News

Dili, Polísia Repúblika Indonezia (Polri) kaptura sidadaun Timor oan hamutuk ema naín 113 iha Atambua, Munisipiu Belu, Provinsia Nusa Tenggara Timur (NTT) Indonesia. Sidadaun hirak neé kompostu husi mane naín 103 no feto naín 8 neébe maka Polri kaptura iha loron segunda-feira (09/08) iha tuku 09:00 oras Indonezia nian.

Porta Voz Komandu Polísia Nasional Timor-Leste (PNTL) Superintendente Xefe Arnaldo Araújo liu husi konferensia imprensa tersa-feira (10/08) neé informa sidadaun hirak neé Polri kaptura iha loron hirak liu ba wainhira sira halaó hela aktividade iha Indonesia no oras neé dadaun sidadaun hirak neé iha hela Polri nia liman, iha tempu badak ema hirak neé sei deporta mai ita nia rai liu husi odamatan Batugade.

“Dalan neébe maka sira sempre uza hodi liu hakat ba Indonezia maka liu husi dalan hat maka hanesan husi rai tolu no tasi ida, dalan husi rai tolu neé maka Fatumean, Lamaknen no Turiskai no mós liu husi tasi, sira neé maka atravesa ba Indonezia Atambua hodi ba halo aktividade iha neéba”, tenik Porta Voz Komandu PNTL neé.

Superintendente Xefe afirma ita hotu hein katak iha tempu badak Polri  sei entrega sidadaun hirak neé liu husi ita nia Imigrasaun no liu husi odamatan Batugade nian. Hafoin ema sira neé lori mai ita nia rai maka sei halaó tuir regras neébe maka vigora iha ita nia rai. Otamatikamente sira mós sei tama Kuarentena loron 14 hafoin maka halo prosesu tuir mai.

“Hakarak hatoó obrigadu wain ba governu Indonezia, liu-liu Polísia Indonezia nian espesial ba Polres Belu neébe maka sira ho esforsu makaás bele kaptura ita nia sidadaun sira neébe maka agora dadaun iha hela sira nia fatin, hatoó mós obrigadu wain ba ita nia Atase Polri neébe maka agora dadaun iha Timor-Leste, nia mós servisu makaás, halo kooperasaun diak ho PNTL hodi nuneé ita nia servisu kooperasaun bele lao ho diak maka ema neébe agora dadaun detein hela iha Polres Belu sei entrega iha tempu badak”, afirma Xefe Gabinete Relasaun Públika neé.

Media PNTL.

Dili, Komandu Polísia Nasional Timor-Leste (PNTL) segunda feira (09/08) ne’e desloka tan ekipa ida membru PNTL hodi reforsa seguransa iha liña fronteira atu prevene variante virus Delta tama mai Timor-Leste.

Komandante Komandu Operasaun Superintendente Xefe Pedro Belo ba jornalista sira hateten, ne’e planu husi Komandante Jerál PNTL nian no ema hotu nia preukupasaun seguransa ba iha liña fronteira nian, tanba ita hatene katak iha fronteira ne’eba ita iha membru ne’ebe limitadu tebes-tebes liu-liu sira ne’ebe destaka iha postu sira.

“Tanba ne’e ita reforsa tan husi Komandu Jerál no molok ida ne’e mós reforsa ona husi Unidade Espesial Polísia (UEP) ne’ebe maka koloka ona iha ne’eba (Fronteira-red) no oras ne’e dadaun ami atu koloka tan ekipa atu reforsa tan ba parte fronteira ninian, atu ita hotu tenke asegura fronteira tanba oras ne’e dadaun iha movimentu illegal ema ne’ebe maka’as tebes-tebes iha fronteira ninian”, tenik Komandante Komandu Operasaun PNTL ne’e.

