News

Dili- Parseru United Nations Development Program (UNDP-sigla ingles) entrega ekipamentu protesaun pessoal ba Polisia Nasional Timor-Leste (PNTL ) ne’ebe maka kontinua halao knaar durante periodu Estadu Emerjensia hasoru pandemia Moras Corona Virus (COVID-19).

Reprezentante Rezidente UNDP Tuya Altangerel hateten atu apoia Polisia nia servisu hodi prevene no responde kazu violensia bazeia ba jeneru no violensia domestika durante situasaun pandemia COVID-19 ohin loron UN inisiatva Spotlight, Cordinator rejidente ONU no Embaxador Uniaun Europeia haksolok hodi entrega material prevensaun COVID-19 ba PNTL hodi fasilita sira nia servisu.

Nia haktuirtan surtu COVID-19 kria kondisaun ne’ebe hamosu kazu violensia bazeia ba jeneru aumenta iha nivel global no Timor-Leste, Iha situasaun ida ne’e papel PNTL liu-liu VPU no Polisia Komunitaria inportante tebes hodi fo protesaun ba vitima sira tanba iha situasaun ida ne’e so uniku PNTL maka laiha distrasaun iha sira nia movimentu nune’e sira livre hodi servi komunidade no prevene violensia bazeia ba jeneru no violensia domistika.

Programa UN initiative Spotlight sei kontinua apoiu PNTL liu-liu hasae kualidade servisu Unidedade Polisia ba ba Ema Vulneravel (VPU-sigla ingles) no Polisia Komunitaria hodi inplementa atividade hanesan fo kapasitasaun ba membru PNTL iha unidade VPU no Polisiamentu Komunitaria konaba oinsa responde kazu sira relasiona ho violensia bazeia ba jeneru, Violensia Domestika no Violensia hasoru parseru intimu no kazu hasoru ema vulneravel sira iha area rural.

“Sei hadia no konstrui fatin Hakmatek VPU nian iha munisipiu alvu husi inisitiva Spotlight atu nune’e vitima sira bele hetan asesu ba justisa,” dehan Tuya.

Entretantu Reprezentante Rezidente ONU Roy Trivedy hateten entrega ekipamentu protesaun pesoal responde ba covid-19 UNDP atu apoiu forsa PNTL hodi fornese servisu ho diak atu kontribui hapara violensia kontra feto no labarik feto iha Timor-Leste.

Apoiu ne’e inportante tebes tanba tanba dalabarak forsa PNTL mak ema ne’ebe servisu iha lina oin hodi responde kualker situasaun ne’ebe maka akontese .

Iha okajiaun ne’e Komandante Jeral PNTL Komisariu Faustino da Costa hateten Apoiu ne’ebe maka parseru UNDP oferese ohin foka ba ekipamentu protesaun pessoal  hasoru Pandemia COVID-19 nune’e material hirak ne’e sei distribui ba membru PNTL iha munisipiu hotu liu-liu ba sira ne’ebe agora daudaun halao servisu iha terenu atu nune’e sira bele utilija ekipamentu protesaun hirak ne’e.

Nia haktuirtan parseru UNDP mos sei fo apoiu ba PNTL atu hare oinsa iha meius ruma atu bele apoiu area Polisiamentu Komunitaria no VPU atu halao sensivilijasaun ba komunidade tanba durante ne’e kazu violensia Domestika ass.

Ekipamentu hirak ne’ebe maka UNDP Programa UN Spotlight oferese maka hanesan Maskra hamutuk 4200, Luvas hamutuk 3000, hand sanitizer hamutuk 153, sabaun 75, Ekipamentu Protesaun Personal (PPE)  no seluktan.

Serimonia ne’e ho prezensa husi Embaxador Uniaun Eropeia Endrew Jacobs, Partipa iha serimonia ne’e Segundu Komandante UEP, Diretur Servisu Migrasaun, Komandante CFP, Komandante Unidade no Xefe Departamentu sira. Media PNTL

Dili, Segunda-feira (15/06) ne’e Komandu Polísia Nasional Timor-Leste (PNTL) liu husi Komandante Jerál Komisariu Polísia Faustino da Costa akompaña husi Segundu Komandante Jerál Komisariu Polísia Mateus Fernandes hala’o ekontru ida ho Komandante PNTL munisipiu 12 inklui RAEOA no Komandante Unidade sira PNTL nian hodi diskuti implementasaun Estadu Emerjensia hahu’u husi faze dahuluk to’o ohin loron.

