News

Dili, loron 20 Maiu 2019 Repúblika Demokrátika Timor-Leste komemora loron restaurasaun Independensia ba dala sanulu resin hitu (17) ho serimonia insar bandeira ne’ebe hala’o iha Palacio Presidente Nicolau Lobato Aitarak-laran Dili.

Komandante Jerál Polisia Nasional Timor-Leste (PNTL) Komisariu Polisia Faustino da Costa hamutuk ho esposa ne’ebe partisipa iha serimonia ne’e hato’o parabens ba estado no Povu Timor laran tomak ne’ebe mak komemora Loron Restaurasaun Indepensdensia ba dala 17.

“Ho tinan sanulu resin hitu (17 )ne’ebe mak ita selebra  katak ita hot-hotu suporta, apoiu paz ba estabilidade liu-liu oinsa para bele dezenvolve ita nia Rain”, tenik Komandante Jerál.

Serimonia ne’e diriji husi Presidente da Repúblika Dr. Francisco Guterres Lu-Olo no Partisipa husi Primeiro Ministro, Persidente Parlamento Nacional ,Presidente  do Tribunal Rekursu, membru  governu, membru deputadu/a, korpu diplomátiku, komandu F-FDTL no PNTL, estudantes no komunidade. Koru husi Santa Cecilia Balide Dili no iha seremonia ne’e mós Presidente da Repúblika fó kondekorasaun  ho Ordem de Timor-Leste ba luta nain sira.

Esperansa ba futuru  ho selebrasaun loron Restaurasaun Indepensia ba dala 17 ita bele hametin liutan unidade paz,no estabilidade iha Nasaun ida ne’e.

Media PNTL.

Dili- Membru Polisia Nasional Timor-Leste (PNTL) nain 40 tuir kursu uza forsa no direitus humanus atu nune’e bele hamenus kazu utilijasaun armas la tuir lei no padraun ne’ebe maka iha.

Komandante Jeral PNTL Komisariu Faustino da Costa hateten Polisia uza forsa wainhira nesesita no iha situasaun perigoju nia laran nune’e proibido ba membru PNTL ne’ebe maka uza arma la tuir regras hodi fo perigu ba ema seluk, Nia hato’o asuntu ne’e ba Jornalista sira iha Centro Formasaun Polisia Comoro Dili, Segunda (21/05).

Komisariu ne’e haktuirtan knaar no responsabilidade pessoal PNTL nian atu fasilita ema hirak ne’ebe viola regra, lei no viola direitus ema seluk nian ne’ebe tuir los labele halo, Polisia laos atu viola regras no lei.

“Komandu espera hafoin treinamentu ne’e bele redus uza forsa susesivu tanba Polisia laos atu viola lei”.

Formasaun ne’e halo ba membru nain 40 hodi prepara sira sai treinador depois obrigatoriu ba Komandante munisipiu, Unidade no Departamentu nomos Komandante Jeral ho Segundu Komandante Jeral sei partisipa iha kursu ne’e para hatene konaba uza forsa selae maka dala ruma ita halo sala no lao ses husi koridor ne’ebe iha.

Atu termina Komandante Jeral husu ba partisipante sira atu aproveta kursu ne’e no tau iha pratika.

Iha okajiaun ne’e Komandante CFP Superintendente Arquimino Ramos hateten ohin halo abertura ba kursu rua (2) primeiro Sucoro no uza Forca. Kursu Primeiro Sucoro nian ita konvida CVTL tanba Polisia atende situasaun emerjensia no dejastre presija atendementu primeiro sucoro tanba dalabarak ita hein ambulansia vitima mate liu tia maka ambulansia to’o mai entaun kualker membru Polisia ne’ebe hasoru asidente hirak ne’e presija iha konyesementu baziku atu bele ajuda vitima sira sedu liu diak liu tanba kazu bele prosesu maibe ema nia vida inportante.

Nia haktuirtan Ho ID Card ne’ebe iha kada membru ne’ebe passa iha kursu uza forsa iha direitu atu uza arma no ba sira ne’ebe la passa laiha direitu atu utilija arma no tenke tuir kursu tinan oin atu bele iha kualifikasaun.

Kursu ne’e sei foka liu konaba lei uza forsa, uza forsa tuir nia padraun ho proporsional iha legalidade no tuir nesesidade.

