News

Dili-Atu anima komemorasaun aniversariu Polisia Nasional Timor-Leste ba dala-22 maka komisaun organijadora halao jogu torneu PNTL cup ne’ebe maka sei partisipa husi klube futeball 12 husi unidade sira iha PNTL, Universidade no instituisaun seluk.

Prezidente komisaun organizadora Superintendente Xefe Pedro Belo hateten jogu ne’e realija tanba iha instituisaun PNTL durante tinan 2021 peltaun ida maka mate husik hela ita maioria tinan U40 ba leten, entaun hanesan instituisaun ita prekupa ba situasaun ida ne’e no dalan ida maka liu husi ejersisiu hanesan ne’e bele ajuda hadia ita nia saude, Nia hato’o asuntu ne’e iha CFP Komoro Dili, sexta (18/02).

Nia haktuirtan hanesan institiuisaun ita tenke solusiona situasaun ne’ebe agora akontese dadauk iha PNTL, ita hein katak ba oin ho ejersisiu sira hanesan ne’e ita obriga Komandante munisipiu no unidade sira para kada loron sexta halo ejersisiu no bele mos organija eventu sira hanesan ne’e para ba oin jogu sira ne’e bele halao ho diak.

Hein katak bele halao jogu ida ne’ebe diak idade U40 ba leten ona la buka prestasaun maibe ita buka para hadia saude ho amizade mak inportante. “Piala karik sei mai maibe piala ida boot liu maka saude no amizade,”dehan Ramos.

Entretantu reprejentante Prezidente FFTL Superintendente Xefe Henrique da Costa hateten tuir estratejia husi FFTL ho vizaun ida katak tenke lori bola to’o iha baze no ba nivel hotu-hotu signifika katak ita sira idade tinan 40 ba leten ne’e iha oportunidade nafatin laos dezenvolve deit talentu iha futeball nian maibe inportante iha atividade fo saude ba ita nia aan.

“Iha moto ida katak ita tenke dezenvolve futeball iha Timor-Leste hanesan duut manlai ne’ebe maka agora dadauk moris iha fatin hotu,”.

Iha okajiaun ne’e reprejentante Komandante Jeral PNTL Superintendente Xefe Carlos Jeronimo hateten jogu futeball ne’e inportante hanesan lia balu hateten mensano in corpore sano ho desportu hadia ita nia isin halo saude diak, liu husi atividade hanesan ne’e ita bele hakbiit no bele hanaruk ita nia tinan.

Jeralmente iha jogu hanesan ne’e ekipa hotu-hotu halo esforsu atu hatudu nia talentu iha arena ida, no seluk hanoin atu bele hetan mos premiu maibe hau hakarak husik hela lia fuan ida ba jogador sira, ekipa no abitu sira katak ita boot sira inplementa didiak ba no hatudu ita boot sira bele sai fair play atu nune’e atividade ne’e halao ho diak laos manan deit mais inportante joga ho diak no bonito maske ita tinan 40 maibe ita mos bele hatudu buat ruma.

Torneu PNTL cup ne’e loke husi  Vice Ministru Interior Antonio Armindo no Inspetor Jeral PNTL Superintendente Xefe Carlos Jeronimo, no partisipa husi Diretur Rekursu Humanus, Komandante TLPDP ho nia adjuntu, Reitor UNPAZ ho nia klube, kordenador jogu 12 no adeptus sira.

Jogu abertura husi Unidade Patrulamentu Fronteira(UPF) ho ropa kor kinur kontra Universidade da Paz (UNPAZ) ho ropa kor azul,  rejultadu jogu UPF manan ho skor 3-1. Media PNTL

Dili-Komandu Jeral Polisia Nasional Timor-Leste (PNTL) halo enkontru ho Prezidente Republika Francisco Guterres ‘Lu Olo’ hodi aprejenta situasaun seguransa rai laran nomos preparasaun PNTL hodi hasoru Eleisaun Prezidensial.

Komandante Jeral PNTL Komisariu Faustino da Costa hateten ami aprejenta ba Prezidente Republika katak situasaun atual rai laran lao diak ita hotu hatene no akompana katak tempu agora ita prepara ba kampaña no eleisaun, Nia hato’o asuntu ne’e ba Jornalista sira iha Palasiu prezidente Bairo-Pite Dili, kinta (17/02).

