Munisipiu balun,” afirma Treinadór Helder.

Aleinde fo treinamentu ba Juventude iha Kapital DIli, sira mos halao ona iha Munisipiu balun mak hanesan iha Oecusse, Aileu, no Manufahi.

Iha Oeccuse oinsa prepara Juventude no PNTL sira iha Munisipiu refere atu partisipa iha serimonia 500 anos Katólika tama iha Timor Leste, ne’ebe tuir planu sei realiza iha Lifau Oecusse tinan ne’e.

Ekipamentus ne’ebe Moradoór sira uza hodi halo prátika ne’e hetan suporta husi PNTL rasik. Média PNTL.

Dili- Dala barak públiku kestiona bebeik ba servisu Empeñamentu Operasaun Conjunto (EOC), kompostu husi Polisia Nasional Timor Leste (PNTL) no Falintil Forsa Defeza Timor Leste (F-FDTL) ne’ebe kumpri rezolusaun husi Parlamentu Nasional hodi ba buka tuir Mauk Moruk ho nia membru sira ne’ebe halo ona krime hasoru seguransa Estadu nian.

Operasaun Konjunta ne’e hala’o abertura iha Kampu Aviasaun Lanud Munisipiu Baucau iha loron 21 fulan Marsu 2015, ne’ebe operasaun ne’e hanaran “HANITA” katak liu husi dalan hamaus ka halo aproximasaun de’it ho Mauk Moruk ho nia elementu sira atu koopera ba Justisa, labele uza forsa hasoru sira.

Iha faze dahuluk durante fulan ida nia laran, EOC kumpri ordem liu husi Rezolusaun ne’e hodi halo aproximasaun ho komunidade sira, no konsege membru husi grupu Mauk Moruk nian barak mak intrega-an ba EOC no hakarak atu koopera ba Justisa, maibe Mauk Moruk rasik ho nia elementu imporante balun seidauk intrega-an hodi koopera ba Justisa, no sira kontinua subar-an.

Operasaun “HANITA” ne’e tuir lolos hala’o deit fulan ida, maibe tamba Mauk Moruk ho nia elementu importante balun seidauk intrega-an, tamba ne’e EOC kontinua ba faze daruak hodi kontinua buka tuir Mauk Moruk liu husi dalan aproximasaun atu Mauk Moruk rasik mak intrega-an ba hodi responsavel ba asaun ne’ebe sira halo hasoru Instituisaun Seguransa Estadu nian.

Operasaun hala’o besik fulan tolu nia laran EOC seidauk konsege nafatin hetan Mauk Moruk nuudar alvu importante ba operasaun ne’e, tamba komunidade lakohi fó informasaun ba EOC hodi bele kaptura Mauk Moruk.

Tamba ne’e Komandante Jerál PNTL, Komisáriu Júlio da Costa Hornay  husu nafatin ba komunidade hotu atu fó informasaun ba parte polisia atu nune’e bele kaptura Mauk Moruk.

“EOC seidauk kaptura Mauk Moruk tamba ema hotu lakohi fó informasaun ba ami oinsa mak ami bele kaptura Sr. Mauk Moruk, ita nuudar Timor oan hotu ne’ebe hakarak moris iha paz no estabilidade nia laran, ita hotu iha dever atu kontribui hodi hato’o informasaun ba EOC atu nune’e bele kaptura lalais, karik la fó informasaun mak KOK sei esforsu an nafatin,” afirma Komandante Jerál PNTL, Komisáriu Júlio Hornay ba Jornalista sira iha Kuartel Jerál PNTL, Caicoli-Dili, loron Kuarta (15/07/2015). Média PNTL.

Dili- United Nations Fund for Population Activities (UNFPA) iha Timor Leste entrega material eletrónika hanesan Laptop ida, projector ida, no dokumentu balun ba Klínika Polísia Nasionál Timor Leste (PNTL) hodi suporta ba planu servisu Klínika PNTL nian relasiona ba programa Saude Seksual no Reprodutiva.

Ekipamentu eletrónika ne’e intrega direitamente husi Reprezentante UNFPA John M. Pile ba Komandante Jerál PNTL, Komisáriu Julio da Costa Hornay iha Kuartél Jerál PNTL, Caicoli-Dili, loron Kuarta (15/07/2015).

“Ekipamentu ne’ebe ami entrega ba PNTL atu suporta sira nia planu no implementasaun programa saude seksual no reprodutiva. Hodi UNFPA Timor Leste nia naran, ha’u hakarak rekoñese no manifesta hodi kontinua suporta ba PNTL, mai ita kontinua servisu hamutuk kona-ba kestaun kritikal ida ne’e,” afirma John M. Pile, Reprezentante UNFPA iha Timor Leste.

