News

DILI – Primeiru Ministru Portugal, Pedró Passos Coelhó hakfodak no admira tebe-tebes ba progressu Intituisaun Polísia Nasionál Timor-Leste (PNTL), tanba Timor-Leste foin mak ukun-an ho idade sei ki’ik maibe servisu no fasilidade PNTL lao ba oin ho diak ho professional. PM Portugal Pedró Passos Coelhó hato’o asuntu ne’e wainhira hala’o vizita ofisiál ba Sentru Formasaun Polísia Comoro hodi hare progressu Polísia Nasionál Timor-Leste (PNTL) hakat dadaun ne’ebe hetan apoiu husi Portugal, liu husi Guarda Nasionál Portugal (GNR). Iha vizita PM Portugal ne’e simu husi Komandante Jerál PNTL, Komisáriu Polísia DR. Longuinhos Monteiro ho ofisiais sira Kinta, (24/7/2014). Primeiru Ministru Portugal (PM) Pedró Passos Coelhó iha nia diskursu hatete, iha Portugal prosesu atu hadia polísia lori tinan atus hat resin mak foin bele hetan polísia professional, maibe Timor-Leste foin mak hetan Independensia ho Polísia nia idade foin mak tinan 14 komesa hakat dadaun ona ba oin ho kualidade no fasilidade sufsiente. “Hau admira tebes hare dezenvolvimentu ne’ebe lao dadaun iha Timor-Leste nune’e mos dezenvolimentu polísia nian mos lao diak progressu. Portugal nafatin nasaun maun-alin ho Timor-Leste iha dezenvolvimentu,”dehan PM Portugal Pedró Passos Coelhó. Komandante Jerál PNTL, Komisáriu Polísia DR. Longuinhos Monteiro hatete, lori governu TL nia naran hato’o agradesementu tomak ba apoiu ne’ebe governu Portugal fó, liu husi intedementu iha 2011. “Ita espera katak, politika ne’ebe Timor-Leste no polísia difini para atu bele hamosu uniundu ho kareteristika no natureza polísia Timor ninian. Ita bele konta katak, ho formasaun ne’ebe hetan ita espera katak ba iha futuru polísia ne’ebe kredivel ne’ebe hetan konfiansa boot husi povu rasik,”dehan Komisáriu Polísia DR. Longuinhos Monteiro. Komandante Jerál PNTL, Komisáriu Polísia DR. Longuinhos Monteiro, fiar katak, ba iha futuru PNTL ho ninia kna’ar  tomak sei garantia liberdade, trankualidade no seguransa ba povu Timor-Leste.Kooperasaun PNTL nian laos deit husi Portugal maibe ho nasaun sira ne’ebe mak sai amigu ho Timor-Leste tuir polítika estadu ninian. Komandante Sentru Formasaun Polísia, Superintende Xefe Polísia Julio Hornai iha nia diskursu hatete, liu husi kooperasaun bilateral ne’ebe governu Timor-Leste halo ho governu Portugal atraves ajuda tebes PNTL iha prosesu konkursu públiku nomos ba selesaun, kursu formasaun ba ajente PNTL, kursu manutensaun orden públika no treinamentu ba Unidade Espesiál Polísia. “Durante GNR hamutuk ho ami iha Sentru formasaun ne’e iha komunikasaun diak no iha duni pasu pozitivu, ami husu apoiu ne’e labele para iha ne’e deit, maibe kontinua ba oin ho formasaun oioin iha future,”dehan Superintende Xefe Julio Hornai. Mídia PNTL  

