Uncategorized

Dili- Kampaña Parlamentar durante inisiu to’o ohin loron (20 to’o 21) lao ho seguru no paz tanba kontribuisaun lideransa partidu no militantes sira.

Komandante Komandu Operasaun Superintendente Xefe Henrique da Costa hateten durante periodu kampaña loron rua (20 to’o 21) laiha insidente no asidente ruma ne’ebe akontese tanba Polisia Nasional Timor-Leste (PNTL) halo servisu hetan koperasaun diak husi kordenador partidu nomos ekipa hirak ne’ebe organiza kampaña, Nia hato’o asuntu ne’e ba Jornalista sira iha Kuartel Jeral Kaikoli Dili Kinta (22/06).

Komandante ne’e haktuirtan katak Tuir relatoriu ne’ebe maka Komandu Operasaun simu husi Komandu PNTL munisipiu 13 katak situasaun lao normal no kontroladu.

“Kolokasaun membru PNTL hodi fo seguransa ba atividade kampaña depende ba movimentu kampaña tanba iha munisipiu balu loron ida iha partidu tolu ou hat maka halo kampaña, numeru husi militantes ne’ebe maka partisipa, nomos situasaun iha munisipiu ne’e rasik,” komandante Henrique esplika.

Komandu munisipiu ida-idak iha nia membru rasik nomos apoiu husi Unidade Espesial Polisia (UEP) hodi reforsa atu asegura seguransa. Media PNTL

Dili- Polisia Nasional Timor-Leste (PNTL) prende motorizada hamutuk 425 durante kampaña Parlamentar ne’ebe maka halao iha loron 20 to’o 22 ohin.

Komandante Komandu Operasaun Superintendente Xefe Henrique da Costa hateten PNTL halo pasa revista iha teritoriu laran tomak durante periodu kampaña no prende motorizada hamutuk 425 barak liu iha munisipiu Kovalima, Dili, Manufahi no Viqueque, Nia hato’o asuntu ne’e ba Jornalista sira iha Kuartel Jeral Kaikoli Dili Kinta (22/06).

Nia haktuirtan katak motor hirak ne’e prende tanba laiha dokumentus, xapa matrikula, uza kanu resin no tolu ema nain tolu ba kampaña tanba ne’e Polisia prende no prosesa tuir Lei Tranzitu Seguransa Rodoviariu.

Komandu PNTL fo ona orentasaun ba Komandu PNTL munisipiu 13 no apoiu husi Unidade Espesial Polisia (UEP) atu nune’e kontinua halo operasaun nune’e mos kordena ho F-FDTL atu  fo apoiu karik iha situasaun ruma ne’ebe PNTL presiza.

Alende ne’e liu husi pasa revista ne’ebe maka PNTL halao iha loron 20 no 21 prende kilat manu (senapan) ida  iha area Comoro sub distritu Dom Aleixo, Iha operasaun laran Polisia hetan  motor nain halai lakon maibe depois minutu balu nia laran motor nain ba aprezenta aan iha Eskudra Polisia Dom Aleixo.

Tanba ida ne’e kategoria flagrante delitu maka Polisia kaptura kilat nain detein durante oras 72 hodi submete ba prosesu.

Media PNTL

Dili-Asidente trafiku ne’ebe maka akontese iha Loes Munisipiu Liquica iha loron Sexta-Feira (16/06) rezulta ema nain tolu (3) mate no seluk kanek todan.

Segundu Komandante Jeral PNTL Komisariu Faustino da Costa hateten iha semana kotuk  PNTL rezista kazu asidente trafiku hamutuk 39 ne’ebe rezulta ema nain 3 mate iha Loes no ida iha Dili), Nia hato’o asuntu ne’e hafoin dirizi enkontru semanal hamutuk ho Komandante munisipiu, Unidade no superior PNTL iha kurtel Jeral Kaikoli Dili Segunda (19/06).

Komisariu Faustino haktuirtan katak Asidente Trafiku ne’e akontese tanba kondutor lori kareta ho kondisaun tua lanu todan depois tula familia tanba kontente demais ikus mai akontese asidente.

