News

Dili-Komandu Polisia Nasional Timor-Leste(PNTL) despede Ofisiais Superior nain tolu(3) Komandante Komandu Administrasaun Superintendente Xefe Polisia Jose Soares, Xefe Departamentu Justisa Superintendente Xefe Polisia Agostinho Gomes no Komandante Sentru Operasaun Nasional Superintendente Assistente Polisia Augostu Tilman neébe maka sei tuir kursu Defense Strategic Studies Course (DSSC) iha Australian War College durante tinan ida nia laran.

Komandante Jeral PNTL Komisariu Polisia Faustino da Costa hateten Kursu neébe maka sira sei infrenta maka iha Pacific Defiance Strategy, kursu ida neé normalmente fo ba Forsa Defeza Timor-Leste maibe iha tinan 2021 sira mos fo oportunidade ba PNTL para bele partisipa liu husi prosesu selesaun no teste, Nia hatoó asuntu neé ba Jornalista sira iha Kuartel Jeral PNTL Kaikoli Dili tersa (26/07).

Nia hatutan iha tinan kotuk sira fo oportunidade ba PNTL haruka kandidatu nain 3 maibe hafoin sira partisipa iha teste kandidatu ida deit maka passa Superintendente Xefe Polisia Natercia Martins no tinan 2022 Komandu identifika no fo kandidatu nain 5 maibe sira neébe konsege liu husi prosesu neébe rigoroju husi Adidu Defeza Australia ho ninia ekipa nuneé kandidatu nain 3 maka passa iha prosesu teste neé.

“Iha buat rua inportante maka identifika nesesidade saida maka PNTL presiza atu dezenvolve, liutan no daruak maka hanesan oportunidade ida ba membru sira para iha ligasaun no kria networking tanba iha kursu neébe sei halao laos Australia ho timor deit maibe kuaze nasaun sira iha illa Pasifiku no Azia nasaun lubuk ida maka iha neba maioria mai husi militar no mos Polisia, no saida maka sira aprende lori fila mai Timor-Leste,”dehan Komandante Jeral.

Ita nia esperansa maka hanesan inisiu husi prosesu katak sei bele iha oportunidade ba komandante sira seluk no kandidatu sira neébe tinan kotuk no tinan ida neé la pasa prosesu selesaun sei iha tempu ba sira nuneé aproveta hodi prepara aan didiak para tempu seluk tuir mai ita bele haruka sira involve iha kursu hanesan neé, tanba planu estratejiku dezenvolvimentu nasional no Planu Estratejiku PNTL buat ida formasaun no kapasitasaun neé tenke kontinua nafatin ho objetivu ida  bainhira maka ita hatene lolos katak Polisia neé proifesional.

Entretantu Deputy Embaixador Australia Suzy Wilson hateten governu Australia sente orgullu tebes halo koperasaun no fo asistensia ba apoiu kursu neé inportante ba membru PNTL hetan oportunidade hanesan atu hari treinamentu no halo ligasaun entre Polisia iha Australia nomos iha rejiaun Pasifiku no Asia Pasifiku, inportante hetan ligasaun atu apoia dezenvolvimentu iha hanoin Polisia nian no atendmentu ba povu no habot ligasaun, edukasaun, investimentu iha komunidade timor oan. Inportante ba Kolega nain 3 atu aprende no hetan ideia konaba Polisia komunidade no inportante atu haboot nasaun neébe estavel no iha komitmentu iha rejiaun.

Iha okajiaun neé Reprejentante Ofisiais Superior nain tolu Komandante Komandu Administrasaun Superintendente Xefe Polisia Jose Soares hateten nudar Ofisiais Superior joven ami nafatin luta no iha espasu neébe luan iha ami nia kakutak no ami sei halo ida neébe diak liu atu demonstra ami nia espiritu no vontade hodi reprejenta nasaun Timor-Leste no Instituisaun PNTL.

Iha serimonia neé Komandu mos fo Sertifikadu de Louvor ba Ofisiais Superior nain 3. Kursu Defense Strategic Studies Course (DSSC) ho durasaun tinan ida(1) maibe molok atu tuir kursu neé preparasaun ba lingua ingles durante fulan lima (5).

