News

Dili, Komandu Polísia Nasional Timor-Leste (PNTL) Segunda-feira (03/08) ne’e hala’o serimonia Isar Bandeira ne’ebe maka dirige husi Komandante Jerál PNTL Komisariu Polísia Faustino da Costa.

Iha ninia intervensaun ba serimonia ne’ebe hala’o iha resintu Kuartél Jerál PNTL, Komisariu Polísia Faustino hateten situasaun seguransa iha rai laran durante semana ida lao ho diak maske akontese kazu tara-ann ne’ebe maka komesa sa’e ba bebeik, nune’e mós asidente ne’ebe maka husi loron-loron ba loron aumenta ba bebeik ne’ebe rezulta ema barak maka mate.

“Tanba ne’e hare’e ba situasaun rua ne’e ita tenke hatene didiak situasaun iha terenu antes ita deside buat ruma, ho formasaun husi Ministeriu Públiku atu nune’e ita labele foti asaun ida ne’ebe sala ou dala-ruma la tuir regras”, tenik Komandante Jerál PNTL ne’e.

Komisariu Polísia Faustino alerta ba membru tomak liu-liu ba kna’ar polísia nia iha terenu wainhira mosu problema ruma polisia laos ho inisiativa atu halo mediasaun ba problemas hirak ne’e maibé prosesu hotu tenke lori ba nia nain maka Ministeriu Públiku.

“Maske situasaun hakmatek maibé la signifika seguru, ita hotu akompaña katak iha fatin-fatin laiha ona kazu maibé iha ema barak halo movimentu  iha tempu kalan sei tauk, tanba ne’e maske hakmatek maibé la signifika seguru tanba wainhira lao ema balun sei tuda no balun sei asalta, ida ne’e kna’ar no responsabilidade laos deit deit Komandu ida ne’e maibé ita hotu atu asegura ida ne’e”, haktuir na’in ulun PNTL ne’e.

Autoridade másimu seguransa ne’e apela ba membru PNTL tomak kona-ba utilizasaun Media Sosial tenke tuit ninia regras tanba ema hotu iha mundu maka asesu ba Media Sosial, tanba ne’e wainhira la nesesaria ka merese tau iha Media Sosial, la presiza tau.

Media PNTL.   

COVALIMA, 2 Agostu 2020 (SRP) – Vise-Ministru Interior (VMI), Antonio Armindo hamutuk ho komitiva akompaña direitamente husi Komandante Unidade Patrullamentu Fronteira (UPF), Superintendente Polísia, João Sancho Pires no Komandante PNTL Munisipiu Covalima Superintendente polisia Antonio Maria de Sa, halao vizita ba Postu UPF no Skuadra PNTL (Polisia Nasional Timor-Leste), iha área fronterisa Timor-Leste no Indonezia.

“Vizita ida ne’e sai hanesan oportunidade diak ba hau ho ekipa tekniku aprovizionamentu Ministeriu Interior nian no PNTL hodi haré direitamente fatin ba futuru instalasaun nomos difikuldade sira ne’ebé membru sira hasoru iha terenu. Ita hotu hatene katak, UPF iha fronteirisa dezenpeña papél importante lubuk ida hodi halo kontrolu iha fronteira loron no kalan ba ema no sasán ne’ebe tama ilegalmente mai teritóriu Timor-Leste liu husi “jalan tikus”. Informa Vise-Ministru Antonio ba SRP iha Komando PNTL Munisipiu Covalima (01/08/2020).

Dili, Prezidente Repúblika, Francisco Guterres Lu Olo, husu timoroan sira atu kontinua kumpri nafatin medidas prevensaun COVID-19 tuir rekomendasaun husi Organizasaun Mundial Saúde no husi Ministeriu Saúde. Prezidente Repúblika konsidera importante tebes Governu promove no foti medidas ba proteje no garante saúde públika.