Polisia rezistu ona kazu ne’e hodi prosesa ba Ministeriu Publiku no prosesu tuir mai depende vitima nia familia ho suspeitu tanba sira familia deit.

Maioria kazu asidente trafiku ne’ebe maka akontese ass liu iha Dili, Liquica, Baucau no Oe-Cusse.

Alende ne’e PNTL mos rezista kazu krime ordinariu hamutuk 11 tanba hemu tua lanu no lakon kontrolu nune’e halo asaltu ba familia balu, kazu hirak ne’e prosesu hela.

Komandu orenta nafatin atu hotu-hotu halao servisu no atende kazu hirak ne’e hodi prosesu no rezistu ba Ministeriu Publiku nudar titular ba asaun penal. Media PNTL

Dili- Polisia Nasional Timor-Leste (PNTL) prontu asegura seguransa ba kampaña Parlamentar ne’ebe maka halao iha loron 20 Juñu to’o 19 Jullu

Segundu Komandante Jeral PNTL Komisariu Faustino da Costa hateten PNTL simu ona orariu kampaña no Komandu Jeral fo ona orentasaun ba Komandante munisipiu nomos komandante Unidade Espesial Polisia(UEP), Unidade Polisia Fronteira (UPF) no Unidade Polisia Maritima (UPM) atu asegura seguransa durante kampaña, Nia hato’o asuntu ne’e hafoin dirizi enkontru semanal hamutuk ho Komandante munisipiu, Unidade no superior PNTL iha Kuartel Jeral Kaikoli Dili Segunda (19/06).

Komisariu ne’e haktuirtan katak PNTL halo ona preparasaun maximu atu koloka forsa polisial iha fatin hirak ne’ebe maka Partidu boot sira sei inisia kampaña iha munisipiu Lospalos, Covalima no Liquica tuir orariu kampaña ne’ebe maka CNE fo sai.

Komandu fo sai ona diretiva operasional liu-liu ba fatin ne’ebe identifika risku ba konflitu Unidade sira sei fo apoiu seguransa maximu.

Partidu politiku hamutuk 21 maka rezistratu iha Tribunal Rekursu atu kompete iha  Eleisaun Parlamentar ne’ebe maka sei halao iha loron 22 Jullu 2017 Media PNTL.

Dili-Komandu Jerál Polísia Nasional Timor-Leste (PNTL) estabelese Gabinete Assesoria Juridiku ne’ebe hetan apoiu husi parseiru desenvolvimentu TLPDP (Timor Leste Police Development Program) hamutuk ho AFP (Australia Federal Police), atu bele fornese informasaun no konsellu kona-ba Legislasaun, Regulasaun no Prosedimentu relevante sira seluk.

Inspetór Jerál PNTL Superintendente Xefe Carlos Jerónimo ne’ebe reprezenta Komandu Jerál iha nia intervensaun hateten ho estabelesimentu Gabinete Juridiku ida ne’e PNTL sente orgullu tanba foun-foun hari’i gabinete ne’e, laiha buat ida maka bele suporta servisu gabinete nian, maibé ho lansamentu ida ne’e bele ajuda ona servisu PNTL nian iha area juridiku.

“Material sira ne’ebe iha gabinete ne’e nia laran apoiu mai duni husi TLPDP, ita espera apoiu sira ne’e hotu bele fó assesoria diak ba iha Komandante Jerál no Segundu Komandante Jerál”, hateten Inspetór Jerál PNTL.

Superintendente Xefe Carlos Jerónimo haktuir konkluzasaun katak apoiu sira ne’e labele to’o deit iha ne’e, maibé PNTL sei husu nafatin karik iha nesesidade ruma no lori Komandu Jerál PNTL nia naran hakarak agradese esforsu tomak ne’ebe governu Australia fó liu husi TLPDP.

Iha fatin hanesan Komandante TLPDP Geoff Turner iha nia intervensaun hateten TLPDP orgullu tebes hodi apoiu estabelesimentu Gabinete Assesoria Juridika PNTL ida ne’e.

