Uncategorized

Dili- Komandu Polisia Nasional Timor-Leste (PNTL) munisipiu Baucau kontinua sosializa Lei Nu. 5/2017 rejimi juridiku pratika Artes Marsiais, Rituais, Armas Brancas no Rama Ambon hodi redus krime no konflitu entre Arte Marsiais.

Segundu Komandante PNTL munisipiu Baucau Superintendente Asistente Joni Viana hateten Komandu PNTL munisipiu Baucau iha loron 3/08 hamutuk ho Prokurador Distrital Baucau halo sensibilizasaun lei ne’e iha suku Tekinomata no suku seluk nune’e komunidade sir abele kompriende lalaok husi lei ne’e, Nia hato’o asuntu ba jornalista sira hafoin partisipa abertura formasaun ba formador sira iha Tower Fatuhada Dili, Segunda (07/08).

Komandante Joni informatan Komunidade barak maka seidauk iha koñesementu konaba lei armas brancas ne’ebe maka koalia konaba sasan kroat hirak ne’ebe maka joven sira utiliza hodi hasai ema nia vida hanesan rama ambon, diman, surik, katana, samurai no seluktan ne’ebe maka define iha lei Nu 5/2017 artigu 2 numeru 1.

Sosializasaun ne’e rasik hetan partisipasaun maximu husi komunidade no sira hein katak sosializasaun ne’e kontinua nafatin atu nune’e ema hotu iha koñesementu hodi evita problema ne’ebe maka sempre mosu bebeik.

“PNTL inplementa ona lei ne’e tanba ne’e wainhira iha ema ruma uza armas brancas polisia halo kedas atuasaun tuir lei haruka,”.

Alende ne’e PNTL Baucau hamutuk ho F-FDTL, Batelaun Ordem Publika (BOP), Polisia Militar ho autoridade munisipal no lokal halo esforsu hodi halo limpeza no hamos lema artes marsiais iha sidade Baucau no laiha reasaun ruma husi joven sira tanba ema hotu tenke kumpri lei no lei maka ass liu hodi regula ema nia hahalok no atividade.

Lei Nu.5/2017 aprova iha Parlamentu Nasional iha loron 6/03/2017 no promulga husi Prezidente Republika iha loron 12/04/2017 ho artigu hamutuk 43. Lei ne’e hanesan lei espesifiku (Lex Especialis). Media PNTL

Dili- Ofisial Polisia Suku (OPS) husi munisipiu 12 no Rejiaun Autonoma Espesial Oe-Cusse tuir Formasaun ba  Formador hodi dezenvolve liutan Polisiamentu Komunitaria.

Komandante Komandu Operasaun Superintendente Xefe Henrique da Costa hateten ho kursu ne’e formadu sira bele haforsa servisu Polisia Komunitaria iha nivel suku diak liutan hodi bele redus krime, Nia hato’o asuntu ne’e hafoin abertura formasaun ba formador sira iha Tower Fatuhada Dili, Segunda (07/08).

Komandante ne’e haktuirtan katak formasaun ne’e sei foka liu kona-ba Normas Organizasaun no Prosedimentu (NOP) ba OPS, Konselu Polisiamentu Komunitaria (KPK) no Konselu Seguransa Munisipal (KSM) ne’ebe maka aprova no lansa ona husi Komandante Jeral tanba ne’e molok inplementa membru sira tenke iha koñesementu klean nune’e inplementasaun iha terrenu bele lao diak.

Formasaun ne’e partisipa husi Segundu Komandante munisipiu balu, Xefe Operasaun no Komandante Eskuadra; formasaun ne’e sei halao durante semana rua nia laran (07-18) no formador sira husi Departamentu Polisiamentu Komunitaria, Centru Formasaun Polisia (CFP), no Fundasaun Azia.

Tuir planu formasaun hanesan sei fo ba Komandante Eskuadra sira nune’e bele akompaña atividade Polisiamentu Komunitaria iha suku 442. Media PNTL

Dili, Instruindus hamutuk na’in 121 ne’ebe durante fulan sia (9) hala’o formasaun Iha Centro Formasaun Polísia (CFP) Polísia Nasional Timor-Leste (PNTL) iha sexta semana kotuk (04/08) simu graduasaun no instruindus PNTL hamutuk na’in114 hetan promosaun ba Sarjentus.