Superintendente Xefe ne’e salienta tan katak ekipa ne’e iha misaun ne’ebe klaru hodi bele koopera hamutuk ho nia maluk sira iha ne’eba (Fronteira-red) no sei orienta direita husi Komandante sira ne’ebe enkarega iha parte fronteira nian, sira hotu sei submete ba iha ne’eba (Fronteira-red) hodi bele asegura ita nia fronteira ho diak, tanba ita hotu hatene katak oras ne’e dadaun iha moras ida variante foun Delta ne’ebe maka oras ne’e dadaun sa’e maka’as iha ita nia nasaun viziñu no tuir informasaun balun mos tama ona mai Timor-Leste.

“Ho ida ne’e maka ita tenke asegura fronteira ho metin atu nune’e ema sira labele halo movimentu tun sa’e iha parte fronteira nian, maibé ohin ekipa ida ne’e ho nia misaun ne’ebe klaru tebes-tebes, sira sei lao ho servisu, sira sei lao ho Sentidu Estadu nian no sira sei hatudu rezultadu ne’ebe diak ba povu no rai ida ne’e”, hatutan Superintendente Xefe ne’e.

Media PNTL.

Dili, Embaixada Australia iha Timor-Leste liu husi Parseiru Desenvolvimentu Timor Leste Police Development Program (TLPDP) sexta-feira (30/07) ne’e finaliza rehabilitasaun edifisiu Servisu Informasaun Polísia (SIP) Komandu Polísia Nasional Timor-Leste (PNTL).

Reprezentante Komandu PNTL Komandante Komandu Administrasaun Superintendente Xefe José Soares iha ninia intervensaun manifesta agradesimentu profunda ba Embaixada Australia ne’ebe ho laran luak tulun ona SIP hodi hadia nia kondisaun servisu.

“Hau no ita sira ne’ebe ohin halibur hamutuk iha fatin ne’e sai sasin hahu’u husi PNTL ne’e estabelese, dala-ruma parseiru sira mai tinan rua ka tolu mai sira nia misaun termina, sira fila maibé husi lideransa ne’ebe husi inisiu kedas apoiu ba PNTL kontinua to’o ohin loron, PNTL ida ne’e hamrik to’o ohin loron, ita hamrik iha nasaun sira seluk ita bele ba hola parte iha Nasaun Unidas, ita hamrik iha auto-konfiansa ida katak hau reprezenta Polísia tanba parseiru sira nia apoiu”, afirma Komandante Komandu Administrasaun PNTL ne’e.

Superintendente Xefe ne’e salienta tan katak PNTL apresia tebes ba saida maka TLPDP halo desde tinan 2004 to’o ohin loron, kondisaun barak maka sira (TLPDP-red) kria ba ita PNTL, infrastrutura, formasaun sira ne’e ita la konta, orsamentu mai husi Embaixada ba iha TLPDP.

Iha fatin hanesan reprezentante Embaixador Australia iha Timor Leste Mr. Dhan hateten parte governu Australia liu husi ninia embaixada hamutuk ho TLPDP espera bele kontinua servisu hamutuk ho PNTL hodi bele hadia fatin ba SIP hodi hala’o servisu diak iha futuru.

“Ami espera bele apoiu nafatin SIP iha futuru hodi hadia diak liu tan profesionalizmu SIP nian iha servisu loron-loron, agradese mós ba kontraktor ne’ebe bele tulun hodi hadia edifisiu SIP nia ne’ebe maka ohin ita finaliza ona ninia rehabilitasaun”, tenik reprezentante Embaixador Australia ne’e.

Tuir Xefe SIP Superintendente Boavida Ribeiro katak rehabilitasaun ne’e hala’o durante semana tolu nia laran, iha ne’ebe kompañia Timor oan ida maka sai hanesan kontraktor hodi rehabilita edifisiu SIP nian. Orsamentu ne’ebe utiliza ba iha rehabilitasaun ne’e mai husi Embaixada Autralia hamutuk dolar rihun sanulu ($10.000,00) hodi hadia parte balun husi edifisiu nian ne’ebe att no konstrui mós sala ida ba servisu administrasaun SIP nian. Media PNTL.   