Partisipa iha serimonia despedida neé Segundu Komandante Jeral PNTL Komisariu Polisia Mateus Fernandes,  Inspetur Jeral, Komandante Komandu Operasaun, Xefe Departamentu Xefe Seksaun, Ofisiais Sub Alternus, Komandante UEP, Adidu Defeza Australia, Komandante TLPDP ho nia estrutura  Sarjentu no Ajente sira. Media PNTL

Liquiça, Komandu Polísia Nasional Timor-Leste (PNTL) kuarta-feira (27/07) liu husi gabinete Jeneru realiza workshop durante loron rua kona-ba Planu Asaun Nasional (PAN) 1325 ba membru Komandu PNTL munisipiu hat maka hanesan Dili, Aileu, Ermera no Liquiça iha Salaun Komandu PNTL munisipiu Liquiça.

Xefe Gabinete Jeneru PNTL Inspectora Xefe Maria Fatima Martins iha ninia intervensaun ba abertura Workshop neé hateten programa neé iha tempu uluk hala’o kampaña durante loron sanulu-resin-nen (16) nia laran maibé wainhira hau mai kaer kargu hanesan Xefe Jeneru foun, hau leé iha programa PAN 1325 nia laran katak PAN neé politika idak-idak nian hodi halaó nia programa.

“Ho ida neé hau hamosu programa ida neé laos baseia ba Jeneru nia planu maibé baseia ba Planu Asaun Nasional (PAN) 1325 neébe ita adopta husi Rezolusaun ONU nian no mós 1325 ho ida neé maka ita foti ba iha Pilar hat neébe presija ita aprende didiak iha loron rua nia laran, maibé laos materia ida neé deit, ita mos iha materia husi parte IT, Komunitaria no departamentu sira seluk no ho ida neé materia sira neé laos ami nia programa maibé iha kedas ona iha programa PAN 1325 nia laran”, esplika Xefe Gabinete Jeneru PNTL neé.

Inspectora Xefe neé salienta liu tan katak iha programa PAN 1325 neé ita hareé liu ba pilar hat hanesan pilar partisipasaun. Iha pilar neé, oinsa reprezenta feto iha aspetu hotu nivel nasional toó nivel munisipiu. No oinsa mós kona-ba foti desizaun kona-ba servisu katak laos mane deit maka bele maibé feto mós bele. Pilar segundu maka kona-ba Protesaun  hareé liu ba violensia baseia ba Jeneru, oinsa maka PNTL bele atende ba kazu ida neé. Pilar tuir mai  Prevensaun nian maka oinsa ita nia maneira atu prevene krime violensia baseia ba Jeneru. Pilar ikus maka kona-ba Harií Paz, oinsa ita nia hamutuk atu harií Paz no oinsa ita ajuda ita nia komunidade sira atu harií Paz.

Iha fatin hanesan reprezentante Komandante Jerál PNTL Superintendente Xefe Armando Monteiro hateten objetivu prinsipal husi wokrshop ida neé maka oinsa partisipasaun Jeneru iha PNTL durante loron rua nia laran, halo diskusaun hodi bele identifika problema neébe durante neé PNTL infrenta liu-liu iha Jeneru ninian hodi formula no fó solusaun ba knaár neébe maka instituisaun PNTL halaó.

“Segundu maka iha programa ida neé laos deit mai husi munisipiu hat, maibé konvida mós parte husi Komandu Jerál PNTL hodi fahe informasaun oinsa atu bele promove igualidade Jeneru iha instituisaun PNTL, ida neé maka diskusaun durante loron rua sei halaó baseia ba Planu Asaun Anual, pilar hat neébe maka durante neé PNTL halaó nuneé bele banati tuir, sai mós hanesan inspira no motiva membru PNTL hodi halaó kna’ar servi ema no rai ida neé”, tenik Superintendente Xefe neé.

Porta Voz Komandu PNTL neé apela ba partisipante sira neébe mai husi munisipiu hat (Dili, Aileu, Ermera no Liquiça) espera kata durante loron rua nia laran maske tempu neébe limitadu maibé oinsa atu bele iha vontade, iha esperitu hodi akompaña, aprende tanba ita koalia kona-ba igualidade Jeneru dala-ruma ema hanoin maka koalia kona-ba problema deit maibé oinsa ita mós halo mudansa ba ita nia ann, tenta atu aprende promove malu entre feto no mane.

