News

Dili- Polisia Nasional Timor-Leste (PNTL) liu husi Unidade Servisu Investigasaun Kriminal (SIK) kaptura suspetu ho inisial CH ne’ebe maka simu pakote droga husi Nigeria mai Timor-Leste.

Sub Xefe Investigasaun Kriminal Nasional Inspetor Xefe Mouzinho Correia hateten iha loron 14 de Janeiru oras tuku:16:00 SIK hamutuk ho funsionariu Alfandega kargo Aeroportu Internasional Nicolao Lobato konsege prende pakote balu ne’ebe manda husi Nigeria mai Timor-Leste ne’ebe maka simu husi suspetu CH, Nai hato’o asuntu ne’e liu husi komferensia emprensa iha Kuartel Jeral PNTL Kaikoli Dili, Kinta (16/01).

Nia haktuirtan hafoin liu oras rua (2) SIK no Alfandega lori pakote ne’ebe suspeta hela mai eskritoriu SIK nasional, wainihra loke pakote ne’e iha laran hetan droga ho tipu sabu-sabu (Metam fetamin ) ho kuantidade 3.253 Kg.

Modus foun ne’ebe maka autor uza maka droga ne’e hatama iha kompresor Ac kareta nian no falun metin depois manda mai Timor-Leste no destinasaun final sei haruka ba Indonezia.

Suspetu CH servisu nudar resepsionista iha Hotel Timor-Plaza, no prosesu ba suspetu ne’e tuir lei ne’ebe maka vigora iha Timor-Leste, tanba kaptura ho flagrante delitu maka hafoin kompleta investigasaun oras 72 PNTL sei aprezenta ba Tribunal hodi submete ba julgamentu primeiru interogatoriu.

Enkuantu autor ne’ebe maka manda pakote ne’e husi Nigeria nia prosesu lao hela, ita fiar katak kazu ne’e iha relasaun ho kazu ne’ebe maka PNTL atende iha tinan kotuk pil eskasi 4684 Kg ne’ebe maka hetan iha Mota-Ain.

Iha tinan kotuk autor manda pakote ne’ebe hanesan maibe lahatene saida maka iha laran, pakote ne’e nia destinasaun ba Indonezia tanba nbe’e maka prosesu sei buka tuir nafatin liu husi koperasaun ho INTERPOL no POLRI iha Indonezia.

Relasiona ho akontesementu hahu iha tinan 2019 to’o ohin loron maka “Hau apela ba ita hotu liu-liu joven sira ne’ebe maka uza media sosial atu evita simu pakote ou kualker sasan husi ema deskonesidu tanba ita lahatene karik pakote ne’e kontein droga ruma;  ida ne’e sei prejudika ita boot sira tanba se ita la kuidadu ho sasan hirak ne’e maka ita nia ema inosente barak sei sai vitima ba autor krime sira”.

Antes termina sub Xefe investigasaun Kriminal ne’e informa katak iha ona evidensia barak hatudu katak Timor-Leste sai fatin tranzitu no destinasaun ba droga tanba autor sira hatene katak iha fator barak hanesan falta  ekipamentu atu detekta droga no menus rekursu humanus nomos fator seluk maka folin droga iha Timor-Leste karun liu kompara ho nasaun seluk grama ida (1) $200.00 to’o $350.00. Media PNTL

Dili, Prezidente Repúblika Demokratika Timor-Leste (PR-RDTL) Dr.Francisco Guterres Lu-Olo apresia servisu konjuntu ne’ebe maka Komandu Polísia Nasional Timor-Leste (PNTL) ho Forsa Falintil Defesa Timor-Leste (F-FDTL) hodi asegura seguransa ba komemorasaun loron bo’ot Natal 2019 no selebrasaun Tinan Foun 2020 iha teritoriu Timor laran tomak.

 Apresiasaun hirak ne’e PR hato’o ba Komandu PNTL liu husi Komandante Jerál Komisariu Polísia Faustino da Costa no Segundu Komandante Jerál Komisariu Polísia Mateus Fernandes wainhira hala’o enkontru ba dahuluk iha tinan foun 2020 iha kinta-feira (16/01) ne’e iha Palasiu Prezedente Aitarak-Laran.

