News

DILI –  Asistente Administrador no Diretór Gabinete Rejional ba Azia Pasífiku ba Programa Nasoins Unidas ba Dezenvolvimentu (UNDP) HAOLIANG XU hala’o vizita ofisial ba PNTL hodi haree ba progresu no dezafiu ne’ebé infrenta, liu husi kooperasaun UNDP ho Polísia Nasional Timor-Leste (PNTL) durante ne’e. “Ha’u nia objetivu mai vizita iha PNTL ne’e atu hatene rezultadu kooperasaun entre UNDP ho PNTL durante ne’e, liu-liu programa saida mak UNDP apoiu ba PNTL. Iha sorumutu ne’e, ami ko’alia liu kona-ba kapasitasaun ba membru PNTL sira iha área administrasaun, rekursu umanus, lojistika, Teknolojia Informátika, relasaun públika, prokuramentu, finansas no seluk tan, no liu husi diskusaun ne’e, parte PNTL apresia tebes ba programa husi UNDP nian”. Informa Diretor Gabinete Rejional ba Azia Pasífiku UNDP Haoliang Xu ba jornalista sira hafoin hala’o enkontru ho Segundu Komandante Jerál PNTL, Komisáriu Afonso de Jesus iha Kuartél Jerál PNTL Caicoli-Dili, kinta feira (10/07/2014). Hatan ba pergunta kona-ba observasaun ba seitor seguransa iha Timor-Leste, Diretór Rejionál UNDP Haoliang Xu hateten, iha tinan 2006 Timor-Leste hasoru situasaun tranzisaun nia laran, no iha tinan 2012, Polísia Nasoins Unidas (UNPOL) entrega poder tomak ba PNTL hodi fó seguransa ba povu Timor-Leste, ida ne’e situasaun ne’ebé todan teb-tebes iha tempu ne’eba, maibé konsege ultra passa. Eis Jestor no Vise Senior Reprezentante Rezidente UNDP nian iha Timor-Leste husi tinan 2002-2004 ne’e hatutan, sira sei fó nafatin apoiu hodi fó kapasitasaun ba área hirak ne’ebe PNTL presiza, nomos ba Estadu no Governu Timor-Leste nia programa hodi bele dezenvolve di’ak liu tan prosesu dezenvolvimentu iha Timor-Leste. Iha parte seluk, Segundu Komandante Jerál PNTL, Komisáriu Afonso de Jesus hateten, nia parte fó agradese ba UNDP tamba durante ne’e sira fó duni sira nia apoiu másimu ba Instituisaun PNTL, maibé husu mos ba membru PNTL sira atu uza oportunidade ho didi’ak hodi bele hatene kona-ba kapasitasaun ne’ebé parte UNDP fó, atu nune’e iha futuru bele hala’o servisu di’ak liu tan. “Hanesan ita boot sira hatene, UNDP hanesan parseiru ida ba PNTL, ne’ebé durante ne’e fó apoiu kapasitasaun ba membru PNTL sira liu-liu iha área administrasaun, rekursu umanus, lojístika, IT, no relasaun públika, tamba ne’e mak sira mai iha ne’e atu haree progresu servisu UNDP nian, liu-liu staff Internasional no Nasional sira ne’ebe koloka ba área hirak ne’e”. Informa Komisariu Afonso de Jesus. Iha sorumutu ne’e, parte PNTL husu mos ba Diretor Rejional UNDP katak, iha futuru PNTL sei presiza nafatin apoiu husi membru (staff) UNDP sira atu bele ajuda nafatin liu-liu iha área IT hodi bele dezenvolve di’ak liu tan IT iha nível nasional to’o distrital. Entertantu iha sorumutu ne’e, Diretór Gabinete Rejionál UNDP Haoliang Xu akompaña husi UN Resident Coordinator & UNDP Resident Representative, Knut Ostby, no UNDP Country Director, Noura Hamladji, no parte PNTL nian mak Segundu Komandante Jerál PNTL, Komisáriu Afonso de Jesus. Mídia PNTL.  

