20150828-BS1_2396Segundu Komandante Jerál PNTL Faustino da Costa, moris iha Postu Administrativu Maubara, Munisípiu Liquiça iha loron 18 Junhu 1974 ho estadu sivíl kaben nain.

Komisáriu Faustino, edukasaun formal hahu eskola iha Primaria SDK St. Paulus VI Maubara 1982-1989, Ensinu Pre Sekundaria SMP N Maubara 1989-1991, Ensinu Sekundaria SMA N 1 Dili 1991-1994 no ikus liu akaba Diploma II Politeknik Negeri Dili 1994-1996.

Segundu Komandante Jerál mos ema primeiru ne’ebe tama PNTL iha tinan 2000, ne’ebe forma husi UNPol. Durante hala’o kna’ar Komisáriu Faustino hetan fiar husi UNPol sira hodi tuir formasaun ba iha rai liur kona-ba jestaun polísiamentu nian. Eskola siensia polísia iha Academy FBI, Universidade West Virginia hahu iha Setembru 2008 remata iha Dezembru 2008. Kursu Ingles iha Flinders University, Australia hahu iha Junhu 2008 remata iha Agostu 2008. Kursu Jestaun polísial no jestaun konflitu iha IPDC Swedia hahu iha Fevereiru 2010 remata iha Marsu 2010.

Kursu jestaun polísial rejiaun Ázia iha RMIT (Royal Melbourne Institute Technology Hanoi, Vietnam) hahu Setembru-Outubru 2011. Kursu Lideransa iha Sentru Formasaun Polísia, Comoro hahu Fevereiru 2001 remata iha Marsu 2001. Kursu Disiplinar iha Sentru Formasaun Polísia, Comoro hahu Maiu 2002 remata iha Junhu 2002.

Kursu Komadante Munisípiu iha Maktab Cheras, Malazya hahu Fevereiru 2003 remata iha Marsu 2003, Eskola Inspetór iha PULAPOL, Kuala Lumpur, Malazia hahu Outubru 2004 remata iha Novembru 2004, Kursu audit inspesaun iha Jakarta, Indonézia hahu 2013.

Haree ba formasaun no kursu ne’ebe ás tebes Segundu Komandu Jerál ne’e iha 2003-2004 hetan fiar husi Komandu PNTL sai hanesan Komadante Polísia iha Liquiça, iha Dezembru 2005 to’o juñu -2007 simu kna’ar hanesan Adjuntu Diretór Rekursu Umanus PNTL no iha 2009 sai hanesan Diretór Rekursu Umanus PNTL.

Iha Dezembru 2009 to’o Jullu 2010, hetan konfiansa husi Komandu PNTL hodi delega fila fali hanesan Komandante Polísia Munisípiu Liquiça, iha 2010-2011 Xefe Departamentu Justisa, iha loron Abril 2011 sai Komandante Polísia Munisípiu Baucau remata iha 18 Novembru 2013. Iha 18 Novembru 2013 simu kna’ar hanesan Xefe Inspeksaun Jerál remata iha 27 Marsu 2015.

Simu kna’ar hanesan Segundu Komandante Jerál ho deviza Komisáriu iha loron Sesta 27 Marsu 2015 hanesan mos loron PNTL ba dala XV, iha Sentru Formasaun Polísia, Comoro-Dili.