Uncategorized

Iha loron 2 Febreiru tinan 2017 Secretária Estado dos Negosius Estrageiros e Cooperação de Portugal, Dra. Teresa Ribeiro, ba Centro Formação da Policia, ne’ebe públikamente mérito GNR iha Timor-Leste no obra ne’ebe halao tia ona iha nasaun ida ne’e.

Iha Centru Formasaun Policia mos halao hela kursu formasaun Sarjentu ho apoiu husi GNR bazeia ba akordu ne’ebe maka asina tia ona husi instituisaun rua ne’e.

Hahu iha tinan 2009 GNR apoia PNTL iha area formasaun liu husi protokolu ida ne’ebe asina iha tinan 2011. Alende ne’e halaomos rekrutamentu no selesaun ba kursu formasaun ajente no kursu formasaun Sarjentus.

Liu husi kooperasaun ida ne’e forma ona ajente Polisia Nasional Timor-Leste nain 1006 (Rihun ida neen) liu husi kursu 4 ne’ebe maka halao tia ona.

Ho apoiu GNR nian iha semana daruak tinan 2016 halao ona kursu dahuluk nian ba konkursu admisun kursu formasaun Sarjentus ho prezensa husi membru Polisia husi nasaun CPLP nomos kursu ordem publika iha unidade Espesial de Policia.

Delegasaun ne’e akompaña husi Embaixador postugal, Diretor Instituto Camões no ofisial Ligasaun Ministeriu Administrasaun Interna iha Dili

Iha vizita ne’e komitiva simu ho Formatura no halao surumutu hodi aprezenta servisu CFP nian husi Komandante CFP Superintendente Arquimino Ramos no Aprezentasaun kooperasaun servisu GNR no CFP.

Dili- Membru PNTL nain 3800 preparadu atu fo seguransa ba sentru votasaun 690 iha teritoriu Timor-Leste laran tomak durante Eleisaun Prezidensial no Parlamentar.

Segundu Komandante Jeral PNTL Komisariu Polisia Faustino da Costa hateten Membru PNTL nain 3800 preparadu atu koloka ba sentru votasaun hamutuk 690 resin kolokasaun membru iha Sentru Votasaun bazeia ba numeru votatentes no potensia amiasa ba konflitu, Nia hato’o asuntu ne’e hafoin Briefing Seguransa iha Kuartel Jeral PNTL Kaikoli Dili (31/01).

Komisariu Faustino haktuirtan katak PNTL mos iha Forsa Rezerva no Unidade Espesial hodi servisu movel nune’e wainhira mosu problema ruma forsa rezerva iha atu responde alende ne’e sei koloktan Unidade Especial hodi fo seguransa ba Eleisaun iha munisipiu Baucau, iha parte rai klaran Aileu, Ainaro no Same sei koloka minimu peltaun ida no Maliana hodi reforsa parte Suai.

Iha prosesu preparasaun PNTL identifika sentru votasaun ne’ebe maka nia votantes barak liu, potensia amiasa boot ba konflitu, no sentru votasaun ne’ebe maka difisil asesu ba transporte no komunikasaun atu define hodi koloka nia membrus seguransa. Media PNTL

Dili- Polisia Nasional Timor-Leste (PNTL) to’o agora seidauk simu lista kandidatura Prezidente Republika (PR) ne’ebe maka ofisialmente rejista iha Tribunal Rekursu.

Segundu Komandante Jeral PNTL Komisariu Polisia Faustino da Costa hateten to’o agora PNTL seidauk hatene lolos ema nain hira maka kandidata aan ba Prezidente Republika ba periode tinan 2017-2022 hodi konkore iha Eleisaun Prezidensial ne’ebe maka sei halao iha loron 20 marsu tinan 2017, Nia hato’o asuntu ne’e hafoin Briefing Seguransa iha Kuartel Jeral PNTL Kaikoli Dili (31/01).

Komisariu ne’e haktuirtan katak to’o agora sei iha kompetensia Tribunal Rekursu no Comisaun Nasional Eleisoens nian no ofisialmente foin iha kandidatu nain rua maka rejistu iha Tribunal Rekursu.

Bazeia ba kalendariu ne’ebe maka fo sai husi STAE katak iha fulan Fevereiru loron 19 to’o 21 STAE sei taka aplikasaun ba kandidatura PR no iha fulan Marsu loron 3 to’o 17 hanesan periodu kampaña ba kandidatu PR, iha tempu kampaña PNTL sei fornese eskoltu ba kandidatu hirak ne’e tuir lei haruka. Media PNTL

PNTL Garantia Konflitu Sei Menus

Dili- Konselu Ministru foin lalais ne’e aprova ona proposta lei ne’ebe maka aprezenta husi Ministeriu Interior atu kriminalija atividade Arte Marsiais, projetu lei ne’e haruka ona ba Komisaun A no B Parlamentu Nasional hodi hare no aprezenta ba meza Parlamentu Nasional (PN) hodi halo diskusaun no aprova.

