News

Dili- Komandu Polisia Nasional Timor-Leste (PNTL) munisipiu Dili kontinua reforsa patrulhamentu lao ain iha tempu kalan atu nune’e bele deteta no kaptura grupu organijadu hirak ne’ebe maka hadau ema nia telfone no krime seluktan.

Komandante PNTL munisipiu Dili Superintendente Xefe Polisia Orlando Gomes hateten Komandu munisipiu Dili la nonok ho situasaun ne’ebe maka akontese maibe ami halo esforsu tomak no halo ona planu operasaun espesifiku ba ida ne’e atu reforsa patrula lao ain iha tempu kalan iha fatin hirak ne’ebe maka ita konsidera risku, Nia hato’o asuntu ne’e ba Jornalista sira hafoin partsipa abertura Formasaun ba OPS munisipiu Dili iha Salaun Tower Fatuhada Dili, kuarta (27/07).

Nia hatutan Ami fahe ona ekipa, no lansa ona membru sira hodi tun ba iha terrenu atu halo monitorizasaun ba situasaun no identifika ona ema sira ne’ebe kria grupu hodi naok ema nia telfone, PNTL identifika ona katak grupu ida ne’e organizadu, Ami identifika mos sira nia fatin no ami sei kaer sira.

Kazu hadau telfone ne’e konsidera hanesan grupu organijadu tanba sira lansa ona sira nia ema iha fatin-fatin atu hadau telfone tanba ne’e maka kuandu ami reforsa makaas sira ses husi fatin balu ne’ebe maka bai-bain sira halo asaun ba fali fatin seluk.

Iha ona vitima sira ba hato’o keisa iha Eskuadra sira no Intelijen mos nafatin buka tuir sira atu bele responsabilija ba sira nia hahalok. Polisia identifika ona sira nia fatin balu no ita sei halibur evidensia hodi foti asaun.

“Ami sempre Haruka membrus hotu ba iha fatin hirak ne’ebe maka risku atu halo prevensaun ba krime hirak ne’ebe maka mosu. Polisia lao nafatin hodi kontrola ema hirak ne’ebe maka hanoin aat ba ita nia rai no estraga ita nia situasaun ami prontu atua sira, kuandu ami identifika halo kapturasaun hodi prosesu tuir lei ne’ebe maka vigora,” dehan Komandante.

Alende ne’e iha Planu Operasaun Seksaun Tranzitu halo mos Auto Stop iha tempu loron no kalan hodi halo Sweeping ba iha fatin hirak ne’ebe maka iha movimentu transporte la uza asesoria tanba ne’e maka ita halo Pasa Revista (checkpoint) hodi hare dokumentus, asesoria transporte motor no kareta hodi eduka sira atu kumpri lei tranzitu no impoin regras tanba ne’e maka sira selu multa(Koimas) wainhira sira la kumpri atu nune’e sira bele hadia erru ne’ebe maka sira halo, auto stop mos iha objetivu atu normaliza engarafamentu liu-liu iha mini merkadu sira.

Hau iha ona planu atu nune’e iha oras ne’ebe maka iha engarafamentu koloka membru iha neba atu normaliza fali dalan hirak ne’e atu transporte lao ba mai livre, ida ne’e maka Komandu munisipiu halo hela.

Ligadu ho komfrontus arte marsiais iha area Beto ne’ebe maka sempre akontese iha komunidade nia leet iha tempu kalan no halo komunidade labele deskansa ho diak, Komandante munisipiu Dili fo ona ordem ba Komandante Eskuadra Dom Aleixo liu-liu iha Gan LAFAEK ne’ebe mosu problema no bolu ona Lider Arte Marsiais PSHT no Kera-Sakti sira ne’ebe responsabiliza iha bairu ne’eba atu mai hasoru hau hodi simu orentasaun atu kontrola sira nia membru, kuandu hatene organiza maka tenke hatene kontrola membru sira ne’ebe maka sempre halo provokasaun.

Atu hakotu eis komandante UEP ne’e afirma ba lider Arte Marsiais sira iha bairu ida-idak tenke kontrola nia membru sira, tanba ne’e maka Hau bolu lider mai iha Komandu Dili atu simu orentasaun atu bele kordena ho membru sira atu kontribui ba seguransa, paz no estabilidade iha sira nia bairu rasik. hotu-hotu tenke kontribui no wainhira membru ruma komete erru ou halo krime maka sira nia lider maka ba buka sira hodi entrega ba autoridade seguransa, ne’e nudar responsabilidade atu kontribui ba paz no justisa. Media PNTL

Dili- Fundasaun Azia (TAF-sigla ingles) fo formasaun ba Ofisial Polisia Suku (OPS) munisipiu Dili no membru Unidade Pessoa Vulneravel (VPU-sigla ingles) hodi hasae sira nia konyesmentu konaba oinsa atende feto no labarik ne’ebe maka sai vitima violensia domestika.