Komisariu Polísia Faustino da Costa hafoin enkontru ba jornalista sira hateten sorumutu ohin loron nian ne’e foku ba asuntu rua maka hanesan implementasaun Estadu Emerjensia faze dahuluk, daruak no datoluk nian ne’ebe ita bele dehan hela loron 12 deit, entaun saida maka ami atu hare’e oinsa bele hato’o ba governu ba oin ninian.

“Dezafiu saida, vantagem saida maka iha Estadu Emerjensia durante ne’e, implementasaun lao diak ne’e maka ida ne’ebe, karik buat ruma ne’ebe prezija atu hadia no ida ne’ebe maka sai lisaun laos deit ba PNTL maibé mós ba ita nia komunidade, sosiedade tomak iha Estadu Emerjensia ne’e, atu hare’e diak no ladiak ne’e tanba saida”, tenik Komandante Jerál ne’e.

Lideransa másimu insituisaun PNTL ne’e afirma tan katak hanesan ita hotu akompaña situasaun iha rai laran liu-liu situasaun politika ne’ebe atu fahe ajenda ohin nian, katak primeiru kona-ba Pandemia COVID-19 ida fali ba situasaun politika aktual. Tan ne’e husu ba Komandante sira, saida maka sira nia observasaun durante ne’e iha terenu no mós saida maka Komandu durante ne’e akompaña iha buat balun hato’o ba sira no buat balun mós hato’o ba sira hodi aktualiza.

“Los duni Komandu rekoñese katak iha problema balun mak hasoru meius-de-apoiu hanesan ekipamentus, komunikasaun dala-ruma mós kona-ba uniforme ne’e mós problema ida hotu ne’ebe bele afeta ba servisu operasional nian, hanesan iha munisipiu sira dala-ruma tempu udan, ho sira nia sepatu no kondisaun sira nian ne’ebe iha, transporte sira oinsa, kondisaun merese hala’o servisu iha ne’eba ka lae tanba tempu besik ba oin ne’e ita hare’e ba orsamentu tinan ida ne’e no mós orsamentu tinan oin oinsa atu polísia iha ona informasaun sira ne’e hodi hato’o”, hatutan Komisariu Polísia ne’e.

Autoridade ne’e mós apela ba Komandante no membru sira katak keta haluha Konstituisaun RDTL artigu 147 koalia kona-ba Polísia Nasional, keta haluha polísia nia juramentu ne’ebe iha Regulamentu Disiplina iha artigu 6 hotu-hotu tenke kaer metin ida ne’e, keta haluha mós Regulamentu Disiplina iha artigu 8 koalia kona-ba Dever Jerál polísia nian, hanesan polísia ida tenke halo saida, entaun ho situsaun sira ne’e atu hare’e hodi responde preukupasaun balun ne’ebe durante ne’e iha hanesan mós kona-ba utilizasaun ekipamentus.

“Ho asuntu sira ne’e maka ohin bolu Komandante sira hotu atu koalia iha asuntu rua ne’e no hafoin enkontru ne’e Komandu sei elabora, prepara relatoriu ida hodi hato’o ba Ministru Interior Interinu”, hatutan Lideransa másimu insituisaun PNTL ne’e.

Media PNTL.                

Dili, iha âmbitu komemorasaun loron Santo António nu’udar mahein instituisaun Polísia Nasional Timor-Leste (PNTL) iha tinan ida ne’e, maka Komandu PNTL hala’o asaun karidade hodi apoiu nesesidade básiku ba komunidade kbi’it laek hamutuk uma kain 50 iha kapital Dili. Aktividade ne’e hala’o hafoin selebrasaun misa iha Kapela Centro Formação Polícia (CFP).

Komandante CFP Superintendente Xefe Arquimino Ramos ne’ebe reprezenta Komandu PNTL hafoin entrega apoiu ba komunidade kbi’it laek sira hateten aktividade karitativa ohin (13/06) ne’e husi PNTL tomak tanba ho komemorasaun loron Santu António hanesan padroeiru PNTL nian ho loron ida ne’e maka PNTL hakarak halo aktividade refere.

“Antes ne’e ami la identifika, ami lao deit mak hare’e ida ne’ebe mak nesesita tebes lori mai hodi ami entrega apoiu hirak ne’e hanesan mina, fos, supermie no ami lao hare’e ida ne’ebe nesesita tebes ajuda ida ne’e maka ami fó, ba apoiu ohin loron nian ami sei fó tulun ba komunidade kbi’it laek sira hamutuk uma kain 50 iha kapital Dili”, haktuir Komandante CFP ne’e.