Segundu Komandante Jeral PNTL Komisariu Polisia Faustino da Costa hateten bainhira PN aprova lei ne’e antes kampana ba Eleisaun Prezidensial no Parlamentar maka iha garantia katak sei laihatan movimentu arte marsiais no rama ambon iha teritoriu Timor-Leste, Nia hato’o asuntu ne’e hafoin Briefing Seguransa iha Kuartel Jeral PNTL Kaikoli Dili (31/01).

Komisariu Faustino haktuirtan katak lei ne’e sei kriminalija ema ne’ebe maka lori no uza rama ambon ho amiasa kadeia tinan tolu, uza atributu arte marsiais kadeia tinan tolu, satan tuir trenu ou treinador sei hetan pena prijaun tinan tolu.

lei ne’e aplika ba arte Marsiais ne’ebe maka governu hasai rejolusaun hodi taka hanesan PSHT, IKS, Korka no Sete-Sete.

PNTL aprezenta ona situasaun ne’e ba Prezidente Republika no prezidente Republika hein hela lei ne’e bainhira PN lori ba Prezidente Republika atu promulga.

 Dili- Komandu Polisia Nasional Timor-Leste (PNTL) halo security briefing hamutuk ho adidu seguransa no defeza husi konsuladu no embaxada iha Timor-Leste hodi informa situasaun seguransa no preparasaun Eleisaun Jeral.

Segundu Komandante Jeral PNTL Komisariu Polisia Faustino da Costa hateten liu husi security breafing ne’e atu informa ba embaixada sira nia adidu atu hatene situasaun seguransa lolos iha Timor-Leste hodi prevene informasaun falsu husi fontes ne’ebe la klaru, Nia hato’o asuntu ne’e hafoin enkontru iha Kuartel Jeral PNTL Kaikoli Dili (31/01).

Komisariu ne’e haktuirtan katak Komandu PNTL informa situasaun real ba emabaixada hotu nia adidu sira atu hatene situasaun lolos iha timor no antisipa ba Eleisaun Jeral.

Iha sesaun briefing nian Komandante Komandu Operasaun aprezenta servisu ne’ebe komandu PNTL halo hodi asegura eleisaun mai.

Akontesementu asalta malu, rama ambon no arte marsiais sai prekupasaun tanba ne’e iha intervensaun komandante Jeral aprezenta katak arte mrsiais no rama ambon komesa redus ona liu-liu formasaun ba OPS sira atu kordena direta ho lideransa Komunitaria sira no antisipasaun saida maka PNTL halo.

Security Briefing bad ala rua ne’e partisipa husi adidiu seguransa husi Embaixada Indonezia, Filipina, Portugal, Japaun, Korea, Cina, Brazil, Malaysia, brunai Darusalasam Uniaun Europeia, AFP, IOM, UNDSS no seluktan. Media PNTL

Dili, relasiona ho eleisaun Prezidente ne’ebe sei hala’o iha tempu badak, Komandu Operasaun Polísia Nasional Timor Leste (PNTL) halo enkontru Preparativu hodi fahe Planu Operasaun ba iha Komandante PNTL munisipiu sira.

“Iha apresentasaun ne’ebe sei apresenta husi komandu Operasional, husu ba Komandante Munisipiu sira maka tenke apár ho planu Diretiva Operasional ba kampaña prezidensial”,tenik Segundu Komandante Jerál PNTL iha salaun enkontru Kuartél Jerál kaikoli.

Komisariu Faustino da Costa akresenta tan katak hare’e ba data eleisaun nian ne’ebe monu iha tempu udan presija hare’e mós kondisaun Estrada sira iha area rural, husu ba Komandante munisipiu sira atu hare’e planu tentativa operasional iha realizasaun eleisaun prezidensial tinan 2017.

“Husu mós ba Komandante sira atu hare’e ho dadus kona-ba kada sentru votasaun, votante sira maka sei vota loron iha eleisaun prezidensial nian, tanba ne’e ba Komandante sira ne’ebe maka seidauk iha dadus, husu tulun ba STAE munisipiu nian”, salienta Komisariu Faustino da Costa.

Entretantu, Komandante Operasaun Nasional Superintendente Xefe Henrique da Costa iha sesaun apresentasaun hateten enkontru refere halo hodi hato’o ba Komandante Munisipiu sira kona-ba Ordem Preparatorio Eleisaun Prezidensial loron 20 Marsu 2017.