Segundu Komandante Jeral PNTL Komisariu Polisia Pedro Belo hateten ita orgulu no agradese ba parseru TAF ne’ebe servisu hamutuk ho MSS no Programa NABILAN hodi fo formasaun konaba oinsa atende violensia hasoru feto no protesaun ba feto no labarik sira tanba OPS maka iha linha frente tanba ne’e presija iha konyesmentu ne’ebe maka diak oinsa bele hakbesik ba komunidade liu-liu feto no labarik sira, Nia hato’o asuntu ne’e iha serimonia abertura formasaun iha Salaun TOWER Fatuhada Dili, kuarta (26/07).

Nia hatutan iha formasaun durante loron tolu (26-29) jullu, imi sei aprende konaba oinsa hakbesik ba vitima sira, halo relasaun diak ho labarik sira, noo uza oportunidade ne’e hodi aprende ho diak no inplementa iha imi nia knar lor-loron nian.

OPS servisu hamutuk ho Autoridade Lokal, Veteranus, parte Igreja no ema inportante sira iha suku laran kuandu imi servisu hamutuk ho diak no imi hatudu imi nia imparsial no neutru iha komunidade nia let maka violensia hirak hanesan ne’e fasil ba ema atu hato’o sira nia problema ne’e ba ita Wainhira OPS sira hetan kazu Violensia Domestika iha suku laran maka Imi lori ba entrega iha VPU hodi halo prosesu.

“Atu hametin konfiansa vitima sira nian ba Polisia maka instituisaun PNTL iha nia politika rasik hodi tau membru PNTL femenina iha unidade VPU atu nune’e vitima sira bele sente seguru no konfiavel hodi hato’o sira nia problema hanesan feto ho feto koalia ba malu,”dehan Komisariu.

Iha oportunidade ne’e Komisariu Pedro Belo husi ba Ofisial Polisia Suku no Ofisial Polisia Eskola sira atu lor-loron vizita komunidade sira husi uma ba uma hodi hakbesik an ba sira atu nune’e bele identifika problema ne’ebe maka sira hasoru liu-liu iha familia,

Entretantu Komandante PNTL munisipiu Dili Superintendente Xefe Polisia Orlando Gomes hateten liu husi formasaun ida ne’e bele hasae abilidade no konyesmentu OPS sira nia atu bele halao servisu ho diak no fo atendementu ba vitima ho kualidade hodi fo protesaun ba komunidade, feto ho labarik sira ne’e maka sai vitima ba violensia.

Nia hatutan OPS hamutuk ho Xefe suku sira hodi halo atendmentu ba komunidade no hare problema ruma ne’ebe maka akontese iha komunidade, servisu hamutuk ho lider komunitariu, Konsellu Polisiamentu Komunitaria no lider hirak ne’ebe maka influensia iha suku laran hodi vizivilidade ba komunidade sira no identifika problema ne’ebe maka mosu iha suku laran hodi buka solusaun atu nune’e labele hamosu krime

Marka prejensa iha serimonia abertura ne’e Komandante PNTL munisipiu Dili Superintendente Xefe Polisia Orlando Gomes, Xefe Departamentu Formasaun Superintendente Assistente Albino Mouzinho, Country Representative TAF, Reprejentante Ministeriu Solidaridade Sosial, ekipa husi Fundasaun Azia, no OPS husi munisipiu Dili hamutuk 31 no VPU. Media PNTL

Dili, Komandu Polísia Nasional Timor-Leste (PNTL) sei esforsu maka’as hodi asegura seguransa iha liña fronteira husi aktu krime kontra bandu no aktividade illegal ne’ebe kontinua mosu.

Komandante Jerál PNTL Komisariu Jerál Polísia Henrique da Costa ba jornalista sira hafoin halo abertura aktividade ida kona-ba Seminariu Monitorizasaun No Avaliasaun PNTL Tinan 2023 kaurta-feira (26/07) ne’e hateten asegura fronteira rai maran ne’e ita iha Unidade Patrullamentu Fronteira (UPF), maibé ita hatene katak ita nia rai maran nia luan ne’e hira no ita nia membru hira maka ita koloka iha ne’eba (UPF).

“Ita koloka membru iha kada postu ne’e mínimu tebes, la hanesan ho parte sira seluk, maibé ema sempre uza ita nia parte fraka hanesan menus rekursu umanu, hodi hatama sasan, maibé ita hatene katak balun konsege hatama no ita nia ema halo operasaun ne’e hetan no prende hanesan ita akompaña iha semana kotuk ne’e balun konsege hatama tomate, hafoin ita nia membru sira husi UPF no UPM prende”, tenik Komandante Jerál PNTL ne’e.

Komisariu Jerál Polísia ne’e haktuir tan alén de ne’e iha Oecusse mós ema balun hatama manu futu ninian hamutuk ruanulu-resin no iha loron rua liu ba ita nia membru sira iha Komandu PNTL RAEOA ho mós UPF sira konsege prende. La signifika katak buat hotu tama, maibé balun tama no balun ne’ebe maka sira hetan, sira prende tanba ne’e ita nafatin esforsu maka’as liu husi Komandu munisipiu sira ho mós Unidade Espesial Polísia (UEP) atu nune’e bele apoiu ita nia UPF hodi asegura iha fronteira rai maran ninian.