Komandante CFP Superintendente Arquimino Ramos hafoin serimonia ba jornalista sira hateten graduasaun ne’e hala’o hafoin instruindus PNTL hamutuk 114 no instruidus husi Comunidade dos Países da Língua Portuguesa (CPLP) hamutuk na’in 7 partisipa iha kursu ba Sarjentus durante fulan sia (9) ne’ebe organiza husi PNTL.

“Instruindus hamutuk 121 mak kompleta sira nia kursu ohin no sira ne’ebe mai husi PNTL hafoin kursu ne’e hetan kedas promosaun ba Sarjentus, instruindus husi nasaun CPLP nianMinistru Interior sei halo rekomendasaun ba sira nia nasaun atu halo promosaun ba postu ida tuir mai kedas”, tenik Komandante CFP.

Superintendente Arquimino Ramos subliña liu tan katak kursu ne’e hala’o durante fulan sia (9) nia laran hahu’u husi loron 5 fulan Dezembru 2016, iha ne’ebe durante fulan hitu (7) formasaun eskolar hala’o iha CFP nia laran depois fulan rua (2) hala’o formasaun exersisiu iha munisipiu no unidade sira no remata iha loron 4 fulan Agostu 2017.

Hatan kona-ba planu CFP nian ba formasaun refere iha futuru, Komandante CFP esplika, “Sei kontinua nafatin, iha vagas balun ne’ebe seidauk prense, PNTL rasik governu aloka ona 157 maibe sira ne’ebe pasa hamutuk 114 deit signifika sei iha vagas nune’e oportunidade ne’e sei iha”.

Kona-ba formasaun ba nivel Ofisias PNTL nian, Komandante CFP esklarese katak Ministru Interior politikamente fó ona orientasaun no Komandu Jerál foin dadaun ne’e hasai ona despaxu ida atu CFP ho nia ekipa prepara hela fasilidade sira hanesan ekipamentu, kuríkulum atu iha tempu besik sei hala’o mós kursu ofisial.

“Orsamentu husi kursu ne’e rasik mai husi Fundo Desenvolvimento Capital Humano (FDCH- Ministerio Planeamento Investimento Estratégico- MPIE) maka apoio orsamentu kursu ne’e”, salienta Superintendente ne’e.

Iha biban hanesan reprezentante formandu, Sarjentu Fátima M.M. Marques hafoin serimonia hateten dahuluk loke vaga ne’e, nia laiha vontade atu konkore tanba bareira barak maka mosu hanesan formasaun ne’ebe hala’o durante fuan 9, formasaun hala’o iha Rairobo (Postu Administrativu Atabae, Munisipiu Bobonaro) maibé ho espiritu ne’ebe nia iha, nia koko bareira ne’e hotu maske hasoru difikuldade durante formasaun.

“Nune’e husi sentimentuladiak, hau esforsu ann sai esperansa bo’ot mai hau katak buat ida ne’ebe hau la realiza iha hau nia hanoin maibé mehi ne’eto’o duni”, dehan Sarjentu Fátima M.M. Marques.

Total instruidus ne’ebe maka simu graduasaun hamutuk na’in 121 kompostu husi instruindus CPLP na’in 7, na’in 3 husi nasaun Guine-Bissau no na’in 4 husi São Tome e Príncipe. Entretantu PNTL na’in 114, feto na’in 7, mane na’in 107 além de simu graduasaun iha tempu hanesan hetan mós promosaun Sarjentus husi Komandu PNTL.Partispa iha serimonia graduasaun no promosaun ne’e Ministru Interior, Komandante Jerál PNTL hamutuk ho Ofisias, Komandante PNTL Munisipiu, Provedor Direitos Humanos e Justiça, representante husi FDCH, konvidadu no familia graduadu sira.

Kadetes Na’in 3 Elemina Husi CFP

Kadetes na’in 3 iha Kintu kursu formasaun ba ajente ne’ebe maka dadaun ne’e hala’o hela formasaunbaze iha Rairobo (Postu Administrativu Atabae, Munisipiu Bobonaro) CFP elemina tanba kondiasaun saude la permite hodi kontinua formasaun.