DILI –  Komandu Jerál PNTL fó Promosaun deviza ba ofisiais Saude-PNTL hamutuk na’in 5 (lima) iha Kuartel Jerál PNTL-Caicoli-Dili, segunda feira (07/07/2014). Ofisiais na’in 5 ne’e hetan promosaun ba deviza bazeia ba proposta husi Segundu Komandante Jerál, Komisáriu Afonso de Jesus ne’ebé relasiona ho Dekretu Lei nú.16/2009 kona-ba rezime promosaun ba PNTL, iha artigu 8. Komandu Jerál PNTL hasai orden promosaun ba ajentes polisia ne’ebe remata ona sira nia estudu iha área medisina hamutuk na’in 5 mak hanesan: Armindo Pinto nu’udar Ajente Prinsipál promove ba Inspektur Asistente, Francisco Pinto Ajente Prinsipál promove ba Inspektur Asistente, Mateus Pinto nu’udar Ajente Xefe promove ba Primeiru Sarjentu, Armando Araujo nu’udar Ajente Xefe promove ba Primeiru Sarjentu, no Orlando Alves Ajente Prinsipál promove ba  Primeiru Sarjentu, no orden promosaun ne’e hahú efetivu husi loron 01 fulan Jullu 2014. Iha serimónia orden promosaun ba ajente na’in lima ne’e, Komandante Jerál PNTL, Komisáriu Dr. Longuinhos Monteiro iha nia diskursu hateten, agora dadaun Komandu Jerál diskute hela ho Komisaun Funsaun Públika (KFP) hodi ko’alia kona-ba estatutu médiku PNTL nian, relasiona ho proposta husi KFP katak sé mak sai médiku profisionais saude sei husik ninia instituisaun ne’ebe tutela liu-liu PNTL no F-FDTL hodi ba tama iha Ministériu Saúde nian. Ho nune’e, Komandante Jerál no Segundu Komandante Jerál PNTL sei ba diskute ho KFP hodi mantein nafatin ninia pozisaun katak estatutu profisionais saude liuliu médiku sira sei la lakon mos ninia estatutu PNTL, tamba PNTL sei la fo dalan ba médiku PNTL sira atu eskolla, karik eskolla mak iha opsaun rua de’it:“karik ba tama iha Ministériu Saúde sei husik Instituisaun PNTL, ou mantein nafatin iha PNTL hodi hala’o mos kna’ar hanesan médiku”. Akresenta Komandante Jerál Longuinhos Monteiro. Hafoin serimonia orden promosaun ne’e, Segundu Komandante Jerál PNTL, Komisariu Afonso de Jesus iha ninia entrevista ba jornalista sira hateten, “promove sira la’os tamba atu okupa pozisaun maibe promove sira tamba sira nia estudu espesialidade iha área medisina nian, tamba ne’e mak promove sira atu hala’o sira nia kna’ar hanesan ema médiku ida, sira na’in 5 ne’e, na’in 2 ba inspektur asistente tamba remata ona sira nia estudu iha lisensiatura ba Doutor nian, no nain 3 ba primeiru sarjentu tamba remata ona sira nia estudu iha Baxarelatu ba enfermeiru”. Entertantu, hatan kona-ba funsionamentu klínika PNTL nian, Komisáriu Afonso hateten, sira iha papel importante iha PNTL, kada fulan 3 sira ba distritu hodi konsulta membru PNTL sira, maske sei infrenta difikuldade ba fasilidade. Ikus liu, Segundu Komandante Jerál Afonso apela ba membru PNTL hotu katak ida-idak hala’o nia kna’ar maibe tenke hare’e mos ba ninia saúde, tamba saude di’ak mak hala’o kna’ar, bainhira moras todan tiha mak ba konsulta bele fó impaktu negativu ba ema ida-idak nia moris. Mídia PNTL.  

DILI –  Polísia Nasionál Timor-Leste (PNTL) hala’o enkontru ho Komisaun B Parlamentu Nasionál (PN) ne’ebé trata asuntu Defeza, Seguransa no Negósiu Estranjeiru hodi ko’alia kona-ba progresu no dezafiu ne’ebé mak PNTL hasoru iha pasadu, prenzente no futuru.

Enkontru ne’e parte PNTL prezidi husi Komandante Jerál PNTL Komisáriu Dr. Longuinhos Monteiro no parte Komisaun B Parlamentu Nasionál, prezidi husi Prezidente Komisaun B, Deputadu David Dias Ximenes, hahú husi oras 09.00 dader to’o 16.30 Lorokraik OTL iha salaun Konferénsia Kuartel Jerál PNTL Caicoli-Dili, Kinta feira (03/07/2014).

