Uncategorized

Dili- Trimestre primeiru (Janeiru-Marsu ) tinan 2017 asidente trafiku rezulta ema nain 17 mate no nain 352 kanek todan no kmaan.

Segundu komandante Jeral PNTL Komisariu Polisia Faustiona da Costa hateten iha trimester primeiru tinan 2017 PNTL rezista kaze asidente trafiku hamutuk 434 husi total kazu ne’e rejulta ema nain 17 mate no nain 352 kanek todan no kmaan, hat’o asuntu ne’e iha Kuartel Jeral PNTL Kaikoli Dili Segunda (13/03).

Komisariu Faustino esplika katak asidente ne’ebe akontese maka hanesan kareta soke motor, kareta monu mesak, motor monu mesak (asidente tunggal) kareta ho kareta soke malu no kareta baku fila, motor soke malu no kareta ho motor soke ema ne’ebe rezulta ema mate, estragus ba kareta, motor no rin eletrisidade.

“ Kazu ne’ebe akontese maioria iha kapital Dili, relasiona ho ne’e PNTL kontinua halo cek point no iha fim da semana ne’e Komandu PNTL munisipiu Dili prende mikrolet no taxi hamutuk 250 tanba halo movimentu la ho kondisaun hanesan dokumentus laiha, dokumentus invalidu, kondutor laiha karta kondusaun.

Alende ne’e PNTL mos prende motorizada hamutuk 116 tanba laiha lampu, espelu, la uza kapasete, kanu resin no laiha karta kondusaun .

Kazu hirak ne’e balu selu multa no balu prosesu ba Tribunal liu-liu kazu ne’ebe maka rezulta ema mate no kondutor laiha karta kondusaun, tanba kodigu Estrada hateten lori kareta ho motor seim karta kondusaun ne’e krime ho pena prijaun tinan 3. Media PNTL

Dili- Relasiona ho Eleisaun Prezidensial Polisia Nasional Timor-Leste (PNTL) sei halo alerta um (1) hahu loron 15 to’o 21 Marsu hodi antisipa seguransa antes eleisaun.

Segundu Komandante Jeral PNTL Komisariu Polisia Faustino da Costa hateten PNTL tenke garantia katak iha loron hakmatek antes Eleisaun Prezidensial laihatan atividade kampaña no lori atributu partidu politiku, Nia hato’o asuntu ba jornalista sira iha Kuartel Jeral PNTL Kaikoli Dili Segunda (13/03).

Komisariu Faustino haktuirtan katak relasiona ho ne’e membru PNTL husi Unidade no Komandu Jeral sei desloka ba munisipiu 12 iha loron 18 hodi koloka membru sira ne’e ba Komandu munisipiu hodi fo apoiu seguransa ba Eleisaun Prezidensial ne’ebe maka sei halao iha loron 20 Marsu.

Alende ne’e tuir orariu iha loron 14 STAE sei halo distribusaun material sensitivu ba Komandante Komandu PNTL munisipiu 13, Komandu munisipiu sira informadu no sira rasik sei mai simu sasan hirak ne’e. atu lori ba rai iha iha sira nia munisipiu. Media PNTL

Dili- Komandu Polisia Nasional Timor-Leste (PNTL) Informa situasaun seguransa kampaña Prezidensial ba Prezidente Republika (PR).

Komandante Jeral PNTL Komisariu Polisia Julio da Costa Hornay hateten enkontru mensal ho Prezidente Republika ho autoridade seguransa ohin hodi informa situasaun seguransa rai laran relasiona ho seguransa kampaña Prezidensial, Nia informa asuntu ne’e hafoin enkontru ho PR iha Palasiu Aitarak Laran Dili Kuarta (8/03)

Komandante Jeral haktuirtan katak kampaña Prezidensial ne’ebe maka hahu iha loron 3 to’o 7 Marsu horseik buat hotu lao ho diak so deit akontense insidente iha Raikotu wainhira militante Fretelin fila husi kampaña iha munisipiu Ermera.