“Sira hamutuk na’in 184 maibé na’in 3 ita elemina tanba sira moras, kondisaun físiku labele atu kontinua formasaun, nune’e agora dadaun sira hamutuk na’in 181 maka sei kontinua hela formasaun iha Rairobo no sira sei fila hikas mai Dili iha loron 20 Agostu 2017”, tenik Superintendente Arquimino Ramos.

Media PNTL.

Dili- Joven ida mate iha komfrontasaun entre komunidade ne’ebe maka akontese iha munisipiu Baucau postu administrativu Laga.

Komandante Komandu Operasaun Superintendente Xefe Henrique da Costa hateten kazu asaltu malu iha Laga ne’ebe maka hahu iha Eskola Sekundaria Jeral Filial Nu. 1 suku Tekinomata wainhira estudante sira halao hela ezame rezulta vitima Jose Moreira mate no Eilidio Ximens kanek, Nia hato’o asuntu ne’e ba jornalista sira hafoin enkontru ho parseru sira iha kartel Jeral PNTL Kaikoli Dili, Tersa (02/08).

Komandante Henrique haktuirtan katak  PNTL eskuadra Laga kaptura ona suspeitu sira hodi submete ba prosesu investigasaun, alende ne’e Komandu PNTL munisipiu Baucau informa katak identifika ona autor balu ne’ebe maka presija atu iha mandatu kapturasaun hodi kaptura lori ba prosesu tuir mai.

“Polisia investigasaun Baucau sei halo hela prosesu hodi submete ba Ministeriu Publiku hodi hetan mandatu kapturasaun ba ema hirak ne’ebe maka Polisia identifika sai hanesan autor ba kazu ne’e,” dehan Komandante operasaun.

Kronolojia Konfrontus iha Laga suku Tekinomata akontese iha loron 31/07 entre estudante tuir mai involve komunidade, tanba estudante sira lori sira nia maun alin no familia tama iha problema nia laran.

Atu mantein seguransa no prevene konflitu ne’e sai bootliutan autoridade seguransa munisipiu Baucau ne’ebe kompostu husi Task Force, Unidade Espesial, Batelaun Ordem Publika, Polisia Militar no forsa ne’ebe destaka iha Baucau sira halo ona prevensaun ba problema ne’e.

Alende ne’e Komandu operasaun mos orienta ona OPS sira atu halo komunikasaun ho autoridade lokal hodi prevene problema labele hadaet ba komunidade sira nune’e polisia bele halo investigasaun.

Entertantu mate isin Jose Moreira Polisia entrega ona ba familia hafoin sira rejeita atu halo otopsia nune’e parte Polisia, Ospital no familia halo tiha deklarasaun hodi entrega ba familia iha suku Waitame hodi halot tuir tradisaun. Media PNTL.

Dili- Komandu Operasaun Polisia Nasional Timor-Leste (PNTL) halo enkontru tekniku ho parseru husi Embaixada Japaun, Nova Zelandia no Programa Dezenvoplvimentu Suku (PNDS) hodi koalia konaba konstrusaun uma ba OPS.

Komandante Komandu Operasaun Superintendente Xefe Henrique da Costa hateten enkontru ne’ebe maka PNTL Departamentu Polisiamentu Komunitaria halo ho parseru sira koalia konaba inplementasaun projetu konstrusaun uma ba OPS iha munisipiu Aileu ne’ebe maka apoiu husi governu Japaun, Nia hato’o asuntu ne’e ba jornalista sira hafoin enkontru ho parseru sira iha Kuartel jeral PNTL Kaikoli Dili, Tersa (01/08).

Komandante ne’e haktuirtan katak ekipa tekniku tur hamutuk oinsa bele aselera prosesu hodi inplemnta apoiu husi governu Japaun ne’e.

Governu Japaun sei hari uma 3 ba OPS iha munisipiu Aileu iha Eskuadra Remexiu suku Tula Takeu, Eskuadra Laulara suku Fatisi no eskuadra Lequidoe suku Bere-Leu; No governu Nova Zelandia apoiu uma 14 teknikamentu projetu ne’e sei inplementa husi PNDS tuir sitema ne’ebe maka iha.

Tuir planu PNTL nian sei hari uma ba OPS iha suku 442 maibe kestaun orsamentu tanba ne’e kada tinan sei halo fazeadamente hodi fasilita OPS sira servisu iha suku. Hein katak governu Timor-leste bele hare oinsa hari uma ba OPS sira nune’e PNTL la depende deit ba doador sira.

