Uncategorized

Covalima- Ministru Interior halo enkontru ho diresaun servisu tutela iha Ministeriu Interior(MI) hodi halo avaliasaun servisu.

Ministru Interior Dr. Longuinhos Monteiru iha nia intervensaun husu ba diresaun servisu tutela MI tomak hanesan PNTL, Protesaun Sivil, Bombeiros, Diresaun Nasional Prevensaun konflitu iha munisipiu Covalima tenke halo kordenasaun servisu metin nafatin, Nia hato’o asuntu ne’e iha surumutu hamutuk ho Komandu PNTL munisipiu Covalima iha Kuartel PNTL munisipiu Covalima.

Eis komandante Jeral PNTL ne’e haktuirtan katak wainhira komandu munisipiu Covalima iha atividade ruma konvida mos diresaun tutela iha MI sira atu akompana no bele partila atividade no responsabilidade hodi suporta komandu PNTL nia misaun ruma karik halao.

Husu atu iha dezintendementu iha koperasaun no kordenasaun servisu entre linas ministeriais liu-liu tutela Ministeriu Interior nian no husu atu mantein nafatin relasaun diak ho administrasaun municipal no autoridade local sira.

Iha enkontru ne’e Komandante Komandu PNTL munisipiu Covalima Superintendente Eugenio Pereira aprejenta relatoriu servisu seguransa munisipiu Covalima ba Ministru Interior, Segundu Komandante Jeral PNTL no director sira ne’ebe tutela iha Ministeriu Interior. Media PNTL

Segundu Komandante Jerál Polísia Nasional Timor Leste (PNTL) akompaña husi Komandante Operasaun Nasional, Komandante Polísia Komunitaria no amo Kapelaun PNTL iha loron Tersa feira ne’e (24/01) hala’o audensia ho Amo Bispu Dioseze Dili Dom Virgilho do Carmo da Silva hodi husu apoio hodi haklaken ba sarani Katólika hotu atu kontribui ba seguransa, paz no estabilidade iha eleisaun Presidensial no Parlamentar. Iha biban ida ne’e mós husu disponibilidade amo Bispu nian atu prezidi misa ba Aniversáriu Polísia Nasional Timor Leste ba XVII.

Ermera- Polisia Nasional Timor-Leste (PNTL) no populasaun munisipiu Ermera tenke servisu hamutuk no koopera ba balu hodi asegura seguransa Eleisaun Jeral 2017 iha munisipiu Ermera lao ho hakmatek no seguru.

Komandante Jeral PNTL Komisariu Polisia Julio da Costa Hornay hateten PNTL ho populasaun sira tenke servisu hamutuk hodi asegura lalaok Eleisaun Jeral ho diak hodi hatudu katak ita mesak bele asegura ita nia eleisaun, Nia hato’o asuntu ne’e iha Enkontru Konselu Seguransa Munisipal iha Kuartel PNTL munisipiu Ermera.

Komisariu Julio haktuirtan katak Servisu boot ida ba Forsa Seguransa no Defeza atu asegura eleisaun ne’e lao ho diak, ita hotu iha esperansa, tanba ne’e hau husu ba PNTL iha munisipiu Ermera liu-liu OPS sira atu hamutuk ho autoridade lokal, veteranus no joventude sira atu koopera ba malu hodi asegura eleisaun ne’e.

“Hau husu PNTL liu-liu OPS sira atu servisu no sakrifika aan iha prosesu eleisaun, no ba joven sira atu kuidadu aan iha tempu kampaña nune’e la hakilar tun sae no gas motor ba mai tanba wainhira mosu asidente kanek ou mate inan aman no familia maka terus no hasai gastu.”

Ita hotu iha dever no konsiensia katak seguransa, estabilidade no paz ba nasaun inportante ba ita atu nune’e buat hotu lao diak, inan aman ba toos, ku’u kafe no faan e halao servisu hodi sustenta ita nia moris.

Iha okajiaun ne’e Prezidente autoridade munisipiu Ermera Jose Martinho Soares hateten ekipa STAE munisipiu Ermera prontu ona atu fo apoiu ba Eleisaun no hein deit ordem husi nasional mai atu halo rekrutamentu ba ofisiais sira ne’ebe atu fo apoiu ba eleisaun iha nivel suku no aldeia ou iha sentru votasaun.

Autoridade munisipal halo koordenasaun servisu ne’ebe diak ho instituisaun hotu ne’ebe maka ejisti iha munisipiu Ermera liu-liu polisia ho autoridade lokal.