Dili, Komandu Polísia Nasional Timor-Leste (PNTL) durante semana rua nia hahu’u husi loron 14 to’o loron 28 fulan Jullu tinan 2021 rezista Insidente hamutuk 90 no Asidente 20 ne’ebe maka akontese iha teritoriu nasional.

Porta Voz Komandu PNTL Superintendente Xefe Arnaldo Araújo kinta-feira (29/07) ne’e relata ba jornalista sira katak husi total Insidente 90 ho tipu maka hanesan: Asaltu malu 53, ahi han 2, asaltu sexual 1, ameasa 3, Disturbasaun jerál 4, estraga Propriadade 2, Furto 4, Suisidiu/oho ann/tara ann 1, Violensia Domestika 18, Homesidiu 1 no mate derepente 1.

“Entretantu total kazu asidente tráfiku 20 ne’ebe akontese durante semana rua nia laran maka ho tipu kazu hanesan kareta ho kareta 3, motor ho motor 2, kareta ho motor 4, single 7 no soke ema lao ain hamutuk 4, husi total asidente hirak ne’e rezulta kanak kma’an 28, kanek todan 1 no mate 1”, esplika Porta Voz Komandu PNTL ne’e.

Superintendente Xefe ne’e salienta liu tan katak iha loron 24 fulan Jullu tinan ne’e akontese ahi han uma iha munisipiu Bobonaro iha Aldeia Samelaun, Suku Ritabou, Postu Administrativu Maliana, munisipiu Bobonaro. No kazu homesidiu ida akontese iha loron 27 fulan Jullu iha area Aldeia Kirilelo, Suku Asumanu, postu Administrativu Liquiça munisipiu Liquiça iha ne’ebe aman maka oho nia oan rasik.

Membru PNTL Hamutuk Na’in 3.510 Simu Ona Vasina

Iha biban ne’e Porta Voz Komandu PNTL relata mós total membru PNTL ne’ebe simu ona Vasina COVID-19 hamutuk 3.510 husi total membru PNTL aktual hamutuk ema na’in 4.104. Husi númeru hirak ne’e, membru PNTL ne’ebe seidauk simu Vasina hamutuk na’in 504.

“Razaun ba sira ne’ebe seidauk simu Vasina tanba moras permanente, Strok, Ran Midar, Tensaun no aimoruk Vasina nian mak la sufisiente tanba iha munisipiu balun aimoruk seidauk to’o iha fatin”, tenik Superintendente Xefe ne’e.

Media PNTL. 

Dili, Komandu Polísia Nasional Timor-Leste (PNTL) liu husi ekipa konjunta hanesan Servisu Investigasaun Kriminal Nasional (SIKN) ho Komandu PNTL munisipiu Dili eskuadra Dom Aleixo kaptura ona suspeitu ne’ebe envolve iha insidente ahi han uma iha area eis Merkadu Comoro.

Liu husi Konferensia Imprensa ne’ebe hala’o iha kinta-feira (29/07) ne’e Porta Voz Komandu PNTL Superintendente Xefe Arnaldo Araújo hateten suspeitu refere além de komete krime insendiu, komete mós aktu krime rua seluk.

Iha loron 29 fulan Jullu 2021 oras 03:30 otl, iha insidente iha akontese iha area Aldeia 02, Suku Fatuhada, Postu Administrativu Dom Aleixo munisipiu Dili, ne’ebe rezulta ahi han uma iha area eis Merkadu Comoro nian.

Hafoin insidente ne’e akontese, husi SIKN servisu konjunta ho Komandu PNTL munisipiu Dili eskuadra Dom Aleixo duni tuir kedas suspeitu no iha oras 05:00 otl, ekipa identifika suspeitu komete tan aktus ba krime ida hodi harahun vidru iha rezidensia Korpu Diplomátiku Nova-Zelandia ho Australia nian iha area Praia dos Qoquiros no imediatamente kaptura kedas suspeitu iha fatin refere hodi transporta kedas mai iha edifisiu SIKN.

