News

Dili- Komandante Jeral PNTL husu ba Unidade Espesial Polisia UEP atu halo reflesaun klean ba ejistensia Unidade ne’ebe kompleta ona tinan 11 hodi hadia diak liutan sira nia servisu hodi servi povu no nasaun ho profesional.

Komandante Jeral PNTL Komisariu Faustino da Costa hateten Unidade Espesial tenkeser hatudu katak sira espesial no sira unidade duni hodi halo abaliasaun profunda karik iha servisu balun ne’ebe sira sidauk halo diak no maximu tenke buka atu hadia liu husi manera Polisia Nasional Timor-Leste nia filosofia Polisiamentu Komunitariu ho karater identiku militar, Nia hato’o asuntu ne’e iha Kuartel UEP Bairo-Pite Dili.

Komisariu ne’e haktuirtan Misaun Unidade Espesial atu suporta Komandu Munisipiu sira bainhira nesesita apoiu iha kazu balu ne’ebe bele afeta ba ordem publika no  Komandu munisipiu sira lakonsege atua.

“UEP hamrik dekada ida resin ona katak Sub Unidade tolu tau hamutuk iha Unidade Espesial da Polisia, tinan 11 ne’e katak tinan reflesaun, disiplina sai fator ne’ebe konsidera profesionalismu iha atendimentu no atuasaun ho savi inportante maka Hirarkia, Kadeia de Komandu, Disiplina no estatutu, tenkeser hatene katak Ami Unidade Espesial Ami Polisia Nasional entaun Unidade Espesial husi Polisia Nasional katak iha timor PNTL ida deit ho dutrina ida deit no juramentu ida deit Oinsa atu servi povu rai ida ne’e ho respeita direitu Humanus,” dehan Komandante Jeral.

Iha okajiaun ne’e Vice Ministru Interior Antonio Arminido hateten iha tinan 11 nia laran UEP kontribui signifikamente ba manutensaun Ordem Publika iha nasaun ida ne’e, UEP nia knaar inportante no estratejiku maka atu ajuda no halo manutensaun ba hakmatek no estabelese ordem publika inklui providensia siguransa pessoal ba Entidades Estadu no eminente sira.

Nia haktuirtan UEP ejisti iha mundu tomak no sira mantein postura prontidaun maximu hodi infrenta kualker tipu amiasa iha kualker teatru operasaun ho nivel amiasa esepsional iha terrenu, ho natureja espesial ne’e ita boot sira tenke halo formasaun no treinamentu bebeik hodi hasae ita boot sira nia profesionalismu, aumenta efikasia teknika, abilidade fizika no disiplina maximu.

Vice Ministru ne’e rekonyese katak kapasidade prontidaun ejiji ita nia investimentu tanba ne’e mesmu ami foin atu kompleta fulan rua mais ami promete katak durante mandatu governu ida ne’e ami sei esforsu hodi tau atensaun mos ba dezenvolvimentu UEP hodi bele kumpri nia misaun ho dignu.

Iha okajiaun ne’e Komandante UEP Superintendente Xefe Orlando Gomes hateten UEP konstitui hanesan Unidade rezerva PNTL nian  ho misaun espesifiku hodi promove kapasidade no mobilija forsa Unidade Espesial PNTL atu lidera kualker situasaun perturbasaun ordem publika ho intensidade aas prinsipamente atu kombate krime organizadu ho armas de fogu atu mantein lei no ordem iha teritoriu nasional Timor-Leste.

Nia haktuirtan Membru Operasional hotu iha UEP tenke iha formasaun teknika no professional duke membru PNTL sira seluk, BOP, CSP no COE ne’ebe maka hamutuk bele produs familia ida ne’ebe metin hodi ajuda no apoiu kompleta malu iha misaun hodi kontribui ba seguransa ne’ebe iha efikasia no efisiensia atua hodi nune’e fornese seguransa ba povu ho diak.

