News

DILI – Liu husi deklarasaun konjunta husi Administrasaun Munisipiu Dili, Komandu PNTL Munisipiu Dili hamutuk ho Konsellu Veteranus Kombatentes Libertasaun Nasionál Munisipiu Dili husu ba komunidade iha Dili laran tomak atu hakmatek, kria damai, paz no estabilidade hodi festeja simu tinan foun 2015. Deklarasaun konjunta ne’e hato’o husi Administrador Munisipiu Dili, Gaspar Soares Tersa, (30/12/2014) iha Kaikoli, Dili. Iha deklrasaun ne’e mos kondena ba kualker aktu violénsia ka anarkizmu iha teritoriu nasionál espesiál Munisipiu Dili no zero toleransia ba krime saida deit. Deklrasaun konjunta aberta ne’e husu ba Administrasaun Munisipiu Dili, lideransa Komunitariu no Konsellu Veteranus i Libertasaun Nasionál sei fó apoio tomak ba Autoridade seguransa hodi foti medidas forte ba qualquer autos krime iha área Munisipiu Dili. Deklrasaun ne’e akompanha husi Komandante  PNTL Munisipiu Dili, emexersisiu Superintendente Xefe Armando monteiro no Konsellu Veteranus Munisipiu Dili, Adjuntu Xefe, Salustiano Belo alias Uro. Mídia PNTL  

DILI – Estrutura foun husi Sekretáriu Estadu Seguransa (SES) hamutuk na’in 65 (neennulu resin lima) ne’ebe ho nia kargu hanesan Diretór Jerál, Xefe Departamentu, Koordenador/a, Komandante Korpu Bombeiros simu posse iha Edifisiu foun SES Caicoli Dili, segunda 22 Dezembru 2014. Iha serimonia tomada de posse ne’e Sekretáriu Estadu Seguransa Francisco Guterres hatete, SES agradese ba Prezidente Ezersísiu Komisaun Funsaun Públika (KFP) ne’ebe hili no nomeia direta liu husi avaliasaun ne’ebe halo ba estrutura foun refere. Francisco Guterres afirma, iha planu estratéjiku SES nian iha faze primeiru ne’ebe koalia mos kona-ba estrutura, formasaun, no reformula deviza. “Ha’u hakarak hatete ba Ita boot sira ne’ebe foin simu posse katak governu bele troka maibe ita boot sira tenke mantein nafatin hodi serví ba ita nia komunidade, hein katak iha tinan 2015 mai it abele servisu di’ak liu tan, tamba 2015 nuudar tinan ikus ba planu estratejiku SES nian iha faze primeiru,” Apela Francisco Guterres. Iha fatin hanesan, Prezidente Ezersísiu KFP Liborio Pereira hateten, “tenke hala’o dever tuir komprimísiu ne’ebe ita boot sira ohin halo ona, tane aas interese Nasional, no tau ba sorin interese partidu no privadu nian, atu nune’e bele serví povu no Nasaun ne’e ho responsabilidade.” Liborio Pereira hatutan, entre funsionáriu públiku iha Timor-Leste minoria mak hala’o servisu tuir komprimisiu ne’ebe iha, maibe maioria servisu la tuir ida ne’e. Tamba ne’e husu ba funsionariu SES ne’ebe simu posse tenke hatudu ezemplu ne’ebe di’ak ba funsionariu sira seluk, hodi serví ba estadu no povu ho di’ak. Iha serimonia ne’e, Vice Primeiru Ministru Fernando Lasama de Araujo hateten, Xefia sira ne’ebe simu posse hanesan simu kna’ar todan hodi tau matan ba membru sira hanesan sai bibi atan ne’ebe di’ak. “imi SES hakarak tinan 2015 ho estrutura foun, ha’u fiar katak durante tempu barak imi aprende buat barak mak imi hetan konfiansa hodi simu kna’ar foun, ho imi ita bele la’o di’ak ba oin .” Apela Vice PM Lasama. Iha serimonia tomada de posse ne’e mos SES halo inagurasaun ba edifisiu foun 2 ne’ebe inagura husi Vice PM Lasama, Primeira Dama Isabel Ferreira, no hetan bensaun husi Amo Kapelaun PNTL ho SES Padre Nelinho Ferreira. Serimonia ne’e mos SES ho familia no konvidadus tomak selebra Natal Hamutuk iha edifisiu foun refere. Entretantu, partisipa iha serimonia ne’e mak hanesan Ministru Justisa Deonisio Babo Soares, Segundu Komandante Jerál PNTL Komisáriu Afonso de Jesus, Vice Ministru MNEK Constancio Pinto, Ministra MSS Isabel Guterres, Sekretária Estadu Promosaun Igualdade Idelta Maria Rodrigues, Deputadu Komisaun B Parlamentu Nasional, Madre Guilhermina Marcal, Diretores Jerais, funsionariu no familia SES. Iha fatin hanesan SES entrega mos Karreta 5 ho marka Karreta Estadu hamutuk 5 ba Unidade Patrullamentu Fronteira (UPF) PNTL ne’ebe Komandante UPF simu Xave Karreta nia ho simbolikamente husi Vice Primieru Ministru Fernando Lasama, ne’ebe akompaña husi Sekretariu Estadu Francisco Guterres no Segundu KJ-PNTL, Komisáriu Afonso de Jesus. Mídia PNTL        