Reprezentante UNFPA John M. Pile hatutan, planu UNFPA ba tinan ida ne’e no tinan oin mak sei kontinua suporta ba PNTL iha área 4 mak hanesan hasa’e PNTL nia sistema relatoriu no monitorizasaun no avaliasaun, reforsa PNTL nia sistema implementasaun edukasaun, hasa’e kapasidade pesoál saúde PNTL nian, no reforsa kapasidade PNTL iha Jestaun programa nian.

Entertantu iha fatin hanesan, Komandante Jerál PNTL, Komisáriu Julio da Costa Hornay agradese ba apoiu ne’ebe UNFPA fó ba PNTL liu-liu ba Klínika PNTL atu hala’o nia servisu hodi halo sosializasaun kona-ba prevensaun ba HIV/SIDA nian.

“Ne’e ekimpamentu atu fo apoiu ba unidade saude nian atividade atu halo sosializaaun kona ba HIV nian ba PNTL rasik nomos ba komunidade sira oinsa atu halo prevensaun ba HIV ida ne’e,” afirma Komisáriu Julio Hornay.

Komandante Jerál PNTL hatutan, tuir informasaun ne’ebe iha katak iha Timor Leste mos iha ona moras HIV ida ne’e, no moras ne’e laharee ba se deit atu ema boot ka ki’ik, bainhira ita la kuidadu ita nia an mak moras ne’e sei kona ita, tamba ne’e oinsa atu halo prevensaun ba moras refere.

Hafoin serimonia entrega ne’e, Reprezentante UNFPA, hamutuk ho Komandante Jerál PNTL ne’ebe akompaña husi Xefe Seksaun Klínika PNTL ho partisipante sira hala’o vizita ba Laboratóriu no Klínika PNTL.

Partisipa iha serimonia ne’e mak Komandante Unidade, Departamentu, Seksaun, Xefe Seksaun Klínika PNTL ho nia enfermeiru no Doutor sira, ekipa UNFPA, no membru PNTL balun iha Kuarte Jerál PNTL. Média PNTL.

Dili- Prosesu promosaun ba Polisia Nasional Timor Leste (PNTL) ne’ebe lidera husi Primeira Dama Isabel Ferrreira nuudar Prezidente ba Komisaun Apoiu Tekniku Promosaun PNTL nian, ne’ebe hahu husi tinan 2012 no remata iha 30 Juñu 2015, prosesu ne’e intrega fali ba Komando Jerál PNTL atu lidera rasik ba prosesu tuir mai.

Entertantu bainhira remata servisu ne’e, Komando Jerál PNTL hala’o serimonia despedida ho Prezidente Ekipa Apoiu Tekniku ba Promosaun PNTL ho nia ekipa iha Kuartel Jerál PNTL, Caicoli-Dili, sesta (03/07/2015).

Iha serimonia ne’e, Primeira Dama Isabel Ferreira nuudar Prezidente ba Ekipa Promosaun ne’e hateten, servisu ne’ebe durante ne’e ekipa hala’o durante la’o diak tebes tamba iha kooperasaun di’ak husi PNTL, nomos agradese ba nia ekipa tomak ne’ebe durante ne’e hala’o servisu ba prosesu promosaun PNTL nian.

“Servisu ne’e liu husi planu IV Governu Konstitusional ne’ebe iha komprimisiu ida hakarak atu reforma setor seguransa liu-liu PNTL, mak fo fiar ba ami hodi halo esforsu tomak hodi hala’o servisu ne’e, no ami bele finaliza ho diak tamba iha kooperasaun husi Komando Jeral PNTL, desde lideransa Komisáriu Afonso de Jesus no Ministru Interior atual Dr. Longuinhos Monteiro, to’o mai agora Komisáriu Júlio Hornay,” afirma Prezidente Komisaun Apoiu Promosaun Isabel.

Primeira Dama hatutan, servisu apoiu tekniku promosaun PNTL ne’e ho nia objetivu seluk mak atu oinsa hametin Instituisaun PNTL sai hanesan Instituisaun ida ne’ebe forte, kredivel no professional, ida ne’e mak sai orgullu boot ida ba ita hotu hanesan Timor Oan nomos ba Estadu independente ida, PNTL iha nia funsaun importante iha nasaun ida ne’e, tamba estabilidade nasaun nian depende ba seguransa.