UEP moris liu husi prosesu agrupamentu ba Unidade tolu (3) hanesan Unidade Intervensaun Rapida (UIR) agora konyesidu ho naran Batelaun Ordem Publika (BOP), Corpu Seguransa Pessoal (CSP), agora konyesidu hanesan Compania Seguransa Pessoal(CSP), Unidade Rezerva Polisia (URP) agora konyesidu ho naran Compania de Operasaun Espesial (COE) mudansa ne’e hatudu evidensia no konkretija ne’ebe boot ho realidade ezemplu ba aprosimasaun no konyesementu ba membru sira iha sub unidade tolu bazeia ba faktus katak membru sira ne’e hela hamutuk lor-loron iha Komandu ida no hatudu duni sira nia espiritu de korpu ne’ebe aas.

Serimonia aniversariu UEP ba dala 11 ne’e kompleta ho Promosaun Diviza por antiguidade ba Ajente nain tolu(3) hodi promove ba postu Ajente Principal, Entrega Sertifikadu de Louvor ba membru nain 12ne’ebe iha dedikasaun ass, no demostrasaun Abilidade membru UEP.

Serimonia ne’e partisipa husi Prezidente Komisaun B Parlamentu Nasional Jose Agustinho “Xomotso”, Eis Komandante Jeral PNTL Paul de Fatima Martins, Inspetur Jeral PNTL, Komandante Operasaun, Segundu Komadante munisipiu Dili, Komandante UPF, Diretur Jeral Servisu Migrasaun, Komandante Unidade, Xefe Departamentu, Adidu Seguransa Portugal, Reprejentante Veteranus, Administrasaun,  Parseru TLPDP,  Fundasaun Azia, Ofisiais, Superior, Inspetor, Sarjentu no Ajente,   no konvidadu sira. Media PNTL

Dili, Komandu Polísia Nasional Timor-Leste (PNTL) kinta-feira (13/08) ne’e hala’o enkontru ho grupu Aliansa Universitariu Timor-Leste (AUTL) relasiona ho karta rekoñesimentu ida ne’ebe Komandu PNTL simu liu husi Komandu Operasaun kona-ba asaun pásifika ne’ebe AUTL sei hala’o iha semana oin (17/08). AUTL kestiona ho dezisaun politika VIII governu nian iha dekretu Lei Nu.21/2020 hodi fó subsidiu ba estudante non-bolseiru sira ne’ebe frekuenta hela estudu iha estrangeiru relasiona ho Surtu COVID-19 ne’ebe afeta mundu.

Porta Voz Komandu PNTL Superintendente Xefe Arnaldo Araújo hafoin enkontru ba media sira hateten reprezentante AUTL sira ne’e mai hasoru Komandu PNTL relasiona ho karta koñesimentu ne’ebe maka sira dirigi mai Komandu hodi fó apoiu seguransa ba asaun ne’ebe maka sira sei halo iha semana oin.

“Enkontru ohin lao diak, parte AUTL entende diak ho PNTL ne’ebe lidera husi Komandante Operasaun liu-liu kona-ba kritériu ou regra sira ne’ebe sira (AUTL-red) tenke kumpri tanba Lei maka fó dalan hodi halo manifestasaun, hanesan distansia husi fatin manifestasaun ho edifisiu Estadu nian, Lei Armas Brankas mós parte AUTL tenke kumpri hanesan labele lori sasan kroat hodi afeta ba ema seluk”, esplika Porta Voz Komandu PNTL ne’e.

Superintendente Xefe Arnaldo afirma tan molok realiza asaun pásifika, parte AUTL ho Komandu PNTL liu husi Komandu PNTL munisipiu Dili sei asina akta ida ne’ebe hetan ona konkordansia parte rua atu nune’e aktividade manifestasaun bele lao ho diak. Parte PNTL munisipiu Dili sei fó seguransa másimu ba iha asaun refere no manifestante sira tenke kumpri ba Lei Kódigu Estrada Nu.6/2003.