Kursu uza forsa no Diretus Humanus fo ba membru nain 40 husi Unidade no munisipiu hotu durante semana 6. No kursu primeiru Sucoru fob a membru nain 28 durante loron tolu (21-23/05)

Kursu uza forsa, Direitus Humanus no Primeiro Sucoro ne’e hetan apoiu finanseru husi parseru Polisia Federal Autralia no Programa Apoiu Polisiamentu Komunitaria husi Novazelandia. Media PNTL

Dili, Komandu Polísia Nasional Timor-Leste (PNTL) liu husi Departamentu Polisiamentu Comunitario Nacional (DPCN) apoiu treinamentu aktividade Drum Band ba estudante sira iha eskola Secundaria Annur. Abertura treinamentu Drum Band ne’e hala’o iha resintu eskola Secundaria Annur iha loron sexta (17/05) semana kotuk.

Diretór DPCN Superintendente Asistente António da Luz ne’ebe ofisialmente halo abertura ba aktividade treinamentu ne’e hateten eskola Secunadria Annur iha ekipamentu Drum Band ninian maibé sira (eskola Secunadria Annur-red) laiha treinador ida ne’ebe maka bele hanorin estudante sira atu utiliza instrumentu sira ne’e nune’e sira husu apoiu PNTL nian liu-liu DPCN atu bele sai observador inklui mós treinador.

“Além-de treinu ba Drum Band nian, ita mós iha planu halo treinamentu ba Eskuteru ninian atu bele treinu sira oinsa maka sira bele prepara sira nia ann didiak, muda sira nia karakter no mentalidade oinsa bele iha disiplina atu bele hala’o sira nia aktividade loron-loron ninian, ida ne’e maka husi eskola Annur ninian servisu hamutuk ho PNTL atu bele fó formasaun ba sira”, tenik Diretór DPCN ne’e.

António da Luz ne’ebe hanesan mós Presidente Eskuteru Munisipiu Dili akresenta tan katak total estudante sira ne’ebe maka partisipa iha akrtividade Drum Band ne’e hamutuk 94 no fahe ba faze rua, treinamentu ne’e rasik sei hala’o iha fim-de-semana durante oras rua nia laran.

“Espera katak ba oin estudante sira ne’e iha preparasaun diak no iha disiplina atu bele partisipa iha formasaun ida ne’e, prepara mós sira wainhira iha serimonia ou eventu importante sira hanesan aniversariu PNTL iha 27 Marsu kada tinan ita bele konvida sira atu partisipa hodi anima iha eventu sira ne’e”, hatutan Superintendente Asistente ne’e.

Apoiu PNTL nian liu husi DPCN ne’e hanesan treinu gratuita tanbe ne’e misaun Polísia nian atu bele eduka ita nia oan sira, entaun gratuita ita la husu buat ida husi eskola, ita fornese ita nia tempu tomak ho gratuita hodi bele ajuda ita nia oan sira hodi forma sira nia karakter.

Partisipa iha lansamentu treinamentu ne’e Diretór DPCN, reprezentante Fundasaun Annur, reprezentante Xefe Suku Kampu Alor, profesores no estudante eskola Secundaria Annur.

Media PNTL.   

Dili- Ministeriu Saude halo enkontru ho Komandu Polisia Nasional Timor-Leste (PNTL) munisipiu Dili no ministeriu relevante konaba inplementasaun rejime kontrolu tabaku Dekretu lei Nu. 14/2016 nune’e bele prevene kauza husi fuma sigaru.

Xefe departamentu Controlo Doenças Não Contasiozas Dr. Frederico Bosco Alves dos Santos hateten enkontru ne’e nia objetivu atu buka solusaun hamutuk no manera ne’ebe diak liu tuir ita nia situasaun atu inplementa Dekretu lei Nu. 14/2016 konaba rejime kontrolu tabaco nian, Nia hato’o asuntu ne’e iha Kuartel Komandu Munisipiu Dili, Kinta (16/05).

Nia haktuirtan   ita halibur hamutuk lina ministerial sira hanesan Diresaun Nasional Transporte Terrestre, Aifaesa, PNTL no parseru sira seluk hodi hamutuk buka manera ne’ebe diak liu para komesa inplementa rejime kontrolu tabaku tanba Lei ne’e seidauk inplementa ho maximu tanba entidade hirak ne’ebe maka iha kompetensia atu inplementa lei ne’e seidauk iha konesementu no presija kriatan Diploma Ministerial konjuntu atu reforsa inplementasaun lei ne’e.

