Dili– Badan Narkotika Nasional Republik Indonesia (BNN) ho Polisia Nasional Timor Leste (PNTL) sei koopera hamutuk atu oinsa bele prevene ai moruk droga tama Timor Leste no Indonezia liu husi liña fronteira.
Atu prevene ba droga ne’e mak Parlamentu Nasional konvida BNN mai Timor Leste hodi fahe informasaun ba PNTL atu nune’e oinsa bele kombate droga ne’e.
Komandante Jeral PNTL Komisariu Julio da Costa Hornay agradese ba BNN tamba sira hakarak mai fahe informasaun mai PNTL, atu PNTL ho BNN-POLRI hamutuk hodi kombate aimoruk droga ne’e, tamba Timor Leste agora ne’e sai hanesan fatin tranzitu ida ne’ebe ema liu husi ne’e tama fali ba Indonesia.
“PNTL agradese ba sira tamba sira hakarak mai fahe informasaun mai ita, atu Timor Leste ho Indonesia hamutuk hodi kombate aimoruk droga ne’e, tamba Timor Leste agora ne’e sai hanesan fatin tranzitu ida ne’ebe ema liu husi ne’e tama fali ba Indonesia, no iha futuru oin mai Timor Leste mos bele sai hanesan fatin merkadu ida, ita lakohi ida ne’e akontese, tamba ne’e ita servisu hamutuk hodi sira mai fahe informasaun mai PNTL, kona ba sira nia rain ne’e aimoruk droga tama oinsa, tama ema nia rain oinsa, no oinsa mak bele prevene, atu nune’e PNTL bele alerta atu oinsa bele prevene ba ida ne’e,” afirma Komisariu Julio Hornay ba jornalista sira hafoin enkontru ho BNN iha salaun konferensia Kuartel Jeral PNTL, Caicoli-Dili, loron Segunda (14/12/2015).
Komandante Jeral Hornay hatutan, atu halo servisu ne’e ho susesu presija hetan apoiu buat barak atu fasilita servisu polisia nian, no Sr. General BNN mai ne’e konvida husi Parlamentu Nasional, fiar katak parlamentu mos sei apoiu ba ida ne’e, atu nune’e ita bele halo prevensaun imediata atu nune’e Timor Leste bele hadook-an husi aimoruk aat ne’e.
Komisariu hatutan, aimoruk droga ne’e dala barak tama husi área fronteira no marítima, tamba ne’e PNTL sei haforsa seguransa iha fronteira no maritime atu nune’e bele halo prevensaun.
Iha fatin hanesan, Directorat Pengejaran dan Pemberantasan BNN, Brigadeiru Jeneral Yan Defetes hateten, objetivu BNN mai Timor Leste atu bele fahe informasaun ba PNTL kona-ba oinsa halo prevensaun ba aimoruk droga ne’e.
“Objetivu ami mai iha ne’e atu fahe informasaun ba malu liu-liu kona-ba área droga nian, atu oinsa PNTL ho BNN servisu hamutuk hodi prevene ba aimoruk droga ne’e tamba iha nasaun rua ne’,” afirma Brijen Yan.
Brijen Yan hatutan, aimoruk droga ne’e laos tama iha nasaun ida ka rua deit maibe ida ne’e tama iha nasaun ne’ebe deit, tamba ne’e nasaun rua ne’e presija apoiu malu atu bele prevene ba droga.
Partisipa iha enkontru ne’e mak Komando jeral, komandante husi kada unidade, departamentu, seksaun iha kuartel jeral, komandante UPF, Komandante UPM, no adjuntu komandante UEP, Diretor Servisu Migrasaun husi Ministeriu Interior no Diretor BNN ho nia ekipa. Média PNTL.