DILI –  Komandu Polísia Nasionál Timor-Leste (PNTL) liu husi subtitui Komandante Jerál PNTL, Komisáriu Afonso de Jesus lansamentu Servisu Avaliasaun Dezempeñu (SAD), ne’ebe ninia funsaun hodi avalia kompartamentu no disiplina servisus membru PNTL sira. Seremoinia lansamentu ne’e hala’o iha Kuartel Jerál PNTL Segunda, (22/12/2014). Liu husi diskursu, Komisáriu Afonso de Jesus husu ba Komandate Distritu, unidade, seksaun no departamentu sira hahu iha 2015 ba oin implementa didiak SAD atu nune’e ba futuru bainhira iha promosaun kareira no deviza labele mosu protestu oioin. “Ita atu hahu promosaun kareira no deviza ita husu relatoriu mos husi Departamentu Justisa atu haree didiak membrus sira nia kompartamentu no disiplina,”dehan Komisáriu Afonso. Komisáriu Afonso informa,  sistema SAD ne’e rigorozu tebes, tamba ne’e komandante sira presija ita nia onestidade atu bele servisu maka’as liu tan iha impelemntasaun atu bele ejerse ita nia servisu ho di’ak no ba membru sira presija koopera ho komandante ka xefia, atu nune’e bainhira ami implementa SAD ne’e, bele koopera ba malu atu nune’e prienxe formatu sira ne’ebe ho onestidade. Hahu lansamentu SAD komesa implementa iha fulan Janeiru 2015, antes ne’e sosializasaun ba Komandante kada Unidade, Gabinete, Seksaun, Departamentu husi Nasionál no Distrital hamutuk na’in 128, iha Centru Formasaun Polisia Dili, atu bele haree no kompriende didiak molok implementa. Fator ba avaliasaun ba dezempeñu membru PNTL sira nian tantu Xefia nomos membru baibain, mak hanesan sentidu responsabilidade no jestaun rekursu, relasaun no komunikasaun iha servisu fatin no iha publiku, antusiazmu, konfidensialidade no imparsialidade, loialidade no obidensia, respeitu no onestu, inisiativa, kreatividade no produtividade, ekipa servisu, puntualidade no prezensa iha servisu fatin, atitude no hahalok, lideransa, supervizaun no dezenvolvimentu membru, efisiente no provizaun servisu efektivu, planeamentu no jestaun. Mídia PNTL    