“Ministeriu Saude halo esforsu liu husi advokasia nafatin ba entidade relevante sira, buka mekanismu oinsa atu kria diploma ministerial ne’ebe sai kompetensia ba inplementador sira, no regulamentu internu ne’ebe regularija inplementasaun Dekretu lei ne’e; Dekretu Lei ne’e balu inplementa ona maibe artigu balu seidauk inplementa hanesan bandu fuma iha fatin publiku, labele fuma iha transporte publiku, labele faan sigaru ba labarik minoridade,” dehan Dr. Frederico.

Iha okajiaun ne’e Komandante Jeral PNTL Komisariu Faustino da Costa hateten iha diskusaun konaba inplementasaun rejime kontrolu tabaco maka presija enkontru lina ministerial relevante hodi hare ba inplementasaun iha kapital Dili nune’e husi Komandu PNTL propoin hodi inplementa Dili is a fine city hodi kontinua saida maka ex Prezidente deklara katak Dili Cidade da Paz.

Komisariu ne’e haktuirtan hare ba Dekretu lei ne’e rigoroju no forte maibe ita nia komunidade no sosiedade tomak nia konsiensia laiha maka sai prekupasaun boot tanba ne’e ita hakarak inplementasaun ida ne’ebe mais simples no mais fasil em kordenasaun ba ministeriu relevante liga ho lei ida ne’e.

“Konteudu husi Dili is a fine City maka bainhira ema kontra regulamentu no regras ruma maka aplika Koima (multa) atu nune’e inplementasaun bele lao ho maximu no ema la viola regra ne’ebe maka ihaDekretur Lei. Nu 14/2016 aplika koima hahu $0.50 to’o $10.000 iha fatin hirak ne’ebe bandu fuma hanesan jardim, transporte publiku no seluktan,” dehan Komisariu ne’e.

Iha enkontru ne’e Komandante Jeral mos abiza ba komandante PNTL sira atu labele fuma wainhira lori kareta no motor no wainhira kontra maka komandante Jeral sei foti medidas no sansaun.

Enkontru ne’e partisipa husi Komandante Unidade no Xefe Departamentu Komandu PNTL munisipiu Dili, Komandante Tranzitu Nasional, Reprejentante Aifaesa, parseru Aliansa Nasional, Autoridade Munisipiu Dili, Controlo Tabaco no Diresaun Nasional Transporte Terrestre. Media PNTL

Dili, Komandu Polísia Nasional Timor-Leste (PNTL) liu husi Unidade Espesial Polísia (UEP)  seksaun Explosive Ordnance Disposal (EOD) iha kuarta-feira (15/05)  ne’e hala’o enkontru ida ho ekipa husi Kompañia Encanta Leste ho Kompañia XainaHam kona-ba importasaun material explosivu ba konstrusaun portu iha Tibar.

Komandante UEP Superintendente Xefe Afonso dos Santos hafoin enkontru hateten sorumutu ne’ebe maka realiza entre Komandu Jerál ho ekipa kompañia rua ne’ebe maka kaer projetu konstrusaun portu Tibar ho parte PNTL ne’ebe maka kontrola teknikamente importasaun material explosivu nian.

“Kompañia rua ne’e maka kaer projetu portu Tibar agora PNTL teknikamente iha Unidade Espesial seksaun EOD maka atu kontrola teknikamente importasaun armazenamento no mós ba iha utilizasaun blastiku ne’ebe maka atu fera foho hirak ne’eba ba iha konstrusaun portu Tibar”, hateten Komandante UEP ne’e.

Superintendente Xefe Afonso hatutan katak kompañia iha ona kontratu no Komandante Jerál PNTL bele ona relata ba Ministru Interior Interinu atu nune’e iha futuru bele lao ona projetu ida ne’e.

Partisipa iha enkontru ne’e Komandante Jerál PNTL Komisariu Polísia Faustino da Costa, Komandante Operasaun, Komandante UEP, Komandante SIP, ekipa gabinete Asesoria Juridiku PNTL ne’ebe maka fó pareser liga ba termu Lei no Diploma Ministerial ne’ebe iha ba Komandu kona-ba involvimentu PNTL nian iha konstrusaun ne’e.