Tuir planu, aktividade neé sei halaó durante loron rua nia laran (27 no 28 Jullu) iha Komandu PNTL munisipiu Liquiça ho presensa membru PNTL husi munisipiu Dili, Aileu, Ermera no Liquiça. Hafoin ida neé, sei kontinua programa hanesan ba munisipiu seluk inklui RAEOA no munisipiu espesial Atauro. Marka presensa iha abertura neé reprezentante Komandante Jerál PNTL Superintendente Xefe Armando Monteiro, Komandante PNTL munisipiu Liquiça Superintende Umbelina Amaral, Xefe Departamentu Polisiamentu Komunitaria Nasional (DPCN), Xefe Seksaun IT Nasional, Xefe gabinete Jeneru PNTL inklui orador husi Komandu Jerál maka hanesan departamentu Justisa Nasional, DPCN, gabinete Jeneru, Seksaun IT, Seksaun VPU, Seksaun Saude, seksaun Rekursu Umanu no gabinete Relasaun Publika.

Media PNTL.             

Komandu PNTL liu husi Komandante Jerál Komisariu Polísia Faustino da Costa hamutuk ho Segundu Komandante Jerál Komisariu Polísia Mateus Fernandes, realiza enkontru Avaliasaun Servisu Seguransa iha Kapital Dili hamutuk ho Komandante Komandu PNTL munisipiu Dili, Komandante Unidade Espesial Polísia (UEP), Komandante Unidade Polísia Marítima (UPM), Komandante Centro Formação Polísia (CFP), Xefe Gabinete, Xefe Servisu no Xefe Departamentu sira Kuartél Jerál hodi avalia servisu ne’ebe hala’o ona durante fulan ida nia laran.

Iha enkontru ne’e Komandante Komandu PNTL munisipiu Dili, Komandante UEP, UPM no Xefe Servisu Informasaun Polísia (SIP) aprezenta relatoriu mensal ba servisu hirak ne’ebe maka atinzi ona durante fulan ida nia laran, iha âmbitu asegura seguransa kapital Dili. Relatoriu refere koalia liu kona-ba númeru Krime ne’ebe akontese, atuasaun PNTL nian iha sidade Dili liu-liu mosu krime. Hare’e mós kona-ba númeru asidente ne’ebe sempre akontese wainhira mosu engrafamentu iha kapital Dili.

Iha intervensaun enkontru ne’e Komandante Jerál Komisariu Polísia Faustino da Costa nafatin husu ba Komandante no Xefe Servisu sira atu kontrola membru sira nia servisu hodi atúa situasaun krime ruma no kontrola transporte.

Além de halo Avaliasaun Servisu Seguransa iha Kapital Dili, iha enkontru ne’e Avalia mós kona-ba Formatura Jerál ne’ebe hala’o iha Komandu Jerál. Avaliasaun Formatura Jerál nia objetivu maka atu hare’e prezensa membru sira nian, iha aspetu perfomansia membru sira nian iha kada Formatura.

Hola parte iha aktividade ne’e Komandante Jerál Komisariu Polísia Faustino da Costa hamutuk ho Segundu Komandante Jerál Komisariu Polísia Mateus Fernandes, Inspetur Jerál, Komandante Komandu Operasaun, Administrasaun, Komandante UEP, UPM, CFP, no Xefe Gabinete, Xefe Servisu no Xefe Departamentu sira Kuartél Jerál.

Bobonaro, 22 jullu 2022 (SRP) – Komandu Polísia Nasional Timor-Leste (PNTL) Munisipiu Bobonaro, sesta-feira (22/07) ne’e, hala’o serimonia inagurasaun edifisiu foun ba PNTL –VPU (Vulnerable Person Unit), ne’ebe maka hetan doasaun hosi paresiru Programa Nasoens Unidas nian ba Dezenvolvimentu (Sígla inglés; UNDP), ne’ebe hetan apoiu orsamentu hosi Uniaun Europeia iha Timor-Leste liu hosi inisiativa spotlight.