Superintendente Xefe Arquimino hatutan komunidade kbi’it laek sira ne’e ami identifika tanba polísia ne’e loron-loron sempre lao ain hodi patrolia no hare’e rasik komnidade hirak ne’ebe maka neseita duni atu hetan apoiu.

Iha fatin hanesan Faustina de Carvalho hanesan benefisiaria ne’ebe maka hetan apoiu nesesidade básiku husi PNTL ne’e hato’o ninia sentimentu kontenti tanba foin ba dala-uluk hetan ajuda umanitaria ne’e. ajudu umanitariu sira ne’e maka hanesan fos saka ida, mina no supurmie kaixa ida.

“Hau husu obrigadu bo’ot ba polísia sira tanba ami hetan aihan hanesan ne’e, ami agradese ba tulun ne’ebe maka ohin loron ami hetan husi PNTL”, haktuir komunidade ne’ebe hela iha area ponte CPLP nian ne’e.

Media PNTL.

Dili, loron 13 fulan Juñu nu’udar loron Santo António de Padua ne’ebe sai hanesan mahein ba instituisaun Polísia Nasional Timor-Leste (PNTL). Komemorasaun tinan ida ne’e Komandu PNTL selebra ho aktividade simples ne’ebe hahu’u ho misa no halo asaun karidade ba komunidade kbi’it laek sira iha munisipiu Dili.

Komandante Jerál PNTL Komisariu Polísia Faustino da Costa hafoin partisipa misa ne’ebe hala’o iha Kapela Centro Formação Polícia (CFP) ba jornalista sira hateten tinan ida ne’e Komandu la halo selebrasaun Santu António hanesan tinan hirak liu ba kotuk iha ne’ebe maka halo proseisaun husi Komandu Jerál ba to’o iha Igreja Motael, hanesan mós iha munisipiu sira iha Santu António hanesan Manatutu no Baucau la halo serimonia bo’ot ne’ebe partisipa ema barak relasiona ho Pandemia surtu COVID-19 no implementasaun Estadu Emerjensia.

“Entaun ita uja nafatin Espíritu Santu António nian hanesan padroeira, esforsu ann nafatin hodi badinas, buka defende buat ne’ebe los, halo buat ne’ebe los, laos foti ann katak hau mak matenek liu, hau arogansia liu membrus PNTL labele ida ne’e, hotu-hotu hanesan tanba Santu António ninia karaktér mak nune’e maka Komandante sira uluk foti atu sai hanesan mahein ida hodi lao tuir mahein ida ne’e”, tenik Komandante Jerál PNTL ne’e.

Autoridade másimu seguransa ne’e apela ba Komandante hotu-hotu inklui membru tomak katak situasaun maske dala-ruma ita hanoin atu normal ona, maibé nafatin dala-ida tan rona ordem Komandu molok deside buat ruma konsulta ho Komandu no mós orienta membru sira atu halao kna’ar basea ba doutrina PNTL ninian.

Selebrasaun Santu António tinan ida ne’e hala’o simples no la marka prezensa husi Komandante PNTL munisipiu sira tanba oras ne’e dadaun iha munisipiu sira hala’o hela prosesu pagamentu subsidiu husi governu iha ne’ebe maka PNTL asegura hela ida ne’e. Ho nune’e selebrasaun tinan ne’e hola parte deit husi Komandante Jerál no esposa hamutuk ho ofisias superior sira iha Komandu Jerál inklui komunidade balun. Misa ne’ebe hala’o iha Kapela CFP ne’e deriji husi amo Nelinho Soares hanesan Kapelaun PNTL nian no akompaña husi amo selebrante na’in rua seluk.

Media PNTL.    

Dili- Komandante Jeral Polisia Nasional Timor-Leste (PNTL) no Segundu Komandante Jeral halao  enkontru ho Prezidente Republika Francisco Guterres “Lu-OLo”  hodi relata servisu seguransa durante fulan Maiu no planu kolokasaun membru hodi fo seguransa ba programa fahe subsidiu uma kain ba povu.