Dili – Prezidente Republika (PR) Timor-Leste Taur Matan Ruak inagura Ponte Comoro I no II ho naran ponte CPLP hodi fo omenajen ba membru nasaun CPLP hodi hetan libertasaun no independensia. Inagurasaun ponte ne’e hala’o iha loron tersa feira (22/07/2014), iha diskursu PR Taur Matan Ruak hateten, ponte ne’e hanesan simbolu hodi halibur povu no nasaun iha mundu, halo ema sai ida de’it, no hanoin ida de’it. “Ponte ida ne’e liga ita ba nasaun hotu ne’ebe koalia lian portuges ne’ebe luta maka’as hodi hetan ninia liberdade no independensia, ponte ida ne’e sai simbolu hodi halibur povu no nasaun sira iha mundu halo ema ida deit, hanoin ida deit, neon ida deit, ponte ida ne’e nu’udar simbolu ne’ebe liga ita ba pasadu, ita nia istoria, ita nia identidade, ponte ida ne’e tau naran CPLP hodi fo omenajen ba nasaun sira hotu ne’ebe ko’alia lian Portugés ne’ebe iha ligasaun boot ho ita nia nasaun ho ita  nia povu”. Afirma PR Taur Matan Ruak. Ponte ne’e halo husi kompañia Wika-Indonezia ho Consorsiu Nasional Timorense (CNT), ne’ebe ho nia naruk metru 180 no largura metru 9, ho gasta orsamentu hamutuk $19 miloens. Hafoin asina plaka husi PR Timor-Leste, Amu Bispo Dioseze Dili, Dom Alberto Ricardo da Silva fó bensa ba ponte refere, no serimonia ne’e la’o ho di’ak tamba hetan siguransa másimu husi Polisia Nasional Timor Leste (PNTL). Entertantu serimonia inagurasaun ne’e dirije direita husi Prezidente Republika Taur Matan Ruak, akompaña husi Primeiru Ministru Xanana Gusmão, Xefe Governu, Xefe Estadu no delegasaun sira husi nasaun membru CPLP, Ministru Obras Publikas, Prezidente Kompañia Consorsiu Nasional Timorense (CNT), reprezentante Governu no Estadu Timor-Leste, membru Parlamentu Nasional, organizasaun Nasional no Internasional, media nasioal no internasioal, no komunidade. Mídia PNTL.

DILI – Komandante Jerál Polísia Nasionál Timor-Leste (PNTL), Komisáriu Polísia Dr. Longuinhos Monteiro fó avizu ba públiku katak, aban loron 22 Jullu 2014, hahu tuku 15:00 to’o tuku 20:00 OTL  dalan husi rotunda Comoro, estatua Prezidente  Nicolao Lobato to’o Timor Plaza sei taka ba públiku, tanba inagurasaun ponte Comoro ne’ebe sei hanaran ponte CPLP. Avizu públiku ne’e, Komisáriu Polísia Dr. Longuinhos Monteiro hato’o ba jornalista sira, bainhira tun ba haree  fatin ba inagurasaun  ponte Comoro. “Husu ba públiku atu koopera tanba iha ita nia nasaun iha semana ida ne’e nia laran sei eventu internasionál simeira CPLP, no mos hasai tiha ona karta ofisial katak fó toleransia de pontu iha loron Tersa no Kuarta ba funsionáriu públiku.” Apela Komandante Jerál PNTL. PNTL sei koordena ho Diresaun Nasionál Transponrte Terrestres (DNTT) hodi kontrola transporte  rodoviariu iha Dili laran, liuliu iha parte Colmera no transmiti  kualker mudansa  orariu, liuliu kona-ba desviu movimentu transporte públiku. Nune’e mos iha loron 23 Jullu sei taka estrada ba públiku hahu husi parte Otel Timor to’o área branka, Kristu Rei. “Ba públiku sira, karik iha loron rua ne’e la iha atividade importante, hakmatek iha uma atu nune’e evita engarrafamentu,”dehan Komisáriu Polísia Dr. Longuinhos Monteiro. Mídia PNTL