DILI –  Komandante Jerál PNTL Komisáriu Dr. Longuinhos Monteiro husu ba komunidade iha teritoriu laran tomak bainhira hetan material funu nian ne’ebe antigu tenke hato’o polísia hodi nune’e labele sai vitima. Komisáriu Dr. Longuinhos hato’o asuntu ne’e bainhira asiste ekipa Ekipa Explosive Ordnance Disposal (EOD) Kinta, (18/12/2014) harahun material funu nian iha área F-FDTL Metinaru –Dili. “Apela komunidade sira, see hetan material funu nian, labele book maibe informa ba autoridade polísia komunitaria hodi informa mai ekipa EOD hodi ba halo destroisaun ka bele rezolve, tamba sasan hirak ne’e uluk iha tempu funu nian ne’ebe balun sei iha hela ita nia rain, no la seguru ba ita nia vida. Foin dadauk mane ida mate koa fali granada,”informa Komisáriu Dr. Longuinhos. Ema mate husi material antigu funu nian mak hanesan munisipiu Ermera, Baucau, Bobonaro, Manufahi, Lautem rezulta ema mate. Komandante Jerál PNTL esplika liutan katak, material antigu funu nian iha Timor-Leste sei barak tanba tinan atus (400) Portugal iha ne’e, funu entre Australia ho Japaun nomos invazaun militar Indonezia durante tinan 24 nia laran. “Sasan antigu funu nian iha ita nia nasaun barak mak sei namkari, ne’ebe husu ba komunidade sira atu hetan tenke lori informa ba polísia.” Material antigun funu nian ne’ebe maka harahun hanesan; kainaun 1, granada 8, projetila antilaria 3, kilat manu 6, fugetis karun 7, tua habok dos 10, farda artemarsiais ilegál sira nomos farda militar antigu. Destroisaun material funu nian ne’e asiste direitamente husi Major Jeneral F-FDTL Lere Anan Timur, Komandante Jerál PNTL Komisáriu Dr. Longuinhos Monteiro, Segundu Komandante PNTL Komisáiru Afonso de Jesus, Diretór SIN  Cirilio no membru husi PNTL-FDTL.

Komadante Operasaun Nasionál PNTL, Superintendente Xefe Armando Monteiro dehan rekoila material funu nian ne’ebe uzadu bazeia ba rezolusaun Governu Nú 30/2014. Material kategoria ferrujen ona ne’ebe ne’ebe balu sei husik iha Timor-Leste no to’o agora,  komunidade balun sai ona vitima ba material ne’e tamba ema barak seidauk iha koñesimentu ba material funu nian ne’e. Mídia PNTL