Relasiona ho kazu Raikotu PNTL kaptura ona autor prinsipal hodi ba prosesu iha Tribunal no autor hetan medidas koasaun Aprezentasaun Periodika hodi hein prosesu julgamentu no autor nain hat (4) seluk hein mandadu kapturasaun husi Ministeriu Publiku.

Polisia mantein nafatin seguransa hodi nune’e kampaña Prezidensial bele lao ho diak tuir nia dalan nune’e lider politiku no militantes partidu sira mos intende no kompriende konduta ne’ebe maka partidu iha no kumpri regras hirak ne’ebe maka vigora.

Antes termina eis Komandante Centru Formasaun Polisia ne’e apela ba Lider partidu politiku sira atu fo informasaun nafatin ba militantes sira wainhira lao iha kampaña tenke mantein nafatin pojisaun no kumpri regras tranzitu karik motorista no pasajeiru sira viola maka Polisia prende no aplika sansaun tuir lei haruka. Media PNTL

Dili- Polisia Nasional Timor-Leste (PNTL) prende motorizada 199 tanba kanu resin, laiha sapa matrikula no la uza espelu

Segundu Komandante PNTL munisipiu Dili Superintendente Asistente Euclides Belo hateten iha Domingu 05 Marsu PNTL liu husi atividade cek point PNTL prende motorizada hamutuk 199 entre motor hirak ne’e 48 mak kanu resin no halo estrundu, hato’o asuntu ne’e iha Komandu PNTL munisipiu Dili Segunda (6/03).

Nia haktuirtan katak iha operasaun ne’e prende mos motorizada governu nian, motorizada balun ne’ebe maka laiha sapa matrikula, laiha espelu no la tuir kodigu Estrada. Motor nain hirak ne’ebe maka fila husi atividade kampaña Prezidensial iha munisipiu Liquica Polisia prende motorizada maibe fo fila atributu partidu ne’ebe maka sira uza tanba loron kampana nian

“ PNTL halo antisipasaun maximu ba atividade kampaña Prezidensial atu evita ema labele halo asaun brutal, Komandu PNTL munisipiu Dili koloka membru operasaun iha Eskuadra hat ho apoiu husi Polisia Unidade Espesial.”

Hafoin prende motorizada hirak ne’e tau hela iha Komandu PNTL munisipiu Dili no aplika sansaun tuir regras hirak ne’ebe maka vigora iha lei Kodigu Estrada nian tuir tabela infrasaun. Media PNTL

Dili- Polisia Nasional Timor-Leste (PNTL) no Falintil Forsa Defeza Timor-Leste (F-FDTL) sei halo seguransa koordenada hodi asegura prosesu Eleisaun Jeral tinan 2017 lao ho seguru.

Liu husi komferensia da emprensa hamutuk iha Kuartel Jeral PNTL Komandu PNTL no F-FDTL deklara katak instituisaun Seguransa no Defeza nudar instrumentu estadu nian sei halo servisu maximu no fo apoiu ba malu hodi asegura prosesu Eleisaun Jeral lao ho susesu.

Komandante Jeral PNTL Komisariu Polisia Julio da Costa Hornay hateten ami PNTL ho F-FDTL deside hodi kria seguransa em koordenada hodi apoiu malu asegura Eleisaun Jeral tinan 2017 (Eleisaun Prezidensial no Eleisaun Parlamentar) lao ho susesu.

Ezistensia PNTL ho F-FDTL atu toma responsabilidade hodi asegura seguransa maske forsa rua ne’e iha nia misaun keta-ketak PNTL konaba seguransa interna no F-FDTL seguransa externa maibe iha ami nia lei organika rasik mos hateten atu koopera malu iha servisu kuandu nesesita, no forsa rua ne’e implementa ona dala barak hodi rezolve problema nasaun nian.

Seguransa ba eleisaun ne’e maske em koordenada maibe PNTL maka prinsipal no infrenta direita hodi fo seguransa tantu kampaña no iha Sentru votasaun, tanba ne’e preparasaun ba seguransa eleisaun ne’e PNTL sei hatun nia efektivus tomak, komandu sei fo apoio efektivus ba reforsa komandu munisipiu hodi asegura eleisaun ne’e.