Nia haktuirtan ho situasaun hirak ne’e maka Komandu halo enkontru semanal ne’e hodi aprejenta preparasaun PNTL nian to’o iha ne’ebe no kordenasaun halo nusa ho orgaun eleitoral sira.

Polisia Nasional maka asume responsabilidade hodi asegura seguransa, ita halo ona preparasaun, los duni katak PNTL preparadu maske hasoru dejafiu iha tempu pandemia COVID-19 ita tama iha estadu de kalamidade no dezastre naturais hanesan udan no anin alende ne’e iha mos dezafiu interna maka rekursu humanu ne’ebe ita sei koloka maximu membru PNTL hotu komesa husi kampaña to’o Eleisaun.

“Iha enkontru ne’e Xefe Estadu husu nafatin ba PNTL atu kontinua servisu ho inparsial atu asegura buat hotu lao diak,” Nia hatutan Prezidente nia mensajen.

Iha okajiaun ne’e Komandante Jeral ne’ebe akompana husi Segundu Komandante Jeral Komisariu Mateus Fernandes husu ba joven sira nudar futuru nasaun nian atu prepara aan atu iha futuru sai ema ne’ebe diak tanba uluk ita nia inan aman no avo sira luta ba rai ida ne’e ita konsidera hotu tau sira hanesan heroi da libertasaun nasional, oinsa mak joven ida-idak tau iha sira nia neon no hanoin katak nia mos loron ida bele sai heroi ba dezenvolvimentu nasional rai ida ne’e nian.

Daruak atu sai heroi ba dezenvolvimentu nasional prepara ita boot sira nia aan bele halo atividade ne’ebe kontribui hahu husi familia, bairu, aldeia no suku; se ida ne’e maka ita boot sira tau tempu agora ita halo preparasaun ba kampaña no eleisaun tau ita boot sira nia aan nune’e ema seluk labele aproveta imi ba sira nia interese. Media PNTL

Dili- Segundu Komandante Jeral PNTL Komisariu Mateus Fernandes halo enseramentu ba Workshop Aprezentasaun Global Festa Demokrasia Eleisaun Prezidensial 2022, nudar faze preparasaun oinsa atu asegura seguransa durante periodu eleisaun.

Komisariu Mateus Fernandes hateten liuhusi workshop loron rua ne’e ita boot sira aprende halo nusa maka Eleisaun Jeral lao diak ho partisipasaun maximu husi komunidade sira, ho aprejentasaun husi orador sira husi orgaun eleitoral hanesan STAE, CNE nomos Prokurador Jeral nia reprejentante, materia hirak ne’e hanesan faze preparatoriu kuandu iha eleisaun orgaun eleitoral sira sei servisu hamutuk, Nia hato’o asuntu ne’e iha nia diskursu iha salaun Maubara room Timor Plaza Comoro Dili kuarta (16/02).

Nia haktuirtan liu husi servisu hamutuk maka ita sei atinji ita nia objetivu ne’ebe orsida  Komandu Operasaun sei termina iha planu operasaun konaba vizaun no misaun PNTL iha eleisaun jeral, hafoin ne’e wainhira fila ba munisipiu Komandante sira sei halo planu tekniku operasional hodi atinji misaun no vijaun ne’ebe iha.

“Durante iha eleisaun Polisia tenke neon nain no matan moris no hatene saida mak diak no presija atu halo, kuidadu STAE nia evidensia sira no hare ba vizaun ne’ebe maka Komandante Komandu Operasaun fixa iha neba, mehi hirak ne’e hodi garante ita nia funsionamentu ne’ebe maka professional no proporsional, buat hotu-hotu nia save maka neutru no inparsial,”dehan Komisariu Mateus.

Orgaun eleitoral sira tenke neutru nune’e garante eleisaun ida ne’ebe kredivel no objektif tanba ne’e orgaun eleitoral sira tenke servisu hamutuk liu-liu ho neutru no inparsial ho nune’e maka ita sei manan konfiansa husi komunidade sira.