DILI – Komandu Polísia Nasionál Timor-Leste (PNTL) aloka motorizadas  hamutuk 100 ba Ofisiais Polísia Suku (OPS) iha Komandu PNTL Distrital 12. Seremonia entrega motorizadas hirak ne’e direitamente husi Komandante Jerál PNTL, Komisáriu Dr. Longuinhos Monteiro iha Kuartel Jerál, Caicoli (5/12/2014). Liu husi diskursu, Komisáriu Dr. Longuinhos Monteiro hatete, prezensa OPS iha suku sai fatór importante ba polítika Komandu ninian hodi konjunta ho polítika estadu ninian, ne’ebe sei to’o iha baze, signifika parte seguransa tenke mos to’o iha baze. PNTL sente urglhu ba iha ninia servisu, servisu ne’ebe la todan maibe mos laos fasil. Presiza halo dedikasaun boot hodi hala’o kna’ar ida ne’e, presiza sakrifisiu ne’ebe ejijensia ba kualker membru OPS. Komandu trasa planu hodi apiou fasilidades ba OPS hodi hala’o servisu, liliu iha liña koordenasaun ho autoridades distritais, suku no aldeia sira. “Hau fiar, iha tempu mai oin sei kompleta estadu ninia mata dalan, estadu ninia estrutura, matan no tilun, hodi bele kontrola seguransa iha teritoriu tomak,”dehan Komandante Jerál PNTL. Iha fatin hanesan Xefe Departamentu Polísiamentu Komunitária Superintendente Assistente Boavida Ribeiro dehan, PNTL iha ona OPS hamutuk 238, alende ne’e mos Komandu PNTL hamutuk ho parseiru sira estabelese ona KDD iha Distritu 9 nomos estabelese KPK 77 iha munispiu 9. OPS sai hanesan premeira liña iha PNTL hodi atinji estratéjika ba iha Vizibilidade, Involvimentu no Profesionalizmu. Iha 2013 kotuk Komandu PNTL utiliza orsamentu estadu sosa ona motorizadas 28, koloka ba Distritu Ainaro motorizadas 21, motorizadas 5 koloka ba Distritu Baucau, motorizadas 1 ba Distritu Cova-lima no motorizadas 1 ba Distritu Oe-cusse. Ba iha tinan ne’e, Komandu PNTL nafatin utiliza orsamentu estadu ninian sosa tan motorizadas 100 hodi bele responde ba ejijensia sira mai husi baze liu husi OPS sira. Xefe Departamentu Polísiamentu Komunitária apela ba OPS sira atu utiliza motorizadas ne’e ho diak no responde duni nesesidades OPS nian, husu mos ba Komandante Distritu sira atu koloka motorizadas hirak ne’e ba OPS tuir despaixu Komandu PNTL. Fó obrigadu ba Komandu PNTL tamba iha atensaun másimu uza orsamentu estadu nian hodi sosa motorizadas ba OPS sira atu hala’o kna’ar ho diak liutan. Dekretu Lei no.09/2009 konaba Lei Organika Polísia Nasionál Timor-Leste iha nia natureza tenik “Polísia Nasionál Timor-Leste ho nia Natureza Polísiamentu Komunitaria maske nia karáter identik ho semi militar, iha nia jestaun ka manajementu disiplina, formasaun no estatutu pessoal”. PolÍsia Nasionál Timor-Leste nia politika konaba Polísiamentu Komunitária iha objetivu atu promove estratéjia ba prevensaun krime no protesaun komunitária iha Repúblika Demokratika de Timor-Leste, Polísiamentu nebe proaktivu no preventivu núdar baze ba Polísiamentu Komunitária, Polísia labele serbisu mesak tamba komunidade maka hanesan baze ejistensia Polísia nian, atu haburas filozofia ida neé tenki iha esforsu kolaborativu ho motivasaun nebe makaás tebes ho espíritu parseria ida nebé mutúa liu husi estabelesementu ba siguransa suku no bairu. Entretantu Komandante PNTL Disritu Lautem, Superintendente Marcos Sequeira hatete, maske PNTL Distritu Lautem seidauk estabelese Polísia Komunitáriu husi planu Komandu nian, maibe PNTL Lautem monta hotu ona OPS iha suku 34. Husi motorizadas 100 ne’e PNTL Lautem hetan motorizdas 9 hodi koloka ba OPS iha suku 9.  Kolokasaun ne’e hare ba suku sira ne’ebe dok husi vila no suku sira ne’ebe identifika risku krime sei as. “Hau husu ba membru OPS Lautem sira mak simu motorizdas ne’e atu kuidadu didiak nomos uza ba servisu hodi atende komunidade. Labele uza ba intereses privadu,”apela Superintendente Marcos Sequeira. Mídia PNTL

AILEU – Liu husi komemorasaun aniversariu Proklamasaun Unilateral RDTL ba dala 39 iha Distritu Aileu, Suku Aissirimou stand PNTL Vizitatantes mak hanesan Sekertariu Estadu Seguransa, Francisco Guterres, Major Jeneral Lere Anan Timur, Segundu Komandante PNTL, Komisáriu PNTL Afonso de Jesus, Sekertariu Estadu Fortalesemente Francisco Borlako, estudantes, juventude nomos komunidade sira. Sasan sira maka monta iha stand PNTL nia laran mak hanesan; foto atividades PNTL, ekipamentu husi Unidade Polisia Marítima, fahe kardenu husi Departamentu Polísi Komunitária ho nia esplikasaun kona-ba prevene krimi no hadok-an husi droga nomos fahe kamizola ba estudante sira ho nia lia fuan “Polísia O nia kolega”. Alende ne’e mos iha kalan loke video ne’ebe PNTL produs hanesan Feto PNTL mos bele no kampaña seguransa tránzitu rodoviaria. Ba vizitantes Xefe stand PNTL, Inspetór Francisco Martins esplika kona-ba atividades PNTL nian liu husi foto sira mak monta nomos esplika kona-ba viziaun no misaun Polísia Komunitária. “Ita nia joven, estudante no komunidade sira iha antusismu tebes mai vizita stand PNTL tanba sira sente katak, PNTL mak sira nia belun hodi garante pás no estabilidade,”dehan Inspetór Francisco. Midia PNTL    