Iha fatin hanesan reprezentante Porta Voz AUTL Moises Soares Magno hateten objetivu mai hasoru Komandu PNTL atu koalia kona-ba karta koñesimentu ba demonstrasaun ninian tanba iha semana kotuk ami submete karta koñesimentu mai parte seguransa hanesan PNTL kona-ba asaun ne’ebe sei hala’o iha loron 17 fulan Agostu tinan ne’e.

“Asaun pásifika ne’e halo primeiru maka atu kestiona dezisaun politika injustu husi VIII governu ne’ebe foti dezisaun politika ida liu husi Lei Nu.21/2020 hodi fó subsidiu ba maluk estudante Timor oan sira ne’ebe hala’o estudu iha rai liur no sira ne’ebe hetan subsidiu ne’e estudante sira non-bolseiru, agora dezisaun ida ne’e fó deit ba estudante sira non-bolseiru iha rai liur maibé estudante Ensinu Superior iha rai laran ami la hetan”, tenik reprezentante Porta Voz AUTL ne’e.

Moises Soares akresenta tan ami laos atu husu subsidiu maibé pelo menus VIII governu ida ne’e responsabiliza netik propinas semester par tinan 2020. Enkontru ne’e parte AUTL laos mai atu husu autorizasaun parte seguransa maibé tuir Lei Demostrasaun Nu.1/2006 hateten katak husu ba demostrante sira molok halo asaun pásifika tenke submete uluk karta koñesimentu ba parte PNTL, hafoin ida ne’e parte PNTL manda karta notifikasaun ida ba parte AUTL.

“Massa sira ne’ebe sei hola parte iha asaun pásifika ne’e maka AUTL ne’ebe konstitui husi Universidade haat hanesan UNITAL, UNDIL, UNTL no UNPAZ, Institutu haat maka hanesan ICS, IEC, DIT no IOB”, haktuir reprezentante Porta Voz ne’e.

Media PNTL

Dili- Durante loron 9 (04-12/08) Polisia Nasional Timor-Leste (PNTL) rejista kazu krime hamutuk 26 hodi presa ba Ministeriu Publiku (MP).

Portavoz Komandu PNTL Superintendente Xefe Arnaldo Araujo relata kazu krime hirak ne’ebe akontese kompostu husi Asaltu 10, Ofensa Integridade Fizika Simples 15 no Tentativa Homesidiu 1. Kazu hirak ne’e nia prosesu iha ona Polisia no sei kontinu ba Ministeriu Publiku, Nia hato’o asuntu ne’e iha komferensia emprensa iha Kuartel Jeral PNTL Kaikoli Dili, Kuarta (12/08).

Komandantye ne’e haktuirtan  alende ne’e PNTL mos rejista kazu asidente trafegu hamutuk 75 husi total kazu ne’e ema nain 59 kanek kmaan, nain 10 kanek todan no nain 6 mate. Asidente hirak ne’e akontese tanba fator humanu, kondisaun transporte no fator estrada.

Asidente ne’ebe rejulta vitima sira mate maioria motor soke malu no motor soke ema lao ain, entre vitima hirak ne’ebe maka mate nain ida sidadaun Indonezia ne’ebe maka ohin (Kuarta 13/08) transporta nia mate isin ba Indonezia. No sira ne’ebe maka kanek halo hela tratamentu.

Informa mos katak Iha 12 de Agostu akontese komfrontus iha munisipiu Baucau ne’ebe rejulta ema balu hetan sona no komunidade nia uma hetan sunu; Suspetu ba kazu ne’e sei deskunyesidu no PNTL Baucau sei buka hela no hein katak iha tempu badak sei kaptura suspetu hodi investiga, prosesa no aprejenta ba Ministeriu Publiku.

Vitima kazu komfrontus iha munisipiu Baucau halao hela tratamentu iha Ospital no hein katak hafoin rekopera vitima bele fo deklarasaun ne’ebe los ba Polisia atu nune’e kaptura lalais suspetu.

