Uncategorized

Dili- Membru Batelaun Ordem Publika (BOP) nain 39 simu graduasaun hafoin remata kursu formasaun baziku Manutensaun Ordem Publika iha Unidade Espesial Polisia (UEP).

Komandante Jeral PNTL Komisariu Polisia Julio da Costa Hornay hateten kursu formasaun baziku ne’e hanesan kultura bainhira membru foun integra iha Unidade ne’e tenke simu treinamentu espesial ba Unidade ida ne’e nian, Komandante Hornay hato’o asuntu ne’e hafoin graduasaun ba membru BOP iha Kuartel UEP Bairo-Pite Dili Kinta (30/03).

Nia haktuirtan katak ajente BOP nain 39 ne’ebe simu graduasaun ohin sei reforsatan efetivu Unidade Espesial liu-liu iha BOP hodi asegura Eleisaun Parlamentar no atividade sira seluk ne’ebe maka presija sira nia apoiu.

“Atu fasilita servisu UEP nian Komandu Polisia Nasional Timor-Leste sosa ona ekipamentus no hein katak sei to’o mai iha tempu besik hodi distribui ba membru sira hodi fasilita sira nia servisu.”

Formasaun sai papel fundamental ba PNTL, kursu formasaun Manutensaun Ordem Publika ne’e kursu espesial ba Polisia atu kontrola disturbiu sivil iha ambitu misaun mantein no reestabelese ordem publika hodi dezenvolve kompetensia no komportamentu ne’ebe espesifiku ba halao funsaun.

Iha okajiaun ne’e komandante UEP Superintendente Xefi Afonso dos Santos hateten ajente nain 39 ne’e tuir kursu formasaun baziku no formasaun ordem publika durante fulan rua (2) no formador sira husi GNR no Instrutor UEP, tuir tradisaun formasaun ba UEP halao durante fulan tolu (3) no kontinua formasaun durante semana 6 ba Ordem Publika.

Nia reforsatan katak hafoin graduasaun ajente hirak ne’e sei halao servisu iha UEP no kolokadu iha Peltaun de Apoiu no wainhira Eleisaun Parlamentar hotu maka sei fahe ba kompania Bravo  Baucau no kompania Delta Bobonaro.

Tuir Planu Komandu EUP maka tenke aumenta efetivu kompletu iha BOP hodi kompleta kompania hat (4) nia membru kata kompania membru 100 resin maibe numeru efetivu ne’ebe maka iha oras ne’e daudaun sufsiente atu responde bainhra estadu presija.

Enseramentu kursu formasaun baziku ba ajente BOP ne’e kompleta ho atrasaun Teknika Manutensaun Ordem Publika hanesan Patrullamentu, Anti Terorista, Operasaun Tubulares no Inativasaun Armas Esplusivu.

Serimonia graduasaun ne’e partisipa husi komandante Administrasaun Superintendente Xefi mateus Fernandes, Segundu komandante CFP Superintendente Asistente Emilio dos Santos instructor GNR, komvidadus, familia graduadu no membru UEP. Media PNTL

Dili- Estadu Timor-Leste kondekora instituisaun Polisia Nasional Timor-Leste PNTL ho Medalha Ordem de Timor-Leste ne’ebe maka hala’o servisu seguransa ba povu no nasaun hodi asegura seguransa públika.

Prezidente Republika Taur Matan Ruak hateten Kondekorasaun ne’e nudar rekoñesementu estadu ba instituisaun seguransa ne’ebe maka loro-loron koopera no servisu makaas hodi hametin seguransa iha rai laran, hametin legalidade demokratika, tane ass no asegura identidade nasional liu husi kapasidade hodi servi nasaun no povu, Nia hato’o asuntu ne’e liu husi deskursu ba serimonia aniversariu PNTL iha Centru Formasaun Polisia Comoro Dili Segunda (27/03).