Objetivu husi enkontru ne’e parte komisaun B PN hodi rona esplikasaun kona-ba pontus intervensaun PNTL nian kona-ba kestaun orsamentu, pesoál armamentu, lojístika, no sst, no vijita ida ne’e bele esklarese situasaun reál hanesan kapasidade no difikuldade PNTL nian nu’udar instituisaun ne’ebé tutela seguransa ba Estadu Timor-Leste.

“Ha’u fiar katak Deputadu sira sai husi ne’e ho informasaun ne’ebé Komandu transmiti hodi responde ba dúvidas ne’ebé Deputadu sira iha durante iha sira nia fiskalizasaun iha área distritais, ao mesmo tempo lori ksolok ba Komandu Jerál PNTL tamba ho vijita ida ne’e bele iha esklarese ne’ebé barak no bele habelar liu tan servisu misaun ba instituisaun 2 (rua) hanesan Parlamentu Nasionál nu’udar fiskalizadór no PNTL nu’udar implementadór ba kestaun seguransa.” Esplika Komisáriu Longuinhos Monteiro.

Iha okaziaun ne’e, Komisáriu Longuinhos Monteiro informa katak, Komisaun B Parlamentu Nasionál husu mos preparasaun PNTL nian atu responsabilidade seguransa ba simeira CPLP ne’ebé sei halo iha fullan Jullu ne.

Entertantu, hafoin hala’o inspesaun, Prezidente Komisaun B Parlamentu Nasionál Deputadu David Dias Ximenes hateten katak, husi vijita ne’e hodi haree situasaun PNTL nian iha parte rekursu umanu, kapasidade, no fasilidade.

Liu husi vijita ne’e fó mos korazem ba servisu PNTL nian hodi fó seguransa ba komunidade sira ho diak no profesional tamba iha fatin hotu-hotu presiza polísia nia prezensa.

Prezidente Komisaun B Deputadu “Mandati” apela ba Polísia sira katak, Polísia la’os funsionáriu públiku, tamba ne’e tenke prontu 24 oras, no hakarak tama polísia mak ne’e; “O prontu para kumpri mak Estadu sei haree O nia fasilidade sira ne’e”.

Hafoin hala’o enkontru, Deputadu husi Komisaun B ho nia delegasaun sira akompaña ho Komandante Jerál PNTL ho nia Komandante Unidade sira ba hala’o inspesaun direita ba fatin hirak mak hanesan lojístika, ofisina, farmásia, mekánika no sei hala’o mos inspesaun ba Unidade Espesiál Polísia, no sub Unidade BOP iha loron 9 Jullu 2014.

Lori Komandu PNTL nia naran, Komisáriu Jeral PNTL Dr. Longuinhos Monteiro mos hato’o agradesimentu ba Prezidente Komisaun B PN ho nia delegasaun tomak ne’ebé mak fó sira nia tempu ba servisu importante ida ne’ebé asume ninia misaun nu’udar defensór no protetór ba interese seguransa sidadaun Timor-Leste nian. Mídia PNTL.

