News

Dili, Komandu Polísia Nasional Timor-Leste (PNTL) liu husi Departamentu Administrasaun no Planeamentu Nasional (DAP) no Departamentu Polisiamentu Komunitaria Nasional (DPKN) hamutuk ho parseiru desenvolvimentu The Asia Foundation (TAF) sexta-feira (11/12) ne’e realiza Kolokiu Nasional ida kona-ba Planu Asaun Munisipiu (PAM) ne’ebe akipa traballu husi TAF, Planeamentu Nasional no DPKN prepara ona ba Komandante PNTL munisipiu 13, Komandante Eskuadra no Polisiamentu Komunitariu munisipiu sira.

Planu Asaun Munisipiu (PAM) mak mata-dalan ida ba servisu Polisiamentu Komunitáriu hodi implementa estratejía Komandu Jerál nian ba atinji vizaun no misaun enjeral. PAM ne’e mós sai nu’udar dokumentu advokasia ida hodi halo kontaktu ho parte interesada sira atu hetan atensaun hodi aloka rekursu finanseiru no seluk tan ba apoia servisu polisiamentu komunitáriu no estratejía PNTL enjeral.

Xefe DAP Superintendente Calistro Gonzaga iha entrevista hateten sorumutu ohin ne’e atu ita hare’e Planu Asaun Munisipal ida ne’ebe maka atu halo Uniforme, atu hetan apoiu husi ajénsia internasional sira.

“Tanba iha avaliasaun lubuk ida ne’ebe maka ita halo, iha munisipiu balun maka iha avansu/mudansa maibé iha munisipiu balun presiza hetan mós informasaun hodi hetan ballansu, nune’e maka ita realiza sorumutu ida ne’e atu bele kompratilla/fahe informasaun kona-ba Normas Organizasaun Planeamentu Asaun Munisipal nian”, esplika Xefe DAP ne’e.

Superintendente Calistro afirma tan iha sorumutu ne’e iha diskusaun kona-ba segmentu saida maka sei ajusta ba iha Normas Organizasaun ida ne’e, hodi ikus mai hetan rezultadu segmentu saida ba Normas ida ne’e no aprezenta ba Komandante Jerál PNTL hodi aprova, nune’e ita utiliza hanesan Planu Asaun Munisipal (PAM) atu bele hetan apoiu husi parseiru desenvolvimentu sira.

“Planu ne’e ona maibé ita hakarak atu ajusta fila fali, tanba iha munisipiu balun ne’ebe maka implementa husi TAF halo ona maibé iha munisipiu balun seidauk hetan informasaun konkretu tanba ne’e maka ita halo Normas ida ne’e atu bele munisipiu hotu-hotu tenke hetan informasaun, atu nune’e iha tinan 2021 hotu-hotu tenke lao ho Planu ida ne’e”, akresenta Superintendente ne’e.

Planu Asaun Munisipal (PAM) ida ne’e sei lao ho ninia Normas programa sira hanesan atu hetan apoiu kona-ba sorumutu, deseminasaun Lei ruma, atu halo sensibilizasaun ba informasaun husi polísia ba iha komunidade, ida ne’e maka ita halo Normas ida atu munisipiu sira hotu tenke hato’o informasaun ba komunidade tenke uniforme.

Kolokiu ho tema “Aprezentasaun Normas Prosedimentu No Organizasaun (NOP) Ba Planu Asaun Munisipal (PAM), Programa Polisiamentu Komunitariu” hala’o iha salaun Konferensia Tower-Fatuhada ne’ebe abertura husi Komandante Jerál PNTL Komisariu Polísia Faustino da Costa akompaña husi Komandante TLPDP, Xefe DAP, Xefe DPCN no partisipante sira iha Kolokiu ne’e maka Komandante PNTL munisipiu 13, Komandante Eskuadra no Polisiamentu Komunitariu munisipiu sira.

Media PNTL.        