Hafoin enkontru ba jornalista sira, Komisariu Polísia Faustino da Costa relata katak iha sorumutu ne’e Komandu aprezenta ba PR kona-ba situasaun Natal, Tinan Foun no mós akontesimentu hirak ne’ebe maka akontese durante fulan ida nia laran.

“PR apresia PNTL ho F-FDTL nia servisu hamutuk ba Natal no Tinan Foun ne’ebe mantein seguransa hodi ema hotu bele festeja ho diak no PR husu nafatin ho akontesimentu sira ne’ebe iha membru PNTL halo nia servisu basea nafatin ba Lei no Ordem ne’ebe iha”, esplika Komandante Jerál PNTL ne’e.

Komisariu Polísia afirma tan katak durante periode Natal hahu’u husi loron 1 to’o loron 31 fulan Dezembru 2019 PNTL rezista akontesimentu hamutuk 449 kazu ne’ebe mai husi ema lanu, halo asaltu ba malu. Fatór ne’ebe mak kontribui hodi rezulta ema lanu barak tanba livre atu asesu ba tua sabu ne’ebe maka faan iha fatin hotu no ho folin ne’ebe baratu.

Iha biban ne’e, Komisariu Polísia Faustino da Costa hato’o mós mensagem badak ba komunidade hotu relasiona ho Timor oan balun iha loron hirak liu ba hetan kapturasaun husi autoridade seguransa tanba lori Droga tama mai Timor-Leste. Ba ida ne’e, Komandante Jerál apela: “Ba sidadaun Timor oan hotu karik sasan balun ita bo’ot sira koñese liu husi Media Sosial husi nasaun ne’ebe deit, haruka sasan ruma ba ita bo’ot sira, husu atu evita sasan hirak ne’e labele ba foti no simu deit, tanba ida ne’e maka akontese ba ita nia sidadaun Timor oan balun ne’ebe maka iha loron hirak liu ba ami kaptura”.

Media PNTL.

Dili- Governu Ofisialmente halo lansamentu fatuk da-huluk ba konstrusaun edifisiu Kuartel Jeral Polisia Nasional Timor-Leste (PNTL) atu nune’e PNTL iha infraestrutura ne’ebe diak hodi bele halao knar lor-loron nian.

Ministru Defeza no Interior Interinu Filomeno Paixão hateten edifisiu foun ne’e inportante ba PNTL sira bele hetan instalasaun no ambiente ne’ebe maka diak liu ba servisu hodi nune’e PNTL bele halao servisu ho diak tanba PNTL halao servisu durante oras 24 hodi asegura seguransa  rai laran tanba ne’e maka Governu da-VI to’o mai governu da-VIII kaer nafatin politika kontinuidade hakarak fo apoiu ba PNTL hodi halo lalais konstrusaun edifisiu ida ne’e, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Sexta (10/01)

Nia haktuirtan konstrusaun edifisiu ne’e ho montante orsamentu hamutuk $10, 177,638.20 ne’ebe responsabilija husi kompania Shanghai Construction Group Co Ltd ho durasaun tempu tinan rua (2020-2022) no hein katak ita iha buat diak ida tanba ne’e maka ohin hau bolu atensaun Polisia sira katak governu tau aternsaun ba PNTL hodi foti povu nia osan ne’e halo imi nia uma halo diak tanba ne’e imi mos tenke atensaun atu halo servisu diak liutan.

Entretantu Komandante Jeral PNTL Komisariu Faustino da Costa hateten konstrusaun edifisiu Kuartel Jeral PNTL nudar projetu boot ida ne’ebe estadu no governu prepara ba instituisaun ida ne’e dala uluk iha PNTL ne’ebe mai ho intensaun ida ba bem estar ne’ebe faz parte ba kondisaun ifraestrutura atu membru sira halao sira nia knaar ho diak no responsabilidade.