Xefe Estadu hato’o ida ne’e, iha nia sorumutu semanal ho Komandante PNTL Faustino da Costa no nia Adjuntu Mateus Fernandes  ne’ebé  iha okaziaun ne’e aleinde koalia situasaun seguransa no servisu sira PNTL nian, koalia mós kona-ba medidas prevensaun ba Surtu Covid-19 iha area fronteira Timor-Leste ho Indonézia.

Ba Prezidente Repúblika Komisàriu Faustino da Costa relata PNTL haree hela posibilidade atu aumenta postu seguransa Unidade Polisia Fronteira (UPF) no nia husu ona ba Komandu PNTL iha Bobonaro, Covalima no RAEAO  atu servisu hamutuk nafatin ho lider komunitaria no Ofisial Polisia Suku sira ne’ebé iha area fronteira hodi evita ema tama no sai illegamente iha area refere.

Nia akresenta PNTL husu komunidade iha area fronteira atu la depende de’it ba UPF no F-FDTL hodi hala’o seguransa, maibe servisu hamutuk hodi evita propagasaun moras ne’e iha Timor-Leste. Komandante PNTL ne’e sublina, PNTL sei atúa no la tolera pasajen ilegal iha area fronteira.

“Se ita hatene ita-nia nasaun vizinu ne’e moras hela, ita hakarak ba signifika ita hakarak oho ita-nia an ho ita-nia familia sira. Timoroan sira tenki hatene ida ne’e”, afirma Komisariu Faustino da Costa ne’ebé relata ba Xefe Estadu katak situasaun seguransa rai-laran “la’o di’ak, kalma no hakmatek”.

Fontes: Midia PR

Dili, Komandu Polísia Nasional Timor-Leste (PNTL) liu husi Komandu Operasaun iha kinta-feira (30/07) ne’e realiza enkontru ida ho Grupu movimentu Universitariu Kontra Ezbosu Lei Kriminaliza Difamasaun ne’ebe maka kompostu husi estudante Universitariu sira.

Porta Voz Komandu PNTL Superintendente Xefe Arnaldo Araujo hafoin enkontru ba jornalista sira hateten grupu refere mai hasoru Komandu PNTL relasiona ho sira nia planu aktividade Asaun Pásifiku ida ne’ebe maka sei realiza iha loron 3 fulan Agostu tinan ne’e.

“Informa ba públiku katak ohin iha enkontru ne’e diskuti asuntu balun ne’ebe iha ona konkordansia ba malu maka hanesan Manifestante sira tenke kumpri Lei Nu. 1/2006 kona-ba LIBERDADE DE REUNIÃO E DE MANIFESTAÇÃO hodi bele hala’o asaun pásifiku ne’e ho diak”, informa Porta Voz Komandu PNTL ne’e.

Superintendente Xefe afirma tan katak iha konkordansia ne’e, parte Movimentu Universitariu aseita atu halo asaun refere tuir Lei ne’ebe maka vigora ona hanesan distansia metro 100 husi edifisiu governu no Estado, wainhira Movimentu Universitariu sira maka la kumpri iha asaun ne’e maka parte Polísia sei halo atuasaun basea ba Lei ne’ebe maka atribui ba Polísia.

“Parte Komandu, liu-liu PNTL munisipiu Dili sei fó seguransa tomak ba iha asaun ida ne’e, sé karik iha ema ruma ou parte terseiru ne’ebe maka hakarak atu pertuba asaun ne’e Polísia prontu atu bele atúa ida ne’e no polísia sei la tolera aktu krime ruma iha asaun pásifika ne’e”, haktuir Porta Voz Komandu PNTL ne’e.

Iha fatin hanesan, Leobardino Ximenes nu’udar Coordenador Campo Movimentu Universitariu hateten prezensa ohin iha Komandu PNTL nian maka atu fó koñesimentu ba parte polísia atu bele hatene asaun ne’ebe maka sei halo liu-liu loron, data no fatin.