Dili- iha insiu fulan Dezembru Polisia nasional Timor-leste (PNTL) rejista kazu insidente hasmutuk hitu (7) no asidente trafiku tolu(3)

Porta Voz PNTL Superintendente Xefe Arnaldo de Araujo hateten durante inisiu fulan Dezembru PNTL rejista kazu insidente hamutuk 7 ne’ebe rejulta ema nain ida (1) mate tanba monu husi ai, Nia hato’o asuntu ne’e liu husi komferensia emprensa iha Sentru Formasaun Polisia Komoro Dili, Kinta (11/12).

Nia haktuirtan alende ne’e rejistamos kazu asaltu cineza iha Baucau, Ahi han uma, tentativa sexual hasoru minoridade iha munisipiu Cova Lima no kazu seluktan, Alende ne’e PNTL mos rejista Asidente trafiku hamutuk tolu (3), nain ida mate no rua kanek kmaan, asidente ne’e akontese tanba fator humanu kondus motor ho kondisaun lanu no la kontrola velosidade.

     Liu husi Komferensia emprensa ne’e Porta Voz PNTL husu ba sidadaun hotu-hotu  liliu ba joven sira labele hemu tua iha dalan publiku hodi halo perturbasaun no Nafatin bandu sunu foguete/ só bele sunu iha 31 kalan hodi simu tinan foun.

Fo hanoin mos winhira iha tempu udan kuidadu uza Telefone tanba bele iha koneksaun ho dejatre railakan nune’e mos wainhira lori kareta ho motorizada labele preokupa ho telephone tanba bele hetan asidente. Nune’e mos inan-aman sira atu kontrola oan sira iha tempu udan bo’ot tun labele ba halimar be’e iha Estrada publiku tamba bele fó ameasa ba ita/Desastre. Media PNTL

Dili- Polisia Nasional Timor-Leste (PNTL) halao workshop loron ida ba Xefe operasaun munisipiu no xefe Sentru Operasaun Distrital hodi halo uniformijasaun relatoriu servisu Komandante sira nian.

Komandante Jeral PNTL Komisariu Faustino da Costa hateten liu husi worksop ida ne’e atu fo hanoin hikas ba Komandante sira atu nune’e kualker atividade ne’ebe maka sira halao tenke relata informasaun kompletu mai Komandu Jeral, Nia hato’o asuntu hirak ne’e iha Sentru Formasaun Polisia Komoro Dili, Kinta (10/12).

Komisariu ne’e haktuirtan Komandante sira mos tenke identifika problema saida maka akontese hodi halo planu operasaun no planu atendementu hodi fo seguransa maximu ba povu no nasaun.

Durante ne’e dalaruma komandante sira hato’o relatoriu atraza, relatoriu la kompletu no presija verifika fali tanba ne’e maka liu husi avaliasaun ne’ebe maka ita halao ho Komandante Sentru Operasaun Nasional foun nesesita katak ita presija halo fila-fali workshop ida hanesan ne’e para halo uniformijasaun tanba iha rotasaun komandante husi nivel nasional to’o munisipiu, Unidade, Xefe Seksaun no Xefe Operasaun munisipiu sira tanba ne’e maka presija halo uniformijasaun katak ita nia formatu relatoriu maka ida ne’e no presija hotu-hotu kompleta.

Relasiona ho selebrasaun loron Santu  Natal no tinan foun Komandu PNTL hasai ona orientasaun operasaun ba Komandante munispiu sira atu asegura seguransa  maibe emprinsipiu fugetes ne’e ita bandu no autorija deit ba ida ne’ebe iha lisensa ka autorijasaun tanba iha tempu babain la autorija atu tiru fugetes so autorija deit iha loron 24, 25 nomos 31 kalan laos loron kalan tarutu iha kintu-kantu.

Kestiona konaba prekupasaun publiku konaba atuasaun Polisia nian ne’ebe dalaruma uza forsa liderasaun ne’e hateten la iha lei Polisia nian ka normas ida autorija aktu uza forsa tanba ne’e Komandu halo ona prosesu hodi investiga oknum membru PNTL ne’ebe maka halo atuasaun uza forsa iha kazu sunu sasan sexta baziku iha munisipiu Viqueque.