“Ita nia enkkontru ohin ne’e atu hato’o Ordem Preparatorio husi parte ekipa traballu operasaun ninian ba hala’o ona rekoñesimentu terrenu iha munisipiu 13 no husi ida ne’e ita foti informasaun balun iha ne’e, atu ita bele elabora hamutuk planu operasaun ba eleisaun prezidensial 2017 nian”, tenik Superintendente Xefe Henrique da Costa.

Media PNTL.

Dili- Primeiru Ministru (PM) Rui Maria de Araujo halo vizita mai Kuartel Jeral hodi enkontru ho Ministru Interior no Komandu Jeral PNTL hodi deskuti konaba promosaun Ofisiais no alterasaun lei organika PNTL.

Ministru Interior Longinhos Monteiro hateten iha vizita ne’e PM husu esklaresementu kona-ba rejime promosaun Polisia Nasional Timor-Leste (PNTL) oinsa organiza no jere rejime promosaun ba Ofisiais no alterasaun lei organika PNTL, Nia hato’o asuntu ne’e hafoin enkontru ho Primeiru Ministru iha Kuartel Jeral PNTL Sexta (30/01).

Eis Komandante Jeral PNTL ne’e haktuirtan katak iha enkontru ne’e PM fo orintasaun politika oinsa maka Ministeriu Interior hare atu iha tempu besik despaxu hodi define vagas no postu para halo promosaun ba ofisiais sira ne’ebe priense kriteria.

Alende ne’e Ministeriu Interior sei hare no aprejenta lalais pakote alterasaun lei organika PNTL, regulamentu disiplinar PNTL no estatutu Polisia nian atu hetan konsiderasaun husi Konselu Ministru hodi hadia sistema foun ne’ebe adekuadu ho situasaun real iha PNTL.

MI sei prepara despaxu iha loron Kuarta ou Kinta (1 ou 2/ Fevereiru) hafoin sei lori mai Komandu Jeral hodi hare prosedimentu ne’ebe atu priense dadauk para iha loron 27 Marsu aniversariu PNTL ba dala 17 ita bele halo ona promosaun nune’e priense vaga ne’ebe ita presiza nune’e strutura iha PNTL labele vacum. Media PNTL

Dili, kinta-feira ne’e (26/01) Komandante Jerál Polísia Nasional Timor Leste (PNTL) Komisariu Julio da Costa akompaña husi Segundu Komandante Jerál Komisariu Faustino da Costa hasoru malu ho Prezidente Repúblika (PR) hodi hato’o situasaun seguransa rai laran.

Komandante Jerál PNTL hafoin enkontu ba jornalista sira hateten enkontru mensal halo hodi hato’o ba PR situasaun aktual no mós preparasaun situasaun ba eleisaun jerál no parlamentar.

“Enkontru ne’e hato’o ba PR kona-ba situasaun jerál iha munisipiu 13 inklui Dili, katak situasaun lao kontroladu mesmu akontese problema balun maibé PNTL pronto protidaun atu bele atúa no prosesa”, tenik Komandante Jerál PNTL iha Palasio Prezidente Aitarak Laran, Dili.

Komisariu Julio da Costa akresenta tan katak iha enkotru mensal ne’e aprezenta mós ba PR kona-ba Planu seguransa PNTL nian ba iha eleisaun Prezidensial no Parlamentar nian ne’ebe sei hala’o iha fulan hirak tuir mai.

“Preparasaun ba eleisaun, PNTL preparadu atu halo seguransa ba eleisaun Prezidensial no mós Parlamentar, ita sei toma medida regras ne’ebe forte iha prosesu kampaña atu ema hotu-hotu bele respeita ema seluk nia direitu karik no ami sei kordena ho Sekretariadu Tékniku Administrasaun Eleitoral (STAE) no Comissão Nacional das Eleições (CNE) atu kalendariu kampaña nian ita bele entende malu”, salienta Komandante Jerál PNTL.

Situasaun Seguransa iha Fronteira Kontroladu

Relasiona ho eleisaun Prezidensial no mós Parlamentar ne’ebe sei hala’o iha tempu badak, seguransa iha fronteira Komandu PNTL sei hasa’e volume membru nian atu bele asegura iha loron eleisaun.

“Seguransa iha fronteira orient aba Komandu Munisipiu no UPF atu aumenta movimentu partullamentu hodi asegura ita nia fronteira iha loron eleisaun, no servisu hamutuk ho forsa seguransa sira nian”, hateten Komisariu Julio da Costa Hornay.

Media PNTL.  