DILI – Polísia Nasionál Timor-Leste (PNTL) lakon tan nia membru polísia na’in 2 (rua) iha fulan Jullu tinan ida ne’e. membru polísia ne’e mak hanesan matebian Sarjentu Fernando Maia nu’udar membru Unidade Polísia Maritima ne’ebé mate iha loron 03 fulan Jullu 2014 no matebian Superintendente Asistente Mateus de Jesus Soares nu’udar Segundu Komandante Distritu Dili, ne’ebé mate iha loron 04 fulan Jullu 2014, matebian na’in rua ne’e mate iha Hospital Nasionál Guido Valadares-Dili. Matebian Fernando Maia, mate tamba sofre moras tensaun no matebian Mateus de Jesus Soares mate tamba sofre moras kánkru fuan (kanker jantung), tuir dadus ne’ebe iha katak membru PNTL sira ne’ebé mate hamutuk atus ida rua nolu resin ida (121) hamutuk ho membru nain 2 ne’e. Entertantu molok familia matebian hala’o prosesu funeral, hanesan bai-bain Polísia Nasionál Timor-Leste hala’o serimonia despedida ba matebian Fernando Maia iha Kuartel Jerál PNTL, Caicoli-Dili ne’ebé prezidi husi Segundu Komandante Jerál PNTL, Komisáriu Afonso de Jesus. Liu husi serimónia despedida ne’e, Segundu Komandante Jerál, Komisáriu Afonso de Jesus hateten, lori Komandu Jerál nia naran hato’o sentidu kondolénsia ba familia matebian no ba membru PNTL sira hanesan matebian nia kolega. Sarjentu Fernando Maia, nu’udar polisia ida ne’ebe hala’o nia knaar durante tinan 12 nia laran, molok matebian muda mai iha Unidade Polísia Marítima, antes ne’e hala’o nia kna’ar iha Estasaun Atabae, Distritu Bobonaro. “Familia triste, Instituisaun PNTL mos triste bainhira rona matebian Fernando Maia ba ona mundu seluk, tamba matebian hala’o nia kna’ar seidauk to’o rohan, maibe matebian husik hela ita iha fatin ida ne’e, tamba ne’e mai ita hato’o ita nia orasaun ba Nai Maromak atu bele tulun nia klamar iha mundu seluk, nomos bele tulun ita iha mundu ida ne’e hodi fó liman ba malu hodi fó siguransa ba ita nia nasaun.” Hatutan Komisáriu Afonso de Jesus. Lori mos Komandu Jerál no matebian nia naran hato’o deskulpa ba maluk PNTL, komunidade sira hotu katak, karik durante ne’e matebian Fernando Maia halo sala iha nia moris ho nia knaar tomak hanesan polísia, tanba ita ema la perfeitu iha okaziaun ne’e, husu atu fó perdua. Iha fatin hanesan, Komandante Unidade Polísia Marítima (UPM), Superintendente Lino Saldanha hateten, matebian ne’e nia esperiénsia la’os iha área marítima de’it maibé molok ne’e nia servisu ona iha área Unidade Espesiál, nomos iha Distritu sira. Superintendente Lino hatutan, molok matebian ne’e husik hela mundu ne’e, matebian husu lisensa semana 2 atu konsulta no tuir informasaun ne’ebe iha matebian ne’e mate tamba sofre moras tensaun. Ikus liu Komandante UPM hameno katak, “fiar ba Maromak, fiar ba ita nia Rai ida ne’e no fiar ba ita nia familia, só buat 3 ne’e mak ita hala’o di’ak, ita nia moris metin”. Entertantu Matebian Fernando Maia moris iha Dili, loron 19 fulan Setembru tinan 1967, oan husi Aman Arnaldo Maia Barreto, ho Inan Maria Manuela, ne’ebé hela iha Aldeia Lahane Oriental, Suku Lahane Oriental, Sub-distritu Vera Cruz, Distritu Dili. Matebian Fernando Maia hahú tama polísia iha loron 4 fulan Jullu tinan 2002, no mate iha loron 03 fulan Jullu 2014, nu’udar Sarjentu  Polísia. Matebian Fernando Maia mate husik hela nia fen kaben ho oan na’in 5 (lima). PNTL mos sei hala’o serimónia despedida hanesan ba Matebian Mateus de Jesus Soares hanesan Segundu Komandante Distritu Dili iha loron tuir mai, molok familia hala’o prosesu funeráriu. Matebian Mateus de Jesus Soares, moris iha Maubara-Liquica, loron 10 fulan Jullu tinan 1960, oan husi Aman Antonio Soares, inan Alda Soares de Jesus Pereira, ne’ebé hela iha Suku Vila-Verde, Sub-Distritu Vera Cruz, Distritu Dili. Matebian akaba nia eskola iha nível ensinu Pré-Sekundáriu (SMP) iha tempu Portugés nian. Matebian hahú tama kareira nudar polísia iha loron 6 fulan Marsu tinan 2001, matebian husik hela mundu ne’e iha loron 04 fulan Jullu 2014 ho deviza Superintendente Asistente. Durante tinan 12 (sanulu resin rua) nia laran, matebian Mateus de Jesus Soares hala’o nia kna’ar nu’udar Segundu Komandante iha Kuartel Distritu Dili. Ita ema moris iha mundu hanesan ema la’o rai, loron ida sei fila ba Aman Maromak, hanesan liafuan husi Biblia katak “ita ema mai husi rai sei fila ba rai.” Mídia PNTL