DILI – Komandu Jerál Polísia Nasionál Timor-Leste (PNT) koloka membru 800 hodi fo seguransa durante hala’o konferénsia Internasionál Simeira Comunidade Páis Língua Portuguesa (CPLP) ba dala-X, ne’ebe sei hala’o iha Timor Leste durante semana ida, hahú husi loron loron 17 Jullu to’o 23 Jullu tinan ne’e. Entertantu molok atu hala’o simeira ne’e, PNTL hala’o parada preparativu seguransa iha Kuartél Jerál PNTL, Caicoli-Dili Tersa (15/7/2014), hodi koloka membru PNTL sira ba fatin hirak ne’ebé identifika ona hanesan Hotel, Aeroportu, Ministériu Negósiu Estranjeiru, nomos área sira seluk ne’ebé iha kategoria ba dalan protokolu. Serimonia parada preparativus ne’e, dirije direitamente husi Komandante Jerál PNTL, Komisáriu Dr. Longuinhos Monteiro, no iha ninia diskursu hatete “hahú ohin ba oin, laiha tan adisional, kada departamentu no unidade servisu atu rekere, tanba preparativu fulan ida tiha ona, signifika katak Komandu sei la verifika tan kapasidade auto intelijénsia husi kada komponente ne’ebe sei destaka hodi apoia segurasa ba simeira CPLP”. Komandante Jerál PNTL, Komisáriu Longuinhos hatutan, polísia sei asegura seguransa ba simeira ne’e tamba apoiu mos husi Forsa F-FDTL ba atividade operasionais, tamba responsavel seguransa mai husi tutela ida iha komponente estadu ne’e nian. Iha okaziaun ne’e, Komisáriu Longuinhos Monteiro apela katak “Ha’u lakohi rona dezintendementu servisu iha terenu ne’ebe mosu entre polísia ho polísia, nune’e mos evita dezentendementu entre polísia ho responsavel protokolu Ministeríu Negosiu Estranjeiru, no tenke hatudu disiplina no profesionalizmu.” Iha biban ne’e, Komandante Operasaun Nasionál, Superintendente Xefe Armando Monteiro ba jornalista hateten, liu husi reuniaun Komandu Jeral katak, PNTL sei koloka membru polísia hamutuk 800 ba terenu durante simeira CPLP, membru 500 sei involve direita no membru 300 alerta hodi fo apoiu, karik iha kualker indikasaun aktus krime mosu, membru 300 ne’e prontu hodi halo intervensaun ne’ebe hetan apoiu husi Komandu Distritu Dili. Komandante Operasaun Nasional, Armando Monteiro hatutan, kondutór ba Xefi Estadu husi nasaun CPLP sei responsável husi Forsa F-FDTL, no ba Xefi Governu, Xefe Parlamentu no delegasaun sira sei responsável husi PNTL. Serimonia parada preparativus ba siguransa simeira CPLP ne’e dirize direitamente husi Komandante Jerál PNTL, Komisáriu Polísia Dr. Longuinhos Monteiro, no partisipa mos husi Xefe Estadu Maior F-FDTL, Koronel Falur Rate Laek, no kolokasaun membru PNTL hamutuk 800 ne’e hahú husi loron 15 Jullu no sei retira iha loron 24 Jullu 2014. Mídia PNTL.

DILI – Atu tama ba enkontru Internasionál Semeira Communidade Páis Língua Portuguesa (CPLP) ne’ebe realiza iha loron 17 to’o 23 Jullu, Unidade Tránzitu Nasionál hahú iha loron 15 Juñu to’o 26 Jullu tinan ne’e halao operasaun (check point-red) ba ba transporte públiku liu-liu ba taxi sira mak halao movimentu iha kapital Dili. Komandante Tránzitu Nasionál, Inspektór Xefe Antonio L.C. Soares ba Relasaun Públika PNTL Kuarta, (9/7) iha nia servisu fatin hatete, objetivu halo operasaun ne’e hodi regulariza kondutór taxista sira alende ne’e mos hodi kontrola ba movimentu transporte públiku. Iha operasaun ne’e hare liu ba kondisaun taxi ninian hanesan ahi oan, sapa, karta kondusaun no kondutór sira ne’ebe mak la uza farda, tuir regulamentu kondutór taxista sira iha farda kompletu, farda ne’e tenki uza wainhira buka pasajeirus. Liu husi operasaun ne’e Unidade Tránzitu konsege kaptura kondutór ne’ebe mak la iha karta kondusaun no uza karta kondusaun falsu. Ba kazu rua ne’e kategoria krime, kondutór tenki kastigu iha sela detensaun 72 oras depois lori ba Ministériu Públiku hodi tuir prosesu hearing iha Tribunal Distrital Dili. “Ami prende taxisita kuaze 60 resin mak la uza farda no kaptura taxista nain 3 tanba halo falsifikasaun karta kondusaun. Taxista sira mak la uza farda sei selu multa iha Dirasaun Nasionál Transporte Trestres (DNTT) no falsifikasaun karta kondusaun konsedera krime,”esplika Inspektór Xefe Antonio L.C. Soares. Mídia PNTL  