“Asaun pásifika ne’e sei realiza duni iha loron 3 fulan Agostu iha fatin ne’ebe maka ami identifika ona maka iha edifisiu Liceu, asaun ne’e sei laiha ninia limitasaun tempu wainhira politiku sira lakoi tau interese no bele hare’e kona-ba kontekstu sistema demokrasia iha Timor-Leste no mós iha mundu”, haktuir Leobardino.

Coordenador akresenta tan responsabilidade hanesan sidadaun, akademia, sosiedade sivil no parte sira seluk ne’ebe maka la konkorda oinsa atu nafatin hatudu kredibilidade estadu soberania, estadu demokratiku Timor-Leste, ida ne’e maka ita halo hodi meius saida deit atu bele solusiona problema ne’e.

Media PNTL.

Dili- Formadu Quinto (5^o ) Kursu Promosaun Ofisial Superior (CPOS-sigla portuges) kontinua halo vizita estudu ba Kuartel Unidade Polisia Maritima (UPM) hodi hare besik liu servisu unidade ne’e nian.

Diretur do Kursu husi Institutu Defeza Nasional (IDN) Maijor Valerio Valente hateten vizita ne’e ho objetivu atu formadu sira prepara hela sira nia teze atu peskiza sira nia traballu investigasaun nune’e sira iha informasaun ruma karik aban bainrua sira mai husu informasaun ruma karik Komandante sira bele ajuda sira  hodi kompleta   nomos hatene estrutura iha Unidade ida tantu Militar no Polisia nia lalaok atu nune’e sira iha konyesementu utuan entermus operasional no sira hatene kuandu iha servisu ne’ebe maka iha ligasaun ba malu, Nia hato’o asuntu ne’e iha Ro’o NRT Kairala iha Portu Dili, Kuarta (2907).

Nia mos hato’o agradese ba Komandante UPM ne’ebe maka esplika ona situasaun ro’o ba formadu sira maske sira balu la estuda konaba ro’o maibe sira hakarak hatene utuan entre formadu nain 29 ne’e nain rua husi komponente naval F-FDTL maka iha konyesementu konaba tasi .

Iha okajiaun ne’e Komandante UPM Superintendente Basilio de Jesus hateten ho vizita formadu CPOS husi IDN mai UPM ohin hau esplika utuan konaba rekursu humanus ne’ebe ejisti, rekursu materiais ne’ebe maka iha kondisaun maka ne’e ita infrenta difikuldade lubuk ida maibe ita atu integra malu katak kondisaun hirak ne’e labele sai hanesan obstaklu ba ita nia servisu.

Nia haktuirtan informasaun hirak ne’ebe maka Unidade ne’e fahe sai hanesan introdusaun ida ba formadu sira nia teze karik iha formadu ruma atu levanta konaba kondisaun Autoridade Maritima Nasional ne’ebe maka governu planea atu estabelese ita iha dadus ou konaba servisu integradu entre Komponente Naval ho PNTL/UPM ita bele apoiu.

Atu termina Eis Ditretur Lojistika iha Kuartel Jeral PNTL ne’e enkoraja formadu sira katak Forsa no Polisia nudar ema ne’ebe maka hetan formasaun entaun iha fuan boot, korajen no atenbrani maske infrenta kondisaun difisil maibe labele sai obstaklu maibe oinsa maka ita servisu hakaas aan nafatin atu bele ultapasa situasaun hirak ne’e.

Iha vizita estudu ne’e formadu sira rona esplikasaun konaba servisu UPM, hare besik kondisaun ro’o Luzitania, Ro’o MV Timor-Leste no Ro’o NRT Kairala.

Antes ne’e Formadu sira halo ona vizita estudu komparativu iha Kuartel Jeral PNTL, Unidade Espesial Polisia (UEP). Media PNTL

Dili, Situasaun seguransa iha teritoriu nasional durante semana ida hahu’u husi loron 22 to’o 29 fulan Jullu tinan ne’e lao hakmatek maske mosu asidente no insidente balun.