DILI – Komando Jerál Polisia Nasional Timor Leste (PNTL) hala’o enkontru loron ida hodi halo preparasaun kona ba seguransa ba Natal no tinan foun 2015. Enkontru ne’e dirije husi Segundu Komandante Jerál hanesan Komandante Jeral Interinu, Komisariu Afonso de Jesus iha Kuartel Jeral PNTL Caicoli Dili loron segunda feira 24 Novembru 2014 ne’ebe partisipa husi Komandante PNTL Distritu 13, Komandante Operasaun Nasional, Komandante Adminstrasaun, no komandante unidade no seksaun sira iha Komado Jeral. Iha enkontru ne’e koalia liu kona ba preparasaun ba seguransa Natal no Tinan foun nomos PNTL sei koopera ho Ministériu Komérsiu Industria no Ambiente (MCIA) hodi halo inspesaun ba loja sira ne’ebe fa’an fogetis iha territoriu tomak. “Ha’u konvida Komandante 13 Munisipiusira mai hodi koalia kona ba seguransa ba Natal no Tinan Foun 2015 liu-liu operasaun, ne’ebe sei hahu husi loron 28 Novembru to’o Janeiru 2015. Iha enkontru ne’e mos ami sei koopera ho MCIA hodi tama sai loja sira ne’ebe fa’an fogetis, ba sira ne’ebe laiha lisensa atu fa’an ba armas fogetis ne’e bele halo prosesu tuir lei ne’ebe iha, tamba baze legal lei UNTAET bnian sei válidu hela hodi regula ba atividade ne’e.” Informa Komisáriu Afonso. Segundu Komandante Jerál hatutan, iha enkontru ne’e atu autoriza komandante Munisipiusira hodi bele autoriza membru sira hodi ba halo inspesaun ba loja sira tamba dala ruma sira atu halo inspesaun sei tauk hela, tamba ne’e liu husi enkontru ne’e informa ba sira atu bele hala’o tamba baze legál iha. Aleinde koalia kona ba preparasaun seguransa ba loron boot Natal no tinan foun, nomos halo inspesaun ba loja sira, sira mos koalia kona ba Gupu Arte Marsiais balun ne’ebe to’o agora sei hala’o atividade ilegál iha territóriu Timor Leste nomos balun ba hala’o iha rai liur, tempu badak PNTL sei koalia ho Nai ulun boot sira atu nune’e bele hapara ba atividade ne’e. “Relatoriu mai husi Komandante UPF, total ema sira ne’ebe sira prende iha fulan Novembru 2014 hamutuk na’in 122 husi Grupu Arte Marsiais “PSHT” ne’ebe husi Timor Leste ba Indonezia hodi hasa’e sabuk, no entre sira balun prosesu hela no balun aplika TIR.” Tenik Komisáriu Afonso de Jesus. Média PNTL.    

AILEU –  Situasaun seguransa ba Komemorasaun Loron Proklamasaun Independensia RDTL ba dala 39 (28 Novembru 1975 – 28 Novembru 2014) ne’ebe Estadu no Governu desidi hodi komemora iha Munisipiu Aileu la’o ho di’ak no kontroladu.