Entertantu iha loron 01/08 Ministeriu Interior, Ministeriu Administrasaun Estatal no governu Nova Zelandia asina ona Memorandu de entendimentu iha salaun enkontru Ministeriu Interior  kona ba implementasaun projetu pilotu ne’ebe uza sistema PNDS hodi koopera ho komunidade sira iha suku ba hari’i uma ba OPS. Media PNTL

Dili, Governu Nova Zelandia no governu Timor-Leste halo parseria ida ba programa apoio Pilotu Uma ba Ofisial Polisiamentu Komunitaria (OPS) Polísia Nasional Timor-Leste (PNTL) iha munisipiu hotu.

Parseria ba programa ne’e halo liu husi serimonia asina Memorandum of Understanding (MoU) ne’ebe maka hala’o entre Ministeriu Interior (MI), Ministeriu Adminstrasaun Estatal (MAE) no Embaixada Nova Zelandia iha Timor-Leste tersa ne’e (01/08) iha salaun enkontru Ministeriu Interior nian hodi hare’e liu ba implementasaun programa pilotu ne’ebe sei uza Sistema servisu hotu iha PNDS (Programa Nasional Desenvolvimentu Suku) hodi koopera ho komunidade sira iha suku ba hari’i uma ba OPS.

Embaixada Nova Zelandia ba Timor-Leste Vicki Poole iha ninia intervensaun ba serimonia ne’e hateten Nova Zelandia kontinua halo kontribuisaun signifikante ba seguru no asegura komunidade iha Timor-Leste.

“Faze programa Pilotu Uma ba OPS hanesan parte ida husi Programa Apoio Polisiamentu Komunitaria, Timor-Leste ne’ebe akordu entre governu Timor-Leste no Nova Zelandia asina ona iha loron 10 Junhu 2016, ne’e demostra Timor-Leste nian rekoñesimentu ba Nova Zelandia nian aproximasaun ba Polisiamentu Komunitaria no ida ne’e sei permite atinzimentu iha tinan ha’at ba kotuk husi apoio polisiamentu komunitaria sei konsolida no sustenta”, dehan Vicki Poole.

Iha fatin hanesan Vise Ministru MAE Tomas Cabral hateten ho apoio husi embaixada Nova Zelandia hodi halo edifisiu ka residensia ba polísia komunitariu, programa ne’e sei servisu hamutuk ho PNDS tanba ne’e MAE maka sente benefisiariu husi apoio ne’e.

“Tanba polísia ba halo servisu ba iha komunidade, MAE maka hetan benefisiu katak MI sei destaka ninia funsionariu sira, ninia kuadru sira, ninia polísia sira atu hela besik liu ba povu, ida ne’e maka prestasaun entre pilar rua hanesan pilar administrasaun ho pilar seguransa nune’e povu bele sente hakmatek liu no povu bele iha konfiansa ba nia seguransa rasik”, tenik Vise Ministru MAE.

Nune’e mós Ministru Interior Dr. Longuinhos Monteiro iha ninia sesaun intervensaun hateten kooperasuan servisu entre Ministeriu Interior ho Governu Nova Zelandia hala’o tiha ona iha tinan ha’at ba kotuk ne’ebe maka susesu hotu liu-liu implementasaun programa Polisiamentu Komunitariu.

“Ohin ita sai orgullu iha ita ninia modelu polisimentu komuntaria, servisu ida ne’ebe presta informasaun ba iha komandu PNTL hodi halo avaliasaun durante hala’o misaun estadu ninian”, tenik Ministru Interior.

Iha programa Apoio Pilotu Uma ba OPS, Nova Zelandia sei fó apoio osan hamutuk $500,00 ba hari’I provizaun uma ba OPS no total uma ne’ebe maka sei hari’i hamutuk sanulu resin ha’at. Iha okaziaun n’e, asina mós akordu ida entre MI no MAE hodi hare’e ba aopio servisu Konsellu Polisiamentu Komunitariu (KPK) iha suku hotu iha Timor-Lesete. Kuaze 142 KPK maka estabelese ona desde tinan 2012 mai to’o agora iha muinisipiu 11 no Rejiaun Autonoma Espesial Oecusse (RAEOA).