Xefe Gabinete Relasaun Publikae Porta Voz Komandu Polísia Nasional Timor-leste (PNTL) Superintendente Xefe Arnaldo Araujo kuarta-feira (29/07) ne’e informa durante semana ida nia laran akontese asidente rua ne’ebe maka rezulta ema na’in rua mate.

“Asidente karreta Mini-Truk (Angguna) ida baku fila akontese iha munisipiu Aileu diresaun mai Dili ne’ebe hakanek ema na’in 11 no oras ne’e dadaun vitíma sira hala’o hela tratamentu iha HNGV, asidente tráfiku ida mós akontese iha munisipiu Liquiça motorista ida tula ema no monu iha dalan hodi rezulta motorista kaneke todan no nia maluk ida seluk mate iha fatin”, esplika Xefe Gabinete Relasaun Publika PNTL ne’e.

Porta Voz Komandu PNTL akresenta liu tan atu evita asidente hirak ne’e akontese tan maka oras ne’e dadaun PNTL munisipiu Dili hala’o hela aktividade pasa revista (Cek Point) ba transporte hirak ne’ebe maka sirkula iha kapital Dili.

“Tanba ne’e husu ba motorista sira hotu atu bele kumpri regras hirak ne’ebe maka Polísia Tránzitu sira hasai ona hanesan wainhira atu halo viagem tenke hare’e dokumentu transporte ninian, hare’e kondisaun transporte nian atu nune’e labele afeta ba sira nia ann rasik no ba ema seluk nia vida no informa mós ba públiku katak PNTL munisipiu Dili mós oras ne’e dadaun hala’o hela aktividade ida hodi rekolla transporte hirak ne’ebe maka att no para hela iha Estrada públiku tanba situasaun ne’e bele afeta ba engrafamentu”, apela Porta Voz Komandu PNTL ne’e.

Superintendente Xefe Arnaldo afirma tan iha semana ida nia laran akontese insidente hanesan Suisidu (Tara-Ann) hamutuk ha’at ne’ebe maka akontese hanesan iha munispiu Ermera kazu rua, Viqueque kazu ida no Suai kazu ida. Kazu hirak ne’e akontese tanba vitíma sira ho kondisaun moras mental no oras ne’e dadaun kazu hirak ne’e iha ona prosesu investigasaun no sei haruka ba Ministeriu Públiku hodi lori ba tribunal.

Media PNTL.

Dili, Komandu Polísia Nasional Timor-Leste (PNTL) liu husi Departamentu Polisiamentu Komunitaria Nasional (DPCN) kuarta-feira (29/07) ne’e hala’o serimonia enseramentu Formasaun Multimedia ba membru DPCN ne’ebe maka frekuenta formasaun durante fulan rua no oferese husi Kompañia CANXIGO Training Center.

Komandante Jerál PNTL Komisariu Polísia Faustino da Costa iha ninia intervensaun ba serimonia ne’ebe hala’o iha salaun enkontru Kuartél Jerál hateten hare’e ba Planu Estratéjiku Desenvolvimentu Nasional (PEDN) Timor-Leste 2011-2030 ne’ebe koalia kona-ba area PNTL nian, maka to’o iha tinan 2030 PNTL maka primeiru ninia ekipamentu ne’ebe avansadu basea ba desenvolvimentu no evuluasaun informasaun teknologia.

“Segundu maka iha 2030 PNTL ninia emar sira tenke ho koñesimentu ne’ebe ass liga ho informasaun no teknologia, ida ne’e maka hatu’ur iha PEDN nian, nune’e sé ita hare’e ba situasaun aktual evuluasaun no  desenvolvimentu liu-liu ita nia rai doben Timor-Leste”, tenik Komandante Jerál PNTL ne’e.