“Ita hare’e liu ba tasi ninian ne’e, tasi luan tebes, Timor ne’e hadulas deit ho tasi, agora ita nia membru UPM menus tebes no fasilidade mós menus, dala ruma ita halo movimentu maibé sorte diak ita hetan balun ita prende, aktividade polisiamentu komunitaria nian mós lao, inteligen nian mós lao, halo komunikasaun ho komunidade sira atu nune’e sai hanesan matan no tilun ba Polísia ninian karik hanesan suspeita buat ruma ou rona informasaun ruma pasa ba Polísia atu nune’e ita bele halo medida ruma”, hatutan Komisariu Jerál Polísia ne’e.

Media PNTL.

Dili, Komandu Polísia Nasional Timor-Leste (PNTL) liu husi Gabinete Planeamentu Estratéjiku no Dezenvolvimentu (GPED) kuarta-feira (26/07) ne’e realiza aktividade ida kona-ba Seminariu Monitorizasaun No Avaliasaun PNTL Tinan 2023 ho objetivu atu hare’e servisu Polísia nian iha Sétor hotu-hotu ba Atendimentu Públiku, Analiza Rezultadu Trimestral no Rasionaliza Planu Rekursu hodi bele mellora/hadia diak liu tan kualidade rezultadu iha próximo Trimester durante implementasaun programa liu husi Sistema Informátika Dalan Ba Futuru Timor-Leste.

Komandante Jerál PNTL Komisariu Jerál Polísia Henrique da Costa hafoin halo abertura ba aktividade ne’ebe hala’o iha salaun enkontru Kaurtél Jerál, ba jornalista sira hateten kada tinan Komandu prepara Planu Asaun Annual hodi aprezenta ba Governu nune’e bele hetan osan husi Governu.

“Ohin ita halo ita nia enkontru avaliasaun ba iha servisu ninian ne’ebe maka envolve Komandante Komandu munisipiu, Komandante Unidade, Xefe Departamentu sira hodi halo fila fali avaliasaun ba iha implementasaun ita nia Planu Asaun Annual ne’ebe maka ita fó sai ona no ita mós halo avaliasaun ba iha ita nia implementasaun Planu Estratéjiku PNTL nian inklui mós Prioridade Lima Komandu ninian ne’ebe maka ita implementa iha tinan 2023 nian”, esplika Komandante Jerál PNTL ne’e.

Komisariu Jerál Polísia ne’e salienta tan katak parte GPED nian maka sei halo aprezentasaun no orsida sira mós sei hare’e kona-ba Atinzimentu ba iha ita nia implementasaun ba Planu sira. Atu nune’e bele ajusta ho Planu Prioridade husi Governu ninian, atu nune’e ita labele lao sai husi Planu Prioridade husi Governu nian.

“Ita mos orienta atu nune’e, avaliasaun ne’e remata husi parte GPED ninian tenke tun direitamente ba iha munisipiu sira atu nune’e bele akompaña sira nia implementasaun iha terenu, pois bele mós fó orientasaun karik identifika buat ruma ne’ebe maka ladiak, bele fó kedas orientasaun atu nune’e iha terenu sira bele halo servisu ho diak”, hatutan Komisariu Jerál Polísia ne’e.

Hola parte iha aktividade loron ida ne’e, Komandante Jerál PNTL Komisariu Jerál Polísia Henrique da Costa, Komandante Komandu Operasaun, Administrasaun, Komandante Komandu PNTL munisipiu 14, Komandante Komandu Unidade UPM, UPF, UEP, Xefe Departamentu no Xefe Gabinete sira Komandu PNTL nian.  Media PNTL.

 Dili-Komandu PNTL munisipiu Liquica prende presaun de arma (Kilat anin) unidade 21 ho marka Sharp Tiger no motorizada unidade rua(2) ne’ebe maka hatama illegal liu husi fronteira Terrestre iha loron segunda (17/07), oras 23:41 Otl.

Portavoz Komandu PNTL Superintendente Polisia Antonio Da Lúz akompaña husi Komandante PNTL munisipiu Liquisa Superintendente Polisia Umbelina Soares relata katak Servisu Investigasaun Kriminal ho Seksaun Rezerva Intervensaun Rapida (RIR) munisipiu Liquica kaptura sidadaun nain tolu (3) ho sasan evidensia kilat manu hamutuk unidade 21 no motorizada rua (2), Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili.

Nia hatutan ekipa halo hela patrulhamentu hamutuk iha area Maumeta laran no ekipa simu kontaktu husi Komandante munisipiu katak iha fatin Kaimeo Dato Liquica nian membru Servisu Informasaun Polisia (SIP) nain ida prende hela suspetu lori sasan kontra bandu.

Komandu detein suspetu nain tolu ne’ebe maka komete kazu kontra bandu ne’e, suspetu hirak ne’e ho inisial JMP, AAPM no MB no investigasaun munisipiu Liquica halo ona prosesu identifikasaun hodi submete ba prosesu kontinuasaun ba Ministeriu Publiku.