Iha workshop loron ikus sesaun loraik Komandu Operasaun mos halo aprezentasaun konaba formatu Relatoriu kampaña nomos iha sentru votasaun no apuramentu municipal nian.

Hodi termina workshop ne’e Komandante Komandu Operasaun Superintendente Xefe Pedro Belo husik hela lia menon “Ita hotu nia servisu hamutuk asegura seguransa eleisaun prezidensial 2022 bele lao ho diak no susesu.”

Workshop durante loron rua (15-16/02) ho tema ‘Eleisaun Seguru ba Ema hotu’ ne’e partisipa husi Komandante Komandu munisipiu 12 no RAEOA, Komandante Unidade UEP, UPM no UPF, Xefe Departamentu no Xefe Gabinete sira iha Kuartel Jeral. Media PNTL

Dili-Polisia Nasional Timor-Leste (PNTL) sei hasai nia enerjia tomak hodi asegura seguransa ba festa demokrasia Eleisaun Prezidensial (EP) periodu 2022-2027 atu lao ho hakmatek no seguru ba povu tomak.

Komandante Komandu Operasaun Superintendente Xefe Polisia Pedro Belo hateten PNTL sei asegura seguransa ba festa demokrasia komesa husi Kampaña, Eleisaun to’o finalidade atu lao ho seguru nakonu ho domin, dame no paz iha ambiente hakmatek no laiha violensia, Nia hato’o asuntu ne’e iha Workshop aprezentasaun Global Festa Demokrasia Eleisaun Prezidensial 2022 iha Timor Plaza Dili, tersa (15/02).

Nia haktuirtan PNTL mos sei halo aplikasaun lei ho firme ba grupu hirak ne’ebe maka tenta atu kria problema hodi perturba festa demokrasia ne’e ho nune’e maka membru PNTL tomak hahu husi Kuartel Jeral, Komandu munisipiu no Unidade sei servisu hamutuk sai forsa ba instituisaun PNTL hodi oferese seguru no asegura seguransa ba festa demokrasia Eleisaun Prezidensia 2022 lao ho susesu.

PNTL sei servisu bazeia ba prinsipiu legalidade no profesionalismu, neutralidade hodi servi nia povu lahateke ba rasa, kor no partidu politika atu nune’e povu bele tau nafatin konfiansa ba instituisaun seguransa nia emar sira atu halao knar tuir lei haruka.

“Bem vindu mai fatin ida ne’e iha loron rua nia laran atu nune’e worshop ne’ebe maka ita halao bele hetan rejultadu diak, Komandante sira hotu ita hotu hanoin katak timor ida deit PNTL ida deit hamutuk sai save susesu ba seguransa Eleisaun Prezidensial 2022,”

Atu asegura seguransa ba EP lao ho seguru no sustentavel maka Komandu Operasaun nasional simu orientasaun husi Komandante Jeral PNTL atu prepara planu formasaun no worshop ba festa demokrasia ida ne’e ho objetivu prepara fiziku, mental no konyesementu kapasidade intelektual.

Preparasaun ne’ebe maka PNTL halao maka hanesan: Treinamentu uza forsa no ordem publika ba Komandu PNTL munisipiu 12 no RAEOA, Komandu Jeral, UPM no Sentru Formasaun Polisia (CFP-sigla portuges), Formasaun media ba PNTL munisipiu no Unidade sira, Formasaun ba Sefe Seksaun justisa iha munisipiu 13 no unidade nomos worshop ne’ebe maka halao ohin ne’ebe involve Komandante munisipiu, Komandante Unidade Xefe Departamentu, no Xefe gabinete sira hotu. Formasaun hirak ne’e ho objetivu atu hasae konyesementu ba membru sira hotu hodi halao servisu ho professional, responsabilidade no akuntabilidade durante festa demokrasia ida ne’e.

Alende ne’e Komandu operasaun mos halo hela preparasaun Formasaun ba Ofisial Polisia Suku (OPS), Formasaun ba Xefe investigasaun munisipiu no Eskuadra nomos sei halotan ezersisiu no formatura jeral ka show force.

