News

Relasiona ho engarrafamentu transporte ne’ebe sempre akontese iha sidade Díli, liu-liu iha Loja no Edifísu ne’ebe besik estrada públika, mak iha VI Governu Konstitusional husi Ministériu Obras Públika, Transporte no Komunikasaun (MOPTK) liu husi programa 100 dias (loron atus ida) Vice Ministru MOPTK nian, hatun despaixu ho Nú. 02/III/2015/GVMOPTC/MOPTC kona ba fiskalizasaun no Estasionamentu veíkulu ba Instituisaun Polísia Nasional Timor Leste (PNTL) liu-liu Departamentu Tránzitu Nasionál hodi ezekuta despaixu refere ba kondutor karreta sira ne’ebe uza Estrada públiku.

Iha despaixu ne’e, Vice Ministru OPTK fó autorizasaun ba Polisia Tránzitu atu fahe informasaun ba publiku liu-liu kondutor sira ne’ebe lori karreta Estadu, Privadu nomos transporte publiku atu kumpri despaixu ne’e, bainhira parkir karreta iha estrada ninin tenke ho aliñamentu (karreta nia oin ba loos, labele para hanesan uluk).

Relasiona ne’e, polisia tránzitu fahe ona informasaun ba publiku iha sidade Dili, liu-liu iha fatin hirak ne’ebe mak durante ne’e hamosu engarrafamentu bebeik.

“Kampaña estasionamentu ba veíkulu ne’e, ami hetan despaixu husi Vice OPTK atu fo avizu ba publiku liu-liu kondutor sira ne’ebe lori karreta atu bainhira para karreta iha Estrada ninin, tenke para loos, labele para hanesan uluk tamba taka dalan ba karreta ka veíkulu seluk hodi hamosu engarrafamentu,” afirma Xefe Dep. Tránzitu Nasionál Interinu, Inspt. Xefe Valente Soares da Silva.

Tuir Inspt. Xefe Valente nia haree durante ne’e, engarrafamentu akontese tamba seidauk iha regulamentu ida hodi regula veíkulu sira hodi para ho di’ak, maibe hafoin despaizu ne’e iha no fahe ona avizu ba publiku, agora bele iha ona mudansa maske kondutor barak mak seidauk rona informasaun ne’e.

Avizu ka informasaun ne’e, ekipa polisia tranzitu mak tun direita ba iha terreinu hodi fo informasaun ba kondutor sira bainhira parkir sala. Kampaña ne’e foin mak hala’o iha Dili deit tamba Díli nuudar sidade ida ne’ebe baibain hamosu engarrafamentu.

Karik utentes veíkulu liu-liu kareta ne’ebe mak para karreta latuir regra ne’ebe mak iha, polisia tranzitu sei fo auto infrasaun hodi fo sansaun ba kondutor ne’ebe lori karreta refere.

Iha parte seluk, ba fatin parkir karreta ne’ebe mak iha fatin balun seidauk iha, Governu sei haree hodi rezolve.

“Bazeia ba despaixu husi Vice Ministru Obras Públika, Transporte no Komunikasaun katak, ba utentes transporte públiku tomak atu halo estasionamentu ba veíkulu ho liña Indiana, ka aliñamentu ho loos liu-liu iha lojas no edifísiu sira nia oin ne’ebe besik estrada públika, karik la halo tuir mak sei hetan sansaun,” apela Xefe Dep. Tránzitu no Rodoviária Interinu, Insp. Xefe Valente Soares. Média PNTL.

Dli- Feto Polisia Nasional Timor Leste husi Munisipiu 13 hamutuk ho Komando Jeral hala’o Konferensia Jéneru ba daruak durante loron 3 hahú husi loron 17-19 Juñu 2015, iha Akademia Polisia Comoro- Dili.

Iha II konferensia ne’e ho nia objetivu atu haree liu ba progressu no dezafiun ne’ebe durante ne’e Feto PNTL sira hasoru iha terreinu, hafoin hala’o I konfrenesia ne’ebe hala’o ona iha fulan hirak liu ba.

Iha abertura ba konferensia loke ofisial husi II Komandante Jerál PNTL, Komisáriu Faustino da Costa no Diretora Jerál  Ministériu Interior hanesan mos Prezidente Grupu Traballu ba Jéneru Gulhermina Soares ne’ebe akompaña mos husi Espoza Embaxador Australia, Komandante TLPDP, no Komandante Interinu Centru Formasaun ba Polisia.