Media PNTL.

Dili- Polisia Nasional Timor-Leste (PNTL) lansa programa saude na familia uza sistema digital nune’e fasil atu kontrola no up date pasiente wainhira halo tratamentu iha klinika saude PNTL ou fasilidade saude seluk.

Komandante Jeral PNTL Komisariu Julio da Costa Hornay hateten sistema ne’e diak ba pessoal saude PNTL nune’e no fasil atu kontrola membru PNTL ne’ebe maka moras no halo tratamentu iha klinika PNTL Dili ou iha ospital ka santru saude iha munisipiu 12, Nia hato’’o kestaun ne’e iha serimonia lansamentu programa saude na familia uza sistema Digital iha Klinika PNTL Kaikoli Dili Segunda (31/07).

Komisariu ne’e haktuirtan katak liu husi sistema ne’e membru PNTL ne’ebe maka halo konsulta iha ospital ou sentru saude iha munisipiu wainhira fo dadus kompletu pessoal saude bele hare diagnosa, kondisaun moras, aimruk ne’ebe konsumu no dadus mediku ne’ebe maka halo tratamentu.

Husu ba mediku PNTL atu responsabilidade, kuida no uza ho diak atu fasilidade ne’ebe maka gabinete Primeru Ministru fo no instala iha Unidade Saude PNTL bele uza ba tempu naruk ba nesesidade servisu nia .

Iha okajiaun ne’e Diretora Jeral Prestasaun Saude Dra. Odete Viegas hateten sistema ne’e pratiku no efetivu liu ba pessoal saude sira oinsa atu fo atendementu saude ne’ebe maka diak liu ba populasaun.

Eis Diretora Jeral Ospital nasional Guido Valadares ne’e haktuirtan katak sistema ne’e mos hamenus gastu tanba Ministeriu saude bele kontrola uzu medikamentu ne’ebe maka durante ne’e sai problema ba Timor-Leste ho sistema ne’ebe kontribui atu utilija medikamentus ho rasional tanba dalabarak komunidade sosa aimoruk ne’ebe maka la tuir preskripsaun mediku no sei afeta ba populasaun nia saude.

Programa dijitalijaun sistema saude familia lansa ona iha loron 22 Jullu tinan 2015 no sistema ne’e utilija ona iha munisipiu 3 no ospital Nasional Guido Valadares no fasilidade saude iha iha kapital Dili utilija sistema ne’e; no iha tempu badak gabinete Primeiru Ministru sei halao iha teritoriu laran tomak.

Iha serimonia lansamentu ne’e Diretora Diretora Jeral Prestasaun Saude entrega komputador ida ho Marka Lenovo ba Xefe saude PNTL Inspetor Abilio Araujo Goncalves.

Serimonia lansamentu ne’e partisipa husi Gabinete primeiru Ministru mediku PNTL no konvidadu sira. Media PNTL

Dili-Atu hasa’e koñesimentu pesoal Rekursu Umanu ba sistema Data Base, Komandu Polísia Nasional Timor-Leste (PNTL) liu husi departamentu Rekursu Umanu realiza treinamentu ida ba pesoal hamutuk nain sia (9).

Diretór Rekursu Umanu PNTL Superintendente Asistente  Lucas Tilman iha sesaun treinamentu ne’e hateten objetivu treinamentu ne’e atu fó kapasitasaun ba pesoal Rekursu Umanu PNTL atu bele sai operador ba sistema Data Base.

“Sistema base dadus PNTL nian ne’ebe maka agora instala iha Komandu Jerál no partisipantes sira mai husi membru PNTL departamentu rekursu umanu inklui funsionariu sivil sira ne’ebe maka hala’o servisu iha departamentu ne’e”, dehan Diretór Rekursu Umanu PNTL.

Superintendente Asistente Lucas Tilman espera katak husi treinamentu ne’e maka iha futuru bele responde ba nesesidade instituisaun nian, kona-ba membru PNTL nain hira maka ativu, nain hira maka halo hela estudu iha rai liur no mós rai laran, habilitasaun rekursu nian nain hira, membru PNTL mate nain hira tanba ne’e maka liu husi sistema Data Base ne’e bele ajuda atu hetan dadus hirak ne’e hotu.

Media PNTL.  