Ligadu ho komfrontus ne’ebe maka akotese Komandu PNTL fo ona orentasaun ba Komandante munisipiu sira atu orenta membru sira liu-liu Polisiamentu Komunitaria atu hakbesik aan ba povu hodi sosialija oinsa komunidade kontibui hodi kria paz ho hakmatek atu nune’e komunidade bele halao nia moris ho seguru. Media PNTL

Dili- Formandu kursu Formasaun Avansadu iha Governasaun no Lideransa Estratezia (CFAGLE-sigla portuges) kuaje nain 50 ne’ebe maka halao kursu iha Institutu Defeza Nasional  (IDN) halo vizita estudu komparativu iha Kuartel  Jeral PNTL

Segundu Komandante Jeral PNTL Komisariu Mateus Fernandes hateten liu husi vizita ne’e formandu sira hakarak rona Polisia nia servisu no funsaun hodi servi povu no nasaun formandu hirak ne’e asumi kargu nudar Diretur Jeral iha instituisaun governu no tuir hela kursu iha IDN, Nia hato’o asuntu hirak ne’e ba Jornalista sira iha Kuartel Jeral PNTL Kaikoli Dili, Kuarta (12/08).

Komisariu ne’e agradese ba Diretor Jeral sira ne’ebe kursu iha IDN bele mai vizita PNTL, Xefe suku sira uluk mai vizita ona no Diretor Nasional sira mos sei mai  ne’e atu dehan katak Polisia mai husi povu no prontu simu vizita iha tempu saida deit hodi esplika konaba lalaok no servisu ne’ebe maka Polisia halo no sira mos fahe sira nia esperensia hodi nune’e ita bele lori Polisia ba oin.

Agora dadauk IDN halao mos kursu ba membru governu sira no ita agradese tanba iha timor iha netik Institutu ida ne’ebe bele fasilita formasaun ba ukun nain sira para bele lori nasaun ne’e ba oin tuir ita hotu nia esperansa.

Iha vizita ne’e Diretur Rekursu Humanu PNTL Superintendente Emilio dos Santos halo aprezentasaun konaba Misaun, Vizaun no knar PNTL nian hodi asegura seguransa iha nasaun Timor-Leste nune’e mos Formandu sira fo sujestaun ba komandu PNTL hametin koperasaun no kordenasaun servisu ho instituisaun estadu hotu atu nune’e servisu hamutuk hodi kombate krime trans nasional. Alende ne’e Formandu sira mos vizita Sentru Operasaun Nasional (NOC/IMS) no Servisu Investigasaun Kriminal Nasional (SIKN) hodi hare no rona servisu husi departamentu hirak ne’e nudar esperensia ida ba sira antes remata sira nia kursu.

Vizita ne’e kompleta ho entrega lembansa husi Formandu no Komandu PNTL. Media PNTL.

Dili, Komandu Polísia Nasional Timor-Leste (PNTL) liu husi Komandu Operasaun realiza enkontru ida ho Komandu PNTL munisipiu, Unidades, Xefe Servisu no Departamentu sira iha Kuartél Jerál hodi rona no simu orientasaun kona-ba papel PNTL hodi responde ba implementasaun Estadu Emergensia (EE) tuir Dekretu Governu Nu.10/2020. Iha loron 6 fulan Agostu 2020 oras 00:00 to’o loron 4 fulan Setembru 2020 oras 23:59 Prezidente Repúblika dekreta Estadu Emergensia hodi prevene Kalamidade Pandemia COVID-19 iha Timor-Leste.

Komandante Jerál PNTL Komisariu Polísia Faustino da Costa iha ninia intervensaun hateten objetivu husi enkontru ne’e maka Komandu atu fó informasaun aumezmu tempu orientasaun balun ba munisipiu no unidade sira kona-ba Estadu Emergensia ida agora dadaun ita hahu’u.