Nia haktuirtan edifisiu ne’ebe ohin lansa sei sai fatin atu nune’e membru PNTL halao knaar ho responsabilidade tuir planu ne’ebe governu no estadu prepara antes tinan 2030.

Tuir planu estratejiku dezenvolvimentu nasional  2011-2030 defini katak bainhira to’o 2030 PNTL nudar instituisaun estadu ida ne’ebe kredibel no konfiabel ho ninia ekipamentu ne’ebe adekuadu, abansadu no modernu.

Konstrusaun edifisiu PNTL ne’e kompostu husi lobby, garajen kareta no motor, sala hodi halao servisu, salaun komferensia, fatin ba treinamentu, fatin ezersisiu (gym) no seluktan.

Istoria badak preparasaun ba konstrusaun

Planu ne’e hahu kedan iha tinan 2014 momentu Dr. Longuinhos Monteiro maka hanesan Komandante Jeral PNTL ne’ebe maka fo orentasaun ba Komandu Administrasaun Dirasaun Nasional Administrasaun no Planeamentu oinsa atu bele inisia prosesu ruma ba konstrusaun Kuartel Jeral PNTL.

Iha tinan 2017 Ministru Defeza no Seguransa Sr. Agustinho Sequera Xomoco atual deputadu Komisaun B asina kontratu ho kompania Shanghai Construction Group hodi ejekuta prosesu refere bazeia ba  prosesu ne’ebe halao husi CNA, ADN no MPS, iha loron 5 fulan Marsu tinan 2019 notifikasaun husi Ministeriu Justisa ba familia hitu (7) ne’ebe simu ona kompesasaun no indimizasaun husi governu hodi hamamuk fatin ne’ebe to’o ohin loron maske sei ejisti infrastrutura maibe laiha atividade ne’ebe halao iha fatin ne’ebe sei halao kontrusaun.

Maibe maske simu ona notifikasaun maibe iha Xefe familia hamutuk 10 maka seidauk husik mamuk fatin ne’e tanba sei ejiji oinsa atu hetan indimijasaun ne’ebe merese husi governu.

Serimonia lansamentu ne’e hahu ho serimonia kultural tuir lisan Lakoto ne’ebe maka partense ba rai Dili hodi hamulak no husu lisensa ba rai nain atu fo matak malirin ba PNTL.

Serimonia ne’e partisipa husi Sekretariu Estadu Terras Propriedade, Reprejentante Komisaun B Parlamentu Nasional Cornelio Gama “L-7”, Embaxador Republika Popular Cina iha Timor-Leste, Diretor kompania Shanghai Construction, Diretor Jeral Servisu Migrasaun, Komandante TLPDP, Komandante PNTL munisipiu 12 no RAEOA, Komandante UEP, UPF no UPM, Xefe suku Kaikoli, lia nain Lisan Lakoto Rumbia Kaikoli nomos kombidadu sira. Media PNTL

Dili, Komandu Polísia Nasional Timor-Leste (PNTL) hamutuk ho Komandu Forsa FALINTIL Defesa Timor-Leste (F-FDTL) iha loron segunda-feira dahuluk fulan Janeiru tinan 2020 (06/01) realiza enkontru ida ho objetivu atu halo avaliasaun ba servisu ne’ebe maka Komandu rua ne’e hala’o ona durante tinan 2019.

Ministru Defesa no Ministru Interior Interinu Filomeno Paixão ba jornalista sira hateten enkontru ne’e insiativa husi Komandu rua (PNTL no F-FDTL) ho hau nia kolaborasaun, apoiu tomak tanba tinan-tinan ita koalia bebeik Natal hamutuk, entaun tinan ida ne’e ita hola forma ida seluk no konteudu mós oin seluk oituan, forma ne’e maka Ofisias Superior sira mai hotu iha ne’e ita tur hamutuk koalia.

“Avaliasaun total ba seguransa nasaun nian, avaliasaun ita rona hotu husi parte PNTL no F-FDTL, no husi parte hau nian sei fó resumu ida ba avaliasaun rua ne’e no sei hare’e medidas konkretas saida maka sei foti iha tinan 2020”, esplika Ministru Defesa no Ministru Interior Interinu ne’e.