LIQUIÇA – Komando Polísia Nasionál Timor Leste (PNTL) Distritu Liquiça hala’o semináriu ho tema “hasa’e koñesimentu kona-ba papél no dever juventude nian no transforma ema sai sidadaun ne’ebé di’ak hodi hases-an husi violénsia sira, problema rai nian no violénsia doméstika nian” iha Sentru Tokodede Liquiça, kuarta (11/06/2014). Iha abertura ba semináriu ne’e, Komandante Operasaun Nasionál PNTL Superintendente Xefe Armando Monteiro hanesan Komandante Interinu Komando PNTL distritu Liquiça hateten, objetivu husi seminariu komunitariu ne’e oinsa PNTL hamutuk ho nia parseiru sira hodi  identifika no buka solusaun ba problema ne’ebé durante ne’e komunidade sira infrenta. Asuntu importante 3 (tolu) mak foti iha semináriu ne’e mak hanesan problema disputa rai, violénsia doméstika, no papél juventude nian atu oinsa bele involve an sai sidadaun ne’ebe diak, hodi partisipa dezenvolvimentu nasional. Ho nune’e, liu husi semináriu ne’e PNTL ho parseiru sira hanesan Governu, ONG no TLCPP no komunidade sira atu bele oinsa buka solusaun ne’ebé di’ak rezolve problema refere. Oradór ba semináriu ne’e mai husi parte Guvernu hanesan Diretór Terras e Propriedade Distritu Liquica, ko’alia kona-ba problema disputa rai, reprezentante husi Secretaria Estadu Promosaun Igualdade (SEPI) ko’alia kona-ba violénsia ba jéneru (violensia doméstika), Director Ezekutivu Asosiasaun HAK ne’ebé ko’alia kona-ba oinsa transforma ema sai sidadaun ne’ebé di’ak, no Prezidente Konsellu Nasionál Juventude Timor-Leste (CNJTL) ko’alia kona-ba papel no dever juventude nian. Iha tempu hanesan, Xefe Ekipa Programa Polisiamentu Komunitária Timor-Leste (TLCPP), Jhon Rivers iha nia diskursu ba abertura hateten, programa TLCPP nia objetivu mak atu servisu hamutuk ho PNTL no komunidade sira atu nune’e komunidade sira moris iha hakmatek no seguru, no fundus ba programa ne’e mai husi Polísia Nova Zelandia. Jhon Rivers hatutan, servisu ne’ebé TLCPP hala’o mak kontinuasaun ba atividade polisiamentu komunitária nian, tamba polisiamentu komunitária ko’alia kona-ba seguransa no seguru komunidade nian. Aleinde servisu ho polísia komunitária, TLCPP mos servisu hamtuk ho PNTL hodi ko’alia kona-ba juventude no violénsia doméstika, nomos seguransa tránzitu. Iha tempu hanesan, Xefe Departamentu Polísia Komunitária Nasionál Superintendente Asistente Boavida Ribeiro iha ninia diskursu abertura hateten, iha fulan Fevereiru 2014 liu ba distritu Liquica nu’udar distritu primeiru ne’ebe harii KDD (Komisaun Diretiva Distrital). No liu husi semináriu ne’e bele hasoru malu ho xefe suku, no komunidade sira atu ko’alia kona-ba problema ne’ebe durante ne’e hasoru sai hanesan problema nasionál mak hanesan disputa rai, violénsia doméstika, no saida mak papel no dever ema ida-idak nian hodi kontribui ba nasaun Timor-Leste. Superintendente Asistente Boavida Ribeiro hatutan, semináriu ne’e importante ba membru PNTL sira, liu-liu ba sira ne’ebé mak servisu direita ho komunidade sira hanesan polísia komunitária, ofisial polisia suku (OPS), atu oinsa bele hakle’an sira nia kapasidade hodi sai membru polisia ne’ebe kredibel, profisional, tuir pilar 3 hanesan vizaun estratéjiku Komando PNTL nian. Xefe Departamentu Polisia Komunitária Nasionál Boavida akresenta, hala’o servisu tuir planu estratéjiku PNTL nian, liu-liu tema ne’ebé foti iha aniversáriu PNTL ba dala 14 kona-ba VIP (Vizibilidade Involvimentu no Profisionlizmu). Boavida esplika, Vizibildade mak oinsa polisia nia prezensa iha komunidade nia le’et, liu-liu iha fatin hirak ne’ebe mak risku ba problema, no sai ameasa ba komunidade nia moris, Involvimentu mak involve entidade hotu atu oinsa bele fahe hanoin ka ideias ba malu hodi bele rezolve problema ne’ebé mak durante ne’e komunidade sira infrenta. No Profisionalizmu mak membru polisia sira tenke hatudu sira nia matenek, la’os iha teoria de’it maibe matenek iha atuasaun, matenek iha atendementu, no matenek iha disiplina hodi asegura integridade, kredibilidade no prestiju PNTL nian. Boavida hatutan, “iha distritu Liquica estabelese ona seguransa voluntáriu, maske seidauk ofisializa husi Komando Nasional PNTL, ita boot sira nia espíritu nasionalizmu, espíritu voluntarizmu, ne’e sai hanesan mestre di’ak ida ba instituisaun PNTL, liu-liu ba membru PNTL sira ne’ebe servisu direitamente ho komunidade, bainhira ita boot sira hamutuk ho ami, ami sente la mesak no bele haforsa liu tan ami nia servisu hodi bele fó seguransa ba ita nia komunidade sira”. Iha fatin hanesan Adjuntu Administrador Distritu Liquica, Aureldino Afonso dos Santos hateten, distritu Liquica hanesan distritu primeiru ne’ebe estabelese Konsellu Polisiamentu komunitariu (KPK), no Komisaun Diretiva Distrital (KDD) hanesan projetu pilotu ida ne’ebé estabele ona iha suku 10 distritu Liquica ne’ebe identifika iha konflitu aas liu, iha distritu Liquica iha sub distritu 3 no suku 23, suku 13 seidauk implementa, bainhira programa pilotu ne’e susesu mak sei implementa tan iha suku seluk ne’ebe mak identifika problema aas. Semináriu ne’e loke ofisialmente husi Adjuntu Administrador Distritu Liquica. Iha tempu hanesan, Diretór Departamentu Terras e Propriedade Distritu Liquica Tito Serão hateten, atu sai na’in ba rai  labele uza ho forsa de’it, maibe tenke ho konsiensia, no hatudu evidensia, tamba bainhira laiha faktus mak lei la konsidera no kategoria krime. Tito hatutan, atu rezolve problema ruma di’ak liu rezolve iha xefe suku no xefe aldeia sira liu husi mediasaun, tamba bainhira to’o iha tribunal tenke hatudu faktus, no kustu ne’ebe bo’ot. Entertantu partisipasaun iha seminariu ne’e mak komandante Operasaun Nasional hanesan komandante interinu distritu Liquica, Xefe Departamentu Polisia Komunitaria Nasional, Adjuntu Administrador distritu Liquica, Xefe Ekipa TLCPP, Orador sira, Adjuntu Komandante Komando PNTL distritu Baucau, Aileu no Viqueque, xefe suku, ONG local, membru PNTL, estudante, veteranus, grupu feto sira nomos konvidadus sira seluk. Mídia PNTL.