“Ida ne’e hanesan inisiativa importante ida ba PNTL no mós ba nia parseiru desenvolvimentu sira hodi bele fornese informasaun no konsellu kona-ba Legislasaun, Regulasaun no Prosedimentu relevante sira”, tenik Komandante TLPDP.

Geoff Turner haktuir liu tan katak estabelesimentu Gabinete Assesoria Juridika ida ne’e hanesan aspeitu importante ida ba sustentabilidade no independensia PNTL nian. Iha konkluzasaun, TLPDP iha esperansa atu Gabinete Assesoria Juridika ida ne’e hetan susesu absoluta iha nia aspeitu hotu-hotu.

Partisipa iha lansamentu ne’e Inspetór Jerál, ofisias Superior no ekipa TLPDP.

Media PNTL.  

Dili- Polisia Nasional Timor-Leste (PNTL) rezista ema nain 37 mate tanba asidente trafiku ne’ebe maka akontese durante fulan Janeiru to’o Juñu tinan 2017.

Segundu Komandante Jeral PNTL Komisariu Polisia Faustino da Costa hateten durante fulan Janeiru to’o 8 de Juñu 2017 PNTL rezista kazu asidente trafiku hamutuk 812, ne’ebe rezulta  kanek kmaan 793, kanek todan 173 no mate nain 37, Nia hato’o asuntu ne’e ba jornalista sira iha Kuartel Jeral PNTL Kaikoli Dili.

Komisariu ne’e haktuirtan katak kazu ne’ebe rezulta vitima kanek todan no mate nia prosesu legal rezista iha Ministeriu Publiku no kontinua prosesu legal ba Tribunal hodi foti desijaun.

“Komandu PNTL informa ona situasaun ne’e ba Prezidente Republika katak asidente trafiku situasaun ida ne’ebe ita presiza atu hare laos PNTL deit maibe presiza kontribuisaun no kolaborasaun husi parte hotu,” dehan Komisariu Faustino.

Kazu asidente trafiku ne’ebe maka akontese tanba fator neglijensia humana tanba ne’e kampaña prevensaun no sosializasaun Lei Tranzitu Seguransa Rodoviaria liu husi media inportante no bele salva ema nia vida. Media PNTL

Dili-Komandante Polísia Nasional Timor-Leste (PNTL) husi munisipiu 13 husu ba parseiru desenvolvimentu Timor Leste Police Development Program (TLPDP) atu apoio Kursu lingua ba membru PNTL sira iha munisipiu.

Segundu Komandante Jerál PNTL Komisariu Polísia Faustino da Costa sexta semana kotuk (09/06) hafoin partisipa iha enkontru avaliasaun apoio servisu TLPDP mai PNTL hateten preukupasaun hirak ne’e komandante munisipiu sira hato’o tanba durante ne’e membru sira menus koñesimentu ba lingua ofisial Português no lingua Inglês.

“Problema ita nian mak ne’e, será que Komandante munisipiu sira kada semana tenke mai tuir formasaun iha Dili, ne’e gastu oinsa no viagem ba mai, parseiru nia pesoal mós limitadu, sera que parseiru sira tenke koloka pesoal iha kada munisipiu atu hanorin lian Português no lian inglês, hau hanoin ida ne’e kestaun ida ita tenke hare’e”, tenik Segundu Komandante Jerál PNTL.

Komisariu Polísia Faustino da Costa akresenta katak atu hatan ba kestaun ne’e maka Komandu orienta ona Centro Formação Polícia (CFP) atu bele tau iha Planu Asaun Annual ida atu oinsa iha tinan tuir mai bele iha kursu ruma, hanesan kursu ba lingua português semana hira ba membru na’in hira nune’e mós kursu ba lingua ingles atu nune’e wainhira membru ida mai partisipa, remata kursu hotu bele fila fali ba munisipiu.

Atu bele responde ba preukupasaun husi Komandu Munisipiu sira, maka Komandu jerál sei prepara Planua Asaun Annual ida atu oinsa maka bele realiza Kursu refere iha nasional hanesan iha CFP ou iha Kuartél Jerál, hafoin maka hare’e fila fli apoiu saida maka ita presija husi parseiru sira kona-ba pesoal ne’ebe maka sei hanorin lingua português no lingua ingles.