“Husu ba ita boot sira ne’ebe realiza tan II konferensia ne’e atu haree fila fali rezultadu implementasaun husi 1⁰ Konferensia ne’ebe hala’o ona, fahe informasaun ba malu hodi halo avalaisaun atu nune’e bele dezenvolve liu tan servisu polisia nian iha terreinu,” informa Segundu Komandante Jerál PNTL Komisariu Faustino da Costa.

Iha fatin hanesan, reprezentante Ministru Interior Guilhermina Ribeiro hateten, nuudar Prezidente Grupu Traballu Jéneru nian husu ba feto PNTL sira atu haka’as-an hodi hala’o servisu nafatin liu-liu hakbesik-an ba komunidade iha área rural hodi dezimina informasaun kona ba violénsia doméstika nian, atu nune’e bele redúz númeru violénsia doméstika ne’ebe sempre akontese iha Timor Leste.

Tuir Komandante TLPDP, Detective Supt. Polisia Dave Allen hateten sira orgullu sai parseiru ho PNTL liu-liu Jéneru PNTL hodi bele dezenvolve liu tan programa planu asaun Jeneru PNTL nian ne’ebe hala’o ona.

Iha parte seluk, Sekretaria Estadu ba Feto Veneranda Lemos hateten, SEM sei halo diálogu ho Ministru Interior, no Komandante Jeral PNTL hodi koalia kona-ba atu fó formasaun ba feto PNTL sira iha área lideransa, língua, koalia iha públiku (public speaking), atu nune’e feto PNTL mos bele sai lideransa no bele foti desizaun.

Entertantu, iha enseramentu ba konferensia ne’e, Komandante Jerál PNTL, Komisáriu Júlio da Costa Hornay hateten, husu ba maluk feto PNTL sra atu kumpri nafatin misaun, no servisu ho sakrifisiu atu bele asegura paz no estabilidade iha rai laran, maske sei hasoru difikuldade barak liu-liu ba fasilidade maibe, preokupasaun hirak ne’e  sei rezolve neneik.

Tamba feto mos iha kapasidade hodi apoiu ba servisu, ho nune’e tenke aproveita oportunidade ne’ebe komandante ka Xefe sira fó ba ita boot sira, hodi bele hetan esperiénsia ruma bainhira tuur iha estrutura ruma, hatene ona ida-idak nia servisu. Média PNTL.

Dili- Prezidente Repúblika (PR) Taur Matan Ruak hala’o vizita ba Polísia Nasionál Timor Leste (PNTL) iha kuarta (10/06/2015) iha Kuartel Jerál PNTL, Caicoli-Dili relasiona ba programa vizita ne’ebe mak Prezidente hala’o iha Munisipiu 13 iklui suku sira iha territóriu tomak.
Iha vizita ne’e Prezidente Repúblika sente orgullu ho mudansa ne’ebe mak PNTL hatudu durante ne’e, hodi asegura paz no estabilidade iha rai laran.
“Ha’u kontente haree mudansa boot PNTL nian iha tinan 13 nia laran, liu-liu iha tinan 6 ikus ne’e iha mudansa nebe maka’as, ne’e la’os de’it relatoriu ne’ebe Komandante Jerál informa mai ha’u, maibe liu husi vizita ba suku sira ne’ebe durante ne’e ha’u ba, povu fó avaliasaun ne’ebe di’ak ba dezenvolvimentu PNTL nian, tamba ne’e ha’u enkoraja nafatin PNTL atu bele servisu maka’as liu tan, tamba Povu no Nasaun presija PNTL nia tulun,”informa Prezidente Repúblika Taur Matan Ruak.
Prezidente hatutan, kualker Estadu iha mundu, iha pontu importante 2 mak Estadu hakarak mak hametin paz no estabilidade iha rai laran, no prosperiedade (moris diak) ba povu.
Pontu 2 ne’e sagradu ne’ebe la’os PNTL de’it mak hala’o misaun ne’e, maibe ema hotu liu-liu Ministériu sira ne’ebe relevante tenke servisu hamutuk atu nune’e bele asegura seguransa iha ita nia rai laran hodi fó prosperiedade ba povu.
Se estabilidade no paz laiha mak dezenvolve mos sei laiha, tamba ne’e husu ba PNTL atu servisu di’ak liu tan no tenke preparadu, tamba dezenvolvimentu ba oin, dezafiu no problema mos aumenta.
Iha parte seluk, PR Taur husu ba PNTL atu hametin relasaun diak ho komunidade hodi oinsa PNTL promove polisiamentu komunitária, atu nune’e komunidade sira mos fó sira nia kontribuisaun ba paz no estabilidade.
Nune’e mos PNTL tenke hadi’a servisu polísia tránzitu nian atu bele redúz asidente tráfiku ne’ebe akontese bebeik iha Nasionál nomos iha Munisípiu sira, tamba dala barak asidente tráfiku ne’e sempre hatudu númeru aas, tamba ne’e Prezidente no Nasaun preokupa ba kestaun ne’e.
“Tránzitu sira servisu hamutuk ho joven no univesrsitariu sira, dehan ba sira katak ita nia vida ne’e importante, ne la fa’an no la sosa iha merkadu, tamba Estadu presija ema ne’ebe iha saude di’ak atu bele kontribui ba Estadu, kada fulan estatístika ne’ebe Komandante fó númeru asidente aas, kanek, mate, mate liu fali funu ida, liman ain tohar liu fali tiru malu, ida ne’e mak Prezidente preokupa,” akresenta Prezidente Repúblika. Média PNTL.