Taur haktuir tan katak rekoñesementu Publiku ne’ebe maka hau fo iha serimonia ida ne’e hodi kondekora instituisaun ho Colar Ordem de Timor-Leste no Presigna ba Estandarte Nasional hanesan sentimentu gratidaun ida ne’ebe justu hodi fo rekoñesmentu ba PNTL.

“ Hau hato’o agradesementu ba PNTL ne’ebe simu dever no disponibilidade maka’as atu proteje no servi sidadaun no nasaun ho profesionalismu no dedikasaun”

Iha okajiaun ne’e PR kondekora mos Komandante Jeral PNTL Komisariu Polisia Julio da Costa Hornay ho medalla Ensigna de Ordem Timor-Leste ba servisu ne’ebe nia presta ona ba nasaun iha Komandu Jeral PNTL.

Prezidente Republika kondekora mos Ofisiais Superior PNTL nain 19 ho medalla de Servisus Distintos grau Ouro no Medalla de ordem Servicos Distintos grau Prata ba inspector, Sarjentu no Ajente Xefe nain 12.

Kondekora mos Vice-Ministru Administrasaun Estatal Tomas do Rosario Cabral ho Medalla de Mérito de Segurança Públika 1^a klase no Medalla de Mérito de Segurança Públika 4^a klase ba Primeiro-Sarjentu das F-FDTL Celestino fraga no Ajente-Chefe Nelson Carlos Amaral.

Iha okajiaun ne’e Prezidente Republika mos kondekora sidadaun nasional no estrajeiru ne’ebe maka kontribui ba servisu seguransa hanesan Superintendente Paul Jorge Dickinson Polisia Federal Australia, Superintendente Kevin joseph brenan Polisia Nova Zelandia, major Felisberto Antonio M.P. Contente GNR no kompania TELEMOR.

Serimonia kondekorasaun ne’e kompleta ho kondekorasaun Medalla de Komportamentu Exemplar ba Inspetor Lucia de Fatima Ximenes, Sarjentu Domingos Maia no Ajente-Chefe Albertino das Neves.

Serimonia Aniversariu PNTL ba dala 17 ne’e Partisipa husi Primeiru Ministru, Ministru Interior, Ministru Defeza, Maijor General F-FDTL, Prokurador Jeral Republika(PJR) Jose da Costa Ximenes, Reprezentante Prezidente parlamentu Nasional, reprezentante Prezindente Tribunal Rekursu, membru governu, Korpu Diplomatiku, parseiru desenvolvimentu PNTL, Konvidadu, membru PNTL no familia tomak. Media PNTL

Dili- Ex Prezidente Republika Jose Ramos Horta rekoñese durante tinan 17 Polisia Nasional Timor-Leste (PNTL) atinji progresu, profesionalismu, ekipamentus no infrastrutura diak liutan.

Nudar Ex Prezidente Republika hau kontente ho prestasaun servisu PNTL nian hodi hamenus kriminalidade tanba Polisia nia intervensaun no prevensaun maibe tenke hadia diak liu tan no hakaas aan nafatin atu Polisia orgullu iha Timor no sai modelu ba nasaun seluk, Horta hato’o asuntu ne’e hafoin partisipa iha serimonia aniversariu PNTL iha Centru Formasaun Polisia Komoro Dili.

Horta haktuir tan katak atu dezenvolve Polisia diak liu tan hodi asegura seguransa ba povu no nasaun tenke halo prevensaun kontra krime organizadu liu husi kooperasaun servisu hamutuk ho entidade seluk hanesan Prokuradoria Jeral da Republika tanba krime organizadu hanesan Droga, Prostituisaun, Money Laundry, Terorismu no Krime seluk ne’ebe maka perigoju ba nasaun.

Hau hatene Polisia no Polisia Sientifika Investigasaun Kriminal ho apoiu husi nasaun vijinu hanesan Portugal, Australia, Singapura no Indonezia diak liu tan maibe amiasa hirak ne’e permanente no ita labele taka matan no labele toba.

