Uncategorized

Dili, Komandu Polísia Nasional Timor Leste (PNTL) hala’o enkontru Jestaun Konsellu Projetu ho parseiru desenvolvimentu sira ne’ebe maka durante ne’e fó apoio mai PNTL.

Komandante Jerál PNTL Komisariu Julio da Costa Hornay iha intervensaun hateten Komandu agradese tebes ba presensa parseiru sira nian ne’ebe maka durante ne’e ajuda PNTL ba nia prosesu desenvolvimentu instituisaun ninian liu-liu ba United Nations Development Programme (UNDP).

“Instituisaun PNTL hetan apoio husi UNDP atu desenvolve kapasidade iha area jestaun no administrasaun hodi kompleta formas asistensia ne’ebe PNTL nesesita”, hateten Komandante Jerál PNTL iha salaun enkontru Kuartél Jerál sexta ne’e (25/02).

Komisariu Julio da Costa Hornay akresenta tan katak objetivu husi apoio ne’e maka atu garante katak matenek hirak ne’ebe parseiru sira transmite mai iha PNTL atu bele tau iha prátika. Programa UNDP ho parseiru sira seluk mai atu fó apoio no reforsa kapasidade PNTL hodi bele presta servisu ho kualidade ba povu Timor Leste.

“Progarama apoio UNDP ne’ebe iha durante ne’e tuir nesesidade PNTL duni no hala’o iha area hirak hanesan implementasaun no koordenasaun ba Planu Estrátegiku Desenvolvimentu PNTL nian, Teknologia no Jestaun ba Dadus, Aprovisionamentu, Jestaun Frotas ka Servisu MTO, Relasaun Públika, Apoio ba Jéneru, no mos Jestaun Rekursu Umanu”, salienta Komisariu Julio.

Komandante Jerál PNTL mós louva ho programa hirak ne’ebe maka parseiru sira oferese iha duni ninia rezultadu no hatudu duni vantagem ne’ebe diak mai iha PNTL.

Iha fatin hanesan UNDP Country Director Sr. Claudio Providas iha ninia intervensaun ba enkontru ne’e hateten parte UNDP agradese tebes ba servisu ne’ebe maka halo ho PNTL durante ne’e lao diak tebes.

“Servisu UN nian hanesan ita hotu hatene maka atu prioritize estrátegia ne’ebe maka define ona ba tempu naruk no dezeñu projetu ne’ebe maka eziste dadaun iha UNDP ho PNTL hodi haforsa governasaun no hare’e liu ba servisu atendimentu ne’ebe sai hanesan progranma UNDP nian ho PNTL”, hateten UNDP Country Director.

Partisipa iha enkontru ne’e parseiru sira hanesan Australia Federal Police (AFP), JICA, United State of America Embassy no representante Embaixada Nova Zelandia nian iha Timor Leste.

Media PNTL.  

Dili- Governu liu husi Ministeriu Interior halo ona planu atu monta kamera vidio iha kareta patrulamentu no operasional Polisia Nasional Timor-Leste (PNTL) hodi nune’e bele monitorija atuasaun iha baze.

Ministru Interior Longuinhos Monteiru hateten hare ba modernijasaun ba Informasaun no Teknolojia (IT) ohin loron permite atu kareta Polisia ne’ebe maka lao iha patrulamentu mos iha camera video iha kareta oin, hato’o asuntu ne’e iha deskursu serimonia inagurasaun sistema CCTV iha Kuartel Jeral PNTL Kaikoli Dili Kinta (23/02).

Nia haktuirtan katak kamera video hirak ne’e atu monitorija membru nia atuasaun iha baze no gravasaun hirak ne’e bele utilija hodi defende pojisaun polisia nian tanba dalabarak Polisia ne’ebe maka sai hanesan autor lei no ordem hetan fali akujasaun tanba sira nia asaun nune’e mos diak ba Komandante sira atu foti desijaun.

Ita nia mehi katak antes fulan Agostu kareta patrula polisia iha Dili tenke iha ona video kamera ida ne’e prioridade hodi justifika prezensa polisia nia empanamentu, regras iha ambitu siguransa interna no siguransa interna.