Iha prosesu indentifikasaun nia laran, investigador identifika suspeitu ho inisial F.A.P. komete aktus krime hanesan:

1. Krime iha Konkursu (Código Penal Artigu 35)
2. Insendiu (Código Penal Artigu 263)
3.  Danu-Agravadu (Código Penal Artigu 259)

Ho ida ne’e, investigador prepara ona Auto-Notisia Flagrante-Délitu ho númeru NUC: 0397/21.DICMR. No agora dadaun, suspeitu detein hela iha Sentru detensaun Komandu PNTL munisipiu Dili, hodi aprezenta ba iha Primeiru Interrogatoriu iha Tribunal munisipiu Dili molok oras hitu-nulu-resin-rua (72).

Kazu Maliana

Entretantu iha konferensia imprensa ne’e, Porta Voz Komandu PNTL relata mós insidente ida ne’ebe akontese iha munisipiu Bobonaro. Iha loron 24 fulan Jullu 2021 oras 13:50 otl, iha insidente iha akontese iha area Aldeia Samelaun, Suku Ritabou, Postu Administrativu Maliana, munisipiu Bobonaro ne’ebe rezulta ahin han uma rua (2).

Hafoin insidente ne’e akontese, husi Komandu PNTL munisipiu Maliana servisu konjunta kompostu husi Unidade Espesial Polísia (UEP) no Falintil Forsa Defesa Timor-Leste (F-FDTL) halo kedas atuasaun hodi hapara aktus krime refere no notifika kedas suspeitu na’in hitu (7) hodi halo identifikasaun.

Kazu Liquiça

Iha loron 27 fulan Jullu 2021 oras 18:20 otl iha insidente ida ne’ebe akontese iha area Aldeia Kirilelo, Suku Asumanu, postu Administrativu Liquiça munisipiu Liquiça. Hafoin Komandu PNTL munisipiu Liquiça simu tia informasaun, imediatamente desloka kedas ba iha lokal do Krime.

To’o iha fatin refere, ekipa konfirma katak iha duni kazu homesídiu ne’ebe rezulta vitima mane ida mate no deskonfia hetan oho husi ninia aman. Ho ida ne’e investigador prepara Auto-Notisia Flagrante-Délitu ho númeru NUC: 0053/21Lilik. No agora dadaun, suspeitu detein hela iha Sentru Detensaun Komandu PNTL munisipiu Liquiça, hodi aprezenta ba iha Primeiru Interrogatoriu iha Tribunal munisipiu Dili molok oras hitu-nulu-resin-rua (72).

Media PNTL.            

Dili-Komandante Jeral PNTL no Segundu Komandante Jeral atualija situasaun seguransa teritoriu nasional  ba Prezidente Republika (PR) Francisco Guterres Lu-Olo katak situasaun lao diak.

Komandante Jeral Komisariu Polisia Faustino da Costa hateten   situasaun jeral teritoriu nasional lao diak maske iha akontesementu balu hanesan kazu Homesidiu iha Liquica, akontesementu iha Lahane no informasaun konaba akontesementu balu iha Kovalima, Nia hato’o asuntu ne’e ba Jornalista sira iha Palasiu Prezidensial Bairo-pite Dili, kinta(29/07).

“Durante semana ida ne’e nia laran iha kazu akontesementu hamutuk 50 ida ne’e maka Ami atualija ba Xefe Estadu,” dehan Komisariu.

Iha biban ne’e lideransa maximu instituisaun seguransa ne’e fo sai ba publiku katak governu dekreta ona serka sanitaria ba munisipiu Ermera no mantein serka sanitaria iha Dili tanba ne’e ema hotu tenke mai ho hanoin ida katak virus ne’e iha, Estadu Emerjensia lao no tenke evita aglomerasaun (halibur malu) iha ne’ebe deit no evita halo festa ne’ebe halibur ema barak tanba Komandu sei hare no atua selae fo inplikasaun boot.