Parabens ba PNTL no tenke kontinua servisu maka’as liu tan, parabens ba sira ne’ebe simu kondekorasaun no promosaun . Media PNTL

Dili, Polísia Nasional Timor Leste iha loron 27 fulan Marsu tinan 2017 selebra nia aniversariu ba dala XVII iha Centro Formação Polícia (CFP) Comoro ne’ebe hahu’u ho serimonia Inspesaun ba Força Parada husi Presidente Repúblika Timor Leste Taur Matan Ruak.

Polísia Nasional Timor Leste hanesan insituisaun seguransa ida ne’ebe garante Lei, ordem no Demokrasia iha Timor Leste hetan apresiasaun husi Presidente Repúblika hodi kondekora ho Colar de Timor Leste. Iha Serimonia ne’e mós fó Kondekorasaun ba Komandante Jerál PNTL, Promosaun ba ofisias, Sarjentu no Ajente Prinsipal ba dedikasaun ne’ebe kontribui ona mai iha instituisaun PNTL durante ne’e.

Komandante Jerál PNTL Komisariu Julio da Costa Hornay iha nia diskursu ba serimonia ne’e agradese ba apoio tomak husi Primeiru Ministru no Ministru Interior mai iha PNTL durante ne’e, iha servisu ida ne’ebe difisil ba ita nia seguransa.

“Polisia Nasional Timor Leste ohin festeja nia tinan ba dala 17, durante periodu ida ne’e instituisaun PNTL lao hamutuk ho transformasaun ita nia sosiedade, buka atu servi ba públiku tuir prinsipiu ne’ebe hatu’ur iha Konstitusaun RDTL katak atu defende legalidade demokrátika no garante seguransa sidadaun sira nian ho apartidaria no la inklina ida ne’e ou ida ne’eba”, tenik Komandante Jerál PNTL.

Komisariu Julio da Costa Hornay mós iha nia diskursu agradese no sente onradu ba presensa kovidadu sira nian iha selebrasaun loron istoriku PNTL nian.

“Ami sente onradu tanba ita bo’ot sira bele mai hola parte iha ami nia selebrasaun loron istoriku ida ne’e, hodi familia PNTL tomak nia naran, hato’o ami nia agradesimentu no amizade”, aprsesia Komisariu Julio da Costa Hornay.

Iha fatin hanesan, Presidente Repúblika Taur Matan Ruak ne’ebe partisipa mós iha serimonia ne’e, iha nia diskursu fó saudasaun espesial ba Polísia Nasional Timor Leste no sivil tomak ne’ebe durante ne’e koopera hodi hametin seguransa iha rai laran.

“Hanesan legalidade Demokratiku tane ass no asegura ita nia identidade nasional liu husi sira nia kapasidade hodi servi ita nia rai no ita nia povu”, tenik Presidente Repúblika.

Taur Matan Ruak mós hato’o parabens ba povu tomak nia partisipasaun iha eleisaun Presidente nian foin lalais ne’e, ne’ebe lao hakmatek no tuir ordem.

“Klima seguransa so bele sai posibel tanba kna’ar importante ne’ebe hala’o husi PNTL no hamutuk ho F-FDTL no kontribuisaun husi ita nia povu hodi asegura ambiente ida ne’ebe nakonu ho hakmatek, independensia no neutralidade”, hateten Presidente Repúblika.

Partisipa iha serimonia ne’e Presidente Republika, Primeira Dama, Primeiru Ministru, Ministru Interior, Ministru Defesa, Maijor General F-FDTL, membru governu, deputadus Parlamento Nasional, embixadores, parseiru desenvolvimentu PNTL, konvidadus, membru PNTL no familia tomak.

Media PNTL.

Dili- Bispu Diocese Baucau halo retiru reflesaun ba funsionariu diresaun sivil husi Ministeriu Interior no Polisia Nasional Timor-Leste hodi moris ho mensajen quaresma nian hanesan sarani.