Media PNTL.  

Dili-Komandu Polisia Nasional Timor-Leste (PNTL) asina Memorandum of Understanding (MOU) ho Provedoria dos Direitus Humanus e Justiça (PDHJ) hodi fo formasaun konaba Direitus Humanus no Boa Governasaun ba membru PNTL.

Komandante Jeral PNTL Komisariu Faustino da Costa hateten MOU ne’e ho objetivu atu reforsa no halo kapasitasaun ba membru PNTL iha nivel nasional to’o postu administrativu nune’e iha futuru redus involvimentu no violasaun diretus humanus ne’ebe nota katak dala wain la responde saida maka hatur iha Konstituisaun da Republika artigu 147, Nia hato’o asuntu ne’e ba Jornalista sira iha edifisiu PDHJ Kaikoli Dili, Segunda (13/05).

Komisariu ne’e haktuirtan Komandu PNTL nafatin propoin katak formasaun no kontinuasaun formasaun ne’ebe sei halao laos deit iha nivel nasional maibe bele halao to’o kapital munisipiu atu nune’e membru hotu-hotu laos deit hetan formasaun baziku maibe mos formasaun kontinuasaun no refreshing training ba ofisial Polisia sira iha nivel teritoriu nasional.

“ MOU ne’ebe maka asina ne’e hodi fo formasaun no sensibilijasaun ba membru PNTL konaba Diretus Humanus, no iha tempu hanesan karik iha kazu no akontesementu ne’ebe sai prekupasaun publiku, PNTL (Departamentu Justisa) no PDHJ nia ema sei involve iha prosesu investigasaun,” dehan Komisariu Faustino.

Atu termina Komandante Jeral PNTL fo fiar no tau esperansa boot katak iha futuru ita sei bele redus saida maka sai prekupasaun povu liu-liu konaba atuasaun  no involvimentu PNTL nia ema sira iha atendementu publiku.

Iha okajiaun ne’e Provedora  PDHJ Jesuina Maria F.Gomes hateten Provedor ho inisiativa hakarak atu estabelese nota intendementu ho Komandante Jeral PNTL atu reforsa koperasaun institusional atu halo esforsu koletivu liu-liu liga ho prevensaun liu husi fornesimentu treinamentu no formasaun ba PNTL para hasae konyesmentu iha area Direitus Humanus bazika no rejimi uza forsa atu nune’e sira bele halao sira nia knaar diak liutan.

Nia haktuirtan formasaun iha tipu oi-oin hanesan Seminariu, Workshop no treinamentu ho durasaun loron 5 tanba ne’e PDHJ identifika Treinamentu loron lima (5) sei fo ba membru PNTL ho postu Ajente liu-liu sira ne’ebe halo atuasaun direta ba komunidade no ba postu Ofisiais PDHJ halo Seminariu no Workshop loron ida atu koalia liu konaba knaar hanesan Komandante.

Formasaun ne’e nudar asaun prevensaun hodi redus violasaun diretus humanus tanba dalabarak violasaun mosu tanba falta de konyesementu.  Durante ne’e PDHJ fo ona Formasaun ba membru PNTL maibe membru ne’ebe tuir seidauk barak, iha tinan tolu (3) ikus PDHJ fo formasaun ba membru PNTL Unidade Espesial Polisia ba Batelaun Ordem Publika (BOP) foin maka nain 272 husi membru PNTL kuaje 4000 ne’e persentajen ne’ebe kiik.

Iha okajiaun ne’e PDHJ mos asina MOU ho Centro Nacional Chega (CNC) atu utilija rekursu ne’ebe maka PDHJ iha hodi inplementa Rekomendasaun Chega.

Serimonia asinatura MOU ne’e marka prejensa husi Inspetor Jeral Superintendente Xefe Carlos Almeida Sousa Jeronimo, Xefe Departamentu Justisa Superintendente Orlando Gomes Xefe Gabineti Asesoria Juridika Inspetor Virgilio Correia, Diretor Centro Nasional Chega (CNC) Hugo Fernandes, Provedor Adjuntu Boa Governasaun Miguel de Carvalho, Provedora Adjunta Diretus Humanus Venicia Erlana Magno, Xefe Departamentus no Funsionariu PDHJ.