Ministeriu hare hela ida nee no sei halo akijisaun iha tempu besik se buat hotu lao diak antes fulan Agostu kamera ba kareta patrulamentu no operasional sei monta kamera video hodi halo gravasaun iha oras ne’ebe maka polisia sira sai halo intervensaun iha terrenu hot-hotu gravadu.

Entretantu Segundu Komandante PNTL munisipiu Dili Superintendente Asistente Euclides Belo hateten wainhira iha meius barak liu mka bele dezenvolve PNTL no sei fasil atu fo atendementu ba publiku liu-liu komunidade hodi garante estabilidade. Media PNTL

Dili- Atu fasilita vizilansia servisu Polisia Nasional Timor-Leste (PNTL) nian iha terenu governu Cina fo apoiu doasaun sistema CCTV ( Closed Circuit Television) hodi monitorija insidente no asitende iha kapital Dili.

Komandante Jeral PNTL Komisariu Polisia Julio da Costa Hornay hateten kamera video no sistema husi CCTV sai vantajem hodi bele hetan imajen sira nebe liga ho kontrola situasaun hanesan naok no asaltu ba sidadaun sira, asuntu ne’e hato’o iha serimonia inagura CCTV iha Kuartel Jeral Kaikoli Dili Kinta (23/02).

Komandante Jeral haktuirtan katak ho apoiu sistema CCTV bele kontribui ba kombate krimi, monitoriza asidente trafiku, situasaun nebe liga ho artes marsiais, rama ambon no monitoriza aktividade publika sidadaun sira nian hodi garante seguransa diak liu tan ba estabilidade sosial iha Timor-Leste.

“ CCTV iha nia gravasaun no hosi gravasaun ne ita bele hare fila-fali imajen no detekta kualker eventu no insidente nebe mosu iha tempu real bele konese nia kausa hodi bele ajuda seguransa atu halo prevensaun”.

Iha okajiaun ne’e Embaixador Cina ba Timor-Leste Liu Hongyang hateten governu Cina iha komitmentu boot atu fo asistensia ba Timor-Leste, ho sistema CCTV ida ne’e nudar ezemplu koperasaun iha setor seguransa nian entre nasaun rua no fiar katak ho sistema teknolojia ne’ebe modernu no avansadu sei fo vantajen ba seguransa publika iha kapital dili no fo seguru ba povu no nasaun.

Hafoin entrega CCTV hirak ne’e ba PNTL tekniku husi Kompania JTE Cina sei nafatin akompaña operdor sira hodi fo formasaun no halo manutensaun durante tinan tolu (3) nia laran.

Serimonia inagurasaun sistema CCTV ne’e partisipa husi Ministru Interior Longuinhos Monteiro, Ministru Defeza Cirilo Cristovão, Xefe Estadu Maior F-FFDTL Koronel Falur Rate Laek, Prezidente Komisaun B Parlamentu Nasional David Diaz Ximenes no ofisiais PNTL. Media PNTL

Dili- Ofisial Polisia Suku (OPS) nain 418 kompleta formasaun konaba Informasaun Teknolojia (IT), Sistema Eleitoral no Lei Eleitoral formasaun ne’e sai bukae ba sira hodi halao servisu iha terrenu.

Komandante Jeral PNTL Komisariu Polisia Julio da Costa Hornay hateten materia hirak ne’ebe maka OPS sira simu durante formasaun bele suporta servisu loro-loron iha suku hodi servi povu diak liutan, Nia hato’o asuntu ne’e iha serimonia enseramentu kursu ba OPS iha Centru Formasaun Polisia Comoro Dili Kuarta (22/02).

Komandante Jeral afirmatan katak nudar ain liman Komandu PNTL iha baze tenke halo servisu makaas hodi garante seguransa ba povu no nasaun no atinji suksesu instituisaun seguiransa ne’e.