Tuir Filomeno Paixão haktuir iha 2019 mezmu iha problema oituan maibé PNTL konsege kontrola no atúa antepadamente, tanba ne’e ita atu hare’e no hadia diak liu tan servisu ne’ebe ita halo ba komunidade, atu Forsa rua ne’e bele kontribui diak liu intergradamente ba iha seguransa Nasional.

Iha fatin hanesan, Xefe Estadu Maior Jeneral FALINTIL Forsa Defesa Timor-Leste (F-FDTL) Major Jeneral Lere Anan Timur hateten hanesan ema humanu ne’ebe maka la perfeitu no sempre iha defisiensia maibé ita ema moris mai ne’e laos mai deit ho defisiensia no derota, ita moris mai ne’e derota mós iha vitoria mós iha.

“Tanba ne’e maka ohin PNTL ho F-FDTL liu-liu Ofisias sira hamutuk no Ministru Defesa, ami hare’e no halo reflesaun oituan kona-ba balansu oituan, desenvolvimentu aktividades iha tinan 2019 nia laran no tama ona ba iha tinan 2020, sempre iha 2019 laos hotu-hotu lao diak maibé sala mós iha, diak mós iha no ida ne’ebe maka sala ita buka despede ho tinan tuan, ita tama ba tinan foun ho buat foun”, tenik Xefe Estadu Maior Jeneral F-FDTL ne’e.

Major Jeneral Lere Anan Timur apela mós iha enkontru Avaliasaun ne’e ba Ofisias sira hotu katak primeiru ita tenke muda ita nia mentalidade, ita nia karakter atu sai lutu ba nasaun lolos, liu-liu kona-ba arte marsias, koalia kona-ba deslokasaun ba Indonesia no hau fó ordem ba Ofisias sira atu kontrola ninia membru sira.

Entretantu, Komandante Jerál PNTL Komisariu Polísia Faustino da Costa iha ninia entrevista heteten enkontru ne’e nu’udar avaliasaun servisu ba tinan 2019 no oinsa atu hadia diak liu tan iha tinan 2020 tanba ne’e maka ohin ita envolve Ofisias Subalternu, Kapitais, Ofisias Superiores no mós parte Polísia ho F-FDTL.

Hola parte iha enkontru avaliasaun ne’ebe hala’o iha Salaun Enkontru Ministeriu Finansas Aitaral-Laran ne’e maka Ministru Defesa no Ministru Interior Interinu, Sekretariu Estadu Pretesaun Sivil, Xefe Estadu Maior Jeneral F-FDTL, Komandante Jerál PNTL, Estrutura Komandu F-FDTL no PNTL, Ofisias Subalternu, Kapitais, Ofisias Superiores F-FDTL no PNTL.

Media PNTL.

Natal katak loron ida ne’ebe nain Jejus Kristu moris no povu kristaun sei selebra, selebrasaun loron Natal katak festa  familia nian ne’ebe aman inan no oan sira hamutuk, festa domin nian festa ida ne’ebe iha hakmatek nian.

Komandu PNTL aproveta oportunidade ida ne’e atu apela ba inan aman no ba povu tomak katak selebrasaun ida ne’e bele lao ho hakamtek, ho domin no paz, ita hotu nia kontribuisaun katak festa ida ne’e loron ida ne’ebe familia hamutuk hodi selebra prejensa Kristu nian maibe bainhira konsumu Alklu (tua) ruma evita halo viajen uja rasik transporte hanesan motor, kareta privadu no transporte publiku sira.

Apela mos ba inan aman sira ba komunidade tomak atu tau matan ba oan sira, tau matan ba alin sira uju de fugetes dalawain ema hanoin fugetes buat ida ne’ebe la fo risku maibe fugetes no paixon dalaruma hamosu konsekuensia iha tinan balu ba kotuk inan feton ida lakon nia  vida, akontesementu balu foin liu ba  alin joven balu minoridade uza fugetes no ikus mai kanek no inan aman lori ba ospital. Entaun inan aman sira tau atensaun didiak ba ida ne’e tanba fugetes bele halo ema ne’ebe uza sofre nomos vijinu sira iha ita nia bairu no ita nia aldeia.