Autoridade másimu seguransa ne’e haktuir tan Timor-Leste restaura ninia Independensia iha era millennium ida, nia obriga ninia sidadaun sira tenke ajusta ninia koñesimentu no matenek la hare’e ba nia ne’ebe foin maka sai nasaun maibé hare’e ba geografikamente tenke ajusta ho nasaun sira iha area Asia no illa pasifíku nian. Signifika katak maske Timor-Leste iha area Asia no illa pasifíku nia le’et maibé ezizi desenvolvimentu no kapasitasaun sidadaun sira nian atu hanesan emar sira iha Eropa.

“Nune’e maka formasaun, kapasitasaun refere hanesan sub-programa ba implementasaun PEDN ninian katak iha 2030 PNTL tenke matenek iha area ida ne’e no ekipamentu tenke avansadu, signifika ba futuru ita sei identifika atu oinsa tenke iha nafatin kapasitasaun no formasaun ba area relevante hodi responde Planu Estratéjiku PNTL nian tantu mós PEDN”, hatutan Komisariu Polísia ne’e.

Iha fatin hanesan Diretor Kompañia CANXIGO hateten iha tinan 2019 kompañia hatama proposta ida mai iha DPCN atu halo formasaun ba ajente iha area jornalizmu básiku no multimedia, hafoin prosesu sira ne’e hotu maka hahu’u formasaun iha loron 14 Agostu to’o 14 Outubru 2019.

“Tuir lolos aktividade enseramentu ba formasaun ne’e ita hala’o ona iha momentu hirak liu ba maibe tanba ita hasoru situasaun COVID-19 nune’e maka ita bele realiza fila fali iha loron ohin, espera ho formasaun ida ne’e ita nia ajente sira bele aumenta koñesimentu iha area multimedia hodi kontribui ba servisu DPCN nian”, haktuir Diretor ne’e.

Iha serimonia ne’e formandu sira DPCN Demostra Kapasidade durante kursu Multimedia hanesan oinsa hasai foto ho diak no halo video badak. Hola parte iha aktividade ne’e Komandante Jerál, Komandante Komandu Operasaun, Administrasaun, Xefe Servisu no Diretor Departamentu sira iha Kuartél Jerál. Sorumutu ne’e taka ho fahe sertifikadu husi kompañia CANXIGO ba formandu sira.

Media PNTL.      

Dili- Komandu Polisia Nasional Timor-Leste (PNTL) munisipiu Bobonaro hametin vizibilidade iha komunidade nia le’et liu husi estabelesimentu Konsellu Polisiamentu Komunitaria (KPK) iha munisipiu Bobonaro

Komandante PNTL munisipiu Bobonaro Superintendente Xefe Octavio Araujo Bucar hateten

Iha munisipiu Bobonaro estabelese ona KPK iha postu administrativu 5 maibe tanba pandemia COVID-19 maka postu administrativu Lolotoe la halao tanba ne’e agora ami buka hela meius atu halao iha fulan Agostu ou Setembru oin mai bainhira bai loron no rai maran tanba Lolotoe rai malirin no udan hela deit, formasaun ba KPK sei prepara husi Komandu munisipiu ho apoiu husi Fundasaun Azia.

Nia esplika KPK nia servisu atu hare no identifika kazu saida maka akontese iha komunidade nia leet hodi buka solusaun hamutuk ezemplu kazu disputa rai, violensia domestika no seluktan maibe ba kazu sivil Polisia no membru KPK sira sempre halo mediasaun ho parte rua iha suku laran  no kazu krime ne’e prosesa tuir dalan justisa nian.

Hafoin estabelesimentu KPK kompletu Ami sei halo avaliasaun ba OPS iha suku 50 iha munisipiu Bobonaro no hirak ne’ebe sei falta fo formasaun no hirak ne’ebe maka diak ita kontinua fo motivasaun para halo diak liutan.

Atu asegura seguransa iha lina fronteira Komandu PNTL munisipiu Bobonaro sempre iha kordenasaun diak ho UPF wainhira iha kazu kontrabandu UPF kaptura entrega ba Komandu munisipiu hodi rejistu no prosesa ba Ministeriu Publiku hodi halo kontinuasaun.