Formasaun ba OPS nain 418 ne’e fahe grupu 7 ho material konaba Formasaun Baziku IT, Kaderneta, Introdusaun IMS, Sistema Eleitoral, No Lei Eleitoral formasaun ne’e halao liu husi kooperasaun servisu PNTL ho Comisaun Nasional Eleisaun (CNE) no Sekretariadu Tekniku Administrasaun Eleitoral (STAE) ho apoiu orsamentu husi parseru Polisia Nova Zelandia.

Membru OPS nain 20 resin seidauk tuir formasaun tanba partisipa hela kursu formasaun ba Sarjentu tanba ne’e Departamentu Polisia Comunitaria sei hare tempu no halo formasaun ba sira iha tempu tuir mai.

Relasiona ho preparasaun ba seguransa Eleisaun Jeral OPS halo sosialijasaun, aprosimasaun, no rekolla dadus informa ba Komandu Eskuadra hodi halo planu operasaun ba seguransa eleisaun.

Serimonia enseramentu ne’e kompleta ho entrega leptop ba OPS husi munisipiu 13 no partisipa husi Diretur Jeral CNE, Komandante CFP parseru TLPDP no Fundasaun Asia. Media PNTL

Dili- Timor-Leste Police Development Program (TLPDP) sei nafatin fo apoiu ba Polisia Nasional Timor-Leste (PNTL) bazeia ba programa prioridade tinan 2017 nian.

Segundu Komandante Jeral PNTL Komisariu Polisia Faustino da Costa hateten TLPDP nudar parseru PNTL nian tanba ne’e maka halo enkontru hamutuk ho Komandante Munisipiu no Unidade sira hodi identifika programa prioridade ba tinan 2017 ne’ebe maka presiza apoiu husi parseru sira, Komandante hato’o asuntu ne’e hafoin enkontru ho parseru TLPDP iha Kuartel Jeral PNTL Kaikoli Dili Sexta(17/02)

Haktuirtan katak Parseru sira nia anu fiscal Orsamentu hahu iha fulan Janeiru to’o Junhu no iha orsamentu ne’ebe preve atu nafatin apoia instituisaun PNTL.

TLPDP nudar parseru PNTL nian ne’ebe maka fo apoiu desde tinan 2004 to’o agora, durante ne’e TLPDP apoia ona PNTL hodi rehabilita Sela Detensaun iha Komandu munisipiu, instala fatin ba Unidade VPU, fo formasaun ba OPS, formasaun ba membrus Unidade Tranzitu no Investigasaun kona-ba uza Sistema Jestaun Insidente.

Iha okaziaun ne’e Komandante PNTL munisipiu Baucau Superintendente Xefe Jose da Costa lori Komandu PNTL nia naran agradese ba TLPDP ne’ebe maka durante ne’e apoia PNTL liu-liu Komandu PNTL munisipiu Baucau liu husi apoiu ekipamentu ba Servisu Informasaun Polisia (SIP) nomos apoiu formasaun ba Jender no apoiu ekipamentu ba Investigasaun. Media PNTL

Dili- Unidade Patrulamentu Fronteira (UPF) sei reforsa vizilansia seguransa iha fronteira terrestre hodi asegura seguransa ba Eleisaun Jeral.

Komandante UPF Seperintendente Xefe João Belo dos Reis hateten UPF hametin siguransa liu husi cek point hodi detekta karik iha ema ruma halo movimentu tama sai ho intensaun atu estraga ita nia seguransa no preparasaun ba eleisaun Jeral, Nia hato’o asuntu ne’e ba jornalista sira iha Kuartel Jeral PNTL Kaikoli Dili (17/02).

Nia afirmatan katak UPF koopera ho Komandu PNTL munispiu, F-FDTL, TNI ho POLRI hodi fahe informasaun ba malu atu nune’e karik iha movimentu ruma ne’ebe diskumfia bele estraga ita nia seguransa ami bele koopera ba malu.

“ Komandu UPF apela nia membru sira atu asegura seguransa iha lina fronteira liu-liu iha prosesu Eleisaun Jeral (Prezidensial no Parlamentar) hodi asegura sentru votasaun ne’ebe maka iha lina fronteira”.