Hafoin serimonia Komemorasaun Loron Proklamasaun Independensia RDTL, Komandante PNTL Munisipiu Aileu, Superintendente Damião Correia iha nia entrevista hateten, situasaun seguransa iha MunisipiuAileu hahú husi feira ka ekspozisaun husi loron 25 to’o 28 Novembru la’o ho di’ak tamba hetan kontribuisaun másimu husi partisipante no komunidade sira. “Kona ba situasaun seguransa ba komemorasaun loron Proklamasaun Independensia RDTL ba dala 39 Estadu no Governu desidi hodi komemora iha Munisipiu Aileu, situasaun la’o di’ak no garantia estabilidade iha komemorasaun ne’e hahú husi feira to’o serimonia 28 Novembru.” Tenik Superintendente Damião Correia. Komandante PNTL Aileu afirma, total membru PNTL ne’ebe fo seguransa ba komemorasaun ne’e hamutuk na’in 420 (atus hat ruanulu), ne’ebe PNTL Aileu rasik iha membru hamutuk na’in 99 (sianulu resin sia), no husi distritu 12 seluk kada distritu iha membru na’in 5 (lima) nomos  husi Komando Jerál hodi fó apoiu ba seguransa iha komemorasaun ne’e. “Ha’u nuudar Komandante Aileu, Komando Jeral desidi sai hanesan komando taktikal atu maneja ba rekursu ne’ebe husi Distritu 12 seluk no Komando Nasional mai apoiu, total hamutuk na’in 420, kada Munisipiu na’in 5 mai fo apoiu hodi bele garante seguransa iha munisipiu Aileu, no Aileu rasik PNTL hamutuk 99 pessoas.” Esplika Komandante Damião. Damião hatutan, situasaun seguransa la’o di’ak tamba hetan apoiu másimu husi komunidade rasik, tamba festa 28 Novembru ne’e loron boot ba Timor Leste nian tamba ne’e partispante sira ne’ebe mai partisipa iha antusiasmu no kontente hodi partisipa iha komemorasaun ne’e to’o remata. Tema ba Komemorasaun Loron Proklamasaun Independensia RDTL iha loron 28 Novembru ba tinan ida ne’e mak “da Insurreição á Libertação” katak husi Insureisaun ba Libertasaun ne’ebe partisipa husi Prezidente da Repúblika Taur Matan Ruak ho Primeira Dama Isabel Ferreira, Primeiru Ministru Xanana Gusmão ho nia Vice Fernando Lasama de Araujo, eis Primeiru Ministru Mari Alkatiri, xefe Estadu Maior Jeneral F-FDTL Lere Anan Timur, Komandante Jeral PNTL Interinu Komisáriu Afonso de Jesus, membru Instituisaun Governu no Estadu, korpus diplomátikus, relijiozus, estudantes, no komunidade sira husi MunisipiuAileu, nomos husi Munisipiu12 seluk. Entretantu, komemorasaun loron Proklamasaun Independensia RDTL ne’ebe komemora iha Munisipiu Aileu, hala’o mos feira durante loron 4 (hat), inagurasaun ba estatua Prezidente Nicolau Lobato, kompetisaun diskursu entre estudante bázika sentral iha territóriu tomak ne’ebe organiza husi Ministériu Edukasaun, Juventude no estudante Universitáriu ne’ebe voluntáriu lao ain husi Dili to’o Aileu, konsertu muzikal husi Banda Nasional, nomos dansa tradisional ne’ebe anima tebes ba festa boot ne’e. Média PNTL.    

AILEU – Polisia Nasional Timor Leste (PNTL) sai 3⁰  lugar ba kompetisaun dada tali ne’ebe organiza husi Ministériu Petróleo no Rekursu Minerais (MPRM).

Kompetisaun dada tali ne’e hala’o iha fatin feira iha loron 26 Novembru, PNTL kompete ho grupu 9 (sia) seluk ne’ebe to’o ikus 1⁰  lugar mak komunidade Aileu rasik, 2⁰  lugarmak husi Ministériu Solidariedade Sosial (MSS), no 3⁰  lugar mak PNTL. Hafoin fahe prémiu ba manan na’in sira, Graciete Moniz hanesan membru Komisaun Organizadora husi MPRM iha nia entrevista hateten, kompetisaun ne’e Ministériu Petróleo baibain hala’o bainhira iha festa boot ruma Nasaun nian hodi anima komunidade no partipante sira. “Kompetisaun ida ne’e hanesan festa komunidade, halo kompetisaun ida ne’e para bele involve komunidade lokal, partisipante feira sira, nomos husi Instituisaun balun ne’ebe hakarak partisipa iha kompetisaun, nia objetivu mak atu bele anima malu, oinsa bele servisu hamutuk, no bele ajuda malu.” Informa Graciete Moniz. Tipu kompetisaun ne’ebe MPRM hala’o mak hanesan dada tali ba ema boot, kadi kakutak no halai karon ba labarik sira, ne’ebe involve husi Grupu 10 no kada Grupu iha ema na’in 10. “Iha kompetisaun dada tali ne’e kebetulan deit kolega sira husi Instituisaun seluk mos hakarak partisipa hotu hanesan MSS no PNTL hodi kompete ho komunidade Aileu anan sira, no iha kompetisaun ne’e PNTL mak hetan  3⁰  lugar hafoin Aileu ho MSS, tamba ne’e parabens ba PNTL ne’ebe partisipa ona iha kompetisaun ne’e.” Informa Graciete Moniz ho hamnasa. Kompetisaun hirak ne’e hala’o iha fatin feira iha loron 26 Novembru, no manan na’in sira simu prémiu ka prezente iha loron 28 Novembru hafoin komemorasaun loron Proklamasaun Independensia RDTL ba dala 39 iha Munisipiu Aileu. Média PNTL.  