DILI – Unidade Espesiál Polísia (UEP)prepara membru foun na’in 120 (atus ida ruanulu) hodi halo seguransa ba Simeira Comunidade País da Lingua Portuguesa (CPLP) ne’ebé sei hala’o iha fulan Jullu tinan ne’e. Membru hirak ne’e sei koloka hodi fó seguransa iha Aeroportu Internasional Nicolau Lobato, Hotel sira, área tasi ibun Ministériu Negósiu Estranjeiru no Kooperasaun, no fatin sira seluk iha Dili laran ne’ebé mak bainaka sira hela ba. Molok atu halo seguransa ba Xefe Estadu no membru sira husi nasaun CPLP sira ne’e, membru foun UEP 120 hala’o atrasaun ka treinu iha Kuartel Jerál PNTL Caicoli-Dili. Informa Komandante Operasaun Nasional, Superintendente Xefe Armando Monteiro ba Jornalista sira iha Kuartel Jerál PNTL Caicoli Dili, tersa 24 Juñu 2014. “Membru foun hamutuk 120 husi Unidade Espesiál Polísia hala’o demonstrasaun iha ne’e hodi prepara sira atu halo seguransa ba atividade Simeira CPLP ne’ebé sei hala’o iha fulan oin, membru hirak ne’e mai husi sira ne’ebé foin lalais tuir treinamentu báziku, no agora dadauk treinamentu ne’e seidauk remata tamba seidauk to’o fulan 3”. Informa Komandante Monteiro. Entertantu abertura atrasaun ba membru foun UEP ne’e husi Komandate Jerál PNTL Komisáriu Dr. Longuinhos Monteiro, no akompaña husi Komandante UEP Komandante UEP Superintendente Xefe Afonso dos Santos . Mídia PNTL.