Don Basilio do Nacimento hateten hau koalia ba sira hanesan sarani ne’ebe halao knaar iha area seguransa no husu ba sira atu servi povu no nasaun tuir lei no ordem ho prespetiva sarani nian. Nia hato’o asuntu ne’e hafoin retiru reflesaun iha kapela Santo Antonio Colejiu Comoro Dili Sexta (24/03).

Nudar nasaun foun sei falta buat barak maibe durante restaurasaun independensia tinan 15 nia laran hari instituisaun sira no neneik-nenenik koko hadia nia aan no ita hatene katak wainhira hahu buat hotu la perfeitu maibe ho intelijensia ema nian buka atu halo perfeitu

Iha okajiaun ne’e Ministru Interior Longuinhos Monteiro hateten liu husi retiru ne’e ita halo reflesaun ba prinsipiu no valor nudar sarani no nudar servidor estadu, reflesaun ne’e orienta ita atu kompriende dever no obrigasaun institusional.

“Polisia no servidor estadu tenke hatene katak nudar servidor estadu ita kaer prinsipiu no valor fundamental 3 maka Disiplina, Servi no Onra ne’ebe sai mata dalan atu valoriza ita nia prestasaun servisu, ”dehan ministru Interior.

Atu termina Ministeru Interior hato’o agradese ba Amo Bispu Don. Basilio ne’ebe disponibilija tempu hodi halo reflesaun ne’ebe maka hare iha kontekstu filosofia no psikolojia ne’ebe inpostante ba funsionariu no Polisia sira atu partisipa.

Retiru reflesaun ne’e partisipa husi Efetivu Kuadru no Diresaun tutela iha Ministeriu Interior, Komandante Jeral PNTL no Segundu Komandante Jeral PNTL, Inspetor Jeral, Komandante PNTL husi munisipiu 13 no Superior PNTL. Media PNTL

Dili- Povu maka sente no avalia servisu Polisia Nasional Timor-Leste (PNTL) nudar instituisaun seguransa ho misaun prinsipal atu salva guarda povu no nasaun ho nia rikusaun tomak tanba ne’e satisfasaun povu nian nudar sasukat ba suksesu PNTL.

Komandante Jeral PNTl Komisariu Polisia Julio da Costa Hornay hateten povu maka sente no avalia servisu PNTL nian durante nia ejistensia durante tinan 17 hodi asegura seguransa ba povu no nasaun nia hato’o asuntu ne’e hafoin retiru reflesaun iha kapela Santo Antonio Colejiu Comoro Dili.

Komandante Jeral ne’e haktuirtan katak PNTL iha nia vizaun ba futuru hakarak povu Timor-Leste moris hakmatek iha ambiente paz no estabilidade hodi halao ida-idak nia moris ho livre no seguru iha nasaun ida ne’e

Entretantu Ministru Interior Longuinhos Monteiro hateten PNTL nia suksesu la sukat ho kuantidade maibe sukat ho dignidade no valorijasaun ne’ebe povu fob a polisia ida ne’e sai hanesan indikasaun ba susesu PNTL nian.

Sukssesu misaun Polisia nian laos Komandante Jeral ou Ministru Interior mak sukat no desidi maibe hare ba levantamentu apresiasaun ne’ebe mai husi Komunidade boot teb-tebes katak Polisia nia knaar inportante atu asegura seguransa.

Entretantu Bispu Diocese Baucau Don Basilio do Nacimento hateten maske ho difikuldade no dezafiu oi-oin maibe PNTL koko ho meius ne’ebe maka iha hodi halo servisu seguransa. Media PNTL

Dili- Bispo Diocese Dili Don Virgilio Do Carmo sei prezidi misa ba loron aniversariu PNTL dala-17 iha Kapela Santo Antonio Colejiu Comoro Dili.