Sasan hirak ne’e tama husi fronteira no suspetu hirak ne’e ba foti iha fronteira, tanba ne’e prosesu investigasaun sei lao atu hatene klaru liu iha investigasaun maka sei hatene lolos sasan ne’e sira foti iha ne’ebe no husi se.

Iha okajianun ne’e Komandante munisipiu Liquica Superintendente Polisia Umbelina Soares informa tuir orentasaun husi Komandante Jeral  Komisariu Jeral Polisia Henrique da Costa maka Hau ho membru sira transporta Suspetu nain tolu (3) ho sasan evidensia mai Kuartel Jeral atu nune’e Portavoz PNTL halo komferensia emprensa atu nune’e publiku bele hatene tanba kazu ne’e sensitivu tebes, hafoin lori sira fila-fali ba Komandu munisipiu Liquica hodi kontinua prosesu investigasaun.

Komandu munisipiu Liquica halo kordenasaun servisu ho Unidade Polisia Marítima(UPM), Unidade Patrulhamentu Fronteira (UPF) no membru F-FDTL sira ne’ebe destakadu hodi pasa informasaun ba malu hodi halo vizilansia no prende movimentu sidadaun ho sasan illegal.

Portavoz Komandu PNTL haktuirtan movimentu sasan illegal kontinua akontese iha fronteira terrestre tanba fronteira nia area luan, distransia postu ida ba postu seluk dook ho membru ne’ebe limitadu nudar kauza atividade illegal kontinua akontese maibe Polisia kontinua halo esforsu hodi reforsa seguransa. Komandu mos iha planu atu bele hare oinsa reforsa ita nia fronteira, espera katak iha tinan oin governu bele aloka orsamentu hodi halo rekrutamentu ba membru PNTL foun hodi bele aumenta rekursu ne’ebe maka ita menus ho ekipamentu ne’ebe maka apropriadu.

Atu prevene atividade ilisitu maka Komandu orienta nafatin ba membru sira atu halao servisu ho lolos no responsabilidade tanba nasaun ne’e ita nian tanba ne’e ita iha dever atu asegura alende ne’e presiza mos komunidade ne’ebe maka hela iha liña fronteira terrestre no marítima nia koperasaun hodi apoiu Polisia liu husi informasaun tanba Polisia mesak labele halo buat ida.

Avizu mos ba publiku karik uza no rai hela sasan kontra bandu maka voluntariamente entrega ba autoridade seguransa duke Polisia maka hetan halo aprensaun no prosesu tanba sasan kontrabandu ne’e kontra Lei tanba ne’e labele koko rai no uza sasan illegal hirak ne’e tanba ne’e konsidera hanesan krime Armas Branca.

Iha biban ne’e informa mos katak iha loron segunda (17/07) Departamentu Investigasaun Kriminal(DIK) Servisu do Alfandega kaptura sidadaun nain 3, ne’ebe hatama sigaru Surya 12, bal ida (slop 21) no Joker Karton 8, iha Portu Tibar.

Sidadaun nain 3 ne’e kompostu husi Feto nain 2, ho mane ida, ho naran inisial, JPBM (mane), MI no RSB (feto). Sasan hirak ne’e transporta husi fronteira Batugade mai Kapital Dili, ho transporte publiku (BUS).

Kazu ho NUC: 0204/ 23.PNSIC, husi Departamentu Investigasaun Kriminal kontinua prosesu no lori ba Ministeriu Publiku hodi kontinua nia prosesu.

Media PNTL

Dili, Komandu Polísia Nasional Timor-Leste (PNTL) sexta-feira (14/07) ne’e simu vizita dahuluk Ministru Interior Francisco da Costa Guterres,Ph.D mai iha Kuartél Jerál hodi hare’e no rona dezafiu hirak ne’ebe maka institusaun seguransa ne’e hasoru durante ne’e. iha vizita ne’e hala’o mós enkontru ho estrutura Komandu PNTL nian.

Hafoin aktividade vizita, ba jornalista sira Ministru Interior hateten ohin halo vizita mai PNTL atu rona dezafiu saida maka PNTL infrenta no presiza saida maka governu bele apoiu hanesan infrastrutura no  ekipamentu. Iha ne’e ami hare’e ona katak kestaun infrastrutura, ekipamentus, transporte tanba ne’e governu iha komitmentu sei hadia PNTL nia insfrastrutura, hadia sira nia ekipamentus no prepara transporte ba Komandu PNTL.

“Kestaun seluk ne’ebe maka ohin koalia ho Komandu maka kestaun oinsa maka bele hadia diak liu tan prestaun servisu Polísia ninian, atu bele hala’o servisu hanesan atendimentu públiku ne’e lao ho diak, segundu maka oinsa Polísia bele kria mekanizmu atu haforsa liu tan Manutensaun da Paz iha Timor laran tomak”, tenik Ministru Interior ne’e.

Membru Governu ne’e kompremete ona katak kona-ba infrastrutura sei hare’e uluk konstrusaun edifisiu Kuartél Jerál nian tanba ne’e ohin hau hateten ona ba Komandu katak iha tinan 2024 tenke hahu’u ona ninia lansamentu ba Kuartél Jerál. Ninia prosesu deit maka presiza resolve, iha tinan ida ne’e nia laran sei resolve uluk ninia mekanizmu no prosesu hotu, maka iha tinan 2024 sei tama iha lansamentu ba konstrusaun ninian.