Iha perturbasaun ruma nebe maka Polisia labele atende maka Komandante Jeral PNTL sei husu apoiu ba F-FDTL.

Entretantu Xefe Estado Maior General F-FDTL Lere Anan Timur hateten F-FDTL no PNTL nudar instrumentu nasaun nian ba legalidade uza forsa kuandu nesesariu, maske misaun ketak-ketak maibe kompleta malu instituisaun rua ne’e nia knaar maka interven no reprime problema ruma ne’ebe mosu iha rai laran ou situasaun ruma ne’ebe kria instabilidade ba estadu, nasaun no povu.

Husu ba timor oan hotu atu iha responsabilidade hodi asegura eleisaun 2017 ne’e bele lao ho diak no iha ambiente nebe nakonu ho paz no dame nune ita timor oan hatudu dala ida tan ba mundu katak timor oan sira mos bele, maske iha difikuldade oin-oin maibe kestaun de responsabilidade, nasionalismu, patriotismu hodi asegura ita nia dignidade nudar nasaun independente, demokratiku nia folin laiha negosiasaun. Media PNTL

Dili, Komandu Polísia Nasional Timor Leste (PNTL) hala’o enkontru Jestaun Konsellu Projetu ho parseiru desenvolvimentu sira ne’ebe maka durante ne’e fó apoio mai PNTL.

Komandante Jerál PNTL Komisariu Julio da Costa Hornay iha intervensaun hateten Komandu agradese tebes ba presensa parseiru sira nian ne’ebe maka durante ne’e ajuda PNTL ba nia prosesu desenvolvimentu instituisaun ninian liu-liu ba United Nations Development Programme (UNDP).

“Instituisaun PNTL hetan apoio husi UNDP atu desenvolve kapasidade iha area jestaun no administrasaun hodi kompleta formas asistensia ne’ebe PNTL nesesita”, hateten Komandante Jerál PNTL iha salaun enkontru Kuartél Jerál sexta ne’e (25/02).

Komisariu Julio da Costa Hornay akresenta tan katak objetivu husi apoio ne’e maka atu garante katak matenek hirak ne’ebe parseiru sira transmite mai iha PNTL atu bele tau iha prátika. Programa UNDP ho parseiru sira seluk mai atu fó apoio no reforsa kapasidade PNTL hodi bele presta servisu ho kualidade ba povu Timor Leste.

“Progarama apoio UNDP ne’ebe iha durante ne’e tuir nesesidade PNTL duni no hala’o iha area hirak hanesan implementasaun no koordenasaun ba Planu Estrátegiku Desenvolvimentu PNTL nian, Teknologia no Jestaun ba Dadus, Aprovisionamentu, Jestaun Frotas ka Servisu MTO, Relasaun Públika, Apoio ba Jéneru, no mos Jestaun Rekursu Umanu”, salienta Komisariu Julio.

Komandante Jerál PNTL mós louva ho programa hirak ne’ebe maka parseiru sira oferese iha duni ninia rezultadu no hatudu duni vantagem ne’ebe diak mai iha PNTL.

Iha fatin hanesan UNDP Country Director Sr. Claudio Providas iha ninia intervensaun ba enkontru ne’e hateten parte UNDP agradese tebes ba servisu ne’ebe maka halo ho PNTL durante ne’e lao diak tebes.

“Servisu UN nian hanesan ita hotu hatene maka atu prioritize estrátegia ne’ebe maka define ona ba tempu naruk no dezeñu projetu ne’ebe maka eziste dadaun iha UNDP ho PNTL hodi haforsa governasaun no hare’e liu ba servisu atendimentu ne’ebe sai hanesan progranma UNDP nian ho PNTL”, hateten UNDP Country Director.

Partisipa iha enkontru ne’e parseiru sira hanesan Australia Federal Police (AFP), JICA, United State of America Embassy no representante Embaixada Nova Zelandia nian iha Timor Leste.

Media PNTL.  