Ermera- Konselu Seguransa Munisipal (KSM) Ermera halo enkontru ho Konselu Polisia Komunitaria (KPK) no Ofisial Polisia Suku (OPS) hodi prepara atividade ba tinan 2017

Diretur Departamentu Polisia Komunitaria Superintendente Asistente Antonio da Luz hateten KSM nia servisu atu akumula informasaun ne’ebe mak husi KPK no komunidade konaba problema sadia deit maka komunidade enfrenta hanesan problema seguransa no problema sosial seluk nune’e liu husi enkontru KPK bele rezolve asuntu hirak ne’e, Nia hato’o asuntu ne’e iha Enkontru Konselu Seguransa Munisipal iha Kuartel PNTL munisipiu Ermera.

Komandante da Luz haktuirtan katak enkontru membru KSM Ermera ho autoridade lokal, Xefe de Suku, Komandante Eskuadra no OPS sira hanesan faze inisiu tama ba tinan 2017 oinsa maka sira bele prepara atividade hodi responde ba Eleisaun Jeral nomos atividade seluk ne’ebe maka halao iha komunidade.

Xefe Suku Poetete Postu administrativu Ermera Felisberto das Neves hateten postu Ermera iha suku Poetete no Remarhei estabelese KPK iha 2014 to’o agora Xefe suku ho OPS sira halao servisu ho diak liu husi kordenasaun no koperasaun diak no wainhira mosu problema iha komunidade nia leet maka OPS ho autoridade lokal rezolve hamutuk ho parte sira ne’ebe maka hasoru problema.

Manera resolve problema iha Polisia Komunitaria uja sistema PARA ( Peskiza, Analiza, Responde no halo Avaliasaun ) sistema ne’e maka OPS sira uza hodi resolve problema ne’ebe maka akontese iha suku.

Iha prosesu resolve problema fahe ba kategoria rua Krime no Sivil, PNTL no autoridade komunitaria sir abele resolve probela sivil bai-bain hanesan istori malu no hadau malu rai maibe labele resolve kazu krime tanba ne’e kazu krime tenke relata ba Ministeriu Publiku.

KSM iha nivel munisipiu nia prezidente Konselu maka Komandante munisipiu no vice maka Prezidente Autoridade munisipiu, KPK iha nivel suku no Xefe Suku maka sai hanesan Xefe KPK no sub Xefe maka OPS sira.

Enkontru KSM munisipiu Ermera prezidi husi Komandante munisipiu Ermera Superintendente Natercia Martins akompaña husi Diretur Departamentu Polisia komunitaria, parseiru The Asia Foundation, Polisia Nova Zelandia no ho prezensa Komandante Jeral PNTL hodi fo motivasaun ba Komandu PNTL munisipiu Ermera atu halao servisu makaas liutan. Media PNTL

Dili- Komandu Polisia Nasional Timor-Leste (PNTL) husu komunidade Kaikoli ne’ebe maka afetadu ba futuru konstrusaun Kuatel Jeral PNTL atu koopera nune’e bele realiza konstrusaun

Segundu Komandante Jeral PNTL Komisariu Polisia Faustino da Costa hateten konstrusaun Kuartel jeral PNTL nudar nesesidade ida ba PNTL tanba too oras ne’e Komandu Jeral sei utilija nafatin edifisiu ne’ebe maka tuan ona, Nia hato’o asuntu ne’e ba jornalista iha iha Kuartel Jeral PNTL Kaikoli Dili (16/01).

Komisariu ne’e haktuirtan katak Konselu Ministru aprova katak tinan 2017 presiza halo Kuartel PNTL no preve ona orsamentu tanba ne’e PNTL nafatin kordena ho ministeriu relevante atu nune’e bele hamutuk ho autoridade lokal para halo enkontru ho komunidade afetadu hodi hetan solusaun .

“Husu Komunidade sira atu koopera tanba Komandu PNTL presija infrastrutura atu atende no responde nesesidade pesoal PNTL nian tanba kuaje Komandu Munisipiu sira iha ona konstrusaun Kuartel foun maibe Komandu Jeral to’o ohin loron sei uza nafatin uma antigu,” Komisariu Faustino husu.

Konstrusaun Kuartel Jeral foun ne’e prosesu ida ne’ebe naruk desde tinan 2012 iha tinan 2014 PNTL tau osan maibe la konsege realiza prosesu ida ne’e tanba ne’e iha tinan 2015 osan ne’e fila ba kaixa estadu no iha tinan 2016 PNTL nafatin buka dalan oi-oin oinsa atu bele hari ona Kuartel Jeral PNTL.