“Ita sei mós halo revizaun ba Lei sira kona-ba Regime Salarial no Regime Karreira ninian, atu nune’e sira bele desempeña sira nia papel ne’e ho diak liu tan, no ita mós tenke agradese tanba durante ne’e PNTL konsege hala’o servisu ho diak tebes, ita bele hare’e iha eleisaun tolu ne’ebe liu ona lao ho diak, tanba sira maka pilar esensial ida ne’ebe maka tau hela seguransa ba iha prosesu ne’e rasik”, afirma Membru Governu ne’e.

Francisco da Costa Guterres,Ph.D haktuir tan katak durante aktividade eleisaun tolu ne’ebe liu ona, situasaun seguransa lao ho diak tanba servisu maka’as PNTL nian hanesan wainhira akompaña lori urnas sira husi fatin votasaun no halo kontagem hafoin ikus mai hamosu rezultadu ne’ebe maka diak, ne’e sira hotu tanba servisu Polísia sira nian.

“Ohin mós hau lori Primeiru Ministru nia naran no mós Governu nia naran agradese hela ba servisu ne’ebe PNTL halo diak tebes-tebes durante eleisaun tolu ne’e”, hatutan Ministru Interior ne’e.

Planu Governu nian liu-liu Ministeriu Interior sei hare’e ba PNTL maka iha tinan 2024 sei preparasaun atu halo rekrutamentu ba Polísia foun, sei revê mós Diploma Legais barak ne’ebe maka iha PNTL nia laran, atu nune’e wainhira halo Lei ne’e tenke tuir kondisaun servisu PNTL nian.

Iha vizita dahuluk ne’e, Ministru Interior Francisco da Costa Guterres,Ph.D simu ho Guarda de Honra no tara tais husi Segundu Komandante Jerál PNTL Komisariu Polísia Pedro Belo. Hafoin ida ne’e, membru governu ne’e kontinua hala’o enkontru ho Komandante Jerál PNTL Komisariu Jerál Polísia Henrique da Costa, Segundu Komandante Jerál PNTL Komisariu Polísia Pedro Belo, Komandante Komandu PNTL munisipiu 14, Komandante Unidade, Xefe Departamentu, Xefe Servisu sira ne’ebe tutela iha Komandu Jerál.

Iha biban enkontru ne’e, Komandante Jerál PNTL halo mós aprezentasaun kona-ba Programa Planu Prioridade PNTL nian ba tinan 2023-2026, Dezafiu no Obstákulu ne’ebe maka PNTL hasoru durante ne’e. Hafoin aprezentasaun, Komisariu Jerál Polísia Henrique da Costa entrega Relatoriu Servisu durante Períodu Primeiru nian ba iha Ministru Interior Francisco da Costa Guterres,Ph.D.

Media PNTL.

Dili- Komandante Jeral Komisariu Jeral Polisia Henrique da Costa no Segundu Komandante Jeral Komisariu Pedro Belo halao vizita kortejia ba RENETIL no husu atu kontinua tau matan ba servisu membru PNTL iha terrenu.

Komandante Jeral hateten ohin Hau mai ho Segundu Komandante Jeral halo vizita ba Organizasaun Rejistensia RENETIL no husu atu nune’e nafatin tau matan mai instituisaun PNTL no fo sira nia kontribuisaun liu husi aspetu saida deit, buat ne’ebe ita husu mak ne’e kuandu PNTL halo buat ruma la los no ladiak tenke hateten ba ami katak ita bot sira iha neba halo buat ne’e la los atu nune’e ami bele hadia, Nia hato’o asuntu ne’e ba Jornalista sira iha Sede RENETIL Farol Dili, kinta (13/07).

“Atu dezenvolve Polisia laos depende deit ba membru nain 4000 ne’ebe iha instituisaun PNTL nia laran maibe presija kontribuisaun husi ema hotu-hotu, momentu ida ne’e ita husu apoiu husi RENETIL para nafatin fo sira nia hanoin ba ita, ita mos akompaña hela katak ita nia situasaun seguransa agora daudauk ne’e lao normal hakamtek, maibe ita husu kontribusaun husi ema hotu-hotu nian atu nune’e mantein situasaun ida hanesan ne’e,” dehan Komandante Jeral.

Nia hatutan karik iha situasaun ruma ne’ebe perturba ordem publika bele informa ba parte seguransa atu nune’e ita bele foti medida prevensaun antes duke mosu tia problema ruma maka ita nia Polisia to’o ba tarde no sasan estragus hotu ona no ema mate hotu ona ita lakohi atu akontese, entaun prejensa Polisia nian diak liu ita prevene duke mosu tia problema maka ita ba.

Ita hatene katak kontribuisaun joventude sira nian liu-liu parte RENETIL agora daudaun barak mos sai hanesan membru PNTL.