Ba motorista sira hotu bainhira festeja loron Kristu nian maka evita konsumu Alklu tanba ema hotu ne’ebe uza ita boot nia transporte sira nia vida tomak iha ita boot nia liman.

Alende asegura komunidade no sosiedade sira nia viajen husi uma ba kapela, ba igreja no ba parokia PNTL ho nia Unidade tomak sei asegura eventu ida ne’e.Uzu de transporte no veiculu de Estadu PNTL halo ona kordenasaun ho Komisaun Anti Korupsaun(KAK), katak loron ferias naruk ne’ebe governu dekreta PNTL sei halo nia atividade hodi asegura ema hotu ne’ebe uza patrimoniu estadu nian katak bainhira laiha autorijasaun propriu maka membru PNTL sei hola medidas hodi foti trasporte governu nian ne’ebe laos halao servisu no sem autorijasaun husi Superior hirarkia

Ba membru PNTL selebrasaun loron Natal no tinan Foun loron ida ne’e inportante maske nune’e nudar Komandante Jeral orienta tuir nesesidade servisu no nesesidade operasional maka ita hotu sei alerta nafatin atu nune’e ita nia familia no ita nia komunidade selebra no festeja loron boot ne’e ho Dame, Domin no hakmatek.

Numeru Asidente trafiku Ass Kada Tinan

Atu hato’o ba komunidade no povu tomak katak iha tinan 2018 PNTL rejista no halo atendementu ba akontesementu no asidente hamutuk 1712, husi asindente tranzitu hirak ne’e rejulta ema nain 368 kanek todan, nain 421 kanek kmaan  no nain 72 maka lakon sira nia vida (mate).

Iha tinan 2019 to’o oras ne’e daudaun PNTL iha teritoriu tomak rejistu asidente hamutuk 1440 husi total asidente ne’e rejistu to’o ohin loron rejulta kanek todan nain 342 no nain 68 maka lakon vida (mate) nune’e kompara ho tinan 2018 iha fulan Dezembru nia laran ema ne’ebe lakon vida hamutuk nain 9.

Iha fulan Dezembru tinan 2019 nia rohan ita rejista ema nain rua (2) maka lakon vida tanba asidente trafiku ho informasaun hirak ne’e ami nia esperansa katak kolaborasaun no koperasaun ema hotu nian ita sei bele redus asidente trafiku iha selebrasaun festa Natal no tinan foun.

Husu atu komunidade hotu ne’ebe selebra tau nafatin fiar ba Maromak atu nune’e Maromak sei leno naroman ida ne’ebe nakonu ho esperansa ba ita hotu iha loron, fulan no tinan ne’ebe foun liu-liu loro matan ida ne’ebe sei mosu iha loron 1 fulan Janeiru tinan 2020 esperansa boot ida ne’ebe ema hotu tau katak era mileniu ba tinan 2020 nudar era ida ne’ebe komunidade no sosiedade tomak tau esperansa katak Timor-Leste mos iha dame, domin, paz hakmatek nia laran.

Ikus liu hodi estrutura Komandu PNTL nia naran ami hakarak hato’o Ami nia Natal ida ne’ebe hakamtek ho domin ho paz ba povu Timor-Leste liu-liu ba sira ne’ebe selebra loron prejensa Kristu nian;  Feliz Natal 2019 no Boas Entradas 2020 ba ita hotu. Media PNTL.

Dili_ Polisia Nasional Timor Leste (PNTL) liu husi gabinete Jender fo ajuda ai-han ba vitima afetadu dejastre naturais no kbiit laek iha Munisipiu Ermera  Postu Admistrativu Hatulia no Postu Administrativu Remixio munispiu Aileu.