Komandu fo ona ordem eskrita ba munisipiu atu kontrola no evita aglomerasaun, nune’e mos ba sidadaun hirak ne’ebe maka tuir ona vasinasaun COVID-19 atu nafatin halo imi nia atividade maibe labele fasilita ema ne’ebe maka la vasina se lae Polisia sei kaer no detein ema ne’ebe lori kartaun no ida ne’ebe maka fo nia kartaun kazu ne’e akontese barak; Orientasaun ida ne’e laos deit ba postu entrada no saída husi kapital Dili ba munisipiu maibe mos ba Ermera no munisipiu hotu hodi evita aglomerasaun, Se numeru infetadu COVID-19 tun ona ida ne’e diak liu ita lakoi kazu sae fila-fali maka tenke disiplina.

Nune’e mos sidadaun sira ne’ebe tenta falsifika rejultadu swab test Ami sei detein hotu, ita tenke konsiente katak moras ne’e risku no ita lakoi atu variante virus foun mosu barak liutan maka ita tenke halo prevensaun tuir protokolu saude mundial.

PNTL kontinua asegura fronteira Komandu orienta atu la tolera sedeit maka halo atividade illegal, ita kordena ho parte relevante sira oinsa atu asegura inklui mos ita identifika timor oan hira maka hela iha Indonezia ilegalmente, informasaun ne’e ita halo no iha tempu ruma bele iha deportasaun husi Indonezia mai timor.

Iha biban ne’e Prezidente Republika husu ba PNTL atu kontinua halo servisu bazeia ba lei, regulamentu no prosedimentu ne’ebe maka iha. Media PNTL

Dili-Durante fulan Jullu (1-26) Polisia Nasional Timor-Leste (PNTL) kaptura sidadaun nain 33 ne’ebe pasa fronteira ilegalmente ba Indonezia hodi submete ba prosesu.

Komandante Jeral PNTL Komisariu Faustino da Costa hateten husi loron 1-26 Jullu autoridade seguransa kaptura sidadaun nain 27 inklui sira ne’ebe komunidade rasik identifika no ikus mai Polisia ba foti no kaptura nain 6 total hamutuk ema nain 33; sidadaun hirak ne’e halao atividade negosiu illegal iha fronteira no joven sira tenta ultrapasa fronteira ilegalmente ba Indonezia, nia hato’o asuntu ne’e ba jornalista sira iha Kuartel Jeral PNTL Kaikoli Dili, tersa (27/07).

Komisariu haktuirtan iha postu sira halo mos cek poin, durante semana rua ne’e nia laran identifika falsifikasaun dokumentus tolu hanesan imprime kartaun falsu, tanba ne’e maka halo mos prosesu ba diretur kompania imprime balu iha Dili laran, segundu ema sira ne’ebe vasina kompletu fo sira nia kartaun kinur ba ema seluk ne’ebe rejista kazu 7 hodi detein no prosesu no mos ema ne’ebe nunka tuir swab derepente iha falsifikasaun rejultadu swab test para sai husi Dili ba munisipiu kazu ne’e mos ita halo prosesu.

“Polisia Unidade Espesial, UPF, Komandu munisipiu no Unidade Polisia Maritima kontinua reforsa seguransa iha fronteira terestre no parte tasi; Polisia lahare deit kestaun fronteira Terrestre maibe hare mos deslokasaun tanba Estadu Emerjensia a nivel nasional maibe serka sanitaria ne’e ba kapital Dili nune’e sidadaun hirak ne’ebe halo viajen husi Dili ba munisipiu tenke tuir prosedimentu tanba ne’e maka ema balu aproveta ida ne’e hodi halo falsifikasaun hodi imprime kartaun falsu ho kuantia boot no faan kada kartaun $5, iha mos sidadaun nain ida ne’ebe maka Polisia kaptura wainhira atu halo viajen ba Maliana lori ho kartaun kinur mamuk ne’ebe hein atu priense nia mos iha lista ema ne’ebe hatama ona osan, hahalok ne’e konsidera krime ne’e falsifikasaun ida ne’ebe ita halo prosesu.”dehan Komandante Jeral.