Workshop durante loron rua (15-16/02) ho tema ‘Eleisaun Seguru ba Ema hotu’ ne’e loke husi Komandante Jeral akompana husi reprejentante Komandante TLPDP no partisipa husi Komandante Komandu munisipiu 12 no RAEOA, Komandante Unidade UEP, UPM no UPF, Xefe Departamentu no Xefe Gabinete sira iha Kuartel Jeral.

Workshop ne’e sei foka liu konaba: Aprejentasaun Global ba Eleisaun Prezidensial 2022, Preparasaun Administrasaun no Lojistika, Sistema Eleisaun Prezidensial hato’o husi Prezidente CNE, Preparasaun STAE ba eleisaun prezidensial hato’o husi Diretor STAE, Krime Eleitoral hato’o husi Prokurador Jeral Republika no aprejentasaun husi Komandante munisipiu sira konaba preparasaun Rekursu Humanu-Rekursu Material no difikuldade.

Workshop ne’e realija tanba hetan apoiu orsamentu husi parseru TLPDP. Media PNTL

Dili-Departamentu Justisa sei garante disiplina no ordem polisia iha aplikasaun lei no ordem iha servisu instituisaun seguransa nia membru sira.

Xefe Departamentu Justisa PNTL Superintendente Xefe Polisia Agostinho Gomes hateten membru hirak ne’ebe partisipa iha workshop durante loron rua ne’e wainhira sira fila ba unidade ida-idak sira ajuda Komandante Unidade atu bele garante disiplina ordem polisia no aplika disiplina iha unidade ida-idak nune’e halo membru sira professional atu nune’e halo asaun polisial iha terrenu tuir lei no ordem nomos ordem  ne’ebe Komandu fo hodi nune’e bele hetan konfiansa mai husi povu, governu no estadu, Nia hato’o asuntu ne’e iha enseramentu workshop pre operasaun Profost iha CFP Komoro Dili, sexta (11/02).

Nia hatutan workshop loron rua ne’e hanesan tempu ne’ebe badak teb-tebes maibe ba futuru hafoin Eleisaun Prezidensial antes tinan 2023 Departamentu Justisa planu atu bele realija kursu Profost ba Komandante Unidade, Xefe Seksaun Justisa sira no eskribaun disiplina iha Seksaun Justisa husi unidade hotu-hotu, ho tarjetu hotu-hotu tenke domina regulamentu disiplina PNTL atu nune’e bele pratika iha unidade ida-idak ho lolos para halo prosesu indisiplina mos ho lolos tuir lei ne’ebe maka iha.

“Brani halo asaun disiplina ho firme, konfia ba Imi nia esperensia no matenek ho dignu,”Komandante Justisa motiva membru sira.

Husu ba membru sira fila ba munisipiu no unidade halao servisu ho disiplina hodi halo prevensaun atu membru PNTL labele komete infrasaun disiplina tanba ho disiplina maka membru PNTL halao servisu ho professional.

Iha okajiaun ne’e Komandante CFP Superintendente Xefe Polisia Arquimino Ramos hateten workshop loron rua (2) ne’e lato’o maibe partisipante sira bele aprende buat ruma hodi ba aplika iha munisipiu no unidade, karik iha tempu oin mai bele iha tan kursu seluk hodi aprofunda konyesementu sira iha neba.

Nia haktuirtan hahu husi imi iha Seksaun Justisa, munisipiu no unidade apoiu Komandante sira atu inplementa regras regulamentu disiplinar ne’ebe iha tia ona no agora daudaun ita uza ona regulamentu foun Dekretu Lei Nu.44/2020 loron 07 outubru.

“Hau espera katak PNTL bele iha mudansa, Komandu Jeral hahu ona hadia no iha mudansa balu tanba lideransa husi Xefe Departamentu Justisa Superintendente Xefe Agustinho Gomes, antes ne’e ita koalia ba malu hodi hadia iha munisipiu no unidade sira,”dehan Komandante Ramos.