Komando Operesaun Konjuto (KOK) existe dala ida tan tamba hare ba atentado Lalu-Lai, Baguia no Movimentos Grupos Ilegais (CRM-CPDRDTL) maka Estado Atraves Diretiva Politika liu husi Rezulusaun do Gov. No.11/2015 dia 9 de Março hodi autoriza Forsa Defeza no Polisia Nasional de Timor- Leste atu bele hala’o Opersaun Konjunto ho karakter militar hodi prevene no halakon grupos Ilegais no re-estbelese fila fali seguransa iha area teritorio Timor laran tomak liu-liu iha ponta leste. Grupo llegal ne’ebe existe no halo atendatu ka perturbasaun orden publiku maka hanesan[1]: Grupos Ilegais (CRM-CPDRDTL) ne’ebe exige liu husi Comunikasaun social hodi husu ba Presidente da Repúblika atu bele suspende Constituisaun RDTL hodi re-instituir Constituisaun de 1975. Nomos exitensia asosiasaun armada, militar, ka pramilitar ne’ebe la iha legitimidades husi Estado.

Haree husi aspeitu Juridico Tuir Constituisaun RDTL Artigo 43. N.o 3 proividu atu Labele iha Asosiasaun Armada, Militar ka para-militar no Organizasaun ne’ebe defende ideia ka dada ema ba Komportamento ho karakter rasista ka Xenófobu ka ne’ebe promove Terorizmo.[2] Signifika katak Kualker se deit maka tama iha asosiasaun armada, militar, ka paramilitar ne’ebe la iha legitimidade husi Estado ne’e krime kontra Estado, tamba refere rekezitus ne’ebe hakerek iha Codigo Penal Artigo 188 katak ema ne’ebe harí Organizasaun ka Asosiasaun, fo apoio, involve ka partisipa Organizasaun ilegal no xefia Organizasaun konsidera hanesan Krime[3].

Relasiona ho situasaun ne’ebe Akontese iha Baucau, iha dia 15 de Janeiro de 2015, Grupos CRM no CPRDTL halo Assalta ba membrus PNTL hodi hadau Pistola Glock 19 rua, Sunu Kareta PNTL nian ida, Hakanek PNTL nain rua iha Saelari-Laga. Grupos CRM no CPRDTL Kontinua halo Assalta ba Membrus PNTL no Presidente Parlamento Nasional. Akontesemento ne’e akontese iha dia 8 de Manço de 2015 ne’ebe resulta membrus PNTL nain hat kanek inklui eskoltu S.E. Presedente Parlamento Nasional, sunu sede Suku, no sunu Komunidade sira nia Kareta. Tan ne’e Orgaun Soberania Kondena atentado ne’e fo amiasas ba orgaun Soberania no Institusaun Estado nian.

Elimina ka deroga tiha Asosiasaun Armada, Militar ka para-militar no Organizasaun ne’ebe iligitimidade resista hodi fo Amiasas paz no estabilidades.Tamba ne’e Konseito ba Operasaun Konjuto nian maka; (1) Aplika forsa ne’ebe proporsional, Legalidade, Akuntabildade, no Nesesidade (2) Operesaun Psikologia, (3) Buska no Revista (4) no Elemina no Neutraliza Apoiantes hodi restora fila fali paz no estabilidade iha Timor laran tomak.[4]

Husu ba Autores sira, katak justisa maka dalan los hodi hetan verdade, volensia sei labele resolve Problema. Hakarak buka Verdade tenke kolabora ho Justisa, tamba ema hotu-hotu iha lei nia oin hanesan, Violensia laos solusaun ba Konflito no konsideira hanesan Krime. Husu ba Komunidades sira atu labele fo apoio grupos ilegais sira, tamba se deit maka fo apoio ba organizasaun ilegais, sira partisipa mos krime. Dalan diak ba ita hotu maka kopera ho autoridades Estado hodi garante liberdade, paz no estabilidade. PNTL no F-FDTL maka ita nia forsa ne’ebe Asegura no promove Estado Direito, Estado Demokratiku no Estado Soberania.

