Dili– Ajente rekruta Polisia Nasional Timor-Leste (PNTL) na’in 243 (atus rua hatnulu resin tolu) ofisialmente hahú formasaun báziku to’o graduasaun durante fulan neen (6) iha Centru Formasaun ba Polisia (CFP) molok sai membru polisia.
“Ohin halo tan abertura ba kuarta kursu (4o) ba ajente rekruta Polisia Nasional Timor-Leste hanesan parte inisiu ida atu hala’o formasaun ba ajentes ba ano letivu 2015/2016,” informa Komandante Interinu CFP Superintendente Assistente Emilio dos Santos iha serimonia abertura formasaun ba ajente rekruta sira iha loron Tersa (27/10) CFP Comoro Dili.
Komandante Emilio hatutan, despaixu husi Komandante Jeral katak iha kuarta kursu ida ne’e rekruta ajente nain 262 maske seidauk kompleta maibe sei iha faze inkorporasaun nia laran iha deit 243 no sira seluk sei halo hela prosesu atu kompleta númeru 262.
Entertantu Komandante Jeral PNTL Komisariu Julio da Costa Hornay husu ba ajente rekruta sira atu asegura didiak hodi kumpri regulamentu hotu-hotu ne’ebe maka iha, estuda no treinu maka’as no tenke iha fizika, mentalidade no matenek polisia nian atu bele sai polisia ne’ebe di’ak no afirma iha filera PNTL hodi servi povu no nasaun ida ne’e.
“Iha tinan ida ne’e muda tiha kuríkulu husi tinan ida ba fulan neen tamba ne’e ha’u husu ba imi hotu atu kumpri regulamentu hotu ne’ebe maka aplika ba imi durante iha formasaun, imi seidauk polisia, imi sei rekruta kandidatu polisia no regulamentu ne’ebe maka aplika ba imi regulamentu disiplinar rekruta nian lalika prosesu naruk iha nivel estrutura Centru Formasaun prosesa e elimina no laiha toleransia ba infrasaun disiplinar ne’ebe maka komete husi ajente rekruta sira,” tenik eis Komandante CFP ne’e.
Ho nune’e Komandante Jeral espera katak ajente rekruta sira ne’ebe tuir formasaun ne’e bele to’o graduasaun.
“Hau espera katak imi ne’ebe hamrik iha ne’e no restu mai tan hodi kompleta 262 sei hamrik hanesan ne’e iha loron graduasaun,” Nia afirma.
Iha okajiaun ne’e Segundu Komandante Jerál GNR Maijor Tavares Nunes hateten Instrutores GNR sira sei ajuda, akompaña no fo apoiu bazeia ba pedidu husi PNTL ho orientasaun ne’ebe maka iha hamutuk ho instrutor Timor oan sira.
Formasaun ba ajente rekruta sira kompostu husi formasaun báziku, eskolar no fizika ne’ebe maka sei hala’o iha CFP, formasaun karakteristika sei hala’o iha foho Pilmou Postu Administrativu Bazartete Munisipiu Liquica durante loron tolu.
Serimonia abertura ne’e dirizi husi Komandante Jerál PNTL akompaña husi Komandante Interinu CFP no Segundu Komandante Jeral GNR Maijor Tavares Nunes, reprejentante TLPDP, Instrutores iha CFP, membrus PNTL no ajente rekruta sira. Média PNTL.