Hau nia observasaun iha munisipiu no unidade sira karik imi nia Komandante sira haluha imi mos fo pareser ba sira atu nune’e labele utilija poder disiplinar ne’e para kastigu deit maibe mos utilija poder ne’e hodi fo sansaun ba sira ne’ebe la kumpri lei no fo louvor ba sira ne’ebe maka halo servisu ho diak.

Workshop pre operasaun Profost durante loron rua (2) 10-11/02 ne’e partisipa husi Xefe Seksaun Justisa munisipiu, Unidade, CFP no Justisa Nasional hamutuk nain 37. Serimonia ne’e kompleta ho entrega sertifikadu ba partisipante sira. Media PNTL

Oecusse-Vice Ministru Interior inagura edifisiu Eskuadra Polisia Oesilo Rejiaun Administrativa Espesial Oecusse Ambeno (RAEOA) ne’ebe maka konstrui husi parseru TLPDP.

Vice Ministru Interior Antonio Armindo hateten Ami mai vijita to,o iha edifisiu Esquadra Oesilo no hare kondisaun ladun diak no la saudavel ba membru PNTL atu halo knar iha Esquadra ne,e ho nune’e maka ami agradese ba TLPDP nebe sempre fo suporta makas ba PNTL, Nia hato’o asuntu iha serimonia inagurasaun foin lalais iha Oesilo RAEOA.

Nia husu ba Komandante Esquadra Oesilo ho membrus sira hotu tenke kuidadu Edifisio Esquadra ne,e hodi bele fasilita imi Nia servisu ho kondisaun Diak.

Komandante Komandu Administrasaun Superintendente Xefe Jose Soares agradese ba parseru TLPDP nebe fo apoiu no suporta ba instituisaun PNTL no husu ba Komandante Esquadra hodi servisu hamutuk ho Autoridade lokal hodi fo estabilidade ba Komunidade nebe iha Sub-Regiaun Oesilo.

“Husu ba Autoridade lokal sira hodi servisu hamutuk ho membru PNTL nebe hela besik no liu-liu iha Esquadra Polisia Oesilo hodi asegura no fo estabilidade ba Komunidade iha Fronteira Oesilo,”dehan Komandante Jose.

Agradese no fo parabens ba Kompania nebe maka halo rehabilitasaun edifisio Esquadra Oesilo ate remata ho diak.

Hafoin inaguragurasaun  Komandante Administrasaun PNTL RAEOA entrega edifisio ne’e ba komandante Esquadra Oesilo.

Eskuadra Oesilo rehabilita husi kompania Kompania LB.Era ULU. Unipessoal. Lda ho apoiu finanseru husi parseru TLPDP. Proseso rehabilitasaun edifisio Esquadra PNTL Oesilo ho durasaun Fulan tolu (3) hahu iha dia 04 de Novembru de 2021 no Remata iha dia 10 de Janeiro de 2022.

Serimonia inagurasaun ne’e partisipa husi Komandante PNTL RAEOA Superintendente Xefe mateus Asuncão Mendes, Komandante TLPDP, Adjuntu Prezidente Autoridade RAEOA, Autoridade Lokal Sub-Regiaon Oesilo, Estrutura PNTL RAEOA no konvidadu sira. Media PNTL

Dili- Komandante Komandu Operasaun halo enkontru ho Xefe Departamentu Tranzitu nasional no munisipiu hodi halo evaluasaun servisu tinan 2021.

Enkontru annual ne’e ho objetivu atu halo evaluasaun ba servisu ne’ebe maka departamentu tranzitu halao tia ona iha tinan kotuk no oinsa hadia diak liutan iha tinan 2022 atu nune’e bele hakbesik liu ba komunidade hodi halo sosializasaun konaba lei no regras tranzitu atu  nune’e ema hotu bele kompriende no halo tuir.

Komandante Komandu Operasaun Superintendente Xefe Pedro Belo orienta Xefe Seksaun Tranzitu munisipiu 12 no RAEOA atu halo servisu makaas hamutuk ho membru sira hodi kontrola movimentu ema no transporte nune’e kontribui ba reseita estadu.

“Membru sira servisu ho disiplina uza imi nia matenek no kapasidade hodi inplmeneta lei no regras hotu ne’ebe makai hakbesik aan nafatin ba komunidade no respeta sira nune’e komunidade sira mos iha konsiensia no respeta Polisia nia servisu,”Nia bolu atensaun.