PNTL mos halo atividade direta ba Oe-Cusse RAEOA hahu kedas husi Dili oinsa atu halo deslokasaun ita prepara halo identifikasaun nune’e mos orientasaun fo ona ba Komandante sira katak viajen Dili-Covalima, Dili -Maliana Polisia sei cek se sidadaun ne’e laos orijen husi munisipiu refere maka husu tuir nia objetivu viajen saida, nune’e buat ne’ebe maka akontese iha semana ida liuba kotuk ita halo kapturasaun joven lubuk ida husi Dili, Ainaro no Manatuto hakarak ba vizita familia iha Maliana maibe laiha objetivu ida klaru entaun ita prosesu no haruka sira fila impede sira nia viajen ba Bobonaro.

Atu termina Komandante Jeral haktuir katak asuntu fronteira ne’e kestaun disiplina se ita lakoi variante virus foun Delta tama timor maibe PNTL no F-FDTL mesak halo servisu iha fronteira ne’e la fasil, atu kombate atividade illegal presija ema hotu nia kontribuisaun hodi solusiona. Media PNTL                           .

Dili, Komandu Polísia Nasional Timor-Leste (PNTL) liu husi ekipa konjunta hanesan Servisu Investigasaun Criminal Nacional (SICN) hamutuk ho Servisu Informasaun Polísia (SIP), Servisu Informasaun Militar (SIM) no Servisu Nasional Informasaun (SNI) kaptura ona suspeitu mane na’in ha’at ne’ebe involve iha kazu homesidiu ida ne’ebe akontese iha loron 9 fulan Jullu tinan ne’e.

Liu husi Konferensia Imprensa ne’ebe hala’o iha segunda-feira (26/07) ne’e Porta Voz Komandu PNTL Superintendente Xefe Arnaldo Araújo ne’ebe akompaña husi Xefe SICN Superintendente Xefe José Neto Mouk hateten suspeitu hirak ne’e ekipa konjunta kaptura iha idak-idak nia residensia.

Insidente refere akontese iha loron 9 fulan Jullu 2021, iha oras mais ou menus 00:45 otl iha area Fomentu, Aldeia Delta 3, Suku Comoro, Postu Administrativu Dom Aleixo, munisipiu Dili ne’ebe rezulta vitima ida ho naran Hilario Vitalicio Soares mate iha fatin akontesimentu.

Relasiona ho kazu refere, maka iha loron 23 fulan Jullu tinan ne’e, Servisu Investigasaun Kriminal Nasional (SIKN) simu Mandadu Detensaun husi Tribunal Distrital Dili ho númeru NUC.0155/21.PNSIC. Tanba ne’e, iha loron 26 fulan Jullu iha oras mais ou menus 08:00 otl, husi SIKN ezekuta mandadu refere hodi halo detensaun ba suspeitu na’in ha’at ne’ebe maka komete iha kazu homesidiu refere.

Agora dadaun, suspeitu hirak ne’e detein hela iha sela Komandu PNTL munisipiu Dili hodi hein aprezenta ba Tribunal Distrital Dili hodi submete ba iha Primeiru Interogatoriu. Suspeitu hirak ne’e ho inisial J.S.P, J.S, M.S.C no M.M.C.P

Media PNTL.    

Dili-Komandu Polisia Nasional Timor-Leste (PNTL) halo reuniaun Konsellu Superior (KS) hodi foti desijaun ba membru ne’ebe komete iregularidade.

Sekretariu KS Superintendente Xefe Carlos Jeronimo hateten reuniaun ohin hanesan reuniaun dahuluk iha tinan 2021 hodi halo diskusaun ba kazu tolu (3) hanesan kazu Homesidiu iha Ainitas hun, kazu Burla no Abandona servisu, nia hato’o asuntu ne’e ba Jornalista sira iha Kuartel Jeral PNTL Kaikoli Dili, Sexta (23/07).