Media PNTL

Maliana, Komandu Polísia Nasional Timor-Leste (PNTL)  Munisipiu Bobonaro iha sexta-feira semana kotuk (28/09) hala’o serimonia tomada de posse ba estrutura  Konsellu Polisiamentu Komunitaria (KPK) husi postu administrativu Maliana, Cailaco no Balibo.

Komandante PNTL munisipiu Bobanaro Superintendente Xefe Armando Monteiro hafoin serimonia ba jornalista sira hateten Komandu PNTL munisipiu Bobonaro hala’o serimonia tomada de posse ida kona-ba KPK ita hahu’u reforma no re-estrutura fila fali hafoin mudansa eleisaun Konsellu Suku iha tinan 2016 liu ba.

“Ho formasaun ida ne’e Komandu PNTL munisipiu Bobonaro hetan apoiu husi ita nia parseiru Fundasaun Asia iha Timor-Leste ne’ebe hahu’u formasaun ida ne’e iha fulan Fevereiru tinan ida ne’e hahu’u husi postu administrativu Atabae, Balibo, Cailaco no ikus iha Maliana ho formasaun iha postu administrativu ha’at ne’e ita atinzi ona suku hamutuk 25 husi suku 50 iha munisipiu Bobonaro“, tenik Komandante PNTL munisipiu Bobanaro ne’e.

Superintendente Xefe Armando Monteiro salienta liu tan katak ho formasaun ida ne’e mós Komandu PNTL reforsa tan ninia parseira liu husi Konsellu Polisiamentu suku hamutuk ho Konsellu Suku iha suku 25 ne’ebe simu posse oinsa sira bele halo servisu hamutuk iha komunikasaun, kolaborasaun ba buka no identifika problema komunidade nian no hamutuk ho komunidade oinsa atu bele fó solusaun ba problema ne’ebe mak ita nia komunidade infrenta liu-liu ba kazu sivil sira ne’ebe mak durante ne’e ita nia komunidade diretamente hato’o mai iha eskuadra tantu mai iha Komandu PNTL.

“Tanba ne’e ho formasaun refere no serimonia tomada de posse ne’e bele dehan katak bele minimiza no reforsa tan servisu polísia nian iha munisipiu Bobonaro, hein katak ohin ita akompaña parseiru sei apoiu no tinan oin ita bele remata no kompleta suku 50 iha munisipiu Bobonaro.

Iha fatin hanesan Presidente Autoridade Munisipiu Bobonaro Interinu Julio Carvalho Caeiro iha ninia intervensaun ba serimonia ne’e perante empulsadu sira husu atu bele hala’o servisu ho responsabilidade no bele hamutuk ho komunidade hodi buka no resolve problema sira ne’ebe mak durante ne’e komunidade sira hasoru.

Partisipa iha serimonia ne’e Segundu Komandante Jerál ne’ebe reprezenta Komandante Jerál, Presidente Autoridade Munisipiu Bobonaro Interinu, director Fundasaun Asia, membru KPK no komunidade sira husi munisipiu Bobonaro.  Media PNTL.

Dili, Membru Polísia Nasional Timor-Leste (PNTL) husi Unidade Espesial Polísia (UEP) hamutuk na’in 28 tersa-feira ne’e (02/10) ofisialmente simu xapa hodi prepara ann atu ba atende Misaun da Paz iha ONU.

Segundu Komandante Jerál PNTL Komisariu Polísia Faustino da Costa ne’ebe ofisialmente entrega xapa ba membru UEP sira hateten durante ne’e membru hirak ne’e partisipa hela formasaun no ohin hanesan pasu ida tan hodi koloka xapa ne’e no sira ne’e preparadu hodi koloka iha Misaun da Paz ONU nian.

“Primeiru hau nia parabéns ba ita bo’ot sira ne’ebe durante ne’e infrenta hela formasaun ida preparasaun ba Misaun da Paz ONU nian, segundu hau nia parabens mós tanba loron ohin ita bo’ot sira hetan ona meius ida ne’ebe indika katak ita bo’ot sira preparadu atu partisipa iha Misaun da Paz ONU ninian maka xapa ne’ebe tau ba ita bo’ot sira”, hateten Segundu Komandante Jerál PNTL ne’e.