Prezidente komisaun organizadora ba aniversariu PNTL Superintendente Xefe Carlos Almeida S. Jeronimo hateten selebrasaun loron aniversariu PNTL dala 17 (27/03/2000-27/03/2017)  ho tema “Ho Aniversariu ba dala 17 PNTL sei garante Lei, Ordem no Demokrasia iha Timor-Leste “ komemora ho atividade misa agradesementu ne’ebe maka halao iha loron Domingu 26 no prezidi husi Bispu Diocese Dili hafoin misa sei kari aifunan iha monumentu PNTL, hato’o asuntu ne’e ba jornalista sira iha Kuartel Jeral PNTL Kaikoli Dili Kinta (23/03).

Atual Inspetur Jeral ne’e informatan katak iha loron 27 de Marsu sei halo serimonia aniversariu ho programa hanesan Promosaun Diviza por Antividade no Kondekorasaun Colar de Meritu ba PNTL ne’ebe maka sei fo husi Prezidente da Republika.

Alende ne’e Ministru Interior mos organiza Retiru ba PNTL ne’ebe maka sei halao iha Kapela Santo Antonio Colejiu aban (24) ba membru PNTL no funsionariu Ministeriu Inerior

Oras ne’e daudaun preparasaun ba selebrasaun ne’e atinji ona %50 membru sira komesa halo formatura hodi koloka membru sira tuir formatu ne’ebe maka prepara ona.

Aniversariu ne’e sei partisipa husi komvidadus sira hanesan Embaxador sira no Parseru Dezenvolvimentu. Media PNTL

Dili, ohin loron 20 fulan Marsu, povu tomak iha nasaun Timor Leste partisipa iha Eleisaun Prezidensial hodi kumpri sira nia direitu nu’udar sidadaun atu fó votu ba kandidatu Prezidensial tinan 2017-2022.

Polísia Nasional Timor Leste (PNTL) hanesan instituisaun seguransa nian ne’ebe asegura Sentru Votasaun hotu iha teritoriu laran kumpri dever ida ne’e, maka Komandu Jerál PNTL hatun efetivu membru tomak nian hodi fó apoio seguransa ba membru PNTL munisipiu.

Komandante Jerál PNTL iha loron eleisaun ne’e, hala’o fiskalizasaun ba iha sentru votasaun iha kapital Dili, iha ne’ebe membru husi Komandu Jerál no Centro Formação Polícia (CFP) ne’ebe la envolve seguransa direta ba munisipiu, fó apoio ba membru liu husi mekanismu monitor situasaun seguransa iha sentru votasaun.

Komisariu Julio da Costa Hornay hafoin halo observasaun ba sentru votasaun balun iha kapital Dili hateten situasaun aktual seguransa eleisaun prezidensial ba tinan 2017 lao ho diak, komunidade tomak ho antusiazmu partisipa iha festa Demokrasia ida ne’e.

“To’o ohin loron situasaun eleisaun prezidensial tinan 2017 lao ho diak, iha kapital Dili ohin ita observa sentru votasaun hotu-hotu lao ho diak, komunidade tomak antusiazmu hodi forma atu fó sira nia votu, nune’e informasaun hotu husi Komandu Munisipiu sira hato’o mai katak buat hotu lao diak no kontroladu”, tenik Komandante Jerál PNTL.

Nai ulun PNTL ne’e, iha biban ne’e mós apela ba povu tomak, “Hanesan Komandante Jerál ne’ebe responsabiliza ba seguransa, hato’o ba komunidade tomak atu bele ho konsiensia rasik katak rai ne’e ita nian, nune’e ita hotu-hotu iha dever no hanoin atu asegura estabilidade no paz iha rai ida ne’e, liu-liu ba loron ohin eleisaun ida ne’e”.

Media PNTL.

Dili- Forsa Seguransa Eleisaun Prezidensial Polisia Nasional Timor-Leste (PNTL) ohin ofisialmente desloka ba munisipiu 13 hodi fo seguransa ba Eleisaun Prezidensial iha loron 20 Marsu.

Komandante Jeral PNTL Komisariu Polisia Julio da Costa Hornay hateten Komandu PNTL koloka efetivu nain 600 resin husi Kontijente Jeral, UEP, UPM no UPF hodi reforsa efetivu iha munisipiu sira atu fo seguransa maximu ba Eleisaun Prezidensial, hato’o asuntu ne’e iha serimonia deslokasaun forsa seguransa eleisaun iha Kuartel jeral PNTL Kaikoli Dili Sabadu (18/03).