Edifisiu foun VPU ne’e hetan inaugurasaun hosi Vise-Ministru Interior, António Armindo, Sekretária Estadu Igualdade no Inkluzaun (SEII), Maria do Rosário Fátima Correia, Komandante Jeral PNTL Komisariu Polisia Faustino da Costa , Komandante PNTL Munisipiu Bobonaro, Antonino Mauluta, Padre Pároku Maliana, Valerio Gusmão, Reprezentante UNPD, Joniyanto Monteiro, Reprezentante Uniaun Europeia, Carla Silva no-mos reprezentante hosi Autoridade Munisipiu Bobonaro.

“Hanesan onra ida mai ha’u hodi ohin mai iha fatin ne’e reprezenta Governo Timor-Leste, partikularmente no Ministru Interior ne’ebe mos hanesan ita-nia Primeiru-Ministru, Jeneral Taur Matan Ruak, iha seremónia ne’e, hodi bele inaugura espasu ka fatin seguru ne’ebe sei fasilita serbisu membru VPU sira atu bele dezempeña misaun servisu no asisténsia ba ita-nia sobrevivente Timor-oan ne’ebe sofre husi tipu violensia oi-oin ho alta profisionalizmu no kualidade”, dehan, Antonio Armindo, perante nia diskursu hafoin remata seremonia inaugurasaun edifísiu foun ne’ebe lokaliza iha Suku Holsa, Postu-Administrativu Maliana, Munisipiu Bobonaro.

Nia dehan, ho fatin foun ne’e, vitima husi violasaun domestika no abuzu seksuál sira bele sente seguru, konfidensial no komfortavel wainhira mai hato’o keisa.

“Guvernu ida ne’e iha ninia komitmentu nafatin apoiu feto no labarik sira liu-liu ba programa ne’ebe fokus ba abuzu seksuál no violensia doméstika. Tanba ne’e ita firmi hamutuk ho feto sira hodi luta ba kualker tipu violensia no ikus liu husu ba membru VPU sira atu kolabora ho Autoridade lokal servisu hamutuk kombate violensia hasoru feto no labarik feto tanba ida ne’e krime publiku no hirak ne’ebe komete tenke hetan kastigu adekuada”, afirma Governante ne’e.

Iha biban ne’e, Vise-Ministru Interior ne’e lori Guvernu nia naran hato’o agradesementu wain ba parseria sira ne’ebe apoiu Ministeriu Interior hodi harii edifisiu ne’e no nia husu nafatin atu kontinua iha futuru oin mai.

Entretantu uma ne’e ho medida 11:50×9 hamutuk kuartu lima kompostu hosi sala rua ba vitima abuzu kompletu ho sanita, sala rua ba investigasaun no sala ida ba atendementu. Enkuantu obra ba projetu ne’e ho montante osan $62,550 55 no responsavel hosi empreza Ravio Construction Unipesoal. Lda ne’ebe hahu halo konstrusaun iha inisiu fulan agostu tinan kotuk no finaliza iha loron 13 maiu 2022. Media Serviços Relações Públicas

Dili- Fundasaun Azia (TAF-sigla ingles) aprejenta rejultadu peskiza inplementasaun programa Konsellu Polisiamentu Komunitaria (KPK) iha munisipiu nen hodi avalia susesu no dejafiu neébe maka iha.

Team Leader TAF Heidi Arbuckle hateten objetivu husi peskija neé maka atu hare fila-fali KPK nia servisu iha munisipiu nen(6) maka hanesan Dili, Ermera, Ainaro, Baucau, Viqueque no Bobonaro reprejenta KPK iha suku 333 iha teritoriu laran tomak, husi evaluasaun neé TAF, Fundasaun Mahein no PNTL hakarak hare boa pratika husi KPK hodi asume papel hodi halo prevensaun konflitu no disputa iha nivel suku, Nia hatoó asuntu neé ba Media PNTL iha CFP Comoro Dili, (21/07).