Workshop loron ida ne’e organija husi Sentru Operasaun Nasional ho apoiu husi parseru TLPDP no partisipa husi Komandante do Komandu Operasaun Nasional, Xefe relasaun Publika no porta Voz PNTL, Komandante Sentru Formasaun Polisia, Xefe Operasaun munisipiu, Xefe Sentru Operasaun Distrital. Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa sexta feira (04/12) ne’e fó posse ba Xefe Departamentu Polisiamentu Komunitaria Superintendente António da Luz,L.CG. Asuntu nomeasaun ne’e halo baseia ba Despasu husi Gabinete Komandante Jerál PNTL Nº 306-A/CG-PNTL/XII/2020.

Komisariu Polísia Faustino da Costa iha ninia intervensaun ba serimonia tomada de posse ne’ebe hala’o iha Gabinete Komandante Jerál hateten Superintendente António hanesan ema ida ne’ebe Komandu laiha dúvida atu bele lidera servisu sira iha Departamentu Polisiamentu Komunitaria tanba molok ba hala’o estudu iha estrangeiru Superintendente ida ne’e sai ona Xefe ba Departamentu refere.

“Loos duni durante ne’e servisu hirak Departamentu Polisiamentu Komunitaria hala’o husi Superintendente Assistente Helena da Dores Alves maibé hare’e mós ba nesesidade balun tanba ne’e Komandu deside hodi halo nomeasaun ne’e”, tenik Komandante Jerál PNTL ne’e.

Autoridade másimu Instiutisaun Seguransa ne’e afirma tan durante halo diskusaun ho Segundu Komandante Jerál PNTL katak Polísiamentu Komunitariu ne’e laos PNTL mak tau maibé PNTL hanesan Polísia Komunitariu ne’ebe mai ho Lema ida katak VIP (Vizibilidade, Involvimentu no Prfesionalizmu). Tanba ne’e Lema refere ita hotu tenke tau iha asaun wainhira ita hala’o ita nia misaun.

Hola parte iha serimonia ne’e Segundu Komandante Jerál Komisariu Polísia Mateus Fernandes, Inspector Jerál, Komandante Komandu Operasaun, Administrasaun, Komandante UPF, Xefe Relasaun Públika no Diretur Rekursu Umanu PNTL.

Media PNTL.          

Dili-Suspetu ida ho inisial JG tinan 54 husi munisipiu Viqueque postu Lakluta sunu aihan sexta bazika ne’ebe maka governu distribui tanba la satisfas ho kuantidade sasan ne’ebe maka governu distribui.

Portavoz PNTL Superintendente Xefe Arnaldo Araujo hateten iha loron 28/11 tuku 10:00 Ministru Kordenador Asuntu Ekonomiku hamutuk ho Administrador no Komandu PNTL Viqueque inklui Administrador postu Lakluta ho autoridade lokal iha Lakluta distribui aihan Sexta bazika iha distribuisaun ne’e mosu insidente ida ne’ebe rezulta sasan balu hetan estragus, Nia hato’o asuntu ne’e liu husi komferensia empresa iha Kuartel Jeral PNTL Kaikoli Dili, Tersa (01/12).

Nia esplika suspetu JG la satisfetu ho kuantidade sasan ne’ebe governu oferese nune’e suspetu rega gajolina masa ida ba mina bimoli kaixa ida no sunu ho iskeru  hafoin suspetu halai nune’e Polisia ne’ebe maka fo seguransa momentu neba konsege kaptura suspetu no oras ne’e daudaun detein hela iha sela munisipiu Viqueque no ohin (horseik red) sei aprejenta ba Ministeriu Publiku hodi prosesu ba Tribunal hodi halo Primeru Interogatoriu.