MOTA AIN –  Polísia Nasionál Timor-Leste (PNTL) liu husi Servisu Investigasaun Kriminál  Nasionál (SIKN) hamutuk no  Badan Narkotika Nasional (BNN) Propinsi Nusa Tenggara Timur, Indonézia hamutuk ho Sosiedade Sivíl halo liu husi dialogu hodi halo akordu hapara atividades droga iha nasaun rua ne’e. Dialogu ne’e halao iha Mota-ain área Timor-Leste ninian Sabadu, (22/12/2014) ne’ebe ho tema “Dialogu entre PNTL, BNN no Sosiedade Sivíl relasiona ho asuntu droga”. Komandante SIKN Supt. Ludgerio Lay hatete, objetivu husi dialogu ne’e atu nasaun rua entre Timor-Leste ho Indonézia bele sheering didiak ba malu atu nune’e buka dalan diak hodi hapara atividades droga. Asuntu droga sai importante  atu detekta sasan sira mak tama mai iha Timor-Leste laos deit husi parte PNTL, maibe komponente ne’ebe maka iha hanesan Alfandega, Migrasaun Karantina no ema sira servisu iha aeroportu tenke iha kooperasaun diak no importante ema sira ne’e labele mos involve iha atividades ne’e, see iha oknum balun mos iha kotuk ida ne’e mos fó dalan ba livre droga. “Ita nia maluk BNN sira detekta ita nia fraku ba kontrolasaun ho nune’e mak droga tama mai TL no bele liu iha fronteira. Husi frekeza sira ne’e ita bele tetu hamutuk hodi buka solusaun, ba futuru PNTL tenta buka dalan ho servisu maka’as hodi hapara atividades droga,”informa Supt. Ludgerio Lay. Xefe BNN Alosius Dando hatete, hare ba movimentu atividades droga sa’e maka’as iha mundu ne’e, Repúblika Indonézia no Timor-Leste sai alvu mos ba ema sira hodi movimenta droga. Dialogu ne’e importante tebes entre nasaun rua ne’ebe mak tau akordu hodi buka meus oinsa atu hapara atividades droga, liliu iha fronteira teres tress (rai maran), tasi laran  nomos aeroportu. Xefe BBN-NTT ne’e husu ba estadu Timor-Leste hodi bele halo sosializasaun barak ba komunidade sira no eskola sira kona-ba asuntu kombate droga. Dialogu ne’e importante tebes hodi foti asaun ba servisu hamutuk no iha akordu atu dialogu ne’e iha kontinuasaun. Ba premeiru dialogu ne’e hala’o iha Timor-Leste no ba oin hala’o iha Indonézia Diretór Fundasaun Del Amor (FDA), Miguel dos Santos Maia hatete, realiaza dialogu ne’e tanba haree situasaun agora dadaun iha Timor-Leste atividades droga komesa movimenta maka’as ona. “Diak liu ita prevene kedas ho kondisaun sei ki’ik nee, duke sai boot ona maka ita foin hakfodak, susar tebes atu kontrola,”dehan Miguel Maia. Dialogu ne’e fasilita husi Sosiedade Sivíl Fundasaun Del Amor (FDA) husi Timor-Leste, Yayasan Warna Kasih (YWK) husi Indonézia. Mídia PNTL