Komandante Jeral PNTL Komisariu Faustino da Costa hateten Ami aproveta enkontru Primeira semana ho Prezidente Republika hodi relata situasaun seguransa katak situasaun iha nivel teritoriu nasional lao diak no hakmatek iha semana ida ne’e nia laran, maske iha akontesementu kiik oan balu iha semana kotuk maibe kompara semana ida ne’e tuun, Nia hato’o asuntu ne’e ba Jornalista sira hafoin enkontru ho PR iha Palasiu Prezidente Bairo-Pite Dili, (04/06).

Komisariu ne’e haktuirtan planu agora daudaun hare ba oin maka inplementasaun regras Estadu Emerjensia(EE) no mos preparasaun PNTL atu fo seguransa ba programa governu hodi halo pagamentu subsidiu uma kain ba komunidade tuir data ne’ebe fo sai katak sei halao iha loron 9 to’o 22 fulan ne’e, relasiona ho programa governu ne’e ami aprejenta ba PR katak PNTL halo ona enkontru kordenasaun ho parte relebante ba prosesu hirak ne’e.

“ Komandu PNTL fo ona orentasaun ba membru sira nune’e PNTL preparadu atu asegura seguransa ba prosesu pagamanetu subsidiu ba komunidade ne’e”.

Alende ne’e PNTL mos foka ba inplementasaun Dekretu Lei  ba inplementasaun Estadu Emerjensia ba da-toluk ne’ebe taka movimentu transporte terestre, maritima no Aero; ita nia Aeroportu ita hatene lao bai-bain hanesan mos portu maibe foku prinsipal liu ba movimentu terrestre (rai maran ) tanba iha komunidade balun maka halo atividade kontra bandu iha fronteira munisipiu Bobonaro, Covalima no Oe-Cusse.

Iha enkontru ne’e Prezidente Republika mos husu oinsa kondisaun membru PNTL ne’ebe maka halao knaar iha fronteira tanba ne’e maka Komandu PNTL mos hare hela katak iha apoiu balu ne’ebe maka ita fo maske seidauk kompletu maibe kria kondisaun ne’ebe maka merese ba sira atu halao sira nia knaar iha fronteira ho diak liutan.

Komisariu Faustino mos informa katak durante periodu estadu emerjensia ema estranjeiru ne’ebe tama mai timor so ho autorijasaun Primeiru Ministru deit maibe iha  timor oan no ema estranjeiru balu tenta halo atividade kontra bandu atu tama mai teritoriu Timor-Leste Iha semana ne’e nia laran autoridade seguransa iha fronteira kaptura sidadaun Indonezia nain rua(2) iha munisipiu Bobonaro no Covalima nain tolu (3) nune’e autoridade seguransa rejeita sira nia entrada no haruka sira fila maibe iha Oe-cusse timor oan nain ida (1) ita haruka kumpri karatina durante semana rua.

Alende ne’e iha mos timor oan balu ne’ebe tenta atu lori sasan ba faan iha Indonezia maibe la konsege tanba sira halai soe hela sasan wainhira hetan autoridade seguransa iha fronteira nune’e Polisia foti sasan hirak ne’e hodi halo prosesu. Media PNTL

Dili, Komandu Polísia Nasional Timor-Leste (PNTL) iha loron 1 fulan Juñu tinan 2020 ne’e hetan apoiu ekipamentus ba Prevensaun COVID-19 husi organizasaun Plan Internasional Timor-Leste.

Komandante Komandu Administrasaun PNTL Superintendente Xefe José Soares ne’ebe reprezenta Komandante Jerál iha serimonia entrega ekipamentus hateten Plan Internasional hala’o doasaun ba PNTL ekipamentu prevensaun COVID ninian tanba sira prense sira nia dever tuir proposta ne’ebe maka PNTL hato’o iha fulan hirak liu ba kotuk.

“Ne’e dala-uluk Plan halo ba Komandu Jerál maibé iha realidade Plan halo servisu diak tebes ho PNTL sira ne’ebe maka iha munisipiu, sira nia relasaun no kooperasaun diak, tanba ne’e aproveita ho ameasa surtu COVID-19 ninian basea ba proposta ne’ebe maka ami hato’o sira kumpri no ohin loron sira entrega ekipamentus hirak ne’e” , tenik Komandante Komandu Administrasaun PNTL ne’e.

Superintendente Xefe José Soares afirma tan katak ekipamentus hirak ne’e bele utiliza ba membru sira tanba dala barak ema kestiona katak ami mak impõen regras COVID-19 ninian maibé iha realidade maka membru balun mak la uza maskra tanba ne’e ho ekipamentus hirak ne’e bele tulun hodi fasilita membru sira iha terenu hodi hala’o sira nia servisu ho diak.