DILI – Atu asegura ambiente moos no saudavel liu-liu iha sidade Dili, funsionariu husi kada Ministériu, organizasaun, Instituisaun akadémiku, komunidade, inklui instituisaun Falintil Forsa Defeza Timor-Leste (F-FDTL) no Polísia Nasionál Timor-Leste (PNTL) hala’o limpeza jerál iha sidade Dili, iha loron sesta feira (11/07/2014). Iha loron sesta feira ne’e, funsionáriu husi kada Ministériu, estudantes, komunidade, no Instituisaun sira seluk hala’o limpeja iha sidade Dili tuir oráriu husi Ministériu Administrasaun Estatal nian ne’ebé iha tinan kotuk aprova ona hodi hala’o limpeja jerál iha loron sesta feira, maibé limpeja ne’e la’o ladun másimu. PNTL la’os fo seguransa de’it ba komunidade sira, maibé nu’udar Instituisaun Estadu ida, fó mos ninia kontribuisaun hodi hamoos fo’er ne’ebé mak husi loron ba loron kontinua naklekar iha sidade Dili, hodi fó impaktu moras ba saude ema ida-idak nian. Entertantu iha limpeja ne’e, PolísiaNasional Timor-Leste (PNTL) hala’o limpeja jerál iha Suku Becora hahú husi Terminal to’o merkadu Taibesi durante oras tolu nia laran. Limpeja jerál iha sidade Dili hodi asegura ambiente moos hodi simu bainaka espesial ba konferensia simeira CPLP ne’ebé sei realiza iha loron 17 to’o 23 Juñu tinan ne’e iha Timor-Leste. Mídia PNTL.

DILI – Sekretariu Estadu Seguransa ( ses), Fransisco Guterres to’o oras ne’e sei hein hela lei seguransa social hosi menisteriu solidaridade social ( MSS )mak foin halo reforma ba membru Polisia Nasional Timor Leste ( PNTL ) kuaje 200 nebe mak katuas ona. SES,Fransisco argument, lei rejime tranzitoriu husi parlamento Nasional (PN)aprova tiha ona,maibe sei hein tan lei seguransa social hosi MSS mak foin halo reforma ba memmbru polisia sira. “ida ne’e kuandu aprova ona mak ami foin hahu prosesu tranzisaun ba polisia kona ba kestaun reforma,tanba buat barak mak percisa ita tenki resolve,” hatete Fransisco ba jornalista sira iha palasiu Governu,Dili Tersa( 24/06).”ami halo ona enkontru ne’e dalarua.dala ida ha’u nia tekniku no segundu ha’u rasik mak ba hasoru hodi ko’alia ho sekretariu estadu seguransa social .ami diskuti uituan kona-ba lei ne’e atu ba resolve mos kestaun balu kona ba reforma,” hatete fransisco.nia hatutan rasaun tan sei hein lei seguransa social MSS ho intensaun atu buka no diskuti hela artigu balun iha lei ne’e atu bele resolve netik problema balun iha PNTL laran. “PNTL  ita tenki tama iha prosesu normal ne’e  hakarak dehan ida ne’ebe reforma ne’e sai no ida ne’ebe mak tama ne’e tama para kareira ne’e nafatin. Nune’e ita komesa tama ona iha prosesu iha siklu normal,” Fransisco haktuir. Vantajen lei ne’e di’ak teb-tebes tanba lei ne’e kontributivu,signifika sidadaun hotu iha rai laran persija tebes lei ne’e atu hetan seguransa social. Fontes Timor Post .(10/07/14)