Alende ne’e Komandu PNTL mos hakarak informa katak horseik dadersan tuku 05:30 akontese asidente iha munisipiu Manatuto suku Manehat kareta Fuso ida ne’ebe tula aihan sexta bazika bakufila rejulta aiha sexta bazika monu ba rai no ema nain tolu (3) kanek, oras ne’e daudaun Polisia munisipiu Manatuto iha fatin akontesimentu hodi rekola informasaun hodi hatene saida maka hetan estragus no fator husi asidente ne’e. Kareta fuso ne’e governu aluga hodi distribui sasan sexta baziku.

Hakarak informa mos katak kazu insidente durante semana ida nia laran hahu dia 24 to’o 01 de Dezembru hamutuk 25no asidente hamutuk sia (9). Media PNTL

Dili- Forsa konjunta kompostu husi PNTL no F-FDTL kontinua asegura seguransa iha fronteira terrestre hodi prevene movimentu no tranzasaun illegal.

Komandante UPF Superintendente João Sancho Pires informa UPF kontinua halo patrulla tanba fronteira nee area luan nune’e UPF la mesak maibe hamutuk ho membru F-FDTL no Komando Operasaun Espesial (COE- sigla portuges) ne’ebe destaka kontinua mantein hodi asegura seguransa, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Tersa (01/12).

 Komandante ne’e haktuirtan membru sira la foti diretu lisensa annual hahu inplementasaun Estadu Emerjensia (EE) to’o agora UPF servisu nafatin hodi halo patrulla no kontinua apoiu Komandu munisipiu Bobonaro, Covalima no Oe-Cussse oinsa prevene movimentu no tranzasaun illegal iha fronteira.

“Iha fulan kotuk osan alimentasaun tarde nune’e Komandu buka desaraska hodi kordena ho Ministeriu balu hodi fo apoiu fos nune’e ami fahe ba Kompania tolu (3) Maliana, Suai no Oe-Cusse hodi hein osan alimentasaun sai no laiha problema maske orsamentu tarde la difikulta UPF atu halo servisu maske hahan laiha no hamlaha maibe servisu nafatin tanba UPF nia papel atu asegura seguransa iha terrenu,” Komandante UPF esplika.

Forsa konjunta kontinua halo operasaun no passa revista iha postu 30 ne’ebe maka iha no postu provizoriu 8 ne’ebe maka aumenta mos lao hela hodi koloka efetivu UPF hamutuk ho F-FDTL, no COE.

Durante periode EE Forsa konjunta kaptura ema hamutuk 38 kompostu husi timor oan hamutuk 27 ne’ebe maioria estudante ne’ebe nia kitas mate no sira balu ne’ebe maka halo tranzasaun illegal hodi faan sasan iha mota laran nomos sidadaun Indonezia hamutuk 13, ni prosesu timor oan ita entrega ba karantina no sidadaun Indonezia deporta ba Indonezia.

Alende ne’e kapturamos sasan lubuk ida hanesan Fugetes, sigaru Surya ball ida (1), ropa obralan, Fugetes, Beer DS, Minarai 1200 litru no Ro’o maibe ema nain rua((2) foti ro’o peskador palaka nian hodi halai fila ba Atapupu. Sasan no suspetu balu ne’ebe maka deskumfia iha hela Kuartel UPF hodi submete ba prosesu investigasaun hodi ba Tribunal.

Atu termina Komandante ne’e apela ba komunidade hirak ne’ebe hela besik lina fronteira atu kopera ho ami hodi prevene tanba iha Atambua mos afeta ona husi COVID-19 hamutuk ema nain 30 tanba ne’e maka husu ba komunidade sira ita kopera malu nune’e buat ruma ne’ebe illegal labele lao hodi prevene virus Corona labele hadaet. Media PNTL

Dili, Komandante Jerál Polísia Nasional Timor-Leste (PNTL) Komisariu Polísia Faustino da Costa no Segundu Komandante Jerál Komisariu Polísia Mateus Fernandes iha loron kinta-feira (26/11) ne’e hala’o enkontru semanal ho Prezidente Repúblika Dr.Francisco Guterres Lú-Olo hodi informa servisu Komandu PNTL nian durante fulan Outubru tinan 2020.