Dili, Komandu Polísia Nasional Timor Leste (PNTL) entre loron 11 to’o loron 21 fulan Janeiru rezista kazu asidente hamutuk 29, entre kazu hirak ne’e Munisipiu Dili rezista ass liu hamutuk 17 kazu asidente.

Segundu Komandante Jerál PNTL Komisariu Faustino da Costa iha segunda ne’e (23/01) iha Kuartél Jerál hateten kazu hirak ne’ebe maka rezista, Munisipiu Dili ho nia númeru ne’ebe maka ass hodi rezulta ema ida mate.

“Husi kazu Asidente 17 iha munisipiu Dili rezulta ema ida maka mate no prosesu lao hela tuir kodigu Estrada ne’ebe maka vigora iha ita nia rai no parte vitima no ema ne’ebe maka konduz viatura husi asidente ne’e tenke rezista to’o iha Tribunal”, tenik Segundu Komandante Jerál PNTL.

Kontrola Viatura Estadu Iha Loron Feriadu

Komisariu Faustino da Costa iha biban entrevista ho jornalista sira hateten durante tinan 2016 PNTL hamutuk ho ekipa hosi diresaun Patrimoniu Estadu konsege prende karreta Estadu hamutuk 124 no motorizada 156 ne’ebe maka sirkula iha loron feriadu no sábadu ho domingu.

“Motorista sira ne’ebe maka lori karreta no motor laiha autorizasaun, laos em servisu tanba loron ferias no mós fim de semana sira responsabiliza tenke ba selu iha banku tuir despasu ne’ebe maka iha”, hateten Segundu Komandante Jerál PNTL.

Komisariu Polísia ne’e afirma tan katak antes Natal iha tinan kotuk (2016) Komandu PNTL hamutuk ho Ministériu Transporte no Telekomunikasaun halo avizu ida katak ba se deit maka utiliza transporte governu ida ne’ebe sem autorizasaun liu-liu iha loron ferias sábadu no domingu, sei detein iha sela tanba iha mós kooperasaun ho Comissão Anti Corrupção (CAC).

“Atu evita labele akontese hanesan iha fulan kotuk antes Natal ne’ebe maka konsege prende funsionariu nain 2, tanba ne’e husu ba kada diresaun atu sasan hirak ne’e iha fim de semana tau iha nia fatin hodi ita kumpre regra ne’ebe iha”, apela Segundu Komandante Jerál PNTL.

Media PNTL.

Covalima- Komandu PNTL munisipiu Covalima rejista kazu agresaun fizika no kazu violensia domestika ass liu durante tinan 2016.

Komandante Komandu PNTL munisipiu Covalima Superintendente Eugenio Perreira hateten Durante tinan 2016 PNTL munisipiu Covalima rejista kazu agresaun fizika hamutuk 62 no kazu violensia Domestika hamutuk 36 no kazu transaksaun illegal hamutuk 15, nia hato’o asuntu ne’e iha enkontru hamutuk ho Ministru Interior no Segundu Komandante Jeral PNTL iha Kuartel komandu PNTL munisipiu Covalima foin lalais ne’e.

Superintendente ne’e haktuirtan katak alende kazu tolu iha leten iha mos kazu seluk ne’ebe maka PNTL rezista no prosesa maka hanesan kazu abuzu sexual ba vitima minoridade hamutuk 4, Violasaun Sexual 3, Homesidiu 3, kazu dezovidiensia 1, jogu illegal 1, suisidiu 1, kazu violasaun domisiliariu 1, furtu simples 4, burla agravadu 2, no ultrazu ba simbolu nasional bandeira RDTL ne’ebe Cineza uza bandeira RDTL hodi falun isin no tesi fuuk kazu hirak ne’e rejista ona iha Ministeriu Publiku.

Kazu hirak ne’e mosu tanba kauza husi fator social, ekonomika, edukasaun, dezenvolvimentu, politika no seguransa.

Hare husi fator social sei iha komunidade ne’ebe sei moris iha situasaun dezempregu liu-liu ba joven sira ne’ebe remata estudu iha nivel sekundaria no la konsege kontinua ba universidade, familia balu laiha kondisaun sufsiente atu halao sira nia moris ho diak iha ambitu familia nian, ladun iha kontrola husi inan aman ba oan sira no direitu atu sai nain ba rai sai mos hanesan kauza ida ba konflitu tanba hadau malu rai ne’ebe laos deit hanesan problema pessoal maibe hamosu mos provokasaun ne’ebe bele involve grupu iha suku ne’ebe nia risku boot ba situasaun seguransa.

Komandu PNTL munisipiu Covalima asumi responsabilidade ba seguransa iha area juridisaun munisipiu Covalima hodi garante estabilidade no seguransa ba sidadaun ne’ebe hela iha Covalima. Media PNTL