Media PNTL.      

Dili-Formasaun eskolar ba kursu Sarjentu Polísia Nasional Timor-Leste (PNTL) iha sexta semana kotuk (09/06) remata hafoin instruindu sira kompleta formasaun durante fulan hitu hahu’u husi fulan Dezembru tinan 2016 to’o fulan Juñu tinan 2017, loron 12/06 Instruindu sira sei halo pratika exersisiu durante fulan rua (2).

Komandante Centro Formação Polícia (CFP) Superintendente Arquimino Ramos hafoin partisipa iha enkontru avaliasaun apoio servisu TLPDP mai PNTL hateten hafoin formasaun eskolar, sei halo mós abertura ba formasaun exersisiu no Instruindu sira sei koloka ba idak-idak nia munisipiu no unidade idak-idak ne’ebe sira mai.

Durante formasaun exersisiu fulan rua (2), Instruindu sira sei halo pratika ba materia sira Môdulu nian mak hanesan Môdulu Sosio Komprimental, Môdulu Jurídiku, Môdulu Tékniku Profesional no Môdulu Taktikal Polisiamentu nian. Além de materia kona-ba Môdulu nian, durante fulan hitu (7) Instruindu sira mós aprende kona-ba Komandu no Lideransa, atu prepara Instruindu sira atu nsai Komandu seksaun, komandu Peltaun, komandu eskudra sira tuir Lei Organika PNTL nian no Regime Promosaun nian.

“Tanba razaun logistika ita haruka sira fila ba idak-idak nia munisipiu to’o loron 28 fulan Jullu, sira fila fali iha CFP atu halo preparasaun ba graduasaun, Instruindu PNTL hamutuk 114 fila fali ba idak-idak nia fatin no Instruindu hamutuk na’in hitu (7) husi nasaun Comunidade dos Países da Língua Portuguesa (CPLP) koloka deit iha CFP”, hateten Komandante CFP.

Superintendente Arquimino Ramos subliña katak tanba sira laiha poder polísial iha ne’e (Timor-Leste) Instruindu hamutuk na’in hitu husi nasaun CPLP ne’e, CFP deside ho aprovasaun husi Komandante Jerál PNTL nian hodi koloka deit iha CFP, tanba wainhira maka ita koloka sira ba iha munisipiu, sira labele atúa karik mosu situasaun ruma. Iha formasaun exersisiu ne’e, Instruindu sira sei halo pratika ba teoria sira ne’ebe maka durante fulan hitu (7) sira aprende iha kursu. Media PNTL.           

Dili-Komandu Polísia Nasional Timor-Leste (PNTL) iha sexta ne’e (09/06) hamutuk ho parseiru dezenvolvimentu hala’o enkontru ida ho Timor Leste Police Development Program (TLPDP) hodi halo avaliasaun ba servisu ne’ebe halo durante tinan 2016-2017 ba PNTL.

“Ita hotu hatene katak PNTL desde 2014 iha ninia Planu Estratejiku ne’ebe defini area objetivu estratejiku ne’ebe presija ita atu atinji iha tinan 2018 iha ne’ebe Komandante PNTL munisipiu sira presija   akompaña no mós apár”, tenik Segundu Komandante Jerál PNTL.

Komisariu Polísia Faustino da Costa subliña liu tan katak husi area objetivu hirak ne’e, iha balun maka durante ne’e suporta no apoio husi parseiru sira hanesan TLPDP mai iha PNTL, tanba durante tinan sanulu-resin ba kotuk to’o oras ne’e PNTL hetan suporta maka’as husi TLPDP ho area oin-oin.

“Durante ne’e ita hetan apoio maka’a husi TLPDP iha area kapasitasaun, formasaun, suporta mós meius de apoiu ba insitituisaun PNTL, halo mós manutensaun ou reparasaun ba iha ekipamentus hanesan transporte inklui ita nia edifisiu balun ne’ebe TLPDP halo la se’es husi objetivu estratejiku lima ne’ebe defini ona”, hateten Komisariu Polísia ne’e.