Hafoin enkontru ba jornalista sira Komandante Jerál PNTL Komisariu Polísia Faustino da Costa hateten situasaun jerál iha nivel teritoriu nasional lao diak no kalma. Maske iha publikasaun balun dehan rumoris ka isu kona-ba Ninja iha fatin balun, katak ita halo prosesu no ema balun ne’ebe ita halo identifikasaun, ninia prosesu lao hela.

“Ami mai atu aprezenta ba PR iha enkontru ne’e kona-ba servisu PNTL nian ne’ebe durante ne’e halo hanesan Asidente no Insidente sira ne’ebe mosu, tantu mós preparasaun ba 28 Novembru nian maka oinsa Polísia atu asegura hanesan mós preparasaun ba Natal no Tinan Foun ninian”, informa Komandante Jerál PNTL iha Palasiu Prezidente Aitarak Laran, Dili.

Komisariu Polísia akresenta tan katak total Asidente hahu’u husi loron 01 to’o 31 fulan Outubru hamutuk 160 iha ne’ebe rezulta ema hamutuk na’in 13 maka mate. Ba ida ne’e saida maka Polísia halo nafatin halo Check Point, halo Barragem Estrada ne’ebe iha fulan Outubru deit ita aplika Koimas/Multa hamutuk ninia Infrasaun ne’e $1.600,00. No $39.404,00 maka osan ne’ebe maka PNTL hatama ba Kaixa Geral Estadu.

“Ba iha Insidente fulan Outubru nian hamutuk 418 akontesimentus, komesa husi kazu asaltu, Violensia Domestika, Suisidiu no mós Insidente hanesan ema monu rasik to’o mate, ne’ebe ita hotu akompaña kazu ikus liu mak iha Fatudere-Viqueque Villa, tio ida ho idade 80 hafoin sa’e ai/ha’as monu tu’un, kazu hanesan mós akontese iha parte Lospalos nian”, informa Komisariu Polísia ne’e.

Autoridade másimu seguransa ne’e afirma kona-ba Seguransa ba loron 28 Novembru nian katak parte PNTL envolve forsa másimu tantu ba iha Parada hanesan mós halo seguransa tanba laos deit iha nivel nasional ne’ebe hala’o iha munisipiu Liquiça maibé kuaze iha munisipiu hotu-hotu sei selebra loron importante ne’e. Ita hotu akompaña kuaze iha munisipiu hotu-hotu aktividade Feira (Pameran) ne’e hahu’u kedas semana kotuk ne’e lao no Polísia nafatin asegura ida ne’e.

“Seguransa ba loron 28 Novembru iha munisipiu Liquiça ita uza Forsa másimu tanba laos deit husi Komandu PNTL munisipiu Liquiça maibé hetan apoiu mós husi nasional tantu mós husi Unidade sira Polísia nian”, hakotu autoridade másimu seguransa ne’e.

Media PNTL.                       

Dili- Polisia Nasional Timor-Leste (PNTL) bandu negosiante no komunidade sira faan fugetes tanba bele perturba ema nia saude.

Porta Voz PNTL Superintendente Xefe Arnaldo Araujo hateten  komunidade sira labele suporta malu hodi ba hola fugetes no paixon hatama mai timor-Leste tanba bele estraga saude no bele halo ema seluk nia deskansa ladiak wainhira ema toba halo ema hakfodak bele moras no bele mate, Nia hato’o asuntu ne’e liu husi komferensia emprensa iha Kuartel Jeral PNTL Kaikoli Dili (23/11).

Nia haktuirtan ba komunidade sira ne’ebe maka hela iha lina fronteira no negosiante sira atu evita hatama paixon mai iha teritoriu timor laran tomak tanba iha hela situasaun COVID-19 se karik ita hadomi ita nia nasaun no povu ita lalika tama ba Indonezia tanba ita hatene katak fugetes no paixon sempre tama husi Indonezia no governu bandu.