Komunidade uma kain 21 maka afetadu husi numeru ida ne’e to’o ohin loron iha xefe familia 7 maka aprezenta ona dokumentus mai Komandu PNTL no asina ona akordu katak sira atu husik fatin ne’e maibe familia uma kain 14 maka seidauk aseta tanba ne’e Komandu PNTL liga nafatin ho Ministeriu tutela no Ministeriu kompetente oinsa prosesu konstinuasaun hodi hari Kuartel PNTL. Media PNTL

Dili- Atu garante seguransa ba Eleisaun Jeral Komandu Jeral Polisia Nasional Timor-Leste (PNTL) servisu hamutuk ho Sekretariadu Tekniku Administrasaun Eleitoral (STAE) no Comisaun Nasional Eleitoral (CNE) hodi fo formasaun lei ba OPS.

Komandante Komandu Administrasaun Superintendente Xefe Mateus Fernandes hateten Formasaun ba Ofisial Polisia Suku (OPS ) ne’e halao entre Polisia, CNE no STAE hodi kompriende regras eleitoral nomos prosesu eleisaun atu nune’e OPS sira bele responde no atende ho diak, Nia hato’o asuntu ne’e iha serimonia enserasauntu formasaun ba OPS iha Centru Formasaun Polisia Comoro Dili (14/01).

Komandante Mateus haktuirtan katak OPS sai hanesan lina primeiru ba seguransa ne’ebe lor-loron hamutuk ho komunidade no autoridade lokal maka sira sei koopera hamutuk hodi hare oinsa maka bele produs buat ruma liu-liu prosesu eleisaun bele lao diak no garantia seguransa atu ema hotu bele goja sira nia direitu demokratiku ho diak.

“Atu garante seguransa Eleisaun Jeral lao diak maka povu tenke koopera ho Polisia tanba eleisaun ne’e inportante ba timor oan tomak tanba ne’e ita hotu tenke servisu hamutuk hodi asegura seguransa lao hakmatek no paz”.

OPS ida-idak presija identifika saida deit maka sai amiasa no perturba prosesu Eleisaun, potensia amiasa saida maka lor-loron sira hare iha sub distritu no suku depois sira identifika potensia amiasa hirak ne’e no prepara asaun Polisia nian maka asaun preventiva no represiva nune’e bele minimija konflitus durante prosesu Eleisaun.

Formasaun ne’ebe maka halao durante semana ida ne‘e foka liu konaba Funsaun Polisia ligadu ho servisu iha terrenu , aspetu social ekonomiku hodi hare oinsa sira bele halao servisu iha baze ho diak liutan.

Formasaun ne’e partisipa husi OPS munisipiu Bobonaro no Baucau no sei kontinua ba OPS sira iha munisipiu 11 seluk. Media PNTL

Dili, Komandante Jerál Polísia Nasional Timor Leste (PNTL) Komisariu Julio da Costa Hornay akompaña husi Segundu Komandante Jerál Komisariu Faustino da Costa hasoru malu ho Prezidente Repúblika (PR) hodi hato’o situasaun seguransa iha teritoriu.

Komandante Jerál PNTL hafoin enkontru ba jornalista sira hateten kestaun ne’ebe maka hato’o ba PR maka asuntu servisu seguransa nian, asidente, insidente ne’ebe maka akontese iha teritoriu laran tomak.

“Kazu sira ne’ebe maka durante ne’e akontese iha ita nia rai ho situasaun jerál ne’ebe maka inklui mós aprezenta servisu polísia nian durante ne’e”, tenik Komandante Jerál PNTL.

Komisariu Julio da Costa Hornay akresenta liu tan katak, iha enkontru ne’e hato’o mós preparasaun planu servisu PNTL nian atu apoio seguransa eleisaun jerál ne’ebe maka sei hala’o iha tinan ida ne’e.

PNTL Pronto Ezekuta Resolusaun Armas Brankas (Rama Ambon)

Entretantu relasiona ho Dekretu Lei ne’ebe maka foin dadaun hetan aprovasaun husi Konsellu Ministru nian atu kriminiliza uza Armas Brankas, Komisariu Julio esplika, “PNTL hein Lei ne’e, kuandu Lei ne’e aprovadu ona no públika ona iha Jornal da República, Polísia pronto atu bele ezekuta”.