“Ho númeru ne’ebe maka iha, ita konsidera prioridade ba membru sira ne’ebe mak iha fronteira tanba sira maka loron-loron enfrenta ho entrada ita nia sidadaun iha fronteira no ba membru sira iha munisipiu seluk ita mós atribui ona maibé ho ekipamentus hirak ne’e bele ajuda liu tan”, hakotu Superintendente Xefe ne’e.

Iha fatin hanesan, Country Director Plan Internasional Timor-Leste Diliyana Ximenes ba jornalista sira hateten iha fulan hirak liu ba Plan Internasional simu karta ida husi Komandu PNTL atu bele fó suporta sasan sira hanesan hygiene nian ba PNTL tanba Plan Internasional Timor-Leste servisu hamutuk ho PNTL iha tempu barak ona liu-liu iha munisipiu Aileu no Ainaro wainhira ami prezija PNTL sempre iha ami nia sorin.

“Entaun wainira simu karta pedidu ida ne’e, ami responde kedas hodi apoiu mascara suku hamutuk rihun ida atus lima (1.500) ida ne’e ami fó foku ba PNTL iha Dili, Aileu, Ainaro no iha Covalima tanba agora dadaun ami responde hela apoiu ba COVID ninian iha munisipiu Covalima, ami fó mós Hand Sanitizer litru hat-nulu (40), aimoruk desinfekta hodi rega ba edifisiu PNTL hamutuk 16, luvas, Etamol no thermometer”, hateten Country Director Plan Internasional Timor-Leste ne’e.

Diliyana Ximenes informa tan katak informalmente ami servisu hamutuk ona, PNTL sempre iha ami nia sorin wainhira ami hala’o ami nia aktividade iha munisipiu Aileu no Ainaro, ho apoiu ida ne’e maka hanesan loke odamatan hodi formalmente ami iha duni akordu ho PNTL atu servisu hamutuk iha area Igualdade Jéneru, Protesaun ba labarik, Salva guarda labarik no foin-sa’e, ida ne’e importante tebes tanba ita hotu hatene maluk Polísia sira mak sempre iha ita nia sorin wainhira ita hala’o aktividade ruma iha fatin ne’ebe deit, ba Plan orgullu tebes bele formalmente servisu hamutuk ho instituisaun PNTL.

Media PNTL.                

Dili-Komandu Polísia Nasional Timor-Leste (PNTL) liu husi Komandante Jerál no Segundu Komandante Jerál iha kinta-feira (21/05) ne’e hala’o enkontru semanal ho Prezidente Repúblika (PR) Dr.Francisco Guterres Lu-Olo hodi relata situasaun seguransa iha teritoriu nasional.

Komisáriu Faustino da Costa, akompaña husi Segundu Komandante Jeral Komisariu Mateus Fernandes, relata situasaun seguransa ba Prezidente Repúblika Francisco Guterres Lú Olo, katak situasaun iha teritoriu la’o hakmatek, maske tensaun polítika uitoan maibé la fó impaktu ba estabilidade iha rai laran.

Komandu Polisia Nasional Timor Leste Agradese no louva mos ba maturidade povu Timor Leste nia durante iha Estadu Emerjensia no situasaun politika iha rai laran, tanba kontribui tebes ba prosesu estabilidade nasaun nia.

“Ha’u Relata ba Prezidente Republika katak, situasaun jeral teritoriu nasional la’o diak, kalma no hakmatek. Maske sei iha tensaun politika ne’ebe ema hotu akompaña maibe ida ne’e mos aproveita atu agradese no apresia ita nia povu nafatin hakmatek”, dehan Komandante Jeral PNTL Komisariu Polisia Faustino da Costa hafoin hala’o enkontru ho Prezidente Republika Francisco Guterres “Lu Olo” iha Palasiu Prezidente Nicolau Lobato.

Tamba ne’e Komandu PNTL nafatin apela ba povu iha situasaun politika rai laran atu hakmatek nafatin hodi fo tenpu ba ulun bot sira atu buka solusaun.

Durante enkontru Prezidente Republika hato’o mos ninia apresiasaun ba Polisia Nasional Timor Leste liuliu durante periodu Estadu Emerjensia dahuluk no daruak nian. Media PNTL

Dili-Sentru Formasaun Polisia hatudu sira nia karidade ba kbiit laek sira durante iha estadu emerjensia nia laran kuaje uma kain rua nulu resin.