Komisariu Polísia Faustino da Costa salienta liu tan katak membru sira ne’ebe simu xapa hirak ne’e, liu husi diskusaun balun iha tempu ne’ebe naruk ikus liu mak vizita Komandante Jerál nian iha Nova Yorke enkontru xefe polisia nian no resultadu husi vizita ida ne’e ami tenta oinsa atu realiza, implementa aktividade sira balun tuir diskusaun iha vizita Komandante Jerál nian.

“Hau pesoalmente desde tinan ida no rua ba kotuk, kapasidade atendimentu ita nia Unidade Espesial iha Misaun da Paz ONU nian, hau nem preukupa, hau nem iha dúvidas kona-ba kapasidade atendimentu no hala’o kna’ar iha Misaun Paz hau la preukupa ida ne’e”, hatutan na’in ulun daruak PNTL ne’e.

Segundu Komandante Jerál PNTL mós akresenta tan kestaun bo’ot ida ne’ebe maka institusaun kestiona maka meius apoiu, meius suporta oinsa membru hirak ne’e hala’o sira nia kna’ar ho responsabilidade. Além-de ne’e PNTL nafatin halo kooperasaun ho parseiru Timor-Leste Police Development Program (TLPDP) atu fó formasaun lian Portugués no Inglês ba membru sira ne’ebe maka atu partisipa iha Misaun da Paz tanba lingua rua ne’e sai hanesan lingua ofisial ONU nian.

“Kestaun mak ne’e meius apoiu, meius suporta oinsa mak sira hala’o sira nia kna’ar ida ne’e maka sai desafiu bo’ot ida hanesan kareta hira mak Unidade Espesial tenke lori husi Timor, ekipamentus seguransa nian hira maka tenke lori liu-liu hanesan EOD ninian no oinsa maka ita bele lori sasan hirak ne’e to’o iha Afrika ne’eba”, lamenta Komisariu Polísia ne’e.

Komisariu Faustino da Costa apela ba membru hirak ne’ebe maka sei partisipa iha MIsaun da Paz ONU nian ne’e atu bele komporta ann ho didiak tanba imi ba reprezenta familia, institusaun no nasaun Timor-Leste.

Media PNTL.

Dili- Komandu Polisia Nasional Timor-Leste (PNTL) halo enkontru planu asaun annual tinan 2018-2019 hodi define programa prioridade ne’ebe atu halao.

Komandante Jeral PNTL Komisariu Julio da Costa Hornay hateten hare husi envelope fiskal no programa prioridade ne’ebe koloka iha tinan 2019 maka ami konvida Komandante sira hodi tur hamutuk no koalia konaba programa prioridade planu annual tinan 2018-2019, Nia hato’o asuntu ne’e ba Jornalista sira iha Kuartel Jeral PNTL Kaikoli Dili, Segunda (01/10).

Komisariu Hornay haktuirtan  ita prepara ita nia planu depois planu balu ne’ebe maka orsamentu fiskal seidauk atinji Komandu sei deskuti iha komite revizaun orsamentu ho rajaun ne’ebe maka forte hodi hetan aprovasaun ba inplementasaun tinan 2019 nian.

Total orsamentu ne’ebe maka PNTL propoin hamutuk $26 miloens ne’ebe maka fahe ba item Salariu e vensimentu kuaje $ 15 miloens, vens de servisu kuaje $10 miloens  ne’ebe maka Komandu sei koloka no nia menus sei aprejenta iha Komite revijaun orsamnetu atu hetan aprovasaun.

“ Prioridade ne’ebe maka define hanesan hadia bem estar PNTL nian, hadia infrastrutura, hadia ekipamentu no transporte hodi suporta membru PNTL nia servisu operasaun ka administrasaun iha terrenu,” Nia dehan.

Enkontru planu asaun annual tinan 2018-2019 ne’e halao durante loron rua (01 to’o 02 ) ho partisipasaun husi Komandante munisipiu 13, Komandante Unidade Espesial Polisia (UEP), Komandante Unidade Polisia Maritima (UPM) Komandante Unidade Patrulamentu Fronteira (UPF), Komandante Centru Formasaun Polisia, Komandu Jeral no parseru sira. Media PNTL