Oinsa bele hametin liu tan hierarkia komando nian, Primeira Dama husu ba membru PNTL tomak atu bele fiar malu no respeita malu, maske nia idade kiik no kolega maibe, haree tuir esperiensia bainhira fo ona konfiansa ba kargu ne’ebe nia asumi, ita tenke respeita, no nia ordem tenke kumpri, ho ida ne’e mak instituisaun ne’e sei metin liu tan no sei hamosu polisia ne’ebe kredivel no professional liu tan, no buat ne’ebe ita hotu mehi hodi moris iha situasaun ne’ebe seguru bele sai duni realidade.

No Prezidente komisaun ne’e husu deskulpa ba membru PNTL sira ne’ebe karik durante ne’ebe balun ladun simu ho prosesu ne’e, no tempu oin mai atu halo promosaun, ne’e PNL mak sei lidera rasik.

“Ohin ami entrega tomak prosesu ne’e ba ita boot sira, ita boot sira mak lidera rasik prosesu ne’e, importante mak fiar malu, rona malu no respeita malu, mak sei lahamosu problema ruma iha Instituisaun nia laran, no fiar katak prosesu ne’e sei la’o ho diak,” tenik Isabel Ferreira.

Iha fatin hanesan, Komandante Jeral PNTL Komisariu Julio da Costa Hornay agradese boot ba Prezidente Komisaun ho nia ekipa tomak ne’ebe  servisu maka’as, maske ekipa ne’e simu protesta barak husi membru PNTL balun ne’ebe ladun satisfas ho prosesu promosaun ne’e.

“Ami hotu rekonhese katak, komisaun ne’e nia servisu maka’as ho pasiensia boot hasoru prosesu ida ne’e, to’o mai konsege halo promosaun ba postu 12 ba membru PNTL nian, iha tinan 2012 halo promosaun extra ordinariu tan hodi kompleta nesesidade estrutura PNTL nian, ne’e situasaun ida ne’ebe difisil maibe komisaun ne’e halo servisu maka’as hodi bele hatudu rezultadu ne’ebe di’ak tebes,” afirma Komisáriu Júlio Hornay.

Komandante Jerál hatutan, ba oin prosesu ne’e PNTL mak sei lidera rasuk, maibe sei presija nafatin apoiu husi komisaun nian maske komisaun la ejiste ona, no PNTL iha esperansa katak prosesu ne’e sei la’o di’ak.

Entertantu iha serimonia agradesimentu ne’e, Komando Jeral mos entrega lembransa no sertifikadu ba Prezidente Komisaun ho nia ekipa tomak hanesan símbolu agradese no rekoñesimentu ba servisu ne’ebe durante ne’e komisaun hala’o. Média PNTL.

Komandante Jerál Polísia Nasionál Timor-Leste, Komisáriu Júlio da Costa Hornay, hakbesik an ba Komandu Munisípiu inklui eskuadra sira iha Munisipiu 13 (sanulu resin tolu) hodi haree servisu membru PNTL sira nian iha terreinu.

Atividade vizita ba membru sira ne’e hala’o relasiona ba programa 100 dias (loron atus ida) Komandante Jerál nian hafoin simu tomada de posse husi Primeiru Ministru Dr. Rui Maria de Araujo iha Aniversáriu Polisia Nasional Timor Leste (PNTL) ba dala XV iha Akademia Polisia loron 27 Marsu 2015.

Liu husi vizita ne’e, Komandante Jerál Komisáriu Julio da Costa Hornay rona direta preokupasaun nomos haree direta kondisaun servisu membru sira nian iha baze.

“Hau mai iha ne’e atu haree ha’u nia membru sira iha terreinu                                                                                                                                                                                                                                                  liu-liu iha munisipiu nomos eskuadra sira, ha’u tenke hakbesik-an hodi hato’o mensajen komando nian ba sira, atu nune’e bainhira sira halo atuasaun ruma tenke tuir lei no ordem, labele hatudu atitude ne’ebe ladiak hodi hamosu preokupasaun husi komunidade sira,” informa Komisáriu Julio Hornay.

Komandante Jerál akrsenta katak, atitude ne’ebe membru PNTL sira hatudu iha terreinu, bainhira halo sala publiku la’os temi membru sé mak halo sala maibe temi em jeral Insituisaun PNTL nia naran, tamba ne’e husu ba membru sira hotu atu hatudu atitude ne’ebe mak diak, ho profesionalizmu.