“Aprezentasaun kona-ba Diretiva Operasaun Kalamidade Saude Públika ba Prevensaun Propagasaun Pandemia COVID-19 fase dahaat ne’ebe maka hato’o husi Komandante Operasaun tanba saida maka agora ita tama fila fali EE dala ida tan, los katak Timor-Leste livre ona husi Pandemia ida ne’e maibé moras ida ne’e seidauk lakon husi mundu ida ne’e”, tenik Komandante Jerál PNTL ne’e.

Komisariu Polísia ne’e afirma tan EE ida ne’e hahu’u fila fali tanba esperiensia iha nasaun barak iha ne’ebe ita sempre koalia kona-ba ondas ba daruak ninian, ne’e akontese mós iha Timor-Leste antes ita hahu’u fali EE. Tanba husu ba Komandante munisipiu/unidade no xefe servisu sira atu orienta membru sira molok implementa regras balun iha EE ida ne’e.

Iha biban enkontru ne’e, Komandante Komandu Operasaun Superintendente Xefe Pedro Belo aprezenta mós Diretiva Operasional balun relasiona ho servisu PNTL nian iha âmbitu implementasaun EE dahat nian bazeia ba Dekretu Governu Nu.10/2020 kona-ba Medidas lori halo ezekusaun kona-ba Deklarasaun EE nu’udar hala’o dadaun tiha ona husi Dekretu Prezidente Repúblika Nu.55/2020 de 5 Agostu.

Hola parte iha enkontru ne’ebe lidera husi Komandante Jerál maka Komandante PNTL munisipiu 12, Xefe Unidade sira hanesan UEP,UPF,UPF no Xefe Servisu/Departamentu sira iha Kuartél Jerál.

Media PNTL.

Dili- Komandante Eskuadra nain 20 kompleta ona kursu investigasaun ba intervensaun Komandante iha servisu investigasaun atu nune’e Komandante sira iha konyesementu ne’ebe naton konaba lalaok no prosesu oinsa identifika no prosesa autor ba kazu ruma.

Komandante Jeral PNTL Komisariu Faustino da Costa hateten kursu ne’e inportante ba Komandante Eskuadra sira atu hatene oinsa orienta membru sira nomos akompana relatoriu ne’ebe maka membru sira halo, Nia hato’o asuntu ne’e iha enseramentu kursu iha Centru Formasaun Polisia Comoro Dili, Sexta (07/08).

Komisariu ne’e hato’o parabens ba Komandante sira ne’ebe kompleta ona kursu ne’e maske tempu badak maibe inportante tebes atu hatene, konyese no jere rekursu ne’ebe maka iha no buka atu aprende liutan.

Entretantu Segundu Komandante CFP Superintendente Boavida Ribeiro louva Komandante Eskuadra sira nia vontade durante semana ida partisipa iha kursu investigasaun. Ami hein katak materia hirak ne’ebe maka ita boot sira hetan bele util iha imi nia servisu atu nune’e bele orienta, avalia no superviziona membru sira. Ami hein katak hafoin kursu ne’e imi lori bukae ida ne’ebe inportante ba imi nia aan rasik nudar  Komandante Eskuadra ida ne’e maka ami CFP nia dejeju ba ita boot sira.

Lori Komandante CFP nia naran hato’o agradesementu ba parseru TLPDP nia vontade no matenek hodi fahe konyesementu ba Komandante Eskuadra sira.

Iha okajiaun ne’e reprejentante partisipante kursu Komandante Eskuadra Pasabe Inspetor Xefe Herman Metan agradese ba koperasaun ne’ebe halao hamutuk ho parseru TLPDP hodi realija kursu ida ne’e, durante semana ida nia laran ami aprende teoria no pratika ida ne’e sai hanesan referensia no sai bukae mai ami aru servi diak liutan no fo ordem ba investigador atu kumpri no halo tuir lei no ordem tuir interese justisa . ida ne’ebe lolos ba investigador atu halo servisu  ho proprio wainhira atende keixa halo ezame ba local do krime husi komunidade ne’ebe buka lia los no justisa tuir lei.