Enkontru Annual ne’e foka liu konaba seguransa rodoviaria iha relasaun ho Eleisaun Prezidensial, Aplikasaun lei Kodigu Estrada no Disiplina no kumprimentu membru tranzitu liu-liu uza fardamentu no seluktan.

Enkontru ne’e lidera husi komandante Komandu Operasaun akompana husi Xefe Departamentu Tranzitu Seguransa Rodoviariu Nasional (DTSRN) Superintendente Jõao Belo Reis no Adjuntu Xefe Tranzitu Inspetur Xefe Inocencio Freitas no partisipa husi Xefe Seksaun Tranzitu munisipiu 12 no RAEO, Postu Mota-Ain no Mota-Masin.   Media PNTL

Dili- Komandu Polisia Nasional Timor-Leste (PNTL) halo treinamentu pre operasaun Xefe seksaun justisa husi munisipiu no unidade hodi asegura eleisaun prezidensial 2022.

Xefe Departamentu Justisa PNTL Superintendente Xefe Agostinho Gomes hateten Profost ou Departamentu Justisa maka iha responsabilidade garantia disiplina no ordem polisial iha instituisaun laran tanba ne’e maka Komandu fornese workshop ne’e ba sira atu nune’e sira fila ba unidade ida-idak bele kontrola membru sira atu halao servisu ho disiplina tuir lei no ordem ne’ebe maka iha, Nia hato’o asuntu ne’e ba Jornalista sira iha CFP Comoro Dili, kuarta (10/02).

Nia haktuirtan workshop ne’e mos hanesan inisiativa Komandu hodi sai hanesan lisaun no referensia ida atu hamutuk hanoin oinsa dezenvolve departamentu justisa hodi garantia disiplina no ordem polisial iha instituisaun PNTL.

Nudar forsa seguransa PNTL tenke disiplina nune’e liu husi workshop ida ne’e bele aumenta konyesmentu, esperensia konaba oinsa garantia disiplina no ordem polisial no liu-liu oinsa halo prosesu infrasaun disiplina ba individual membru PNTL ne’ebe maka komete infrasaun.

Iha abertura Segundu Komandante Jeral PNTL Komisariu Polisia Mateus Fernandes hateten wainhira ita koalia konaba disiplina refleta ita nia isin lolon no refleta ita nia boa vontade tanba disiplina hahu husi ita nia servisu, hatais, koalia no hahalok.

Nia haktuirtan wainhira instituisaun PNTL nia membru sira disiplina diak maka governu kontente no ita nia komunidade sira hanesan objetu seguransa sente kontente teb-tebes tanba ita nia performansia no disiplina diak.

“Komandu nia nehan maka disiplina laiha disiplina signifika ita laiha nehan. Atu hametin ordem publika seguransa ita tenke tata ho disiplina,”dehan Komisariu Mateus.

Segundu Komandante Jeral husu ba partisipante sira atu fo ulun ho neon atu materia hirak ne’ebe maka ita boot sira aprende depois kontribui ba sira seluk nune’e membru sira ne’ebe maka servisu iha profost tenke hare ba Lei, Regulamentu, SOP, Lei organika tuan no Lei organika foun nudar polisia tenke kompriende buat hirak ne’e.

Workshop ne’e halao durante loron rua (10-11/02) partisipa husi unidade 15 (Komandu munisipiu 12 no RAEOA) kada munisipiu nain rua, Unidade Operasional PNTL nain tolu no CFP nain 2 . materia foka liu konaba Regulamentu Disiplina PNTL, Lei organika PNTL artigu balu ne’ebe korespondensia ho departamentu justisa, Normas Organijasaun no Prosedimentu (NOP) Departamentu Justisa no NOP konaba prosedimentu disiplina Administrativu Departamentu Justisa..