Iha parte seluk, Komisáriu Julio Hornay husu ba membru PNTL sira, tenke servisu ho loialidade no disiplina no tenke kuidadu ba fasilidade ne’ebe mak Governu oferese mai PNTL hanesan karreta no motorizada inklui uma (kazerna), tamba governu laos tinan-tinan atu fo azudu nafatin maibe liu husi periodu.

Komandante Jerál rekoñese katak, membru PNTL sira iha eskuadra balun mak hala’o servisu ho la’o ain, tamba la iha transporte hanesan karreta no motorizada, maibe Komisariu fo korazen nafatin hodi fo motivasaun ba membru sira atu nune’e bele hala’o servisu ho fuan ho laran.

Iha Vizita ne’e, membru PNTL balun hato’o lamentasaun kona-ba fasilidade polisia nian ba Komandante Jerál, tamba durante ne’e iha eskuadra balun laiha fasilidade ne’ebe sufisiente hodi apoiu ba sira nia servisu iha baze.

Hatan ba kestaun ne’e, Komisariu Júlio Hornay fo korazen nafatin ba sira katak PNTL iha difikuldade barak maibe agora iha mudansa boot, kompara ho salariu inisiu PNTL hahu to’o agora, iha diferensia boot teb-tebes ba saláriu.

“Ha’u husu ba ita boot sira katak servisu ho fuan ho laran, labele hanoin katak iha limitasaun ba ida ne’e, maibe meius seluk mak bele halo, lian Indonezia katak, tiada rotan akar pun jadi,” Komisariu fo hanoin.

Entertantu, vizita Komandante Jerál ne’e hala’o hahú husi Munisípiu Dili, Lautem,Viqueque, Manufahi, Ainaro, Aileu, Baucau, Covalima.

Iha vizita ne’e, Komandante Jerál hala’o enkontru ho Komandante PNTL Munisipiu no eskuadra sira nomos veteranus balun hodi koalia kona-ba servisu polisia nian ho komunidade sira iha baze.

Eis Komandante Centru Formasaun ba Polisia ne’e husu ba Komandante Munisipiu no eskuadra sira atu derizi membru sira molok ba hala’o servisu iha terrenu atu nune’e membru sira labele hases husi ordem no fasil atu kontrola.

Iha parte seluk Júlio Hornay preokupa mos ho kazerna ne’ebe iha Munisipiu balun seidauk remata no laiha fasilidade, hanesan iha Postu Administrativu Natarbora Munisipiu Manatuto no Munisipiu Aileu, tamba ne’e husu ba Kompañia ne’ebe kaer obra ne’e atu finaliza lalais no halo kompletu fasilidade kazerna nian atu nune’e membru sira bele hela hodi hala’o servisu. Média PNTL.

Dili- Liafuan ne’e hato’o husi Komandante Jerál PNTL, Komisáriu Júlio Hornay bainhira enserra ba Segundu Konferénsia Jéneru PNTL ne’ebe organiza husi Seksaun Jéneru PNTL no servisu hamutuk parseiru dezenvolvimentu TLPDP (Timor Leste Police Development Program) iha Centru Formasaun Polísia Comoro-Dili, loron Sesta (19/06/2015).

“Atu familia uma laran harmonia nomos susesu iha karreira, tenke tau aas diginidade no respeita malu, tamba karik la respeita malu no la fó importánsia ba ita nia dignidade, mak buat hotu ne’ebe ita hala’o iha familia nomos iha servisu sei laiha valor,” afirma Komisáriu Júlio Hornay.

No husu ba maluk feto sira, labele haree deit ba servisu maibe tenke haree mos ba familia, nune’e mos ba mane sira tenke fo apoiu mos ba feto ka ita nia feen sira nia kareira, tamba servisu atu lao di’ak no susesu, sempre hetan apoiu husi familia.

Iha parte seluk, Primeira Dama Isabel Ferreira husu ba polisia feto sira atu labele haree deit ba pozisaun no deviza, maibe haree mos ba familia uma laran, tamba familia mak sai xave importante ba susesu kareira nian.

Tamba tuir Primeira Dama nia haree, durante ne’e iha familia barak mak divorsiu no abandona oan sira, to’o ikus oan sira mak sai vitima tamba taka dalan ba labarik sira nia futuru.

Liga mos ba kazu violénsia domestika ne’ebe akontese bebeik, ida ne’e familia nia fé no respeita malu mak menus, bainhira familia ida-idak tau iha konsiensia katak familia importante, tenke respeita malu, fiar malu no hadomi malu. Média PNTL.