Iha nia deskursu Komandante Jeral husu ba membru sira atu mantein seguransa iha sentru votasaun ne’ebe maka Sekretariadu Tekniku Administrasaun Eleitoral (STAE) determina ona no halao servisu seguransa ho responsabilidade maximu ba misaun ne’ebe maka ita boot sira halao hodi fo susesu ba eleisaun ida ne’e.

“ Husu ba membru sira ne’ebe maka determinadu iha Sentru Votasaun atu sakrifika aan no mantein disiplina hodi manan komfiansa husi estadu, governu no mundu Internsional katak PNTLmos bele”.

Alende asegura seguransa iha Sentru Votasaun nudar sidadaun PNTLmos iha direitu atu vota tanba ne’e PNTL fo ona membrus sira nia naran ba STAE iha Sentru Votasaun ne’ebe maka sira koloka ba maibe la autoriza lori arma.

Deslokasaun forsa seguransa ne’e apoiu ho kareta husi Komandu 24 no aluga kareta 40 atu fo apoiu deslokasaun ba munisipiu no uza ba seguransa eleisaun ne’ebe maka sei jere no responsabilija husi Komandante munisipiu.

PNTL iha Forsa rezerva husi Unidade Espesial Polisia (UEP) ne’ebe preparadu atu fo apoiu bainhira iha perturbasaun ruma, alende ne’e F-FDTL liu husi servisu emkordenasaun prontu fo apoiu ba PNTL bainhira presiza.

Serimonia parada desloksaun forsa seguransa eleisaun ne’e prezidi husi Komandante Jeral akompana husi Segundu Komandante Jeral no partisipa husi Komandante PNTL munisipiu 13, Komandante Unidade, Ofisiais, Sarjentu no Ajente PNTL. Media PNTL

Dili- Atu prevene asidente no insidente iha loron ikus kampaña Eleisaun Prezidensial Polisia Nasional Timor-Leste (PNTL) reforsa seguransa iha kapital Dili no munisipiu Liquica.

Segundu Komandante PNTL munisipiu Dili Superintendente Asistente Euclides Belo hateten PNTL tenke garante seguransa ba kampaña ba dala ikus iha Tasi Tolu Dili ba Kandidatu Prezidente Republika Francisco Guterres numeru sorteiu 2 no kampaña kandidatu Antonio da Conceicão “Kalohan” numeru sorteiu 8 ne’ebe maka halao iha munisipiu Liquica, Nia hato’o asuntu ne’e iha Rotunda Prezidente Nicolau Lobato Dili.

Komandante Euclides haktuirtan PNTL tenke garante katak apoiantes sira tenke lao no kumpri regras tranzitu hodi evita asidente no insidente ne’ebe ita la espera atu akontese.

“Komandu PNTL husu nafatin disiplina husi apoiantes no militantes hirak ne’ebe maka tuir kampaña atu labele mosu konflitu, PNTL prontu hodi asegura seguransa ba militante sira”.

Durante operasaun iha dader laiha violasaun grave ruma ne’ebe maka akontese mesmu iha apoiantes balu maka kontra regras tranzitu.

PNTL koloka numeru efetivu ne’ebe boot husi Komandu PNTL munisipiu Dili no apoiu husi Unidade Espesial Polisia (UEP) no UPM.

Iha loron hakmatek (18 no 19) PNTL sei kopera no asegura seguransa ba ekipa lojistika kandidatu Prezidente Republika nain 8 atu hasai pamfletu no propaganda politika.

Tuir observasaun journalista iha terrenu nota katak hahu dader to’o lorokraik membru PNTL sira alerta, halo patrula lao ain no halo seguransa iha kapital Dili hahu iha Palasiu to’o Tasi Tolu. Media PNTL