Dili– Polisia Nasional Timor Leste (PNTL) sei kaptura artemarsiais ne’ebe mak malandru kontinua treinu subar, liu-liu ba artemarsiais tolu (PSHT, IKS, no KORK) ne’ebe mak tuir rezolusaun governu nian katak taka atividades treinu nian total iha Timor Leste.
Komandante Jerál PNTL, Komisáriu Júlio da Costa Hornay dehan, artemarsiais ne’ebe mak malandru kontinua loke sira nia atividade treinu subar polisia mos mantein nafain rezolusaun governu nian.
“O malandru, malandru o nian. Polisia kumpri rezolusaun governu nian. Ami kumpri nafatin ami nia dever. Sira mos iha direitu maibe direitu ne’ebe mak sira uza kuandu viola rezolusaun governu nian ka aparelu estadu ninian, instituisaun estadu nian ne’ebe mak toma responsabilidade ba ida ne’e iha dever para ezekuta saida mak governu fo ona,” dehan Julio ba jornalista sira iha Kuartel Jerál PNTL, Caicoli-Dili, sesta (25/09/15).
Nia hatutan, se mak hakarak kontinua hala’o atividades polisia pronto atu kombate, no kontinua buka tuir nafatin fatin ne’ebe mak artemarsiais sira treinu subar ba.
“Ita buka nafatin kuandu ita hatene ona informasaun iha fatin ruma ita sobu (brongkas), tamba ne’e rezolusaun. Se ami la ezekuta entaun ami la respeita orden ne’ebe mak governu hatun mai ami polisia,” dehan Julio.
Nia dehan, Polisia ne’e governu nia instituisaun, tau para kumpri orientasaun governu nian ne’ebe tuir lei hatur, se ema viola lei polisia bele kombate.
Artemarsiais ne’ebe mak governu hatun rezolusaun atu taka sira nia atividade total mak Kmanek Oan Rai Klaran (KORK), Persaudaraan Setia Hati Terate (PSHT), no Ikatan Kera Sakti (IKS). (Fontes: Timor Post Edisaun Segunda, 28/09/2015).