DILI –  Asistente Administrador no Diretór Gabinete Rejional ba Azia Pasífiku ba Programa Nasoins Unidas ba Dezenvolvimentu (UNDP) HAOLIANG XU hala’o vizita ofisial ba PNTL hodi haree ba progresu no dezafiu ne’ebé infrenta, liu husi kooperasaun UNDP ho Polísia Nasional Timor-Leste (PNTL) durante ne’e. “Ha’u nia objetivu mai vizita iha PNTL ne’e atu hatene rezultadu kooperasaun entre UNDP ho PNTL durante ne’e, liu-liu programa saida mak UNDP apoiu ba PNTL. Iha sorumutu ne’e, ami ko’alia liu kona-ba kapasitasaun ba membru PNTL sira iha área administrasaun, rekursu umanus, lojistika, Teknolojia Informátika, relasaun públika, prokuramentu, finansas no seluk tan, no liu husi diskusaun ne’e, parte PNTL apresia tebes ba programa husi UNDP nian”. Informa Diretor Gabinete Rejional ba Azia Pasífiku UNDP Haoliang Xu ba jornalista sira hafoin hala’o enkontru ho Segundu Komandante Jerál PNTL, Komisáriu Afonso de Jesus iha Kuartél Jerál PNTL Caicoli-Dili, kinta feira (10/07/2014). Hatan ba pergunta kona-ba observasaun ba seitor seguransa iha Timor-Leste, Diretór Rejionál UNDP Haoliang Xu hateten, iha tinan 2006 Timor-Leste hasoru situasaun tranzisaun nia laran, no iha tinan 2012, Polísia Nasoins Unidas (UNPOL) entrega poder tomak ba PNTL hodi fó seguransa ba povu Timor-Leste, ida ne’e situasaun ne’ebé todan teb-tebes iha tempu ne’eba, maibé konsege ultra passa. Eis Jestor no Vise Senior Reprezentante Rezidente UNDP nian iha Timor-Leste husi tinan 2002-2004 ne’e hatutan, sira sei fó nafatin apoiu hodi fó kapasitasaun ba área hirak ne’ebe PNTL presiza, nomos ba Estadu no Governu Timor-Leste nia programa hodi bele dezenvolve di’ak liu tan prosesu dezenvolvimentu iha Timor-Leste. Iha parte seluk, Segundu Komandante Jerál PNTL, Komisáriu Afonso de Jesus hateten, nia parte fó agradese ba UNDP tamba durante ne’e sira fó duni sira nia apoiu másimu ba Instituisaun PNTL, maibé husu mos ba membru PNTL sira atu uza oportunidade ho didi’ak hodi bele hatene kona-ba kapasitasaun ne’ebé parte UNDP fó, atu nune’e iha futuru bele hala’o servisu di’ak liu tan. “Hanesan ita boot sira hatene, UNDP hanesan parseiru ida ba PNTL, ne’ebé durante ne’e fó apoiu kapasitasaun ba membru PNTL sira liu-liu iha área administrasaun, rekursu umanus, lojístika, IT, no relasaun públika, tamba ne’e mak sira mai iha ne’e atu haree progresu servisu UNDP nian, liu-liu staff Internasional no Nasional sira ne’ebe koloka ba área hirak ne’e”. Informa Komisariu Afonso de Jesus. Iha sorumutu ne’e, parte PNTL husu mos ba Diretor Rejional UNDP katak, iha futuru PNTL sei presiza nafatin apoiu husi membru (staff) UNDP sira atu bele ajuda nafatin liu-liu iha área IT hodi bele dezenvolve di’ak liu tan IT iha nível nasional to’o distrital. Entertantu iha sorumutu ne’e, Diretór Gabinete Rejionál UNDP Haoliang Xu akompaña husi UN Resident Coordinator & UNDP Resident Representative, Knut Ostby, no UNDP Country Director, Noura Hamladji, no parte PNTL nian mak Segundu Komandante Jerál PNTL, Komisáriu Afonso de Jesus. Mídia PNTL.  