“Komforme opiniaun membru Konsellu kazu Ainitas hun maioria votasaun ba demisaun, kazu falta servisu votus afavor 15, kontra 8 no maioria demisaun nune’e mos kazu burla rejultadu votasaun afavor 22, no kontra 1; Rejultadu votasaun maioria membru Konsellu Superior desidi fo demisaun ba membru hirak ne’ebe maka komete kazu ne’e,” Nia dehan.

Liu husi Reuniaun ne’e Konsellu Superior foti desijaun ba kazu hirak ne’ebe maka nia prosesu hotu ona.

Alende ne’e reuniaun Konsellu superior durante loron tomak ne’e koalia mos konaba preparasaun seguransa ba Eleisaun Prezidensial no Eleisaun Parlamentar nomos situasaun seguransa enjeral agora.

Reuniaun ne’e prezidi husi Komandante Jeral PNTL Komisariu Faustino da Costa no Segundu Komandante Jeral Komisariu Mateus Fernandes no partisipa husi Komandante PNTL munisipiu 12 nomos Komandante Operasaun Nasional, Komandante Administrasaun no Komandante Unidade UPF, UPM no UEP. Media PNTL

Dili, Komandu Polísia Nasional Timor-Leste (PNTL) durante semana rua nia laran konsege kaptura sidadaun Timor oan hamutuk na’in 9 ne’ebe tama ilegalmente liu husi fronteira no sidadaun estrangeiru na’in 14 seluk ne’ebe maka deporta ona ba sira nia rai.

Lia hirak ne’e hato’o husi Komandante Jerál PNTL Komisariu Polísia Faustino da Costa akompaña husi Segundu Komandante Jerál Komisariu Polísia Mateus Fernandes hafoin hala’o enkontru semanal ho Prezidente Repúblika Dr.Francisco Guterres Lu-Olo kinta-feira (22/07) semana ne’e hodi aprezenta mós situasaun seguransa aktual iha nivel teritoriu nasional ne’ebe lao diak no kontroladu.

“Maibé iha ita nia sidadaun balun maka tenta hodi halo nafatin aktividade ultrapasa fronteira illegal, ita halo ona kapturasaun ba sira (Sidadaun na’in 9-red) ne’ebe koko atu sai, balun ne’ebe sai ona ita koordena no iha balun ne’ebe ita deporta, seguransa nafatin iha fronteira ita tau/koloka koordena ho entidades hotu, parte relevante liu-liu ita nia lideransa komunitaria sira iha fronteira, tantu parte tasi nian mós”, esplika Komandante Jerál PNTL ne’e.

Komisariu Polísia ne’e afirma tan kona-ba variante Virus Delta ne’ebe maka iha rai ketan Indonesia komesa iha ona, oinsa atu virus ne’e labele tama mai iha ita nia rai maka ita hotu tenke prevene aktividade illegal tantu ema no sasan tanba polísia sei la tolera ida ne’e atu akontese. Sidadaun hirak ne’ebe polísia kaptura, uluk kna’nain kumpri lai regras Estadu Emergensia (EE) nian, submete ba Kuarantena, wainhira livre ona husi Kuarantena maka kontinua ho prosesu investigasaun. Iha loron 17 fulan ne’e akontese mós kazu ida, inan ida ne’ebe laiha neon hodi soe nia oan iha lixeiru, kazu refere ita prosesu hela.

“Iha enkontru ne’e Xefe Estadu nafatin husu ba autoridade seguransa atu mantein aktualiza situasaun seguransa iha nivel teritoriu nian; husu atu PNTL kontinua kumpri kna’ar no responsabilidade hodi garante seguransa ba ema hotu”, tenik Komisariu Polísia ne’e.

Iha biban ne’e, autoridade másimu instituisaun seguransa ne’e hato’o Parabéns ba Timor oan hotu iha âmbitu komemorasaun loron mundial Saúde nian, husu atu hotu-hotu nafatin kumpri regras EE nian hanesan fase liman bebeik, mantein distansia sosial atu ema hotu iha saúde ne’ebe diak.

Media PNTL.