PNTL mos sei tama sai loja hodi foti paixon ne’ebe maka faan illegal no husu ba komersiante sira lalika faan paixon tanba seidauk iha autorijasaun husi Ministeriu Turismu Komersiu Industria.

Husu ba inan aman sira atu tau atensaun no evita oan sira labele sunu paixon tanba Polisia sei halo patrulamentu ba bairo-bairo no fatin hirak ne’ebe maka diskumfia faan fugetes no sunu paixon. Polisia sei halo atuasaun seriu no rigoroju ba aktus hirak ne’e. Komandu PNTLmos koloka ona Ofisial Polisia Suku (OPS) iha kada suku tanba ne’e Komandu sei fo hatene ba sira hodi sosialija ba inan aman no joven sira atu labele sunu paixon.

Liu husi komferensia emprensa ne’e Porta Voz PNTL ne’e mos relata katak durante semana ida Iha asidente ne’ebe maka akontese iha teritoriu laran tomak hamutuk 3 rejulta vitima nain ida (1) mate no nain 22 kanek kmaan oras ne’e dadaun iha hela ospital no motorista iha hela prosesu investigasaun iha Polisia nia liman.

Alende ne’e iha mos dezastre naturais rua (2), ida rezulta vitima mate tanba uma monu no hanehan iha Batugade postu administrativu Balibo munisipiu Bobonaro, oras ne’e dadauk matebian iha ona familia nia liman hodi halo prosesu funebre.

Hakarak informa ba komunidade sira katak hodi kalan iha dezastre naturais anin no udan boot ne’ebe mosu iha fatin serimonia Proklamasaun Independensia 28/11 mosu estragus balu anin sobu tenda maibe la rejulta ema kanek no mate.

Relasiona ho rumoris konaba ninja iha munisipiu Ainaro Porta Voz PNTL ne’e haktuir katak ohin hau komunika diretamente ho Komandante PNTL munisipiu Ainaro  Superintendente Xefe Justino Menezes dehan katak oras ne’e daudaun sira sei halo hela servisu hodi identifika rumoris ida ne’e no hein katak iha tempu badak ita sei hatene lia los husi informasaun ne’e no kauja nee.

Dili, Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes hamutuk ho Ofisias Superior no Ofisias Sub-Alternos husi Kuartél Jerál, Komandu Munisipiu Dili, Unidade Espesial Polísia (UEP), Unidade Polísia Marítima (UPM) no Centro Formação Polísia (CFP) sexta-feira (20/11) semana kotuk realiza Retiru hodi halo preparasaun ba selebrasaun Natal 2020 no Tinan Foun 2021.

Padre Carlito ne’ebe dirije aktividade reflesaun ne’e hateten objetivu Retiru ne’e maka atu oinsa ema idak-idak bele manan Iduldensia Plenária molok tama ba festa Natal no Tinan Foun hodi sai ema ne’ebe maka ho atitude foun.

“Iduldensia Plenaria ne’e katak atu ita idak-idak bele hakribi hahalok att sira ne’ebe ita halo iha moris ida ne’e hodi konverta ann ba moris foun bele simu Ita Nai Jesus ne’ebe sei mai lori Paz no Domin ba ema hotu-hotu”, tenik Amululik ne’e iha ninia reflesaun.

Sacerdote ne’e afirma tan atu bele manan Iduldensia Planária iha pontu importante balun ne’ebe maka ema idak-idak tenke halo, hanesan ema tenke iha konsiensia husi ann rasik katak hakribi ninia hahalok att hodi labele halo sala dala-ida tan no Vontade hodi halo tuir Penitensia ne’ebe amululik sira fo wainhira ita ba halo konfesa.

Hafoin relfesaun, realiza mós Konfesa no taka ho Misa ne’ebe maka dirije husi amu Selebrante Carlito. Aktividade ne’e hala’o iha Igreja Balide no hetan partisipasaun másimu husi Ofisias Superior no Ofisias Sub-Alternos sira Komandu PNTL nian.

Media PNTL.