“Relasaun ho komemorasaun loron mundial feto iha area rurais, tamba ne’e ami fo ajuda ba ema  kbiit laek, vitima dezastre naturais no amu lulik sira ne’ebe halibur ita nia oan sira, ajudu ne’e la hare ninia kualidade no valor”, dehan Xefe Gabinete Jender PNTL Inspektur Xefe Daria Ximenes.

Iha okajiaun ne’e amu paroku Hatulia Pe. Natalino da Costa Soares hato’o ninia agradese ba Instituisaun PNTL ne’ebe ho laran luak no disponibel hodi fo ajuda ba Parokia Hatulia.

“Hau hanesan labarik sira nia aman iha fatin ida ne’e hakarak agradese tebes ba Instituisaun PNTL departamentu Jender ne’ebe ho laran luak no disponibilidade hodi hakat mai ami nia fatin hodi fo ajuda ba labarik sira ne’ebe hela iha ne’e; tamba domin, PNTL mak povu, povu mak PNTL, nune’e PNTL iha fo ajuda buat ne’ebe mak sira iha”, dehan amu Paroku.

Entretantu Administrador Postu Administrativu Remixiu Jacinto Mendonça mos fo agradese ba PNTL departamentu Jender tamba iha interese fo apoiu ba familia sira ne’ebe afeitadu ba dezastre no kbi’it laek.

Ai han ne’ebe mak Gabinete Jender PNTL fo ajuda mak hanesan fos, mina, supermi, sabaun no Rinso. Media PNTL

Dili-Polisia nasional Timor-leste PNTL sei asegura seguransa ba selebrasaun natal no Tinan Foun 2020 atu nune’e povu bele festeja ho kontente, seguru nakonu ho paz dame no domin.

Komandante Jeral PNTL Komisariu Faustino da Costa hateten Komandu PNTL halo hela preparasaun oinsa atu asegura selebrasaun Natal no Tinan Foun tanba ne’e maka iha Unidade Espesial Polisia (UEP ) halo parada atu suporta apoiu ba Komandu munisipiu sira no UEP sei alerta un. Nia hato’o asuntu ne’e ba Jornalista sira iha Kuartel UEP Bairo-Pite Dili, Segunda (23/12).

Komisariu ne’e haktuirtan hanesan Komandante Jeral orenta ona estrutura Komandu PNTL nian katak ba se deit maka atu halo festa familia nian ida ne’e lao la tuir nia dalan ka halo inpedementu ba movimentu komunidade nian maka PNTL sei la tolera, ita sei atua kuandu buat ida ne’ebe  ba ema hotu-hotu nia interese satan iha uma laran, igreja laran, nomos iha fatin publiku.

“PNTL iha ona diretiva ida ne’ebe uza nia rekursu sira ho maximu no bainhira rekursu hirak ne’e sei presija nafatin suporta apoiu maka Falintil F-FDTL iha ona diretiva konjunta ida, sira sei suporta no apoiu PNTL bainhira nesesita. Komponente tomak iha ne’ebe F-FDTL iha hahu husi fronteira to’o parte leste,” dehan Komandante Jeral.

Aproveta oportunidade ida ne’e hakarak dehan katak ita presija no tenke selebra Natal ida ne’ebe hakmatek, ho dame, no Natal ida ne’ebe ho domin nune’e ita hotu hamutuk hodi simu tinan foun ida ne’ebe furak, tinan foun ida ne’ebe murak ba ema hotu no mehi katak se iha tinan 2019 iha buat balu ne’ebe ita tenke hadia iha 2020 ita buka hadia livre, dame, domin no hakmatek.

Entretantu Komandante UEP Superintendente Xefe Afonso dos Santos hateten Komandu UEP fo apoiu ba Komandu munisipiu hotu, nemak ohin halo gelar Operasaun ida ne’ebe inklui COE, BOP, CSP no Peltaun de Apoiu Servisu; Atividade operasaun sei halo rutina to’o dia 10 de Janeiru tuir orentasaun Komandu Jeral PNTL.

“UEP preparadu atu halo atuasaun bainhira mosu konflitu entre joven iha bairu-bairu tanba UEP nia  misaun klaru katak laiha toleransia ba sedeit,” dehan Komandante UEP.

