Bobonaro, Komandu Polísia Nasional Timor-Leste (PNTL) liu husi Segundu Komandante Jerál Komisariu Polísia Pedro Belo hato’o parabéns ba membru PNTL sira iha Komandu munisipiu Bobonaro ne’ebe asegura ona seguransa ba sarani sira hodi partisipa misa iha Tasi-tolu Dili, iha âmbitu vizita Sua Santidade Papa Francisco nian mai Timor-Leste iha loron 09 to’o loron 11 fulan Setembru tinan 2024.
Liafuan Agradesimentu ne’e Segundu Komandante Jerál Komisariu Polísia Pedro Belo hato’o liu husi ninia diskursu iha Formatura Jerál ne’ebe hala’o iha Komandu PNTL munisipiu Bobonaro iha loron sexta-feira (20/09) ne’e katak lori Komandante Jerál PNTL nia naran hato’o parabéns no agradesimentu bo’ot tebes-tebes ba ita nia operasaun bo’ot ida ne’ebe maka ita ultrapasa iha vizita Amo Papa nian mai ita nia rai doben Timor-Leste.
“Bobonaro, munisipiu ida ne’ebe mós asegura iha ita nia sarani sira ne’ebe husi munisipiu ba Dili nune’e mós ekipa lubuk ida ba apoiu seguransa iha Kapital Dili, tanba ne’e lori Komandante Jerál nia naran hato’o agradesimentu ba estrutura Komandu munisipiu ne’ebe ldieradu husi Komandante Munisipiu to’o sarjentu, ajente no imi hotu ne’ebe kooperasaun diak tebes-tebes ho igreja, veteranu, autoridade lokais sira ne’ebe diak hodi bele lori ita nia sarani sira ne’ebe barak maibé ita asegura ho diak to’o iha Dili, ita nafatin fó asistensia ho diak to’o fila fali mai ho diak”, tenik Segundu Komandante Jerál PNTL ne’e.
Komisariu Polísia ne’e salienta tan katak tanba ne’e servisu ida ne’ebe maka hafoin ita ukun ann, iha operasaun ida ne’ebe bo’ot tebes hanesan ne’e, ita hotu akompaña katak ita nia sarani sira ne’ebe husi munisipiu 12 inklui Oecusse ne’ebe maka to’o iha Dili no populasaun no sarani tomak ne’ebe hamutuk rihun ida resin iha Kapital Dili, maibé laiha kazu ida maka akontese.
“Só ita akompaña katak hafoin Misa iha asidente ida, kareta baku fila iha parte Ermera ninian, maibé ema rihun ba rihun ne’ebe maka tama iha Dili ho diak tanba ita hotu nia kontribuisaun ne’ebe maka maka’as tebes, Inklui mós ita nia kolega Forsa Defesa sira ne’ebe maka apoiu ba ita, tanba antes ida ne’e iha despaisu ida husi Governu, liu husi Rezolusaun ida, nune’e mós iha Ordem Operasaun ne’ebe maka sai husi Komandu Jerál ba iha Operasaun Konjunta ne’ebe hanaran Operasaun Pombu Mutin, ho ida ne’e, ita nia susesu bo’ot tebes tanba ne’e agradesimentu no parabéns ba maluk sira hotu ne’ebe maka durante ne’e hala’o servisu”, haktuir Komisariu Polísia ne’e.
Segundu Komandante Jerál PNTL ne’e apela atu servisu ida ne’e tenke mantein nafatin, ita nafatin kolabora servisu diak ho autoridade lokais sira liu-liu Komandante Eskuadra sira, orienta ita nia OPS sira atu servisu hamutuk ho ita nia xefe suku sira ne’ebe maka iha terenu, hodi kontinua lori Misaun PNTL ba ita nia komunidade sira.
“Tanba ita iha Karakter Polisiamentu Komunitaria, entaun ita nia hahalok hala’o hanesan Polisia Komunitaria maibé keta haluha katak ita nia natureza ne’e militar, ne’ebe maka tenke obedese ba Hirakria maka Komandante Jerál hafoin ba estrutura Komandu nian maka hanesan Komandu Munisipiu sira, tanba ne’e imi hotu tenke obedese ba Ordem ne’ebe maka fó sai husi Komandante Munisipiu no labele ba rona falo Ordem husi ema seluk”, apela Segundu Komandante Jerál PNTL ne’e. Media PNTL.