Dili-Relasiona ho selebrasaun loron mundial Konservasaun Natureza, sexta ne’e (28/07) Komandu Polísia Nasional Tmor-Leste (PNTL) hala’o limpeza jerál iha area Largo Lecidere to’o iha Area Branca.

Komandante Operasaun PNTL Superintendente Xefe Henrique da Costa iha sesaun entrevista ho jornalista sira hateten limpeza ne’e hala’o bazea ba enkontru ne’ebe maka hala’o Malabo (Guine-Equatorial) ne’ebe maka partisipa husi membru nasaun Comunidade dos Países da Língua Portuguesa (CPLP) iha tinan kotuk.

“Husi orientasaun enkontru ne’e maka kada tinan ita tenke hala’o aktividade limpeza ou bele mós kuda ai-oan, tuir lolos aktividade ne’e ita hala’o iha fulan kotuk maibé tanba ita hotu preukupa ho eleisaun parte seguransa ninian, tanba ne’e maka ita foin bele halo aktividade loron ohin ne’e”, tenik Komandante Operasaun PNTL.

Superintendente Xefe Henrique da Costa akresenta liu tan katak iha aktividade limpeza ne’e ladun hetan foer barak tanba komunidade sira barak maka iha ona konsiensia atu tau foer iha nia fatin, nune’e mós ekipa limpeza husi munisipiu Dili ne’ebe maka sempre halo hamo’os fatin hirak ne’e.

“Espera katak komunidade hotu-hotu iha ona konsiensia atu nafatin mantein foer iha nia fatin no kontinua kuidadu natureza ita nia liu-liu limpeza iha area tasi-ibun ninian, tanba ita hatene katak area tasi-ibun ne’e laos ita Timor oan mesak maka mai vizita maibé maluk estrangeiru sira mós vizita fatin ida ne’e”, hatutan Superintendente Xefe ne’e.

Partisipa iha aktvidade limpeza ne’e membru husi Komandu Jerál, Unidade Espesial Polísia (UEP), Unidade Polísia Marítima (UPM), hahu’u husi area Largo Lecidere no remata iha Tasi-ibun area Branca.

Media PNTL.    

Dili- Komandante Komandu Operasaun halo enkontru ho Prezidente CNE hodi kolia konaba seguransa ba edifisiu no Prezidente Comisaun Nasional Elisaun (CNE).

Komandante Komandu Operasaun Superintendente Xefe Henrique da Costa hateten ohin ami mai enkontru ho Prezidente CNE Alcino Barris hodi hare ba asuntu seguransa tanba depois de anunsia rezultadu Eleisaun Parlamentar konserteja balu kontente no balu la kontente maibe labele mosu fali problema ne’ebe maka fo inpaktu ba seguransa nasional, Nia hato’o asuntu ne’e hafoin enkontru ho Prezidente CNE iha Edifisiu CNE Kaikoli Dili.

Nia haktuirtan katak   Komandu PNTL koloka membru seksaun ida husi Unidade Espesial Polisia (UEP)  hodi fo seguransa ba edifisiu CNE durante oras 24 no membru Cosrpu Seguransa Pessoal (CSP) fo seguransa ba Prezidente CNE hodi akompaña servisu Prezidente CNE nian.

Tuir orariu ne’ebe maka iha ohin CNE sei konklui apuramentu nasional no entrega akta ba Tribunal Rekursu hodi halo  validasaun final tanba ne’e Alende halo seguransa iha edifisiu CNE no STAE  PNTL mos  sei  fo seguransa ba edifisiu Tribunal Rekursu durante prosesu lao.

Iha enkontru ne’e Prezidente CNE no Diretor STAE esplika konaba mekanismu no prosedimentu apuramentu municipal no nasional ne’ebe maka lao daudaun no fo klarifikasaun konaba informasaun falsu ne’e maka publika iha Facebook konaba buletin de votus lakon no seluktan.

Enkontru ne’ebe maka halao durante oras rua nia laran ne’e dirizi husi prezidente CNE akompaña husi Inspetor Jeral Olavio da Costa Almeida ho prezensa husi Diretor Jeral STAE Acilino Manuel Branco no parte PNTL komandante Operasaun akompana husi Chefe Servico Informasaun Policia Superintendente Xefe  Jose Maria Neto Mok. Media PNTL