Iha okajiaun ne’e Sekretariu Jeral RENETIL Joaquim da Fonseca hateten vizita Komandante Jeral no Segundu Komandante Jeral mai Sede RENETIL nudar jestu ida ne’ebe maka ami agradese teb-tebes tanba ida ne’e hanesan hahu buat foun ida iha relasaun entre RENETIL hanesan organizasaun Rezistensia ida no organizasaun sosiedade sivil nian ho instituisaun ida inportante teb-tebes ba manutensaun seguransa lei no ordem.

Nia hatutan ohin Komandante sira mai ne’e hanesan espresa sira nia avertura sira nia neon no attitude nakloke atu servisu ho siedade tomak inklui organizasaun hanesan RENETIL. Ami hato’o ami nia apresiasaun ba jestu ida ne’e nomos ba PNTL nia servisu em jeral, hanesan ita bot sira akompaña iha semana kotuk ami halo komferensia emprensa hodi koalia konaba andamentu prosesu eleisaun nian iha neba ami agradese no kongratula PNTL nia servisu ne’ebe garante katak prosesu eleitoral hahu husi kampaña to’o kontajen de votus lao diak ho insidente minimu. Ohin mos ami repete fali mensajen ida ne’e ba PNTL nia Komandu ho mensajen ida katak hahu hari hela iha ida ne’e nia leten tanba ne’e hatudu ona fundamentu diak iha PNTL nia servisu.

“Fo korajen ba membru PNTL tomak atu uza susesu ida ne’e hanesan padraun ida para hakat ba oin ne’e kontinua ho ida ne’e,” dehan Fonseca.

Nia afirma enkontru ida ne’e Hau hein katak laos sorumutu ba dala ikus liu, uluk kuandu ami ba vizita Kuartel PNTL tanba kazu insidente ruma atu hato’o liafuan, Komandante sira uluk mos nakloke hodi simu no rona, agora daudaun PNTL mak mai ne’e mos diak. Aban bainrua ami sei kontinua koperasaun no relasaun ida ne’e hodi hadia ita nia rai no ita nia sosiedade, Nia hakotu. Media PNTL

Dili, Atu garante situasaun seguransa iha Kapital Dili hakmatek, Komandu Polísia Nasional Timor-Leste (PNTL) munisipiu Dili sei hasa’e volume patrullamentu hodi evita konflitu mosu iha komunidade nia le’et.

Hafoin simu posse husi Komandante Jerál Komisariu Jerál Polísia Henrique da Costa iha loron kuarta-feira(12/07) ne’e nu’udar Komandante Komandu PNTL munisipiu Dili, Superintendente Xefe Polísia Orlando Gomes ba jornalista sira hateten iha hanoin balun ne’ebe maka atu servisu hamutuk ho ita nia líder tomak iha munisipiu Dili ho ita nia komunidade sira, joven, veteranu no ita nia líder komunitaria tomak, atu hotu-hotu hamutuk fó kontribuisaun atu nune’e bele kontribui ba situasaun hakmatek kapital Dili nian.

“Tanba ne’e laos hau mai atu lidera, ba buat balun ne’ebe presiza ita hadia, ita tenke hadia, mellora diak liu tan iha Komandu munisipiu Dili ninian, hau hanoin ba oin ita sei hadia jestaun operasaun, ita sei hadia funsaun lima iha PNTL ne’ebe Polisial nian ne’e, ita sei mellora, esforsu no haka’as ann hamutuk atu nune’e ita bele prevene krime sira ne’ebe maka sempre mosu”, tenik Komandante Komandu PNTL munisipiu Dili ne’e.

Superintendente Xefe Polísia salienta tan katak Polísia maka sai hanesan autor ba seguransa atu halo prevensaun, maibé kontribui mós ho ita nia líder komunitaria sira, ita bele kombate krime ne’ebe maka mosu iha Dili laran ne’e. ita hotu-hotu hamutuk, Dili ne’e bele hakmatek.

“Ita kontinua hasa’e ita nia volume patrullmentu no ita sei trasa planu operasaun ba iha Dili laran, ita sei servisu haka’as ann, sei hadomi ita nia rai, ita tenke esforsu maka’as atu nune’ebe bele garante situasaun hakmatek maibé ita konta ho ita nia maluk sira tomak”, hatutan Superintendente Xefe Polísia ne’e.

Eis Komandante UEP ne’e sei apela ba membru sira iha Komandu munisipiu Dili katak Polísia ne’e servisu basea ba Lei no Ordem, servisu tuir regras, ita halo atuasaun iha terenu mós tuir regras, tuir Lei ne’ebe maka iha, respeitu nafatin ba iha Direitus Umanus. Iha membru ne’ebe maka halo servisu lalos, envolve iha grupu sira, ka partidu sira, ita tenke halo prosesu investigasaun, tanba Polísia nia servisu tenke imparsial, neutru atu nune’e ita nia komunidade sira bele fiar iha Polísia, laran metin iha Polísia, Polisia labele halo servvisu tuir nia hakarak maibé tenke tuir Lei, Regras, Prosedimentu ne’ebe maka iha.

Media PNTL.                                 