Komandu Jerál PNTL apela ba Komandante Munisipiu sira atu bele aproveita didiak suporta no apoio programa sira ne’ebe maka TLPDP apoiu ba iha ita nia atendimentu públiku no aproveita atu bele dezenvolve liu tan area sira liu-liu hanesan area investigasaun, formasaun ba polísia komunitaria, IT atu it abele halo atendimentu diak liu tan.

Programa no area sira ne’ebe maka durante tinan 2016/2017 parseiru TLPDP halo ba iha membru PNTL sira hodi halo atendimentu ba iha komunidade sira, maka hanesan Formasaun, Projetu Lideransa no Jestaun, Sistema Jestaun Insidente, Ofisial Ligasaun Polísia, Polisiamentu Jerál, Servisu Informasaun Polísia, Jéneru, Governasaun no Krime Transnasional.

Iha sorumutu ne’e halo mós despedida ba iha Komandante TLPDP sesante Paul Dickinson ba iha Komandante foun Geoff Turner hodi assume kargu ba tinan 2017-2018. Partisipa iha enkontru ne’e Segundu Komandante Jerál PNTL, parseiru TLPDP no Komandante PNTL munisipiu 13.

Media PNTL.

Dili- Komandu Polisia Nasional Timor-Leste (PNTL) munisipiu Bobonaro kaptura ona suspeitu nain 11 ne’ebe maka diskumfia involve iha kazu asaltu malu iha suku Holsa postu Administrativu Maliana hodi submete ba prosesu investigasaun.

Komandante PNTL munisipiu Bobonaro Superintendente Xefe Armando Monteiro hateten Suspeitu nain 11 ne’ebe maka PNTL kaptura oras ne’e dadaun iha sela detensaun Komandu PNTL munisipiu Bobonaro hodi submete ba prosesu investigasaun, Nia hato’o asuntu ne’e hafoin partisipa workshop prepasaun Eleisaun Parlamentar iha Hotel Ramelau Aimutin Dili (08/06).

Komandante Monteiro haktuirtan katak hafoin investigasaun sei submete ba Ministeriu Publiku hodi halo interogatoriu nune’e suspeitu sira responsabiliza ba hahalok ne’ebe sira komtete tuir lei Nu.5/2017.

Kazu asaltu malu ne’e akontese iha (07/06)  ho motivu Grupu Arte Marsiais (GAM) PSHT, IKS no komunidade babain iha diferensia opiniaun no ideolojia afilia ba organijasaun partidu, iha tempu hanesan ne’e nakonu ho emosaun entaun la simu ideia no ideolojia ida ne’e hodi halo konflitu ne’ebe rejulta vitima balu kanek no komunidade nia uma no sasan hetan estragus

Komandu PNTL munisipiu Bobonaro halo patrulamentu konjuntu hamutuk Batelaun Ordem Publika (BOP) no F-FDTL hodi neutralija situasaun, iha operasaun ne’e Polisia prende sasan evidensia hanesan fardamentu, sasan kroat no atributu Arte Marsiais hare ba evidensia hirak PNTL foti Autonotisia halo auto aprensaun no auto Flagrante Delitu no tama kedas auto detensaun..

PNTL nia prezensa halo atuasaun hodi asegura vitima hodi halo evakuasaun mai Komandu no hetan asistensia saude  no suspeitu sira oras ne’e dadaun iha sela detensaun hodi hein prosesu kontinuasaun ba hahalok ne’ebe maka sira halo.

“ Situasaun oras ne’e daudaun lao normal maibe presiza vijilansia ho seguransa patrulamentu intensivu hodi prevene ba problema kontinuasaun,” dehan Komandante Monteiro.

Kazu ne’e akontese iha suku Holsa no kontinua ba suku Odomau ne’ebe maka konsidera hanesan fatin konsentrasaun no risku ba konflitu PNTL identifika ona fatin hirak ne’e no halo patrulamentu tanba sempre iha provokasaun no ajitasaun husi GAM ne’ebe maka taka tia ona. Media PNTL