Dili- Governu liu husi Ministeriu Interior halo ona planu atu monta kamera vidio iha kareta patrulamentu no operasional Polisia Nasional Timor-Leste (PNTL) hodi nune’e bele monitorija atuasaun iha baze.

Ministru Interior Longuinhos Monteiru hateten hare ba modernijasaun ba Informasaun no Teknolojia (IT) ohin loron permite atu kareta Polisia ne’ebe maka lao iha patrulamentu mos iha camera video iha kareta oin, hato’o asuntu ne’e iha deskursu serimonia inagurasaun sistema CCTV iha Kuartel Jeral PNTL Kaikoli Dili Kinta (23/02).

Nia haktuirtan katak kamera video hirak ne’e atu monitorija membru nia atuasaun iha baze no gravasaun hirak ne’e bele utilija hodi defende pojisaun polisia nian tanba dalabarak Polisia ne’ebe maka sai hanesan autor lei no ordem hetan fali akujasaun tanba sira nia asaun nune’e mos diak ba Komandante sira atu foti desijaun.

Ita nia mehi katak antes fulan Agostu kareta patrula polisia iha Dili tenke iha ona video kamera ida ne’e prioridade hodi justifika prezensa polisia nia empanamentu, regras iha ambitu siguransa interna no siguransa interna.

Ministeriu hare hela ida nee no sei halo akijisaun iha tempu besik se buat hotu lao diak antes fulan Agostu kamera ba kareta patrulamentu no operasional sei monta kamera video hodi halo gravasaun iha oras ne’ebe maka polisia sira sai halo intervensaun iha terrenu hot-hotu gravadu.

Entretantu Segundu Komandante PNTL munisipiu Dili Superintendente Asistente Euclides Belo hateten wainhira iha meius barak liu mka bele dezenvolve PNTL no sei fasil atu fo atendementu ba publiku liu-liu komunidade hodi garante estabilidade. Media PNTL

Dili- Atu fasilita vizilansia servisu Polisia Nasional Timor-Leste (PNTL) nian iha terenu governu Cina fo apoiu doasaun sistema CCTV ( Closed Circuit Television) hodi monitorija insidente no asitende iha kapital Dili.

Komandante Jeral PNTL Komisariu Polisia Julio da Costa Hornay hateten kamera video no sistema husi CCTV sai vantajem hodi bele hetan imajen sira nebe liga ho kontrola situasaun hanesan naok no asaltu ba sidadaun sira, asuntu ne’e hato’o iha serimonia inagura CCTV iha Kuartel Jeral Kaikoli Dili Kinta (23/02).

Komandante Jeral haktuirtan katak ho apoiu sistema CCTV bele kontribui ba kombate krimi, monitoriza asidente trafiku, situasaun nebe liga ho artes marsiais, rama ambon no monitoriza aktividade publika sidadaun sira nian hodi garante seguransa diak liu tan ba estabilidade sosial iha Timor-Leste.

“ CCTV iha nia gravasaun no hosi gravasaun ne ita bele hare fila-fali imajen no detekta kualker eventu no insidente nebe mosu iha tempu real bele konese nia kausa hodi bele ajuda seguransa atu halo prevensaun”.

Iha okajiaun ne’e Embaixador Cina ba Timor-Leste Liu Hongyang hateten governu Cina iha komitmentu boot atu fo asistensia ba Timor-Leste, ho sistema CCTV ida ne’e nudar ezemplu koperasaun iha setor seguransa nian entre nasaun rua no fiar katak ho sistema teknolojia ne’ebe modernu no avansadu sei fo vantajen ba seguransa publika iha kapital dili no fo seguru ba povu no nasaun.

Hafoin entrega CCTV hirak ne’e ba PNTL tekniku husi Kompania JTE Cina sei nafatin akompaña operdor sira hodi fo formasaun no halo manutensaun durante tinan tolu (3) nia laran.