Dili, Komandante Jerál Polísia Nasional Timor-Leste (PNTL) Komisariu Jerál Polísia Henrique da Costa hamutuk ho Segundu Komandante Jerál Komisariu Polísia Pedro Belo iha loron kuarta-feira(12/07) ne’e fó posse ba daruak Ofisias Superior no Inspetores hamutuk na’in sanulu resin-rua (12) hodi priense estrutura Komandu PNTL nian ne’ebe antes ne’e mamuk hela hafoin prosesu aposentasaun/reforma.

Ofisias Superior no Inspetores hamutuk sanulu resin-rua (12) ne’e simu posse ba kargu hanesan: Komandante Komandu Administrasaun, Komandante Komandu PNTL munisipiu Dili, Komandante Komandu PNTL munisipiu Aileu, Komandante Komandu PNTL munisipiu Viqueque, Komandante Komandu PNTL munisipiu Manatuto, Komandante Komandu PNTL munisipiu Covalima, Segundu Komandante Interinu UEP no Segundu Komandante Interinu UEP, Xefe Departamentu Tránzitu Seguransa Rodoviaria Nasional (DTSRN), Xefe Departamentu Investigasaun Kriminal (DIK), Segundu Komandante CFP no Komandante Interinu Batallaun de Manutensaun no Ordem Públika (BOP).

Iha nia intervensaun ba serimonia ne’e, Komandante Jerál PNTL Komisariu Jerál Polísia Henrique da Costa hateten promosaun, nomeasaun, rotasaun iha insitituisaun ida espesialmente PNTL hanesan buat ida ne’ebe normal, akontese iha nasaun ne’ebe deit no akontese iha instituisaun polísia ne’ebe deit.

“Ohin ita realiza serimonia ida ne’e hodi priense mós kargu ka estrutura ne’ebe maka durante ne’e mamuk no halo mós rotasaun atu nune’e bele iha envariomentu foun ida, atu nune’e bele implementa servisu iha fatin ne’ebe foun ho diak liu tan”, informa Komandante Jerál PNTL ne’e.

Komisariu Jerál Polísia ne’e salienta, ita hatene katak iha fulan kotuk ita halo ona aposentasaun ka reforma ba iha ita nia membru hamutuk 158 inklui mós ita nia ofisias superior, ofisias inspetores lubuk ida, ninia rezultadu husi reforma ne’e maka fó oportunidade ba ema sira seluk atu nune’e okupa kargu sira ne’ebe mamauk no mós bele iha oportunidade ba promosaun iha tempu tuir mai.

“Hau hakarak apela ba iha emposadu sira ne’ebe maka ohin simu posse, kargu no nomeasaun ne’ebe ohin ita bo’ot sira simu hanesan konfiansa husi instituisaun liu husi Komandante Jerál no Segundu Komandante Jerál atu nune’e bele asegura dezisaun Komandu nian, hafoin implementa servisu iha terenu ho responsabilidade”, hatutan Komisariu Jerál Polísia ne’e.

Autoridade másimu instituisaun seguransa ne’e salienta tan katak iha juramentu ba tomada de posse ne’e emposadu sira hateten katak lealidade no mós kumpri ba iha Lei sira. Signifika katak Lei sai hanesan lealidade ba servisu no ita bo’ot sira nia lealidade ba Komandu mós importante.

“Husu ba emposadu sira ne’ebe maka sei ba fatin servisu foun ne’e atu bele kria komunikasaun ne’ebe diak ho ita nia líder ka autoridade sira iha ne’eba, tanba wainhira ita mesak ho númeru Polísia ne’ebe limitadu ita sei labele fornese servisu ne’ebe maka 100% ba iha ita nia komunidade sira, tanba ezizensia ne’e barak hanesan problema sosial, ne’ebe maka ninia impaktu ne’e bele hadaet mai to’o iha servisu Polísia ninian, tanba ne’e tenke halo koordenasaun ho parseiru sira iha area responsabilidade atu nune’e lori progresu ba iha servisu Polísia ninian”, hatutan Autoridade másimu instituisaun seguransa ne’e.

Komandante Jerál PNTL ne’e apela ba Ofisias Superior, Subalternu inklui membru sira katak ita Polísia ne’e halo servisu tenke Neutral, labele inklina ba kaulkér partidu politiku tanba instituisaun PNTL konsagra ona iha Konstituisaun RDTL artigu 147 fó kna’ar ba ita, husu ba ita hotu tenke obedese ba ida ne’e.

Despasu Gabinete Komandante Jerál:

Hola parte iha serimonia tomada de posse ne’ebe hala’o iha salaun enkontru Kuartél Jerál ne’e Komandante Jerál PNTL Komisariu Jerál Polísia Henrique da Costa hamutuk ho Segundu Komandante Jerál Komisariu Polísia Pedro Belo, Komandante Komandu Operasaun, Inspetur Jerál, Diretur Justisa no Disiplina Interinu, Xefe SIP, Xefe Gabinete no Xefe Departamentu sira iha Kuartél Jerál inklui emposadu sira.

Media PNTL.

Dili-Ministru Interior halao enkontru ho Membru Polisia reformadu sira hodi rona sira nia hanoin no prekupasaun ba desijaun Governu Konstitusional da VIII ne’ebe halo Reforma ba membru nain 158 tanba idade abansadu no kondisaun Psikika.