Situasaun seguransa iha munisipiu Bobonaro oras ne’e daudaun lao normal no kontroladu maske iha asidente no insidente kiik oan ne’ebe maka akontese maibe sempre responde husi governu lokal, PNTL Eskuadra no postu sira hanesan Kailaku, Bobobnaro, Lolotoe, Maliana vila, Balibo, Batugade, Atabae, sempre iha resposta. Krime ne’ebe rejistu iha munisipiu Bobonaro maka hanesan Violensia Domestika, Ofensas integridade fizika no asaltu malu; Wainhira akontese kazu grave ruma sira halo konsultasaun ho Komandu munisipiu no Komandu munisipiu transmite mai Komandu Jeral.

Relasiona ho planu hari infraestrutura PNTL iha tinan 2021 hau sei bolu Komandante Eskuadra, KPK no Xefe suku sira atu hare fatin ne’ebe estratejiku liu nune’e bele hari postu OPS iha fatin adekuadu atu nune’e OPS ho ninia familia bele konsentra no hela metin iha neba hodi observa situasaun iha suku ne’e liuliu suku ne’ebe maka besik fronteira.

Kestiona konaba funsionamentu CCTV ne’ebe maka koloka iha munisipiu Bobonaro Komandante Bucar esplika kamera vizilansia CCTV hamutuk 12 maka instala iha Bobonaro maibe rua (2) avaria nia funsionamentu ladun adekuadu tanba prasija Air Condisionadu (AC) ne’ebe durante ne’e ami uza deit Vintunas. Ami halo ona proposta mai Komandu Jeral maibe seidauk iha resposta husi Komandu tanba ne’e ami sei esforsu hodi buka manera oinsa atu mantein kondisaun CCTV ne’e diak nafatin.         Media PNTL

Dili- Komandante Jeral no Segundu Komandante Jeral Polisia Nasional Timor-Leste(PNTL) halo enkontru ho Komandante munisipiu no Komandante Unidade hodi evalua servisu ne’ebe maka durante ne’e halao ona.

Komandante Jeral PNTL Komisariu Faustino da Costa hateten liu husi enkontru ne’e Komandu fo hanoin hodi hadia ba oin nomos kestaun orsamentu ba tinan ida ne’e hau fo hanoin ba Komandante sira no orenta sira atu lalika tau orsamentu ba kompras nian, Nia hato’o asuntu ne’e ba Jornalista sira iha Sentru Formasaun Polisia Dili, Tersa (28/07).

Alende ne’e koaliamos konaba uma ba OPS sira atu halo iha ne’ebe Komandante sira maka hatene liu tanba ne’e ami bolu Komandante sira nune’e waihira sira fila ba koalia ho parseru servisu sira hodi identifika suku ne’ebe maka atu halo uma nune’e sira hato’o ba Komandu atu halo planu asaun servisu ba tinan 2021.

Nia haktuirtan prioridade tinan 2020 maka hare ba dividas ne’ebe maka PNTL iha atu selu hahu  tinan 2017-2019 ho total hamutuk  $ 2.7 miloens no rezerva ba orsamentu operasional to’o fim do anu.

Iha tinan 2021 PNTL identifika prioridade tuir governu nian maka infraestrutura tanba ne’e PNTL tenke hatene infraestrutura saida maka presija atu halo iha nebe tanba ne’e maka ami koalia ho Komandante sira atu hatene fatin no rai iha ka lae nomos estatutu rai ne’e rasik.

Komandu mos informa ba Komandante sira konaba situasaun seguransa lao kalma no hakmatek maibe ikus-ikus ne’e situasaun asidente trafegu ne’ebe maka rejulta ema mate no kazu boot liu iha Oecusse  no kestaun agora ita koalia konaba natureja ka fator ema nomos insidente ema tara aan no mate iha Dili no Ermera nune’e hau husu ba Komandante sira tenke hatene ida ne’e para oinsa relata no asaun saida maka PNTL halo.