DILI –  Komandu Jerál PNTL fó Promosaun deviza ba ofisiais Saude-PNTL hamutuk na’in 5 (lima) iha Kuartel Jerál PNTL-Caicoli-Dili, segunda feira (07/07/2014). Ofisiais na’in 5 ne’e hetan promosaun ba deviza bazeia ba proposta husi Segundu Komandante Jerál, Komisáriu Afonso de Jesus ne’ebé relasiona ho Dekretu Lei nú.16/2009 kona-ba rezime promosaun ba PNTL, iha artigu 8. Komandu Jerál PNTL hasai orden promosaun ba ajentes polisia ne’ebe remata ona sira nia estudu iha área medisina hamutuk na’in 5 mak hanesan: Armindo Pinto nu’udar Ajente Prinsipál promove ba Inspektur Asistente, Francisco Pinto Ajente Prinsipál promove ba Inspektur Asistente, Mateus Pinto nu’udar Ajente Xefe promove ba Primeiru Sarjentu, Armando Araujo nu’udar Ajente Xefe promove ba Primeiru Sarjentu, no Orlando Alves Ajente Prinsipál promove ba  Primeiru Sarjentu, no orden promosaun ne’e hahú efetivu husi loron 01 fulan Jullu 2014. Iha serimónia orden promosaun ba ajente na’in lima ne’e, Komandante Jerál PNTL, Komisáriu Dr. Longuinhos Monteiro iha nia diskursu hateten, agora dadaun Komandu Jerál diskute hela ho Komisaun Funsaun Públika (KFP) hodi ko’alia kona-ba estatutu médiku PNTL nian, relasiona ho proposta husi KFP katak sé mak sai médiku profisionais saude sei husik ninia instituisaun ne’ebe tutela liu-liu PNTL no F-FDTL hodi ba tama iha Ministériu Saúde nian. Ho nune’e, Komandante Jerál no Segundu Komandante Jerál PNTL sei ba diskute ho KFP hodi mantein nafatin ninia pozisaun katak estatutu profisionais saude liuliu médiku sira sei la lakon mos ninia estatutu PNTL, tamba PNTL sei la fo dalan ba médiku PNTL sira atu eskolla, karik eskolla mak iha opsaun rua de’it:“karik ba tama iha Ministériu Saúde sei husik Instituisaun PNTL, ou mantein nafatin iha PNTL hodi hala’o mos kna’ar hanesan médiku”. Akresenta Komandante Jerál Longuinhos Monteiro. Hafoin serimonia orden promosaun ne’e, Segundu Komandante Jerál PNTL, Komisariu Afonso de Jesus iha ninia entrevista ba jornalista sira hateten, “promove sira la’os tamba atu okupa pozisaun maibe promove sira tamba sira nia estudu espesialidade iha área medisina nian, tamba ne’e mak promove sira atu hala’o sira nia kna’ar hanesan ema médiku ida, sira na’in 5 ne’e, na’in 2 ba inspektur asistente tamba remata ona sira nia estudu iha lisensiatura ba Doutor nian, no nain 3 ba primeiru sarjentu tamba remata ona sira nia estudu iha Baxarelatu ba enfermeiru”. Entertantu, hatan kona-ba funsionamentu klínika PNTL nian, Komisáriu Afonso hateten, sira iha papel importante iha PNTL, kada fulan 3 sira ba distritu hodi konsulta membru PNTL sira, maske sei infrenta difikuldade ba fasilidade. Ikus liu, Segundu Komandante Jerál Afonso apela ba membru PNTL hotu katak ida-idak hala’o nia kna’ar maibe tenke hare’e mos ba ninia saúde, tamba saude di’ak mak hala’o kna’ar, bainhira moras todan tiha mak ba konsulta bele fó impaktu negativu ba ema ida-idak nia moris. Mídia PNTL.  