Nia haktuirtan sistema kolokasaun iha Dili Kompania Alfa sei destaka ba parte Dili leste, no Kompania Carlie sei apoiu munisipiu Dili parte weste, membru GOE, SAT no EOD stand by para halao sira nia knaar propriu tuir sira nia misaun.

Serimonia parada ne’e prejidi husi Komandante Jeral PNTL akompania husi Komandante UEP, Segundu Komandante UEP Superintendente Orlando Gomes, Komandante Seksaun no membru UEP husi Batelaun Ordem Publika (BOP), Corpu Seguransa Pessoal (CSP), Seksaun Anti Terorista (SAT), Explosive Ordnance Disposal (EOD). Media PNTL

Dili- Unidade Patrulhamentu Fronteira (UPF) sei reforsa vizilansia no seguransa ba selebrasaun loron Natal no Tinan Foun atu nune’e komunidade hirak ne’ebe maka hela iha area fronteira bele festeja loron boot ne’e ho seguru nakonu ho paz, dame no domin.

Komandante  UPF Superintendente João Belo Reis hateten ami halo kordenasaun ba preparasaun Natal nian hahu kedas iha fulan Novembru, ami mos halo passa revista iha fatin hirak ne’ebe maka konsidera hanesan movimentu illegal no sasan kontra bandu barak ami reforsatan ami nia membru atu nune’e bele deskobre karik iha ema ruma tama ita nia nasaun liu husi dalan illegal, Nia hato’o asuntu hirak ne’e ba Jornalista sira iha Kuartel Jeral PNTL Kaikoli Dili, Kinta (19/12).

Superintendente ne’e haktuirtan UPF iha kordenasaun ho ajensia interligadu iha fronteira liu-liu Alfandega, Imigrasaun no Polisia Militar (PM). Iha parte seluk preparasaun seguransa ba Natal no tinan foun membrus hotu-hotu la autorija ba uma maibe stand by para reforsa karik buat ruma instituisaun presija sira, sira iha neba para fo apoiu.

Husu konaba servisu Operasaional loro-loron nian Komandante UPF ne’e esplika iha kordenasaun ne’ebe maka halo ho POLRI liu-liu parte BNN nian Ami lansa hela informasaun balu no detekta mos movimentu ne’ebe maka konsidera tama iha buat balu ne’ebe maka ita suspeta hela tanba ne’e maka horseik no horbainrua ita konsege kaer ema nain ida ne’ebe maka diskumfia uja droga no trafikante droga nian hodi halo prosesu investigasaun iha Komandu munisipiu.

Kazu Kontra Bandu Ass Iha Tinan 2019

Iha Tinan 2019 kazu kontrabandu  hanesan minarai illegal rejistu hamutuk 37 toneladas maka UPF prende, kareta tolu (3) motorizada walu (8), sigaru, movimentu ema illegal relasaun ho arte marsiais no buat seluktan, prosesu ba kazu hirak ne’e Komandu UPF entrega ba Komandu PNTL munisipiu Bobonaro, RAEOA no Suai.

Progresu no mudansa balu ne’ebe maka iha movimentu ema tama no sai iha fronteira depois de estadu parte Imigrasaun lansa viza livre movimentu illegal iha fronteira komesa menus tanba ema prefere uza vistu tama ita nia nasaun .

Alende ne’e governu fo apoiu Drones 10 ba UPF para bele uza halo patrulamentu iha liña fronteira, fasilidade ne’ebe maka governu fo apoiu nudar meius ida hodi bele hakmaan servisu iha patrulamentu fronteira, ho drones ita hateten katak ema nain 10 nia servisu Drones ida bele halao iha loron ida ho nune’e  teknolojia reforsatan efetividade servisu  UPF iha futuru.