Abertura Workshop ne’e partisipa husi Inspetur Jeral PNTL Superintendente Xefe Carlos Jeronimo, Komandante Komandu Operasaun Superintendente Xefe Pedro Belo, Komandante Komandu Administrasaun Superintendente Xefe Jose Soares, Komandante CFP Superintendente Xefe Arquimino Ramos, Xefe Gabinete Koperasaun no Relasaun Internasional, Xefe Departamentu sira, Sub Xefe Informasaun Polisia, Ofisiais Sarjentu no Ajente sira. Media PNTL

Dili- Polisia Nasional Timor-Leste (PNTL) realizasorumutu ho parseru dezenvolvimentu hodi tau hamutuk hanoin no ideia ba apoiu hotu ne’ebe maka parseru sira fo nune’e bele uniformija hamutuk.

Komandante Jeral PNTL Komisariu Polisia Faustino da Costa hateten sorumutu ida ohin inportante oinsa atu tau hamutuk ideia no hanoin konaba apoiu parseru sira nian hodi nune’e ba futuru dezenvolve instituisaun PNTL nune’e bele kompleta no halo tuir misaun ne’ebe iha, Konstituisaun RDTL, Regulamentu no lei hirak ne’ebe vigora iha nasaun ne’e, Nia hato’o asuntu ne’e liu husi diskursu iha salaun City8 Has-Laran Dili, kuarta (09/02).

Nia haktuirtan koperasaun nudar area ida ne’ebe inportante no ita hakarak estimula tanba PNTL bele hamutuk ho parseru sira hotu ne’ebe iha ona esperensia iha tempu barak iha kontaktu barakliu ho realidade tanba ne’e hakarak ka lakoi atu adapta aan ho sira seluk tuir dinamika husi tempu ba tempu.

Apoiu hirak ne’e hotu maka sei hamutuk ho institusaun PNTL atu aliña ninia objetivu hodi trasa estratejia oinsa maka nia misaun ka asaun ba kolaborasaun PNTL nian no ba Timor-Leste ida ne’ebe prosperu no seguru.

“Lori instituisaun PNTL nia naran hakarak agradese ba apoiu hotu husi doador tantu ajensia internasional no organijasaun sira hotu, embaixada sira liu husi adidu sivil, seguransa, adidu militar no defeza ne’ebe kontribui ba dezenvolve PNTL,”dehan Komisariu Faustino.

Parseru sira durante ne’e fo apoiu iha area inportante rua maka hanesan kapasitasaun no dezenvolvimentu infrastrutura. maka hanesan konstrusaun sela, edifisiu VPU, apoiu konstrusaun postu iha fronteira no seluktan, apoiu hirak ne’e iha desde PNTL ejisti to’o ohin loron.

Iha biban ne’e Xefe Departamentu Administrasaun no Planeamentu (DAP) Superintendente Calisto Gonzaga halo aprejentasaun konaba planu prioridade ne’ebe maka PNTL trasa ona maka hanesan Seguransa Nasional, Inkluzaun Sosial no Boa Governasaun (jestaun institusional).

“Ami fiar katak estratejiku ne’ebe maka ami tau iha prioridade tinan 2022 tuir kbiit no sukat kondisaun instituisaun no persija tebes apoiu ne’ebe maka depende ba programa hirak ne’ebe maka ita atu rona husi parseru sira nune’e bele adekua no labele duplika programa hirak ne’ebe durante ne’e ita atrabesa,”.

Liu husi biban ne’e PNTL ho parseru sira tur hamutuk hodi fahe informasaun konaba mapamentu estratejiku instituisaun PNTL ba parseru sira, esforsu ida halo hodi bele asegura komitmentu no politika akordu bilateral husi instituisaun hirak ne’ebe maka asina tia ona.

Kolokiu ne’e realija ho kolaborasaun husi parseru Fundasaun Asia (TAF) no tuir planu kolokiu ne’e sei halao kada fulan nen(6).