Serimonia enseramentu kursu Investigasaun ba Komandante Eskuadra nain 20 ne’ebe halao iha loron 03-07/08 kompleta ho entrega sertifikadu ba partisipante sira, serimonia ne’e diriji husi Komandante Jeral PNTL akompana husi Segundu Komandante CFP no parseru TLPDP. Media PNTL

Dili, Komandu Polísia Nasional Timor-Leste (PNTL) liu husi Servisu Investigasaun Kriminal Nasional (SIKN) sexta-feira (07/08) ne’e hala’o enkontru avaliasaun ho Xefe Investigasaun Munisipiu sira kona-ba servisu hirak  ne’ebe durante ne’e hala’o ona.

Komandante Jerál PNTL Komisariu Polísia Faustino da Costa iha ninia intervensaun ba Xefe Investigasaun Munisipiu sira iha sorumutu ne’ebe hala’o iha salaun enkontru Kuartél Jerál hateten, hanesan investigador tenke iha koñesimentu diak kona-ba Lei sira hanesan Konstituisaun RDTL, Kódigu Prosesu Penal no Lei Seguransa Interna ne’ebe maka atribui ba servisu PNTL nian iha terenu wainhira mosu kazu ruma.

Autoridade másimu instituisaun seguransa ne’e mós motiva xefe investigasaun munisipiu sira atu mellora diak liu tan servisu iha futuru liu-liu atendimentu ba kazu sira hanesan suisidiu (Tara-aan) ne’ebe maka suspeitu sira deskoñesidu no enkoraja xefe investigasaun sira ne’e atu mantein servisu ne’ebe lao diak ona durante ne’e atu kontinua halo diak liu tan.

Iha fatin hanesan reprezentante parseiru TLPDP ne’ebe maka durante ne’e apoiu SIKN hateten planu parseiru nian hodi kontinua apoiu Komandu PNTL liu-liu parte SIKN iha area projetu balun hanesan hari’I edifisiu Sentru Servisu Krime Transnasional ne’ebe maka oras ne’e dadaun ninia obra lao hela.

Komandante TLPDP ne’e mós akesenta katak projetu balun ne’ebe planea ona atu finansia ba SIKN maka kontinua fornese formasaun ka treinamentu vizilansia ba membru SIKN sira iha Nasional no mós munisipiu, formasaun investigasaun nivel 2 ba grupu 2, formasaun espésifiku uza modelu iha entrevista, formasaun VPU, agresaun sexsual no kontinua apoiu operasaun investigasaun kriminal.

Entretantu Xefe SIKN Superintendente Xefe José Neto Mouk hateten objetivu husi enkontru ne’e maka atu halo avaliasaun servisu ida ba xefe investigasaun munisipiu sira no nasional atu oinsa maka bele hadia diak liu tan iha futuru.

“Iha oportunidade ida ne’e ita atu fahe mós informasaun kona-ba susesu ne’ebe maka ita nia Prokurador Geral halo relatoriu ba Parlamentu kona-ba servisu ne’ebe maka PNTL parte SIKN halo durante ne’e hanesan konklui kazu sira ne’ebe mosu, tanba husi relatoriu ne’e PNTL hetan susesu ida ne’ebe diak tebes hodi ita atinzi 100% kompara ho instituisaun seluk ne’ebe maka iha”, esplika Xefe SIKN ne’e.

Iha enkontru ne’e, Xefe Investigasaun Munisipiu sira mós hato’o sira nia susesu ne’ebe maka halo durante ne’e, hato’o mós sira nia obstákulu, problema no dezafiu sira ne’ebe hasoru wainhira halo atendimentu ba kazu ruma ne’ebe mosu.

Media PNTL.

Dili, Komandu Polísia Nasional Timor-Leste (PNTL) orienta ona Komandu Munisipiu Dili (KMD) no Unidade Espesial Polísia (UEP) atu buka meius oinsa maka bele hamate kutun ka aktu sira ne’ebe halo husi bandidu sira iha kapital Dili hodi rezulta kazu krime ikus-ikus ne’e mosu.