Komandante Sentru Formasaun Polisia Superintendente Xefe Arquimino Ramos haktuir, maneira apoiu ba kbiit laek liu husi patrulla iha situasaun emerjensia hodi identifika ba ema sira ne’ebe presija tulun.

Halo tia identifikasaun membru sira tau nesesidade baziku hanesan fos, supermie, mina no sabaun hodi fo ba kbiit laek sira.

“Ami la husu Xefe Aldeia sira, ami identifika deit iha patrulla husi Ponte Komoro III ba to’o Tasitolu, ami hare sira ne’ebe araska liu ami ajuda”, haktuir Komandante Sentru Formasaun Polisia. Mídia PNTL

Dili-Prevensaun Propagasaun surtu COVID-19, maka Komandu Polisia Nasional Timor Leste (PNTL) kontinua halo sensibilizasaun ba komunidade, motorista no kondutor ne’ebe kondus transporte publiku hodi kumpri regra Estadu Emerjensia da-ruak tuir dekretu no 8/2020.

Komandante PNTL Munisipiu Dili, Superintendente Xefe Armando Monteiro hateten katak, dadaun ne’e ekipa Komandu PNTL halo hela koordenasaun ho Governu hodi regula ninia regra ba kada transporte publiku sira para bele kontribui halo prevensaun ba propagasaun surtu COVID-19.

Komandante Munisipiu Dili mos sei fo orientasaun ba membrus Ofisial Polisia Suku (OPS) sei identifika Asosiasaun Taxi, Mikrolete, Bis no Angguna atu halo sorumutu ida atu hato’o regras Estadu Emerjensia hodi kumpri wainhira tula pasajeiru sira.

Superintendente Xefe Armando Monteiro Afirma katak, bainhira polisia sensibiliza tiha informasaun maka parte motorista no kondutor sira la kumpri, maka PNTL sei prende transporte no selu multa ba estadu tuir lei.

Komandu PNTL mos pronto servisu hamutuk nafatin ho Grupu Juventude Movimentu Tasi-Mos hodi ajuda polisia rega aimoruk dezinfeta ba transporte publiku ho edifisiu publiku sira.

Komandante alerta kurtel jeral PNTL, Superintendente Nicolau F. da Costa informa katak, sensibilizasaun informasaun ne’e parte PNTL halo iha area sira ne’ebe importante hanesan fatin negosiu ba motorista no kondutor sira.

Tuir orientasaun no diretiva ne’ebe fo sai husi komandu nian maka orienta abitante sira bainhira halo viajen ho transporte hotu-hotu tenke kumpri regra hanesa uza maskra, kumpri distansia social no distansia fiziku. Media-PNTL

Palásiu Prezidensiál Nicolau Lobato Bairo Pite, 30 Abril 2020

Prezidente Repúblika, Francisco Guterres Lú Olo, apresia serbisu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’ebé enfrenta risku boot hodi fó seguransa iha tempu surtu COVID-19.

Komandante Jerál PNTL, Komisáriu Faustino da Costa no Segundu Komandante Jeral PNTL, Mateus Fernandes iha enkontru semanál ho Prezidente Repúblika Francisco Guterres Lú Olo, informa preparasaun Komando PNTL relasiona ho estensaun Estadu emerjénsia ne’ebé foin lalais dekreta hosi Xefe Estadu.

Komisáriu Faustino da Costa hateten PNTL kontinua aplika regras sira ne’ebé Governu estabelese durante periudu dahuluk no prontu ezekuta “regras-foun” tuir desizaun Governu hodi konsolida seguransa ba prevensaun COVID-19 durante estensaun estadu emerjénsia.

Komisáriu PNTL mós relata kona-ba situasaun seguransa iha teritóriu-laran, ne’ebé nia konsidera “enjerál la’o di’ak no hakmatek”, maske iha konfrontu entre populasaun hanesan iha Samagia, Samalari no Uatulari.

Relasiona ho informasaun kona-ba ameasa ba Konselleiru Partidu KHUNTO, José Naimori foin lalais ne’e, Komisáriu Faustino da Costa hateten PNTL halo ona prosesu investigasaun ba kazu refere.

Iha semana kotuk, Xefe Estadu husu ona ba Primeiru Ministru atu Governu fornese fasilidade no ekipamentus hodi proteje servisu PNTL, F-FDTL no ekipa saúde ne’ebé hamriik iha liña oin ba prevensaun kombate COVID-19.

MÍDIA PR