DILI –  Polísia Nasionál Timor-Leste (PNTL) hala’o enkontru ho Komisaun B Parlamentu Nasionál (PN) ne’ebé trata asuntu Defeza, Seguransa no Negósiu Estranjeiru hodi ko’alia kona-ba progresu no dezafiu ne’ebé mak PNTL hasoru iha pasadu, prenzente no futuru.

Enkontru ne’e parte PNTL prezidi husi Komandante Jerál PNTL Komisáriu Dr. Longuinhos Monteiro no parte Komisaun B Parlamentu Nasionál, prezidi husi Prezidente Komisaun B, Deputadu David Dias Ximenes, hahú husi oras 09.00 dader to’o 16.30 Lorokraik OTL iha salaun Konferénsia Kuartel Jerál PNTL Caicoli-Dili, Kinta feira (03/07/2014).

Objetivu husi enkontru ne’e parte komisaun B PN hodi rona esplikasaun kona-ba pontus intervensaun PNTL nian kona-ba kestaun orsamentu, pesoál armamentu, lojístika, no sst, no vijita ida ne’e bele esklarese situasaun reál hanesan kapasidade no difikuldade PNTL nian nu’udar instituisaun ne’ebé tutela seguransa ba Estadu Timor-Leste.

“Ha’u fiar katak Deputadu sira sai husi ne’e ho informasaun ne’ebé Komandu transmiti hodi responde ba dúvidas ne’ebé Deputadu sira iha durante iha sira nia fiskalizasaun iha área distritais, ao mesmo tempo lori ksolok ba Komandu Jerál PNTL tamba ho vijita ida ne’e bele iha esklarese ne’ebé barak no bele habelar liu tan servisu misaun ba instituisaun 2 (rua) hanesan Parlamentu Nasionál nu’udar fiskalizadór no PNTL nu’udar implementadór ba kestaun seguransa.” Esplika Komisáriu Longuinhos Monteiro.

Iha okaziaun ne’e, Komisáriu Longuinhos Monteiro informa katak, Komisaun B Parlamentu Nasionál husu mos preparasaun PNTL nian atu responsabilidade seguransa ba simeira CPLP ne’ebé sei halo iha fullan Jullu ne.

Entertantu, hafoin hala’o inspesaun, Prezidente Komisaun B Parlamentu Nasionál Deputadu David Dias Ximenes hateten katak, husi vijita ne’e hodi haree situasaun PNTL nian iha parte rekursu umanu, kapasidade, no fasilidade.

Liu husi vijita ne’e fó mos korazem ba servisu PNTL nian hodi fó seguransa ba komunidade sira ho diak no profesional tamba iha fatin hotu-hotu presiza polísia nia prezensa.

Prezidente Komisaun B Deputadu “Mandati” apela ba Polísia sira katak, Polísia la’os funsionáriu públiku, tamba ne’e tenke prontu 24 oras, no hakarak tama polísia mak ne’e; “O prontu para kumpri mak Estadu sei haree O nia fasilidade sira ne’e”.

Hafoin hala’o enkontru, Deputadu husi Komisaun B ho nia delegasaun sira akompaña ho Komandante Jerál PNTL ho nia Komandante Unidade sira ba hala’o inspesaun direita ba fatin hirak mak hanesan lojístika, ofisina, farmásia, mekánika no sei hala’o mos inspesaun ba Unidade Espesiál Polísia, no sub Unidade BOP iha loron 9 Jullu 2014.

Lori Komandu PNTL nia naran, Komisáriu Jeral PNTL Dr. Longuinhos Monteiro mos hato’o agradesimentu ba Prezidente Komisaun B PN ho nia delegasaun tomak ne’ebé mak fó sira nia tempu ba servisu importante ida ne’ebé asume ninia misaun nu’udar defensór no protetór ba interese seguransa sidadaun Timor-Leste nian. Mídia PNTL.