Asuntu ne’e hato’o husi Komandante Jerál PNTL Komisariu Polísia Faustino da Costa kinta-feira (06/08) ne’e hafoin hala’o sorumutu semanal ho Prezidente Repúblika (PR) Dr.Francisco Guterres Lu-Olo hodi relata situasaun seguransa no aktividade ne’ebe maka PNTL halo iha teritoriu nasional. Hanesan ita hotu hatene PR dekreta ona Estadu Emergensia (EE), Komandu PNTL sei foku ba parte ne’ebe tuir dekretu governu nian fó atu ezekuta iha EE ida ne’e.

“Situasaun seguransa nivel teritoriu nasional ne’e lao diak maske Dili laran maka sei iha nafatin akontesimentu balun ne’ebe maka PNTL nafatin hala’o hela nia kna’ar atu bele hamate aktu husi ema sira ne’ebe iha tanba ne’e Komandu PNTL orienta ona ba KMD no UEP atu buka meius oinsa maka bandidu sira ne’ebe kria problema iha kapital Dili ne’e tenke hamate ona sira nia kutun, labele kapital ne’e domina fali husi bandidu”, alerta Komandante Jerál PNTL ne’e.

Autoridade másimu seguransa ne’e afirma iha enkontru ho PR aprezenta mós informasaun sira kona-ba akontesimentu ne’ebe akontese iha semana kotuk hanesan kazu hatalik ann katak iha loron balun fulan Agostu nian mosu kazu hatalik ann hamutuk rua iha munisipiu Ermera. Husi kazu rua ne’e, ida familia hato’o ba parte polísia katak vitíma ho moras mental tan ne’e la halo prosesu maibé ida seluk ita halo ona prosesu autopsia no rezultadu entrega ona ba Ministeriu Públiku (MP).

“Asuntu seluk ne’ebe maka aprezenta ba PR maka kona-ba asidente ne’ebe maka sei nafatin ass no asidente ne’e mosu ita detekta primeiru maka hu’un husi problema sira ne’e maka oinsa atu hetan Karta Kondusaun, ohin ba teoria aban ba prátika bainrua lori karreta/motor, tanba laiha formasaun ida própriu katak fulan ou semana hira atu bele koñese sinais, hatene nia responsabilidade hanesan motorista ida ne’e maka sai fátor primeiru kontribui ba ita nia asidente ne’e bo’ot, entaun ita tenta organiza ona katak los duni PNTL parte ida ba solusaun problema maibé mós PNTL laos mesak ba solusaun ba problema sira ne’e”, informa na’in ulun PNTL.

Komisariu Polísia subliña tan PR husu nafatin ba PNTL liu-liu ba asuntu fronteira além-de asegura regras sira EE nian maibé oinsa mós atu hare’e kondisaun membru sira nian iha fronteira. Informasaun kona-ba asidente ne’ebe maka mosu durante fulan Jullu nia laran hamutuk 130 ne’ebe husi númeru ne’e rezulta ema na’in 9 maka mate. Liga ho asuntu iha fronteira katak durante ne’e PNTL kaptura ema ne’ebe tama illegal mai Timor-Leste tantu mós tama ba rai Indonesia hamutuk na’in 149, tanba ne’e PNTL sei nafatin reforsa seguransa iha liña fronteira.

Media PNTL.                

Dili, Durante semana ida nia laran Komandu Polísia Nasional Timor-Leste (PNTL) rezista kazu Insidente hamutuk rua ne’ebe maka akontese iha kapital Dili. Kazu rua refere maka hanesan ema deskoñesidu hakanek estudante ida husi Universidade da Paz (UNPAZ) no kazu ida seluk akontese iha Universidade Dili (UNDIL).