Komandante Jerál esplika liu tan katak, iha Lei ba Armas Brankas ne’e maka foin bele hatene saida deit maka konsidera hanesan Armas Brankas maka foin Polísia bele implementa tuir saida maka determina ona iha Lei refere.

Media PNTL.  

Dili- Komandu Polisia Nasional Timor-Leste (PNTL) entrega Laptop 442 ba Ofisial Polisia Suku (OPS) atu nune’e bele fasilita sira nia servisu ho diak liutan.

Komandante Jeral PNTL Komisariu Polisia Julio da Costa Hornay hateten ho apoiu governu komandu PNTL prepara hodi fasilita OPS sira nia servisu iha baze tanba OPS sira ne’e servisu individual iha komunidade nia leet tanba ne’e Komandu fasilita sira ho transporte no ekipamentu IT atu nune’e sira bele utilija ba servisu no halo relatoriu konaba servisu ne’ebe maka sira halao, hato’o asuntu ne’e iha serimonia entrega laptop nne’ebe maka halao iha Centru Formasaun Polisia Comoro Dili (11/01).

Komisariu Julio haktuirtan katak antes antrega laptop ne’e ba OPS sira seksaun IT hanorin membru hirak ne’e durante loron tolu konaba oinsa atu utilija.

Laptop 442 ne’ebe maka entrega ba OPS iha suku 442 iha teritoriu Timor-Leste ne’e sosa ho Orsamentu Jeral Estadu(OJE) tinan 2016 no espera katak ho fasilidade ne’ebe maka Komandu fasilita bele suporta sira iha baze hodi halo servisu ho diak no relata mai Komandu. Media PNTL

Dili- Polisia Nasional Timor-Leste (PNTL) halao planu seguransa ba Eleisaun Prezidensial no Parlamentar ne’ebe maka sei halao iha tinan ne’e atu nune’e bele asegura seguransa ba eventu boot rua ne’e.

Segundu Komandante Jeral PNTL Komisariu Polisia Faustino da Costa hateten atu garante prosesu Eleisaun Jeral maka oras ne’e daudaun Komandu PNTL halo enkontru ho komandante kunisipiu sira hodi identifika dejafiu no problema ne’ebe munisipiu sira infrenta no buka solusaun hamutuk, Komandante hato’o asuntu ne’e ba Jornalista sira iha kuartel jeral PNTL Kaikoli Dili (10/01).

Komisariu ne’e haktuitan katak manera seluk ne’ebe maka ami halo faze preparasaun liu husi identifikasaun geografia iha munisipiu ida-idak hodi relata partidu ne’ebe maka ejisti, identifika suku no aldeia ne’ebe maka difisil asesu ba transporte tanba eleisaun jeral nebe sei halao iha fulan Marsu ne’e tempu udan tanba ne’e PNTL antisipa hodi hare kapasidade PNTL nian atu asegura eleisaun ne’e.

Eleisaun Jeral fo oportunidade ba povu Timor-Leste atu ejerse sira nia direitu, knaar no dever ba atividade demokrasia ne’ebe maka halao tanba ne’e liu husi kordenasaun ho CNE no STAE atu bele fasilita informasaun oinsa maka PNTL bele prepara ninia aan didiak hodi responde situasaun ruma bainhira akontese. Media PNTL

Dili- Iha tinan 2016 PNTL rejista insidente (kazu krime) hamutuk rihun haat hatnulu resin sia (4049) maioria kazu Ofensas Integridade Fizika (baku malu) hamutuk 962 no kazu Violensia Domestika.

Segundu Komandante Jeral PNTL Komisariu Polisia Faustino da Costa hateten husi total kazu hirak ne’ebe maka PNTL rejista hato’o ba Ministreriu Publiku kazu rihun rua resin no kazu balu vitima no suspetu sira halo mediasaun no dame malu hafoin sira taka kazu nee Nia hato’o asuntu ne’e ba jornalista sira iha Kuartel Jeral PNTL Kaikoli Dili, loron Tersa (10/01).

Komisariu ne’e haktuirtan katak alende kazu krime PNTL mos rejista kazu asidente trafiku hamutuk 1741 ne’ebe rezulta ema nain 71 mate no balu kanek todan.

Kazu asidente trafiku ne’ebe akontese ass liu iha kapital Dili hamutuk kazu 1600 tanba fator neglijensia humanu no kazu krime ne’ebe akontese numeru kiik liu iha munisipiu Manufahi tanba durante tinan 2016 rejista deit kazu 48. Media PNTL