Serimonia inagurasaun sistema CCTV ne’e partisipa husi Ministru Interior Longuinhos Monteiro, Ministru Defeza Cirilo Cristovão, Xefe Estadu Maior F-FFDTL Koronel Falur Rate Laek, Prezidente Komisaun B Parlamentu Nasional David Diaz Ximenes no ofisiais PNTL. Media PNTL

Dili- Ofisial Polisia Suku (OPS) nain 418 kompleta formasaun konaba Informasaun Teknolojia (IT), Sistema Eleitoral no Lei Eleitoral formasaun ne’e sai bukae ba sira hodi halao servisu iha terrenu.

Komandante Jeral PNTL Komisariu Polisia Julio da Costa Hornay hateten materia hirak ne’ebe maka OPS sira simu durante formasaun bele suporta servisu loro-loron iha suku hodi servi povu diak liutan, Nia hato’o asuntu ne’e iha serimonia enseramentu kursu ba OPS iha Centru Formasaun Polisia Comoro Dili Kuarta (22/02).

Komandante Jeral afirmatan katak nudar ain liman Komandu PNTL iha baze tenke halo servisu makaas hodi garante seguransa ba povu no nasaun no atinji suksesu instituisaun seguiransa ne’e.

Formasaun ba OPS nain 418 ne’e fahe grupu 7 ho material konaba Formasaun Baziku IT, Kaderneta, Introdusaun IMS, Sistema Eleitoral, No Lei Eleitoral formasaun ne’e halao liu husi kooperasaun servisu PNTL ho Comisaun Nasional Eleisaun (CNE) no Sekretariadu Tekniku Administrasaun Eleitoral (STAE) ho apoiu orsamentu husi parseru Polisia Nova Zelandia.

Membru OPS nain 20 resin seidauk tuir formasaun tanba partisipa hela kursu formasaun ba Sarjentu tanba ne’e Departamentu Polisia Comunitaria sei hare tempu no halo formasaun ba sira iha tempu tuir mai.

Relasiona ho preparasaun ba seguransa Eleisaun Jeral OPS halo sosialijasaun, aprosimasaun, no rekolla dadus informa ba Komandu Eskuadra hodi halo planu operasaun ba seguransa eleisaun.

Serimonia enseramentu ne’e kompleta ho entrega leptop ba OPS husi munisipiu 13 no partisipa husi Diretur Jeral CNE, Komandante CFP parseru TLPDP no Fundasaun Asia. Media PNTL

Dili- Timor-Leste Police Development Program (TLPDP) sei nafatin fo apoiu ba Polisia Nasional Timor-Leste (PNTL) bazeia ba programa prioridade tinan 2017 nian.

Segundu Komandante Jeral PNTL Komisariu Polisia Faustino da Costa hateten TLPDP nudar parseru PNTL nian tanba ne’e maka halo enkontru hamutuk ho Komandante Munisipiu no Unidade sira hodi identifika programa prioridade ba tinan 2017 ne’ebe maka presiza apoiu husi parseru sira, Komandante hato’o asuntu ne’e hafoin enkontru ho parseru TLPDP iha Kuartel Jeral PNTL Kaikoli Dili Sexta(17/02)

Haktuirtan katak Parseru sira nia anu fiscal Orsamentu hahu iha fulan Janeiru to’o Junhu no iha orsamentu ne’ebe preve atu nafatin apoia instituisaun PNTL.

TLPDP nudar parseru PNTL nian ne’ebe maka fo apoiu desde tinan 2004 to’o agora, durante ne’e TLPDP apoia ona PNTL hodi rehabilita Sela Detensaun iha Komandu munisipiu, instala fatin ba Unidade VPU, fo formasaun ba OPS, formasaun ba membrus Unidade Tranzitu no Investigasaun kona-ba uza Sistema Jestaun Insidente.

Iha okaziaun ne’e Komandante PNTL munisipiu Baucau Superintendente Xefe Jose da Costa lori Komandu PNTL nia naran agradese ba TLPDP ne’ebe maka durante ne’e apoia PNTL liu-liu Komandu PNTL munisipiu Baucau liu husi apoiu ekipamentu ba Servisu Informasaun Polisia (SIP) nomos apoiu formasaun ba Jender no apoiu ekipamentu ba Investigasaun. Media PNTL