Durante ne’e populasaun sira lamenta ho informasaun balu ne’ebe espalla iha fronteira katak ema tama sai illegal no uza armas maibe hau klarifika katak informasaun hirak ne’e lalos informasaun hirak ne’e falsu no hanesan ru moris deit.

Tanba ne’e hau husu ba populasaun sira ne’ebe hela iha fronteira atu lalika fiar rumoris, karik hatene ka koñese ema ruma ne’ebe maka iha indikasaun atu estraga estabilidade nasaun tenke informa kedas ba UPF, Komandu PNTL munisipiu no postu polisia ne’ebe besik nune’e PNTL bele atua.

Antes termina Komandante UPF ne’e fo observasaun jeral katak movimentu ema no sasan iha fronteira lao normal maske iha Indonezia halao hela eleisaun governador maibe koperasaun ho TNI no POLRI lao diak tebes tanba ne’e ami hamutuk asegura seguransa. Media PNTL

Dili- Polisia Nasional Timor-Leste (PNTL) sei koloka membru Corpu Seguransa Pessoal (CSP) Unidade Espesial Polisia hodi fo eskoltu ba kandidatu Prezidente Republika (PR) ba periodu 2017-2022 durante prosesu kampaña.

Segundu Komandante Jeral PNTL Komisariu Polisia Faustino da Costa hateten tuir regulamentu ne’ebe iha iha loron 02 Marsu PNTL koloka nia pessoal sira ba kandidatu PR sira antes halo kampaña iha loron 03 Marsu, Nia hato’o asuntu ba jornalista sira Iha Kuartel Jeral PNTL Kaikoli Dili Sexta (20/01)

Komisariu ne’e haktuirtan katak situasaun atual entre kandidatu hirak ne’e balu iha ona eskoltu tanba ne’e ba sira ne’ebe seidauk iha ami koloka eskoltu nain rua (2) ba kada kandidatu.

Iha Sexta-Feira loron 17 Tribunal Rekursu fo sai ona numeru sorteiu ba kandidatu sira.

Bazeia ba kalendariu ne’ebe maka fo sai husi STAE katak iha fulan Marsu loron 3 to’o 17 hanesan periodu kampaña ba kandidatu PR, iha tempu kampaña PNTL sei fornese eskoltu ba kandidatu hirak ne’e tuir lei haruka. Media PNTL

Dili- Governu liu husi Ministeriu Interior aloka ona Orsamentu Jeral Estadu tinan 2017 ho montante $ milaun rua hodi sosa ekipamentu Anti Raiot ba PNTL hodi halo servisu seguransa.

Segundu Komandante Jeral PNTL Komisariu Polisia Faustino da Costa hateten Ministeriu Interior halo ona akordu ho kompania Norinco husi Cina hodi sosa ekipamentus ba PNTL no sasan hirak ne’e sei to’o Timor iha semana daruak fulan Marsu, Nia hato’o asuntu ne’e hafoin halo enkontru semanal ho Komandante Unidade no Sefe Departamentu PNTL iha Kuartel Jeral Kaikoli Dili (13/02).

Komisariu Faustino haktuirtan katak ekipamentus hirak ne’ebe maka sosa hanesan sasan Anti Raiot ne’ebe kompostu husi Kapasete, STIK, Gas Lakrimojenio, ekipamentus anti bala no seluktan hamutuk kontentor 10 resin.

Tuir lei bainhira Kontentor hirak ne’e tama iha PORTIL tenke selu taxa agora se kontentor 10 resin oinsa maka atu selu taxa tanba ne’e iha enkontru semanal ohin ami deskuti konaba ida ne’e no oinsa hato’o karta ba governu atu hare asuntu ne’e no halo mos proposta hodi husu ba kompania atu bele selu taxa hodi bele fasilita prosesu hatama sasan.

Ekipamentus hirak ne’e sei distribui ba Komandu PNTL munisipiu 13 no Unidade hirak ne’ebe maka sei apoia ba seguransa Eleisaun Jeral. Media PNTL

Dili- Governu sei la fo toleransia ba membru Polisia Nasional Timor-Leste (PNTL) ne’ebe maka involve iha atividade partidu politiku tanba PNTL nia knaar prinsipal maka fo seguransa ba povu no nasaun.