Porta Voz Komandu PNTL Superintendente Xefe Arnaldo Araujo tersa-feira (04/08) semana ne’e informa durante semana ida nia laran kazu rua refere maka rezista ona iha Komandu PNTL munisipiu Dili no oras ne’e dadaun kazu sira ne’e iha ona prosesu investigasaun.

“Informa ba públiku katak iha semana nia laran akontese insidente balun iha kapital Dili, hanesan kazu orseik (03/08) akontese iha UNPAZ ne’ebe suspeitu sei deskoñesidu hela no ita hein katak tempu oin mai suspeitu ne’e parte polísia bele kaptura, husu mós ba maluk husi vitima sira karik hatene informasaun ruma relasiona ho kazu ne’e bele informa ba parte polísia munisipiu Dili hodi halo prosesu investigasaun”, informa Porta Voz Komandu PNTL ne’e.

Superintendente Xefe Arnaldo afirma tan katak além-de kazu insidente ne’ebe akontese iha UNPAZ, dezentendimentu balun mós mosu iha UNDIL ne’ebe maka ninia prosesu oras ne’e dadaun lao hela no PNTL munisipiu Dili hala’o ona prosesu investigasaun. Andamentu ba prosesu investigasaun mós lao hela ba kazu ida ne’ebe maka akontese iha Dili Institute of Technology (DIT), hein katak iha tempu badak prosesu hirak ne’e bele lori ona ba Ministeriu Públiku (MP).

“Apela ba estudante sira ne’ebe oras ne’e dadaun hala’o estudu iha UNPAZ atu bele asegura seguransa iha ambiente aprendizagen nian tanba estudante sira ne’e ema mesak intelektual no balun ne’ebe maka esik remata ona estudu, husu atu bele kopera ho parte polísia karik deskonfia ema ruma ou grupu ne’ebe maka atu halo aktu krime, bele informa imediata ba polísia hodi bele foti asaun ruma”, apela Superintendente Xefe ne’e.

Media PNTL.       

Dili- Komandante Eskuadra nain 20 tuir Kursu Intervensaun Komandu iha Servisu  Investigasaun hodi uniformija konyesementu atu halo atuasaun ne’ebe hanesan tuir lei haruka nomos oinsa maneja kualker problema no kazu ne’ebe maka PNTL atende

Komandante Jeral PNTL Komisariu Faustino da Costa hateten Kursu ne’e realija atu Komandante sira hatene kualker insidente ne’ebe maka mosu nune’e ita labele halo servisu ida ne’ebe repetivu nune’e bele fasilita MP halo prosesu ba kazu hirak ne’ebe mosu, Nia hato’o asuntu ne’e ba Jornalista sira iha abertura kursu iha Sentru Formasaun Polisia Comoro Dili, Segunda (03/08).

Komisariu ne’e haktuirtan Ministeriu Publiku (MP) maka nain ba asaun penal  no Polisia nudar koautor fasilita hodi detekta no identifika problema hirak ne’ebe mosu no buka kazu ne’ebe iha oinsa hodi aprezenta ba MP atu prosesa tuir lei ne’ebe maka vigora.

Hanesan Komandante laos atu domina maibe wainhira Komandante sira hatene no kompriende maka sira bele jere Eskuadra no iha konyesemntu iha area investigasaun atu nune’e atuasaun iha terrenu labele sala tanba sira maka disidi kazu ruma atu prosesu ou lae.

Kursu Investigasaun ne’e hahu ho Komandante Eskuadra nain 20 no halo faze por faze hodi  kompleta ba Komandante Eskuadra 65.

Kursu ne’e halao durante semana ida nia laran hahu loron 03- 07 Agostu 2020,  no foka liu konaba area Investigasaun Kriminal oinsa hakerek Auto Notisia, oinsa destingi kazu Flagrante Delitu ou lae tuir Kodigu Prosesu Penal no Kodigu Penal Timor-Leste.

Kursu ne’e realija tanba hetan apoiu husi parseru TLPDP. Media PNTL