Ministru Interior Francisco Guterres hateten Hau mai koalia ho sira atu rona sira konaba prosesu tomak apozentasaun ne’e lao halo nusa hafoin ami sei foti desijaun ida, sei bolu Komandu hodi koalia ho Komandu hafoin aprejenta iha Konsellu Ministru hodi desidi no foti desijaun konaba apozentassaun ne’e rasik, Nia hato’o asuntu ne’e iha Sentru Formasaun Polisia Komoro Dili, tersa (11/07). “Ita laos mai atu hatama fali ema maibe atu prepara didiak para prosesu reforma ne’e lao ho diak no lao ho dignu, Polisia sira ne’e estadu gasta osan barak ba sira atu forma sira sai Polisia to’o oras ida ne’e, tanba ne’e sira reforma hotu ona ita tenke husik sira ho dignu para sira kontinua kontribui ba dezenvolvimentu paz no estabilidade rai ida ne’e no sira kontinua iha ligasaun emosional ho instituisaun PNTL nune’e kuandu PNTL presija sira iha tempu ruma ne’ebe difisil sira kontinua mai ajuda no kontribui nafatin ida ne’e maka ita hare,”dehan Ministru.

Nia haktuir iha enkontru ne’e Reformadu sira hato’o prekupasaun barak Komandu aponta no koalia depois sei tur hamutuk. “Hau sei halo hotu tia pareser ne’e hadia kestaun legais hirak ne’e hotu tia depois Hau bele dehan iha fulan ida ne’e nia laran Ami aprejenta ba Konsellu Ministru para depois Konsellu Ministru foti desijaun,”MI informa.

Hare ba Estatuto Professional do Pessoal com Funções Policiais da PNTL Dekretu Lei Nu. 69/2022 de 28 de setembro ne’e hateten klaru nia mekanismu no prosesu ne’e mak presija hadia, Reformadu sira ne’ebe maka mai mos laos ejiji atu tama fila-fali maibe sira husu deit atu Reforma ho Dignu tanba sira servi ba rai ida ne’e no ba instituisaun ne’e kleur ona labele kaer Sira soe sai deit mais mai Haruka Sira sai husi odamatan ho didiak, ida ne’e maka sira koalia mai Hau.

Governu sei hare ida ne’e no hare oinsa meius ne’ebe maka dignu hodi halo reforma ne’ebe maka dignu para sira fila ba vida sivil. Sira ne’e ema ne’ebe treinadu se ita la trata sira ho diak ba komunidade sira bele sai fali potensia destruidor ba komunidade ne’e rasik tanba ne’e maka ita tau sira ba komunidade no husik sira ho dignu.

Komisariu Jeral Polisia Henrique da Costa hateten ohin hanesan oportunidade diak ida ne’ebe maka organija husi Gabinete Ministru Interior nian hakarak hasoru malu diretamente ho Reformadu sira.

Nia hatutan atu informa mos ba Ministru katak iha loron 16 juñu 2023 ita halo serimonia despedida ho reformadu sira maibe marka prejensa iha momentu neba reformadu kuaje nain 60 maibe agora sira barak, Ami agradese atu rona diretamente mensajen husi Ministru Interior.

Entretantu Reformadu Superintendente Assitente Paskoal Ferreira Guterres hateten Ami agradese ba Primeiru Ministru ne’ebe haruka ona Ministru Interior mai halo enkontru ho ami hodi koalia kestaun barak ne’ebe maka la defende parte ida no hatun parte seluk maibe hanesan Ministru hateten oinsa rezolve situasaun hirak ne’ebe maka agora Polisia hasoru hodi hadia kondisaun hirak ne’e sai ba diak atu nune’e Reforma tuir mai ho situasaun diak.

“Ami reformadu sira ohin koalia ona katak mais ou menus Ita sai ba hanesan kolega sira hateten ita tama iha odamatan ema suta ita husi Janela não pode ser asim (labele hanesan ne’e) instituisaun ne’e estadu nian entaun buat hotu-hotu ita lao tuir governu nia politika entaun governu nia knar rasik mak hakarak prepara hanesan ohin Ministru hateten prepara oinsa atu hadia Lei no prosedimentu atu instituisaun PNTL lao tuir ida ne’e mak inportante no laiha ema ida mak lakon no laiha ema ida mak manan, buat diak ba hotu-hotu.

Enkontru Membru Governu Konstitusional da IX ho Reformadu sira kuaje oras rua nia laran ne’e taka ba publiku.

Enkontru ne’e diriji husi Komandante Jeral akompaña husi Segundu Komandante Jeral Komisariu Pedro Belo ho prejensa husi eis Komandante Jeral Sr. Paulo de Fatima Martins, Komisariu Afonso De Jesus, omisariu Julio Hornay, komisariu Faustino da Costa no Eis Iha okajiaun ne’e Komandante Jeral PNTL Segundu Komandante Jeral Komisariu Mateus Fernandes, Asesor sira, Ofisiais Superior PNTL no Reformadu sira. Media PNTL