Enkontru evaluasaun servisu ne’e partisipa husi Inspetur Jeral, Komandante Administrasaun, Diretur Servisu Migrasaun, Sub Xefe Casa Militar, Komandante CFP, Komandante munisipiu, Komandante Unidade no Xefe departamentu sira. Media PNTL

Dili- Formadu Curso Promoção Oficiais Superior (CPOS) husi Instituto Defeza Nasional (IDN-sigla portuges)  nain 29 halo vizita estudu komaparativu iha Kuartel Jeral Polisia Nasional Timor-Leste (PNTL) hodi kompleta sira nia estudu antes gradua.

Diretor Diresaun Servisu Ensinu no Formasaun Tanente Coronel Punufanu hateten vizita ne’e ho nia objetivu atu rekola dadus no informasaun hodi kompleta sira nia materia individual ne’ebe sira simu ona atu dezenvolve iha tempu oin mai tanba ne’e ami halo programa vizita iha fatin hotu hodi foti dadus ne’ebe instituisaun sira fo hanesan Komandu Jeral PNTL, Kuartel Jeneral F-FDTL, no Komandu Unidade sira, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Kinta (23/07).

Nia esplika Materia ne’ebe maka sira hetan durante kursu tinan ida (hahu iha Fevereiru no hotu iha Dezenbru) nia laran maka konaba area Operasaun, Lojistika, Area Administrasaun alende ne’e sira mos tuir kursu ida ne’ebe hanaran Post graduasaun Mestradu ba area estratejia ne’ebe maka hanorin husi Profesor nain 10 ne’ebe mai husi Universidade Lisboa.

“Ita nia esperansa ho kursu ne’e bele prepara sira atu sai Komandante diak ida ne’ebe preparadu wainhira sira remata kursu no fila ba servisu bele aptu ona atu Komanda Batalao, sai Segundu Komandante Batalao ou sai Komandante Operasional iha batalao nia laran ou Komanda kompania Independentes,”dehan Punufanu.

Formadu 5^o kursu CPOS hamutuk nain 29 kompostu husi PNTL ho postu Inspetor Xefe nain 9 no F-FDTL ho postu Kapitaun nain 20.

Iha okajiaun ne’e Komandante do Komandu Administrasaun Superintendente Xefe Jose Soares hateten iha vizita ne’e Komandu PNTL aprezenta materia balu konaba Rekursu Humanu, Rekursu Lojistika no Rejimi Promosaun alende ne’e formadu sira mos halo vizita ba departamentu no diresaun sira iha Kuartel Jeral PNTL hanesan Sentru Nasional Komunikasaun (NOC-sigla Portuges), Servisu Investigasaun Kriminal Nasional (SICN-sigla Portuges), Diresaun Tranzitu Seguransa Rodaviariu Nasional (DTSRN-sigla Portuges) no Polisiamentu Komunitaria (POLKOM) ho vizita ne’e bele partilaa servisu Polisia nian iha Kuartel Jeral no munisipiu atu nune’e forsa rua ne’e bele partila informasaun no konyesementu ba malu atu membru husi instituisaun rua ne’e garante estabilidade seguransa rai laran atu nune’e fo espasu ba dezenvolvimentu ba país ida ne’e .

Kestiona konaba partisipasaun membru PNTL ne’ebe minimu liu eis Komandante munisipiu Baucau ne’e esplika emprinsipiu Komandu PNTL hakarak priense kuota 20 ne’ebe maka IDN fo maibe ita nia Ofisiais Inspetor sira falta konyesementu lingua portuges no rajaun seluk maka balu asumi hela kargu balu maibe Komandu esforsu hodi oferese kursu lingua portuges ba Ajente no Sarjentu sira maibe ba inspetor sira rekursu tempu minimu tebes ba sira atu hola parte iha kursu tanba sira servisu hela iha terrenu.

Iha vizita ne’e Komandu PNTL fo rekordasaun ba Formadu sira nune’emos Formadu sira entrega rekordasaun ba Komandu PNTL. Media PNTL