Tuir Matenek nain sira haktuir katak “Justisa so bele lao tuir nia dalan kuando ema hotu-hotu kumpri nia regras, ho ida ne’e justisa ne’ebe ema hotu buka sei sai justu”. Tamba ne’e dalan diak ba Grupos Ilegais sira maka tenke kolabora ho Justisa. Ezijensia Grupu MM sei la alkansa, tamba tuir normas iha Constituisaun Repúblika katak Orgaún ne’ebe iha púder atu halo revizaun ba Constituisaun maka Parlamento Nasional.[5] Nune’e mos Orgaún ne’ebe iha poder politika hodi dezolve Parlamento no Governo maka Presidente da Repúblika, tuir rekezitus ne’ebe iha normas legais Constituisaun nian katak Presidente bele dezolve Parlamento no Governo tamba iha krize Institusional grave, ka Parlamento la aprova Orsamentu Estado liu husi 60 dias.[6]

Governo nia demisaun akontese tenke tuir rekezitu sira ne’ebe iha konstituisaun haruka, katak Governo nia demisaun bele akontese wainhira iha Legislasaun foun ka Presidente Repúblika simu pedido husi Premeiro Ministro atu demite ka Premeiro Ministru mate ka hetan imposibilidade fisika permanente ka Guverno hetan Rejeitasaun ba nia programa ba dala rua tuir malu no/ka votu dekonfiansa la hetan aprovasaun[7]. Tamba ne’e defisil atu alkansa objetivo grupo CRN no CPD-RDTL. Diak liu mai kolabora ho justisa atu bele hetan verdade no lia loos.

    Dili–  Klinika Polisia Nasional Timor Leste (PNTL) lansa kampaña hodi prevene moras dengue tamba moras ne’e perigu ba ema nia vida, tamba ne’e PNTL mos iha inisiativa ida atu oinsa bele prevene ba moras ne’e. Iha lansamentu ba kampaña ne’e, Segundu Komandante Jeral PNTL, Komisariu Faustino da Costa hateten, programa ne’e inisiativa husi Doutor Klinika PNTL rasik atu oinsa bele prevene ba moras refere. “Programa ida ohin ita halo ne’e ideia ida hanoin ida husi Doutor Klinika PNTL nian, katak ita haree ba moras dengue, moras ida ne’ebe nia númeru aas, atu oinsa para Instituisaun PNTL atu prevene no bele redús ba númeru moras ne’e, komando sempre fo apoiu ba atividade saida deit mak PNTL hala’o ba interese komún,” afirma Komisáriu Faustino ba jornalista sira iha Kuartel Jerál PNTL, Caicoli-Dili, Sesta (08/05/2015). Iha parte seluk Xefe Klinika PNTL Inspetor Xefe Abilio de Araujo Gonçalves hateten oinsa atu halo prevensaun ba moras ne’e, parte Klinika PNTL prepara ona broxura atu bele fahe informasaun ba membru PNTL sira iha Munisipiu nomos iha Postu Administrativu hotu. “Ohin ne’e halo abertura no ba oin ami sei prodúz broxura ne’e hodi fahe ba kada Komandu PNTL iha Munisipiu nomos ba Postu Administrativu sira atu nune’e sira mos bele hatene oinsa bele prevene ba moras dengue ne’e,” Xefe Klinika ne’e hatutan, iha klinika PNTL rasik seidauk detekta pasiente ne’ebe hetan moras dengue, maibe akompaña liu husi média katak moras dengue mos númeru aas iha Timor Leste liu-liu iha sidade Dili, tamba ne’e PNTL mos iha ona klinika rasik atu oinsa bele prevene. Entertantu abertura ba lansamentu ne’e loke direita husi Segundu Komandante Jerál PNTL, Komisariu Faustino da Costa, ne’ebe akompaña husi Xefe Seksaun Jéneru PNTL, Superintendente Assistente Umbelina Soares, Xefe Klinika PNTL Inspetór Xefe Abilio de Araujo Goncalves, no partisipa iha atividade ne’e mak Xefe Departamentu, Seksaun no membru sira iha Kuartél Jerál. Média PNTL.