Planu tinan 2020, UPF sei reforsu  pessoal barak liutan aprejenta ba Komandu no agora ita planu mos atu montatan Kamara Vizilansia (CCTV) iha postu Mota-Ain, Mota-Masin no Sakato no iha mos hanoin atu halotan postu 13 iha fronteira liu-liu iha zona sira ne’ebe maka konsidera movimentu illegal barak. Media PNTL

Dili- Badan Narkotika Nasional (BNN) husi Indonezia halo enkontru ho Komandu Polisia Nasional Timor-Leste (PNTL) hodi hametin koperasaun servisu iha kombate Droga.

Komandante Jeral PNTL Komisariu Faustino da Costa hateten enkontru ohin hanesan kontinuasaun servisu ne’ebe maka durante ne’e iha entre PNTL ho BNN  ligadu ho kazu narkoba nune’e servisu ne’ebe diak ita mantein, karik buat balu ita presija hare, hadiak no hametin liutan ba oin, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Kinta (19/12).

Komisariu ne’e haktuirtan Diskusaun ne’ebe halo atu hare ba oin karik sei iha akordu ou MOU ruma atu asina ita prepara, depois iha akordu ne’e maka difini area ne’ebe maka ita bele hare no halao hamutuk, hanesan Sub-Xefe BNN ohin dehan  karik ita sei hare konaba halo formasaun konjuntu.

“Iha ne’e ami halo diskusaun kleur utuan katak formasaun konjuntu ne’e laos involve PNTL deit maibe involvemos Ministeriu seluk tanba iha Timor-Leste ita iha sistema multi pluralismu polisial entaun iha neba laos PNTL mesak mak investiga maibe PNTL mos hola parte prevensaun ida entaun iha mos diresaun sira seluk hanesan Ministeriu Finansas diresaun Alfandega, Ministeriu Agrikultura no Peskas diresaun Quarantina, F-FDTL, PSIK no Prokurador sira,” dehan Komisariu Faustino.

Komisariu ne’e haktuir tuir lei timor nia dehan kualker akordu ne’ebe maka inplika ba Orsamentu Jeral Estadu tenke liu husi aprejentasaun no asensaun husi Konsellu Ministru tanba ne’e rejultadu enkontru ohin sei hato’o ba governu oinsa atu bele hare iha parte ida ne’e.

Iha okajiuan ne’e Inspetor Jeneral Polisi Budi Sarwono hateten enkontru ne’e atu hametin koperasaun servisu entre instituisaun rua ne’ebe maka lao diak ona tanba tuir ami nia hare ba futuru sei mosu dejafiu makaas liutan.

Ami espera katak Komandante Jeral PNTL bele fo politika koperasaun servisu ba BNN no Indonezia atu kombate tranzasaun narkoba no utilijasaun narkoba ne’ebe maka lalos tanba fo perigu ba nasaun rua tanba ne’e maka presija hametin relasaun ida ne’e no servisu hamutuk hodi fo informasaun ba malu.

Koperasaun ne’e sei halao ho parte Servisu Migrasaun, Quarantina, no PNTL; presija involve parte hotu nune’e ita iha misaun no vizaun ne’ebe maka hanesan nune’e servisu iha terenu la infrenta dezafiu.

Ohin ami halo diskusaun ne’ebe detallu  relasiona ho koperasaun servisu no treinamentu hamutuk no operasaun hamutuk no nudar baze husi koperasaun servisu ida ne’e maka ita asina Memorandu de Intendimentu (MOU)  entre PNTL no BNN.

Enkontru ne’e Prejidi husi Komandante Jeral akompaña husi Segundu Komandante Jeral Komisariu Mateus Fernandes no delegasaun BNN Xefia husi Irjen Pol. Drs. Puji Sarwono akompana husi Adidu Seguransa Indonezia ba Timor-leste, Adidu Seguransa Timor-leste ba Indonezia ho prejensa husi Inspetor Jeral PNTL, Komandante SIP, Komandante Administrasaun, Komandante SIK no Ofisiais Superior sira. Media PNTL

Maibe realidade servisu maka eis kantor Juga Gama no Binta ne’ebe maka komete kazu droga no halai ba Indonezia maske laiha akordu maibe parte Indonezia entrega fali mai ita ne’ebe maka ita hare hodi tau iha akordu servisu balu iha area sira ne’e.