Primeiru Ministru Rui Maria de Araujo hateten laiha toleransia ba membru PNTL sira ne’ebe maka involve iha atividade politika durante prosesu Eleisaun Jeral tanba nudar forsa seguransa PNTL tenke firme hodi mantein lei no ordem, Nia hato’o asuntu ne’e iha serimonia Inspesaun Parada Forsa Seguransa Eleisaun iha Kuartel Jeral PNTL Kaikoli (13/02).

Xefe Governu ne’e haktuirtan katak Laiha toleransia ba membru PNTL ne’ebe la disiplina no la hatudu profesionalismu iha aktu demokratiku inportante ida ne’e, PNTL hanesan instituisaun estadu nian tenke garante seguransa no ordem publika ho profesionalismu no disiplina

“ Eleisaun Jeral tinan 2017 tenke suksesu hodi hatudu maturidade povu no nasaun Timor-Leste, tenke hatudu katak maske Timor-Leste foin maka atu selebra tinan 15 maibe iha maturidade sufsiente atu abansa hanesan estadu no nasaun”.

Serimonia Inspesaun Parada Forsa Seguransa Eleisaun ne’e hodi hatudu preparasaun PNTL ho fasilidade ne’ebe maka iha atu fo seguransa durante prosesu Eleisaun Prezidensial no Parlamental. Hafoin parada Primeiru Ministru halo enkontru ho komandante Munisipiu no ofisiais superior PNTL hodi hato’o aspirasaun no preparasaun PNTL ba Eleisaun Jeral.

Serimonia Inspesaun Parada Forsa Seguransa Eleisaun iha Kuartel Jeral prezidi husi primeiru Ministru no akompaña husi Ministru Interior, Komandante Jeral ho Segundu Komandante Jeral no partisipa husi Unidade Espesial Polisia(UEP), Unidade Patrulamentu Fronteira (UPF), Unidade Polisia Maritima (UPM), Bombeirus, Formasaun Sarjentu, SIP, Komandante PNTL husi munisipiu 13 Ofisiais Superior sira. Media PNTL

Dili- Atu Prevene asidente trafiku ba motorizada maka kompania HEINEKEN entrega kapasete 300 no material seluktan ba Polisia Nasional Timor-Leste (PNTL) Unidade Tranzitu Seguransa Rodovariu hodi utilija ba halo sosializasaun.

General Manajer kompania HEINEKEN Vinay Mathur hateten ami suporta PNTL hodi oferese fasilidade seguru atu konduz motor iha Estrada publiku nudar parte husi atividade sosial ne’ebe maka kompania halo tanba seguru ba vida inportante, Nia hato’o asuntu ne’e liu husi intervensaun iha serimonia entrega kapasete no fasilidade sasan seluktan iha Kuartel jeral PNTL Kaikoli Dili (10/02).

Nia haktuitan katak ajudu ida ne’e hanesan faze inisiu no iha tempu tuir mai HEINEKEN sei nafatin suporta Unidade Tranzitu iha programa sosializasaun atu publiku bele lori motor/kareta ho seguru.

Iha okajiaun ne’e Komandante Jeral PNTL Komisariu Polisia Julio da Costa Hornay hato’o agradese ba kompania HEINEKEN ne’ebe hanoin atu halo prevensaun ba asidente trafiku liu husi ajudu ida ne’e no espera katak koperasaun ida ne’e diak no lao ba oin nafatin

Ekipamentus hirak ne’ebe maka Kompania Heineken entrega hanesan Kapasete 300, Leptop 1, Kamera Digital 1, kadernu 1000, lapijera 1000 no kamizola ho letra “Mai Ita hmutuk Prevene Asidente trafiku “ hamutuk 1000. Apoiu ida ne’e hanesan jestu ida hodi kontribui ba redusaun mortalidade tanba asidente trafiku liu husi sosializasaun no edukasaun tranzitu ba estudade sira no ba publiku. Media PNTL