Kolokiu durante loron tomak ne’e diriji husi Komandante Jeral no akompana husi Segundu Komandante Jeral Komisariu Polisia Mateus Fernandes no partisipa husi Adidu Seguransa Portugal, parseru Fundasaun Asia, ICRC, UN Women, parseru TLPDP, UNDP no JICA (liu husi Zoom meeting) Inspetur Jeral, Komandante Komandu Operasaun, Komandante munisipiu, Komandante Unidade, Xefe departamentu, Xefe Servisu, no Xefe gabinete sira. Media PNTL

Dili- Komandu Jeral Polisia Nasional Timor-Leste (PNTL) halao enkontru ho Komandante munisipiu, Komandante unidade, Xefe Servisu, Xefe Departamentu no Xefe Gabinete sira iha Komandu Jeral hodi atualija situasaun jeral iha teritoriu laran, preparasaun seguransa ba eleisaun prezidensial no oinsa mantein nafatin disiplina no hirarkia iha instituisaun PNTL.

Xefe Gabinete Relasaun Publika Superintendente Xefe Armando Monteiru hateten asuntu tolu ne’e maka koalia iha reuniaun ohin no kontinua ho reuniaun preparasaun no orientasaun ba Komandante munisipiu no Unidade sira no iha loron 16 sei mai aprejenta planu preparasaun seguransa ba eleisaun jeral no oinsa preparasaun diak liutan, atividade lubuk ida maka sei priense hodi nune’e bele realija seguransa diak ba ita nia festa demokrasia eleisaun prezidensial iha tinan 2022 no Eleisaun Parlamentar 2023, Nia hato’o asuntu ne’e ba jornalista sira hafoin partisipa iha reuniaun iha Kuartel Jeral PNTL Kaikoli Dili, sexta (04/02).

Nia haktuirtan prekupasaun ho difikulkdade hirak ne’ebe maka ohin aprejenta mai husi Komandante Unidade no Komandante Distrital sira Komandu Jeral akomoda hotu, hein katak iha tempu badak nia laran neneik maibe bebeik hodi responde, kompleta no fasilita membru sira hodi halo knar ho diak, ida ne’e mak persija orienta hela hodi nune’e Komandante sira fila-fali ba hodi hatutan hikas orientasaun husi Komandu ba membru sira hodi kumpri no ejekuta no inplementa bainhira sira halao sira nia knar iha terrenu.

“Husi reuniaun ne’e fo sai orientasaun 19 ba komandu munisipiu no Unidade hodi kontrola membru sira nune’e membru PNTL hotu iha ne’ebe deit hatudu nafatin komportamentu, neutralidade, imparsialidade ba kualker insidente no asidente ne’ebe maka mosu iha ita nia komunidade nia leet hodi nune’e ita hetan konfiansa nafatin husi komunidade atu nune’e bele garante sidadaun sira nia seguransa,” Nia esplika.

Komandu Jeral PNTL, nivel komandu distrital no unidade mos halo ona komunikasaun no reuniaun ho orgaun eleitoral tanba ne’e maka diretiva balu ne’ebe maka fo sai inplementa no ejekuta ona oinsa atu asegura orgaun eleitoral liu-liu ba Sede, Brigada nomos teknika eleitoral sira hodi nune’e sira bele hahu kedas prepara agora nune’e labele iha impedimentu ruma ba preparasaun eleisaun.

Kestiona konaba progresu konstrusaun edifisiu Kuartel Jeral PNTL Eis Komandante munisipiu Baucau ne’e informa iha semana kotuk Embaixada Cina no Kompania Sanghai Construction halo ona reuniaun ho Komandu Jeral no hein nia progresu inplmenetasaun.

Kontrusaun ne’e paradu tanba estatutu disputa rai ho komunidade maibe hein katak hanesan instituisaun estadu ami konfia no entrega ba entidade relebante oinsa atu buka solusaun ba PNTL nia prekupasaun ida ne’ebe maka durante ne’e ami infrenta nune’e hahu iha semana ida liu ba kompania kontinua hikas konstrusaun.

Iha biban ne’e Komandante Monteiro atualija katak ohin husi progresu situasaun atual hafoin de mosu perturbasaun ordem publiku iha loron 02 liu ba depois de ida ne’e situasaun jeralmente iha teritoriu timor laran tomak lao kalma no hakmatek maske iha asidente no insidente balu maibe ho informasaun no kolaborasaun husi entidade no komunidade nomos Polisia nia atendementu bele normalija situasaun seguransa iha rai laran. Media PNTL