Nia hatutan liu husi peskiza neé TAF identifika obstaklu neébe KPK hasoru maka inpaktu husi pandemia COVID-19 durante tinan rua ikus neé halo KPK difisil atu halao sira nia atividade hanesan enkontru ho membru KPK nuneé difikulta komunikasaun no kordenasaun ,alende neé membru KPK mos presija tuir formasaun no kapasitasaun konaba Lei no regulamentu sira hodi hatene sira nia papel no limitasaun neébe maka iha tanba membru KPK laos Polisia nuneé dalaruma mosu desintendimentu wainhira sira rezolve problema.

Progresu neébe maka iha durante neé maka iha ejistensia KPK bele rezolve kazu disputa ho karater sivil iha nivel aldeia no suku.

Liu husi peskiza neé TAF rekomenda ba PNTL atu nafatin suporta KPK tanba ho inplementasaun programa KPK hakmaan Polisia nia servisu iha nivel aldeia no suku neébe maka difisil asesu ba transporte nuneé KPK bele rejolve problema kiik no prevene mosu problema boot; Alende neé Komandu PNTL mos tenke kontinua fo formasaun no treinamentu ba sira konaba knaar no papel KPK nian.

Iha okajiaun neé Komandante Jeral PNTL Komisariu Polisia Faustino da Costa hateten peskiza ida neé nudar intensaun Komandu nian hodi husu parseru Fundasaun Azia atu buka no hatene tuir KPK neébe maka instala iha munisipiu tanba neé maka TAF no Fundasaun Mahein halo peskija iha munisipiu nen.

Nia hatutan Komandante sira neébe marka prejensa iha neé ita boot sira hatene iha kada munisipiu instala KPK hira, peskiza neé halao iha suku balu hodi halo komparasaun ba efetividade servisu no problema ka dejafiu neébe maka KPK hasoru.

Liu husi seminariu neé ita buka hatene dejafiu neébe maka iha neé hanesan problema OPS, Komandante Eskuadra  ou toó nivel munisipiu no balu neébe maka Komandu Jeral atu bele buka solusaun hamutuk. Komandu Jeral ho Departamentu Polisiamentu Comunitaria Nasional (DPCN) ita hare ona katak ba futuru ita presija mos loke liras oinsa bele iha kordenasaun ho ministeriu relevante.

Peskija neé halao durante fulan tolu (3) Abril-Juñu iha munisipiu nen hodi produs dokumentu ida konaba oinsa KPK halo operasaun no oinsa rezolve problema ho servisu bazeia ba sira nia mandatu.

KPK instala iha tinan 2011 toó ohin loron besik kompleta tinan 11 no instala ona iha suku 333 iha teritoriu laran tomak ho apoiu husi parseru TAF.

Marka prejensa iha Seminariu loron tomak neé Inspetur Jeal PNTL, Komandante Komandu Operasaun, Komandante Komandu Administrasaun, Xefe DPCN, Komandante munisipiu 14 ho ekipa husi parseru TAF. Media PNTL

Maliana, 18 jullu 2022 (SRP) – Unidade Polísia Espesiál (UEP), liuhosi Batallaun Ordem Publika (BOP), companhia Delta-Maliana, kaptura tán sidadaun timoroan na’in-4, ne’ebé hatama kombustivel liu dalan ilegál hosi fronteira terrestre Indonézia mai iha Suku Ritabou, Postu Administrativu Maliana, Munisípiu Bobonaro.

Iha operasaun ne’e, ekipa ne’ebé lidera hosi Komandante BOP rasik Inspetór Rosalino do Santos, iha madrugada ne’e akipa hapara karreta kamioneta 1 ho númeru matríkula, A.50-724 TLS, ne’ebé tula kombustivel tipu Gazoel no gazolina iha jerigen 54 ho totál mina hamutuk 1620 ltrs.

Iha terenu ekipa notifika nain ba objetu hirak ne’e maka suspeitu feto ho naran inisiál AS tinan 33, hosi Aldeia Samelau, Suku Ritabou-Postu Maliana. Enkuantu suspeitu nain tolu seluk ne’ebé fasilita hatama mina maka AV, tinan 30, husi Aldeia Ai-Aras, Suku Soilesu, Postu Bobonaro, MdC, tinan 27, husi Aldeia Builekun, Suku Balibo Vila, Postu Balibo no NdS, tinan 21, husi Aldeia Samelau, Suku Ritabou, Postu Maliana.